24 აპრილი, 2014

დავით ნარმანია ხილიანის ქუჩის მოსახლეობას შეხვდა

კოალიცია „ქართული ოცნების“ თბილისის მერობის კანდიდატი დავით ნარმანია დღეს ხილიანის ქუჩის მაცხოვრებლებს შეხვდა და მოსახლეობის პრობლემებს ადგილზე გაეცნო. დავით ნარმანიას განცხადებით, ვაკე-საბურთალოს დამაკავშირებელმა გზამ და ავტომანქანების ნაკადის სიჭარბემ ქვეითად მოსიარულეთა უსაფრთხო გადაადგილება თითქმის შეუძლებელი გახადა, რადგან თბილისის ამჟამინდელმა მთავრობამ სწორად ვერ დაგეგმა და მოაწყო ქვეითებისთვის საფეხმავლო ბილიკი. დავით ნარმანია მოსახლეობას პრობლემის მოგვარების კონკრეტულ გზებს სთავაზობს, რისთვისაც მისი თქმით, მომზადდება შესაბამისი საპროექტო დოკუმენტაცია. მოქმედი გზის ნაწილი ჩამოიჭრება, ეზო და პარკირების ადგილი მოეწყობა და ხევზე საბურთალოს ახალ გზასთან დამაკავშირებელი ხიდი აშენდება. გარდა ამისა, დავით ნარმანიას განცხადებით, მომზადდება ქალაქის განაშენიანების გენერალური გეგმა. მისივე თქმით, უკვე მზად არის 10 პროექტი, რომელთა პრეზენტაცია მოსახლეობასთან ერთად, ქალაქის 10 უბანში გაიმართება. „ეს არის მზა პროექტები, რომლებსაც ტენდერების გამოცხადებისა და სამუშაოების დაწყების გარდა არაფერი სჭირდება“- განაცხადა ნარმანიამ.

22 აპრილი, 2014

დავით ნარმანიამ თბილისის ქუჩები დაათვალიერა

კოალიცია „ქართული ოცნების“ თბილისის მერობის კანდიდატი დავით ნარმანია დღეს ავლაბარსა და მეტროსადგურ "ვარკეთილის" მიმდებარე ქუჩებში არსებულ ვითარებას გაეცნო. სანიაღვრე სისტემის გაუმართაობა და საავტომობილო გზებზე ასფალტის საფარის არარსებობა, ავტომანქანით გადაადგილებას განსაკუთრებით წვიმის დროს აფერხებს. დავით ნარმანიას განცხადებით, არჩევნებში გამარჯვების შემთხვევაში, მისი უპირველესი ამოცანა ქალაქში მიწისქვეშა კომუნიკაციების, სანიაღვრე არხების მოწესრიგება და გზებზე ასფალტის საფარის დაგება იქნება. „თითქმის მთელ ქალაქში ასეთი პრობლემებია. განსაკუთრებით წვიმის დროს რთულდება გადაადგილება. ბევრი სახლია, სადაც, სანიაღვრე სისტემის გაუმართაობის გამო, წყალი შედის. სადაც მოხსნილია დაზიანებული გზის საფარი“- აცხადებს ნარმანია. მისივე თქმით, მერია ვალდებულია, გზის საფარი, მოხსნიდან 24 საათში დააგოს.

21 აპრილი, 2014

დავით ნარმანიამ დაღუპულთა ხსოვნას პატივი მიაგო

კოალიცია „ქართული ოცნების“ თბილისის მერობის კანდიდატი დავით ნარმანია მუხათგვერდის ძმათა სასაფლაოზე თავდაცვის მინისტრ ირაკლი ალასანიასთან ერთად მივიდა და საქართველოს ტერიტორიული მთლიანობისთვის დაღუპულთა ხსოვნას პატივი მიაგო. "დღეს მოვედით აქ, რათა გავიხსენოთ და პატივი მივაგოთ იმ გმირებს, რომლებმაც საქართველოს ერთიანობას შეწირეს თავი, რითაც კიდევ მეტი პასუხისმგებლობა დაგვაკისრეს ჩვენი ქვეყნის ინტერესების დაცვის გზაზე. ჩვენ ჩვენს შვილებს უნდა მოვუყვეთ მათი გმირობის შესახებ“ - განაცხადა დავით ნარმანიამ. თბილისის მერობის კანდიდატმა დაღუპულთა ოჯახებს აღდგომის ბრწყინვალე დღესასწაული მიულოცა, დღეგრძელობა, სიმხნევე და გამძლეობა უსურვა.

14 აპრილი, 2014

დავით ნარმანიამ სამინისტროდან პირადი ნივთები წამოიღო

თბილისის მერობის კანდიდატი დავით ნარმანია აცხადებს, რომ ადგილობრივი თვითმმართველობის არჩევნები დემოკრატიულ გარემოში უნდა ჩატარდეს. მისი თქმით, საჭიროა შესრულდეს უწყებათაშორისი კომისიის რეკომენდაციები. მისივე თქმით, მნიშვნელოვანია, რომ გატარებული რეფორმის შედეგად ვირჩევთ მერებსა და გამგებლებს. გარდა ამისა, ცალკეული რეგიონებისთვის მომზადებულია სტრატეგია. ნარმანია მიიჩნევს, რომ თვითმმართველობის რეფორმა რამდენიმეწლიანი პროცესია და მომავალშიც უნდა გაგრძელდეს. უკვე ყოფილმა მინისტრმა პირადი ნივთები ჩაალაგა და პროექტ „მოხეტიალე წიგნების“- სთვის საკუთარი ბიბლიოთეკიდან წიგნებიც შეარჩია.

