ჩვენს ქვეყანას აღარ სჭირდება დაპირისპირება და სიძულვილი; ჩვენ გვჭირდება სიმშვიდე და სისწრაფე განვითარებაში; სწორედ ამის პირობას და გარანტიას ვიძლევით, - ამ სიტყვებით მიმართა საქართველოს პრემიერ-მინისტრმა გიორგი კვირიკაშვილმა ახმეტის მოსახლეობას, რომელსაც „ქართული ოცნება - დემოკრატიული საქართველოს“ მაჟორიტარი დეპუტატობის კანდიდატი გელა სამხარაული წარუდგინა. მთავრობის მეთაურის თქმით, დღეს უმთავრესი ამოცანაა, არც ერთი წუთი აღარ გაცდეს და სწრაფი ნაბიჯებით ყველა ოჯახში მივიდეს კეთილდღეობა. „დავასრულოთ სიგიჟეები, ერთმანეთის ჭამა, დაპირისპირება, გავერთიანდეთ მომავლის ხედვით, სიყვარულით, მთელი საზოგადოება ერთ მუშტად შევიკრათ და გავაკეთოთ ის, რაც ჩვენს ქვეყანას სჭირდება. დღეს ამ თვალსაზრისით „ქართული ოცნება“ უალტერნატივოა. გავერთიანდეთ, იმისთვის, რომ უზრუნველვყოთ ჩვენი შვილების უკეთესი მომავალი, ჩვენი მოხუცების უკეთესი სიბერე და ყველა ჩვენგანის შესაძლებლობების რეალიზაცია“, - განაცხადა გიორგი კვირიკაშვილმა. პრემიერ-მინისტრის შეფასებით, დღეს უკვე ჩაყრილია საფუძველი, რათა ყველა ოჯახმა იგრძნოს კეთილდღეობა და მომავალი ოთხი წლის განმავლობაში ეს აუცილებლად მიიღწევა. გიორგი კვირიკაშვილმა ისაუბრა ჯანდაცვისა და სოფლის მეურნეობის პროგრამებზე, ასევე ადგილობრივი წარმოების განვითარების მნიშვნელობაზე და გამოყო პროგრამა „აწარმოე საქართველოში“, რომლის ფარგლებში, ახალი საწარმოს შექმნის ყველა მსურველს, სახელმწიფო ქონება სიმბოლურ ფასად გადაეცემა, ხოლო სახელმწიფო 50%-იან გარანტიაში შედის კომერციულ ბანკთან, რათა მსესხებელს -ახალ მეწარმეს გირაო გაუმარტივოს. „ეს ყველაფერი იმისთვის კეთდება, რომ მომავალი ოთხი წლის განმავლობაში ყველამ ვიგრძნოთ შედეგი იმისა, რისი საფუძველიც ერთად ჩავყარეთ“, - განაცხადა გიორგი კვირიკაშვილმა. პრემიერის თქმით, სტაბილურობის გარეშე სამომავლო გეგმებზე საუბარი შეუძლებელია. „გონივრული საგარეო პოლიტიკით შევძელით დასავლეთთან კიდევ უფრო დაახლოება და ავიცილეთ საფრთხეები რუსეთთან მიმართებაში. შემდგომი ნაბიჯია საუბარი ურთიერთობების ნორმალიზაციაზე, მაგრამ ტერიტორიული მთლიანობის და ჩვენი ქვეყნის სუვერენიტეტის საკითხებში კომპრომისი ვერ იქნება“, - აღნიშნა პრემიერ-მინისტრმა. მთავრობის მეთაურმა ასევე ისაუბრა ოთხპუნქტიანი რეფორმების გეგმაზე, რომელიც ეკონომიკის განვითარებასთან ერთად, განათლების სისტემაში, მმართველობასა და ინფრასტრუქტურის მოდერნიზაციაში ფუნდამენტურ ცვლილებებს გულისხმობს. გიორგი კვირიკაშვილი რეგიონის ტურისტულ და სატრანზიტო პოტენციალსაც შეეხო და აღნიშნა, რომ მთავრობას ამ მიმართულებით, ძალიან საინტერესო გეგმები აქვს. პრემიერმა აღნიშნა, რომ მნიშვნელოვანი ცვლილებები განხორციელდება თუშეთის ტურისტული პოტენციალის განვითარებისა და მთიანი რეგიონების შემაერთებელი გზების მშენებლობის მხრივაც. ახმეტის მოსახლეობას სიტყვით ასევე მიმართა მაჟორიტარი დეპუტატობის კანდიდატმა გელა სამხარაულმა. მაჟორიტარობის კანდიდატმა აღნიშნა, რომ „ქართული ოცნების“ ხელისუფლების გადაწყვეტილებით ახმეტაში ვითარდება ინფრასტრუქტურა, როგორც საგზაო, ასევე შემდგომში ლოჯისტიკური თვალსაზრისით და ამ ყველაფერს ტურიზმის განვითარება მოჰყვება. „ასევე, მინდა აუცილებლად ავღნიშნო და კიდევ ერთხელ გაგახსენოთ, ძალიან დიდი დანაშაული წინა ხელისუფლების, რაც ახმეტელების მისამართით ჩაიდინა. მოგეხსენებათ, ხე-ტყის მრეწველობა ახმეტისთვის ყოველთვის ტრადიციული დარგი იყო და უამრავი ადამიანი იყო ამ მიმართულებით დასაქმებული. როდესაც გაყიდეს გრძელვადიანი ლიცენზია და ფაქტობრივად, ეს რესურსი აღარ გახდა ხელმისაწვდომი ახმეტელებისთვის, პირიქით, მას შემდეგ უბედურების მომტანიც კი არის ზოგიერთი ოჯახისთვის. ამ საკითხზე სწორედ, პრემიერთან შეთანხმებით, ჩვენ ვმუშაობთ. დღეს რა ხდება რეალობაში, ეს რესურსი იჭრება, მორის სახით გადის დასავლეთ საქართველოში, იქ იხერხება და იყიდება უცხოეთში, იმის მაგივრად, რომ აქ ადგილზე ამუშავებულიყო წარმოება, აქ ადგილზე დასაქმებულიყო ხალხი, თან უამრავი ამ მიმართულების სპეციალისტი ცხოვრობს ახმეტაში, მათ ეს სიკეთე არ ადგებათ. ამიტომ, ჩვენ უახლოეს მომავალში, სწორედ ზეგ გვექნება შეხვედრა ამ საკითხზე გარემოს დაცვის სამინისტროში და გვინდა, რომ წარმოგიდგინოთ უკვე ახალი ხედვა, თუ როგორ შეიძლება სწორედ ჩვენი ხელისუფლების, სახელმწიფოს ჩარევით, ეს რესურსი გახდეს ხელმისაწვდომი და ახმეტას კვლავ დაუბრუნდეს ის ფუნქცია, რომ ადგილზე შეიქმნას დამატებული ღირებულება და გახდეს სიკეთე ჩვენი მოსახლეობისთვის. გეგმები მართლაც ძალიან ბევრი გვაქვს“,-განაცხადა გელა სამხარაულმა. მაჟორიტარობის კანდიდატი დარწმუნებულია, რომ თითოეულ ადამიანს გათვითცნობიერებული აქვს „ქართული ოცნების“ ხედვა და 8 ოქტომბერს სწორ არჩევანს გააკეთებენ. „მე მჯერა თქვენი სიბრძნის, მჯერა იმის, რომ თქვენ გააკეთებთ რეალურ არჩევანს და მხარს დაუჭერთ „ქართულ ოცნებას“,-აღნიშნა გელა სამხარაულმა.

    ჩვენ მხოლოდ და მხოლოდ სიყვარულით ვაპირებთ სიარულს; ჩვენი საზოგადოება ამ დაპირისპირებას, ერთმანეთის ლანძღვა-გინებას და კონფრონტაციას ვეღარ აიტანს, -ამ სიტყვებით მიმართა საქართველოს პრემიერ-მინისტრმა გიორგი კვირიკაშვილმა ლაგოდეხის მოსახლეობას, რომელსაც „ქართული ოცნება - დემოკრატიული საქართველოს“ მაჟორიტარი დეპუტატობის კანდიდატი გურამ მაჭარაშვილი წარუდგინა. მთავრობის მეთაურმა აღნიშნა, რომ მთავარია, დასრულდეს სიძულვილი და საფუძველი ჩაეყაროს ნორმალურ ურთიერთობებს. „ჩვენ არ ვართ სიძულვილის ხალხი, ჩვენ ხომ ადამიანის მოყვარული ერი ვართ. ჩვენ ხომ დღემდე მხოლოდ ერთიანობით მოგვიტანია თავი. მაშ, რა დაგვემართა ამ ბოლო დროს, რა ვირუსი ჩაისახა ასეთი, რომ ვეღარ დავძლიოთ ერთმანეთის სიძულვილი. ნუთუ არ შეიძლება, ადამიანებმა ნორმალურად ისაუბრონ, არგუმენტებით იპაექრონ და არ იყოს ერთმანეთის პიროვნული შეურაცხყოფა. ჩვენ ხომ, გარდა იმისა, რომ ევროპელები ვართ, კავკასიელები ვართ და ჩვენთვის პიროვნული შეურაცხყოფა ძალიან მძიმეა. ჩვენ ყოველ საღამოს ჩვენს ოჯახებთან უნდა მივიდეთ და ჩვენს ბავშვებს ჩავხედოთ თვალებში. სწორედ ამიტომ, გვინდა, სხვებს მივცეთ მაგალითი, რომ ასეთი სტილის პოლიტიკა საქართველოში უნდა დასრულდეს. უნდა დასრულდეს პოლიტიკა, როდესაც ადამიანის ღირსება არაფრად ღირს. ჩვენ განვითარების ისეთი დინამიკა უნდა შევქმნათ, ისე გავაფერადოთ და ავაგუგუნოთ ჩვენი ქვეყანა, რომ არც ერთი ადამიანის ზურგზე არ გადავიაროთ, რადგან არც ერთი გზა და ესტაკადა არ ღირს არც ერთი დაჩაგრული ადამიანის შვილის ცრემლად. ეს არის ჩვენი მთავარი პრინციპი და უზენაესი, რის გარშემოც ვერთიანდებით“, - განაცხადა პრემიერ-მინისტრმა. გიორგი კვირიკაშვილის თქმით, ახლა საჭიროა სწრაფი განვითარება იმისთვის, რომ თითოეულ ოჯახში მივიდეს სიკეთე და კეთილდღეობა, თითოეულმა ოჯახმა იგრძნოს ქვეყანაში განვითარების პროცესი. მთავრობის მეთაური დარწმუნებულია, რომ ოთხი წლის თავზე, როგორც ფიზიკურად, ასევე სულიერად, თვისობრივად ახალ საქართველოს მივიღებთ. „ჩვენთვის მთავარია, დავასრულოთ სიძულვილი და საფუძველი ჩავუყაროთ ნორმალურ ურთიერთობებს, ნორმალურ პოლიტიკას. თუნდაც, ავიღოთ მეზობლებთან მიმართებაში - დიახ, ჩვენ გვაქვს უმწვავესი პრობლემები, ოკუპაციის პრობლემა, ათასობით ადამიანი დაიღუპა საქართველოს ერთიანობისთვის ბრძოლაში, მაგრამ მიუხედავად ამისა, ჩვენი შვილების, ჩვენი მომავალი თაობის წინაშე, არ გვაქვს არანაირი მორალური უფლება, ჩვენს ემოციებს გადავაყოლოთ მათი მომავალი. როგორი რთულიც არ უნდა იყოს, ჩვენ უნდა დავსხდეთ მოლაპარაკების მაგიდასთან და უზრუნველვყოთ, რომ თავიდან ავიცილოთ უარესი მომავალში, თავიდან ავიცილოთ რისკები. ჩვენ უნდა შევქმნათ სტაბილური, მშვიდი მომავლის პერსპექტივა, რათა ადამიანები, დილით გაღვიძების შემდეგ, საუზმის დროს არ უყურებდნენ წინა საღამოს პოლიტიკურ თოქ-შოუს, თუ როგორ ჭამენ ადამიანები ერთმანეთს, არამედ ფიქრობდნენ იმაზე, რა გააკეთონ საკუთარი ოჯახისთვის, საკუთარი ქვეყნისთვის და უკეთესი მომავლისთვის. ასეთი ადამიანები ვართ ჩვენ და ასეთი საქართველო გვინდა“, - განაცხადა პრემიერ-მინისტრმა. გიორგი კვირიკაშვილის თქმით, „ქართულ ოცნებას“ სურს ქვეყანა, სადაც ადამიანებს უსამართლოდ არ ჩაგრავენ, სადაც უკეთესი ქვეყანა შენდება ისე, რომ მოქალაქეების ღირსება არ ილახება. პრემიერ-მინისტრმა ასევე ისაუბრა ჯანდაცვისა და სოფლის მეურნეობის სფეროში განხორციელებულ მნიშვნელოვან ცვლილებებზე. მისი შეფასებით, დღეს უპრეცედენტოდ დიდი ყურადღება ეთმობა მცირემიწიან ფერმერთა დახმარებას საგაზაფხულო ხვნა-თესვაში, არსებობს გრძელვადიანი შეღავათიანი კრედიტები, მრავალწლიანი ნარგავების გაშენების სპეციალური პროგრამა - „დანერგე მომავალი“, კოოპერატივების წახალისების პროგრამა. „კოოპერატივი ძვირფასია ჩვენთვის, რადგან კოოპერაცია გულისხმობს იმას, რომ ადამიანები ინარჩუნებენ თავიანთ საკუთრებას და ერთიანი სახელმწიფო პროგრამის ქვეშ ხდება სასოფლო-სამეურნეო წარმოების გამსხვილება ისე, რომ არც ერთი ადამიანი არ კარგავს საკუთრებას თავის მიწასა და ქონებაზე. ამ მიდგომის შედეგად, ჩვენ ძალიან მნიშვნელოვანი საფუძველი ჩავუყარეთ ადგილობრივი წარმოების განვითარებას. ორი დღის წინ, მე შევხვდი 150 სრულიად ახალ ფერმერს, რომლებმაც ამ პროგრამების შედეგად შექმნეს ახალი სასოფლო-სამეურნეო წარმოებები. ვიღაცეები იკითხავენ, სად არის ქარხნები, საიდანაც ბოლი ამოდისო. ძალიან მნიშვნელოვანია და არაფრით ნაკლებია მეცხოველეობის ფერმა, ყველის ახალი საწარმო და ა.შ. 150 ასეთი ადამიანი, ზოგიერთი - მსხვილი, ზოგიერთი წვრილი ფერმერი საუბრობდა იმაზე, როგორ დაიწყეს ნულიდან ახალი ცხოვრება, შექმნეს ახალი საწარმო და როგორ უზრუნველყოფენ არა მხოლოდ თავიანთ ოჯახებს, არამედ ასაქმებენ ათობით და ასობით ადამიანს“, - განაცხადა გიორგი კვირიკაშვილმა და აღნიშნა, რომ სწორედ ეს არის ის საფუძველი, რომელიც მთავრობის ოთხპუნქტიან სამოქმედო გეგმასთან ერთად, დღეიდან ოთხი წლის თავზე თვისობრივად განსხვავებულ ქვეყანას შექმნის.ლაგოდეხის მოსახლეობას სიტყვით ასევე მიმართა ვიცე-პრემიერმა, „ქართული ოცნება-დემოკრატიული საქართველოს“ გენერალურმა მდივანმა კახა კალაძემ და აღნიშნა, რომ მმართველმა გუნდმა თითოეულ ადამიანს დაუბრუნა ყველაზე მთავარი- ღირსება და თავისუფლება. „ძალიან მიხარია, რომ ამდენი გულანთებული თანამოაზრე შევიკრიბეთ დღეს. ჩვენ 4 წლის განმავლობაში, 2012 წლის 1 ოქტომბრიდან მოვახერხეთ ყველაზე მთავარი და მნიშვნელოვანი, ჩვენი ქვეყნის მოქალაქეებს, თითოეულ ადამიანს დავუბრუნეთ ღირსება, თავისუფლება. მე მეამაყება ნამდვილად, რომ დღეს ჩვენი ქვეყნის თითოეული მოქალაქე არის თავისუფალი, დღეს ქვეყანაში განსხვავებული აზრის გამო ადამიანებს არ დევნიან. განსხვავებული პოლიტიკური შეხედულებების გამო ადამიანები არ იდევნებიან, არ აშანტაჟებენ მათ. ჩვენ დავამტკიცეთ ძალიან მოკლე დროში, რომ თურმე შესაძლებელი ყოფილა ქვეყნის მართვა რეპრესიების გარეშე, ტერორის გარეშე, ადამიანების ჩაგვრის გარეშე და ჩვენ გაძლევთ პირობას, რომ საქართველოში არასდროს არ დაბრუნდება ისეთი მთავრობები, ხელისუფლებები, რომლებიც შეურაცხყოფას მიაყენებენ თავიანთ მოქალაქეებს, გათელავენ მათ ღირსებას. ჩვენთვის მთავარი და მნიშვნელოვანია ადამიანი, ადამიანის კეთილდღეობა, ყველა ჩვენი გადადგმული ნაბიჯი არის განპირობებული თქვენი სიყვარულით, ჩვენი მოქალაქეების, სამშობლოს სიყვარულით“,-განაცხადა კახა კალაძემ. ვიცე-პრემიერმა „ქართული ოცნების“ ხელისუფლების მიერ განხორციელებულ პროექტებზე ისაუბრა. „ შეიძლება ამ 4 წლის განმავლობაში შეცდომები იყო, ამისგან დაზღვეული არავინ არის, თუმცა ძალიან ბევრი მნიშვნელოვანი პროექტი განხორციელდა. 4 წლის წინ საფუძველი ჩაეყარა ძლიერი, ეკონომიკურად განვითარებული ქვეყნის მშენებლობას. ჩვენ გვყავს ძალიან ძლიერი, პროფესიონალი ადამიანებით დაკომპლექტებული გუნდი, გვყავს ძლიერი პრემიერ-მინისტრი, ჩვენი ლიდერი, რომელიც არის საქმეზე, ქვეყნის მოქალაქეების კეთილდღეობაზე ორიენტირებული. მე დარწმუნებული ვარ თქვენი თანადგომით, ჩვენი ერთსულოვნებით აუცილებლად გავიმარჯვებთ, და ეს იქნება გამარჯვება არა მხოლოდ ჩვენი მხარდამჭერების, არამედ სრულიად საქართველოსი, ეს იქნება იმ დემოკრატიული გზის გაგრძელება, რომელიც ჩვენ 2012 წლის 1 ოქტომბერს ყველამ ერთად დავიწყეთ“,-აღნიშნა კახა კალაძემ. მაჟორიტარი დეპუტატობის კანდიდატმა, გურამ მაჭარაშვილმა პრემიერ-მინისტრ გიორგი კვირიკაშვილს, ვიცე-პრემიერს კახა კალაძესა და „ქართული ოცნების“ გუნდს გამოცხადებული ნდობისთვის მადლობა გადაუხადა. „ჩემთვის ძალიან დიდი პატივი და პასუხისმგებლობაა ვიყო ლაგოდეხისა და ყვარლის რაიონის მაჟორიტარი დეპუტატი. „ქართულმა ოცნებამ“ თავისი საქმით დაამტკიცა, რომ მისთვის მნიშვნელოვანი და მთავარი მიზანია თქვენი და თქვენი ოჯახების კეთილდღეობა. ჩემთვის, როგორც ამ კუთხის შვილისათვის, ასევე ძალიან მნიშვნელოვანია, რომ ლაგოდეხის და ყვარლის, რა თქმა უნდა, მთლიანად საქართველოს კეთილდღეობა, რაც შეიძლება სწრაფი ტემპით განვითარდეს. მე თითქმის ორი კვირაა ინტენსიურად ვხვდები მოსახლეობას, საზოგადოების სხვადასხვა ფენის წარმომადგენლებს. პირადად ვეცნობი მათ პრობლემებს. მინდა გითხრათ, რომ მათი განწყობა საკმაოდ ოპტიმისტურია, იმედიანი განწყობა აქვთ. სწამთ და ჯერათ, რომ „ქართული ოცნება“, მისი მაჟორიტარი დეპუტატი, შეძლებს ყველაფერს, გამოიყენებს მთელ თავის რესურს იმისათვის, რომ ამ კუთხეში და მთლიანად საქართველოში, სწრაფად განვითარდეს ყველა ის მიმართულება, რაც დაწყებულია 4 წლის განმავლობაში და რაც მომდევნო ოთხი წლის განმავლობაში აუცილებლად გაგრძელდება. ასევე დაიწყება ახალი, საზოგადოებაზე, ბიზნესის განვითარებაზე ორიენტირებული პროექტები. როგორც ბატონმა პრემიერმა აღნიშნა, ჩვენთვის ძალიან მნიშვნელოვანია, რომ მოხდეს ეკონომიკის განვითარება,ამიტომ გარწმუნებთ, თუ ჩვენ ერთად ვიდგებით, აუცილებლად მივაღწევთ მიზანს და არ არსებობს ძალა, რომელიც ამაში ჩვენ ხელს შეგვიშლის“,-განაცხადა გურამ მაჭარაშვილმა.

