16 ივნისი, 2014

კოალიცია "ქართული ოცნების" განცხადება

კოალიცია „ქართული ოცნება“ ცალსახად ემიჯნება საარჩევნო პროცედურების ნებისმიერ დარღვევას, მით უმეტეს, ხმების გაყალბებას. ჩვენ  მოვუწოდებთ შესაბამის ორგანოებს, გამოიკვლიონ „ნაციონალური მოძრაობის“ მიერ ბრიფინგზე წარმოდგენილი ვიდეოკადრები და პასუხი აგებინონ ნებისმიერ პირს, რომელიც ბრალდებული იქნება ამომრჩევლის ხმების გაყალბებაში. ძალიან უცნაურია, რომ მარნეულში, სადაც „ქართულმა ოცნებამ“ თავისი პარტიული ინტერესები ეროვნული ინტერესების სასარგებლოდ დათმო, და სადაც „ნაციონალურ მოძრაობას“ აქტივისტების განსაკუთრებული მობილიზება ჰქონდა გამოცხადებული, როგორ მოხერხდა, რომ ასე ღიად ხდებოდა ხმების გაყალბება და მათ არც ერთ წარმომადგენელს ამაზე პრეტენზია ღიად არ გამოუთქვამს. რომ აღარაფერი ვთქვათ ადგილობრივებისთვის იმ ცნობილ ფაქტზე, რომ კადრებში აღბეჭდილი პიროვნება პარლამენტის „ნაციონალური მოძრაობის“ დეპუტატის, აზერ სულეიმანოვის ახლობელი და მეგობარია. ჩვენი აზრით, საქმე გვაქვს კარგად დაგეგმილ პროვოკაციასთან, რომელიც საარჩევნო პროცესის დისკრედიტაციისკენ არის მიმართული. „ნაციონალური მოძრაობა“ ჩვეული ხერხებით  განაგრძობს საზოგადოების შეცდომაში შეყვანას და პირადი ინტერესების გამო ეთნიკური დაძაბულობის ინსპირირებას ცდილობს. მოვუწოდებთ საზოგადოებას, მათ შორის ჩვენს ეთნიკურ უმცირესობებს, შეინარჩუნონ სიმშვიდე. „ქართული ოცნება“ არის ხალხის ხელისუფლება, ის არ ყოფს მოსახლეობას თავისი და სხვისი პოლიტიკური ინტერესების მიხედვით და მისთვის მთავარი ქვეყნის საერთო ეროვნული ინტერესებია. ჩვენ არავითარ შემთხვევაში არ დავუშვებთ ჩატარებული არჩევნების დისკრედიტაციას, მით უმეტეს ეთნიკურ ნიადაგზე რაიმე ტიპის დაძაბულობას.   ყველა დამნაშავე უმკაცრესად დაისჯება, მიუხედავად მისი პოლიტიკური კუთვნილებისა და სიმპათიებისა.

15 ივნისი, 2014

ბიძინა ივანიშვილმა და მისმა მეუღლემ ხმა ოზურგეთში, ნატანების უბანზე მისცეს.

ბიძინა ივანიშვილმა და მისმა მეუღლემ ხმა ოზურგეთში, ნატანების უბანზე მისცეს რის შემდეგაც ბიძინა ივანიშვილმა მედიასთან კომენტარი გააკეთა.

