ჩემთვის დიდი პატივია, რომ დღეს ხელვაჩაურში ვიმყოფები. მუნიციპალიტეტში, სადაც განსაკუთრებული ადამიანები ცხოვრობენ, რომლებიც თავიანთი ყოველდღიური შრომით, ყოველდღიური მოღვაწეობით ძალიან ბევრს აკეთებენ ამ მხარისთვის და რა თქმა უნდა, ჩვენი ქვეყნისთვის.  ალბათ არავისთვის არის საიდულმო, რომ აჭარა, მთლიანად ეს მხარე, ტოლერანტობის, მეგობრობის ურთიერთისყვარულის განსაკუთრებულ ტრადიციას ინახავს. სწორედ აჭარაში, განსხვავებული ეთნიკური წარმომავლობისა და რელიგიური აღმსარებლობის მქონე ადამიანები მშვიდობიანად თანაცხოვრობენ და ერთად შრომობენ საკუთარი სამშობლოს, საკუთარი რეგიონის განვითარებაზე. სწორედ აქ მცხოვრები, ადგილობრივი მოსახლეობის უდიდესი ტოლერანტობის გამოვლინების დამსახურებაა, რომ აფხაზი მუჯაჰირების შთამომავლები დღესაც ცხოვრობენ მინიციპალიტეტის ტერიტორიაზე და საკუთარი მხარის განვითარებაზე ზრუნავენ.   ამ მხარეს, ხელვაჩაურის მუნიციპალიტეტს საკმაოდ დიდი ისტორია აქვს. ყველამ კარგად იცის, რომ შუა საუკუნეებში აღნიშნულ ტერიტორიებს მთლიანად დასავლეთ საქართველოსთვის მნიშვნელოვანი სტრატეგიული დანიშნულება ჰქონდა. ამ ადგილებში გვხვდება შუა საუკუნეების მნიშვნელოვანი ძეგლები . ეს ყველაფერი ჩვენი ისტორიის უნიკალური მონაპოვარია, რაც თითოეულ ჩვენგანს სიამაყით ავსებს, თუმცა, აუცილებელია, რომ ყველამ ერთად, ხელვაჩაურის სამომავლო განვითარებაზე ვიზრუნოთ, რასაც ჩვენი ხელისუფლება 2012 წლიდან მოყოლებული საქმით ამტკიცებს. განვლილი რვა წლის მანძილზე, მუნიციპალიტეტში უამრავი მასშტაბური პროექტი იქნა განხორციელებული. დაიგო გზები, განვითარდა ინფრასტრუქტურა, ხელისუფლების ინიცირებული პროგრამების საშუალებით სახელმწიფოსა და მოქალაქეების წარმატებული თანამშრომლობის მაგალითები ვიხილეთ სოფლის მეურნეობაში. ასევე, ძალიან მნიშვნელოვანია ჯანდაცვის სფეროში განხორციელებული რეფორმები და ასევე, ეკონომიკის სამინისტროს მიერ წარმოდგენილი სხვადასხვა პროგრამები, რითაც შესაძლებლობა აქვს ჩვენი ქვეყნის მოსახლეობას, რომ  განავითაროს მცირე და საშუალო ბიზნესი.  რა თქმა უნდა, ეს საკმარისი არ არის და მემგონი ყველა ვთანხმდებით იმაზე, რომ როგორც აქ, ასევე ქვეყანაში სხვადასხვა მიმართულებით არსებობს გამოწვევები, არსებობს ჯერ კიდევ პრობლემები, რასაც სჭირდება მოგვარება და მოწესრიგება. მე დარწმუნებული ვარ, რომ ჩვენ ერთიანი ძალისხმევით შევძლებთ ამ გამოწვევებს ღირსეულად ვუპასუხოთ. ჩვენ შევძლებთ, რომ ეს პრობლემები ეტაპობრივად მოვაგვაროთ, მაგრამ აქაც ძალიან მნიშვნელოვანია ჩვენი ერთობა, რაც ამ ბოლო წლების განმავლობაში, მოყოლებული 2012 წლიდან, ყოველდღიურად ვხედავდით ჩვენ თუ რამხელა ძალა აქვს ამ ერთობას. ჩვენ ყველაფერი უნდა გავაკეთოთ, უნდა ვიშრომოთ თითოეული სოფლის წარმატებისთვის , უნდა ვიშრომოთ თითოეული რაიონის, თითოეული მუნიციპალიტეტის , თითოეული ქალაქის წარმატებისთვის. ერთად უნდა შევქმნათ წარმატებული ისტორიები. ერთად საქართველოს წარმატებისთვის!

