21 მაისი, 2014

სამუშაო შეხვედრა ევროკომისიის კოლეგიასთან

გრძელდება საქართველოს პრემიერ–მინისტრის სამუშაო ვიზიტი ბელგიის სამეფოში. დღეს საქართველოს დელეგაცია ევროკომისიის კოლეგიას შეხვდა. შეხვედრაზე საქართველოს პრემიერ–მინისტრმა ირაკლი ღარიბაშვილმა მიმდინარე წელს ისტორიული უწოდა, როგორც საქართველოსათვის, ასევე ევროკავშირისათვის, რადგანაც 27 ივნისს საქართველო ასოცირების ხელშეკრულებას მოაწერს ხელს. “ჩემი მთავრობის სახელით მინდა განვაცხადო, რომ უაღრესად მოხარული ვარ, ვინაიდან მაქვს შესაძლებლობა მონაწილეობა მივიღო ამ უპრეცედენტო შეხვედრაში ჩემი კაბინეტის წევრებთან ერთად. ჩვენ მზად ვართ შევისწავლოთ და აქტიურად ჩავერთოთ და განვიხილოთ მიმდინარე და მომავალი თანამშრომლობის შესაძლებლობები. ჩვენ წარმოვადგენთ იმ ქვეყნის მთავრობას, სადაც ევროპული ინტეგრაცია ეროვნული იდეაა, რომელსაც მხარს უჭერს მოსახლეობის 85% და ყველა ძირითადი პოლიტიკური პარტია, რაც საქართველოს უნიკალურ მოკავშირედ ხდის აღმოსავლეთ პარტნიორობის მთელს რეგიონში. “ - განაცხადა ირაკლი ღარიბაშვილმა. მთავრობის მეთაურმა ხაზგასმით აღნიშნა, რომ ადამიანის უფლებათა სამთავრობო სტრატეგია და 2020 წლის სოციალურ-ეკონომიკური განვითარება სრულად შეესაბამება ასოცირების ხელშეკრულებაში გაწერილ ვალდებულებებს. ევროკომისიის კოლეგიასთან შეხვედრას საქართველოს დელეგაციის წევრები ესწრებოდნენ. საქართველოს მთავრობის წარმომადგენლებმა და ევროკომისიის წევრებმა შეხვედრის დასასრულს ერთობლივი ფოტო გადაიღეს.

21 მაისი, 2014

შეხვედრა ევროკომისიის პრეზიდენტთან

საქართველოს 13 ივნისს ევროკომისიის პრეზიდენტი ჟოზე მანუელ ბაროზო ეწვევა - ვიზიტის დეტალები დღეს საქართველოს პრემიერ–მინისტრ ირაკლი ღარიბაშვილისა და ევროკომისიის პრეზიდენტს ჟოზე მანუელ ბაროზოს შორის ბრიუსელში გამართული შეხვედრის დროს განიხილეს. შეხვედრაზე მთავარი აქცენტი გაკეთდა ევროკავშირსა და საქართველოს შორის ასოცირების შესახებ შეთანხმების ხელმოწერის საკითხებზე. ასევე ყურადღება გამახვილდა საქართველოს ევროინტეგრაციის პროცესსა და ამ გზაზე მიღწეულ მნიშვნელოვან შედეგებზე. პრემიერ-მინისტრმა ევროკომისართან ისაუბრა საქართველოში მიმდინარე რეფორმებზე, დემოკრატიული ინსტიტუტებისა და კანონის უზენაესობის უზრუნველსაყოფად მთავრობის მიერ გატარებულ ღონისძიებებზე. მხარეებმა ასევე ყურადღება გაამახვილეს სავიზო რეჟიმის ლიბერალიზაციის სამოქმედო გეგმის განხორციელებაში მიღწეულ პროგრესზე.

