საქართველოს პრემიერ-მინისტრმა ირაკლი ღარიბაშვილმა, ევროპული საბჭოს პრეზიდენტმა ჰერმან ვან რომპეიმ და ევროკავშირის პრეზიდენტმა ჟოზე მანუელ ბაროზომ ხელი მოაწერეს საქართველოსა და ევროკავშირს შორის ასოცირების ხელშეკრულებას !

პრემიერ-მინისტრი ევროპული საბჭოს შენობაში იმყოფება. რამდენიმე წუთში საქართველოსა და ევროკავშირს შორის ასოცირების ხელშეკრულების ხელმოწერა დაიწყება.

დღევანდელი დღით კიდევ მრავალი წლის მანძილზე ვიამაყებთ,-ამ სიტყვებით მიმართა საქართველოს პრემიერ-მინისტრმა ირაკლი ღარიბაშვილმა ევროპის მოედანზე შეკრებილ მოქალაქეებს, სადაც ევროკავშირთან ასოცირების ხელშეკრულების ხელმოწერისადმი მიძღვნილი საზეიმო კონცერტი გაიმართა. პრემიერმა ასოცირების ხელშეკრულების ხელმოწერის ისტორიული დღე მიულოცა საქართველოს მოქალაქეებს, აფხაზ და ოს ძმებს. "მივესალმები ჩვენს აფხაზ და ოს ძმებს, გილოცავთ ამ ისტორიულ დღეს. ეს არის დღე, რითაც მრავალი წლის მანძილზე ვიამაყებთ. ეს არის გამარჯვება, რომელიც ეკუთვნის ჩვენს დიდ წინაპრებს, დიდ ილიას. ეს არის საქმე, რომელიც მათი წამოწყებულია. ეს არის ოცნება, რომელიც რეალობად იქცა, მინდა მოგილოცოთ და გითხრათ, რომ ეს არის დასაწყისი ძალიან დიდი გამარჯვებისა. ჩვენ, ქართველი ხალხი, ჩვენი უნიკალურობით, დიდი კულტურით და ტრადიციებით უნდა შევიდეთ დიდ ევროპულ ოჯახში. გპირდებით, რომ ჩვენი ტრადიციებით და კულტურით შევალთ დიდ ევროპულ ოჯახში. გილოცავთ კიდევ ერთხელ და მინდა გითხრათ, რომ ეს არის დასაწყისი ძალიან დიდი წარმატებებისა",-განაცხადა პრემიერმა სიტყვით გამოსვლისას. საზეიმო კონცერტს ევროპის მოედანზე ირაკლი ღარიბაშვილი მეუღლესთან ერთად დაესწრო. ღონისძიებაზე შეკრებილ მოქალაქეებს ასევე სიტყვით მიმართეს სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ, პრეზიდენტმა გიორგი მარგველაშვილმა და პარლამენტის თავმჯდომარე დავით უსუფაშვილმა.

ასოცირების ხელმოწერის შესახებ და საქართველოს სამომავლო გეგმებზე ისაუბრა საქართველოს პრემიერ-მინისტრმა "ევრონიუსისთვის" მიცემულ ინტერვიუში.ირაკლი ღარიბაშვილის ინტერვიუ "ევრონიუსის" ეთერში დღეს გავა.