დიდი პატივია დღეს აქ ყოფნა და საუბარი იმაზე, რა უნდა გავაკეთოთ ხვალ, ზეგ. ახლა ყველანი საარჩევნო ციკლში ვართ, განსაკუთრებით, უკვე 1 სექტემბრიდან, ჩათვალეთ, რომ საარჩევნო კამპანია იქნება გახსნილი, მაგრამ როგორც კი 31 ოქტომბერს ჩვენ სამართლიან ბრძოლაში გავიმარჯვებთ, მეორე დღიდან უნდა გადავიდეთ უკვე მუშაობის, ყოველდღიური შრომის ციკლზე. ამას ძალიან დიდი მნიშვნელობა აქვს იმიტომ, რომ დღეს ჩვენ აქ ვართ საზღვრისპირა მუნიციპალიტეტში. ხელვაჩაურის უნიკალურობა მდგომარეობს იმაში, რომ აქ ერთ დონეზეა განვითარებული სოფლის მეურნეობა და ინდუსტრიული ეკონომიკა, ტურიზმიც და აქ ბევრი შესაძლებლობა აქვთ ადამიანებს. სახელმწიფოს ძირითადი მოვალეობა გახლავთ ის, რომ ადამიანებს, რომელთაც არ ეზარებათ შრომა, შეუქმნას ყველას ის პირობა, რომ ღირსეულად იშრომონ და არჩინონ თავიანთი ოჯახები. სწორედ, ამიტომ შექმნა სახელმწიფომ სხვადასხვა მიმართულებით სპეციალური პროგრამები, თითოეული მოქალაქისთვის - გლეხისთვის, რომ გახდეს ძლიერი ფერმერი, ის, ვინც ინდუსტრიაში მუშაობს, რომ დაიწყოს თავისი ბიზნესი და შექმნას საწარმო. ვინც ტურიზმის მიმართულებით არჩია შრომა, მას შევუქმნათ ყველანაირი პირობები, რომ შექმნას ტურისტული საწარმო. წელს ცოტა გაგვიჭირდა, პანდემიასთან დაკავშირებით. არა მხოლოდ ჩვენს ქვეყანას, გლობალურად, ხედავთ, რომ ტურისტების ნაკლებობაა აჭარაშიც და მსოფლიოშიც, თუმცა ყველანი ერთად დავირაზმეთ, მთელი საქართველო და ვთქვით, რომ აღმოვაჩინოთ თავიდან ჩვენი ქვეყანა და  შიდა ტურიზმის შედეგებს დღეს ბათუმში, ხელვაჩაურში, ქედაში, ყველგან ვხედავთ, საქართველოს სხვადასხვა კუთხიდან რამდენი სტუმარი ჰყავს დღეს აჭარას. მთავარი გახლავთ ის, რომ სახელმწიფოს და მთავრობის მიერ გადადგმული ნაბიჯები არის აბსოლუტურად გააზრებული. მაგალითად - „აწარმოე საქართველოში“, ეს პროგრამები, რომლებიც აძლევენ შესაძლებლობას ადამიანს, რომელსაც შეუძლია, გარისკოს, აიღოს თავის თავზე პასუხისმგებლობა, მიეხმაროს ყველანაირად ფინანსებით, ქონებით, საკუთრებით, მიწით. ეს ყველაფერი იმისთვის არის გაკეთებული, რომ იმ ადამიანებს, იმ ახალგაზრდებს, რომელთაც შეუძლიათ ეფექტურად შრომა, შევუქმნათ ყველანაირი პირობები. დღეს მე მინდა, ორიოდე სიტყვა გითხრათ იმ ახალ პროგრამაზე, რომელიც ჩვენ დავიწყეთ, რომელიც მოიცავს „აწარმოე საქართველოს“, სოფლის მეურნეობის სხვადასხვა პროგრამებს, მაგრამ ყოველთვის პრობლემა იყო ის, რომ აქედან უნდა ჩასულიყავით თბილისში, სამინისტროში მისულიყავით, იქ მიგეღოთ გარკვეული მომსახურება. დღეს, ჩვენ გავაკეთეთ ახალი პროგრამა, „სახელმწიფო შენი პარტნიორია“, რაც ნიშნავს იმას, რომ 88 მუნიციპალიტეტში, სამოქალაქო ცენტრებში და იუსტიციის სახლებში, კიდევ 24 იუსტიციის სახლში, თითოეულ მოქალაქეს შეუძლია მივიდეს და მიიღოს სრული ინფორმაცია, რა სახის პროგრამებში შეუძლია მონაწილეობა. ეს ძალიან მნიშვნელოვანია. სახელმწიფო მიდის დასახლებულ პუნქტში, ადამიანთან, მის ქალაქში, მის დაბაში, მის სოფელში იმისთვის, რომ კიდევ უფრო მეტი კომფორტი შევუქმნათ ადამიანს, რათა იშრომოს. რა თქმა უნდა, ეს არის ყველაზე მნიშვნელოვანი. ყველაზე მნიშვნელოვანია სამართლიანი სახელმწიფო, რომელიც კეთილსინდისიერ, შრომისმოყვარე  მოქალაქეს აძლევს შესაძლებლობას, ღირსეულად იშრომოს და არჩინოს თავისი ოჯახი. ეს არის სახელმწიფოს ყველაზე დიდი ფუნქცია, თუმცა, ამასთან ერთად, სახელმწიფოს მოვალეობაა, პირველ რიგში, წესრიგში მოიყვანოს სისტემური ინფრასტრუქტურა. ის, რომ თქვენთან, აქ, არ უნდა იყოს გაზის, სასმელი წყლის, გზების პრობლემა. მე ხშირად ვამბობ ხოლმე, რომ ბევრი კარგი საქმეა დაწყებული, დასრულებულიც, მაგრამ   კიდევ ბევრი რამ გვაქვს დასასრულებელი ერთად. ყველას კარგად უნდა გვესმოდეს, რომ გზები, გაზმომარაგება, სასმელი წყალი ბოლომდეა მისაყვანი. საქართველოს ბევრ რეგიონში, საირიგაციო წყალი ბოლომდეა მისაყვანი, სკოლებია გასარემონტებელი და ახალი - ასაშენებელი. ეს არ ნიშნავს იმას, რომ ჩვენ ეს პრობლემები დღეს აღმოვაჩინეთ, ეს ნიშნავს, რომ ჩვენ, წლებია ამ პრობლემებზე ვმუშაობდით და  თითოეული მოქალაქე ამას ხედავს. ჩვენ ხომ, ზოგიერთებივით, მხოლოდ ფასადურად, პიარს არ ვაკეთებთ, პირიქით, ჩვენ რაღაცას ვაკეთებთ, შემდეგ მოვდივართ თქვენთან და გეუბნებით, რომ მოდით, გავაგრძელოთ ერთად. დარწმუნებული ვარ, რომ ჩვენ ამას გავაკეთებთ ერთად, იმიტომ, რომ ბევრი წამოწყება, რომელმაც კონკრეტული შედეგი მოუტანა საქართველოს თითოეულ მოქალაქეს, არის დასასრულებელი. მე დარწმუნებული ვარ, რომ ანზორ ბოლქვაძე, ისევე, როგორც ფრიდონ ფუტკარაძე, იქნებიან საქართველოს უმაღლეს საკანონმდებლო ორგანოში და აჭარის უმაღლეს საბჭოში, თქვენი მუნიციპალიტეტის ღირსეული წარმომადგენლები. ამას ხაზგასმით აღვნიშნავ ყველგან და კიდევ ერთხელ ვიტყვი,  დარწმუნებული ვარ, რომ  ჩვენ, ყველანი ერთად გავიმარჯვებთ სამართლიან ბრძოლაში და გისურვებთ გამარჯვებას!

მაჟორიტარი დეპუტატობის კანდიდატის, ანზორ ბოლქვაძისა და აჭარის ა/რ უმაღლესი საბჭოს მაჟორიტარი დეპუტატობის კანდიდატის, ფრიდონ ფუტკარაძის წარდგენა ხელვაჩაურში

კიდევ ერთხელ მინდა გესაუბროთ ჩვენს სამომავლო გეგმებზე, ჩვენს განვითარების პერსპექტივებზე, რომელიც, პირველ რიგში, უნდა შეეხოს მაღალმთიან აჭარას და ხულოს. ეს პროგრესი მართლაც ხელშესახებია. დარწმუნებული ვარ, როგორც დღეს, ისე მომავალშიც, თითოეული ხულოელი იგრძნობს იმ განვითარებას, იმ სამართლიან პერსპექტიულ ქვეყანას, რომელსაც საფუძველი ჩაეყარა 2012 წელს ბატონი ბიძინა ივანიშვილის ლიდერობით. მაღალმთიან აჭარას ამ დიდ გამარჯვებაში დიდი წვლილი მიუძღვის, ამიტომ, დღესაც გვჭირდება თქვენი გვერდში დგომა, გვჭირდება ნდობა, იმისათვის, რომ გავაგრძელოთ ის კონკრეტული საქმეები, ბოლომდე მივიყვანოთ ის გეგმები, რომლებიც გვაქვს და ჩვენმა მეგობრებმა ისაუბრეს, როგორიცაა მაღალმთიანი აჭარის გაზიფიცირება, ასევე, წყალმომარაგება. ვიცით, რომ ბევრ სოფელს აწუხებს წყლის პრობლემა. ჩვენ დავიწყეთ პროექტი, რომელიც, დაახლოებით, 2 წლის განმავლობაში სრულად გადაჭრის ხულოში წყლის მომარაგების საკითხს, ასევე, გაზიფიცირება იქნება ბოლომდე მიყვანილი. მომავალ წელს პრაქტიკულად ყველა სოფელში დაიწყება შიდა დაქსელვითი სამუშაოები და ყველას ექნება ბუნებრივი აირი. წელს პირველად, კურორტ გოდერძიზე მივიყვანეთ ბუნებრივი აირი, რაც არის მაღალმთიანი აჭარის, კურორტ გოდერძის და ასევე მიმდებარე ტურისტული ლოკაციების განვითარების პირობა. ჩვენ არ დაგვვიწყებია, რომ როგორც ხულოში, ისე ყველგან, მოქალაქეებს სჭირდებათ ჯანდაცვა, სოციალური მზრუნველობა და ამ მიმართულებით არაერთი მნიშვნელოვანი პროგრამა განხორციელდება და ხორციელდება, როგორც აჭარის მთავრობის, ისე ცენტრალური ხელისუფლების დონეზე. განსაკუთრებით მნიშვნელოვანია განათლება და იცით, რომ ჩვენს პროფესიულ სასწავლებლებში, რომელიც ხულოში გაიხსნა, უკვე არაერთი ნიჭიერი ხულოელი სწავლობს. დარწმუნებული ვარ, ისინი კიდევ უფრო მეტად გამოადგებიან მათ ოჯახებს, მუნიციპალიტეტს და ქვეყანას. მინდა, მადლობა გადაგიხადოთ თქვენი ერთიანობისთვის, იმ ერთიანობისთვის, რომელიც კიდევ უფრო მეტად აძლიერებს მაღალმთიან აჭარას და არის ჩვენი ძლიერი ქვეყნის, ძლიერი სახელმწიფოს წინაპირობა. ჩვენ არჩევანი შევაჩერეთ ორ ღირსეულ ადამიანზე, ღირსეულ ხულოელზე და ღირსეულ შუახეველზე, რომლებმაც კარგად იციან არსებული რეალობა, იციან თქვენი გამოწვევები, თქვენი პრობლემები და ჩვენ ერთად, გუნდურად გავაგრძელებთ მუშაობას, რომ ყველა ეს პრობლემა მაქსიმალურად მოკლე დროში გადავჭრათ, გავიმარჯვოთ ჩვენი ქვეყნის და ჩვენი საქართველოს წარმატებისთვის.