21 მაისი, 2014

სამუშაო ვახშამი ჰარვარდის კლუბის წევრებთან

საქართველოს დელეგაციამ პრემიერ-მინისტრ ირაკლი ღარიბაშვილის ხელმძღვანელობით ბელგიის სამეფოში სამუშაო ვიზიტი ჰარვარდის კლუბის წევრებთან შეხვედრით დაიწყო. ვესტერლოს სასახლეში საქართველოს დელეგაციას პრინცმა მეროდემ უმასპინძლა. შეხვედრას ბიზნესსექტორის 100-მდე წარმომადგენელი დაესწრო. ვესტერლოს სასახლეში მიღებაზე იმყოფებოდა პრინცი ხუან ბაგრატიონი მეუღლესთან ერთად. ირაკლი ღარიბაშვილმა ვესტერლოს სასახლეში შეკრებილ საზოგადოებას სიტყვით მიმართა და პრინც მეროდეს მასპინძლობისთვის მადლობა გადაუხადა.

20 მაისი, 2014

"ქართულმა ოცნებამ" ჩოხატაურში კანდიდატები დაასახელა

"ქართულმა ოცნებამ“  ჩოხატაურის მუნიციპალიტეტის გამგებლობის კანდიდატი და მაჟორიტარი დეპუტატობის კანდიდატები დღეს დაასახელა. კინოთეატრ "გურიაში“ შეკრებილ საზოგადოებას მმართველი კოალიციის გამგებლობის კანდიდატი ირაკლი კუჭავა მაჟორიტარმა დეპუტატმა, თემურ ჭკუასელმა წარუდგინა: _ ირაკლი არის ღირსეული კანდიდატი. კანდიდატი, რომელიც ნამდვილად სჭირდება ჩოხატაურს, _ აღნიშნა ჭკუასელმა. ირაკლი კუჭავას თქმით, ის და მისი გუნდი ჩოხატაურისთვის ყველაფერს გააკეთებს. გუნდი კი, რომელიც კოალიციამ შეარჩია, ასე გამოიყურება: დაბაში მმართველ ძალას ზაალ მამალაძე წარადგენს, ბუკისციხეში _ ქეთევან სიხარულიძე, ამაღლებაში _ გოჩა სეხნიაშვილი, გოგოლესუბანში _ ვახტანგ ბერძენიშვილი, გორაბერეჟოულში _ დავით ტყეშელიაძე, გუთურში _ ლაშა თოლორდავა. დაბლაციხეში _ გოჩა ჯიქია, დიდივანში _ ვახტანგ გაჩეჩილაძე, ერკეთში _ რამაზ უჯმაჯურიძე, ზემოსურებში  _ ოთარ სოროზანიშვილი, ზემოხეთში _ ერეკლე უღრელიძე, ზომლეთში _ რეზო ვადაჭკორია, ზოტში _ უშანგი ართმელაძე, კოხნარში _ დათო ვაჩეიშვილი, ნაბეღლავში _ ალექსანდრე შარაშიძე, საჭამიასერში  _ ალეკო კვინტრაძე, ფარცხმაში _ მალხაზ ჩხიკვაძე, ქვენობანში _ დავით გუდავაძე, შუა ამაღლებაში _ ვლადიმერ სიხარულიძე, შუასურებში _ დავით ტრაპაიძე, ჯვარცხმაში _ მარინე ბერიძე, ხევში _ გოჩა _ თოდრია, ხიდისთავში _ მაია გიორგაძე, პარტიული ათეული, რომელიც შეხვედრაზე არ გაუჟღერებიათ, ასე გამოიყურება: ზაალ მამალაძე, გოჩა ჯიქია, დავით შარაშიძე, თამაზ ჯინჭარაძე, ზვიად მამალაძე, მაია გიორგაძე,  გია გვენეტაძე, მანანა მინდაძე, მაია პაიჭაძე და შალვა ჩანტლაძე. შეხვედრას ლანჩხუთის მაჟორტარი დეპუტატი, თემურ ჩხაიძე, ოზურგეთის მაჟორიტარი დეპუტატი, ზვიად კვაჭანტირაძე  და ნოდარ დუმბაძის ქალიშვილი, ქეთი დუმბაძე ესწრებოდნენ.

