აახენი 2014 წლის 29 მაისი ძვირფასო ბატონო რომპეი, ქვეყნის მეთაურებო და მთავრობის ხელმძღვანელებო, კარლოს დიდი სახელობის პრემიის ლაურეატებო, ბატონებო და ქალბატონებო, ჩემთვის საპატიო და სასიხარულოა დღეს ამ ღირსშესანიშნავ ღონისძიებაზე ესოდენ განსაკუთრებული აუდიტორიის წინაშე სიტყვით გამოსვლა. თითქმის სამოცი წლის განმავლობაში კარლოს დიდის სახელობის პრემია გადაეცემა მათ, ვინც განსაკუთრებულ სამსახურს უწევს ევროპის ერთობის საქმეს. ეს პრემია, როგორც ის მისმა დამფუძნებელმა, დოქტორ კურტ პფაიფერმა დაახასიათა, მიზნად ისახავს ევროპის ხალხთა არაძალადობრივი, ნებაყოფლობითი ერთობის უზრუნველყოფას, რათა დაცული იყოს უზენაესი ამქვეყნიური ღირებულებები: თავისუფლება, ჰუმანურობა და მშვიდობა. წელს ჩვენ შევიკრიბეთ, რათა პატივი მივაგოთ განსაკუთრებულ პოლიტიკოსსა და მიზანმიმართულ ლიდერს, შერიგების თითქოსდა შეუძლებელი გზების მაძიებელს და ევროპისა და ევროპისა და ევროპული იდეის მგზნებარე პროპონენტს. ძვირფასო ბატონო რომპეი, საქართველოს ხელისუფლებისა და ქართველი ხალხის სახელით, ასევე ჩემგან პირადად, გულწრფელად გილოცავთ 2014 წლის კარლოს დიდის სახელობის პრემიით დაჯილდოვებას და მოგახსენებთ მადლობას არა მხოლოდ ჩემი ქვეყნის მხარდაჭერისათვის ევროპულ გზაზე წინსვლაში, არამედ თქვენი ფასდაუდებელი წვლილისთვისაც ევროკავშირის კონსოლიდაციისა და შემდგომი განვითარების საქმეში.  წელს ევროკავშირი აღნიშნავს აღმოსავლეთით გაფართოების მეათე წლისთავს. ჩვენ ყველამ ვიხილეთ ის უდიდესი სარგებელი, რომლიც ამ ისტორიული მნიშვნელობის გაფართოებას მოაქვს როგორც ახალი წევრი სახელმწიფოებისათვის, მათი ეკონომიკისა და მოქალაქეებისათვის, ასევე "ძველი" წევრი ქვეყნებისათვისაც. გაფართოებამ მოიტანა გაზრდილი ერთიანი ბაზარი ახალი და მნიშვნელოვანი სავაჭრო და საინვესტიციო შესაძლებლობებით. გაფართოებამ მოიტანა უფრო კონკურენტუნარიანი ევროპა და, რაც ალბათ ყველაზე მნიშვნელოვანია, მან შეახსენა ევროპელებს, რომ ევროკავშირი არსით პოლიტიკური პროექტია, რომელიც გულისხმობს კონტინენტზე მშვიდობის, დემოკრატიისა და კეთილდღეობის გავრცელებას. ევროპა არის უნიკალური კონტინენტი, სადაც ადამიანს შეუძლია, სათუთად მოუფრთხილდეს თავის მემკვიდრეობას, რომელიც ასაზრდოებს მას და ამზადებს მომავლისათვის. სწორედ ეს არის ევროპის უზენაესი არსი. ეს არის ადგილი, სადაც თავს იყრიან საზიარო ისტორიისა და საერთო მომავლის მქონე ქვეყნები, სადაც ისინი თავისუფლებას მშვიდობაში ჰპოვებენ, რაც ზუსტად ასახავს ბატონი რომპეის მიერ გამოყენებულ სიტყვებს ევროპის დასახასიათებლად. საქართველო იზიარებს თავისუფალი და მშვიდობიანი ევროპული სივრცის ოცნებას, რომელშიც სუფევს მშვიდობა და კეთილდღეობა და რომელიც აერთიანებს სხვადასხვა კულტურას, ტრადიციას, ენასა და რელიგიას. როგორც თავისუფალი და დემოკრატიული ქვეყნის წარმომადგენელს, მე მჯერა, რომ საქართველოსაც შეუძლია წვლილის შეტანა ევროპული პროექტის წარმატების განმტკიცებაში! კიდევ ერთხელ, გულწრფელად ვულოცავ ბატონ რომპეის და ვუსურვებ წარმატებას მის განსაკუთრებულ საქმიანობაში!

''მზად ვართ წარმატებით განვახორციელოთ ჩვენი ევროინტეგრაციის პრიორიტეტები, რათა ევროკავშირთან ერთად ვაშენოთ საერთო მომავალი ევროპულ ოჯახში'', - განაცხადა საქართველოს პრემიერ-მინისტრმა ირაკლი ღარიბაშვილმა გერმანიის კანცლერთან და უკრაინისა და მოლდოვას პრემიერ-მინისტრებთან ერთად გამართულ ბრიფინგზე. მისივე განცხადებით, საქართველომ მიაღწია მნიშვნელოვან პროგრესს “აღმოსავლეთ პარტნიორობით” გახსნილი პერსპექტივის განხორციელების თვალსაზრისით.  “27 ივნისს ჩვენ ხელს მოვაწერთ საქართველო-ევროკავშირის ასოცირების შეთანხმებას, რომელიც ჩვენი ქვეყნის ევროპიზაციის სამოქმედო გეგმას წარმოადგენს,”-აღნიშნა ირაკლი ღარიბაშვილმა

კოალიცია „ქართული ოცნების“ თბილისის მერობის კანდიდატი დავით ნარმანია მაჟორიტარი დეპუტატობის კანდიდატ, ჯაბა სამუშიასთან ერთად თემქის მოსახლეობას შეხვდა.