იყავით იმედიანები, რადგან ჩვენი ხვალინდელი დღე აუცილებლად იქნება დღევანდელზე უკეთესი- "ქართული ოცნება- დემოკრატიული საქართველოს" თავმჯდომარემ, პრემიერ-მინისტრმა გიორგი კვირიკაშვილმა ხობში მოსახლეობას "ქართული ოცნება-დემოკრატიული საქართველოს" მაჟორიტარობის კანდიდატი ირაკლი ბერაია წარუდგინა.  "აბსოლუტურად გულწრფელად მინდა ვთქვა, რომ მე ნამდვილად მშურს, ქალაქ ხობის თითოეული მოქალაქის, ვინაიდან მათ ეყოლებათ ასეთი ადამიანი საქართველოს პარლამენტში. მე ირაკლის ვიცნობ თითქმის ათი წელია, იგი მუშაობდა საბანკო სექტროში და ყოველთვის ძალიან გამორჩული თანამშრომელი იყო, ყოველთვის იყო ლიდერი იქ სადაც მუშაობდა და იყო ყოველთვის შეუცვლელი იმ ადგილას, სადაც მუშაობდა.ის გახლავთ ძალიან გულისხმიერი ადამიანი და გულისხმიერება არის ყველაზე მნიშვნელოვანი მაჟორიტარი დეპუტატისთვის, ამიტომ მინდა წარმატება ვუსურვო მას",-განაცხადა პრემიერმა.  "მიხარია დღეს თქვენთან ერთად ყოფნა. დღეს ჩვენ ჩამოვედით იმისთვის, რომ გამცნოთ გარკვეული ცვლილება მოხდა. გოდერძი ბუკიამ, რომელიც არის ჩვენი მეგობარი, გუნდის წევრი, ძალიან ღირსეული გადაწყვეტილება მიიღო, ვინაიდან იგი საკმაოდ მასშტაბურ პროექტებს ახორციელებს, და ვინაიდან ეს უკავშირდება სახელმწიფო საპარტნიორო ფონდის ჩართულობას, მივიღეთ გადაწყვეტილება, რომ ამ ეტაპზე, თავი შეეკავებინა მაჟორიტარული არჩევნებისგან. რა თქმა უნდა, იგი რჩება ჩვენი გუნდის მხარდამჭერად და მისი აქ ყოფნაც ამის დასტურია. ეს იყო მისი ღირსეული გადაწყვეტილება უმაღლესი ეთიკური ნორმებით ნაკარნახევი და მინდა მას წარმატება ვუსურვო", - განაცხადა პრემიერ-მინისტრმა.  გიორგი კვირიკაშვილმა მოსახლეობასთან შეხვედრაზე ყურადღება გაამახვილა სახელმწიფოს მიერ დაფინანსებულ პროგრამებზე. პრემიერის თქმით, მნიშვნელოვანია, რომ სახელმწიფო ახალგაზრდებს საკუთარ ბიზნესიდეებს უფინანსებს, ყოველგვარი გირაოს გარეშე. "გუშინ, ჩემთვის ძალიან ბედნიერი დღე იყო. ჩვენ, პირველად დამოუკიდებელი საქართველოს ისტორიაში, დავაჯილდოვეთ მეორე წყება "სტარტაპის" გამარჯვებულების, დამწყები ბიზნესის განვითარების ფონდის, რომელიც სულ ორიოდე წლის წინ შეიქმნა და ყველა ახალგაზრდას აძლევს საშუალებას, მათი მშობლების თუ წინაპრების ქონების დაგირავების გარეშე, მხოლოდ და მხოლოდ საინტერესო იდეით მოიპოვონ დაფინანსება და დაიწყონ საკუთარი ბიზნესი. ეს არის საქართველოს განვითარებისთვის წინგადადგმული ნაბიჯი. ეს იყო ჩემს ცხოვრებაში უბედნიერესი დღე, როდესაც დავაჯილდოვეთ 34 გამარჯვებული ახალგაზრდა და ისინი გახდებიან მეწარმეები. ასევე, სულ რაღაც ორი კვირის წინ, ჩვენ ასევე დავაჯილდოვეთ 20 მაღალტექნოლოგიური, ახალი იდეის ავტორი ახალგაზრდა. დიდი სიხარულია, როდესაც უყურებ ამ ახალგაზრდებს, რომლებსაც ეძლევათ შესაძლებლობა, ყველანაირი გირაოს გარეშე წამოიწყონ ბიზნესი. ახლა, მივემგზავრები დარჩელში, სადაც მეწარმეებთან მექნება შეხვედრა. ესენი არიან სრულიად ახალი სასოფლო-სამეურნეო საწარმოს წარმომადგენლები, რომლებმაც ჩვენი სამთავრობო პროგრამებით მოიპოვეს დაფინანსება და წამოიწყეს ბიზნესი. ეს არის აბსოლუტურად სხვაგვარი ეკონომიკის შექმნა საქართველოში და არის სხვა შესაძლებლობები ჩვენი მოქალაქეებისთვის. მინდა, ყველა თქვენგანს მოვუწოდო, იყავით იმედიანები, იმიტომ, რომ ჩვენი ხვალინდელი დღე აუცილებლად იქნება დღევანდელზე უკეთესი. ამის ჩვენ გვჯერა და ეს არის რეალობა", - განაცხადა კვირიკაშვილმა.  ხობის მოსახლეობას "ქართული ოცნების" მაჟორიტარობის კანდიდატმაც მიმართა. "მოგესალმებით, ძვირფასო ხობელებო. ძვირფასო ზუგდიდელებო. ჩემთვის დიდი პატივია თქვენს წინაშე წარდგენა. მინდა დიდი მადლობა გადაუხადო პრემიერს გიორგი კვირიკაშვილს, ვიცე-პრემიერს კახი კალაძეს და მთელ მმართველ გუნდს. მეძლევა შესაძლებლობა, ვიყო წარმომადგენელი საქართველოს პარლამენტში საზოგადოებასა და ხელისუფლებას შორის, რისთვისაც თქვენი მხარდაჭერა და თანადგომა მჭირდება. დეპუტატობა ჩემთვის არის შესაძლებლობა, ვემსახურო მშობლიურ მხარეს, საზოგადოებას, რომელიც ძალიან ძვირფასი და ღირებულია", - განაცხადა ირაკლი ბერაიამ.

პირობას გაძლევთ, საქართველოში ვერასდროს დაბრუნდებიან ისეთი ხელისუფლებები, რომლებიც საკუთარ მოქალაქეებზე იძალადებენ, - ეს განცხადება „ქართული ოცნება - დემოკრატიული საქართველოს“ საარჩევნო შტაბის უფროსმა, ვიცე-პრემიერმა კახა კალაძემ მუხრანში, ადგილობრივ მოსახლეობასთან შეხვედრაზე განაცხადა. „ჩვენ ერთად ძალიან რთული გზა გამოვიარეთ ამ 4 წლის განმავლობაში. ძალიან ბევრი მნიშვნელოვანი რეფორმა განვახორციელეთ ერთად. მე ნამდვილად მეამაყება ის, რომ ჩვენს ქვეყანაში დღეს თითოეული მოქალაქის უფლებები არის დაცული. ჩვენი მთავარი მონაპოვარი არის ის, რომ ჩვენი ქვეყნის მოქალაქეებს მივეცით თავისუფლება. დღეს საქართველოში განსხვავებული აზრის გამო ადამიანები არ იდევნებიან; განსხვავებული პოლიტიკური შეხედულებების გამო ადამიანებს ქუჩაში ხელკეტებით არ დასდევენ. მე ნამდვილად მეამაყება ის მშვიდი საარჩევნო გარემო, რომელიც თითოეული ჩვენგანის დამსახურებაა. ჩვენ კარგად გვახსოვს, 2011-12 წლებში, როცა ჩვენ საარჩევნო კამპანიას ვატარებდით, როგორი ზეწოლა იყო. ჩვენდა საუბედუროდ, თითოეულმა ჩვენგანმა ეს საკუთარ თავზე, ოჯახზე, მეგობრებზე, ახლობლებზე გამოვცადეთ, თუმცა საამაყოა ის, რომ ეს ყველაფერი ჩვენ წარსულს ჩავაბარეთ. გაძლევთ პირობას, საქართველოში არასდროს და ვერასდროს დაბრუნდებიან ისეთი ხელისუფლებები, რომლებიც იძალადებენ თავიანთ მოქალაქეებზე და დააშანტაჟებენ მათ“, - განაცხადა კალაძემ. სიტყვით გამოსვლისას კახა კალაძემ „ქართული ოცნების“ სამომავლო გეგმებზე ისაუბრა და აღნიშნა, რომ პარტია „ქართული ოცნება - დემოკრატიული საქართველოს“ გამარჯვება საპარლამენტო არჩევნებში საქართველოს თითოეული მოქალაქის გამარჯვება იქნება. „საჭიროა ერთად დგომა, ჩვენი ერთსულოვნება იმისთვის, რომ ჩვენ მივაღწიოთ გამარჯვებას. ეს გამარჯვება არ იქნება მხოლოდ ჩვენი მხარდამჭერების, ეს სჭირდება ჩვენს ქვეყანას, მის სწორ განვითარებას. ამ გუნდის გამარჯვებასთან პირდაპირ კავშირშია საქართველოს მოქალაქეების გამარჯვება. ჩვენ ამას შევძლებთ და აუცილებლად გავიმარჯვებთ ჩვენი ხვალინდელი დღისთვის“, - დასძინა კახა კალაძემ. მან წარმატებები უსურვა „ქართული ოცნების“ მაჟორიტარი დეპუტატობის კანდიდატს მცხეთის მუნიციპალიტეტში დიმიტრი ხუნდაძეს. „ეს რაიონი იქნება ყველაზე წარმატებული რაიონი, თითოეული მოქალაქის ჯანმრთელობა იქნება დაცული. მუხრანში 2 კვირაში იქნება ყველაზე თანამედროვე ბაღის აშენება. იწყება შიდა საუბნო გზების რეაბილიტაცია. წყლის სარეაბილიტაციო სამუშაოები მალე დასრულდება და ვპირდები, რომ ყველა ოჯახში იქნება წყალი, ჯანსაღი ცხოვრების წესი დამკვიდრდება მუხრანში. ვიწყებთ სტადიონების აშენებას”, - განაცხადა ხუნდაძემ.