20 მაისი, 2014

შეხვედრა არქიტექტორებთან

კოალიცია „ქართული ოცნების“ თბილისის მერობის კანდიდატი დავით ნარმანია ძეგლთა პასპორტიზაციის ინიციატივით გამოდის. ინიციატივა დავით ნარმანიამ არქიტექტორებს დღეს გამართულ შეხვედრაზე გააცნო. თბილისის მერობის კანდიდატმა დედაქალაქის გენერალური გეგმის აუცილებლობაზე ისაუბრა და განაცხადა, რომ ქალაქის განაშენიანებასთან დაკავშირებით სწორი და მწყობრი პოლიტიკის შემუშავებაა საჭირო, რისთვისაც უნდა გაძლიერდეს კვალიფიციური არქიტექტორებისგან შემდგარი საკონსულტაციო საბჭო. „თქვენ ხართ ის ხალხი, რომელთა შეხედულებები და მაღალპროფესიული მიდგომები გადამწყვეტია დედაქალაქის საცხოვრებლად უსაფრთხო და კომფორტული გარემოს შექმნაში. ამიტომ მიმაჩნია, რომ ნებისმიერი საკითხი, იქნება ეს ძველი ქალაქის განახლება, თბილისური ეზოებისთვის ახალი სიცოცხლის მინიჭება, ამორტიზებული სახლების ახლით ჩანაცვლება, ახალი სამშენებლო პროექტების განხორციელება თუ სხვა, თქვენთან მჭიდრო თანამშრომლობით უნდა გადაწყდეს“ - მიმართა დავით ნარმანიამ არქიტექტორებს. დედაქალაქის მერობის კანდიდატმა არქიტექტორებს წინასაარჩევნო პროგრამის ძირითადი მიმართულებები გააცნო. მთავარი აქცენტი ქალაქის განაშენიანებასა და ისტორიულ უბნებზე გაკეთდა. არქიტექტორები ამ სფეროში წლების განმავლობაში არსებულ კრიზისზე საუბრობენ. აცხადებენ, რომ მათ წინადადებებს თბილისის მთავრობა არ იზიარებდა და დავით ნარმანიას გამარჯვების შემთხვევაში, მზად არიან დედაქალაქის ახალ მთავრობასთან თანამშრომლობისთვის.