დღეს ბრიუსელში ხელი მოეწერა საქართველო-ევროკავშირს შორის ასოცირების შეთანხმებას. ხელმოწერის ცერემონიის დასრულების შემდეგ, საქართველოს პრემიერ-მინისტრმა ირაკლი ღარიბაშვილმა პრესკონფერენცია გამართა და 27 ივნისის თარიღის ისტორიულ მნიშვნელობაზე ისაუბრა. მისი განცხადებით, ევროკავშირთან ასოცირების შეთანხმების ხელშეკრულება არის ქვეყანაში მნიშვნელოვანი ცვლილებების საფუძველი, რომელთა მიზანიც უკეთესი მომავლის უზრუნველყოფაა. “საქართველოსთვის კარი უკვე გაღებულია, დღევანდელი ხელმოწერა ამის ნათელი დემონსტრაციაა. ეს რის ჩვენი ძირითადი სამოქმედო გეგმა ევროპეიზაციისა, მოდერნიზების გენერალური გეგმა. ეს დამოკიდებულია რეფორმებზე და ჩვენ ვიკისრეთ რეფორმების განხორციელების ვალდებულება. რამდენად სწრაფად განვახორციელებთ რეფორმებს, რომ დავაკმაყოფილოთ მოთხოვნები. ეს დამოკიდებულია ჩვენზე, შეიძლება ვთქვათ 5-10 წელიწადი, ეს დამოკიდებულია იმ პროგრესზე, რომელსაც საქართველო მიაღწევს. ჩვენ ამ რეფორმების განხორციელების ვალდებულება ავიღეთ, რომ მაქსიმალურად ახლოს მივიდეთ ევროკავშირის სტანდარტებთან. ძალისხმევას არ დავიშურებთ, რომ გავხდეთ ევროკავშირის სრულფასოვანი წევრი,”-აღნიშნა ირაკლი ღარიბაშვილმა. მისივე თქმით, განსაკუთრებული მნიშვნელობა ენიჭება ღრმა და ყოვლისმომცველი თავისუფალი ვაჭრობის სივრცეს, რომელიც ასოცირების შეთანხმების განუყოფელი ნაწილია. “ღრმა და ყოვლისმომცველი თავისუფალი ვაჭრობის სივრცე ქართულ პროდუქციასა და მომსახურებას გზას გაუხსნის მსოფლიოში ყველაზე დიდი და დინამიკურად მზარდი ბაზრისაკენ, ყოველგვარი ტარიფებისა და კვოტების გარეშე. ევროპული სტანდარტების, კერძოდ კი, ხარისხის სტანდარტების დანერგვა კიდევ უფრო გააუმჯობესებს ბიზნესისა და საინვესტიციო გარემოს ჩვენს ქვეყანაში, რაც საბოლოოდ მოიტანს მეტ ინვესტიციებს, ახალ სამუშაო ადგილებს და დადებით როლს ითამაშებს სოციალური კეთილდღეობის ამაღლებაში”,-განაცხადა პრემიერმა. საქართველოს მთავრობის მეთაურის განმარტებით, ასოცირების შეთანხმების ხელმოწერა არ არის საქართელოს საბოლოო მიზანი, ის მხოლოდ ევროპისკენ მიმავალი გამოწვევებით აღსავსე გზის დასაწყისია. “ჩვენ მზად ვართ, მივყვეთ ამ გზას და ევროკავშირთან ერთად უზრუნველვყოთ ჩვენი მომავალი ევროპულ ოჯახში,”-აღნიშნა ირაკლი ღარიბაშვილმა. მანვე ოკუპირებულ ტერიტორიებთან დაკავშირებით ჟურნალისტის მიერ დასმულ შეკითხვას უპასუხა და განაცხადა, რომ საქართველოს მთავრობის სურვილია ოს და აფხაზ ძმებს გაუზიაროს სარგებელი, რის შესაძლებლობასაც ევროკავშირთან ასოცირების ხელშეკრულება იძლევა. “რაც შეეხება ოკუპირებულ ტერიტორიებს, ვფიქრობ, ძალიან ნათლად განვაცხადე, გავუგზავნე ჩვენს ძმებსა და დებს ნათელი მესიჯები, რომ კარი ღიაა, მათაც ექნებათ შესაძლებლობა, მიიღონ სარგებელი ასოცირების ხელშეკრულებისგან, თავისუფალი სავაჭრო ზონისა და გამარტივებული სავიზო რეჟიმისგან. ვფიქრობ, ეს არის ძალიან ნათელი გზავნილი, რომ ხელშეკრულება დიდ შესაძლებლობებს აძლევს მათაც და ჩვენი სურვილია, გავუზიაროთ მათ ეს სარგებელი,”-განაცხადა პრემიერ-მინისტრმა.

ასოცირების ხელშეკრულების ხელმოწერასთან დაკავშირებით თბილისში, ევროპის მოედნის მიმდებარე ტერიტორიაზე საქართველოსა და ევროკავშირის დროშები გამოფინეს. სამზადისი დასასრულს უახლოვდება ევროპის მოედანზე, სადაც დღეს 20:30 საათზე გრანდიოზული კონცერტი გაიმართება. კონცერტს შეუერთდება ბრიუსელიდან დაბრუნებული საქართველოს სამთავრობო დელეგაცია პრემიერ-მინისტრ ირაკლი ღარიბაშვილის ხელმძღვანელობით.