საქართველოს პრემიერ-მინისტრის ირაკლი ღარიბაშვილის, გერმანიის კანცლერის ანგელა მერკელის, უკრაინის პრემიერ-მინისტრის არსენი იაცენიუკისა და მოლდოვის პრემიერ-მინისტრის იური ლეანკასერთობლივი  განცხადება.                                                                                                                         პირველ რიგში, მინდა დიდი მადლობა გადავუხადო დღევანდელი შეხვედრისთვის ქალბატონ კანცლერს. დღევანდელი შეხვედრა კანცლერ მერკელთან, ევროკავშირისა და მისი წევრი ქვეყნების აღმოსავლეთ ევროპელ პარტნიორებთან მნიშვნელოვნად გაღრმავებული ურთიერთობების ნათელი ნიშანია.    ხუთი წლის წინ ,,აღმოსავლეთ პარტნიორობამ“ გახსნა ახალი შესაძლებლობები ევროკავშირთან თანამშრომლობის გაძლიერებისათვის. ჩვენმა ქვეყანამ ევროპული გზისადმი ერთგულება დაამტკიცა იმით, რომ წარმატებით გავატარეთ დემოკრატიული რეფორმები და მოვახდინეთ ჩვენი საზოგადოების ევროპული ნორმებისა და სტანდარტების შესაბამისად მოდერნიზება. ჩვენ განუხრელად მივყვებით ევროინტეგრაციის კურსს, რომელიც ქვეყნის საგარეო და საშინაო პოლიტიკის ქვაკუთხედია. მინდა ხაზი გავუსვა, რომ საქართველოს ევროპული არჩევანი განპირობებულია საქართველოს მოსახლეობის აბსოლუტური უმრავლესობის და ყველა ძირითადი პოლიტიკური პარტიის მხარდაჭერით.    ჩვენ ვამაყობთ, რომ მივაღწიეთ ძალიან მნიშვნელოვან პროგრესს აღმოსავლეთ პარტნიორობით გახსნილი პერსპექტივის განხორციელების თვალსაზრისით. როგორც უკვე აღინიშნა, 27 ივნისს  ჩვენ ხელს მოვაწერთ საქართველო-ევროკავშირის ასოცირების შეთანხმებას, რომელიც ჩვენი ქვეყნის ევროპეიზაციის სამოქმედო გეგმას წარმოადგენს. ეს არის ერთგვარი სამოქმედო გეგმა, თუ როგორ უნდა მოხდეს ჩვენი ქვეყნის ყველა სფეროს მოდერნიზება. ევროკავშირის კანონმდებლობასთან ეტაპობრივი დაახლოებით საქართველო მიაღწევს ევროკავშირთან პოლიტიკურ ასოცირებას და ეკონომიკურ ინტეგრაციას.  ღრმა და ყოვლისმომცველი თავისუფალი სავაჭრო სივრცე ქმნის ძალიან დიდ პერსპექტივას ჩვენი ქვეყნისთვის. რაც მთავარია, ეს შეთანხმება ჩვენს საერთო ღირებულებებს ეფუძნება. საქართველო, როგორც ევროპული სახელმწიფო, და მე მინდა ხაზგასმით აღვნიშნო, რომ საქართველო არის ევროპული სახელმწიფო, ერთგულად განაგრძობს დემოკრატიის, კანონის უზენაესობის, თანასწორობისა და ადამიანის უფლებათა პატივისცემის განმტკიცებას. საქართველოს მთავრობა მოწოდებულია ეფექტიანად განახორციელოს ასოცირების შეთანხმება, რათა სრულად მიიღოს შეთანხმებით გათვალისწინებული სარგებელი. ასევე, მინდა აღვნიშნო, რომ ევროკავშირთან უვიზო მიმოსვლის რეჟიმის პერსპექტივა ,,აღმოსავლეთ პარტნიორობის“ ერთ-ერთი ყველაზე მთავარი ასპექტია,   ასევე, მინდა აღვნიშნო, რომ ჩვენი საერთო მიზნების წარმატება დიდად არის დამოკიდებული რეგიონში უსაფრთხოებისა და სტაბილურობის არსებობაზე. ჩვენ ვაფასებთ ევროკავშირის ურყევ მხარდაჭერას საქართველოსადმი, ჩვენი ქვეყნის ტერიტორიული მთლიანობისადმი საერთაშორისოდ აღიარებულ საზღვრებში.      ,,აღმოსავლეთ პარტნიორობის“ ფარგლებში მიღწეული პროგრესის კვალდაკვალ,  ჩვენ ადეკვატურად უნდა ვუპასუხოთ რეგიონში არსებულ ახალ გამოწვევებს.  ჩვენმა ქვეყანამ ბოლო ორი წლის განმავლობაში დაამტკიცა, რომ ჩვენ ვართ აბსოლუტურად კონსტრუქციული, პროგნოზირებადი მთავრობა. ჩვენ გვაქვს კონსტრუქციული დიალოგის პოლიტიკა ჩვენს მეზობლებთან, და არა მხოლოდ ჩვენს მეზობლებთან. ჩვენ შევძელით იდეალური ბალანსის დამყარება. ჩვენ ვიზიარებთ პოლიტიკურ პასუხისმგებლობას ევროპის კონტინენტსა და მის მიღმა მშვიდობასა და უსაფრთხოებაზე. ამ კონტექსტში მინდა აღვნიშნო, რომ საქართველოს მთავრობამ მიიღო გადაწყვეტილება, ჩაერთოს ევროკავშირის მისიაში ცენტრალური აფრიკის რესპუბლიკაში. დაბოლოს, მინდა აღვნიშნო, რომ ,,აღმოსავლეთ პარტნიორობამ“ ჩვენი ურთიერთობა თვისებრივად ახალ საფეხურზე აიყვანა. ჩვენს ურთიერთობაში იწყება ახალი ეტაპი. ასოცირების შეთანხმებების, ღრმა და ყოვლისმომცველი თავისუფალი სავაჭრო სივრცის ჩათვლით, ეფექტიანი იმპლემენტაცია და საერთო-ევროპული პრინციპებისა და ღირებულებებისადმი ერთგულება ნათლად წარმოაჩენს შესაბამისი აღმოსავლეთ ევროპული სახელმწიფოების ევროინტეგრაციისადმი ბუნებრივ სწრაფვას. მინდა აღვნიშნო, რომ მზად ვართ წარმატებით განვახორციელოთ ჩვენი ევროინტეგრაციის პრიორიტეტები, რათა ევროკავშირთან ერთად ავაშენოთ   საერთო მომავალი ევროპულ ოჯახში. დიდი მადლობა.   საქართველოს პრემიერ-მინისტრი ირაკლი ღარიბაშვილი