20 მაისი, 2014

დაიწყო საქართველოს მთავრობის ვიზიტი ბელგიის სამეფოში

საქართველოს მთავრობა საქართველოს პრემიერ-მინისტრის ხელმძღანელობით სამუშაო ვიზიტით ბელგიის სამეფოს ეწვია. ბრიუსელში ვიზიტის ფარგლებში იგეგმება შეხვედრები ევროკომისიის პრეზიდენტთან. ორმხრივი შეხვედრის შემდეგ ირაკლი ღარიბაშვილი და ჟოზე მანუელ ბაროზო მედიისთვისგ განცხადებებს გააკეთებენ და მათ შეკითხვებს უპასუხებენ. დაგეგმილია შეხვედრა ევროკომისიის კოლეგიასთან. საქართველოს დელეგაციის წევრები ევროკომისიის წარმომადგენლებს ასოცირების ხელშეკრულების ხელმოწერისთვს თითოეული უწყების მიერ შესრულებულ სამუშაოებს გააცნობენ. იგეგმება ევროკავშირის ყოვლისმომცველი ინსტიტუციური განვითარების პროგრამის ფარგლებში დახმარების თაობაზე შეთანხმების ხელმოწერა. ევროკავშირის ინიციატივის - "აღმოსავლეთის პარტნიორობის" (EaP) პრიორიტეტების მხარდაჭერის მიზნით ევროკომისიის მიერ შემოთავაზებული იყო დახმარების ინსტრუმენტი - ყოვლისმომცველი ინსტიტუციონალური განვითარების პროგრამა (CIB), რომელიც მიზნად ისახავს პარტნიორი ქვეყნების ინსტიტუციონალური შესაძლებლობების გაძლიერებას და ასოცირების შესახებ შეთანხმებასთან (მათ შორის „ღრმა და ყოვლისმომცველი თავისუფალი სავაჭოს სივრცის შექმნის შესახებ ხელშეკრულებასთან" - DCFTA) დაკავშირებული ღონისძიებების მხარდაჭერას. ინსტრუმენტი ასევე ითვალისწინებს იმ ინსტიტუტების საქმიანობათა გაუმჯობესებას, რომლებიც დაკავშირებული არიან გამარტივებული სავიზო რეჟიმის და რეადმისიის შეთანხმებასთან და მიგრაციის საკითხებთან. CIB-ს ფარგლებში 2011-2013 წლებისთვის საქართველოსთვის გათვალისწინებული ბიუჯეტი 30.86 მილიონ ევროს შეადგენდა. დახმარების შემდეგი ეტაპი (2014-2020წწ), კონკრეტულად DCFTA (ღრმა და ყოვლისმომცველი თავისუფალი ვაჭრობის სივრცე) განხორციელებასთან არის დაკავშირებული. ვიზიტის ფარგლებში საქართველოს პრემიერ-მინისტრი შეხვედრას გამართავს ჰარვარდის კლუბის წარმომადგენლებთან. ვიზიტის დასასრულს ბელგიის სამეფოს ხელოვნებისა და ისტორიის სამეფო მუზეუმში გაიმართება საქართველოს დამოუკიდებლობის დღისადმი მიძღვნილი მიღება, სადაც დაგეგმილია საქართველოს პრემიერ-მინისტრის სიტყვით გამოსვლა. საქართველოს დელეგაციაში შედიან საქართველოს ვიცე-პრემიერი და ენერგეტიკის მინისრტი კახა კალაძე, საგარეო საქმეთა მინისტრი მაია ფანჯიკიძე, ეკონომიკისა და მდგრადი განვითარების მინისტრი გიორგი კვირიკაშვილი, იუსტიციის მინისტრი თეა წულუკიანი, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო ალექსი პეტრიაშვილი, სოფლის მეურნეობის მინისტრი შალვა ფიფია, შერიგებისა და სამოქალაქო თანასწორობის საკითხებში საქართველოს სახელმწიფო მინისტრი პაატა ზაქარეიშვილი.

19 მაისი, 2014

შეხვედრა დიდუბის ბაზრის მოვაჭრეებთან

კოალიცია „ქართული ოცნების“ თბილისის მერობის კანდიდატი დავით ნარმანია დღეს დიდუბის ბაზრის მოვაჭრეებს შეხვდა და მათ პრობლემებს ადგილზე გაეცნო. როგორც მოვაჭრეები აცხადებენ, მუშაობა შეუძლებელი ხდება, ბაზარს არ აქვს სახურავი, მიმდებარე ტერიტორიაზე მოსაწესრიგებელია გზა, რის გამოც, წვიმის დროს მომხმარებელი ვერ გადაადგილდება. მათივე თქმით, წლების განმავლობაში არაერთგზის მიმართვის მიუხედავად, დედაქალაქის მერია დიდუბის ბაზრის ადმინისტრაციას ტერიტორიის კეთილმოწყობის ნებას არ რთავდა. დავით ნარმანიამ მოვაჭრეებს წინასაარჩევნო პროგრამა გააცნო, დედაქალაქის მასშტაბით ბაზრების კეთილმოწყობის აუცილებლობაზე ესაუბრა და გამარჯვების შემთხვევაში პრობლემების მოგვარებას დაპირდა.

19 მაისი, 2014

პროექტის პრეზენტაცია

კოალიცია „ქართული ოცნების“ თბილისის მერობის კანდიდატმა დავით ნარმანიამ ინფრასტრუქტურული პროექტის „ახალი გზები თბილისის განტვირთვისთვის“ პრეზენტაცია გამართა. პროექტის ფარგლებში 3,5 კილომეტრიანი გზა გაიჭრება, რომლის მეშვეობითაც მუხრან მაჭავარიანის ქუჩა დაუკავშირდება მტკვრის მარჯვენა სანაპიროს და ვაშლიჯვარში მოძრაობას საგრძნობლად განტვირთავს. დავით ნარმანიამ პროექტი ბიზნესმენ მამუკა ხაზარაძეს გააცნო. ხაზარაძის თქმით, ახალი გზის გაყვანა შესაძლებელს გახდის ლისის ტბაზე არსებულ სამშენებლო კომპლექსში ინვესტიციის გაორმაგებას.