დღეს საქართველო დიდ ნაბიჯს დგამს თავისუფალი ევროპისკენ! ვულოცავ ამ დღეს მთელ საქართველოს! -ამგვარი მილოცვით დაიწყო სიტყვით გამოსვლა საქართველოს პრემიერ-მინისტრმა ირაკლი ღარიბაშვილმა ასოცირების ხელშეკრულების ხელმოწერის ცერემონიაზე. მან უმნიშვნელოვანესი და გადამწყვეტი დღე უწოდა 27 ივნისის თარიღს და აღნიშნა, რომ საქართველო მზად არის იყოს მშვიდობისა და თანამშრომლობის გარანტი რეგიონში. "დღეს ჩემი სამშობლოს ისტორიაში იწერება ახალი დიდი თარიღი, რომელიც ჩვენ იმედს გვისახავს და რომლითაც ჩვენი შთამომავლობა იამაყებს. სწორედ ამ დღის დადგომაზე ფიქრსა და ზრუნვას შეალია ცხოვრება არაერთმა თაობამ. ამ დღეს დიდხანს ელოდა ჩემი ქვეყანა. მე ბედნიერი ვარ, რომ სწორედ ჩვენს თაობას ხვდა წილად პატივი, სინამდვილედ ექცია ჩვენი წინაპრების ოცნება,"-განაცხადა ირაკლი ღარიბაშვილმა. მისივე თქმით, დღეს საქართველოს ეძლევა ისტორიული შანსი, დაუბრუნდეს თავის ბუნებრივ გარემოს - ევროპას, მის პოლიტიკურ, ეკონომიკურ, სოციალურ და კულტურულ სივრცეს. სიტყვით გამოსვლისას საქართველოს მთავრობის მეთაურმა აფხაზ და ოს ძმებსაც მიმართა და მათ ევროპასთან დაახლოების შესაძლებლობა შესთავაზა. "ჩემო თანამემამულენო, ჩვენ ყველანი ერთი ქვეყნის შვილები ვართ! თქვენ, დღეიდან, ჩვენთან ერთად, ამ პროცესის თანაზიარი ხართ! თქვენ გეძლევათ უნიკალური შესაძლებლობა, ისარგებლოთ ყველა იმ სიკეთით, რაც ევროპასთან დაახლოებას მოაქვს,"-აღნიშნა პრემიერმა. მანვე ყურადღება გაამახვილა საქართველოსა და ევროკავშირის ურთიერთობაში დაწყებულ ახალი ეტაპზე და განაცხადა, რომ ასოცირების შეთანხმებით საქართველო იღებს ვალდებულებას ქვეყანაში ეტაპობრივად დანერგოს ევროპული პოლიტიკური, ეკონომიკური, სოციალური და სამართლებრივი სტანდარტები.   ირაკლი ღარიბაშვილმა გულწრფელად მიულოცა უკრაინელ და მოლდოველ ხალხებს ასოცირების შეთანხმების გაფორმება ევროკავშირთან და მათ წარმატება უსურვა. "ვფიქრობ, სიმბოლურია, რომ სამივე ქვეყანა ერთ დღეს ვაწერთ ხელს ამ უმნიშვნელოვანეს ხელშეკრულებას, რომელიც არა მარტო ევროკავშირთან დაგვაახლოებს, არამედ რეგიონში დემოკრატიის გაძლიერებასა და სტაბილურობას შეუწყობს ხელს,"-განაცხადა საქართველოს პრემიერ-მინისტრმა ევროკავშირთან ასოცირების შეთანხმების ხელშეკრულების ხელმოწერის ცერემონიაზე. ევროპის საბჭოს პრეზიდენტის ჰერმან ვან რომპუის განმარტებით, ევროკავშირის საბოლოო მიზანი საქართველოს, მოლდოვასა და უკრაინის სრულფასოვანი გაწევრიანება და მათი ევროპულ ოჯახში დამკვიდრებაა. "ევროკავშირი თქვენ გვერდით დგას, გაქვთ ჩვენი მხარდაჭერა, სოლიდარობა, ტერიტორიული მთლიანობის აღიარება. უფრო ძლიერი კავშირები დააკავშირებს ჩვენს ქვეყნებს და სრულიად ევროპულ კონტინენტს განვითარებას მოუტანს და სტიმულს მისცემს,"-განაცხადა ჰერმან ვან რომპუიმ. თავის მხრივ, ისტორიული დღე უწოდა 27 ივნისის თარიღს ევროკომისიის პრეზიდენტმა ჟოზე მანუელ ბაროზომ. "დღევანდელი დღე არის სტრატეგიული მიზნის დასაწყისი, რომ ეს ქვეყნები გახდნენ ინტეგრირებული პოლიტიკურად და ეკონომიკურად ევროკავშირთან. სირთულეების მიუხედავად, ვაპირებთ შეთანხმების ხელმოწერას უკრაინასთან, მოდლოვასთან და საქართველოსთან. ამას უდიდესი მნიშვნელობა აქვს არა მხოლოდ ამ ქვეყნებისთვის, რომლებსაც სურთ კანონის უზენაესობის, რეფორმებისა და ღია საზოგადოების კონსოლიდირება, არამედ მთელი ევრიპისთვისაც", - აღნიშნა ბაროზომ. დღეს, 2014 წლის 27 ივნისს, ბრიუსელში ხელი მოეწერა საქართველო-ევროკავშირის შორის ასოცირების შეთანხმებას, ღრმა და ყოვლისმომცველი თავისუფალი ვაჭრობის სივრცის ჩათვლით. დოკუმენტს საქართველოს მხრიდან ხელი მოაწერა საქართველოს პრემიერ-მინისტრმა ირაკლი ღარიბაშვილმა, ხოლო ევროკავშირის მხრიდან - ევროკომისიის პრეზიდენტმა ჟოზე მანუელ ბაროზომ და ევროკავშირის საბჭოს პრეზიდენტმა ჰერმან ვან რომპუიმ. ხელშეკრულებაზე ხელი ასევე ხელი მოაწერეს ევროკავშირის 28 ქვეყნის მეთაურებმა. ხელმოწერის ცერემონიას დაესწრო საქართველოს დელეგაცია, რომლის შემადგენლობაშიც შედიან: საგარეო საქმეთა მინისტრი მაია ფანჯიკიძე, ევროპულ და ევროატლანტიკურ სტრუქტურებში ინტერგაციის საკითხებში სახელმწიფო მინისტრი ალექსი პეტრიაშვილი, ეკონომიკისა და მდგრადი განვითარების მინისტრი გიორგი კვირიკაშვილი და იუსტიციის მინისტრი თეა წულუკიანი და მთავრობის ადმინისტრაციის უფროსის მოადგილე ნინო კობახიძე.