„ჩვენ ვატარებთ ჩვენი ქვეყნის ისტორიაში ყველაზე თავისუფალ და სამართლიან არჩევნებს. ჩვენ გვაქვს პრეტენზია, ყველას მიეცეს შესაძლებლობა, რომ არჩევნები ჩაატაროს მშვიდ და თავისუფალ გარემოში, ყველანაირი ზეწოლისა და ხელშეშლის გარეშე, - ამის შესახებ საქართველოს ვიცე-პრემიერმა, „ქართული ოცნება - დემოკრატიული საქართველოს“ გენერალურმა მდივანმა კახა კალაძემ საერთაშორისო ურთიერთობების საკითხებში ევროპარლამენტის სოციალისტებისა და დემოკრატების პროგრესული ალიანსის ჯგუფის ვიცე-პრეზიდენტ კნუტ ფლეკენშტაინთან შეხვედრის დასრულების შემდეგ განაცხადა. „კნუტ ფლეკენშტაინი ჩვენი ქვეყნის ნამდვილი მეგობარი და მხარდამჭერია. ევროპელი „სოციალისტების“ პარტია „ქართული ოცნების“ პარტნიორია და ჩვენთვის ძალიან მნიშვნელოვანია ეს თანამშრომლობა. სამომავლოდ ამ ურთიერთობების კიდევ უფრო გაღრმავებას ვგეგმავთ, რაც კიდევ უფრო მეტად დაეხმარება ჩვენს ქვეყანას ევროპასთან დაახლოების გზაზე. თქვენ იცით, რომ ჩვენ ბოლო წლების განმავლობაში ძალიან ბევრი მნიშვნელოვანი რეფორმა განვახორციელეთ და დარწმუნებული ვართ, რომ ძალიან მალე საქართველოს მოქალაქეები შეძლებენ ევროპაში მოგზაურობას ვიზების გარეშე და ამ მიმართულებით მინდა კიდევ ერთხელ ძალიან დიდი მადლობა გადავუხადო „სოციალისტებსა“ და „დემოკრატებს“ მხარდაჭერისთვის. დარწმუნებული ვარ, ჩვენ ძალიან მალე გვექნება იმის შესაძლებლობა, რომ საქართველოს მოქალაქეები ვიზების გარეშე იმოგზაურებენ ევროპულ ქვეყნებში“, - განაცხადა კახა კალაძემ შეხვედრის დასრულების შემდეგ. კახა კალაძის თქმით, კნუტ ფლეკენშტაინს ექნება შესაძლებლობა დღის განმავლობაში გამართოს სხვადასხვა შეხვედრა, დააკვირდეს საარჩევნო პროცესის მიმდინარეობას და თავად შეაფასოს საარჩევნო გარემო. „ყველა პოლიტიკურ პარტიას, ყველა პოლიტიკურ სუბიექტს ეძლევა იმის შესაძლებლობა, რომ გააცნოს თავიანთი ხედვები ქვეყნის განვითარებისა ჩვენი ქვეყნის მოსახლეობას და თავად საქართველოს მოქალაქეებმა არჩევნების გზით მიიღონ გადაწყვეტილება, როგორც ეს ევროპულ, ნორმალურ, განვითარებულ ქვეყნებშია, თუ ვინ უნდა იყოს ქვეყნის ხელისუფლებაში. მოხარულები ვართ, რომ ჩვენი მეგობრები ქვეყანაში მიმდინარე დემოკრატიულ პროცესებს ხედავენ, სათანადოდ აფასებენ და აფიქსირებენ თავიანთ მხარდაჭერას. მე კიდევ ერთხელ ძალიან დიდი მადლობა მინდა გადავუხადო ბატონ კნუტ ფლეკენშტაინს“, - აღნიშნა კახა კალაძემ. „დღეს საქართველოს სტუმრობს ევროპული სოციალისტებისა და დემოკრატიული ჯგუფის ვიცე-პრეზიდენტი, ბატონი კნუტ ფლეკენშტაინი, რომელიც ჩვენი ქვეყნის ნამდვილი მეგობარი და მხარდამჭერია. ევროპელი სოციალისტების პარტია, პარტია „ქართული ოცნების“ პარტნიორია და ჩვენთვის ძალიან მნიშვნელოვანია ეს თანამშრომლობა. სამომავლოდ ამ ურთიერთობების კიდევ უფრო გაღრმავებას ვგეგმავთ, რაც კიდევ უფრო მეტად დაეხმარება ჩვენს ქვეყანას ევროპასთან დაახლოების გზაზე. თქვენ იცით, რომ ჩვენ ბოლო წლების განმავლობაში ძალიან ბევრი მნიშვნელოვანი რეფორმა განვახორციელეთ და დარწმუნებული ვართ, რომ ძალიან მალე საქართველოს მოქალაქეები შეძლებენ ევროპაში მოგზაურობას ვიზების გარეშე და ამ მიმართულებით მინდა კიდევ ერთხელ ძალიან დიდი მადლობა გადავუხადო სოციალისტებსა და დემოკრატებს მხარდაჭერისთვის. დარწმუნებული ვარ, ჩვენ ძალიან მალე გვექნება იმის შესაძლებლობა, რომ საქართველოს მოქალაქეები ვიზების გარეშე იმოგზაურებენ ევროპულ ქვეყნებში“,-განაცხადა „ქართული ოცნება-დემოკრატიული საქართველოს“ გენერალურმა მდივანმა. „ ჩვენ ვიმყოფებით ისეთ ქვეყანაში, სადაც მართლა ძალიან კარგად ჩამოყალიბებული საარჩევნო გარემოა, - ამის შესახებ საქართველოს ევროპარლამენტის "სოციალისტებისა და დემოკრატების პროგრესული ალიანსის" ჯგუფის ვიცე-პრეზიდენტმა საერთაშორისო ურთიერთობების საკითხებში კნუტ ფლეკენშტაინმა „ქართულ ოცნებაში“ გამართულ შეხვედრაზე განაცხადა. “ჩვენ „სოციალ-დემოკრატებმა“ კარგად ვიცით, რომ თქვენმა ხელისუფლებამ ძალიან კარგი სამუშაო შეასრულა და ძალიან დაუახლოვა ამ ყველაფერმა თქვენი ქვეყანა ევროკავშირს. მეორე მხრივ, ჩვენ ვიმყოფებით ისეთ ქვეყანაში, სადაც მართლა ძალიან კარგად ჩამოყალიბებული საარჩევნო გარემოა”, - განაცხადა კნუტ ფლეკენშტაინმა. კნუტ ფლეკენშტაინმა საქართველოში წინასაარჩევნო გარემო შეაფასა : „ადამიანებს აქვთ შესაძლებლობა, შეადარონ ეს ყველაფერი ერთმანეთს. შეიძლება ცალკეულ შემთხვევებში ხდებოდეს გარკვეული შეცდომები, მაგრამ არა იმ მოცულობით, რომელმაც შეიძლება მოაღწიოს ჩვენამდე-ბრუსელამდე. თუ ცალკეული შეცდომები ხორციელდება, უნდა აღიკვეთოს განურჩევლად იმისა, თუ ვინ არის ხელისუფლებაში. დღეს არის ისეთი ატმოსფერო, რომელიც მე მომწონს, ისიც მომწონს, რომ ოპოზიციამაც თქვა სტრასბურგში, რომ ჩვენ მხარს ვუჭერთ ხელისუფლებას ვიზალიბერალიზაციის საკითხში", - აღნიშნა კნუტ ფლეკენშტაინმა. კნუტ ფლეკენშტაინმა იმედი გამოთქვა, რომ ვიზალიბერალიზაციის მინიჭების პროცესი საქართველოსთვის ძალიან მალე პოზიტიურად დასრულდება. „მოხარული ვიქნები, საქართველოს ბევრი მოქალაქე ჩემს მშობლიურ ჰამბურგში უვიზოდ მივიღო, - ამის შესახებ საქართველოს ევროპარლამენტის "სოციალისტებისა და დემოკრატების პროგრესული ალიანსის" ჯგუფის ვიცე-პრეზიდენტმა საერთაშორისო ურთიერთობების საკითხებში კნუტ ფლეკენშტაინმა „ქართულ ოცნებაში“ გამართულ შეხვედრაზე განაცხადა. მისი თქმით, ძალიან სასიამოვნოა საქართველოში ჩამოსვლა და იმ პროგრესის ნახვა, რომელსაც ქვეყანამ მიაღწია. „არ არსებობს საფუძველი, თავი შეიკავონ ვიზალიბერალიზაციის მინიჭებისგან. ხვალ ძალიან მნიშვნელოვანი სხდომაა ბრიუსელში. „კონსერვატორებმაც“ ევროპარლამენტში ცალსახად და მკაფიოდ თქვეს, რომ მომწიფდა სიტუაცია ვიზალიბერალიზაციისთვის, დადგა დრო ამის განსახორციელებლად. ძალიან შთამბეჭდავი იყო, როდესაც საქართველოს პრეზიდენტი იმყოფებოდა სტრასბურგში სხვადასხვა პარტიის წარმომადგენლებთან ერთად და ყველა პარტიამ, განურჩევლად მათი ორიენტაციისა, ცალსახად მხარი დაუჭირა სწრაფ ვიზალიბერალიზაციას და არანაირი განსხვავებული აზრი არ დაფიქსირებულა”, - აღნიშნა კნუტ ფლეკენშტაინმა. მისივე თქმით, ევროპარლამენტი და ევროკავშირის წევრი სახელმწიფოების მთავრობები დაობენ იმაზე, ვის უნდა ქონდეს ბოლო სიტყვის უფლება. „მე ვფიქრობ, რომ ეს გამოსავალი იქნება, მე ვიცი გერმანიის ფედერალური კანცლერისაგან, ქალბატონი მერკელისაგან და საგარეო საქმეთა მინისტრ შტაინმაერისაგან, როგორ იბრძვიან ამ შიდა გაუგებრობის აღმოსაფხვრელად. მე მართლაც მოხარული ვიქნები, მივიღო საქართველოს ბევრი მოქალაქე ჩემს მშობლიურ ჰამბურგში უვიზოდ”, - განაცხადა კნუტ ფლეკენშტაინმა.

საქართველოში ვიზიტად მყოფი ევროპარლამენტის სოციალისტებისა და დემოკრატების პროგრესული ალიანსის ჯგუფის ვიცე-პრეზიდენტი კნუტ ფლეკენშტაინი, „ქართული ოცნება-დემოკრატიული საქართველოს“ გლდანის საარჩევნო შტაბს ეწვია. ფლეკენშტეინმა თავისი ვიზიტის მიზნებზე ისაუბრა და წარმატებები უსურვა "ქართულ ოცნებას" და ლევან კობერიძეს მომავალ საპარლამენტო არჩევნებში. „ამ მთავრობას აქვს ქვეყნის განვითარების ოთხპუნქტიანი გეგმა, რომლის ნაწილი გერმანიაში უკვე განხორციელებულია და დარწმუნებული ვარ ამ პროგრამის განხორციელებაში ისეთივე წარმატებულები იქნებით როგორიც გერმანიაა. ლევანმა ძალიან ბევრი რამ გააკეთა კერძო სექტორში, ძალიან მნიშვნელოვანია ისეთი კანდიდატის არჩევა, რომელმაც იცის თუ რამდენად მნიშვნელოვანია სამუშაო ადგილების შექმნა და აქვს კონკრეტული გამოცდილება ამ პრობლემის გადასაწყვეტად. ასეთი ღირსეული კანდიდატია ლევანი“. - განაცხადა კნუტ ფლეკენშტაინმა. ლევან კობერიძემ „ქართული ოცნება-დემოკრატიული საქართველოს“ გლდანის 22-ე ოლქის საარჩევნო შტაბი გახსნა და ისაუბრა რაიონის განვითარების გეგმაზე. „ყველაზე მთავარი, რასაც მე ხაზს ვუსვამ არის ის, რომ მე მუხიანელ, გლდანელ მოსახლეობასთან ერთად ყველაფერს გავაკეთებ იმისათვის რომ გლდანი და მუხიანი გახდეს ერთ-ერთი ყველაზე წარმატებული, მიმზიდველი და პრესტიჟული უბანი თბილისში“. -განაცხადა მაჟორიტარობის კანდიდატმა, ლევან კობერიძემ.

„ქართული ოცნება-დემოკრატიული საქართველოს“ გენერალური მდივანი კახა კალაძე ევროპარლამენტის სოციალისტებისა და დემოკრატების პროგრესული ალიანსის ჯგუფის ვიცე-პრეზიდენტს საერთაშორისო ურთიერთობების საკითხებში კნუტ ფლეკენშტაინს შეხვდა. პარტიის ცენტრალურ ოფისში გამართულ შეხვედრას ასევე ესწრებოდნენ პარტიის აღმასრულებელი მდივანი ირაკლი კობახიძე და პოლიტიკური საბჭოს წევრები- სოფო კილაძე, ირინა ფრუიძე, თამარ ჩუგოშვილი.გარემო არის გაცილებით უკეთესი ვიდრე წლების წინ იყო“. - განაცხადა კნუტ ფლეკენშტაინმა. „ჩვენ შევთანხმდით დეტალებზე, როგორ უნდა ითანამშრომლოს არამარტო ევროპის სოციალ-დემოკრატიულმა სისტემამ და ჩვენმა პოლიტიკურმა გუნდმა, არამედ ცალკეული ქვეყნებს შორის თანამშრომლობის სისტემაზე და სტრატეგიულ მიმართულებებზე შევთანხმდით. შევაფასეთ საქართველოში წინასაარჩევნო კამპანიის მიმდინარეობა“. - განაცხადა გიორგი ვოლსკიმ. შეხვედრის მონაწილეებმა პოზიტიურად შეაფასეს საქართველოსთვის ვიზალიბერალიზაციის პროცესი და მისი წარმატებით დასრულების იმედი გამოთქვეს. „ძალიან მიხარია, რომ ამ საკითხში ყველა პარტია ერთად დგას, მათ შორის საქართველოს პრეზიდენტიც, მე მას შევხვდი სტრასბურგში, მან გამოთქვა სურვილი რომ რაც შეიძლება მალე დასრულდეს ვიზალიბერალიზაციის პროცესი საქართველოსთვის. თქვენი ქვეყანა ნამდვილად იმსახურებს ვიზალიბერალიზაციას“. - განცხადა კნუტ ფლეკენშტაინმა.

საქართველო მისი რეგიონებისა და მოქალაქეების მათემატიკური ჯამი არ არის და ჩემი აზრით, არ არის სწორი ის, რომ ონს, ამბროლაურს, ცაგერს, ლენტეხს, მესტიას ერთი წარმომადგენელი ჰყავდეს, - ეს განცხადება საქართველოს პრემიერ-მინისტრმა გიორგი კვირიკაშვილმა ონის მოსახლეობასთან შეხვედრისას გააკეთა, სადაც „ქართული ოცნება - დემოკრატიული საქართველოს“ მაჟორიტარობის კანდიდატი გოჩა ენუქიძე წარადგინა.  მთავრობის მეთაური საქართველოში მთის რეგიონების მათემატიკური დაჯამებით კმაყოფილი არ არის, ვინაიდან მიიჩნევს, რომ თითოეულ კუთხეს გააჩნია საკუთარი უნიკალური, თვითმყოფადი კულტურა, რომელიც განსაკუთრებულ ყურადღებას იმსახურებს. პრემიერ-მინისტრი მოსახლეობას დაჰპირდა, რომ შემოდგომაზე ამბროლაურის აეროდრომი გაიხსნება, ხოლო ტერმინალის მშენებლობა წლის ბოლომდე დასრულდება. „განსაკუთრებულ ყურადღებას მივაქცევთ და მათ შორის სახელმწიფო რესურსებს გამოვყოფთ შოვისა და უწერის ინფრასტრუქტურის განვითარებაზე. ეს ძალიან მნიშვნელოვანია იმისთვის, რომ თითოეულმა მოქალაქემ, რომელიც აქ ცხოვრობს, იგრძნოს ის სიკეთე, რომლის შეუქცევადი განვითარების საფუძველი, დღეს უკვე ჩაყრილია. გვაქვს ძალიან აქტიური დიალოგი საერთაშორისო საფინანსო ინსტიტუტებთან და ვაპირებთ, მომავალი ოთხი წლის განმავლობაში, გარდა იმისა, რაც იხარჯება, დამატებით 5 მილიარდ დოლარამდე დაიხარჯოს საქართველოს ინფრასტრუქტურის სწრაფ განვითარებაში - ეს არის არა მხოლოდ სატრანზიტო გზები, არამედ ტურისტული ინფრასტრუქტურა და მთავარი ტურისტული მიმართულებების გზები“, - განაცხადა პრემიერმა.  გიორგი კვირიკაშვილის თქმით, მმართველი გუნდისთვის მთავარია ადამიანების ღირსება, ის თავისუფლება, რომელიც ქართველმა ხალხმა თავდაუზოგავ ბრძოლაში მოიპოვა. „დღეს აღარ ერჩიან ბიზნესებს, არ იბარებენ ფინანსურ პოლიციაში, არ სთხოვენ მობილური ტელეფონის დაშლას შესასვლელში - ეს ყველაფერი ჩვენ გავიარეთ და წარსულში დარჩა“, - განაცხადა პრემიერ-მინისტრმა.  მთავრობის მეთაურმა ასევე ისაუბრა საქართველოში დამწყები ბიზნესის განვითარების ფონდის შექმნის შესახებ, რომელიც ქვეყანაში მეწარმეობის სულისკვეთების შექმნას და ახალგაზრდა, დამწყები ბიზნესმენების წახალისებას ისახავს მიზნად. პირველ გამარჯვებულ კომპანიებს გიორგი კვირიკაშვილი დღეს შეხვდება. „ეს არის უპრეცენდენტო ფონდი, რომელიც სპეციალურად ახალგაზრდებისთვის ქმნის დაფინანსების მოპოვების საშუალებას, ყოველგვარი გირაოსა და უზრუნველყოფის გარეშე. მსგავსი რამ საქართველოში არ ყოფილა. ფონდი შეიქმნა საუკეთესო უცხოელი ექსპერტების მონაწილეობით და მას ძალიან დიდი მომავალი აქვს, იმისთვის, რომ ახალგაზრდა ინიციატივიანმა ადამიანებმა შეძლონ საკუთარი საქმის წამოწყება, რა თქმა უნდა, განათლებასთან ერთად“, - განაცხადა პრემიერ-მინისტრმა. ონის მოსახლეობასთან სიტყვით გამოსვლისას „ქართული ოცნება-დემოკრატიული საქართველოს“ მაჟორიტარი დეპუტატობის კანდიდატმა გოჩა ენუქიძემ რაჭის უდიდეს პოტენციალს გაუსვა ხაზი. „მზად ვარ ავიღო ეს პასუხისმგებლობა. მე ვარ და ვიქნები თქვენი ოჯახების მეგობარი და თქვენი ინტერესების დამცველი საქართველოს პარლამენტში. ჩემს ცოდნას, უნარს, წლების განმავლობაში დაგროვილ გამოცდილებას, ჩემს ხელთ არსებულ ყველა ბერკეტს, გამოვიყენებ იმისათვის, რომ იგრძნოთ უკეთესობა. როგორც იცით, რაჭა-ლეჩხუმი და სვანეთი ერთ ოლქად გაერთიანდა, მაგრამ მე ონში მეყოლება წარმომადგენელი, რომელიც კონკრეტულად ონის პრობლემატიკაზე იმუშავებს. რაჭას გააჩნია უდიდესი ტურისტული პოტენციალი. ჩვენ ერთობლივი ძალებით უნდა შევქმნათ თანამედროვე გარემო, შევქმნათ სამუშაო ადგილები, შევაჩეროთ მიგრაციის პროცესი, განვავითაროთ ტურიზმი, მეცხოველეობა, გონივრულად ავითვისოთ ჰიდრორესურსები, გადავწყვიტოთ სოციალური პრობლემები, რაც კეთილდღეობისა და წარმატებული ყოფა-ცხოვრების მომტანი იქნება თითოეული თქვენგანისთვის. წელს პირველი შემთხვევაა, როდესაც პირველ კლასელთა რაოდენობა გაიზარდა წინა წლებთან შედარებით და ეს არის ძალიან სასიხარულო ფაქტი. უნდა გვახსოვდეს, რომ მთის კეთილდღეობა არის ქვეყნის კეთილდღეობა“,-განაცხადა გოჩა ენუქიძემ.