მოგესალმებით აჭარის და საქართველოს ულამაზეს კუთხეში, ხულოში! ჩემთვის პატივია აქ, თქვენთან ყოფნა და საუბარი, რა თქმა უნდა, პირველ რიგში, მომავალზე, მაგრამ, ვიდრე ამ საუბარზე გადავალთ, ყველა უნდა შევთანხმდეთ, რომ ეს კუთხე ქვეყნისთვის ყოველთვის იყო სამაგალითო. მთიანი აჭარა, თავისი სტუმარ-მასპინძლობით, ბუნებით, განვითარების პოტენციალით, რა თქმა უნდა, ბათუმთან ერთად, არის უნიკალური პოტენციალის მატარებელი კუთხე საქართველოში. თქვენი წარმატება და ის, რაც ბათუმსა და აჭარაში ხდება, აჭარის განვითარება, ყოველთვის იყო, არის და იქნება საამაყო თითოეული ქართველისთვის. ეს ჩვენი, ყველას პასუხისმგებლობაა. ხულოს მუნიციპალიტეტში რა გაკეთდა, ამაზე არ უნდა ვისაუბროთ, იმიტომ, რომ ამას ყველა ხედავს. ამას არ სჭირდება დამატებითი სიტყვები. უნდა ვისაუბროთ იმაზე, რაც იქნება მომავალში. იყო ისეთი დაპირებები, რომელიც ცოტა უფრო ადრე უნდა განგვეხორციელებინა, როგორიც არის, მაგალითად ხულო-ზარზმის გზა, მაგრამ მიუხედავად იმისა, რომ ეს ადრე უნდა დაწყებულიყო და ადრე დამთავრებულიყო, ეს გზა უკვე დაიწყო და უახლოეს 3 წელიწადში დასრულდება. ეს არ არის დაპირება, ეს უკვე საქმეა. ეს ისეთი საქმეა, როგორიც ბევრი დავიწყეთ და დასასრულებელი გვაქვს, ისევე, როგორც ხულოს და მაღალმთიანი აჭარის გაზით მომარაგება. მაგისტრალური გაზი აქ უკვე გამოყვანილია, დაერთება დროის საკითხია და ესეც, სისტემური ინფრასტრუქტურის მოგვარების თემაა. შემდეგი თემაა სასმელი წყალი, რომელიც ასევე უნდა მოგვარდეს. რა თქმა უნდა, ჩვენ უნდა ვიზრუნოთ ყველამ ჩვენს მომავალ თაობაზე, ინფრასტრუქტურულად სკოლები მოვიყვანოთ წესრიგში, ავაშენოთ ახალი საბავშვო ბაღები და ა.შ ეს ყველაფერი არის ის, რაც ჩვენ ყველამ ერთად უნდა გავაკეთოთ და ამის გაკეთების ძირითადი მიზანი გახლავთ ის, რომ თითოეული ადამიანი, რომელიც ხულოში და მაღალმთიან აჭარაში ცხოვრობს, არაფრით უნდა განსხვავდებოდეს ადამიანისგან, რომელიც ბათუმში ან თბილისში ცხოვრობს. მათ თანაბარი შესაძლებლობები უნდა ჰქონდეთ და ეს განსაკუთრებით მნიშვნელოვანია ახალგაზრდებისთვის. ეს არის ის, რისთვისაც ჩვენ ყოველდღიურად უნდა ვიშრომოთ, იმის მიუხედავად, რა წინააღმდეგობები გველის წინ. არ იქნება მარტივი, პანდემიაა, ეკონომიკური კრიზისია, ყველა კარგად ვხედავთ, მაღალმთიან აჭარას როგორ დაეტყო ტურისტის შემცირება. ჩვენ ახლა გადასულები ვართ შიდა ტურიზმის სტიმულირებაზე, მაგრამ ყველას გვესმის, რომ ეს საკმარისი არ არის. მთავარია ის, რომ უნდა გვჯეროდეს და ვიცოდეთ, რომ ერთად, კეთილსინდისიერად და სამართლიანად უნდა მოვუაროთ ამ კუთხეს და ამ ქვეყანას იმისთვის, რომ უახლოეს პერიოდში საქართველო იყოს ეკონომიკურად ძლიერი, გამართული, ევროპული სახელმწიფო. ეს არის ის, რაც უნდა დავუტოვოთ ჩვენს მომავალ თაობებს და ჩვენს შვილებს. დარწმუნებული ვარ, ამაში თქვენი არჩევანიც მოგვეხმარება, რადგან დიდი მნიშვნელობა აქვს, ვინ წარმოადგენს ხულოს ხმას როგორც საქართველოს უმაღლეს საკანონმდებლო ორგანოში, ასევე აჭარის უმაღლეს საბჭოში. ეს ადამიანები არიან ის ადამიანები, რომლებსაც თქვენ კარგად იცნობთ და რომლებსაც თავიანთი ცხოვრებით, განვლილი გზით დაუმტკიცებიათ, რომ პირველ რიგში ზრუნავენ მაღალმთიან აჭარაზე, ხულოელებზე და რაც მთავარია, ადამიანზე. ამიტომ, დარწმუნებული ვარ, ჩვენ 31 ოქტომბერს გავიმარჯვებთ და რაც მთავარია, გავიმარჯვებთ სამართლიანად. გამარჯვებას გისურვებთ!

მოგესალმებით, მივესალმები პრემიერ-მინისტრს, ბატონ გიორგი გახარიას, მივესალმები აჭარის მთავრობის თავმჯდომარეს, დამსწრე საზოგადოებას. ძვირფასო სტუმრებო, პირველ რიგში, მინდა ყველას მადლობა მოგახსენოთ დღეს აქ მობრძანებისა და შეკრებისთვის. დღეს უაღრესად ბედნიერი ვარ, რომ კიდევ ერთხელ ამ ულამაზეს მხარეში ვიმყოფები და საშუალება მაქვს მოგმართოთ თქვენ, საკუთარ კუთხეზე შეყვარებულ პატრიოტ ქართველებს, რომლებიც ამ საოცარ ადგილს მომავალ თაობებს უნარჩუნებენ. თამამად შეიძლება ითქვას, რომ ხულო ტოლერანტობის, სიყვარულის, სხვადასხვა რელიგიური აღმსარებლობის მქონე ადამიანების მშვიდობიანი თანაცხოვრების ერთ-ერთი უნიკალური მაგალითია, რაც შეუძლებელია, აღფრთოვანებას არ იწვევდეს იმ ადამიანებისთვის, ვინც ამ მხარეს სტუმრობს. არავისთვის არის უცხო, რომ მაღალმთიანი აჭარა საოცარი ბუნებით, უგემრიელესი, მხოლოდ ამ ადგილისთვის დამახასიათებელი კერძებით გამოირჩევა, რაც უნიკალურ ნიადაგს ქმნის ტურიზმის სფეროს განსაკუთრებული განვითარებისთვის. ჩვენი ხელისუფლების უმთავრესი მიზანი და საზრუნავიც სწორედ ის არის, რომ თითოეულ რეგიონში, ქალაქსა თუ სოფელში არსებული პოტენციალი მაქსიმალურად იქნეს ათვისებული. საზოგადოებასთან აქტიური თანამშრომლობით განვავითაროთ კონკრეტული სფეროები, რაც, პირველ რიგში, სწორედ თქვენი, თითოეული ჩვენი მოქალაქის კეთილდღეობის ხარისხის ზრდაზე აისახება. დარწმუნებული ვარ, შეუიარაღებელი თვალითაც მარტივად შესამჩნევია, რომ 2012 წლის შემდეგ ჩვენს ქვეყანაში, ყველა მიმართულებით მოხდა ფუნდამენტური ცვლილებები. თამამად შეიძლება ითქვას, რომ კონკრეტულად ხულოში, ჩვენი ხელისუფლების პირობებში სასოფლო სამეურნეო და ტურისტული მიმართულებით ძალიან მნიშვნელოვანი პროექტები განხორციელდა, რაშიც მოსახლეობაც აქტიურად ჩაერთო, გარდა ამისა, ჩვენი ხელისუფლების პირობებში აქ, ამ მუნიციპალიტეტში აქამდე არნახული რაოდენობისა და მასშტაბების ინფრასტრუქტურული პროექტები განხორციელდა. დაიგო და რეაბილიტაცია ჩაუტარდა გზებს, აშენდა ხიდები, რაც მუნიციპალიტეტის სპეციფიკიდან გამომდინარე, ადგილობრივი მცხოვრებლებისა და ჩამოსული სტუმრებისთვის ძალიან მნიშვნელოვანია. ეს იმ საქმეების ძალიან მოკლე და პატარა ჩამონათვალია, რაც ბოლო წლების განმავლობაში იქნა განხორციელებული კონკრეტულად ხულოს მუნიციპალიტეტში, თუმცა გარდა მნიშვნელოვანი წინ გადადგმული ნაბიჯებისა, მნიშვნელოვანი განხორციელებული პროექტებისა, მემგონი ყველა ვთანხმდებით იმაზე, რომ ჯერ კიდევ, ხულოში , აჭარაში, ჩვენს ქვეყანაში არსებობს პრობლემები და გამოწვევები, რომლებსაც სჭირდება შესაბამისი რეაგირება, რომლებსაც სჭირდება შესაბამისი პასუხები. მე დარწმუნებული ვარ, ჩვენ ერთიანი ძალისხმევით შევძლებთ ამ გამოწვევებსა და პრობლემებს ღირსეულად ვუპასუხოთ და ყველა პრობლემა გადავლახოთ თავაწეულებმა. დღეს, ჩვენი შეკრების მიზეზი და მიზანი ყველამ ძალიან კარგად იცით, რომ გვინდა წარმოგიდგინოთ ორი ადამიანი, თუმცა ამაზე მოგვიანებით. მე დარწმუნებული ვარ იმაში, რომ ამ ადამიანებს ექნებათ თქვენი მხარდაჭერა და თანადგომა. ჩვენ 2012 წელს მივაღწიეთ მნიშვნელოვან გამარჯვებას. მაშინ, როდესაც ბიძინა ივანიშვილის ირგვლივ სრულიად საქართველო გაერთიანდა და არჩევნების გზით, როგორც ეს ნორმალურ, განვითარებულ, ცივილიზებულ ქვეყნებში ხდება, მშვიდობიანი გზით გავიმარჯვეთ არჩევნებში. 31 ოქტომბერს, საპარლამენტო არჩევნებში მჯერა, რომ ჩვენ ერთიანი ძალისხმევით შევძლებთ არჩევნების პირველივე ტურში გამარჯვებას. ჩვენ, ჩვენი წარმატებებით უნდა გავაძლიეროთ ჩვენი ქვეყანა, გავაძლიეროთ ჩვენი ქვეყნის ეკონომიკა.