„ჩვენ არჩევნების მეორე ტურს გახსნილად ვაცხადებთ და ვაგრძელებთ ბრძოლას საბოლოო გამარჯვებამდე. ჩვენი მიზანი თბილისის კომფორტულ ქალაქად ქცევა და თბილისელების კეთილდღეობის მნიშვნელოვნად გაზრდაა“ - განაცხადა დავით ნარმანიამ დღეს გამართულ ბრიფინგზე.  თბილისის მერობის კანდიდატი სამ ძირითად მიმართულებას გამოყოფს: ➩ 1. დაუბრუნდეს თბილისს ისტორიული ფუნქცია და იქცეს იგი რეგიონის კულტურულ-ეკონომიკურ ცენტრად;  ➩ 2. გადაიქცეს თბილისი ჯანსაღ და კომფორტულ ქალაქად;  ➩ 3. შეიქმნას სოლიდარული საზოგადოება და თითოეულ ოჯახში შევიდეს კეთილდღეობა;

ასოცირების ხელშეკრულების ხელმოწერამდე რამდენიმე საათი რჩება. საქართველოს დელეგაცია პრემიერ-მინისტრის ხელმძღვანელობით უკვე ბელგიის სამეფოში იმყოფება. ბრიუსელი საქართველოსთან ასოცირების ხელშეკრულების ხელმოწერას საზეიმოდ გაფორმებული ხვდება. ლუქსემბურგის მოედანზე გამოფენილია საქართველოსა და ევროკავშირის დროშები. დამთვალიერებელს შეუძლია საქართველოს შესახებ ინფორმაცია საინფორმაციო ბუკლეტებიდან შეიტყოს. ევროკავშირი საქართველოსთან ასოცირების ხელშეკრულების ხელმოწერას დიდ მნიშვნელობას ანიჭებს, რის შესახებაც ევროკავშირის ლიდერებმა უკვე არაერთი განცხადება გააკეთეს. ევროკომისიის პრეზიდენტმა ჟოზე მანუელ ბაროზომ საქართველოსთან ასოცირების ხელშეკრულების ხელმოწერას მთელი ევროპისთვის ისტორიული ნაბიჯი უწოდა. სამზადისი დასასრულს უახლოვდება ევროკომისიაშიც, სადაც ხვალ, თბილისის დროით 11:00 საათზე ასოცირების შეთანხმების ხელმოწერის ცერემონია გაიმართება. ხელშეკრულებას ხელს მოაწერენ საქართველოს პრემიერ-მინისტრი ირაკლი ღარიბაშვილი, ევროკომისიის პრეზიდენტი ჟოზე მანუელ ბაროზო, ევროპის საბჭოს პრეზიდენტი ჰერმან ვან რომპუი და ევროკავშირის წევრი ქვეყნების პირველი პირები. საქართველოს დელეგაცია პრემიერ-მინისტრ ირაკლი ღარიბაშვილის ხელმძღვანელობით ბელგიის სამეფოს დღეს ეწვია. მთავრობა ბრიუსელში ჩაიტანს ქართველი ხალხის მთავარ გზავნილს, რომლითაც კიდევ ერთხელ დასტურდება, რომ საქართველოს ევროპული არჩევანი ურყევია.

    დღეს დილიდან,  საბურთალოს რაიონის ქუჩებში  გამოჩნდა   „ქართული ოცნების“ სახელით  გაკრული  განცხადება, რომლითაც თითქოსდა „ქართული ოცნება“  მსურველებს სთავაზობს,  სასწრაფო და გადაუდებელი ოპერაციის საჭიროების შემთხვევაში, დაუკავშირდნენ განცხადებაში მითითებულ ნომრებზე. განცხადებაში არ არის დაკონკრეტებული, რა ტიპის დახმარებას სთავაზობენ მსურველებს. აღნიშნულთან დაკავშირებით გვსურს  განვაცხადოთ, რომ „ქართული ოცნება“ მითითებულ განცხადებასთან არავითარ კავშირში არ არის. სავარაუდოდ, მსგავსი იაფფასიანი ხრიკებით, არჩევნების მეორე ტურის წინ ვიღაცას მოსახლეობის შეცდომაში  შეყვანა და  „ქართული ოცნების“ დისკრედიტაცია სურს. მივმართავთ მოქალაქეებს, ქალაქის ქუჩებში მსგავსი განცხადების ნახვის შემთხვევაში, დაუკავშირდნენ კოალიცია „ქართული ოცნების“ რაიონულ შტაბებს. ამასთან, მოვუწოდებთ შესაბამის ორგანოებს, შეისწავლონ აღნიშნული განცხადების წარმომავლობა.