15 ივნისი, 2014

კოალიცია "ქართული ოცნების" საარვევნო შტაბის ხელმძღვანელის კახა კალაძის ბრიფინგი

ამ დროისთვის არჩევნები მშვიდ და დემოკრატიულ გარემოში მიმდინარეობს, რასაც როგორც ადგილობრივი, ისე საერთაშორისო დამკვირვებლებიც ადასტურებენ. ადგილი ჰქონდა რამდენიმე დარღვევასა და ინციდენტს, რომელთა აღმოფხვრა საარჩვევნო ადმინისტრაციებმა და შესაბამისმა უწყებებმა დროულად მოახერხეს და პროცესი ჩვეულ რეჟიმში გაგრძელდა.  სამართალდამცავმა ორგანოებმა ინციდენტებზე სწრაფი რეაგირება მოახდინეს და ყველა შემთხვევაზე მიმდინარეობს გამოძიება. ზოგიერთი ოპოზიციური ძალა ცდილობს დაძაბოს სიტუაცია. ისინი ავრცელებენ ინფორმაციას, თითქოს „ქართული ოცნების“ მხარდამჭერები კანონდარღვევით აწარმოებენ აგიტაციას და ზეგავლენას ახდენენ ამომრჩევლის ნებაზე. გვინდა განვმარტოთ, რომ  არჩევნების დღეს  წინასაარჩევნო აგიტაცია და საარჩევნო სუბიექტების სააგიტაციო ატრიბუტიკის გამოყენება აკრძალულია მხოლოდ კენჭიყრის შენობაში. ის ფაქტი, რომ ჩვენი აქტივისტები აწარმოებენ კენჭისყრის შენობის გარეთ უბანზე გამოცხადებული ამომრჩევლების დამატებით აღრიცხვიანობას, არ წარმოადგენა კანონდარღვევას და სრულად შეესაბამაბება საარჩევნო კოდექსის მოთხოვნებს. მსგავსი ქმედება  არჩევნებში მონაწილე ნებისმიერ პოლიტიკურ სუბიექტს შეუძლია განახორციელოს, ვისაც ამომრჩეველთა აქტივობის შესახებ ინფორმაციის ოპერატიულ რეჟიმში მიღება სურს. აქვე, მოვუწოდებთ ამომრჩევლებს და პოლიტიკური პარტიის აქტივისტებს,  თავი შეიკავონ კენჭისყრის შენობაში კანონით აკრძალული ქმედებების განხორციელებისგან და არ შევიდნენ კენჭისყრის შენობაში სააგიტაციო მასალით.   კიდევ ერთხელ დიდი მადლობა მინდა გადავუხადო ყველა იმ ადამიანს ვინც მოიხადა მოქალაქეობრივი ვალი და საკუთარი არჩევანი გააკეთა, ხოლო ვისაც პოზიცია ჯერ კიდევ არ დაუფიქისირებია, აქტიურობისკენ მოვუწოდებთ. 

15 ივნისი, 2014

საქართველოს ვიცე-პრემიერმა და ენერგეტიკის მინისტრმა საარჩევნო უბანზე საკუთარი არჩევანი გააკეთა

უპირველეს ყოვლისა მინდა ავღნიშნო, რომ თვითმმარველობის არჩევნების ამ ფორმით ჩატარება არის ჩვენი დემოკრატიის ტესტი და ჩვენ-- ხელისუფლებამ და ხალხმა ერთმანეთის გვერდშიდგომით ეს შევძელით!. მეორე და უმთავრესი--საბოლოოდ საქართველოში დამკვიდრდა ნორმალური, ცივილური არჩევნების ჩატარების ფორმა--სახელმწიფო რესურსის გამოყენების გარეშე, დევნის და შევიწროვების, ძალადობის და დაშინების, მკვდარი სულების და კარუსელების გარეშე. ის არჩევნების მანკიერი დანაშაულებრივი ფორმა საბოლოოდ ჩაბარდა ქვეყნის პოლიტიკურ წარსულს! მე ხმა მივეცი თბილისის განახლებას, მე ხმა მივეცი ამ განახლებაზე მზუნველ ხალხს!