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ხულოს მოსახლეობას მაჟორიტარი დეპუტატობის კანდიდატი, ანზორ ბოლქვაძე და აჭარის ავტონომიური რესპუბლიკის უმაღლესი საბჭოს მაჟორიტარი დეპუტატობის კანდიდატი, ფრიდონ ფუტკარაძე წარუდგინეს.

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე, აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე და ხულოს, შუახევის, ქედისა და ხელვაჩაურის მაჟორიტარი დეპუტატობის კანდიდატი ანზორ ბოლქვაძე ხულო-ზარზმის გზის სამშენებლო სამუშაოების მიმდინარეობას გაეცნენ. ინტენსიურ რეჟიმში მიმდინარეობს სამუშაოები 5 კმ-იან მონაკვეთზე, რომელიც სახელმწიფო ბიუჯეტიდან ფინანსდება, ხოლო 42 კმ-იან მონაკვეთზე, რომელსაც „ქუვეითის ფონდი“ აფინანსებს, გამარჯვებული გამოვლენილია და სამუშაოები უახლოეს პერიოდში დაიწყება.  პროექტი სამ მონაკვეთადაა დაყოფილი და ჯამში რეაბილიტაცია-რეკონსტრუქცია 47- კილომეტრიან გზას და 7 ხიდს ჩაუტარდება. დაიგება ორზოლიანი ასფალტ-ბეტონის საფარი. „ქართული ოცნების“ ლიდერების შეფასებით, ხულო-ზარზმის განახლებული გზა სტრატეგიულად მნიშვნელოვანია, რამდენადაც ის სამცხე-ჯავახეთის რეგიონს და აჭარის ავტონომიურ რესპუბლიკას უმოკლესი გზით დააკავშირებს. განახლებული გზით, ბათუმიდან ახალციხემდე მგზავრობის დრო 1.5 საათით შემცირდება. სარეაბილიტაციო მონაკვეთი დაბა ხულოდან იწყება, გაივლის გოდერძის უღელტეხილს და ადიგენის სოფელ ზარზმამდე მივა.

მივესალმები საქართველოს პრემიერ მინისტრს, გიორგი გახარიას, პარტია  „ქართული ოცნების“ გენერალურ მდივანს, კახა კალაძეს, ჩემს შუახეველებს. მინდა, მადლობა გადაგიხადოთ და ასევე მოგილოცოთ, რომ ჩვენმა გუნდმა არჩევანი გააკეთა თქვენს ძალიან ღირსეულ მერზე, რომელსაც ამ მოკლე პერიოდში უამრავი მიღწევა აქვს.  პრემიერ-მინისტრმა ძალიან სიღრმისეულად ისაუბრა იმ მიღწევებზე, იმ გამოწვევებზე, რომელიც გვაქვს შუახევში. შესაბამისად, მე აღარ დავიწყებ ამ ყველაფრის ჩამოთვლას. დარწმუნებული ვარ, რომ თქვენი გვერდში დგომით, ჩვენ, 31 ოქტომბერს, შევძლებთ კიდევ ერთი ღირსეული გამარჯვება ვიზეიმოთ. სწორედ ამიტომ, წარმოგიდგენთ კანდიდატებს, რომლებიც, დარწმუნებული ვარ, თქვენს ნდობას კიდევ ერთხელ გაამართლებენ. მათ უკვე შეძლეს, რომ ღირსეულად ემსახურათ მაღალმთიანი აჭარისთვის და შუახევისთვის.  იმ უამრავ მიღწევას, რომელიც გვქონდა, როგორც ინფრასტრუქტურის, დაბების, სოფლების, წყალმომარაგების, ასევე საგზაო ინფრასტრუქტურის ნაწილში -  სჭირდება ღირსეული გაგრძელება, კიდევ უფრო მეტი პოლიტიკური მხარდაჭერა.  ჩვენ, ყველანი ერთად, შევძლებთ კიდევ ერთ ღირსეულ გამარჯვებას მივაღწიოთ.  შუახევმა, თავისი უდიდესი პოტენციალით, ძალიან დიდი როლი ითამაშა ჩვენი ქვეყნის ენერგო დამოუკიდებლობაში და შუახევი ჰესი ამის ნათელი მაგალითია. ასევე, ტურიზმის მიმართულებით ჩვენ გვაქვს კონკრეტული გეგმები, რომლის განხორციელებაც უკვე დავიწყეთ. დარწმუნებული ვარ, თქვენი ღირსეული წარმომადგენლები, როგორც საქართველოს პარლამენტში, ასევე აჭარის უმაღლეს საბჭოში, კიდევ ერთხელ, უფრო მეტი პასუხისმგებლობით, უფრო მეტი რუდუნებით ბოლომდე მიიყვანენ ამ საქმეს.  როგორც ჭვანა, ასევე ჩირუხი, გახდება ახალი ტურისტული მიზიდულობის ცენტრები შუახევში და მაღალმთიან აჭარას ექნება მეტი დინამიკა.  ჩვენ აუცილებლად დავასრულებთ გაზიფიცირებას. სულ რამდენიმე საათში, ჩვენს სტუმრებთან ერთად მოვინახულებთ ხულო-ზარზმის გზის უკვე მიმდინარე მშენებლობას და ეს იქნება მაღალმთიანი აჭარისთვის ახალი პერსპექტივა. ჩვენ ბევრი გამოწვევა, ბევრი ბრძოლა მოგვიწია, რომ დღეს უკვე ის გზა ყოფილიყო მიმდინარე მშენებლობის ეტაპზე და როგორც ძალიან ბევრი სხვა დაპირება, ესეც იქნება შესრულებული.  მადლობა მინდა გადაგიხადოთ გვერდში დგომისთვის და მოველით, რომ თქვენს მაჟორიტარ კანდიდატებს ექნებათ ძალინ მაღალი ნდობა შუახევში.