„ნაციონალური მოძრაობა“  არ იშლის ჩატარებული არჩევნების დისკრედიტაციის მცდელობას.   გიგი უგულავას განცხადება, თითქოს ხელისუფლება ზეწოლას ახდენს ცესკო-ზე არჩევნების მეორე ტურის 12 ივლისს დანიშვნასთან დაკავშირებით, არის აბსოლუტური აბსურდი.   2014 წლის თვითმმართველობის არჩევნები არის უპრეცენდენტო ჩვენი ქვეყნისთვის. წელს პირველად საქართველოს ისტორიაში, კანდიდატებს მოუწიათ 50%-ანი ბარიერის დაძლევა, რიგ შემთხვევებში კი, ხმების სულ რაღაც 2-3% დაკლების გამო,  მეორე ტურის გამართვა გახდა საჭირო. სახელისუფლებო გუნდს რომ ცესკო-ზე ზეწოლის სურვილი და პოლიტიკური ნება ჰქონოდა, ამას მანამდე გააკეთებდა და მეორე ტურამდე არ მიიყვანდა საქმეს.   „ქართული ოცნება“ არის რეალურად დემოკრატიული ძალა, რომლისთვისაც მსგავსი მეთოდებით ბრძოლა მიუღებელია, განსხვავებით „ნაციონალური მოძრაობისგან“, რომლის ერთ-ერთი ლიდერის, გიორგი უგულავას გამოსვლა იყო მათთვის სასურველ დროს არჩევნების მეორე ტურის  დანიშვნის მიზნით ცესკო-ზე ზეწოლის პირდაპირი მცდელობა.   აღსანიშნავია, რომ წლევანდელი თვითმმართველობის არჩევნები უპრეცენდენტო იყო თავისი მასშტაბითა და დემოკრატიულობის ხარისხით.  მიუხედავად იმისა, რომ „ნაციონალური მოძრაობა“ პერმამენტულად ცდილობს საარჩევნო ადმინისტრაციის დისკრედიტაციას, არჩევნების პროცესში მის მიმართ ზედმეტი კითხვები არ გაჩენილა.      გვინდა ხაზგასმით აღვნიშნოთ, რომ არჩევნების მეორე ტურის გამართვის თარიღის მიუხედავად, „ქართულ ოცნებას“ ხალხის მხარდაჭერის იმედი აქვს. ჩვენ გვჯერა, რომ ქართველი ხალხი არ დაუშვებს ქვეყანა წარსულში დააბრუნოს და „ნაციონალურ მოძრაობას“ თუნდაც მცირედი წარმატების ილუზია შეუქმნას.

კოალიცია „ქართული ოცნების“ საარჩევნო შტაბის ხელმძღვანელი კახა კალაძე და თბილისის მერობის კანდიდატი დავით ნარმანია ადგილობრივი თვითმმართველობის არჩევნებში გამარჯვებულ საკრებულოს მაჟორიტარი და პროპორციული სიის დეპუტატობის კანდიდატებს შეხვდნენ. კოალიციის ცენტრალურ ოფისში გამართულ სამუშაო შეხვედრაზე სამომავლო გეგმებზე იმსჯელეს. შეხვედრას საპარლამენტო უმრავლესობის წევრები ესწრებოდნენ.

საქართველოს პრემიერ-მინისტრ ირაკლი ღარიბაშვილის ხელმძღვანელობით, დღეს „ქართული ოცნების“ ცენტრალურ ოფისში კოალიციის პოლიტიკური საბჭოს სხდომა გაიმართა. საბჭოს წევრებმა ადგილობრივი თვითმმართველოს არჩევნების მეორე ტურთან დაკავშირებული საკითხები და საარჩევნო შტაბის საორგანიზაციო თემები განიხილეს. სხდომაზე საუბარი შეეხო საქართველოს პრემიერ-მინისტრის მიერ რუმინეთში განხორციელებულ ვიზიტს. პოლიტსაბჭოს წევრებმა ევროკავშირთან ასოცირების შეთანხმების ხელმოწერის შესახებაც იმსჯელეს და აღნიშნეს, რომ 27 ივნისს საბოლოოდ განმტკიცდება საქართველოს ევროპული არჩევანი.