მინდა, სიამაყით ვთქვა, რომ დღეს აღარ არსებობს ნაპრალი ჩვენს ხალხსა და ჩვენს შორის და ადამიანის ღირსება არის ის უზენაესი, რაზეც არის დამყარებული ყველაფერი საქართველოში, - ამის შესახებ საქართველოს პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა ლენტეხის მოსახლეობასთან შეხვედრისას განაცხადა, სადაც გაერთიანებული ოლქის მაჟორიტარობის კანდიდატი გოჩა ენუქიძე წარადგინა. პრემიერმა გასული ოთხი წლის განმავლობაში განხორციელებულ მნიშვნელოვან ცვლილებებზე ისაუბრა და აღნიშნა, რომ დღეს საარჩევნო გარემო თავისუფალია. „დღეს ქვებით არავის ხვდებიან. ცალკეული ინციდენტების გარდა, მთლიანად, საარჩევნო კამპანია მშვიდობიანია. სატელევიზიო სივრცეში ისმის თავისუფალი აზრი - ხშირად, შეიძლება გულსატკენი, მაგრამ თავისუფალი, - განაცხადა პრემიერმა. მთავრობის მეთაურმა ყურადღება იმ სახელმწიფო პროგრამებსაც დაუთმო, რომლებიც მეწარმეობის განვითარებას ისახავს მიზნად და გამოყო „აწარმოე საქართველოში“, რომლის ნაწილია საოჯახო სასტუმროების წახალისების პროგრამა - „უმასპინძლე საქართველოში“. პრემიერმა აღნიშნა, რომ პროგრამა, ყველა ადამიანს, ამ მიმართულებით საკუთარი ბიზნესის წამოწყებისა თუ გაფართოებისთვის, გრძელვადიან, შეღავათიან კრედიტებს სთავაზობს. გიორგი კვირიკაშვილის თქმით, ეს კეთდება იმისთვის, რომ შეიქმნას ადგილობრივი საწარმოო პოტენციალი და მოქალაქეებმა თავი უფრო წელგამართულად იგრძნონ. თუმცა, პრემიერის განცხადებით, ეს არ ნიშნავს, რომ ხელისუფლებამ საწადელს მიაღწია. როგორც მან აღნიშნა, მმართველი გუნდი კარგად ხედავს, რამხელა გაჭირვებაა რეგიონებში, მაგრამ აქვს ძალიან კონკრეტული გეგმა, როგორ მიაღწიოს იმას, რომ უკვე ჩაყრილი საფუძველი თითოეული ოჯახის კეთილდღეობად გარდაიქმნას. „წელს საქართველოში 6 მილიონამდე ტურისტს ველოდებით და შეუიარაღებელი თვალითაც ჩანს, რეგიონებში რამხელა ზრდაა ტურიზმში. ეს მნიშვნელოვანია იმისთვის, რომ ეს სიკეთე ყველა თქვენგანის ოჯახმა იგრძნოს. ლენტეხში მალე დასრულდება ყველაზე თანამედროვე სტანდარტებით აღჭურვილი საავადმყოფოს მშენებლობა. ეს იქნება დიდი შვება ადგილობრივებისთვის და ეს ყველაფერი, მთის კანონთან ერთად, შექმნის წინაპირობას, რომ აქ დამაგრდეს მოსახლეობა და ახალგაზრდობა რეგიონის დატოვებაზე აღარ ფიქრობდეს. ჩვენ დაგეგმილი გვაქვს მნიშვნელოვანი ნაბიჯები ადგილობრივი ინფრასტრუქტურის შემდგომი განვითარებისთვის. ჩვენ თქვენთან მოსასვლელი პირი არ გვექნება, თუ არ ავაშენეთ ლენტეხიდან მულახისკენ მიმავალი გზა, თავისი გვირაბებით. ასევე, საზაფხულო გზა უშგულის გავლით, რომელიც, ამ გზაზე მდებარე ყველა სოფლისთვის მნიშვნელოვანია. ამას ექნება უდიდესი მნიშვნელობა სვანეთისა და რაჭა-ლეჩხუმის განვითარებისთვის, თითოეული თქვენი ოჯახის კეთილდღეობისთვის“, - განაცხადა პრემიერ-მინისტრმა და აღნიშნა, რომ საზაფხულო გზის მშენებლობა და გვირაბების პროექტზე საერთაშორისო საფინანსო ინსტიტუტებთან მუშაობა უახლოეს მომავალში დაიწყება.  პრემიერის თქმით, ეს ყველაფერი გაკეთდება უსწრაფეს ტემპებში, მაგრამ ისე, რომ მთავრობა არ გადათელავს საკუთარი მოქალაქეების უფლებებს და თითოეული ადამიანის ღირსება უზენაესი და უპირველესი იქნება. გიორგი კვირიკაშვილმა მოსახლეობას მაჟორიტარობის კანდიდატი წარუდგინა და განაცხადა, რომ სვანეთს პარლამენტში წარმომადგენელი პროპორციული სიითაც ეყოლება. „ჩვენ არ მოგვწონს ის, რომ საქართველოს მოსახლეობას, რაღაც სტანდარტების მიხედვით, მათემატიკურად აჯამებენ. ყველა რეგიონს აქვს თავისი თავისებურებები, გასაჭირი, სიხარული და ყველა რეგიონი გამორჩეულია, მაგრამ ასეთია რეალობა“, - განაცხადა პრემიერმა. ლენტეხის მოსახლეობას სიტყვით ასევე მიმართა შრომის, ჯანმრთელობისა და სოციალური დაცვის მინისტრმა დავით სერგეენკომ. მინისტრი ადგილობრივებს „ქართული ოცნების“ ხელისუფლების მიერ ჯანდაცვის მიმართულებით განხორციელებული სასიცოცხლოდ მნიშვნელოვანი პროექტების შესახებ ესაუბრა. „მსურს, კიდევ ერთხელ დაგიდასტუროთ ჩემი დიდი პატივისცემა და მოგახსენოთ იმის შესახებ, რომ მე, ნამდვილად, არ ჩამოვსულვარ აქ იმისათვის, რათა თავი მოგაწონოთ, თუ რამდენი რამის გაკეთება შევძელი- ეს მთლიანად მთავრობის დამსახურებაა. სამწუხაროდ, მოსახლეობის ნახევარზე მეტს არ ჰქონდა იმის შესაძლებლობა, რომ თუნდაც გადაუდებელ შემთხვევაში ექიმთან მისულიყო. ეს არის თითოეული თქვენგანის უფლება და ეს არის ის, რაც გეკუთვნით. ერთადერთი, რაც შევძელით, იმის ნაწილი დაგიბრუნეთ, მე მგონი, საკმაოდ დიდი ნაწილი, რაც გეკუთვნოდათ და არა ის, რომ დაგამადლოთ, აი რამდენი რამ გავაკეთეთ. იგივე ეს საავადმყოფო, რომელიც რამდენიმე კვირაში ამუშავდება. იგივე სასწრაფო დახმარების განახლებული სადგური. მე კარგად მესმის, დამერწმუნეთ, დეტალურად ვიცი, ის დამატებითი საჭიროებები, რაც დარჩება რაიონს მას შემდეგ, რაც ძალიან მალე ეს საავადმყოფო გაიხსნება. იგივე შეეხება სასწრაფოს“,-განაცხადა დავით სერგეენკომ.  მინისტრმა ასევე ისაუბრა სოციალური დახმარებების შესახებ. „ ერთ-ერთი ყველაზე მტკივნეული რაც არის, ესაა სოციალური დახმარებები. ჩვენ ძალიან ვეცადეთ და ბოლო წლების განმავლობაში პოლიტიკური შემადგენელი მთლიანად ამოვაცალეთ ამას, როდესაც არჩევნების წინ ხდებოდა ხოლმე ათეულობით ათასი ადამიანისათვის დახმარების დანიშვნა. მესმის, რომ თითოეული ადამიანისთვის, თითოეული ოჯახისთვის დანიშნული ან განსაკუთრებით მოხსნილი სოციალური დახმარება რამდენად მტკივნეულია, მაგრამ თვალებში გიყურებთ და პირობას გაძლევთ, რომ ეს არის მთავრობის ერთ-ერთი მთავარი პოლიტიკა, შეიძლება ითქვას ღირსების საკითხიც, რომ სოციალური დახმარების იმედზე კი არ იყოს მხოლოდ და მხოლოდ ადამიანი და ოჯახი, არამედ, მას ჰქონდეს ღირსეული სამუშაოს შესაძლებლობა, რომ თვითონ, ღირსეულად შეინახოს თავისი ოჯახი. თუმცა, რა თქმა უნდა, იმ ოჯახებს, ვისაც სჭირდება დახმარება, აუცილებლად დავეხმარებით“,-განაცხადა ჯანდაცვის მინისტრმა.  „ქართული ოცნება-დემოკრატიული საქართველოს“ მაჟორიტარი დეპუტატობის კანდიდატმა გოჩა ენუქიძემ ლენტეხის მოსახლეობასთან სიტყვით გამოსვლისას მიგრაციის პროცესის შეჩერებისა და ამისათვის, თანამედროვე გარემოს შექმნის მნიშვნელობაზე გაამახვილა ყურადღება. „მე დღეს ერთ-ერთი თქვენთაგანი ვარ, თქვენი ოჯახის მეგობარი და თქვენი ინტერესების დამცველი. მსურს ჩემი ცოდნა, უნარი, წლების განმავლობაში დაგროვილი გამოცდილება გამოვიყენო იმისთვის, რომ იგრძნოთ უკეთესობა. ერთად მოვუტანოთ წარმატება და წინსვლა ჩვენს ქვეყანას. ჩვენ ერთობლივი ძალებით შევქმნით თანამედროვე გარემოს, სამუშაო ადგილებს. შევაჩერებთ მიგრაციის პროცესს და განვავითარებთ ტურიზმს, მეცხოველეობას. გონივრულად ავითვისებთ ჰიდრორესურსებს“,-განაცხადა გოჩა ენუქიძემ.

ჩვენ უზრუნველვყოფთ საქართველოში ძალიან სწრაფი განვითარების პროცესს ისე, რომ არც ერთი ბავშვის ცრემლი არ ჩამოვარდება, არც ერთი უდანაშაულო ადამიანი არ დაისჯება, - ამის შესახებ საქართველოს პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა ცაგერში, მოსახლეობასთან შეხვედრისას განაცხადა, სადაც გაერთიანებული ოლქის მაჟორიტარობის კანდიდატი გოჩა ენუქიძე წარადგინა. პრემიერმა აღნიშნა, რომ მთავრობისთვის ადამიანის ღირსება უზენაესია. „ეს არის უდიდესი განსხვავება ჩვენსა და სხვებს შორის. განსხვავება არის ის, რომ ჩვენ სიყვარულით ვაკეთებთ ყველაფერს. ძალიან დიდი განვითარების პროცესი იგეგმება სვანეთში, რაჭა-ლეჩხუმში და მინდა დაგარწმუნოთ, რომ ოთხი წლის თავზე თქვენ იხილავთ სრულიად სხვა, გაცილებით უფრო ფერად, გაცილებით აგუგუნებულ ქვეყანას, რომელშიც ყველა ადამიანი გაცილებით უკეთ იგრძნობს თავს“, - განაცხადა პრემიერ-მინისტრმა.  მთავრობის მეთაურმა ისაუბრა ჯანდაცვისა და სოფლის მეურნეობის უპრეცენდენტო მხარდაჭერაზე და აღნიშნა, რომ ბევრ შეძლებულ ქვეყანას არ აქვს ასეთი უნივერსალური ჯანდაცვის პროგრამა, როგორიც საქართველოს. „დღეს მთიან რეგიონებში, ვეღარ ნახავთ სოფელსა და სოფელს შორის, ფეხით მიმავალ ბავშვებს, რომლებსაც სკოლამდე მისასვლელად, ფეხით რამდენიმე კილომეტრის გავლა უწევდათ. ყველა ასეთ სოფელს ავტობუსი ემსახურება. დღეს ჩვენ ვდგავართ ოთხი წლის მიჯნაზე და მომავალი ოთხი წლისთვის გვაქვს ნაბიჯ-ნაბიჯ გაწერილი გეგმა, როგორ უნდა მივიყვანოთ საქართველო მომავალი ოთხი წლის თავზე იმ წერტილამდე, როცა პროცესი შეუქცევადი იქნება და ყველა ოჯახი იგრძნობს შექმნილ კეთილდღეობას. ეს აბსოლუტურად რეალურია“, - აღნიშნა გიორგი კვირიკაშვილმა.  პრემიერის განმარტებით, იგეგმება უმაღლესი განათლების სისტემის ძირეული რეფორმა, რათა მომავალმა თაობამ, დრო და რესურსი არ დახარჯოს ისეთი პროფესიების დაუფლებაში, რომელთა სიჭარბეა. როგორც გიორგი კვირიკაშვილმა აღნიშნა, მნიშვნელოვანი რეფორმაა საჭირო საშუალო განათლებაშიც, რომლის მთავარი ღერძი უნდა იყოს დაფასებული პედაგოგი. „ჩვენ გვმართებს, ქედი მოვიხაროთ და მადლობა ვუთხრათ იმ ადამიანებს, რომლებმაც ძალიან დიდი გაჭირვების პერიოდში, გმირობის ფასად უზრუნველყვეს უწყვეტი განათლება ჩვენი მომავალი თაობისთვის. მეტი აქცენტი უნდა გავაკეთოთ მომზადების და კვალიფიკაციის ამაღლების პროცესზე და არა ტესტირებაზე, გამოცდებზე. ტესტირება საჭიროა, მაგრამ არ შეიძლება, ეს დამოკლეს მახვილივით ეკიდოს ყოველთვის ჩვენი პედაგოგიური კორპუსის თავზე. მე პედაგოგის ოჯახში ვარ გაზრდილი. დედაჩემი გახლდათ უნივერსიტეტის პროფესორი. დღეს მყავს ასევე ბებია, რომელიც 96 წლის არის და 60 წლის განმავლობაში ასწავლიდა მათემატიკას საქართველოში, კომაროვის სკოლაში. ასე, რომ ჩემთვის უცხო არ არის, რამხელა შრომასთან არის დაკავშირებული ეს ყველაფერი“, - განაცხადა პრემიერ-მინისტრმა.  გიორგი კვირიკაშვილმა საუბრისას ყურადღება მმართველი გუნდის გონივრულ საგარეო პოლიტიკასაც დაუთმო და აღნიშნა, რომ ამ პოლიტიკის შედეგია თუნდაც ის, რომ წელს საქართველოში 400 ათასზე მეტი ტურისტია ჩამოსული რუსეთიდან, რაც მოსახლეობისთვის მნიშვნელოვანი შეღავათი. „ჩვენ ასე ნაბიჯ-ნაბიჯ, ტერიტორიულ მთლიანობასა და სუვერენიტეტში ყოველგვარი კომპრომისის გარეშე, შევძლებთ, უზრუნველვყოთ მეტი სტაბილურობა და ჩვენი შვილების უკეთესი მომავალი“, - განაცხადა პრემიერმა. მთავრობის მეთაურმა, ასევე, საზოგადოების კონსოლიდაციის მნიშვნელობაზე გაამახვილა ყურადღება და აღნიშნა, რომ არ შეიძლება, ქვეყანა მუდმივ დაპირისპირებაში იყოს. „ჩვენ, ერთიანი ძალით, აუცილებლად გავაერთიანებთ ჩვენს საზოგადოებას. უნდა დასრულდეს ამ პატარა ერში ერთმანეთის ჭამა, ერთმანეთთან დაპირისპირება. არ შეიძლება ამდენი შეურაცხყოფის ატანა, არ შეიძლება, ბავშვები უყურებდნენ, მათი მშობლები როგორ ჭამენ ერთმანეთს. ეს არანორმალურია და თუ ჩვენ ეს არ დავასრულეთ, არაფერი გამოგვივა, ვიქნებით მუდმივ დაპირისპირებაში. ჩვენი პარტიის მოწოდებაა, გზა გავუხსნათ ყველა ადამიანს, მათ შორის, მივცეთ საშუალება იმ „გზააბნეულებსაც“, რომლებიც დღეს შეიძლება სხვა მოსაზრების იყვნენ, გაერთიანდნენ ამ ერთი მიზიდულობის ძალის ქვეშ, რომელსაც აუცილებლად შექმნის „ქართული ოცნება“, რომელიც იქნება ჩვენი ქვეყნის განვითარების ერთადერთი ყველაზე ძლიერი ძალა და სერიოზული ცვლილებების მომტანი“, - განაცხადა გიორგი კვირიკაშვილმა. მაჟორიტარი დეპუტატობის კანდიდატმა გოჩა ენუქიძემ სიტყვით გამოსვლისას მოსახლეობას მხარდაჭერისთვის მადლობა გადაუხადა და აღნიშნა, რომ მათ ერთად დგომით უნდა დაუბრუნონ მთას სიცოცხლე. „მე დღეს ერთ-ერთი თქვენთაგანი ვარ. თქვენი ოჯახის მეგობარი და თქვენი ინტერესების დამცველი. მსურს ჩემი ცოდნა, უნარი და წლების განმავლობაში დაგროვებული გამოცდილება გამოვიყენო იმისთვის, რათა თქვენ იგრძნოთ უკეთესობა.ჩვენ ერთობლივი ძალებით უნდა შევქმნათ თანამედროვე გარემო, განვავითაროთ ტურიზმი, ინფრასტრუქტურა, სოფლის მეურნეობა, მოვაგვაროთ სოციალური პრობლემები, რაც კეთილდღეობისა და წარმატებული ყოფა-ცხოვრების მომტანი იქნება. რაჭა-ლეჩხუმი და სვანეთი ერთ ოლქად გაერთიანდა და მინდა იცოდეთ, ლეჩხუმს ეყოლება წარმომადგენელი, რომელიც მის ინტერესებს დაიცავს. ჩემო საყვარელო ლეჩხუმელებო, უკვე ორი მოწვევაა, რაც მთიან რეგიონს წარმოვადგენ პარლამენტში და მთისთვის დამახასიათებელი პრობლემატიკა ჩემთვის კარგად ცნობილია. სულ რამდენიმე დღეში ამოქმედდება ჩვენს მიერ მიღებული „მთის კანონის“ ის ნორმები, რომლებიც ბევრ სოციალურ შეღავათს მოიტანს და თქვენ იგრძნობთ მის სიკეთეს. არჩევნებამდე სულ ცოტა დრო დარჩა და მე მჯერა, რომ 8 ოქტომბერს ჩვენ ერთად გავაკეთებთ სწორ არჩევანს. გავერთიანდეთ, გავაძლიეროთ ერთმანეთი და ერთად დავუბრუნოთ მთას სიცოცხლე“,-განაცხადა გოჩა ენუქიძემ.