მოგესალმებით, შუახეველებო!  აქ, ამ საოცარ ბუნებაში, საოცარ ადამიანებთან ერთად ყოფნა დიდი პატივია ყველა ჩვენგანისთვის, ვინც დღეს აქ ვართ. ჩვენ მომავალზე უნდა ვილაპარაკოთ. ჩვენ არ გვაინტერესებს წარსული. გვაინტერესებს მომავალი, გასაკეთებელი საქმე და რა თქმა უნდა, ჩვენი ბავშვების, ჩვენი შვილების მომავალი.  შუახევი ისტორიული ძეგლებით ერთ-ერთი გამორჩეული კუთხეა, სადაც ბევრი რამ გაკეთდა თითოეულ ციხესიმაგრესთან, თითოეულ ისტორიულ ძეგლთან მისასვლელი გზა ყველგან უნდა მივიყვანოთ, ყველგან უნდა გავაკეთოთ იმისთვის, რომ ტურიზმი განვავითაროთ, მეტი სტუმარი მიიღოს ამ მუნიციპალიტეტმა იმისთვის, რომ აჭარაც და საქართველოც გავაცნოთ ჩვენს სტუმრებს და ყველას დავანახოთ, რომ ეს არის წარმატებული ევროპული ქვეყანა თავისი ფასეულობებით და თავისი მომავლით, თუმცა ყველას კარგად უნდა გვესმოდეს, რომ ჯერ კიდევ ბევრი გვაქვს სამუშაო იმისთვის, რომ ელემენტარული სისტემური ინფრასტრუქტურა მოვიყვანოთ წესრიგში.  მიუხედავად იმისა, რომ დღეს შეგვიძლია ვთქვათ, რომ შუახევის მუნიციპალიტეტიდან ძირითად სოფლებამდე გზები ასე თუ ისე წესრიგში მოვიყვანეთ, შიდა სასოფლო გზები ყველგან  გასაკეთებელია. ყველაფერს რომ თავი დავანებოთ, გაზიფიცირება დასასრულებელია და მაღალმთიან აჭარაში ერთხელ და საბოლოოდ გაზი უნდა შევიდეს, ისევე, როგორც შუახევში სასმელი წყლის საკითხი საბოლოოდ უნდა გადაწყდეს.  მიუხედავად იმისა, რომ ბევრი ბაღი გარემონტდა, მუნიციპალიტეტის დაახლოებით 10 ბაღში ჩატარდა რეაბილიტაცია, ესეც არ არის საკმარისი, იმიტომ, რომ ბავშვები ჩვენი მომავალია. შუახევში ტარდება სკოლის რეკონსტრუქცია, რომელიც 2021 წელს უნდა დასრულდეს, მუსიკალური სკოლით, ინფრასტრუქტურით. არანაირი სხვაობა არ უნდა იყოს, ბავშვი იზრდება თბილისში, ბათუმში თუ შუახევში. ყველგან უნდა ჰქონდეს ერთნაირი წვდომა მაღალი ხარისხის განათლებასთან. მთლიანად აჭარაში, ისევე, როგორც შუახევში, მიწის რეგისტრაცია სისტემური პრობლემა იყო, რომლის გადაწყვეტა, ნელ-ნელა დავიწყეთ და სისტემურ მიწის რეგისტრაციასთან ერთად, 3 წელიწადში, ეს პრობლემა საბოლოოდ უნდა მოვაგვაროთ. ბევრი მაგარი, მნიშვნელოვანი საქმეა დაწყებული, რომელიც ბოლომდე ერთად უნდა მივიყვანოთ.  ბევრი რამ გაკეთდა სოფლის მეურნეობის მიმართულებით და აქ ყველაფერი უნდა გავაკეთოთ და ვაკეთებთ იმისთვის, რომ გლეხი გახდეს ფერმერი. ფერმერი ნიშნავს იმას, რომ ძლიერია და გარდა თავისი ოჯახისა, მეზობელს, ნათესავს დაასაქმებს და სხვა ოჯახებსაც შემოსავალს გაუჩენს. ყველა ის პროგრამა, რომელსაც ჩვენ, გლეხის, ფერმერის მხარდასაჭერად ვახორციელებდით, გაძლიერდება და გაგრძელდება. ყველა სასოფლო-სამეურნეო პროდუქტის გადამუშავებაში, რომელიც ამ ქვეყანაში და აჭარაში მოდის,  სახელმწიფო გლეხს მიეხმარება. ყველამ ერთად უნდა ვიშრომოთ და რაც მთავარია, ყველას უნდა გვესმოდეს, რომ გასაყოფი არაფერი არ გვაქვს.  ამ ლამაზ კუთხეს და ლამაზ ქვეყანას, ყველამ ერთად უნდა მოვუაროთ. მაშინ ვიქნებით წარმატებული ხალხი და მაშინ გვეთქმის ჩვენი მომავლისთვის, რომ ვიშრომეთ იმისთვის, რათა კეთილსინდისიერად, კეთილი და წარმატებული მომავალი დაგვეტოვებინა ჩვენი შვილებისთვის. ეს არის ჩვენი მიზანი.  ჩვენ არავისთან ბრძოლა და ომი  არ გჭირდება. ყველაზე კარგად ვიცით, სად, რომელ ქალაქში, სოფელში და რომელ დაბაში რა არის გასაკეთებელი. ამაში ვერავინ გვაჯობებს. ყველაზე ეფექტიანი მთავრობა არის და იქნება, იმიტომ, რომ ადამიანზეა ორიენტირებული. მისი ზრუნვა მიმართულია იმისკენ, რომ თითოეულ ადამიანს, თითოეულ ოჯახს შეუქმნას იმის შესაძლებლობა, რომ ღირსეულად, სამართლიანად და კეთილსინდისიერად იშრომოს და არჩინოს თავისი ოჯახი. ეს არის ჩვენი მიზანი და შუახევს აქვს ყველაფერი იმისთვის, რომ  იყოს ერთ-ერთი წარმატებული მუნიციპალიტეტი -  ბათუმთან სიახლოვე, ტურიზმის ძალიან დიდი ნაკადები, უამრავი ისტორიული ძეგლი, შესანიშნავი ბუნება და რა თქმა უნდა, რაც მთავარია, საუკეთესო ადამიანები.  ეს არის ის, რამაც უნდა გაგვხადოს ჩვენ საბოლოო ჯამში წარმატებული სოფელი, წარმატებული ქალაქი და წარმატებული ქვეყანა. ჩვენი მიზანია ძლიერი ეკონომიკა, წარმატებული, სამართლიანი ევროპული სახელმწიფო და ყველამ იცოდეთ, რომ სწორედ ასეთ სამართლიან ბრძოლაში, რა თქმა უნდა, ჩვენ გავიმარჯვებთ და თქვენ გეყოლებათ ღირსეული წარმომადგენლები, როგორც საქართველოს პარლამენტში, ასევე აჭარის უმაღლეს საბჭოში. გამარჯვებას გისურვებთ!