კოალიცია „ქართული ოცნების“ თბილისის მერობის კანდიდატი დავით ნარმანია ავჭალის მაჟორიტარი დეპუტატობის კანდიდატ კობა კობალაძესთან ერთად დღეს ოლიმპიური რეზერვების მზადების ეროვნულ ცენტრს ესტუმრა. საქართველოში სპორტის პოპულარიზაციისა და სპორტული შედეგების გაუმჯობესების ხელშეწყობის მიზნით, „ოლიმპიური ცენტრის ღია პირველობა“ ფეხბურთში, ძიუდოში, თავისუფალ, ბერძნულ-რომაულ და ქართულ ჭიდაობაში გაიმართა და მასში 400-მდე სპორტსმენი მონაწილეობდა. როგორც, დავით ნარმანიამ აღნიშნა, მასობრივი სპორტის განვითარება და ცხოვრების ჯანსაღი წესის დამკვიდრება სამოქმედო გეგმის ერთ-ერთი მთავარი ამოცანა იქნება.

სექტემბერში უკვე გვექნება კანონი მთის შესახებ და მთელი ყურადღება გადავა მთიანი რეგიონებისკენ,- განაცხადა საქართველოს პრემიერ-მინისტრმა ირაკლი ღარიბაშვილმა სოფელ ზარიძეების მოსახლეობასთან შეხვედრისას. დღეს მთავრობის მეთაურმა თიანეთი-ზარიძეები-ჟინვალის საავტომობილო გზის სარეაბილიტაციო სამუშაოები დაათვალიერა. აღნიშნული გზის სარეაბილიტაციო სამუშაოები 80-იანი წლების შემდეგ არ ჩატარებულა, რის გამოც ბოლო წლების განმავლობაში, ფაქტობრივად, არ ფუნქციონირებდა და მოსახლეობას გადაადგილების პრობლემას უქმნიდა. როგორც რეგიონული განვითარების მინისტრმა აღნიშნა, ამ დროისთვის გზის აღნიშნული ნაწილის რეაბილიტაცია პრაქტიკულად უკვე დასრულებულია. საქართველოს პრემიერ-მინისტრი სამუშაოებზე დასაქმებულ ადგილობრივებს გაესაუბრა და გზის სახელმწიფოებრივ მნიშვნელობაზე გაამახვილა ყურადღება. მისი განმარტებით, თიანეთი-ზარიძეების საატომობილო გზის 23-კილომეტრიანი მონაკვეთის რეაბილიტაცია უზრუნველყოფს ავტოტრანსპორტის საშუალებების უსაფრთხო და მოხერხებულ მოძრაობას, ხოლო მგზავრებსა და ადგილობრივ მოსახლეობას სატრანსპორტო ხარჯები და მგზავრობის დრო შეუმცირდებათ. თიანეთი-ზარიძეები-ჟინვალის 9 კმ-იანი საავტომობილო გზის რეაბილიტაციის პირველი ეტაპი 2013 წლის სექტემბერში დაიწყო და ძირითადი სამუშაოები უკვე დასრულებულია.სამუშაოებზე, რომელსაც კომპანია "ბლექ სი გრუპი" ახორციელებდა, 174 ადამიანი იყოდასაქმებული. პროექტის ღირებულება 8 888 888 ლარია. გარდა ამისა, რეგიონული განვითარების მინისტრმა ელგუჯა ხოკრიშვილმა მთავრობის მეთაურს განუმარტა, რომ მუნიციპალური განვითარების ფონდი თიანეთის მუნიციპალიტეტის ზარიძეების თემში შემავალი 6 სოფლის წყალსადენი სისტემის სარეაბილიტაციო სამუშაოებს ახორციელებს. პროექტის დასრულების შედეგად ექვსი სოფლის 800 ოჯახს24-საათიანი წყალმომარაგება და მაღალი ხარისხის გაფილტრული სასმელი წყალი ექნება. პროექტის ღირებულება 1 968 456, 96 ლარია. სამუშაოებზე დასაქმებულია 120 ადამიანი, რომელთა 50% ადგილობრივი მკვიდრია.  პრემიერმა მადლობა გადაუხადა ადგილობრივებს მოთმინებისთვის და შიდა გზებისა და სასმელი წყლის პრობლემის აღმოფხვრაში დახმარება აღუთქვა.  "რეგიონები მოვიარე და ყველგან ბევრი პრობლემა დაგვხდა, სამწუხაროდ ოქროს დრო არის დაკარგული, წლების მანძილზე ეს პრობლემები დაგროვდა. ახლა მთავარი არის სოფლის მეურნეობის და ეკონომიკის განვითარება. უკვე გვაქვს შედეგები, გლეხის შრომა დაფასდა," - განაცხადა ირაკლი ღარიბაშვილმა.