ჩვენ ვართ ის გუნდი, ის მთავრობა, რომელსაც არასოდეს გაუთელავს ფეხქვეშ ჩვენი მოქალაქეების ღირსება, რომელიც ყველა ნაბიჯს მხოლოდ ქვეყნისა და ჩვენი მოსახლეობის სიყვარულითა და პატივისცემით დგამდა ამ წლების განმავლობაში, - ამ სიტყვებით მიმართა საქართველოს პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა მესტიის მოსახლეობას, რომელსაც სვანეთის გაერთიანებული ოლქების კანდიდატი გოჩა ენუქიძე წარუდგინა.  პრემიერმა აღნიშნა, რომ მთავრობას აქვს კონკრეტული გეგმა რა უნდა გაკეთდეს, რომ სვანეთი ტურისტებისთვის კიდევ უფრო მომხიბვლელი გახდეს და განვითარდეს შიდა ტურიზმი. „სამწუხაროდ, ბევრ უცხოელს ნანახი აქვს სვანეთი, ხოლო საქართველოს მოსახლეობის უმრავლესობას - არა. ძალიან მნიშვნელოვანია, ჩვენმა შვილებმა, ჩვენმა მოხუცებმა მოინახულონ არა მხოლოდ საქართველოს, არამედ მსოფლიოს ეს ულამაზესი კუთხე. ჩვენ გვაქვს გეგმა, როგორ განვავითაროთ სპორტსკოლები ზამთრის სპორტის სახეობებისთვის. აუცილებლად უნდა აღვადგინოთ ტრადიციული გაზაფხულის არდადეგები, რათა კიდევ უფრო მეტმა ადამიანმა შეძლოს დასვენება სვანეთში და გავზარდოთ ჯანმრთელი მომავალი თაობა. გვაქვს ძალიან კონკრეტული გეგმა თეთნულდის ტურისტული კომპლექსის განვითარებისთვის. იქ სერიოზულ ფინანსურ რესურსებზეა საუბარი, მათ შორის სახელმწიფოს მხრიდან, რათა აუცილებელი ინფრასტრუქტურა შეიქმნას. აუცილებლად უნდა აშენდეს დამატებითი საბაგირო იმისთვის, რომ მესტიიდან შესაძლებელი იყოს ჰაწვალის საბაგიროთი ასვლა, რათა მოთხილამურეებს მესტიაში საბაგიროთი სარგებლობა გავუადვილოთ“, - განაცხადა პრემიერ-მინისტრმა. გიორგი კვირიკაშვილის თქმით, ასევე, აშენდება გზა ქუთაისიდან მულახის მიმართულებით, გვირაბების გავლით და უშგულზე გადამავალი ზაფხულის გზა. როგორც პრემიერმა აღნიშნა, ეს ყველაფერი აბსოლუტური რეალობაა და ამისთვის საერთაშორისო საფინანსო ინსტიტუტებთან ინტენსიური მუშაობა და რეალური მოლაპარაკებები მიმდინარეობს. „ასევე, გარემონტდება ჯვარი-მესტიის გზა, რაც აუცილებელია, რათა შავი ზღვისპირეთიდან ამომავალმა ტურისტმა კომფორტული გზით ისარგებლოს. ეს ყველაფერი კეთდება იმისთვის, რომ სვანეთში თითოეულ ოჯახში ამოვიდეს კეთილდღეობა, თითოეულმა ოჯახმა იგრძნოს ის ნაბიჯები, რომლებსაც ვახორციელებთ. დამატებით შეღავათია მთის კანონი, რომელზეც ბევრი იშრომეს ამ კუთხის შვილებმა, რომლებიც მთის კომისიის მუშაობაში ძალიან აქტიურად საქმიანობდნენ“, - განაცხადა პრემიერ-მინისტრმა.  გიორგი კვირიკაშვილმა, ასევე, ისაუბრა გასული ოთხი წლის განმავლობაში განხორციელებულ ცვლილებებზე და აღნიშნა, რომ დიდი ყურადღება დაეთმო სასიცოცხლოდ მნიშვნელოვან საკითხებს - ჯანდაცვას და სოციალურ მიმართულებას, რაზეც საქართველოს ბიუჯეტის მესამედზე მეტი - 3 მილიარდი ლარი იხარჯება. „ეს იყო უმნიშვნელოვანესი ჩვენთვის, ვინაიდან, თუ არ გვეყოლება ჯანმრთელი მოსახლეობა და ადამიანს, საკუთარი ოჯახის წევრის ჯანმრთელობის უზრუნველსაყოფად, უკანასკნელ ქონებაზე ხელის აღება მოუწევს, მაშინ არაფერს აქვს ფასი. ძალიან დიდი რესურსი დაიხარჯა სოფლის მეურნეობაზე - საქართველოს დამოუკიდებლობის აღდგენის დღიდან მოყოლებული, არც ერთ მთავრობას ამხელა ყურადღება არ დაუთმია სოფლის მეურნეობის განვითარებისთვის. დღეს, ბავშვებისთვის აღარ არის საჭირო, სოფლიდან სოფელში სკოლაში ფეხით სიარული, ესეც ძალიან მნიშვნელოვანი იყო და ამაზეც დიდი რესურსი გამოვყავით. ჩვენ შევქმენით „სოლიდარობის ფონდი“, რომელშიც უამრავი ადამიანი საკუთარი სურვილით, ყოველგვარი ძალდატანების გარეშე, დამატებით, რასაც სახელმწიფო გაიღებს ჯანდაცვისთვის, აგროვებს რესურსს, რომ ძალიან რთულ დაავადებებზე, რომელთა მკურნალობა საქართველოში ვერ ხერხდება, ჩვენს ბავშვებს ვუმკურნალოთ უცხოეთში. ეს ყველაფერი იმისთვის გავაკეთეთ, რომ ჩვენი მოსახლეობისთვის გვეჩვენებინა სითბო, მეტი სიყვარული, რადგან 2011 წელს ამის საჭიროება ძალიან მძაფრად იგრძნობოდა“, - განაცხადა გიორგი კვირიკაშვილმა.  პრემიერმა აღნიშნა, რომ დღეს ქვეყანაში თვისობრივად განსხვავებული საარჩევნო გარემოა, განსხვავებული აზრი არ იდევნება, სატელევიზიო ეთერში ხშირად ისმის არცთუ სამართლიანი კრიტიკა, მაგრამ ეს არის ის სინამდვილე, რომელიც “ქართულ ოცნებას“ მოსწონს და რომლითაც აპირებს მომავალი ოთხი წლის განმავლობაში ცხოვრების გაგრძელებას. მთავრობის მეთაურის შეფასებით, მთავარი მიღწევაა ის, რომ ადამიანის ღირსება დღეს უზენაესი და დაფასებულია. გიორგი კვირიკაშვილის თქმით, მთავრობა ამაყია, მაგრამ არა - თვითკმაყოფილი, ხედავს შეცდომებსაც, თუმცა მოსახლეობას სთავაზობს კონკრეტულ ნაბიჯებზე დაფუძნებულ ახალ გეგმას, რომლის მიზანია, საქართველოში ყველა ოჯახმა იგრძნოს ის კეთილდღეობა, რომლის შექმნის მყარი საფუძველი უკვე ჩაყრილია. „ქართული ოცნება - დემოკრატიული საქართველოს“ თავმჯდომარემ ასევე აღნიშნა, რომ სვანეთს პარლამენტში წარმომადგენელი პროპორციული სიითაც ეყოლება. მმართველი გუნდი მიიჩნევს, რომ განხორციელებული ცვლილება, რომელიც საქართველოს მოსახლეობის მათემატიკური რაოდენობით დაყოფას გულისხმობს, სამართლიანი არ არის და აუცილებელია, კუთხეებს საკუთარი წარმომადგენლობა ჰყავდეთ. მესტიის მოსახლეობასთან სიტყვის გამოსვლისას მაჟორიტარი დეპუტატობის კანდიდატმა გოჩა ენუქიძემ პრემიერ-მინისტრსა და „ქართული ოცნების“ გუნდს გამოცხადებული ნდობისთვის მადლობა გადაუხადა და აღნიშნა, რომ მთის კეთილდღეობა საქართველოს სიძლიერეა. „მე დღეს ერთ-ერთი თქვენთაგანი ვარ. თქვენი ოჯახის მეგობარი და თქვენი ინტერესების დამცველი. მსურს ჩემი ცოდნა, უნარი და წლების განმავლობაში დაგროვებული გამოცდილება გამოვიყენო იმისთვის, რათა თქვენ იგრძნოთ უკეთესობა, თითოეული თქვენგანის ოჯახმა მიიღოს კეთილდღეობა. ჩვენ ერთობლივი ძალებით უნდა შევქმნათ თანამედროვე გარემო, შევქმნათ სამუშაო ადგილები, შევაჩეროთ მიგრაციის პროცესი, განვავითაროთ ტურიზმი, მეცხოველეობა, გონივრულად ავითვისოთ ჰიდრორესურსი, გადავწყვიტოთ სოციალური პრობლემები, რაც კეთილდღეობისა და წარმატებული ყოფა-ცხოვრების მომტანი იქნება. უნდა გვახსოვდეს, რომ მთის კეთილდღეობა საქართველოს სიძლიერეა. როგორც იცით, რაჭა-ლეჩხუმი და სვანეთი ერთ ოლქად გაერთიანდა, თუმცა, ღელვის საფუძველი არ გაქვთ, რადგან, როგორც პრემიერმა განაცხადა, პარტიულ სიაში თქვენ გეყოლებათ წარმომადგენელი. ეს უფრო დიდი შედეგის მომტანი იქნება, ვინაიდან, ერთდროულად ორი გულშემატკივარი გეყოლებათ საქართველოს პარლამენტში“,-განაცხადა გოჩა ენუქიძემ.

ჩვენ შევძლებთ ყველაზე მთავარს - დავასრულოთ დაპირისპირებები საზოგადოებაში, გავაერთიანოთ მთელი ქვეყანა ერთიანი პოზიტიური, დადებითი განვითარების გეგმის გარშემო, - ამ სიტყვებით მიმართა საქართველოს პრემიერ–მინისტრმა ქარელის მოსახლეობას, რომელსაც პარტია „ქართული ოცნება–დემოკრატიული საქართველოს“ მაჟორიტარი დეპუტატობის კანდიდატი– გიორგი თოთლაძე წარუდგინა. გიორგი კვირიკაშვილმა ადგილობრივებს ხელისუფლების მიერ განხორციელებული და მიმდინარე რეფორმები გააცნო. მისი თქმით, არც ერთ მთავრობას, დამოუკიდებელი საქართველოს ისტორიაში, არ მიუქცევია იმხელა ყურადღება სოფლის მეურნეობისთვის, როგორც დღეს. „ეს სახელმწიფო პროგრამები ძალიან მნიშვნელოვანია ქვეყნისთვის და განსაკუთრებით ქარელისთვის, სადაც მრავალწლიანი ნარგავების მოშენების უდიდესი კულტურა არსებობს. ასევე მნიშვნელოვანია მცირემიწიან ფერმერთა დახმარებისკენ მიმართული პროგრამები, რომელთა მეშვეობით ხდება ბევრი პრობლემის გადაჭრა. დღეს უკვე საფუძველი ჩაეყარა ქვეყნის ეკონომიკის გრძელვადიან გაჯანსაღებას, ადგილობრივი წარმოების განვითარებას და სოფლის მეურნეობის გაძლიერებას,“–განაცხადა პრემიერმა. მთავრობის მეთაურის განმარტებით, ხელისუფლების საბოლოო მიზანია, თითოეული მოქალაქის ოჯახში შევიდეს კეთილდღეობა, რაც ქვეყნის სწრაფი განვითარების გეგმით მიიღწევა. პრემიერმა ეკონომიკის შემდგომი ლიბერალიზაციის მიზნით გასატარებელ ღონისძიებებზე ისაუბრა და აღნიშნა, რომ 1 იანვრიდან მოგების გადასახადი აღარ იარსებებს იმ შემთხვევაში, თუ მოგებული თანხა მომავალ პროექტებში რეინვესტირდება. „ჩვენ მთლიანად უარი ვთქვით იმ მემკვიდრეობაზე, როდესაც საგადასახადო ინსტიტუტები ბიზნესზე წნეხისთვის იყო გამოყენებული და უარი ვთქვით კომპანიების შესამოწმებლად ფინანსური პოლიციის გამოყენებაზე. ჩვენ ზუსტად ვიცით, სად უნდა დავიწყოთ და სად უნდა დავასრულოთ ოთხ წელიწადში, ეს არის ძალიან მკაფიო გეგმა, რომლის განხორციელების კომპეტენცია, გამოცდილება, ხალხთან კავშირი და ქვეყნის სიყვარული ჩვენ გაგვაჩნია!“–განაცხადა გიორგი კვირიკაშვილმა ქარელის მოსახლეობასთან შეხვედრისას. „ქართული ოცნება-დემოკრატიული საქართველოს“ გენერალურმა მდივანმა, პარტიის ცენტრალური შტაბის უფროსმა კახა კალაძემ ქარელში სიტყვით გამოსვლისას ყურადღება გაამახვილა მთავრობის მთავარ მიღწევებზე და მათ შორის ხაზი გაუსვა დემოკრატიული ინსტიტუტების მშენებლობას. „პირველ რიგში, მინდა უღრმესი მადლობა მოგახსენოთ თითოეულ თქვენგანს დღეს აქ მობრძანებისთვის. მადლობა იმ საქმიანობისათვის, რასაც თქვენ ჩვენთან ერთად აკეთებდით ამ წლების განმავლობაში. მადლობა იმისთვის, რომ დგახართ იქ, სადაც სჭირდება ჩვენს ქვეყანასა და ხალხს. ჩვენ ძალიან ბევრი ბრძოლა გამოვიარეთ ერთად. დღეს ჩვენ დავუმტკიცეთ სრულიად მსოფლიოს, დავუმტკიცეთ ჩვენი ქვეყნის მოქალაქეებს ის, რომ თურმე შესაძლებელი ყოფილა ქვეყნის მართვა ძალადობის, ოჯახების გაუბედურების გარეშე. ეს, რა თქმა უნდა, არის თითოეული თქვენგანის დამსახურება, ჩვენი ერთად, ყველას დამსახურება. ჩვენ არასდროს დავუშვებთ, რომ ქვეყანაში დაბრუნდეს ისეთი მთავრობები, ისეთი ხელისუფლებები, რომლებიც იძალადებენ თავიანთ მოქალაქეებზე. ჩვენ ყველამ ეს, ჩავაბარეთ წარსულს. ჩვენი მთავარი, მნიშვნელოვანი მონაპოვარი ეს არის თავისუფლება. ნამდვილად საამაყოა, რომ დღეს საქართველოში, ჩვენი ქვეყნის მოქალაქეები არიან დაცულნი. მათი უფლებები არის თანაბრად დაცული, მიუხედავად მათი განსხვავებული აზრისა, მიუხედავად მათი განსხვავებული პოლიტიკური შეხედულებებისა. ზუსტად, ჩვენ ასეთ სახელმწიფოს ვაშენებთ, სადაც თითოეული მოქალაქე იქნება თანაბრად დაცული. ჩვენ ვაშენებთ დემოკრატიულ ინსტიტუტებზე დაფუძნებულ ქვეყანას. რა თქმა უნდა, ეს არ არის იოლი გზა, უფრო მარტივია ქვეყნის ისეთი მართვა, როგორც წინა ხელისუფლება აკეთებდა-ძალადობასა და პოლიციაზე დამყარებული რეჟიმი, მაგრამ ჩვენ ამას, ყველამ ერთად ვუთხარით არა“,-განაცხადა ვიცე-პრემიერმა. კახა კალაძემ ასევე ისაუბრა „ქართული ოცნების“ სამომავლო გეგმებზე. „ ჩვენთვის მთავარი და მნიშვნელოვანი დღეს არის ქვეყნის ეკონომიკურად გაძლიერება, ეკონომიკური განვითარება და ამაში თითოეული თქვენგანის მონაწილეობა არის პრინციპულად მნიშვნელოვანი. დარწმუნებული ვარ, რომ ჩვენ 8 ოქტომბერს ყველა ერთად ვიზეიმებთ გამარჯვებას და ეს არ იქნება მხოლოდ ჩვენი მხარდამჭერების, ჩვენი აქტივისტების, თანამოაზრეების გამარჯვება. ეს იქნება სრულიად საქართველოს გამარჯვება, რადგან, პარტია „ქართული ოცნება-დემოკრატიული საქართველო“ ქვეყანაში გახლავთ რეალურად ერთადერთი, უალტერნატივო ძალა, რომელსაც აქვს შესაძლებლობები მოაგვაროს ყველა ის პრობლემა, რომელიც აწუხებს დღეს ჩვენი ქვეყნის მოსახლეობას. პარტია „ქართული ოცნების“ გამარჯვება არის რეალურად შედეგი იმისა, რომ ჩვენ მივცემთ შესაძლებლობას ჩვენი ქვეყნის მოქალაქეებს, იგრძნონ ის სიკეთეები, რომლებსაც ვპირდებით მომავალი ოთხი წლის განმავლობაში. მინდა გაგამხნევოთ თითოეული თქვენთაგანი და დაგარწმუნოთ იმაში, რომ ჩვენ აუცილებლად გავიმარჯვებთ. გავიმარჯვებთ ისევ და ისევ ჩვენი ქვეყნისთვის, ჩვენი ხალხისთვის, ჩვენი შვილებისთვის, აი, ამ პატარებისთვის, რომლებიც დღეს აქ ჩვენთან არიან წარმოდგენილნი“,-აღნიშნა პარტიის გენერალურმა მდივანმა. როგორც ქარელის მაჟორიტარი დეპუტატობის კანდიდატმა გიორგი თოთლაძემ სიტყვით გამოსვლისას განაცხადა, მის რაიონში ბოლო ოთხი წლის განმავლობაში მნიშვნელოვანი პროექტები განხორციელდა. „მე ვარ მაჟორიტარობის კანდიდატი ჩემს მშობლიურ ქალაქში, ჩემს მშობლიურ რაიონში იმ გუნდიდან, რომელმაც შეძლო და 4 წლის მანძილზე ძალიან ბევრი სიკეთე მოუტანა ჩემს ქვეყანას, თითოეულ ქალაქს და თითოეულ სოფელს. მე მიყვარს ჩემი ქალაქი, ჩემი რაიონი. მე აქ დავიბადე და გავიზარდე. თითოეულ ჩემს წარმატებას ბავშვობიდანვე ვუძღვნიდი ჩემს რაიონს და ქვეყანას. მომავალშიც, რა თქმა უნდა, ასე გაგრძელდება. მე მინდა აქვე ავღნიშნო, რომ ბოლო წლების განმავლობაში ძალიან ბევრი კარგი საქმე გაკეთდა ჩვენს რაიონში, ძალიან ბევრი ღირსეული პროექტი განხორციელდა. დარწმუნებული ვარ და მინდა გარწმუნოთ თქვენც, რომ მომდევნო 4 წელი გაცილებით წარმატებული იქნება ჩვენი რაიონისთვის, რადგან მოხდება უფრო მეტი განვითარება და უფრო მეტი სიკეთე შევა თითოეული თქვენგანის ოჯახში. მე მინდა კიდევ ერთხელ დიდი მადლობა გადაგიხადოთ აქ მობრძანებისთვის, მხარდაჭერისთვის. დიდი მადლობა გადავუხადო ბატონ პრემიერს ასეთი ნდობის გამოცხადებისთვის. მე კარგად ვაცნობიერებ, თუ რაოდენ დიდი პასუხისმგებლობა დამეკისრა და პირობას გაძლევთ ამ დიდ გამოწვევას ღირსეულად გავართმევ თავს“,-აღნიშნა გიორგი თოთლაძემ.