მოგესალმებით! მივესალმები შუახევის მკვიდრებს, ჩვენი ქვეყნის გამორჩეულ ხალხს, რომლებიც ამ ულამაზეს მხარეში ცხოვრობენ და საკუთარი საქმიანობით, საკუთარი ყოველდღიური შრომით აძლიერებენ ამ კუთხეს, ამ რეგიონს და რა თქმა უნდა, ჩვენს ქვეყანას.  „ქართული ოცნების“ ხელისუფლებაში მოსვლა ნიშნავდა ქვეყანაში ძალადობისა და ტერორის დასრულებას, თავისუფლებისა და ადამიანის უფლებებზე დაფუძნებული, დემოკრატიული და სამართლებრივი სახელმწიფოს მშენებლობას, სადაც უპირველესი პრიორიტეტი ადამიანი და მასზე ზრუნვაა. ჩვენმა გუნდმა სახელმწიფო რეალურად ხალხის სამსახურში ჩააყენა და ყველა მიმართულებით გააუმჯობესა ვითარება. შუახევის შემთხვევაში მინდა გამოვყო ინფრასტრუქტურული პროექტები, ტურიზმის ხელშეწყობა და სოფლის მეურნეობის მიმართულებით დაფინანსებული სხვადასხვა პროგრამები, სადაც „ქართული ოცნების“ ხელისუფლებამ საკმაოდ ბევრი პროგრამა განახორციელა, რომელიც დღემდე გრძელდება და რა თქმა უნდა, მომავალშიც გაგრძელდება იმისთვის, რომ გლეხს ხელი შევუწყოთ და სოფლები გავაძლიეროთ.  ამ და სხვა მიმართულებით გაკეთებული საქმეების მიუხედავად, მემგონი ყველა ვთანხმდებით იმაზე, რომ ჯერ კიდევ ბევრი პრობლემაა, არსებობს გამოწვევები, ქართული ოჯახები ჯერ კიდევ საკმარისად არ არიან წელში გამართულები, ხოლო ჩვენი ქვეყნის ეკონომიკა ევროპული ქვეყნებისას საკმაოდ ჩამორჩება.  ამისთვის ძალიან მნიშვნელოვანია ჩვენი ყოველდღიური შრომა და მე დარწმუნებული ვარ, ერთიანი ძალისხმევით, როგორც ეს წლების განმავლობაში ხდებოდა, ყველაფერს გავაკეთებთ, რომ ჩვენი ქვეყანა იყოს კიდევ უფრო წარმატებული, გვქონდეს კიდევ უფრო ძლიერი ეკონომიკა და რაც შეიძლება ძალიან სწრაფად, ჩვენი ქვეყნის თითოეულმა მოქალაქემ საკუთარ თავზე, საკუთარ ოჯახზე იგრძნოს კეთილდღეობა. „ქართული ოცნება“ არის ერთადერთი პოლიტიკური ძალა საქართველოში, რომელსაც ჩვენი ქვეყნის განვითარების, სტაბილურობისა და წარმატების რეალური ხედვა და რესურსი გააჩნია. ჩვენთვის დღეს ყველაზე მთავარი, ყველაზე მნიშვნელოვანი არის ქვეყანაში შევინარჩუნოთ მშვიდობა, სიმშვიდე და სტაბილურობა.  როდესაც ჩვენ ვსაუბრობთ გამოწვევებსა და პრობლემებზე, რა თქმა უნდა, ეს ყველაფერი არის მოგვარებადი, მაგრამ კიდევ ერთხელ მინდა ხაზი გავუსვა, თუ რამდენად მნიშვნელოვანია ჩვენი ერთობა. რამდენად მნიშვნელოვანია ერთად დგომა იმისთვის, რომ ღირსეულად გავუმკლავდეთ ამ პრობლემებსა და გამოწვევებს, რომლებზეც ჩვენ ვსაუბრობთ.  ჩვენ 31 ოქტომბერს გველოდება ძალიან მნიშვნელოვანი არჩევნები და მე მჯერა, როგორც  2012 წლიდან მოყოლებული დღემდე ღირსეულად გამოვდიოდით, ღირსეულად ვპასუხობდით ყველა არჩევნებს, ახლაც ვიტყვით ჩვენს სიტყვას.  დარწმუნებული ვარ, თქვენი თანადგომითა და მხარდაჭერით ჩვენ შეგვძლებთ გავიმარჯვოთ. ერთად საქართველოს წარმატებისთვის !

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა შუახევის მოსახლეობას მაჟორიტარი დეპუტატობის კანდიდატი, ანზორ ბოლქვაძე და აჭარის ავტონომიური რესპუბლიკის უმაღლესი საბჭოს მაჟორიტარი დეპუტატობის კანდიდატი, ფრიდონ ფუტკარაძე წარუდგინეს.

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე, აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე, ხულოს, შუახევის, ქედისა და ხელვაჩაურის მაჟორიტარი დეპუტატობის კანდიდატი ანზორ ბოლქვაძე და  შუახევში, ქედასა და ხელვაჩაურში უმაღლესი საბჭოს მაჟორიტარი დეპუტატობის კანდიდატი ფრიდონ ფუტკარაძე, შუახევში სანერგე-საჩითილე მეურნეობაში იმყოფებოდნენ.  მეურნეობის დირექტორმა, გოჩა ბერიძემ, „ქართული ოცნების“ ლიდერებს მიაწოდა ინფორმაცია, რომ სანერგე და საჩითილე მეურნეობა ორიენტირებულია მაღალი ხარისხის, სერტიფიცირებული, ეკოლოგიურად სუფთა, რაოდენობრივად უხვი მოსავლის ხეხილოვანი ნერგებისა და ბოსტნეული კულტურების ჩითილების წარმოებაზე და მთიანი აჭარის ფერმერებსა და აგრომეწარმეებს ემსახურება. პროექტის ფარგლებში ასევე გაიხსნა ვეტერინარული კლინიკა, რომლის საერთო ფართობი 70 კვ.მ-ია. კლინიკაში განთავსებულია აფთიაქი, ლაბორატორია, საოპერაციო და შეხვედრების ოთახი. ვეტერინარიის ხელშეწყობის პროგრამის ბიუჯეტი 800 ათასამდე ლარს შეადგენს.

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე, აჭარის ავტონომიური რესპუბლიკის მთავრობის თავმჯდომარე თორნიკე რიჟვაძე, ხულოს, შუახევის, ქედისა და ხელვაჩაურის მაჟორიტარი დეპუტატობის კანდიდატი ანზორ ბოლქვაძე და  შუახევში, ქედასა და ხელვაჩაურში უმაღლესი საბჭოს მაჟორიტარი დეპუტატობის კანდიდატი ფრიდონ ფუტკარაძე, შუახევში, საჯარო სკოლის მშენებლობის პროცესს გაეცნენ. დაბა შუახევის სკოლის მშენებლობა აჭარის განათლების, კულტურისა და სპორტის სამინისტროს პროგრამების საჯარო სკოლების ინფრასტრუქტურის გაუმჯობესების ფარგლებში მიმდინარეობს.  შენდება 240 მოსწავლეზე გათვლილი, თანამედროვე სტანდარტების შესაბამისი სკოლა. მოეწყობა ლაბორატორია, ბიბლიოთეკა, სპორტული და სააქტო დარბაზები, სასადილო, ღია და სპორტული მოედანი. სკოლა ადაპტირებულია შეზღუდული შესაძლებლობების მქონე პირებისთვის. პროექტის ღირებულება 2 მლნ ლარს აჭარბებს.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ, აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ, ხულოს, შუახევის, ქედისა და ხელვაჩაურის მაჟორიტარი დეპუტატობის კანდიდატმა ანზორ ბოლქვაძემ და  შუახევის, ქედის და ხელვაჩაურის უმაღლესი საბჭოს მაჟორიტარი დეპუტატობის კანდიდატმა ფრიდონ ფუტკარაძემ, ქედაში ხილის გადამამუშავებელი საწარმო და ღვინის ქარხანა დაათვალიერეს.   კომპანია KTW-მა ააშენა და გახსნა 2 ახალი ქარხანა - ღვინის ქარხანა აჭარული ღვინის სახლით და ხილ-ბოსტნეულის გადამამუშავებელი საწარმო „ნენა”. ღვინის ქარხანაში, სადაც სახელმწიფო პროგრამა „აწარმოე საქართველოშის“ ფარგლებში 1 700 000 ლარის ინვესტიცია განხორციელდა, 22 ადამიანია დასაქმებული. ხილ-ბოსტნეულის გადამამუშავებელ საწარმო „ნენაში“ კი, ასევე „აწარმოე საქართველოში“ პროგრამის ფარგლებში 1 400 000 ლარის ინვესტიცია განხორციელდა და 20 ადამიანი დასაქმდა. ხილის გადამამუშავებელი საწარმო „ნენა“ პროდუქციის რეალიზებას ადგილობრივ ბაზართან ერთად, ევროპის ქვეყნებშიც ახორციელებს. კომპანიამ ასევე ისარგებლა გარემოს დაცვისა და სოფლის მეურნეობის სამინისტროს შეღავათიანი აგროკრედიტის პროგრამით. საწარმოსთვის დამტკიცებული გრანტის მოცულობამ 600 000 ლარი, ხოლო შეღავათიანმა აგროკრედიტმა - 877 000 ლარი შეადგინა.