15 ივნისი, 2014

პრემიერ-მინისტრი საარჩევნო უბანზე

მოვუწოდებ სამართალდამცავ ორგანოებს დროულად აღკვეთონ ყოველგვარი პროვოკაცია, რათა უზრუნველყონ არჩევნების მშვიდ და სტაბილურ გარემოში ჩატარება,-განაცხადა საქართველოს პრემიერ-მინისტრმა ირაკლი ღარიბაშვილმა ჟურნალისტებისთვის მიცემულ კომენტარში. დღეს პრემიერ-მინისტრი, ოჯახთან ერთად, ვაკის მე -11 საარჩევნო უბანზე მივიდა და საკუთარი არჩევანი გააკეთა.  "ხმა მივეცი საქართველოს განვითარებს, წინსვლას და სტაბილურობას, ჩვენი შვილების ბედნიერ მომავალს. ჩვენს ხელისუფლებას აქვს მტკიცე ნება, რომ ეს არჩევნები, რომელიც არის ძალიან მნიშვნელოვანი ჩვენი ქვეყნის განვითარებისა და სტაბილურობისთვის, ჩატარდეს მაქსიმალურად მშვიდ და დემოკრატიულ გარემოში. მოვუწოდებ ყველა პოლიტიკურ ძალას და მათ მხარდამჭერებს, თავი შეიკავონ ემოციებისგან და ნებისმიერი პროვოკაციებისგან. ასევე მოვუწოდებ სამართალდამცავ ორგანოებს დროულად აღკვეთონ ყოველგვარი პროვოკაცია, რათა უზრუნველყონ არჩევნების მშვიდ და სტაბილურ გარემოში ჩატარება," - განაცხადა ირაკლი ღარიბაშვილმა ჟურნალისტებთან საუბრისას.

15 ივნისი, 2014

დავით ნარმანიამ საარჩევნო უბანზე საკუთარი არჩევანი გააკეთა

საბურთალოს რაიონის პირველ საარჩევნო უბანზე საკუთარი არჩევანი გააკეთა კოალიცია „ქართული ოცნების“ თბილისის მერობის კანდიდატმა დავით ნარმანიამ. დავით ნარმანია საარჩევნო უბანზე მეუღლესთან და შვილთან ერთად მივიდა. „არჩევანი გავაკეთე იმ ძალის სასარგებლოდ, რომელმაც უნდა განავითაროს ჩვენი დედაქალაქი“- განაცხადა დავით ნარმანიამ ჟურნალისტებთან. მისი თქმით, აუცილებელია საზოგადოების აქტიური ჩართულობითა და ერთობლივი ზრუნვით მომავალმა თაობამ უკეთეს დედაქალაქში იცხოვროს.

15 ივნისი, 2014

პრემიერ-მინისტრის შემაჯამებელი ბრიფინგი

დღევანდელი არჩევნებით ჩვენმა ხელისუფლებამ კიდევ ერთხელ დაადასტურა დემოკრატიული პროცესების შეუქცევადობა, კიდევ ერთი ნაბიჯი გადადგა ქვეყანამ ევროპისკენ და ჩვენ ვაჩვენეთ მსოფლიოს, რომ მზად ვართ ცივილიზებული მსოფლიოს ნაწილად ვიქცეთ,-განაცხადა საქართველოს პრემიერ-მინისტრმა ირაკლი ღარიბაშვილმა "ქართული ოცნების" ოფისში გამართულ შემაჯამებელ ბრიფინგზე. მისივე თქმით, წინასწარი მონაცემებით, თბილისში პირველ ტურში გამარჯვება მოიპოვა კოალიციის მერობის კანდიდატმა დავით ნარმანიამ და კოალიცია "ქართულმა ოცნებამ". "ეს არის ის წინასწარი მონაცემები, რომელიც ჩვენ ყველამ მოვისმინეთ 8 საათისთვის, ახლა საჭიროა, რომ დაველოდოთ ცესკოს შედეგებს. დღევანდელი გამარჯვებით ჩვენმა კოალიციამ დაადასტურა, რომ ჩვენ ვართ მართლაც უალტერნატივო ძალა. მიუხედავად უპრეცენტოდ მაღალი საარჩევნო ბარიერისა და მაღალი კონკურენციისა, ჩვენ სამართლიანად და დამაჯერებლად გავიმარჯვეთ. ეს ნიშნავს, რომ 2012 წელს ჩვენ მიერ დაწყებული დემოკრატიული ცვლილებები ქვეყნის განვითარების ერთადერთი სწორი გზაა. მინდა მადლობა გადავუხადო ჩვენს ხალხს ნდობისთვის და გარწმუნებთ, რომ დღევანდელი არჩევანი ჩვენი ქვეყნის წინსვლის უპირობო გარანტია. ჩვენ ერთად მივიყვანთ ჩვენს ქვეყანას რეალურ კეთილდღეობამდე. ჩვენთვის, როგორც მმართველი კოალიციისთვის ძალიან მნიშვნელოვანია, რომ არჩევნებმა ჩაიარა მშვიდ გარემოში, სერიოზული დარღვევების გარეშე. დაფიქსიბულ მცირე ინციდენტებზე და დარღვევებზე საარჩევნო ადმინისტრაციამ და სამართალდამცველებმა მყისიერი რეაქცია მოახდინეს და დარწმუნებული ვარ, რომ გამოძიებას ბოლომდე მიიყვანენ,"- განაცხადა ირაკლი ღარიბაშვილმა. მისივე ინფორმაციით, "ქართულმა ოცნებამ" მოიგო საქართველოს ყველა დიდ ქალაქში. პრემიერმა მადლობა გადაუხადა ამომრჩევლებს წინდახედულობისთვის, საკუთარი მოქალაქეობრივი ვალის ღირსეულად შესრულებისა და გამოჩენილი მხარდაჭერისთვის.