საწევრო შენატანები და შემოწირულობები by GeorgianDream

სამწუხაროა, მაგრამ ფაქტია, რომ გუშინდელი პროვოკაციული ინციდენტის შემდეგ, მასში მონაწილე „ნაციონალური მოძრაობის“ წევრები, ნაცვლად იმისა, რომ აეხსნათ მოსახლეობისთვის, თუ რატომ და როგორ აღმოჩნდნენ ქვეყნის უმაღლესი საკანონმდებლო ორგანოს წარმომადგენლები ქვეყნის საერთაშორისო იმიჯის შემლახველ უხერხულ სიტუაციაში, მათთვის ჩვეული სიცრუის ტირაჟირებით შეეცადნენ მომხდარის გადაფარვას. ინციდენტის ერთ-ერთმა მონაწილემ განაცხადა, რომ აზერბაიჯანში მარნეულსა და გარდაბანში განვითარებული მოვლენების განსახილველად იყო ჩასული. ეს განცხადება ძალიან საყურადღებოა. ჩვენ გვაქვს ლეგიტიმური უფლება, მოვითხოვოთ პასუხი კითხვაზე - რატომ და ვისთან არკვევდნენ ჩვენი პარლამენტის დეპუტატები მარნეულისა და გარდაბნის საკითხებს აზერბაიჯანში, მიუხედავად იმისა, რომ აზერბაიჯანი ჩვენი არა მხოლოდ მეზობელი, არამედ მთავარი სტრატეგიული პარტნიორიცაა. ჩვენთვის ძალიან მნიშვნელოვანია საქართველო-აზერბაიჯანის მჭიდრო მეგობრული და კეთილმეზობლური ურთიერთობები, ჩვენ პატივს ვცემთ საქართველოში მცხოვრები ჩვენი აზერბაიჯანელი მოქალაქეების არჩევანს, ამიტომ ვერ დავუშვებთ, რომ რომელიმე პოლიტიკურმა ძალამ ჩრდილი მიაყენოს ქართულ-აზერბაიჯანულ ურთიერთობებს. ჩვენ არაერთგზის განვმარტეთ და კიდევ ვიმეორებთ, რომ შესაძლო ეთნიკური დაპირისპირების თავიდან აცილების მიზნით, „ქართულმა ოცნებამ“ მოხსნა თავისი კანდიდატურა მარნეულში. ჩვენი წარმომადგენლის გამარჯვება კი იმის დემონსტრირებაა, რომ ამ რეგიონში არანაირი ეთნიკური დაპირისპირება არ არსებობს, ხალხი ერთმანეთს ენდობა და არჩევანს ღირსეული კანდიდატის სასარგებლოდ აკეთებს. მომხდარი ფაქტი კიდევ ერთხელ ადასტურებს, რომ „ნაციონალური მოძრაობა“ პირადი ინტერესების მისაღწევად ყველაფერზე წამსვლელი ძალაა. მოვუწოდებთ „ნაციონალურ მოძრაობას“, მეტი ყურადღებით მოეკიდოს ქვეყნისთვის მეტად საფრთხილო საკითხებით მანიპულირებას და გადავიდნენ ჯანსაღი პოლიტიკური კონკურენციის რეჟიმში, რისი ყველა პირობაც ჩვენმა ხელისუფლებამ არჩევნებში მონაწილე ნებისმიერ საარჩევნო სუბიექტს შეუქმნა.

„მე მინდა ოპონენტს შევთავაზო საერთაშორისო ფორმატით და საერთაშორისო წესებით დადგენილი ფორმით დებატების ჩატარება, სადაც ნებისმიერ ტელევიზიას მიეცემა შესაძლებლობა დასვას კითხვები და მიიღოს პასუხები მისთვის საინტერესო კითხვებზე“ - განაცხადა დღეს კოალიცია ქართული ოცნების „დედაქალაქის მერობის” კანდიდატმა დავით ნარმანიამ ჟურნალისტებთან საუბრისას. „დემოკრატიულად ჩატარებულმა ადგილობრივმა არჩევნებმა დაგვანახა, რომ ინფორმირებული ამომრჩეველი იღებს მთავარ გადაწყვეტილებას და სწორედ მასზეა დამოკიდებული ის, თუ ვინ და როგორ აირჩიოს. ჩვენ საზოგადოებას შევთავაზეთ რეალური და კონკრეტულ შედეგებზე გათვლილი პროგრამა და წინასაარჩევნო გეგმა. განსხვავებით ჩვენი ოპონენტისგან, რომელსაც საკმაოდ პოპულისტური მიმართულებებით აგებული გეგმები და დაპირებები ჰქონდა, რაც ასევე იყო შეუსრულებელი მთელ რიგ შემთხვევებში. ვინაიდან, საკითხები, რომლებიც მოცემული იყო პროგრამაში, სწორედ ცენტრალური ხელისუფლების უფლებამოსილებას განეკუთვნებოდა და არა ადგილობრივი თვითმმართველობის უფლებამოსილებას . აქვე განსაკუთრებით გვინდა ხაზი გავუსვათ იმას, რომ მეორე ტური ასევე დემოკრატიული ფორმით ჩატარებული არჩევნების ერთ-ერთი მთავარი მახასიათებელი ნიშანია. ამიტომ ჩვენ მზად ვართ მეორე ტურისთვის“ - აცხადებს დავით ნარმანია.

