პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა წალკის მოსახლეობას მაჟორიტარი დეპუტატობის კანდიდატი, გოგი მეშველიანი წარუდგინეს.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ, პარლამენტის თავმჯდომარე არჩილ თალაკვაძემ, ბოლნისის, დმანისის, თეთრიწყაროს და წალკის მაჟორიტარი დეპუტატობის კანდიდატმა გოგი მეშველიანმა და წალკის მერმა ილია საბაძემ სოფელ იმერაში ახლად აშენებული სკოლა დაათვალიერეს. სოფელ იმერას ახალი სკოლის მშენებლობა 2019 წელს დაიწყო და სექტემბერში დასრულდება. სკოლა 60 მოსწავლეზეა გათვლილი. პროექტში გათვალისწინებულია შიდა და გარე სივრცეების, ასევე რეკრეაციული ზონების მოწყობა. სკოლა თანამედროვე სტანდარტების შესაბამისად შენდება და სრულად იქნება ადაპტირებული შეზღუდული შესაძლებლობების მქონე პირთათვის. მშენებლობას საქართველოს მთავრობა 1,2 მლნ ლარით აფინანსებს.

საქართველოს პრემიერ-მინისტრმა, გიორგი გახარიამ, „ქართული ოცნების“ გენერალურმა მდივანმა, კახა კალაძემ, პარლამენტის თავმჯდომარემ, არჩილ თალაკვაძემ, რუსთავის მერმა, ირაკლი ტაბაღუამ და რუსთავის მაჟორიტარი დეპუტატობის კანდიდატმა, ნინო ლაცაბიძემ რუსთავში, მერაბ კოსტავას განახლებული გამზირი დაათვალიერეს. რუსთავში, ქალაქის ისტორიულ ნაწილში, კოსტავას გამზირის რეაბილიტაცია გასული წლის ნოემბერში დაიწყო. ქუჩაზე არქიტექტურული სტილის შენარჩუნებით არის აღდგენილი ფასადები, გამოცვლილია ყველა მიწისქვეშა კომუნიკაცია და წყალარინების სისტემა. სრულად შეცვლილია ასფალტის საფარი, მოპირკეთებულია ტროტუარები. მოწყობილია გარე განათების ენერგოეფექტური ქსელი, შუა გამყოფ  ზოლზე - რეკრეაციული სივრცე, ასევე, ველობილიკები. დახაზულია საპარკინგე ზონები და გადასასვლელები.

მოგესალმებით! მოგესალმებით ჩემო ძვირფასო რუსთაველებო, ძვირფასო სტუმრებო! ჩემთვის ნამდვილად ძალიან დიდი პატივია დღეს ვიდგე აქ, ჩემს ქალაქში, სადაც დავიბადე და გავიზარდე - სადაც ჩემი ოჯახი, ახლობლების და მეგობრების უდიდესი ნაწილი ცხოვრობს. ქალაქი, სადაც ჩემი ცხოვრების საუკეთესო პერიოდი გავატარე და ალბათ ამიტომაც არის, რომ პატივთან ერთად ეს არის ჩემთვის ძალიან დიდი პასუხისმგებლობის გრძნობა, როგორც გუნდის, ასევე თითოეული თქვენგანის წინაშე . როგორც რიგითი რუსთაველი, რა თქმა უნდა, კარგად ვიცნობ იმ პრობლემებს, რაც დღეს არის რუსთავში, იმ გამოწვევებს და მე დარწმუნებული ვარ, სწორედ თქვენთან ერთად, ჩემს გუნდთან ერთად ყველაფერს გავაკეთებთ, რომ რუსთავის განვითარება გახდეს კიდევ უფრო შეუქცევადი პროცესი. რუსთავი წლების განმავლობაში და იმთავითვე, როდესაც ის დაარსდა, ქვეყნის ისტორიაში ძალიან მნიშვნელოვან როლს ასრულებდა. რუსთავში იქმნებოდა და დღესაც იქმნება არაერთი უნიკალური პროდუქტი, რომელიც როგორც ქვეყნის შიდა