19 მაისი, 2014

სიახლე !

კოალიცია "ქართული ოცნების" თბილისის მერობის კანდიდატის, დავით ნარმანიას ფეისბუქ-გვერდზე ახალი აპლიკაცია "წინადადება დავით ნარმანიას" განთავსდა. რის საშუალებითაც ამომრჩეველს შეუძლია თბილისის პრობლემების და მათი მოგვარების შესახებ საკუთრი ხედვა გააცნოს კანდიდატს. იხილეთ ბმული

19 მაისი, 2014

შეხვედრა სოფელ ფონიჭალის მოსახლეობასთან

კოალიცია „ქართული ოცნების“ თბილისის მერობის კანდიდატი დავით ნარმანია კრწანისის მაჟორიტარი დეპუტატობის კანდიდატ ბექა ნაცვლიშვილთან ერთად სოფელ ფონიჭალის მოსახლეობას შეხვდა. სოფელს მოუწესრიგებელი ინფრასტრუქტურა, გაზიფიცირების, საბავშვო ბაღის, გარე განათების არქონა და დასუფთავების პრობლემა აწუხებს . დავით ნარმანია ფონიჭალელებს გაზიფიცირების საკითხის მოგვარებას პირდება.

18 მაისი, 2014

გამწვანების აქცია მახათას მთაზე

ეკოლოგიური მდგომარეობის გაუმჯობესებისა და ქალაქის განაშენიანების პროექტის ფარგლებში, კოალიცია ქართული ოცნების თბილისის მერობის კანდიდატმა დავით ნარმანიამ საკრებულოს მაჟორიტარი დეპუტატობის კანდიდატებთან ერთად მახათას მთაზე გამწვანების აქციაში მიიღო მონაწილეობა და ზეთისხილის ხეები დარგო. დავით ნარმანიას თქმით, მახათას მთა სიმბოლურად შეირჩა - ადგილი, სადაც მთელი ერი, ერთსულოვნებითა და თანადგომით აშენებს უდიდეს სულიერ კერას, ივერიის ღვთისმშობლის ტაძარს, სიმბოლურია ზეთისხილიც, როგორც მშვიდობისა და ერთობის სიმბოლო. „ტაძრის ეზოს ბაღში ზეთისხილის პირველი ნერგი საქართველოს კათოლიკოს-პატრიარქმა დარგო, ჩვენ ვაგრძელებთ ამ ინიციატივას, ასევე წარმატებით ვახორციელებთ ჩვენი პროგრამით გათვალისწინებულ ქალაქის განაშენიანების გეგმას“ - განაცხადა დავით ნარმანიამ. გამწვანების აქციაში „ქართული ოცნების“ ახალგაზრდული ფრთაც მონაწილეობდა.

18 მაისი, 2014

შეხვედრები ვაზისუბნის მოსახლეობასთან

კოალიცია „ქართული ოცნების“ თბილისის მერობის კანდიდატმა დავით ნარმანიამ ვაზისუბნის მოსახლეობას წინასაარჩევნო პროგრამა ისნის მაჟორიტარი დეპუტატობის კანდიდატ ირაკლი აბუსერიძესთან ერთად გააცნო და მათი პრობლემები მოისმინა. სპორტული ინფრასტრუქტურის დეფიციტი, საბაგირო, დაბინძურებული გარემო, სკოლისა და საბავშვო ბაღების სიმცირე, ვაზისუბნის მოსახლეობას პრობლემებს უქმნის. თბილისის მერობის კანდიდატი მოსახლეობას პირდება, რომ გამარჯვების შემთხვევაში, აღნიშნულ პრობლემებს მოაგვარებს და კვირაში ერთ დღეს მოქალაქეთა მიღების დღედ დააწესებს.