14 აპრილი, 2014

დავით ნარმანია „ მოხეტიალე წიგნების" აქციაში ჩაერთო

თბილისის მერობის კანდიდატი დავით ნარმანია „ მოხეტიალე წიგნების" აქციაში ჩაერთო. ვაჟა-ფშაველას პოემათა კრებული, თომას მანის „ჯადოსნული მთა" და მერობის კანდიდატის, დავით ნარმანიას მიერ დაწერილი „საზოგადოებრივი ადმინისტრირების საფუძვლები" მკითხველს დედაქალაქის ქუჩებში უკვე ელოდება. რეგიონული გავითარებისა და ინფრასტრუქტურის ყოფილმა მინისტრმა თანამშრომლებთან დამშვიდობების შემდეგ წიგნები თბილისის სხვადასხვა ადგილას დატოვა.

14 აპრილი, 2014

დავით ნარმანია საარჩევნო კამპანიას იწყებს

რეგიონული მართვისა და ინფრასტრუქტურის მინისტრი დავით ნარმანია მინისტრის რანგში დღეს მთავრობის ბოლო სხდომას დაესწრო. თბილისის მერობის კანდიდატი დავით ნარმანია საარჩევნო კამპანიას იწყებს. პრემიერ-მინისტრმა ირაკლი ღარიბაშვილმა დავით ნარმანიასკოალიციის სახელით მადლობა გადაუხადა მინისტრობის პერიოდში გაწეული სამუშაოსთვის და განაცხადა, რომ დარწმუნებულია მის გამარჯვებაში. “ვამაყობ, რომ ვიყავი ამ გუნდის წევრი, რომელიც გასული პერიოდის განმავლობაში ერთგულად ემსახურა ქვეყანას და ასევე განაგრძობს. ჩვენ გადავიტანეთ ძალიან რთული პოლიტიკური კოჰაბიტაცია და რომ არა ერთიანობა, ასეთი შედეგები არ გვექნებოდა. გისურვებთ წარმატებას და ქვეყნის საბოლოო გამარჯვებამდე მიყვანას. მიგულეთ თქვენს გვერდით“, - მიმართა დავით ნარმანიამ მინისტრთა კაბინეტს. დავით ნარმანიამ მისი მინისტრობის პერიოდში გაწეული სამუშაოები შეაჯამა.

14 აპრილი, 2014

დავით ნარმანია თანამშრომლებს დაემშვიდობა

თბილისის მერობის კანდიდატმა დავით ნარმანიამ რეგიონული მართვისა და ინფრასტრუქტურის სამინისტროს თანამშრომლებს მადლობა გადაუხადა კოჰაბიტაციის რთულ პერიოდში ერთობლივად გატარებული აქტიური მუშაობისთვის და იმედი გამოთქვა, რომ თანამშრომლობა გაგრძელდება როგორც დედაქალაქის მერიასთან, ისე სხვა სტრუქტურებთან. ნარმანიამ კომენტარი მის შემცვლელზეც გააკეთა და ელგუჯა ხოკრიშვილს წარმატება უსურვა.

13 აპრილი, 2014

შეხვედრა საპარლამენტო უმრავლესობასთან

მნიშვნელოვანია, რომ თვითმმართველობის არჩევნებმა ჩაიაროს მშვიდ და სტაბილურ გარემოში, -ამის შესახებ საქართველოს პრემიერ-მინისტრმა ირაკლი ღარიბაშვილმა საპარლამენტო უმრავლესობასთან შეხვედრის დროს განაცხადა. მისივე თქმით, ხელისუფლების მთავარი ამოცანაა, არჩევნები დემოკრატიულ გარემოში ჩატარდეს.  მორიგ სამუშაო შეხვედრაზე საუბარი შეეხო თვითმმართველობის არჩევნებთან დაკავშირებულ საკითხებს, ასევე მომავალ კვირაში პარლამენტში განსახილველ კანონპროექტებს.

13 აპრილი, 2014

დავით ნარმანია ბზობის აღსანიშნავად თაბორის მონასტერში მივიდა

ბზობის ბრწყინვალე დღესასწაულის აღსანიშნავად, საქართველოს რეგიონული განვითარებისა და ინფრასტრუქტურის მინისტრი, დავით ნარმანია, ოჯახთან ერთად, თაბორის მონასტერში მივიდა.  „ბზობა ერთ-ერთია იმ დღესასწაულებს შორის, რომელსაც ქრისტიანული სამყარო დიდი სიხარულით აღნიშნავს. მინდა, მოგილოცოთ ეს დღე, გისურვოთ ყველაფერი საუკეთესო და მოგიწოდოთ, გავუფრთხილდეთ ღვთის ყველაზე დიდ საჩუქარს - ჩვენ გარემოს, გავუფრთხილდეთ ბზას, რომელიც საქართველოში ამ დღესასწაულის უცვლელი შემადგენელია“, - განაცხადა მინისტრმა.  დავით ნარმანია თაბორის მონასტერში ქოთანში ჩარგული ბზით მივიდა. საქართველოს პატრიარქი, ხელისუფლება მოსახლეობას ამ ენდემური ჯიშის გადარჩენისკენ მოუწოდებენ.  დღესვე, საქართველოს რეგიონული განვითარებისა და ინფრასტრუქტურის მინისტრი წმინდა სამების ტაძარში დაესწრო წირვას, რომელიც საქართველოს კათოლიკოს-პატრიარქმა ილია მეორემ ჩაატარა.