ხაშურმა უნდა დაიბრუნოს ის ლოჯისტიკური, სატრანზიტო ფუნქცია, რომელიც მას ყოველთვის გააჩნდა და ამით განსაკუთრებული მნიშვნელობა შეიძინოს ქვეყნის ეკონომიკურ აღმასვლაში,– ამის შესახებ საქართველოს პრემიერ–მინისტრმა ხაშურში, მოსახლეობასთან გამართულ შეხვედრაზე განაცხადა. გიორგი კვირიკაშვილმა ხაშურელებს პარტია „ქართული ოცნება – დემოკრატიული საქართველოს“ მაჟორიტარი დეპუტატობის კანდიდატი–ვალერი გელაშვილი წარუდგინა და ქვეყნის განვითარების სამომავლო გეგმა გააცნო. მისი თქმით, მომავალი ოთხი წელი სწრაფი და ფუნდამენტური ცვლილებების პერიოდი იქნება. „ჩვენ არ გვაქვს ნაპრალი მოსახლეობასთან, ჩვენ ისეთივე რიგითი ადამიანები ვართ, როგორც თითოეული თქვენგანი, ამიტომ ჩვენ კარგად ვაფასებთ ყველაფერს, რაც კეთდება ამ ქვეყანაში. ჩვენ დიდი პასუხისმგებლობით ვაპირებთ მომავალი 4 წლის გავლას და სწრაფი ნაბიჯებით, მნიშვნელოვანი, ფუნდამენტური ცვლილებებით ეკონომიკაში, განათლების სისტემაში, ინფრასტრუქტურის მოდერნიზაციით...მომავალი 4 წლის განმავლობაში 5 მილიარდ დოლარზე მეტი უნდა დაიხარჯოს დამატებით, ვიდრე დღეს ხმარდება ინფრასტრუქტურას. ჩვენ ამას გავაკეთებთ, ეს არის შესაძლებელი და ამის კონკრეტული გეგმა გაგვაჩნია. არჩევნების მეორე დღიდანვე ჩვენ დავიწყებთ ამ გეგმის განხორციელებას,“–აღნიშნა პრემიერმა. პარტიის თავმჯდომარემ წინასაარჩევნო პროცესის თავისუფალ და ღია გარემოში მიმდინარეობის მნიშვნელობაზე ისაუბრა და აღნიშნა, რომ „ქართული ოცნების“ მთავარი პრიორიტეტი მოქალაქეების ღირსება და თავისუფლებაა. „თქვენ ძალიან კარგად იცით რაც ხდებოდა ხაშურში 2012 წელს. ბატონმა ვალერი გელაშვილმა საკუთარ თავზე იწვნია უსამართლობა, სახელმწიფო აპარატის წნეხი და ფიზიკური განადგურების საფრთხის წინაშეც იდგა. მან ძალიან კარგად იცის, რა არის ადამიანის ღირსება და ვაჟკაცობა და სწორედ ის კაცია, რომელიც ვაჟკაცურად დაუდგა იმ უსამართლობას, რასაც ადგილი ჰქონდა ჩვენს ქვეყანაში,“– განაცხადა პრემიერ–მინისტრმა. გიორგი კვირიკაშვილმა ხაშურელებს „ქართული ოცნების“ მხარდაჭერისკენ მოუწოდა და იმედი გამოთქვა, რომ საზოგადოების კონსოლიდაციით, 4 წლის თავზე თვისობრივად ახალ ქვეყანას მივიღებთ.ხაშურის მაჟორიტარი დეპუტატობის კანდიდატმა ვალერი გელაშვილმა სიტყვით გამოსვლისას პრემიერ-მინისტრსა და „ქართული ოცნების“ გუნდს გამოცხადებული ნდობისა და მისი კანდიდატურის წარდგენისთვის მადლობა გადაუხადა. „ხაშურში უკვე მეოთხედ ვიყრი კენჭს. სამჯერ, თქვენთან ერთად, ბრძოლით, გავიმარჯვეთ უსამართლობის წინააღმდეგ. მეოთხედაც ჩვენ, „ქართულ ოცნებასთან“ ერთად, ქვეყანაში არსებული სამართლიანი არჩევნების პირობებში, აუცილებლად გავიმარჯვებთ. ამ ოთხი წლის განმავლობაში ხელისუფლებასთან ერთად შევეცდები მაქსიმალურად შევქმნათ სამუშაო ადგილები, რათა ყველა ოჯახში შევიდეს კეთილდღეობა. ყველას უღრმეს მადლობას გიხდით აქ მობრძანებისთვის. ჩვენ 8 ოქტომბერს გამარჯვებას ვიზეიმებთ“,-განაცხადა ვალერი გელაშვილმა.

ჩვენი მოქალაქეების ღირსება არის ყველაზე უზენაესი, რასაც ვემსახურებით, - ამ სიტყვებით მიმართა საქართველოს პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა ბორჯომის მოსახლეობას, რომელსაც მაჟორიტარი დეპუტატობის კანდიდატი გედევან ფოფხაძე წარუდგინა. მთავრობის მეთაურმა აღნიშნა, რომ მომავალი ოთხი წლის განმავლობაში საქართველოს ელოდება მნიშვნელოვანი ცვლილებები, ძალიან მნიშვნელოვანი გარღვევა ეკონომიკურ განვითარებაში და ეს ყველაფერი უპირველეს ყოვლისა ეხება ბორჯომს, სადაც ადგილობრივი ტურიზმის განვითარების განსაკუთრებული პოტენციალია. „მინდა, აბსოლუტურად რეალისტურად გითხრათ - ყველაფერი, რაც კეთდება ბაკურიანში, არის ბორჯომელებისთვის. რეგულარულ ავტობუსებს დავნიშნავთ ყოველი ნახევარი საათის, ერთი საათის განმავლობაში, რომელიც მთლიანად, ბორჯომის ყველა სასტუმროს მიაბამს ბაკურიანზე და პირიქით. ძალიან მნიშვნელოვანია, შევკრათ ერთიანი კომპლექსი. დაწყებული გვაქვს კოხტა-მიტარბის მშენებლობა-აღდგენის პროცესი. ეს იქნება უნიკალური ტურისტული კომპლექსი. წელს დავამთავრეთ დიდველის მიმდებარედ ზაფხულის სამთო ციგის ატრაქციონის დამონტაჟება; ფრანგულ კომპანიასთან ერთად დავიწყეთ ბიატლონის ტრასის დამონტაჟება-პროექტირება, რომლის მშენებლობა 2017 წელს დაიწყება; ბაკურიანში უნდა აღდგეს სატრამპლინო სკოლა. ამ ყველაფერს დაემატება ჰოკეის 1000-კაციანი მოედანი, რომლის მშენებლობა უკვე დაწყებულია. ასევე, დამატებით იქნება გასართობი, ახალგაზრდული ცენტრები, მათ შორის ბორჯომში. ეს ყველაფერი მთლიანობაში, აბასთუმნის კომპლექსთან ერთად, თვისობრივად სრულიად სხვა საფეხურზე აიყვანს ამ რეგიონის განვითარებას და ყველა თქვენგანის ოჯახი იგრძნობს ამას. რაც ყველაზე მთავარია, ამას ისე გავაკეთებთ, არც ერთ ბავშვს თქვენს ოჯახებში ცრემლი არ ჩამოუვარდება. ეს არის ყველაზე მთავარი. გაუმარჯოს, ერთიან, გაფერადებულ, აგუგუნებულ, დაქოქილ, ამუშავებულ საქართველოს. ამას ჩვენ აუცილებლად გავაკეთებთ, ჩვენი საზოგადოების გაერთიანებით. მათ შორის, ის გზააბნეული ადამიანებიც, რომლებიც დღეს სხვაგვარად ფიქრობენ, საბოლოო ჯამში დარწმუნდებიან, რომ ჩვენი საზოგადოება უნდა გაერთიანდეს ამ ერთადერთი, უალტერნატივო განვითარების გეგმის გარშემო“, - მიმართა პრემიერ-მინისტრმა მოსახლეობას. გიორგი კვირიკაშვილის შეფასებით, ბორჯომი და მთლიანად ბორჯომის რაიონი საქართველოს მარგალიტია და მთავრობას, ბორჯომის ევროპაში ერთ-ერთ ყველაზე მნიშვნელოვან და საინტერესო ტურისტულ მიმართულებად გადაქცევის კონკრეტული გეგმები აქვს. როგორც პრემიერმა აღნიშნა, ეს არ არის ცარიელი სიტყვები, ეს რეალობაა და მას აუცილებლად აღასრულებს მმართველი გუნდი, რომელსაც საკუთარი მოსახლეობის წინაშე ყველაზე მაღალი პასუხისმგებლობა აქვს. სიტყვით გამოსვლისას, „ქართული ოცნება - დემოკრატიული საქართველოს“ თავმჯდომარემ ისაუბრა იმ მნიშვნელოვან საკითხებზე, რომელთა გადაწყვეტაზე მაქსიმალური რესურსი დაიხარჯა. პრემიერის განცხადებით, 3 მილიარდ ლარზე მეტი იხარჯება ჯანდაცვისა და სოციალურ მიმართულებაზე, რაც ბევრი ქვეყნისთვის ფუფუნებაა; ასევე, უპრეცენდენტოდ მაღალი ყურადღება ექცევა სოფლის მეურნეობას - ხორციელდება უამრავი სახელმწიფო პროგრამა, რომელთა მიზანია კიდევ უფრო მეტი ადამიანის დასაქმება, რათა საქართველოს მოთხოვნილებები ადგილობრივმა წარმოებამ დააკმაყოფილოს. „დღეს სრულიად განსხვავებული წინასაარჩევნო გარემოა, ტელევიზიაში აღარ ისმის მთავრობის ქება-დიდება, პირიქით, ხშირად უსამართლოდაც ისმის კრიტიკა, მაგრამ ეს ნორმალურია. ჩვენ ასეთი ქვეყანა გვინდა. ჩვენ გვინდა ქვეყანა, სადაც ადამიანები თავისუფლად სუნთქავენ, თავისუფლად საუბრობენ და აღარ ეშინიათ ხელისუფლების და მისი სადამსჯელო სტრუქტურების“, - განაცხადა გიორგი კვირიკაშვილმა. მისივე თქმით, მთავრობა აცნობიერებს, რომ ყველა პრობლემა ჯერ გადაჭრილი არ არის და მათ მოსაგვარებლად აქვს ნაბიჯ-ნაბიჯ გაწერილი, ძალიან კონკრეტული გეგმა, რომელიც დღეიდან 4 წლის თავზე, სხვაგვარ საქართველოს შექმნის და თითოეული ადამიანის ოჯახში კეთილდღეობას მოიტანს. როგორც გიორგი კვირიკაშვილმა აღნიშნა, ძირეული ცვლილებები იგეგმება განათლების სისტემაში, რათა მომავალი თაობა არ მოტყუვდეს და არ დახარჯოს ძვირფასი რესურსები იმაზე, რომ ოთხი წლის განმავლობაში ნაკლებად საჭირო პროფესიებს მიჰყვეს, მაშინ, როდესაც ინჟინრების, ტექნოლოგების ძალიან მწვავე საჭიროება არსებობს და საქართველოში შესაბამისი სპეციალისტების არარსებობის გამო საჭიროა მათი უცხოეთიდან შემოყვანა. „ჩვენ უნდა წავახალისოთ სპეციალობები, რომლებიც მეტად საჭიროა საქართველოში. ეს აუცილებელია იმისთვის, რომ ახალგაზრდები პირდაპირ დასაქმდნენ უმაღლესი სასწავლებლის დამთავრების შემდეგ. პედაგოგი უნდა იყოს უფრო მეტად დაფასებული. არ შეიძლება, მუდმივ ფსიქოლოგიურ ტერორში გვყავდეს ადამიანები, რომლებმაც წლების განმავლობაში, მათ შორის ყველაზე გაჭირვებულ წლებში ციმციმ გამოატარეს ჩვენი მომავალი თაობა. ისინი, იმსახურებენ, რომ მინიმუმ, მადლობა გადავუხადოთ“, - განაცხადა პრემიერმა. მისივე თქმით, მთავრობას ასევე აქვს ძალიან კონკრეტული გეგმა, როგორ გადააქციოს საქართველო სატრანზიტო ქვეყნად. გიორგი კვირიკაშვილის შეფასებით, ძალიან მნიშვნელოვანია, დღეიდან 4 წლის თავზე, ყველა უმნიშვნელოვანესი მაგისტრალი და გზა დამთავრებული იყოს და ასევე, ყველაფერი უნდა გაკეთდეს, რათა ბორჯომი სატრანზიტო მოძრაობისგან განიტვირთოს. ამასთანავე, პრემიერი მიიჩნევს, რომ მთავრობა უნდა გახდეს კიდევ უფრო მეტად ადამიანების საჭიროებასა და მომსახურებაზე ორიენტირებული. როგორც მან აღნიშნა, მთავრობას აქვს კონკრეტული გეგმა, როგორ ჩართოს მოსახლეობა გადაწყვეტილებების მიღების, მათ შორის ბიუჯეტირების პროცესში, რათა ადგილობრივი საჭიროებები მეტად იყოს გათვალისწინებული. მთავრობის მეთაურის განცხადებით, ამ ყველაფრისთვის საჭიროა სტაბილურობა და მთავრობამ გასული ოთხი წლის განმავლობაში დაადასტურა, რომ გონივრული საგარეო პოლიტიკით შეძლო სიტუაციის დამშვიდება - ერთის მხრივ სწრაფი ნაბიჯები გადადგა ევროპის მიმართულებით, ხოლო მეორეს მხრივ ტემპერატურა დაწია ჩრდილოელ მეზობელთან ურთიერთობაში, განაახლა ვაჭრობა და ტურიზმი, რაც მნიშვნელოვანია საქართველოში დამატებითი სამუშაო ადგილების შესაქმნელად. „ჩვენ გვაქვს ამბიციური გეგმები, როგორ განვავითაროთ ტურიზმი 12 თვის განმავლობაში ბორჯომსა და ბაკურიანში. აუცილებელია, ბორჯომი არ იყოს მხოლოდ ზაფხულის კურორტი. ჩვენ უნდა დავტვირთოთ ბორჯომი ზამთარში ყველა თვის განმავლობაში. ჩვენ გვაქვს ზამთრის სათხილამურო სკოლების განვითარების პროგრამა და უნდა აღვადგინოთ გაზაფხულის არდადეგები ბავშვებისთვის, იმისთვის რომ გავაჯანმრთელოთ ჩვენი მომავალი თაობა. ამას აუცილებლად გავაკეთებთ“, - განაცხადა პრემიერ-მინისტრმა.როგორც სიტყვით გამოსვლისას „ქართული ოცნება-დემოკრატიული საქართველოს“ გენერალურმა მდივანმა კახა კალაძემ განაცხადა, „ქართულმა ოცნებამ“ ყველას დაუმტკიცა და აჩვენა, რომ თურმე შესაძლებელი ყოფილა ქვეყნის მართვა ძალადობის, ადამიანების ჩაგვრის, ოჯახების გაუბედურების გარეშე. „ ჩვენ ერთად ძალიან მძიმე პერიოდი გამოვიარეთ. თითოეულმა ჩვენგანმა ძალიან კარგად ვიცით, თუ რას ნიშნავს ბრძოლა. ჩვენ ნამდვილად ამაყები ვართ დღეს, რომ წარსულს ჩავაბარეთ ძალადობრივი რეჟიმი, ჩვენ გაძლევთ პირობას, რომ საქართველოში ვერასდროს და არასდროს დაბრუნდებიან ისეთი მთავრობები და ხელისუფლებები, რომლებიც იძალადებენ თავიანთ მოქალაქეებზე, თავიანთ ქვეყნის მოსახლეობაზე“,-აღნიშნა ვიცე-პრემიერმა. კახა კალაძემ ამომრჩეველს 4 წლის განმავლობაში განხორციელებულ რეფორმებზე მიაწოდა ინფორმაცია. „ჩვენ ძალიან ბევრი მნიშვნელოვანი რეფორმა განვახორციელეთ თქვენთან ერთად ამ 4 წლის განმავლობაში. თუმცა, როგორც ბატონმა პრემიერმა ბრძანა, ჩვენ არ ვართ თვითკმაყოფილები. ჩვენ ძალიან კარგად გვესმის ყველა ის პრობლემა რომელიც აწუხებს ჩვენი ქვეყნის მოქალაქეებს და ზუსტად პარტია „ქართული ოცნება-დემოკრატიული საქართველო“, ჩვენი ლიდერის ხელმძღვანელობით, გახლავთ ის ერთადერთი რეალური ძალა, ვისაც აქვს შესაძლებლობები მოაგვაროს ის პრობლემები, რომლებიც აწუხებს ჩვენი ქვეყნის მოქალაქეებს. ჩვენ ამას აუცილებლად მოვახერხებთ და აუცილებლად შევძლებთ ერთად. ჩვენი მთავარი მონაპოვარი -ეს არის თავისუფლება. ნამდვილად საამაყოა ის, რომ დღეს საქართველოში ჩვენი ქვეყნის თითოეული მოქალაქის უფლებები არის თანაბრად დაცული, მიუხედავად მათი პოლიტიკური შეხედულებებისა, მიუხედავად მათი განსხვავებული აზრისა. დღეს ჩვენთვის მთავარი არის ქვეყნის სწრაფი განვითარება, რომ ქვეყანა ეკონომიკურად წინ წავიდეს, ეკონომიკურად განვითარდეს. ჩვენ გვყავს ძალიან ძლიერი გუნდი, რომელიც დაკომპლექტებულია პროფესიონალებით, რომელსაც ყავს ძალიან ძლიერი, გაწონასწორებული, საქმეზე ორიენტირებული ლიდერი გიორგი კვირიკაშვილის სახით და ჩვენ ამ გუნდთან ერთად, თქვენთან ერთად აუცილებლად 8 ოქტომბერს ვიზეიმებთ იმ დიდ გამარჯვებას, რასაც პარტია „ქართული ოცნების“ წარმატება ჰქვია, და ეს არ იფიქროთ, რომ იქნება მხოლოდ ჩვენი მხარდამჭერების, მხოლოდ ჩვენი თანამოაზრეების გამარჯვება. ეს იქნება სრულიად საქართველოს გამარჯვება, რადგან ჩვენი გამარჯვება პირდაპირ კავშირშია საქართველოს თითოეული მოქალაქის კეთილდღეობასთან. ძალიან დიდი მადლობა მინდა გადაგიხადოთ და მინდა გაგამხნევოთ, დაგარწმუნოთ იმაში, რომ ჩვენ ერთად გავიმარჯვებთ“,-განაცხადა პარტიის გენერალურმა მდივანმა. ბორჯომი -ასპინძის გაერთიანებული საარჩევნო ოლქის მაჟორიტარი დეპუტატობის კანდიდატმა გედევან ფოფხაძემ სიტყვით გამოსვლისას „ქართული ოცნების“ გამარჯვების აუცილებლობაზე გაამახვილა ყურადღება და აღნიშნა, რომ ბორჯომი ახლაც ამ გამარჯვების ავანგარდში უნდა იყოს. „ნამდვილად მაქვს ის ემოციები, რაც ამ ადგილს თან სდევს. აქ ეროვნული მოძრაობის დროს იმართებოდა ძალიან ხალხმრავალი მიტინგები და მიხარია, რომ მაშინ, ვინც ერთად ვიდექით, დღეს ისევ ერთად ვართ. ჯერ კიდევ ეროვნული მოძრაობის თანამებრძოლები ისევ შემოვრჩით ერთმანეთს და ეს ჩემთვის ძალიან ბევრს ნიშნავს. მაშინ ჩვენ ყველა ვფიქრობდით საქართველოს დამოუკიდებლობაზე, იმაზე, თუ როგორი იქნებოდა ჩვენი სამშობლო. ოთხი წლის წინ აქ, ამ მოედანზე, როცა შემოვიდა პიკაპების ჯგუფი და განთავსდა პირველი სკოლის მიმდებარე ტერიტორიაზე, მაშინაც ერთად ვიდექით, ვიცოდით ერთი რამ-ჩვენ ჩვენს მომავალს არავის დავუთმობდით. ამაში ვიყავით დარწმუნებულები, იმიტომ, რომ ეს მომავალი ქართველმა ხალხმა გადაწყვიტა. „ქართული ოცნების“ გამარჯვება იქნება ბორჯომის ძალიან დიდი გამარჯვება. ამიტომ, დაპირებებზე არაფერს გეუბნებით. ჩვენ ბორჯომელებმა რა გავაკეთოთ იმისათვის, რომ „ქართულმა ოცნებამ“ გაიმარჯვოს, ამაზე ვიფიქროთ. ჩვენს წილ ბრძოლაზე ვიფიქროთ, რომელიც შესატანია ამ დღეებში, რომ 8 ოქტომბერი არანაკლებ დიდი გამარჯვება იყოს სრულიად საქართველოსი. ჩვენ, ბორჯომელებმა, ამ გამარჯვებაში ჩვენი სიტყვა უნდა ვთქვათ. ახლაც ავანგარდში უნდა ვიყოთ. ამისთვის ვართ ჩვენ აქ შეკრებილები“,-აღნიშნა გედევან ფოფხაძემ.