15 ივნისი, 2014

ირაკლი ღარიბაშვილმა „ქართული ოცნების“ მხარდამჭერებს მიმართა

მინდა, კიდევ ერთხელ მოგილოცოთ თავისუფალი, გამჭვირვალე, ნამდვილად დემოკრატიული, ევროპული ტიპის არჩევნების ჩატარება საქართველოში, - ამ სიტყვებით მიმართა საქართველოს პრემიერ-მინისტრმა ირაკლი ღარიბაშვილმა კოალიცია “ქართული ოცნების” ცენტრალურ ოფისთან შეკრებილ მოქალაქეებს . ირაკლი ღარიბაშვილი მხარდამჭერებს კოალიციის ლიდერებთან და თბილისის მერობის კანდიდატ დავით ნარმანიასთან ერთად მიესალმა და განაცხადა, რომ ეს არ არის მხოლოდ კოალიცია „ქართული ოცნების“, არამედ მთელი საქართველოს გამარჯვება. როგორც კოალიციის ლიდერმა სიტყვით გამოსვლისას აღნიშნა, პირველად, საქართველოს ისტორიაში, დღევანდელი არჩევნების შედეგად მოქალაქეებმა 12 ქალაქსა და 59 რაიონში აირჩიეს 12 მერი და 59 გამგებელი, რაც უპრეცენდენტო შემთხვევაა საქართველოს ისტორიაში. „პირველად, საქართველოს თანამედროვე ისტორიაში ჩვენ მივიღეთ მრავალპარტიული საკრებულოები. ეს არის ჩვენი რეალური დემოკრატიის გამარჯვება და კიდევ ერთხელ ვულოცავ თითოეულ მოქალაქეს ჭეშმარიტად დემოკრატიული არჩევნების ჩატარებას საქართველოში. ეგზიტპოლის მონაცემებით, კოალიცია “ქართული ოცნება” ამ დროისთვის ყველა რეგიონში ლიდერობს. ახლა საჭიროა, დაველოდოთ საბოლოო შედეგებს“, - განაცხადა პრემიერმა სიტყვით გამოსვლისას. ირაკლი ღარიბაშვილის შეფასებით, ცენტრალურმა საარჩევნო კომისიამ ძალიან კარგად იმუშავა. კოალიციის ლიდერმა ასევე მადლობა გადაუხადა თითოეულ მხარდამჭერს, ვინც არჩევნებში მონაწილეობა მიიღო.

14 ივნისი, 2014

ქეთი ჯოხაძის მხარდამჭერი კონცერტი

მუხიანის მაჟორიტარი დეპუტატობის კანდიდატის ქეთი ჯოხაძის მხარდამჭერ კონცერტს დღეს კოალიცია „ქართული ოცნების“ თბილისის მერობის კანდიდატი დავით ნარმანია საარჩევნო შტაბის ხელმძღვანელი კახა კალაძე, უმრავლესობის წევრები ზვიად ძიძიგური და ზურაბ აბაშიძე დაესწრნენ. მათ მოსახლეობას უბნის მაჟორიტარი დეპუტატობის კანდიდატის მხარდაჭერისკენ მოუწოდეს.