გამარჯობა ქედელებო! დიდი პატივია, დღეს ვიყო აქ. ქედა ხომ შუა საუკუნეებიდან დაწყებული, ვაჭრობის და ქვეყნის განვითარების ერთ-ერთი ცენტრი იყო. დღეს კი ქედა იქცა ბუნების, ეკოლოგიის,  სოფლის მეურნეობის, მეღვინეობის უნიკალური ჯიშების და ტურიზმის განვითარების ცენტრად. თქვენ აქ ცხოვრობთ და ყოველდღიურად ჩამოსულ სტუმრებს აცნობთ ჩვენი ქვეყნის ისტორიას, წარსულს და მომავლის იმედს უქმნით აქ მცხოვრებ თითოეულ ადამიანს.  ბევრი კარგი საქმე, რომელიც ერთად დავიწყეთ, ბოლომდე უნდა მივიყვანოთ და ქედაში ბევრი წამოწყებაა დასასრულებელი. ბევრი ისეთი რამ არის გასაკეთებელი, რაც ჯერ კიდევ აღელვებს აქაურ ხალხს, ჩვენს თითოეულ მოქალაქეს. ყველას კარგად გვესმის, რომ წყალმომარაგება, წყალარინება არის უაღრესად დიდი პრობლემა და ამას ყველამ ერთად უნდა მივხედოთ. უახლოესი ორი-სამი წლის განმავლობაში ეს პრობლემა მოგვარდება. გაზიფიცირება მაღალმთიან აჭარაში პრობლემაა და მომავალი წლიდან დაქსელვასაც დავიწყებთ და თითოეულ ოჯახს ეს პრობლემა უნდა მოვუგვაროთ. მუნიციპალური ცენტრიდან სოფლებამდე გზები ასე თუ ისე ნორმალურ მდგომარეობაშია, ქედაში, სოფლების შიდა გზებისთვის თანხები უკვე გამოყოფილია და რეაბილიტაცია დაიწყება. ბევრი რამ გაკეთდება - ქედის საჯარო სკოლის, მუზეუმის, კულტურის სახლის რემონტი.  ეს ყველაფერი კეთდება იმისთვის, რომ სადაც არ უნდა ვცხოვრობდეთ - თბილისში, ბათუმში, თუ ქედაში, ჩვენს მოქალაქეებს და მოსახლეობას შორის სხვაობა არ უნდა იყოს. ცხოვრების მინიმალური დონე უნდა დაკმაყოფილდეს ყველგან, სადაც საქართველოს მოქალაქე ცხოვრობს. ეს არის ჩვენი ძირითადი მიზანი. ყველაზე დიდი პრობლემა, რომელიც წლების განმავლობაში ქედაში და, ზოგადად, აჭარაში დაგროვდა, არის მიწის რეგისტრაცია. მოგეხსენებათ, ჩვენ გამოვაცხადეთ პროგრამა - მიწის სისტემური რეგისტრაცია, რომელიც დაიწყება და სამ წელიწადში ეს პრობლემა ქვეყანაში და მათ შორის აჭარაშიც აღარ იქნება. პროგრამა განხორციელდება ისეთ დონეზე, რომ მიწის სისტემური რეგისტრაციის ფარგლებში აზომვითი სამუშაოებისთვის გლეხს და საქართველოს მოქალაქეს ფული გადასახდელი არ ექნება.  ბევრი რამ უნდა დავასრულოთ, რაც დავიწყეთ. ეს ყველაფერი უნდა გავაკეთოთ ერთად. ქვეყანას აქვს სისტემური ინფრასტრუქტურის პრობლემები, როგორებიცაა გზა, წყალი, გაზი. ნელ-ნელა, ყოველდღიურად უკეთესობა ეტყობა ბათუმს, ქედას და მთლიან საქართველოს, თუმცა კიდევ ბევრი სამუშაო გვაქვს. ჩვენი ძირითადი ამოცანა არის ჩვენი ახალგაზრდები, ბავშვები, მათი განათლება, ჩვენი მოხუცების ჯანმრთელობა, მათი სოციალური დახმარება და მათი პენსია. ეს ის ძირითადი ვალდებულებებია, რომელიც სახელმწიფომ უნდა შეასრულოს.  რა თქმა უნდა, ჩვენი გლეხი, რომელსაც უნდა მივეხმაროთ, რომ რაც შეიძლება სწრაფად, გლეხი გახდეს ფერმერი, მას გაეზარდოს შემოსავალი. ქედაში, ყურძნიდან დაწყებული, ციტრუსებით დამთავრებული და არავის არ ეგონოს, მიუხედავად იმისა, რომ ზოგიერთები აქ რაღაცეებს მოგვიწოდებენ, მთავრობა და სახელმწიფო, გლეხს მარტო არ დატოვებს არასდროს, სანამ გლეხი არ გახდება ფერმერი, არ იქნება ძლიერი, არ დაასაქმებს სხვა ადამიანებს და ქვეყნის კეთილდღეობისთვის არ იქნება ფუნდამენტი და მასზე არ დადგება ქვეყნის ეკონომიკური განვითარება. ამიტომ, როგორც ყოველთვის, ციტრუსის ნაწილში, როგორც არასტანდარტულის, ასევე სტანდარტულის, ექსპორტზე გატანის ნაწილში, სახელმწიფო როგორც ედგა აჭარელ გლეხს, ისე დაუდგება გვერდით მომავალშიც.  ყველას კარგად უნდა გვესმოდეს, რომ არ უნდა ჰქონდეს მნიშვნელობა, სად ვართ, რას ვაკეთებთ, რა პროფესიაში ვართ, რომელ სოციალურ განზომილებაში ვართ, ჩვენ ყველამ ერთად უნდა ვიზრუნოთ ჩვენს ქვეყანაზე, ჩვენს სოფელზე, ჩვენს დაბაზე, ჩვენს ქალაქზე და საბოლოო ჯამში -  ქვეყანაზე. მინდა, გისურვოთ გამარჯვება და რაც მთავარი და ყველაზე მნიშვნელოვანია, დარწმუნებულები ვართ, რომ გავიმარჯვებთ, მაგრამ უნდა გავიმარჯვოთ სამართლიან ბრძოლაში. გამარჯვებას გისურვებთ!