ადიგენი არის ადგილი, რომელიც განსაკუთრებულ მნიშვნელობას შეიძენს საქართველოს სატრანზიტო ფუნქციის გაძლიერებაში,– განაცხადა საქართველოს პრემიერ-მინისტრმა ადიგენში გამართულ შეხვედრაზე. მისი განმარტებით, სწორედ ადიგენზე გაივლის ჩრდილოეთ–სამხრეთის და აღმოსავლეთ–დასავლეთის მაგისტრალები, რაც დიდ ბიძგს მისცემს მთლიანად რეგიონის განვითარებას და ადიგენში ბიზნესაქტივობას შეუწყობს ხელს .  გიორგი კვირიკაშვილმა ადიგენის მოსახლეობას „ქართული ოცნების“ მაჟორიტარი დეპუტატობის კანდიდატი – გიორგი კოპაძე წარუდგინა და მათ მხარდაჭერისკენ მოუწოდა. პრემიერ–მინისტრის თქმით, ბოლო 4 წლის განმავლობაში ხელისუფლებამ განსაკუთრებული ყურადღება დაეთმო მოსახლეობისთვის სასიცოცხლოდ მნიშვნელოვან მიმართულებებს: ჯანმრთელობის დაცვას, სოფლის მეურნეობას, ინფრასტრუქტურულ პროექტებს, წარმოების განვითარებას. მანვე ხაზი გაუსვა განათლების სისტემის რეფორმირების მნიშვნელობას, რაც მთავრობის 4–პუნქტიანი გეგმის შემადგენელი ნაწილია. „დღეს გარკვეული პროფესიის ადამიანები სანთლით საძებარია და ამავე დროს ჩვენი ახალგაზრდები ამთავრებენ უმაღლეს სასწავლებლებს პროფესიით, რაც ჭარბად არის ქვეყანაში. ვფიქრობ, დანაშაულს ჩავდივართ მომავალი თაობის წინაშე, როცა არ ვაძლევთ სწორ მიმართულებას მათ. ეს აუცილებლად გამოსწორდება და ამ პროცესს წარმატებული შედეგით დავასრულებთ,“– აღნიშნა პრემიერმა.  გიორგი კვირიკაშვილმა ვრცლად ისაუბრა ქვეყნის განვითარების სამომავლო გეგმაზე. მისი თქმით, ხელისუფლების მიერ დასახული მიზნების განსახორციელებლად, უპირველესად, საჭიროა საზოგადოების კონსოლიდაცია. „ყოველგვარი ემოციის გარეშე მინდა გითხრათ, უნდა დასრულდეს ჩვენი ისედაც პატარა ერის გათითოკაცება. ჩვენ ყველანი უნდა გავერთიანდეთ და უზრუნველყოთ ჩვენი შვილების უკეთესი მომავალი, ჩვენი მოხუცების უკეთესი სიბერე, ჩვენი ახალგაზრდების უკეთესი განათლება და მათი დასაქმება, შუა ასაკის ადამიანების ბოლომდე ჩართვა ჩვენი ქვეყნის ცხოვრებაში. ეს არ არის ცარიელი სიტყვები, ჩვენ შეგვიძლია 4 წლის თავზე მივიღოთ თვისობრივად ახალი ქვეყანა,“– განაცხადა მთავრობის მეთაურმა ადიგენის მოსახლეობასთან შეხვედრისას. ახალციხისა და ადიგენის გაერთიანებული საარჩევნო ოლქის მაჟორიტარი დეპუტატობის კანდიდატმა გიორგი კოპაძემ მხარდაჭერისთვის მოსახლეობას მადლობა გადაუხადა და აღნიშნა, რომ სწორედ „ქართულმა ოცნებამ“ მოიტანა ქვეყანაში ყველა ის სიკეთე, რასაც ჰქვია თავისუფლება და ადამიანების გვერდში დგომა. „მე ჩემის მხრივ, მინდა ვთქვა, რომ ვიქნები თითოეული თქვენგანის ღირსეული წარმომადგენელი საქართველოს პარლამენტში. ვიქნები თქვენი ელჩი, თქვენი ყველა ნების მიმტანი და გადამცემი ჩვენი ხელმძღვანელობისა და მთავრობისთვის. დიდი მადლობა კიდევ ერთხელ და მოგიწოდებთ ყველას, რომ 8 ოქტომბერს მობრძანდეთ, მხარი დაუჭიროთ „ქართულ ოცნებას“,-განაცხადა გიორგი კოპაძემ.

ჩვენ შეიძლება არ ვაშენებთ იმდენ „ზიზილ-პიპილო“ შენობებს, მაგრამ ვაკეთებთ სასიცოცხლოდ მნიშვნელოვან, საბაზისო ინფრასტრუქტურას,– ამის შესახებ საქართველოს პრემიერ–მინისტრმა ასპინძაში, მოსახლეობასთან გამართულ შეხვედრაზე განაცხადა.  გიორგი კვირიკაშვილმა ასპიძელებს „ქართული ოცნება-დემოკრატიული საქართველოს“ მაჟორიტარი დეპუტატობის კანდიდატი–გედევან ფოფხაძე წარუდგინა და გასული ოთხი წლის განმავლობაში განხორციელებულ რეფორმებზე ესაუბრა. მთავრობის მეთაურის განმარტებით, ხელისუფლებას ქვეყნის განვითარების კონკრეტული გეგმა გააჩნია, რაც გულისხმობს ძირეულ ცვლილებებს განათლების სისტემაში, რათა პედაგოგები იყვნენ გაცილებით დაფასებულნი.  გიორგი კვირიკაშვილი შეეხო მიმდინარე ეკონომიკურ რეფორმებს, რაც, მისი თქმით, საქმიან ადამიანს კიდევ უფრო გაუადვილებს ბიზნესის წარმოებას. „ბოლო პერიოდში ჩვენ დიდი ყურადღება მივაქციეთ წყალმომარაგებასა და გაზიფიცირებას და ბევრ რაიონში ამ მიმართულებით რადიკალურად შეიცვალა მდგომარეობა. ჩვენ ასევე ვარემონტებთ სკოლებს, კულტურის სახლებს, სპორტულ კომპლექსებს, რაც არის საჭირო ჩვენი მომავალი, ჯანსაღი თაობის აღსაზრდელად და დღეს გაცილებით მეტი ფული იხარჯება ინფრასტრუქტურაში, ვიდრე ეს იყო 4 წლის წინ. რა თქმა უნდა, ეს არ არის მაქსიმუმი, ჩვენ არ ვართ თვითკმაყოფილნი და არ ვფიქრობთ, რომ ყველა პრობლემა უკვე მოვაგვარეთ ქვეყანაში. ჩვენ ვიცით რამხელა პრობლემებია რეგიონებში, თუ როგორ უჭირთ ადამიანებს და სწორედ ამიტომ სწრაფი ცვლილების განსახორციელებლად დღეს ჩვენ გვაქვს მომავალი 4 წლიანი გეგმა,“–აღნიშნა პრემიერმა.  პარტია „ქართული ოცნება-დემოკრატიული საქართველოს“ თავმჯდომარემ ასპინძელებს მხარდაჭერისკენ მოუწოდა. „არა მოქალაქეების ღირსების გადავლით, არამედ ერთმანეთის პატივისცემით, ჩვენ ავაშენებთ უკეთეს ქვეყანას – უკეთესი განათლების სისტემით, უკეთესი ინფრასტრუქტურით, უკეთესი გზებით, უკეთესი გაზიფიცირებით, უკეთესი სოფლის მეურნეობით და ეს არის მიღწევადი!“–განაცხადა პრემიერ–მინისტრმა ასპინძის მოსახლეობასთან შეხვედრისას. ბორჯომი -ასპინძის გაერთიანებული საარჩევნო ოლქის მაჟორიტარი დეპუტატობის კანდიდატმა გედევან ფოფხაძემ სიტყვით გამოსვლისას „ქართული ოცნების“ მიღწევებს გაუსვა ხაზი და აღნიშნა, რომ ამ პოლიტიკურმა გუნდმა ქვეყანაში ახალი ღირებულებები დაამკვიდრა. „მგონია, რომ აქ, საქართველოს ამ ისტორიულ მიწაზე, განსაკუთრებული პასუხისმგებლობის გრძნობა გვაქვს ყველას იმ მომავლის წინაშე, რომელიც ჩვენს ქვეყანას უნდა ჰქონდეს. აი, ამ პატარა ასპინძელების უკეთესი ხვალინდელი დღისთვის, რომელთაც დღეს აქ „ქართული ოცნების“ მაისურები აცვიათ და იმედიანი თვალებით გვიყურებენ. ჩვენ არ გვაქვს მორალური უფლება საქართველოს მომავალი სხვანაირი იყოს, თუ არა ნათელი, ძლიერი და დაფუძნებული თავისუფლების დიად იდეალებზე. „ქართულმა ოცნებამ“ ოთხი წლის განმავლობაში ყველაფერი გააკეთა იმისათვის, რომ სრულიად საქართველოს ეგრძნო ის ახალი ღირებულებები, რომლითაც ჩვენ ვიწყებდით ცხოვრებას. მე მინდა, რომ ასპინძამ ბოლომდე იგრძნოს ეს ყველაფერი და ისიც გახდეს იმ პოლიტიკური სივრცის ნაწილი, რომელშიც დღეს სრულფასოვნად არის „ქართული ოცნება“ ჩართული. მე ვიცი, რომ ამ პოლიტიკურ გუნდს დღეს შეუძლია ასპინძას ყველაფერი ის მისცეს, რაც დღეს მას სჭირდება და ნებისმიერმა ასპინძელმა, ნებისმიერმა აქ მაცხოვრებელმა ადამიანმა, მისმა ოჯახმა იგრძნოს, რომ საქართველო სხვა რეალობაში იწყებს ცხოვრებას“,-განაცხადა გედევან ფოფხაძემ.