16 მაისი, 2014

შეხვედრა ექსპერტთა კლუბში

კოალიცია „ქართული ოცნების“ თბილისის მერობის კანდიდატმა, დავით ნარმანიამ დღეს ექსპერტებს წინასაარჩევნო პროგრამა წარუდგინა და მომავალი სამოქმედო გეგმა გააცნო. „დამოუკიდებელ ექსპერტთა კლუბში“ გამართულ შეხვედრაზე საუბარი შეეხო დედაქალაქში არსებულ ვითარებას. თბილისის მერობის კანდიდატმა პრობლემების მოგვარების გზებზე ისაუბრა და ექსპერტთა კლუბის წევრების რჩევები მოისმინა.

16 მაისი, 2014

კოალიცია „ქართული ოცნების“ თბილისის მერობის კანდიდატ დავით ნარმანია არქიტექტორებს შეხვდა

კოალიცია „ქართული ოცნების“ თბილისის მერობის კანდიდატ დავით ნარმანიასა და საბურთალოს მაჟორიტარ დეპუტატ გივი ჭიჭინაძეს მხარდამჭერთა დარბაზში დღეს მორიგი შეხვედრა არქიტექტორებთან ჰქონდათ. დავით ნარმანიამ არქიტექტორებს ქალაქის განაშენიანების გეგმა გააცნო და მათგან რეკომენდაციები მოისმინა. თბილისის მერობის კანდიდატმა ყურადღება გაამახვილა კულტურული მემკვიდრეობის ძეგლების მდგომარეობაზე და ამ პრობლემის გადაჭრის გზებზე ისაუბრა. თავის მხრივ, არქიტექტორებმა დავით ნარმანიას, გამარჯვების შემთხვევაში თბილისის მერიის არქიტექტურის სამსახურში ცვლილებების განხორციელება სთხოვეს და მასთან თანამშრომლობის სურვილი გამოთქვეს.

16 მაისი, 2014

შეხვედრები ვარკეთილისა და სამგორის მოსახლეობასთან

კოალიცია „ქართული ოცნების“ თბილისის მერობის კანდიდატმა დავით ნარმანიამ ვარკეთილის და მოსკოვის გამზირის მოსახლეობას წინასაარჩევნო პროგრამა ვარკეთილის მაჟორიტარი დეპუტატობის კანდიდატ ია მაკასარაშვილთან და სამგორის რაიონის დეპუტატობის კანდიდატ ლია ჯახველაძესთან ერთად გააცნო და მათი პრობლემები მოისმინა. საკანალიზაციო სისტემის გაუმართაობა, სატრანსპორტო პრობლემა, დაზიანებული საცხოვრებელი სახლები და კორპუსებიდან ცენტრალურ გზამდე მისასვლელი გზები მოსახლეობას პრობლემას უქმნის. დედაქალაქის მცხოვრებლები სანიაღვრე სისტემის გაუმართაობაზე საუბრობენ და აღნიშნავენ, რომ ძლიერი წვიმის დროს გადაადგილება შეუძლებელია. დავით ნარმანიამ მოსახლეობას პრობლემის მოგვარების გზებზე ესაუბრა და არჩევნებში გამარჯვების შემთხვევაში, მათ მოგვარებას დაპირდა.

16 მაისი, 2014

თბილისის მერობის კანდიდატის განაცხადის შეტანა ცესკოში

კოალიციამ „ქართული ოცნება“ ცესკოში დღეს თბილისის მერობის კანდიდატის განაცხადი, ასევე მაჟორიტარი და პროპორციული სიები შეიტანა. სიები საარჩევნო შტაბის იურიდიული სამსახურის უფროსმა თედო კობახიძემ წარადგინა. რეგისტრირებული პარტიებისთვის სიების შეტანის ვადა დღეს 6 საათზე იწურება.