ბაზარზე, ასევე ქვეყნის ექსპორტისთვის არის ერთ-ერთი მნიშვნელოვანი მიმართულება. მე ვფიქრობ, რომ რუსთავის სწორედ ამ პოტენციალის კიდევ უფრო კარგად გამოყენებით ჩვენ შევძლებთ რომ ის ეკონომიკური წარმატება, რომელიც ჩვენმა გუნდმა დაიწყო, უკვე თითოეულმა რუსთაველმა იგრძნოს მის ოჯახში. ჩვენ ვთანხმდებით, რომ რუსთავს ქვეყნის ეკონომიკის განვითარებაში უდიდესი წვლილი შეაქვს. ჩვენ ვთანხმდებით, რომ ჩვენი რუსთაველები, ჩვენი თანამოქალაქეები დასაქმებული არიან რუსთავის საწარმოებში, თუმცა ამავდროულად, ძალიან მნიშვნელოვანია რომ ეკოლოგია იყოს პირველ ადგილზე ჩვენს ქალაქში და ეკონომიკის განვითარება, რა თქმა უნდა, არ უნდა ხდებოდეს ეკოლოგიის ხარჯზე. ეკოლოგია იქნება ჩვენი ერთ-ერთი მთავარი მიმართულება, რაზეც ჩვენ აუცილებლად ღირსეული პასუხი უნდა გავცეთ და ყველაფერი უნდა გავაკეთოთ, რომ ქალაქს ჰქონდეს ეკონომიკური ზრდა და ამავდროულად, ეკოლოგია იყოს მნიშვნელოვანი ჩვენი ქალაქისთვის და რაც მთავარია, ჩვენი ბავშვებისთვის. რუსთავი არ არის მხოლოდ საწარმოების ქალაქი, როგორც ეს ხშირად წარმოუდგენიათ ხოლმე. ალბათ მათ, ვინც ჩვენს ქალაქს კარგად არ იცნობს. არა, რუსთავში ცხოვრობს ძალიან ბევრი ნიჭიერი, მოტივირებული და წარმატებული ახალგაზრდა და ასევე ჩემი ერთ-ერთი მთავარი მიმართულება იქნება - სწორედ ამ ადამიანებს შევუქმნათ აქ, ადგილზე, ქალაქში იმის საშუალება, რომ მათ თავიანთი ნიჭისა და რესურსის რეალიზება სწორედ ჩვენს ქალაქში მოახერხონ. მე, რა თქმა უნდა, არ ვარ მხოლოდ რუსთავის მაჟორიტარობის კანდიდატი. რუსთავის საარჩევნო ოლქში შემოდის გარდაბნის 10 თემი და მე მინდა მივმართო მათ, რომ ისევე, როგორც რუსთაველებზე, მე ვიზრუნებ თითოეულ თქვენგანზე და ვიქნები თქვენ გვერდით. იმის მიუხედავად, რომ ჩვენს სოფლებში არაერთი მნიშვნელოვანი პროექტი განხორციელდა ბოლო წლების განმავლობაში, ეს ადამიანები კიდევ უფრო მეტ ყურადღებას საჭიროებენ. ასევე მინდა გითხრათ, რომ დღეს ჩვენს შეხვედრას ესწრება ჩემი 90 წლის ბაბუა, რომელიც 1954 წელს ჩამოვიდა რუსთავში. ჩვენ ხშირად ვსაუბრობთ ხოლმე და ხშირად მიყვება როგორ შენდებოდა რუსთავი და როგორ აშენებდნენ და ქმნიდნენ რუსთავს მშრომელი ადამიანები, როგორ მეგობრობდნენ, უყვარდათ ეს ქალაქი და როგორ უფრთხილდებოდნენ მას. ალბათ სწორედ ასეთი ადამიანების ძალისხმევით მოვიდა დღეს რუსთავი აქამდე და ჩვენ უკვე ახალი ენერგიით, თანამედროვე მიდგომებით და ჩვენი ზრუნვით კიდევ უფრო უკეთესი უნდა გავხადოთ ჩვენი შვილებისთვის. მე გპირდებით, რომ ვიქნები თქვენი ღირსეული ხმა საქართველოს პარლამენტში. ხმა, რომელიც იქნება ყოველთვის გულწრფელი და რაც მთავარია, შედეგის მომტანი. ამიტომ ძალიან გთხოვთ ყველას - დავდგეთ ერთად ჩვენი ქვეყნის და ჩვენი რუსთავის წარმატებისთვის! ძალიან დიდი მადლობა!