ახალქალაქს პარლამენტში წარმომადგენელი პროპორციული პარტიული სიითაც ეყოლება, - ამის შესახებ საქართველოს პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა ახალქალაქის მოსახლეობასთან შეხვედრისას განაცხადა, სადაც ახალქალაქისა და ნინოწმინდის მაჟორიტარი დეპუტატობის კანდიდატი ენზელ მკოიანი წარადგინა.  პრემიერმა კიდევ ერთხელ ხაზგასმით აღნიშნა, რომ საქართველო მრავალეროვანი, მრვალკულტურული ქვეყანაა, რაც ქვეყნის სიმდიდრეა და მთავრობა თითოეული მოქალაქის ინტერესების დასაცავად ყველაფერს გააკეთებს.  გიორგი კვირიკაშვილმა მოსახლეობასთან შეხვედრისას გასული ოთხი წლის განმავლობაში განხორციელებულ ცვლილებებზე ისაუბრა დ განაცხადა, რომ 2011 წლის შემოდგომიდან, როდესაც ბიძინა ივანიშვილმა გააკეთა განცხადება, პოლიტიკური პარტიის შექმნის შესახებ, ქართველ ხალხთან ერთად, პოლიტიკურ ცხოვრებაში მნიშვნელოვანი გარდატეხა მოხდა - მოქალაქეები სახელმწიფო აპარატის წნეხისგან გათავისუფლდნენ, საქართველოში დღეს არის თვისობრივად განსხვავებული, გაცილებით

დღეს არის დრო, როდესაც უნდა დასრულდეს პოლიტიკური დაპირისპირებები და მთელი ქვეყანა გაერთიანდეს იმისთვის, რომ მომავალი 4 წელიწადი გახდეს ისტორიული საქართველოსთვის,–ამის შესახებ საქართველოს პრემიერ–მინისტრმა ნინოწმინდის მოსახლეობასთან შეხვედრისას განაცხადა. გიორგი კვირიკაშვილმა „ქართული ოცნება–დემოკრატიული საქართველოს“ მხარდამჭერებს პარტიის მაჟორიტარი დეპუტატობის კანდიდატი–ენზელ მკოიანი წარუდგინა და მმართველი ძალის მიერ განხორციელებულ რეფორმებთან ერთად, მომავალი 4 წლის სამოქმედო გეგმა გააცნო. „მომავალი 4 წლისთვის ჩვენ გვაქვს გაწერილი გეგმა, თუ როგორ უნდა მოვახდინოთ ქვეყნის სწრაფი მოდერნიზაცია, რათა ჩვენი ინფრასტრუქტურა, პირველ რიგში სატრანზიტო და რეგიონული ინფრასტრუქტურა, იყოს თანამედროვე სტანდარტებთან შესატყვისი. საჭიროა ძირეული რეფორმების გატარება განათლების სისტემაში იმისთვის, რომ უმაღლესი განათლების მქონე ახალგაზრდები პირდაპირ დასაქმდნენ და აღარ დახარჯონ დრო და რესურსები იმ პროფესიებზე, რომლებიც დღეს ნაკლებად მოთხოვნადია. ასევე მნიშვნელოვანია ეკონომიკური რეფორმები, რომლებსაც ჩვენ ვატარებთ,“–აღნიშნა პრემიერმა. გიორგი კვირიკაშვილის განმარტებით, პარლამენტმა უკვე დაამტკიცა ახალი პაკეტი, რომლის თანახმადაც 1 იანვრიდან მოგების გადასახადი აღარ იარსებებს იმ შემთხვევაში, თუ მოგებული თანხა რეინვესტირდება მომავალ პროექტებში.  სიტყვით გამოსვლისას მთავრობის მეთაურმა ისაუბრა ნინოწმინდაში მიმდინარე ინფრასტრუქტურულ პროექტებზე და ხაზი გაუსვა მათ მნიშვნელობას რეგიონის ეკონომიური განვითარებისთვის. „ძალიან ბევრი საქმე კეთდება ნინოწმინდაში, მათ შორის ნინოწმინდა–ბავრას გზა, რომელიც იქნება თანამედროვე სტანდარტების შესაბამისი. ხორციელდება ირიგაციის პროექტები, რაც ძალიან მნიშვნელოვანია სოფლის მეურნეობის განვითარებისთვის; ასევე სხვადასხვა სოფლების გაზიფიცირების პროექტი, რომელიც მომავალშიც გაგრძელდება და დაფარავს სხვა სოფლებსაც,“– აღნიშნა პრემიერ–მინისტრმა.  გამოსვლის დასასრულს პარტიის თავმჯდომარემ საქართველოს ეთნიკურ მრავალფეროვნებაზე გაამახვილა ყურადღება და განაცხადა, რომ ქვეყნის ერთ–ერთ სიმდიდრეს სწორედ მისი მრავალფეროვნება წარმოადგენს.

ჩვენ ძალიან დიდ ყურადღებას მივაქცევთ თეთრიწყაროს ტურისტული პოტენციალის განვითარებას და სპეციალურად თეთრიწყაროსთვის, ტურიზმის განვითარების ნაბიჯ-ნაბიჯ გაწერილი გეგმა შეიქმნება, - ამის შესახებ საქართველოს პრემიერ-მინისტრმა თეთრიწყაროს მოსახლეობასთან შეხვედრისას განაცხადა, სადაც რაიონის მაჟორიტარი დეპუტატობის კანდიდატი გოდერძი ჩანქსელიანი წარადგინა. გიორგი კვირიკაშვილის განცხადებით, რაიონს ტურიზმის მიმართულებით უდიდესი პოტენციალი აქვს და მთავრობა ყველაფერს გააკეთებს, რომ თეთრიწყარო კიდევ უფრო გალამაზდეს და საქართველოში ერთ-ერთი უმთავრესი, ყველაზე საინტერესო ტურისტული მიმართულება გახდეს. პრემიერმა, სიტყვით გამოსვლისას, გასული პერიოდის განმავლობაში განხორციელებულ ცვლილებებზე ისაუბრა და აღნიშნა, რომ 2011 წელს მოხდა ძალიან მნიშვნელოვანი ცვლილება საქართველოს პოლიტიკურ სინამდვილეში - ბიძინა ივანიშვილმა გადადგა მოქალაქეობრივი, იმ დროისთვის გმირული ნაბიჯი და ქართველ ხალხთან ერთად მნიშვნელოვანი გარდატეხა მოახდინა. „თქვენ შეგიძლიათ შეადაროთ დღევანდელი წინასაარჩევნო კამპანია იმას, რაც ხდებოდა ოთხი წლის წინ საქართველოში. განსხვავდება, როგორც ცა და მიწა. შეგიძლიათ, შეადაროთ დღევანდელი მედიასივრცე, სატელევიზიო ახალი ამბები, რომლებიც გადმოსცემდნენ ერთსა და იმავეს, დღეს სრულიად განსხვავებული სურათია. ხშირად ისმის კრიტიკა, შეიძლება ხანდახან გულიც გვეტკინოს არაობიექტური კრიტიკის გამო, მაგრამ ეს არის ის გზა, რომელიც ჩვენ ავირჩიეთ. ეს არის დემოკრატიული განვითარების გზა, რომელიც ქართველმა ხალხმა დაიმსახურა იმ ბრძოლის შედეგად, რომელიც წლების განმავლობაში გასწია. ეს არის ის სახელმწიფო, რომელსაც ჩვენ ვაშენებთ, რომელიც აღარ გადადის ჩვენი მოქალაქეების ზურგებზე, ჩვენ, მათი უფლებების დარღვევით არ მივდივართ წინ. ვაშენებთ ახალ ქვეყანას, რომელიც იქნება თანამედროვე ევროპული ტიპის სახელმწიფო, რომელიც პატივს სცემს საუკეთესო ეროვნულ ქართულ ტრადიციებს და რომელსაც ჩვენი ხალხი იმსახურებს“, - განაცხადა გიორგი კვირიკაშვილმა. მთავრობის მეთაურმა ისაუბრა ჯანდაცვისა და სოფლის მეურნეობაზე. მისი თქმით, 3 მილიარდი ლარი იხარჯება ჯანდაცვასა და სოციალურ მიმართულებაზე, რაც სახელმწიფო ბიუჯეტის თითქმის 35%-ია, ხოლო სოფლის მეურნეობას უპრეცენდენტოდ მაღალი ყურადღება ეთმობა. პრემიერ-მინისტრმა ასევე ყურადღება გაამახვილა დამწყები ბიზნესის დაფინანსების ხელშემწყობი მექანიზმის შექმნაზე და აღნიშნა, რომ ეს ყველაფერი, მთლიანობაში, ქვეყნის თვისობრივად შეცვლის საშუალებას იძლევა. „მინდა დაგარწმუნოთ, რომ ჩვენ ის პოლიტიკური ძალა ვართ, რომელშიც ყველაზე მეტად არის შერწყმული გამოცდილება, კომპეტენცია, თანამედროვე და ამავე დროს, საუკეთესო ეროვნული ფასეულობები. ჩვენ ვართ პოლიტიკური ძალა, რომელსაც არ გააჩნია დისტანცია საკუთარ მოსახლეობასთან, რომლისთვისაც უცხო არ არის არაფერი ადამიანური. გაჭირვება ჩვენ პიროვნულად გამოგვიცდია და გაგვივლია. ჩვენ თქვენი ცხოვრებით გვიცხოვრია და ვცხოვრობთ დღესაც. სწორედ ამიტომ, სიამაყით მინდა გითხრათ, რომ ჩვენ ვართ პოლიტიკური ძალა, რომელსაც აქვს ამბიცია, გააერთიანოს მთელი საქართველოს საზოგადოება, დაასრულოს გათითოკაცებული საქართველო და ავაშენოთ ერთიანი, გალამაზებული, გაფერადებული, ამუშავებული, დაქოქილი და აგუგუნებული ქვეყანა. გაუმარჯოს ერთიან, ძლიერ საქართველოს“, - მიმართა პრემიერ-მინისტრმა თეთრიწყაროს მოსახლეობას. თეთრიწყაროს მაჟორიტარი დეპუტატობის კანდიდატმა გოდერძი ჩანქსელიანმა სიტყვით გამოსვლისას საქართველოს პრემიერ- მინისტრსა და „ქართული ოცნების“ გუნდს გამოცხადებული ნდობისთვის მადლობა გადაუხადა. „ჩემს გაკეთებულ საქმეებზე მეტყველებს ჩემი წარსული. მე მოვდივარ ბიზნესიდან, თუმცა ბიზნესამდე არაერთ თანამდებობაზე ვმუშაობდი ძალოვან სტრუქტურაში. ასევე ვმუშაობდი ქვემო ქართლში სამხარეო პოლიციის უფროსის თანამდებობაზე. ამით იმის თქმა მინდა, რომ კარგად ვიცი თქვენი გასაჭირი და პრობლემები. იმედი მაქვს, რომ ერთად შევძლებთ თეთრიწყარო ვაქციოთ ერთ-ერთ წარმატებულ რეგიონად საქართველოში. საქმეში დავუდგეთ ერთმანეთს გვერდით. დიდი მადლობა, რომ დღეს ვხედავ ასეთ ხალხმრავალ შეკრებას. მე დავიბადე და გავიზარდე აფხაზეთში, ვიზრდებოდი ქართველების, სომხების აზერბაიჯანელების, ბერძნების, უკრაინელებისა და რუსების გვერდით. როგორც იცით, ჩვენს რაიონში სხვადასხვა ეროვნების ხალხი ცხოვრობს. არ გამიჭირდება მათთან საერთო ენის გამონახვა. ნებისმიერ პრობლემას ერთობლივად გადავწყვეტთ. ხვალიდან ჩვენ დავიწყებთ მუშა შეხვედრებს ყველა საარჩევნო უბანში და ვისაუბრებთ თეთრიწყაროსა და გარდაბნის საჭირბოროტო საკითხებზე. კიდევ ერთხელ დიდი მადლობა ნდობისა და მობრძანებისათვის“,-აღნიშნა გოდერძი ჩანქსელიანმა.

გპირდებით, მომავალი ოთხი წლის განმავლობაში, ძალიან სწრაფი განვითარების გეგმით, ჩვენ მივაღწევთ საქართველოს განვითარების იმ ეტაპს, როდესაც ჩაყრილი იქნება საფუძველი გრძელვადიანი, განვითარებული, გაფერადებული და აგუგუნებული ქვეყნისთვის, ჩვენი საქართველოსთვის, - ამ სიტყვებით მიმართა საქართველოს პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა წალკის მოსახლეობას, რომელსაც მაჟორიტარი დეპუტატობის კანდიდატი კახა ოქრიაშვილი წარუდგინა.  გიორგი კვირიკაშვილმა აღნიშნა, რომ ეს, ადგილობრივი წარმოების განვითარებით, სოფლის მეურნეობის ხელშეწყობითა და გონივრული საგარეო პოლიტიკით მიიღწევა. „ჩვენ ვართ იმ ადამიანებისგან შემდგარი გუნდი, რომელიც თითოეული თქვენგანის პრობლემას გულთან ახლოს მიიტანს, რომლისთვისაც უცხო არ არის არც გაჭირვება, გამოგვივლია ყველანაირი საფეხური ცხოვრებაში. ჩვენსა და თქვენს შორის აღარ არსებობს ნაპრალი, დღეს ჩვენს მოსახლეობას სადამსჯელო სტრუქტურების აღარ ეშინია“, - განაცხადა პრემიერმა.  გიორგი კვირიკაშვილის შეფასებით, 2012 წლის შემოდგომაზე, როდესაც ბიძინა ივანიშვილმა გამოაცხადა პოლიტიკური პარტიის შექმნის შესახებ, ქართველ ხალხთან ერთად, საქართველოს პოლიტიკურ სინამდვილეში უდიდესი გარდატეხა მოხდა. მისივე თქმით, დღეს საარჩევნო პროცესი თვისობრივად განსხვავებულია იმისგან, რაც 2012 წლის განმავლობაში ხდებოდა, ის გაცილებით დემოკრატიული და მშვიდობიანია, რაც ძალიან დიდი მონაპოვარია. „დიდი მონაპოვარია ის, რომ ჩვენს მოსახლეობას დღეს აღარ ეშინია მთავრობის და სხვადასხვა სტრუქტურების, გვაქვს თავისუფალი მედია, სადაც თავისუფალი აზრი ისმის. ის, რომ შეიძლება ხშირად ისმოდეს მთავრობის კრიტიკა, არამც და არამც არ ნიშნავს, რომ ყველაფერი, რასაც იქიდან იგებთ, სიმართლეა. რა თქმა უნდა, ეს ყველაფერი არის დემოკრატიის მახასიათებელი და ჩვენ ასე უნდა გავაგრძელოთ განვითარება“, - განაცხადა პრემიერმა.  გიორგი კვირიკაშვილმა გასული ოთხი წლის განმავლობაში განხორციელებულ მნიშვნელოვან რეფორმებზე ისაუბრა და განსაკუთრებით გამოყო ჯანდაცვისა და სოფლის მეურნეობის სფეროები. მთავრობის მეთაურმა ყურადღება „მაღალმთიანი რეგიონების შესახებ“ კანონსაც დაუთმო. „ჩვენ ვართ ის მთავრობა, რომელმაც მთის კანონი მიიღო და რომლითაც დიდი ყურადღება ექცევა მთიან რეგიონებში პედაგოგებს, კერძო სექტორის წარმომადგენლებს, რაც ძალიან მნიშვნელოვანია. ჩვენი ოპონენტები ხშირად არიან ადამიანები, რომლებმაც მთის კანონს მხარი არ დაუჭირეს და ძალიან გთხოვთ, როდესაც განსაზღვრავთ, ვის უნდა ენდოთ მომავალი ოთხი წლის განმავლობაში, ეს აუცილებლად გაითვალისწინოთ“, - მიმართა პრემიერ-მინისტრმა წალკის მოსახლეობას. გიორგი კვირიკაშვილის თქმით, მთავრობა ყველაფრით კმაყოფილი არ არის, თუმცა არ გადაუდგამს არც ერთი ნაბიჯი, რომელიც ქვეყნის სიყვარულით არ იყო ნაკარნახევი.  მთავრობის მეთაური, მაჟორიტარი დეპუტატობის კანდიდატის წარდგენის შემდეგ, ადგილობრივ მოსახლეობას გაესაუბრა და მათ პრობლემებს გაეცნო. როგორც წალკა-დმანისის მაჟორიტარი დეპუტატობის კანდიდატმა კახა ოქრიაშვილმა სიტყვით გამოსვლისას განაცხადა, „ქართული ოცნება“ არის ის ძალა, ვისაც ძალუძს ქვეყანა, ხალხი წინ წაიყვანოს.  „წალკა, როგორც დმანისი, მრავალეთნიკურია. აქ საქართველოს სხვადასხვა კუთხის ქართველები ცხოვრობენ. ქართველებთან ერთად ცხოვრობენ სომხები, ბერძნები,აზერბაიჯანელები, რუსები. ჩვენ ერთი დიდი ოჯახი ვართ. ჩვენ ერთმანეთთან ურთიერთობა ვიცით და ამ დამოკიდებულებას ძალიან ვაფასებთ, ვუფრთხილდებით. წარსულში საქართველო დიდი პრობლემების მომსწრეა. ვნახეთ სამოქალაქო დაპირისპირება, ქვეყნის ნგრევა, ეკონომიკის ჩამოშლა, იყო ბევრი წარმატებაც. რატომ ხდებოდა ეს რყევები ჩვენს ქვეყანაში წარსულში? ჩვენს მიერ არჩეული მთავრობები, სამწუხაროდ ბევრ შეცდომებს უშვებდნენ. ჩვენს ქვეყანას ყოველთვის ჰქონდა კვალიფიციური, მდგრადი, გაწონასწორებული პოლიტიკოსების დეფიციტი. დღეს ჩვენ ყველას გვაქვს შანსი, ბატონი გიორგი კვირიკაშვილის ირგვლივ, შევქმნათ კვალიფიციური ხალხისგან შემდგარი „ქართული ოცნების“ სრულიად ახალი გუნდი, რომელიც წინ წაიყვანს ქვეყანას და თითოეულ ჩვენს მოქალაქეს. მე გამაჩნია წლების განმავლობაში ბიზნესსა და პოლიტიკაში დაგროვილი გამოცდილება, ცოდნა. მინდა, რომ ეს გამოცდილება მოვახმარო ჩვენს ქვეყანას, მათ შორის წალკას და დმანისს, მოვახმარო ამ ახალ კვალიფიციურ გუნდთან ერთად. დღეს ჩვენ ვართ ის ძალა, ვისაც ძალუძს ქვეყანა, ხალხი წინ წაიყვანოს. ჩვენ გვაქვს ოთხ პუნქტიანი კონკრეტული გეგმა ჩვენი ქვეყნის განვითარების. მოდით, დავდგეთ ერთმანეთის გვერდით, ერთობლივად შევქმნათ ჩვენი შვილების მომავალი საქართველო. ძვირფასო წალკელებო, თქვენ და ჩვენ ერთად გავიმარჯვებთ“,-აღნიშნა კახა ოქრიაშვილმა.