კოალიცია „ქართული ოცნების“ თბილისის მერობის კანდიდატი დავით ნარმანია მხარდამჭერთა დარბაზში ქალთა არასამთავრობო ორგანიზაციების წარმომადგენლებს შეხვდა . შეხვედრის მთავარი თემა გენდერული თანასწორობა, მარტოხელა დედების უფლებების დაცვა და სოციალური პრობლემები იყო. ქალთა უფლებადამცველები ასევე ეკოლოგიური გარემოს გაუმჯობესებისა და თბილისის ინფრასტრუქტურის მოწესრიგების სამოქმედო გეგმით დაინტერესდნენ. საუბარი შეეხო ქალაქში მოძრაობის მოწესრიგებასა და შშმ პირებისთვის ადაპტირების პროცესს . დავით ნარმანიამ არასამთავრობო სექტორის წარმომადგენლებს წინასაარჩევნო პროგრამის ძირითადი პრიორიტეტები გააცნო და არსებული პრობლემების მოგვარების გზებზე ესაუბრა. შეხვედრა კითხვა-პასუხის რეჟიმში გაიმართა.

კოალიცია „ქართული ოცნების“ თბილისის მერობის კანდიდატი დავით ნარმანია დიდუბის ბაზრობის მიმდებარე ტერიტორიაზე დიდუბის მაჟორიტარი დეპუტატობის კანდიდატ ლადო ძნელაძესთან ერთად მოვაჭრეებს შეხვდა. მოვაჭრეებს ძირითადად პრობლემა სალარო აპარატებთან და მაღალ გადასახადებთან დაკავშირებით ექმნებათ, რომლის გადაჭრის პირობა მერობის კანდიდატისგან მიიღეს.

ხელისუფლება არ ელოდება მადლობას გაკეთებული საქმეებისთვის, ეს ჩვენი ვალდებულებაა-ვაკეთოთ რეალური საქმეები და ვიზრუნოთ ხალხზე, - განაცხადა პრემიერ-მინისტრმა ირაკლი ღარიბაშვილმა სოფელ ბულაჩაურის მოსახლეობასთან საუბრისას. მთავრობის მეთაურმა დღეს ბულაჩაურის სამელიორაციო სისტემის სათავე ნაგებობის მშენებლობა დაათვალიერა. როგორც რეგიონის გუბერნატორმა მთავრობის მეთაურს განუმარტა, სარეაბილიტაციო სამუშოების შედეგად მთლიანად აღდგება საგურამოს სარწყავი სისტემა, რომელიც წლების მანძილზე არ ფუნქციონირებდა. მშენებელი კომპანიის დირექტორისინფორმაციით, პროექტის დასრულების შემდეგ 1 164 ჰექტარი სასოფლო-სამეურნეო მიწის ფართობი სარწყავი წყლით უზრუნველყოფილი იქნება. როგორც საქართველოს პრემიერ-მინისტრმა განაცხადა, ხელისუფლება თანმიმდევრულად აგვარებს წლების მანძილზე დაგროვილ და უყურადღებოდ მიტოვებულ ყველაზე მნიშვნელოვან პრობლემებს, რომელთა მოგვარებაც მოსახლეობისთვის ახალი საწარმოო ძალის და სტიმულის მიცემას უკავშირდება. სოფელ ბულაჩაურის სამელიორაციო სისტემისსარეაბილიტაციო სამუშაოებს შპს „მამისონი" ასრულებს. პროექტი, რომლის ღირებულება 6 365 000 ლარია, უახლოეს მომავალში დასრულდება. ბულაჩაურის მოსახლეობამ პრემიერს წყლის პრობლემის მოგვარება და შიდა გზების მოწესრიგება სთხოვა და მათი გადაჭრის პირობა მიიღო. ირაკლი ღარიბაშვილმა ადგილობრივებს მიაწოდა ინფორმაცია სახელმწიფო პროგრამის "აწარმოე საქართველოში" შესახებ. "იმედი გაგვიჩნდა, რომ ხელისუფლების დახმარებით სოფელი ფეხზე დადგება. შრომა არ გვეზარება, მთავარია ხელი შეგვიწყოთ. ბევრი რამ კეთდება სოფლისთვის და იმედი გვაქვს, რომ სხვა ქვეყნიდან პომიდორის თუ ხილის შემოტანა საქართველოში აღარ დაგვჭირდება, - მიმართა პრემიერ-მინისტრს ბულაჩაურის მკვიდრმა ნოდარ ბუთხუზმა.

ენერგეტიკის სამინისტროს მიერ 2013 წლიდან, საქართველოს მასშტაბით, დეტალურად იქნა შესწავლილი უშუქო სოფლებში არსებული მდგომარეობა, დაიწყო სამუშაოები რომელსაც აფინანსებს სახელმწიფო , ასრულებს კომპანია „ენერგო-პრო ჯორჯია“. დიდ დახმარებას გვიწევს ამერიკის შეერტებული შტატების განვითარების სააგენტო. ამ ეტაპზე მთლიანობაში 12 სოფლის მოსახლეობას აქვს უკვე ელექტროენერგია.აქიდან 4 სოფლის ელექტოფიცირება იუსაიდის დახმარებით მოხდა რაზეც განსაკუთრებული მადლობა მათ. დღს ვიმყოფებოდით სოფელ ბევრეთში, თბილისთნ ახლოს, სადაც 52 ოჯახი წლები იმყოფებოდა ელემენტარული კომფორტის აგრეშე. ამიერიდან ამ სოფელსაც უწყვეტად მიეწოდება დენი.  