16 მაისი, 2014

სამძიმარი თურქ ხალხს

ვიცე- პრემიერი კახა კალაძე და კოალიცია „ქართული ოცნების“ თბილისის მერობის კანდიდატი დავით ნარმანია   თურქეთის საელჩოში იმყოფებოდნენ. მათ მწუხარება გამოთქვეს თურქეთში, ქალაქ სომაში მომხდარი ტრაგედიის გამო და სამძიმრის წიგნში შესაბამისი ჩანაწერი გააკეთეს.

16 მაისი, 2014

პრემიერ-მინისტრის სამძიმარი

საქართველოს პრემიერ-მინისტრმა ირაკლი ღარიბაშვილმა თურქეთში მომხდარი ტრაგედიის გამო თურქეთის ხელისუფლებას და საქართველოში თურქეთის ელჩს ზექი ლევენთ გუმრუქჩუს მიუსამძიმრა.  პრემიერი დღეს თურქეთის რესპუბლიკის საელჩოში იმყოფებოდა, სადაც სამძიმრის წიგნში ჩანაწერი გააკეთა.  ირაკლი ღარიბაშვილი საქართველოს მთავრობის სახელით თანაუგრძნობს თურქეთის რესპუბლიკის მთავრობას, თურქ ხალხს, დაღუპულთა ოჯახებს და ამ დიდი განსაცდელის დროს გამძლეობას უსურვებს.

15 მაისი, 2014

კანდიდატების წარდგენა დმანისში

დმანისში კოალიცია „ქართული ოცნების “ გამგებლობისა და მაჟორიტარი დეპუტატობის კანდიდატები დასახელდნენ დმანისის გამგებლობის კანდიდატი გოგი ბარბაქაძე პარლამენტის წევრმა, გია ვოლსკიმ წარადგინა. დღესვე, მუნიციპალიტეტის 16 ტერიტორიული ორგანოს მაჟორიტარი დეპუტატების კანდიდატებიც წარადგინეს. გამგებლობის კანდიდატმა ადგილობრივებს წინასაარჩევნო პროგრამა გააცნო და არსებული პრობლემების მოგვარების გზებზე ისაუბრა. გოგი ბარბაქაძემ სამოქმედო გეგმის პრიორიტეტებად სოფლების გაზიფიცირება, საბავშვო ბაღების მოწესრიგება და მცირე ბიზნესის ხელშეწყობა დაასახელა.

15 მაისი, 2014

პროპორციული სიის პრეზენტაცია

საარჩევნო ბლოკ „ქართული ოცნების“ თბილისის საკრებულოს დეპუტატობის კანდიდატების 25 კაციანი პროპორციული სია „ქართული ოცნების“ საარჩევნო შტაბის ხელმძღვანელმა კახა კალაძემ „მთაწმინდის პარკში“ წარადგინა. „ჩვენ მოკლე ხანში დავამტკიცეთ, რომ ვართ ადამიანზე ორიენტირებული, პასუხისმგებლიანი, კანონმორჩილი ძალა, რომლისთვისაც დაუძლეველი ბარიერი არ არსებობს. ჩვენ ვაშენებთ ჩვენს მომავალს, რომელიც მოვიპოვეთ და დავიმსახურეთ თქვენთან ერთად! ყველამ ერთად სიყვარულით და ერთობით მივიყვანოთ ჩვენი გამარჯვება ბოლომდე! ერთად ავაშენოთ საქართველო! ერთად ვიზრუნოთ თბილისზე! ერთად ავაშენოთ თბილისი! ერთად ვიზრუნოთ საქართველოზე!- განაცხადა კახა კალაძემ . თბილისის მერობის კანდიდატმა დავით ნარმანიამ დეპუტატობის კანდიდატებს წარმატება უსურვა და განაცხადა, რომ „ქართული ოცნება“ გუნდური მუშაობით და საერთო მიზნისკენ სწრაფვით წარმატებას მიაღწევს. „ჩვენი ქალაქის საკეთილდღეოდ ძალისხმევას არ დავიშურებთ. ჩვენ მზად ვართ ერთად ვიზრუნოთ თბილისსა და საქართველოზე“, - აღნიშნა დავით ნარმანიამ.