მოგესალმებით ქალბატონებო და ბატონებო, ძვირფასო ქედელებო! მივესალმები საქართველოს პრემიერ-მინისტრს, მივესალმები აჭარის მთავრობის თავმჯდომარეს, მივესალმები უმაღლესი  საბჭოს თავმჯდომარეს, დამსწრე საზოგადოებას.  ძვირფასო სტუმრებო, პირველ რიგში, მინდა მადლობა მოგახსენოთ დღეს აქ მობრძანებისთვის.  ჩემთვის დიდი პატივია მოგმართოთ თქვენ, თავისუფალ, დაუღალავ, ენერგიულ და შეუპოვარ ადამიანებს, რომლებიც ყოველდღიურად ეზიარებით ფლორისა და ფაუნის ამ საოცრებას, ინარჩუნებთ და უფრთხილდებით წინაპართა დანატოვარს, ტრადიციებს, ამავდროულად კი, ყოველდღიურად იღწვით თქვენი ოჯახების, კუთხისა და ჩვენი ქვეყნის უკეთესი მომავლისათვის. ალბათ ყველანი დამეთანხმებით, რომ „ქართული ოცნების“ ხელისუფლებაში მოსვლის დღიდან, წინა ხელისუფლებისგან განსხვავებით, ქედის მუნიციპალიტეტში, ისევე, როგორც, მთლიანად მაღალმთიან აჭარაში მცხოვრები ადამიანების მიმართ დამოკიდებულება ფუნდამენტურად  შეიცვალა, რა  თქმა უნდა ,  უკეთესობისკენ. დღეს ისე როგორც არასდროს, ხელისუფლებისგან განსაკუთრებული ყურადღება გექცევათ და ყველაფერი კეთდება იმისათვის, რომ სახელმწიფო სიკეთეებით თითოეულმა თქვენგანმა მაქსიმალური სარგებელი მიიღოთ! გასული წლების განმავლობაში, მნიშვნელოვნად გაიზარდა ხელისუფლების მიერ, როგორც ქედის მუნიციპალიტეტის დაფინანსება, ისე განხორციელებული პროგრამებისა და პროექტების რაოდენობა. ამ ძალისხმევის, მათ შორის მასშტაბური ინფრასტრუქტურული პროექტების, შედეგად საგრძნობლადაა გაზრდილი ამ მხარის ტურისტული პოტენციალი და ამ სექტორიდან მოსახლეობის მიერ მიღებული შემოსავალი. ხელისუფლების გათვლებითა და ხელშეწყობით, ტურიზმის სფეროდან მიღებული შემოსავალი კიდევ უფრო უნდა გაიზარდოს, რადგან მხარე განსაკუთრებულად გამორჩეულია ამ  ულამაზესი ბუნებით, უნიკალური გასტრონომიული კულტურითა და ავთენტურობით, რაც ტურიზმის განვითარებისთვის ნაყოფიერ ნიადაგს წარმოადგენს. ჩვენ ყველა მიმართულებით გვაქვს მიღწევები, წინ გადადგმული ნაბიჯები, განხორციელებული პროგრამები, ავიღოთ ჯანდაცვა, სოფლის მეურნეობა, განათლება , მაგრამ ყველა ვთანხმდებით იმაზე, რომ არსებობს პრობლემები და გამოწვევები. რა თქმა უნდა, ერთიანი ძალისხმევით შესაძლებელია ყველა  პრობლემისა და გამოწვევის გადალახვა, როგორც  2012 წელს, როდესაც დაიწყო პარტია „ქართული ოცნება-დემოკრატიულმა საქართველომ“ მოღვაწეობა, ყველა გავერთიანდით მისი დამფუძნებლის ბიძინა ივანიშვილის ირგვლივ და ძალიან ბევრ გამარჯვებას მივაღწიეთ.  დარწმუნებული ვარ არჩევნებში, რომელიც ახლოვდება 31 ოქტომბერს, ჩვენ შევძლებთ გავიმარჯვოთ ერთად. ერთად საქართველოს წარმატებისთვის !

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ქედას მოსახლეობას მაჟორიტარი დეპუტატობის კანდიდატი, ანზორ ბოლქვაძე და აჭარის ავტონომიური რესპუბლიკის უმაღლესი საბჭოს მაჟორიტარი დეპუტატობის კანდიდატი, ფრიდონ ფუტკარაძე წარუდგინეს.

მოგესალმებით, მივესალმები საქართველოს პრემიერ მინისტრს, ბატონ გიორგი გახარიას, მივესალმები „ქართული ოცნება-დემოკრატიული საქართველოს“ გენერალურ მდივანს, ბატონ კახი კალაძეს, მივესალმები აჭარის ავტონომიური რესპუბლიკის მთავრობის თავმჯდომარეს, ბატონ თორნიკე რიჟვაძეს, მივესალმები საქართველოს პარლამენტის და უმაღლესი საბჭოს დეპუტაციას, მივესალმები ბათუმელ საზოგადოებას, მივესალმები ბათუმელებს. ჩემო ძვირფასებო, ჩემო საყვარელო ხალხო ჩემთვის უდიდესი პატივია ამ სცენიდან მოგმართოთ თქვენ, ამასთანავე არის უდიდესი პასუხისმგებლობა, თქვენი ხმა მივიტანო ადგილობრივ საკანონმდებლო ორგანოში.  მიუხედავად თავისი მრავალფეროვნებისა, ბათუმი ეს არის ერთ მუშტად შეკრული ძლიერი ოჯახი. ძლიერი და სამართლიანი ოჯახი გასცემს 2020 წლის საპარლამენტო და უმაღლესი საბჭოს არჩევნებზე პასუხს ყველას ვისაც აინტერესებს, თუ ვინ უნდა იაროს სწორი გზით. „ქართული ოცნება - დემოკრატიული საქართველო” 2012 წლიდან მისი საქმიანობა არის სწორი, აღმშენებლობითი, ადამიანის ღირებულებებზე დამკვიდრებული. ჩემი საქმიანობაც, ჩემი ლაიტმოტივიც იქნება მთლიანად ადამიანის ღირებულებებზე, აღმშენებლობაზე და იმ ფასეულობებზე დაყრდნობილი, რომელიც უშუალოდ ადამიანთან ურთიერთობაში მოდის.  მინდა „ქართული ოცნება - დემოკრატიული საქართველოს” დამფუძნებელს, უდიდეს ქველმოქმედს, ბატონ ბიძინა ივანიშვილს თავის გუნდთან ერთად უღრმესი მადლობა გადავუხადო იმისთვის, რომ ნდობა გამომიცხადა და დღეს თქვენს წინაშე წარვსდექი, როგორც უმაღლესი საბჭოს მაჟორიტარი დეპუტატობის კანდიდატი. მინდა, ჩემი სიტყვა დავასრულო ბათუმელებისთვის უსაყვარლესი პოეტის, ვახტანგ ღლონტის სიტყვებით - მე აქ მიყვარდა პირველად და უკანასკნელ ხანს ბათუმი სიყვარულია და არაფერი სხვა. ამ სიყვარულით ამ აღმშენებლობით, ურთიერთთანადგომით ჩვენ გავიმარჯვებთ და უდიდესი უპირატესობით დავდებთ 2020 წლის 31 ოქტომბერს სწორ და აუცილებელ შედეგს.

მოგესალმებით, ჩემო ბათუმელებო! პატივცემულო პრემიერ-მინისტრო, გენერალურო მდივანო, აჭარის მთავრობის თავმჯდომარევ, ძვირფასო ბათუმელებო! უპირველეს ყოვლისა, უდიდესი მადლობა მინდა გადავუხადო თითოეულ თქვენგანს აქ მობრძანებისა და დაფასებისთვის. ასევე, გულწრფელი მადლიერება მინდა გამოვხატო ყველა იმ ადამიანის მიმართ, ვინც ნდობა გამომიცხადა და მომცა შესაძლებლობა დღეს თქვენს წინაშე წარვმდგარიყავი.  დღეს მე აქ მომიყვანა ჩემი ქვეყნის, ჩემი კუთხისა და  ქალაქის სიყვარულმა. დარწმუნებული ვარ, რომ ყველა ბათუმელს, მიუხედავად პოლიტიკური თუ რელიგიური მრწამსისა, უყვარს თავისი ქალაქი და უნდა, რომ ამ ქალაქში ცხოვრება იყოს უკეთესი, ჩვენი წინაპრების მიერ დატოვებული თანაცხოვრებისა და ღირსების წესების შესაბამისად.  მიუხედავად დადებითი  ტენდენციებისა, ჩვენი ქალაქი ჯერ კიდევ მრავალი გამოწვევის წინაშე დგას, მაგრამ თქვენთან ერთად, თქვენი თანადგომით, დავძლევთ ყველა იმ პრობლემას, რომელიც ჩვენი თანაქალაქელების წინაშეა და შევძლებთ მის გადალახვას, თითოეული თქვენგანის ხმას მივაწვდენ უმაღლეს საკანონმდებლო ორგანოს. გამარჯვება გარდაუვალია, როდესაც ემსახურები სიმართლეს, აკეთებ საჭირო საქმეს და გესმის შენი ხალხის ხმა. მზად ვარ, ვემსახურო  ბათუმს, თითოეული ბათუმელი ახალგაზრდის, პენსიონერის, ვეტერანის, სოციალური მუშაკის, პედაგოგის, მეწარმის უკეთესი ხვალინდელი დღის შექმნისათვის.  მადლობა ყველას, ვინც ნდობას მიცხადებს ამ მეტად რთულ და საპასუხისმგებლო გზაზე. ჩვენ ერთად შევქმნით ბათუმის  წარმატებულ მომავალს! ერთად საქართველოს წარმატებისთვის, ერთად ბათუმის წარმატებისთვის.