დიასპორა ჩვენი ქვეყნისთვის უდიდეს პოტენციალს წარმოადგენს, - ამის შესახებ საქართველოს პრემიერ-მინისტრმა ირაკლი ღარიბაშვილმა დიასპორის დღისადმი მიძღვნილ კონფერენციაზე სიტყვით გამოსვლისას განაცხადა. როგორც მთავრობის მეთაურმა აღნიშნა, უცხოეთში მცხოვრებ ქართველებს საკუთარი უნარების, ბიზნესისა თუ საჯარო სფეროში საუკეთესო გამოცდილების გაზიარებითა და გამოყენებით ქვეყნის განვითარებაში დიდი წვლილის შეტანა შეუძლიათ. პრემიერის განცხადებით, დიასპორა ყოველთვის უნდა გრძნობდეს სახელმწიფოს მხარდაჭერას და ხელისუფლება სწორედ ამ მიმართულებით მუშაობს. „ჩვენ შევქმენით დიასპორის მიმართ ახალი სტრატეგია. მეტი კომუნიკაციის მიზნით, თანამედროვე ტექნოლოგიების გამოყენებით, შეიქმნა თანამემამულეთა გლობალური ქსელი, რომლის მეშვეობითაც შესაძლებელია დიასპორის შესახებ ზუსტი მონაცემების უფრო ეფექტიანად შეგროვება. ამავე ქსელის ფარგლებში შეიქმნა ონლაინსკოლა. ჩვენს თანამემამულეებს მიეცემათ საშუალება, ონლაინრეჟიმის გაკვეთილებით შეისწავლონ ქართული ენა და ლიტერატურა, საქართველოს ისტორია, გეოგრაფია, ეთნოგრაფია. ამით ჩვენ კიდევ ერთი ნაბიჯი გადავდგით ქართულ დიასპორაში ეროვნული თვითშეგნებისა და მშობლიური ენის შენარჩუნებისთვის“, - განაცხადა პრემიერმა კონფერენციაზე სიტყვით გამოსვლისას. ირაკლი ღარიბაშვილის განმარტებით, ხელისუფლება საზღვარგარეთ არსებული დიასპორული ორგანიზაციების დახმარებას განაგრძობს, რისთვისაც გასულ წელს მთავრობის სარეზერვო ფონდიდან 400 000 ლარი გამოიყო. პრემიერი მიიჩნევს, რომ ქართული დიასპორის პოტენციალი ქვეყანამ სათანადოდ უნდა გამოიყენოს. სწორედ ამიტომ ირაკლი ღარიბაშვილმა ეკონომიკურ გუნდს დაავალა, დაიწყონ მუშაობა მის ინიციატივაზე, რომელიც საქართველოში ქართული დიასპორისთვის ინვესტიციების კუთხით ფინანსური შეღავათების შემოღებას გულისხმობს.  „ჩემი ოცნებაა, უცხოეთში მცხოვრები ჩვენი თანამემამულეები მალე დაბრუნდნენ ისეთ სამშობლოში, როგორიც ჩვენ ყველას წარმოგვიდგენია. ჩვენი ხელისუფლება ამისთვის ყველაფერს გააკეთებს“, - განაცხადა პრემიერმა და საზღვარგარეთ მცხოვრებ თანამოქალაქეებს დიასპორის დღე მიულოცა.

კოალიცია „ქართული ოცნების“ თბილისის მერობის კანდიდატი დავით ნარმანია ოჯახთან და დედაქალაქის საკრებულოს დეპუტატობის კანდიდატებთან ერთად, ეროვნული გმირის მერაბ კოსტავას დაბადების დღეს მის სახლ-მუზეუმს ეწვია. დავით ნარმანიამ საქართველოს ეროვნულ-განმათავისუფლებელ მოძრაობაში მერაბ კოსტავას მნიშვნელოვან როლზე ისაუბრა. „მე, როგორც თბილისის მომავალი მერი, ვიზრუნებ, რომ ყველა სახელოვანი და ერისთვის საამაყო შვილის სახლ-მუზეუმმა შეინარჩუნოს პირვანდელი სახე და ფუნქციონირებდეს, რათა მომავალმა თაობამ მეტი გაიგოს მათი წინაპრების ღირსეულ საქმეთა შესახებ“, - განაცხადა მან.

გილოცავთ საქართველოს დამოუკიდებლობის დღეს!!! ვუსურვებთ ჩვენს სამშობლოს ერთიანობას, ძლიერებას და წინსვლას!