14 ივნისი, 2014

საქართველოს ნაკრებმა ანგარიშით 23:13 გაიმარჯვა

კოალიცია „ქართული ოცნების“ თბილისის მერობის კანდიდატი, დავით ნარმანია საქართველოს მორაგბეთა ნაკრებისა და ესპანეთის ნაკრების თამაშს დაესწრო. "IRB თბილისის თასი 2014"-ზე პირველ მატჩში საქართველოს ნაკრებმა ანგარიშით 23:13 გაიმარჯვა. შეხვედრა ავჭალის სარაგბო სტადიონზე გამართა. თბილისის მერობის კანდიდატთან ერთად „ბორჯღალოსნებს“ ავჭალის მაჟორიტარი დეპუტატობის კანდიდატი კოკა კობალაძე გულშემატკივრობდა.

14 ივნისი, 2014

თარაშ შურღაიას მხარდამჭერი კონცერტი

დიღმის მასივის მაჟორიტარი დეპუტატობის კანდიდატის თარაშ შურღაიას მხარდამჭერ კონცერტს დღეს კოალიცია „ქართული ოცნების“ თბილისის მერობის კანდიდატი დავით ნარმანია და საარჩევნო შტაბის ხელმძღვანელი კახა კალაძე დაესწრნენ. მათ მოსახლეობას უბნის მაჟორიტარი დეპუტატობის კანდიდატის მხარდაჭერისკენ მოუწოდეს.

14 ივნისი, 2014

შეხვედრა ახალგაზრდა პოლიტიკოსთა ორგანიზაციის წარმომადგენლებთან

კოალიცია „ქართული ოცნების“ თბილისის მერობის კანდიდატი დავით ნარმანია მხარდამჭერთა დარბაზში საქართველოს ახალგაზრდა პოლიტიკოსთა ორგანიზაციის წარმომადგენლებს შეხვდა, წინასაარჩევნო პროგრამის ძირითადი მიმართულებები გააცნო და მერად არჩევის შემთხვევაში განსახორციელებელ პროექტებზე ისაუბრა. ახალგაზრდა პოლიტიკოსებმა დავით ნარმანიას არჩევნებში გამარჯვება უსურვეს და მასთან თანამშრომლობის სურვილი გამოთქვეს.

14 ივნისი, 2014

დავით ნარმანიამ ცაგარელის ქუჩაზე ავარიული კორპუსი დაათვალიერა

ცაგარელის ქუჩაზე მცხოვრები მოსახლეობა საცხოვრებელი სახლის გვერდით დაგეგმილ მშენებლობას აპროტესტებს. ადგილობრივების თქმით, კორპუსი ავარიულია და დაწყებულმა მშენებლობამ შესაძლოა შენობის ნგრევა გამოიწვიოს. მათივე თქმით, თბილისის მერიის სახელზე არაერთი განცხადება დაწერეს, თუმცა უშედეგოდ. ცაგარელის ქუჩაზე შექმნილ ვითარებას ადგილზე გაეცნენ კოალიცია „ქართული ოცნების“ თბილისის მერობის კანდიდატი დავით ნარმანია და საბურთალოს რაიონის მაჟორიტარი დეპუტატობის კანდიდატი გივი ჭიჭინაძე. დავით ნარმანიას თქმით, მისი მერად არჩევის შემთხვევაში შესაბამისი ექსპერტიზის ჩატარების შემდეგ, უკანონო მშენებლობები აიკრძალება, მფლობელს კი ალტერნატიულ ფართს შესთავაზებენ.