სამწუხაროა, მაგრამ ფაქტია, რომ „ნაციონალური მოძრაობა“ საბოლოოდ ყალიბდება დესტრუქციულ ძალად, რომელიც პირადი  მიზნების მისაღწევად ყველაფერზეა წამსვლელი.  გავრცელებული ინფორმაციით,  საპარლამენტო უმცირესობის ლიდერები აზერბაიჯანელმა მესაზღვრეებმა დიდი ოდენობით არადეკლარირებული თანხის გადმოტანის მცდელობისთვის საზღვარზე შეაჩერეს.  „ნაციონალური მოძრაობის“ მიერ ამ ფაქტის უარყოფის მიუხედავად, აზერბაიჯანში საქართველოს ელჩი თეიმურაზ შარაშენიძე ადასტურებს ბაქოში, საბაჟო ტერმინალზე დეპუტატების მიერ არადეკლარირებული თანხის გადმოტანის მცდელობის ფაქტს, საუბარია მილიონამდე აშშ დოლარზე. სამწუხაროა, რომ „ნაციონალური მოძრაობა“  შავი ფულით და უკანონო მეთოდებით   ბრძოლას არ იშლის  და არალეგალური გზებით ცდილობს საკუთარი მიზნების მიღწევას.  საქართველოს პარლამენტის დეპუტატების ამგვარი ქმედება  აზარალებს არა მხოლოდ შიდა პოლიტიკურ პროცესს, არამედ ქვეყნის საერთაშორისო იმიჯსაც. ფაქტია, „ნაციონალურ მოძრაობას“უჭირს  დემოკრატიულ, ჯანსაღ პოლიტიკურ გარემოსთან შეგუება.   ვიმედოვნებთ, მომხდარს საზოგადოების მხრიდან ადეკვატური შეაფასება მოჰყვება.

პირველადი მონაცემებით, კოალიცია „ქართული ოცნების“ კანდიდატები ლიდერობენ მთელი ქვეყნის მასშტაბით, მათ შორის იმ ქალაქებსა და მუნიციპალიტეტებში, სადაც მეორე ტური დაინიშნა. პრაქტიკულად ყველა საკრებულოში აბსოლუტურ უმრავლესობას ჩვენი წარმომადგენლები შეადგენენ. საერთო ჯამში, მთელი ქვეყნის მასშტაბით ასარჩევი 1049 მაჟორიტარული მანდატიდან „ქართულმა ოცნებამ“ 811 დეპუტატი გაიყვანა, რაც საერთო რაოდენობის 77,31%-ს შეადგენს. არჩეული მაჟორიტარებიდან მეორე ადგილზე გავიდნენ საინიციატივო ჯგუფების მიერ წარმოდგენილი კანდიდატები, რომელთა მთლიანი რაოდენობა 128 ადამიანია. ჯამში, ოპოზიციური პარტიების არჩეული მაჟორიტარების რაოდენობა შეადგენს 238-ს, საიდანაც მხოლოდ 64-ია მთავარ ოპოზიციურ ძალაზე პრეტენზიის მქონე „ნაციონალური მოძრაობის“ დეპუტატი. მაჟორიტარული და სიითი შემადგენლობის ჩათვლით, ქვეყნის მასშტაბით, „ქართულმა ოცნებამ“ 1400-მდე მანდატი მოიპოვა, რაც რამდენჯერმე აღემატება სხვა პოლიტიკური ძალების წარმომადგენელთა მანდატების ჯამურ რაოდენობას. დემოკრატიულობის მაღალი ხარისხის მაჩვენებლია ის ფაქტი, რომ არჩევნების მეორე ტურში ლიდერ პოლიტიკურ ძალას 6 ოპოზიციური პარტია დაუპირისპირდება. 15 ივნისის არჩევნები არის რეალური თვითმმართველობისა და ძალაუფლების ხალხისთვის გადაცემის დასაწყისი. ჩვენთვის ძალიან მნიშვნელოვანია ის მაღალი შეფასება, რაც ჩატარებულ არჩევნებთან დაკავშირებით საქართველოში აკრედიტებულმა დიპლომატიურმა კორპუსმა დააფიქსირა. არჩევნები დადებითად შეფასდა საერთაშორისო საზოგადოებისა და პარტნიორი ქვეყნების დიპლომატიური მისიების მიერ. ამერიკის შეერთებული შტატების, დიდი ბრიტანეთისა და ნიდერლანდების საელჩოების მიერ გავრცელებული საერთო განცხადების თანახმად, 15 ივნისის არჩევნები ასოცირების ხელშეკრულების ხელმოწერის წინ თვითმმართველობების გაძლიერებისკენ გადადგმული ისტორიული ნაბიჯია. ამ შეფასებას საქართველოსთვის დიდი მნიშვნელობა აქვს. ჩვენი პოლიტიკური გუნდი უზრუნველყოფს მეორე ტურის მშვიდ და დემოკრატიულ გარემოში ჩატარებას და საერთაშორისო საზოგადოების ისეთივე მაღალ შეფასებას დაიმსახურებს. კიდევ ერთხელ დიდ მადლობას ვუხდით ყველა ამორჩეველს, რომელმაც გამოიჩინა მაღალი სამოქალაქო პასუხისმგებლობა და დააფიქსირა თავისი არჩევანი. აქვე მოვუწოდებთ საზოგადოებას, გავაქტიურდეთ მეორე ტურისთვის და არ დავუშვათ, რომ ჩვენი პასიურობით ჩრდილი მიადგეს ჩვენს საერთო გამარჯვებას. მოგიწოდებთ, ავიღოთ პასუხისმგებლობა საკუთარ ქვეყანაზე და აქტიურად ჩავერთოთ მის მართვაში.    