გამარჯობათ, ბატონებო!   ყველას გილოცავთ  26 მაისს, საქართველოს დამოუკიდებლობის დღეს! ეს არის ერთ-ერთი ყველაზე დიდი თარიღი ჩვენი ქვეყნის ისტორიაში, ეს არის დღე, რომელმაც 96 წლის წინ თავისუფლება მოუტანა ჩვენს ქვეყანას. დღევანდელი დღე განსაკუთრებულად მინდა მივულოცო ჩვენს წვევამდელებს! დღეს თქვენ საზეიმოდ დებთ ფიცს ქვეყნისა და ხალხის წინაშე! დღეს თქვენ სამშობლოს ჯარისკაცები ხდებით,  დღეიდან თქვენ სამშობლოს სადარაჯოზე, ხალხისა და ქვეყნის სამსახურში დგებით! გერქვას საქართველოს ჯარისკაცი, ეს არის უდიდესი პატივი და უდიდესი პასუხისმგებლობა. მე მჯერა,რომ თქვენ წარმატებით შეასრულებთ ჯარისკაცის რთულ, საპატიო მისიას და  პირნათლად მოიხდით ვალს ჩვენი სამშობლოს წინაშე. მებრძოლი სული, ღმერთისა და სამშობლოს სიყვარული - ეს არის ის, რაც ჩვენს ქართულ გენშია და ეს არის ის, რაც ყველაზე მეტად სჭირდება ჯარისკაცს  და  მე მჯერა, რომ თითოეული თქვენგანი სწორედ ამ სულისკვეთებით  იწყებს სამხედრო სამსახურს.  დღევანდელი დღე მინდა მივულოცო ჩვენს შეიარაღებულ ძალებს, ჩვენს ვეტერანებს, თითოეულ ჯარისკაცს და ოფიცერს, რომლებიც საკუთარი სიცოცხლის ფასად იცავენ ჩვენს სამშობლოს, ჩვენი ქვეყნის სახელმწიფოებრივ ინტერესებს. საქართველოს დამოუკიდებლობის დღეს განსაკუთრებული პატივითა და მოწიწებით მინდა გავიხსენო საქართველოს ტერიტორიული მთლიანობისთვის ბრძოლასა და საერთაშორისო სამშვიდობო მისიებში დაღუპული ჩვენი ჯარისკაცები, ჩვენი გმირები. მე ქედს ვიხრი მათ წინაშე.   ჩემო მეგობრებო,  საქართველო მონაწილეობს  საერთაშორისო სამშვიდობო  მისიებში და ჩვენი პარტნიორი და მეგობარი ქვეყნების ჯარების მხარდამხარ ვიბრძვით მსოფლიოში მშვიდობისთვის. ამიტომ მინდა განსაკუთრებულად მივესალმო  და მივულოცო 26 მაისი საერთაშორისო სამშვიდობო მისიებში მონაწილე ჩვენს სამხედროებს, რომლებსაც ახლა ყველაზე საპატიო მისია აკისრიათ - ისინი საქართველოს  სახელმწიფოს და ჩვენი შვილების მომავალს იცავენ უცხო მიწაზე. ჩვენი გმირი სამხედროების განსაკუთრებულ თავდადებასა და ბრძოლის უნარიანობას ყველა ერთხმად აღიარებს მთელ მსოფლიოში. და ჩვენ ეს ძალიან გვეამაყება!   წვევამდელებო, გისურვებთ, არასოდეს გაგნელებოდეთ ვაჟკაცური შემართება და სამშობლოს სიყვარული. მე მჯერა, რომ თქვენ ღირსეულად ატარებთ საქართველოს ჯარისკაცის საპატიო სახელს და ერთგულად ემსახურებით ჩვენს სამშობლოს! რაც მთავარია, - გისურვებთ მშვიდობას! საქართველო ამაყობს თქვენით! თქვენთან ერთად ჩვენს ქვეყანას წინ დიდი მომავალი აქვს.   კიდევ ერთხელ გილოცავთ საქართველოს დამოუკიდებლობის დღეს! ღმერთი იყოს ჩვენი მებრძოლი ერის, ჩვენი დიდი ქვეყნის, ჩვენი სამშობლოს მფარველი!