13 ივნისი, 2014

„ქართული ოცნების“ წინასაარჩევნო კამპანიის საზეიმო დახურვა

"ჩვენი ვალია ჩავატაროთ რეალურად თავისუფალი, გამჭვირვალე, დემოკრატიული არჩევნები, ისეთი არჩევნები, რომლის შედეგების სამართლიანობაში ეჭვი არავის შეეპარება. ჩვენ ამის პირობას გაძლევთ! თითოეული მოქალაქის ხმა იქნება დაცული! დღეს ყველას აქვს საშუალება გაანალიზებული და დამოუკიდებელი არჩევანი გააკეთოს, საკუთარი მოსაზრებისა სინდისის კარნახით მისცეს ხმა მისთვის სასურველ კანდიდატს. ჩვენმა ხელისუფლებამ დაამტკიცა, რომ დემოკრატიული არჩევნების ჩატარება მისი ურყევი ნებაა,"   --  აღნიშნა პრემიერ-მინისტრმა ირაკლი ღარიბაშვილმა. "ჩვენ აქ შეგვკრიბა ქვეყნის სიყვარულმა, ერთსულოვნებამ და საერთო ქართულმა ოცნებამ! იმ ოცნებამ, რომელმაც მთელი ქვეყანა ერთ მუშტად შეკრა და თითოეული ჩვენგანი ჩააყენა ქვეყნის სამსახურში, იმ ოცნებამ რომელიც ჩვენი ხელით--ჩვენი თავდაუზოგავი შრომით უნდა ვაქციოთ რეალობად!" -- განაცხადა ვიცე-პრემიერმა კახა კალაძემ.

13 ივნისი, 2014

შეხვედრა ევროსაბჭოს დამკვირვებლებთან

კოალიცია „ქართული ოცნების“ თბილისის მერობის კანდიდატი დავით ნარმანია დღეს საქართველოში სადამკვირვებლო მისიით მყოფ ევროპის საბჭოს ადგილობრივ და რეგიონულ ხელისუფლებათა კონგრესის დელეგაციას შეხვდა. მერობის კანდიდატმა დელეგაციის წევრებს წინასაარჩევნო გარემოს შესახებ ინფორმაცია მიაწოდა და არჩევნებში გამარჯვების შემთხვევაში დაგეგმილ პროექტებზე ისაუბრა. ადგილობრივი თვითმმართველობის არჩევნების დასრულების შემდეგ დელეგაცია სპეციალურ ანგარიშს მოამზადებს.

13 ივნისი, 2014

დავით ნარმანია „ამერიკის მეგობართა კლუბის“ წევრებს შეხვდა

,,ჩვენთვის საინტერესოა აშშ-ს ქალაქებთან დამეგობრება იმისთვის, რომ მომავალში მათი გამოცდილება გამოვიყენოთ’’- ამის შესახებ კოალიცია „ქართული ოცნების“ თბილისის მერობის კანდიდატმა „ამერიკის მეგობართა კლუბის“ წევრებთან შეხვედრისას განაცხადა. როგორც დავით ნარმანიამ აღნიშნა, თბილისის ეკონომიკური განვითარებისთვის აუცილებელია მეგობარი ქვეყნისგან მეტი ინვესტიციების მოზიდვა, რაც ამერიკის შეერთებულ შტატებთან აქტიური ეკონომიკური ურთიერთობის საფუძველი გახდება. შეხვედრაზე საუბარი შეეხო თბილისში ამერიკული სახლის დაარსების იდეას.

13 ივნისი, 2014

შემაჯამებელი შეხვედრები მოსახლეობასთან

კოალიცია „ქართული ოცნების“ თბილისის მერობის კანდიდატმა დავით ნარმანიამ და საკრებულოს დეპუტატობის კანდიდატებმა დღეს მოსახლეობასთან შემაჯამებელი შეხვედრები გამართეს. შეხვედრები გაიმართა კრწანისის, საბურთალოს, ვაკის და სამგორის მოსახლეობასთან. შეხვედრებს ესწრებოდნენ კოალიცია „ქართული ოცნების“ საარჩევნო შტაბის ხელმძღვანელი კახა კალაძე, პარლამენტის თავმჯდომარე დავით უსუფაშვილი, თავდაცვის მინისტრი ირაკლი ალასანია, საპარლამენტო უმრავლესობის წევრები. შეხვედრებზე დავით ნარმანიამ მოსახლეობას კიდევ ერთხელ გააცნო წინასაარჩევნო პროგრამის ძირითადი პრიორიტეტები და მათ სწორი არჩევანის გაკეთებისკენ მოუწოდა. კოალიციის საარჩევნო შტაბის ხელმძღვანელმა კახა კალაძემ საქართველოს მთავრობის მიერ გაწეული საქმიანობის შესახებ ისაუბრა და იმედი გამოთქვა, რომ მოსახლეობა სამართლიან არჩევანს გააკეთებს.