მისასალმებელია სხვა ოპოზიციური პოლიტიკური ძალების გამოჩენა არეალზე და ის, რომ საკრებულოები იქნება ჭეშმარიტად მრავალპარტიული,-აღნიშნა საქართველოს პრემიერ-მინისტრმა ირაკლი ღარიბაშვილმა "ქართული ოცნების" ცენტრალურ ოფისში დღეს გამართულ ბრიფინგზე. მან დეზინფორმაცია უწოდა გავრცელებულ ინფორმაციას, თითქოს მეორე ტურში კოალიციას მხოლოდ ნაციონალური მოძრაობა უპირისპირდება.  "მეორე ტურში „ქართულ ოცნებას“ 6 ოპოზიციური ძალა დაუპირისპირდება. ქალაქებსა და მუნიციპალიტეტებში გასამართი 21 მეორე ტურიდან, ქართული ოცნებას“ „ნაცოონალური მოძრაობა“ უპირსპირდება მხოლოდ 6-ში. ვფიქრობ, ნაციონალური მოძრაობის მხრიდან სრულიად შეგნებულად ვრცელდება დეზინფორმაცია და ხდება ციფრებით მანიპულირება. სწორედ ამიტომ, აღვნიშნავ რომ ჩვენმა პოლიტიკურმა ძალამ საქართველოს მასშტაბით მოიპოვა მანდატების 67 %, თბილისში კი - 72 % ,"-განაცხადა ირაკლი ღარიბაშვილმა. კოალიციის ლიდერმა საზოგადოებას ცესკოს ბოლო მონაცემები მიაწოდა, რომლის მიხედვით, საქართველოს მასშტაბით, საკრებულოებში „ქართული ოცნება“ წარმოდგენილი იქნება 67%-ით, დანარჩენი პარტიები და საინიციატივო ჯგუფები - 20%-ით, ხოლო „ნაციონალურ მოძრაობა“ - 13%-ით.  "საერთო შედეგები აჩვენებს, რომ ყველა საკრებულოში აბსოლუტური უმრავლესობით ლიდერობს „ქართული ოცნება“ 72%-ით, სადაც გამგებლები და მერები ყველა რაიონში და ქალაქში ლიდერობენ, მათ შორის იქ, სადაც მეორე ტური დაინიშნა,"- აღნიშნა პრემიერმა.  მან კიდევ ერთხელ მიულოცა, როგორც "ქართული ოცნების" მხარდამჭერებს, ისე სრულიად საქართველოს მოსახლეობას თვითმმართველობის არჩევნების დემოკრატიულ გარემოში ჩატარება და მიღწეული შედეგი.

„ნაციონალური მოძრაობის“ მიერ გავრცელებულ კადრებში, რომელშიც ასახულია მარნეულის ერთ-ერთ საარჩევნო უბანზე ყალბი ბიულეტებენის ჩაყრის ფაქტი, ფიგურირებს „ნაციონალური მოძრაობის“ საკრებულოს დეპუტატის ჯაფრაილ იუსუპოვის ცოლისძმა ნაზიმ ალიევი. ეს ადასტურებს ჩვენს ეჭვებს, რომ მარნეულში მომხდარი ფაქტი იყო „ნაციონალური მოძრაობის“ მიერ დაგეგმილი პროვოკაცია და მომხდარს არავითარი კავშირი არ აქვს „ქართულ ოცნებასთან“. რაც შეეხება უბნის შედეგების გადახედვას, ამ საკიხთან დაკავშირებით ცენტრალური საარჩევნო კომისია იმსჯელებს