ჩემო თანამოქალაქეებო! გილოცავთ საქართველოს დამოუკიდებლობის დღეს!  ვულოცავ ჩვენს უმთავრეს ეროვნულ დღესასწაულს - 26 მაისს მთელ საქართველოს, თითოეულ მოქალაქეს, თითოეულ ჯარისკაცს და ოფიცერს, რომლებიც უანგაროდ ემსახურებიან სამშობლოს, უცხოეთში მცხოვრებ ყველა ჩვენს თანამემამულეს!  მინდა განსაკუთრებით მივულოცო საქართველოს დამოუკიდებლობის დღე სამშვიდობო მისიების მონაწილე ჩვენს საამაყო ჯარისკაცებს. თქვენ, სამშობლოსგან მოშორებულები, თავდადებით ემსახურებით საქართველოს სახელმწიფოებრიობის დაცვას და საკუთარი სიცოცხლის ფასად იცავთ ჩვენი და ჩვენი შვილების, ჩვენი მომავალი თაობების უსაფრთხოებას.  26 მაისი უმნიშვნელოვანესი თარიღია საქართველოსთვის. მთელი ჩვენი ისტორია ჩვენი დიდი წინაპრების თავგანწირული და ერთგული ბრძოლაა სამშობლოსთვის. საუკუნეების განმავლობაში სამშობლოს თავისუფლება და დამოუკიდებლობა იყო ის მთავარი იდეა და საყრდენი, რაზეც იდგა ქართველი ერი. თაობიდან თაობას გადაეცემოდა დამოუკიდებლობის მოპოვებისა და სამშობლოს გათავისუფლების იდეა. ამ იდეისთვის იბრძოდნენ სამშობლოსთვის თავდადებული გმირები და მათ ბრძოლას უკვალოდ არ ჩაუვლია - 96 წლის წინ, 1918 წლის 26 მაისს, ასრულდა ყველა ქართველის სანუკვარი ოცნება და ჩვენმა ქვეყანამ დამოუკიდებლობა მოიპოვა.  მაშინ, საქართველოს დამოუკიდებლობა დიდხანს ვერ გაგრძელდა. თუმცა, ჩვენს ხალხს არ შეუწყვეტია ფიქრი სამშობლოს დამოუკიდებლობაზე. ყველა თაობა გულით და გონებით ატარებდა ამ იდეას.  23 წელია საქართველო დამოუკიდებელი ქვეყანაა. ჩვენი ვალია გავუფრთხილდეთ ამ მონაპოვარს და, რადაც არ უნდა დაგვიჯდეს, დავიცვათ ჩვენი ქვეყნის სუვერენიტეტი. ჩვენ დიდი ისტორიის ერი ვართ. ისტორიულად ჩვენ ევროპული ცივილიზაციის ნაწილი ვართ და ამიტომაც უნდა ავაშენოთ ევროპული ტიპის, დემოკრატიული სახელმწიფო, ისეთი, როგორიც ჩვენს ქვეყანას და ჩვენს ხალხს ეკადრება. ცივილიზებული სახელმწიფოს ძლიერება, პირველ რიგში, ძლიერი დემოკრატიული ინსტიტუტებია, რომელთა განვითარება და ხელშეწყობა ხელისუფლების ვალდებულებაა. სახელმწიფომ უნდა უზრუნველყოს კანონის უზენაესობა და კანონის წინაშე ყველა მოქალაქის თანასწორობა. თითოეული ადამიანის თავისუფლება და მისი უფლებების დაცვა დემოკრატიული ქვეყნის უმთავრესი ღირებულებაა და ჩვენ ყველაფერს ვაკეთებთ იმისათვის, რომ ეს ღირებულებები საქართველოში იყოს დაცული.  მეგობრებო, დღევანდელი 26 მაისი განსაკუთრებულია - ჩვენი ქვეყნის დამოუკიდებლობის დღეს ახალი იმედებით ვხვდებით. სულ მალე ჩვენ უმნიშვნელოვანეს ნაბიჯს გადავდგამთ ევროპასთან დაახლოების გზაზე - ზუსტად ერთ თვეში ხელს მოვაწერთ და გავხდებით ევროკავშირის ასოცირებული წევრი. მე მჯერა, რომ საქართველო, როგორც თანასწორუფლებიანი სახელმწიფო, თავისი კულტურული, ისტორიული და პოლიტიკური თვალსაზრისით, ღირსეულ ადგილს დაიმკვიდრებს საერთო ევროპულ ოჯახში. ჩემო თანამემამულეებო,  ჩვენ ყველანი მონაწილე ვართ იმ ისტორიული პროცესებისა, რომლებიც სინამდვილედ აქცევს ჩვენი დიდი წინაპრების, ჩვენი ხალხის სანუკვარ ოცნებას. საქართველო უახლოვდება ევროპულ სივრცეს და ეს პროცესი შეუქცევადია.  საქართველო დიდი კულტურისა და დიდი ტრადიციების ქვეყანაა. ჩვენმა ტოლერანტობამ, კაცთმოყვარეობამ და სამშობლოს სიყვარულმა, მისთვის თავდადების უნარმა შეგვინარჩუნა ქვეყანა. ეს ის ძალა იყო, რამაც გადაარჩინა საქართველო და სწორედ ეს ძალა დააყენებს ახლაც ჩვენს ქვეყანას ფეხზე.  საქართველოს წინ დიდი მომავალი აქვს. ჩვენ ავაშენებთ და გავაძლიერებთ დემოკრატიულ ინსტიტუტებს, დავიცავთ ჩვენი მოქალაქეების თავისუფლებასა და უსაფრთხოებას. ეს სასარგებლო იქნება არა მარტო საქართველოსთვის, არამედ მთელი ჩვენი რეგიონისთვის. საქართველოს აქვს იმის ამბიცია, რომ გახდეს ლიდერი რეგიონში და მჯერა, საქართველო ამას შეძლებს!  ჩვენი ქვეყნის განვითარება პოლიტიკურ და ეკონომიკურ სიკეთესთან ერთად, თითოეული ადამიანის ცხოვრებაზეც სასიკეთოდ აისახება. მჯერა, სწორედ ასე შემოვაბრუნებთ ჩვენს ოს და აფხაზ ძმებს ჩვენსკენ და აუცილებლად დადგება დღე, როცა ჩვენ ისევ ვილაპარაკებთ ერთ ენაზე, ისევ ვიცხოვრებთ გამთლიანებულ და ძლიერ საქართველოში, ჩვენს საერთო სამშობლოში!  მეგობრებო, მოახლოებული არჩევნები ჩვენს ქვეყანას კიდევ ერთ შანსს აძლევს გადადგას ნაბიჯი წინ, დემოკრატიისკენ. ეს არჩევნები თითოეულ მოქალაქეს აძლევს შესაძლებლობას გაითავისოს, რომ ეს ქვეყანა მისია და თავად უნდა უპატრონოს მას. მე ბევრს დავდივარ რეგიონებში და სულ უფრო ვრწმუნდები, რომ ხალხს უნდა ჰქონდეს რეალური ძალაუფლება, ხალხმა თავად უნდა განსაზღვროს და გადაწყვიტოს საკუთარი სოფლის, რაიონის, რეგიონის და, საბოლოოდ, ქვეყნის ბედი. მხოლოდ ასე, ყველა ერთად, შევძლებთ მოვუაროთ და მოვუფრთხილდეთ იმ მონაპოვარს, რომელიც ჩვენს ხალხს, სამშობლოსთვის თავდადებულ გმირებს თავგანწირვისა და სიცოცხლის ფასად დაუჯდათ. ჩვენი ვალია, დავიცვათ ჩვენი სამშობლოს დამოუკიდებლობა და მომავალ თაობებს დავუტოვოთ თავისუფალი, დემოკრატიული და წელგამართული ქვეყანა. კიდევ ერთხელ ყველას გილოცავთ საქართველოს დამოუკიდებლობის დღეს!