12 ივნისი, 2014

შეხვედრა მოკლევადიანი სადამკვირვებლო მისიის წარმომადგენლებთან

კოალიცია „ქართული ოცნების“ მერობის კანდიდატი დავით ნარმანია აირაის მოკლევადიანი სადამკვირვებლო მისიის წარმომადგენლებს შეხვდა. შეხვედრაზე განიხილეს საარჩევნო გარემო. დავით ნარმანიამ სტუმრებს წინასაარჩევნოდ დედაქალაქში მიმდინარე პროცესები გააცნო.

12 ივნისი, 2014

კოალიცია ,,ქართული ოცნების" პოლიტსაბჭოს განცხადება

კოალიცია ,,ქართული ოცნების" პოლიტსაბჭომ იმსჯელა და მარნეულში შექმნილი რეალობიდან გამომდინარე, იმისათვის, რომ ოპოზიციურმა პარტიებმა ვერ მოახერხონ ეთნიკურ ნიადაგზე დაპირისპირების პროვოცირება, აგრეთვე თავიდან იქნეს აცილებული დამატებით სიტუაციის ესკალაცია, მიიღო გადაწყვეტილება ურჩიოს მარნეულის ,,ქართული ოცნების" კანდიდატს, მოხსნას არჩევნებიდან საკუთარი კანდიდატურა ეთნიკურად აზერბაიჯანელი 2 ოპოზიციური კანდიდატის სასარგებლოდ. ჩვენ ვარღვევთ წლების განმავლობაში დამკვიდრებულ მანკიერ პრაქტიკას, როდესაც, როგორც წესი, მარნეულში ხელისუფლება ამომრჩეველს თავს ახვევდა საკუთარ კანდიდატს და ყოველთვის იმარჯვებდა სახელისუფლებო კანდიდატი.  აქამდე ყველა ხელისუფლება გადაწყვეტილებას იღებდა მხოლოდ საკუთარი ვიწროპარტიული ინტერესებიდან გამომდინარე და ამას აყენებდა სახელმწიფოებრივ ინტერესზე მაღალა, რაცხელს უწყობდა ქვეყანაში, საზოგადოებაში დაბალი პოლიტიკური კულტურის დამკვიდრებას. იმის ნიშნად, რომ ჩვენი ხელისუფლებისთვის მთავარია სახელმწიფოს ინტერესები, საზოგადოებრივი თანხმობა და ქვეყანაში პოლიტიკური კულტურის ამაღლება, ვქმნით პრეცედენტს, როდესაც ხელისუფლება თავად ხსნის თავის კანდიდატურას ოპოზიციური კანდიდატების სასარგებლოდ

12 ივნისი, 2014

პროექტის „თბილისი - რეგიონის ცენტრი“ პრეზენტაცია

კოალიცია „ქართული ოცნების“ თბილისის მერობის კანდიდატმა დავით ნარმანიამ საზოგადოების სხვადასხვა სფეროს წარმომადგენლებს წინასაარჩევნო პროგრამა „თბილისი - რეგიონის ცენტრი“ პროექტი გააცნო და მათგან მოსაზრებები მოისმინა. დავით ნარმანიას განცხადებით, არჩევნებში მისი გამარჯვების შემთხვევაში, კულტურული და ტურისტული ღონისძიებების განვითარების ხელშეწყობის მიზნით, მომდევნო წლების განმავლობაში დედაქალაქის მერია 100 მილიონ ლარს დახარჯავს.