პრემიერ-მინისტრმა ირაკლი ღარიბაშვილმა კოალიცია „ქართული ოცნების“ თელავის მერობისა და მუნიციპალიტეტის გამგებლობის კანდიდატები დღეს თელავში გამართულ კოალიციის მხარდამჭერ აქციაზე წარადგინა თელავის მერობისთვის პლატონ კალმახელიძე იბრძოლებს, მუნიციპალიტების გამგებლობისთვის კი შემდეგი კანდიდატები : 1. საგარეჯო - გიორგი გზირიშვილი; 2. გურჯაანი - გია გერგიძე; 3. სიღნაღი - დავით ჯანიკაშვილი; 4. ლაგოდეხი - კახა ჯამბურია; 5. ყვარელი - ილია მზექალაშვილი; 6. დედოფლისწყარო - ნიკოლოზ ჯანიაშვილი; 7. ახმეტა - ბექა ბაიდაური; 8. თელავი - ალექსანდრე შათირიშვილი ირაკლი ღარიბაშვილმა მოსახლეობას „ქართული ოცნების“ მხარდაჭერისკენ მოუწოდა და განაცხადა, რომ ადგილობრივი თვითმმართველობის არჩევნებისთვის კოალიციამ სამშობლოს მოყვარული და ერთგული პიროვნებები შეარჩია. მისივე თქმით, „საპარლამენტო და საპრეზიდენტო არჩევნების შემდეგ, 15 ივნისის გამარჯვება ერთი მთლიანი ციკლის დასასრული იქნება.

სმენადაქვეითებული ბავშვების საზოგადოებაში სრული ინტეგრაციის მიზნით, სპეციალური მუნიციპალური პროგრამა შეიქმნება - ამის შესახებ კოალიცია „ქართული ოცნების“ თბილისის მერობის კანდიდატმა დავით ნარმანიამ სმენადაქვეითებულ ბავშვებთან და მათ მშობლებთან გამართულ შეხვედრაზე განაცხადა. დავით ნარმანიას თქმით, პრობლემებია სახელმძღვანელოებისა და სასმენი აპარატებით უზრუნველყოფის მხრივ. მხარდამჭერთა დარბაზში გამართულ შეხვედრაზე სხვა სპეციალურ საჭიროებებზეც ისაუბრეს.

21 წლის შემდეგ აფხაზეთიდან 31 ქართველი მებრძოლის ცხედარი ჩამოასვენეს. ეს ის მებრძოლები არიან, რომლებიც თვითმფრინავის ჩამოგდების შედეგად სოხუმის ბაბუშერას აეროპორტში 1993 წლის 22 სექტემბერს დაიღუპნენ. ამ ტრაგედიას მაშინ 92 ადამიანი ემსხვერპლა. მართალია, სხვადასხვა დროს ეტაპობრივად ხდებოდა ცხედრების გადმოცემა, თუმცა ამ დრომდე ვერ ხერხდებოდა ყველა დაღუპულის ჩამოსვენება. საქართველოს მთავრობამ შექმნა ორმხრივი კომისია, რომელსაც ჩვენი მხრიდან ხელმძღვანელობს მინისტრი დავით დარახველიძე, ხოლო აფხაზეთიდან - აფხაზეთის დე ფაქტო ხელისუფლების ვიცე-პრემიერი ინდირა ვარდანია. მოლაპარაკებების შედეგად მიღწეულ იქნა შეთანხმება, რომლის შედეგადაც მოხდა დაღუპული 31 ქართველი მეომრის ცხედრის თბილისში ჩამოსვენება.  მადლობა მინდა გადავუხადო, ამ პროცესში ჩართულ ყველა ადამიანს. დღევანდელი დღე ნათელი დადასტურებაა, რომ ჩვენი ხელისუფლებისთვის ძალიან მნიშვნელოვანია, პატივი მივაგოთ ყველას, ვინც თავი შესწირა საქართველოს ტერიტორიული მთლიანობისათვის ბრძოლას.   საქართველოს პრემიერ-მინისტრი ირაკლი ღარიბაშვილი

დედაქალაქის ძველი უბნების განვითარებისა და რეაბილიტაციის გეგმა კოალიცია „ქართული ოცნების“ თბილისის მერობის კანდიდატმა დავით ნარმანიამ ლაიფციგის უნივერსიტეტის არქიტექტორებს და სტუდენტებს ძველი თბილისის დათვალიერებისას გააცნო. თბილისის მერობის კანდიდატმა ტურისტებთან ერთად სოლოლაკისკენ ფეხით გაისეირნა და გზად სოფიკო ჭიაურელის სკვერში ყვავილების ფესტივალზე შეიარა. დავით ნარმანიამ გერმანელ ტურისტებს რუსთაველის გამზირზე გერმანელი არქიტექტორების მიერ აგებული შენობა-ნაგებობებიც დააათვალიერებინა. ექსკურსია გერმანელი არქიტექტორებისთვის შთამბეჭდავი აღმოჩნდა, როგორც მათ აღნიშნეს, დედაქალაქის განვითარების სამოქმედო გეგმა მათ ხედვას შეესაბამება.

კოალიცია „ქართული ოცნების“ თბილისის მერობის კანდიდატი დავით ნარმანია დღეს სასტუმრო „ჰოლიდეი ინში“ ავია კომპანიების, ტურისტული სააგენტოების, სასტუმროებისა და რესტორნების ქსელების წარმომადგენლებს შეხვდა. შეხვედრაზე დედაქალაქის მერობის კანდადატმა ეკონომიკისა და ტურიზმის გავითარების გეგმაზე ისაუბრა.