რუსთავი არის ჩვენი ეკონომიკის სიძლიერისა და გაძლიერების ერთ-ერთი ფუნდამენტი. ეს არ მოიცავს მხოლოდ ეკონომიკას. რუსთავი ქვეყნის სიძლიერის ერთ-ერთი საფუძველია. დღეს, როდესაც ჩვენ რუსთაველ საზოგადოებას ვესაუბრებით, რა თქმა უნდა, უნდა გვახსოვდეს წარსულიც, უნდა ვისაუბროთ პრობლემებზეც და მომავალზეც. ყველას კარგად გვესმის, რომ რუსთავი არის უმსხვილესი საწარმოების ადგილი. დღეს ქვეყანაში ყველაზე მეტი სამუშაო ადგილი იქმნება აქ. ქვეყნის ინდუსტრიალიზაციის საფუძველი არის რუსთავი და რა თქმა უნდა, ჩვენ ეს ყველაფერი უნდა გავაგრძელოთ და გავაძლიეროთ, იმიტომ, რომ ჩვენ დღეს ჯერ კიდევ ღარიბ ქვეყანაში ვცხოვრობთ და თითოეულ სამუშაო ადგილს ქვეყნისთვის უაღრესად დიდი მნიშვნელობა აქვს. მაგრამ, ამასთან ერთად, არ უნდა დაგვავიწყდეს და უნდა ვიცოდეთ, რომ ჩვენ ქვეყანამ განვითარების ისეთ დონეს მივაღწიეთ, რომ სამუშაო ადგილი ნებისმიერ ფასად უკვე აღარ უნდა გვაკმაყოფილებდეს. ყველამ კარგად ვიცით, რა დონის ეკოლოგიური პრობლემებია რუსთავში. როდესაც ვსაუბრობთ საწარმოების, ბიზნესის, ინდუსტრიების მხარდაჭერაზე, სამუშაო ადგილების შექმნაზე, ამავდროულად უკვე უნდა ვიზრუნოთ ქვეყნის ეკოლოგიაზე. ამიტომ, რუსთაველების აბსოლუტურად სამართლიანი გაბრაზება იმასთან დაკავშირებით, რომ ქალაქის ეკოლოგია არის მისახედი, ჩვენი მხრიდან აბსოლუტურად სერიოზულად იყო აღქმული. უახლოეს პერიოდში, რუსთავს ექნება ჰაერის სისუფთავის მართვის გეგმა. ასეთი გეგმა დღეს მხოლოდ და მხოლოდ თბილისს აქვს. სწორედ ამიტომ იყო მთავრობის მიერ ინიცირებული და დღეს უკვე პარლამენტშია კანონპროექტი, რომელიც, დარწმუნებული ვარ, საშემოდგომო სესიაზე სწრაფად დამტკიცდება, რაც ჩვენ გვაძლევს საკანონმდებლო საფუძველს, რომ იმ კომპანიებს, რომლებიც არაკეთილსინდისიერად იქცევიან, კანონიერად მოვთხოვოთ ეკოლოგიური ნორმების დაცვა. რაც აქამდე ხდებოდა, მარტივია. უბრალოდ, კომპანიებისთვის უფრო მომგებიანი იყო ამ მცირე ჯარიმების გადახდა და არავინ არ ფიქრობდა სისტემურად, ეკოლოგიურად, გარემოზე ზიანის შემსუბუქებაზე. ის საკანონმდებლო ცვლილებები, რომლებიც ახლა განხორციელდება, იქნება უმკაცრესი, დაწესდება სერიოზული ჯარიმები, რისი ძირითადი პრინციპიც იქნება აბსოლუტურად ევროპული მიდგომა - ბუნებისთვის, ჰაერისთვის, ეკოლოგიისთვის მიყენებული ზიანი გამოიწვევს პირდაპირ დამზიანებლის მაქსიმალურად ეფექტურად და სწრაფად დასჯას. ეს ის პირობები და ფუნდამენტია, სადაც გპირდებით, რომ კომპრომისს არ დავუშვებთ. ჩვენი გუნდის ძირითადი მიზანი იყო და იქნება ადამიანზე ზრუნვა. კიდევ ერთხელ ვამბობ, არ გვჭირდება სამუშაო ადგილები ნებისმიერ ფასად, ადამიანის, ჩვენი მოქალაქეების და ეკოლოგიის ფასად. ამიტომ, ეს უნდა იყოს საერთო კონსენსუსი ყველასთვის და კომპანიებმა, რომლებიც, რა თქმა უნდა, დოვლათს, სამუშაო ადგილებს ქმნიან, გარემოზე ზემოქმედების უმაღლესი სტანდარტების დანერგვა და გათვალისწინება უნდა დაიწყონ. ეს კანონმდებლობა ძალაში შევა 2021 წლის 1 იანვრიდან და აქ არანაირი კომპრომისი ჩვენი მხრიდან არ იქნება. ადრე უნდა გაკეთებულიყო? დიახ, უნდა გაკეთებულიყო ადრე, მაგრამ მერწმუნეთ, დღესაც, როდესაც კრიზისულ სიტუაციაში ვიმყოფებით, როგორც ეპიდემიოლოგიურად, ასევე ეკონომიკურად, ჩვენი ძირითადი ამოცანაა, ის მწირი სახელმწიფომ რესურსები, რომელიც გაგვაჩნია, სამართლიანად გადავანაწილოთ, რასაც ვცდილობდით და ვცდილობთ, გავაკეთოთ პანდემიის პირობებში. ეს იყო ძირითადი პრინციპი, როდესაც ჩვენ ვგეგმავდით და ჩვენს მოქალაქეებს შევთავაზეთ სოციალური მხარდაჭერის კონკრეტული ნაბიჯები, კონკრეტულ ქმედებებში გამოხატული. ეს იყო ის, როგორც ვეხმარებით ბიზნესებს სექტორულად, ტურიზმი იქნებოდა, სოფლის მეურნეობის სფერო თუ ინდუსტრიული კომპანიები. სამართლიანობა იქნება ძირითადი პრინციპი, რომელიც უნდა გაგრძელდეს, თუმცა არსებობს სტრუქტურული, ქვეყნისთვის კრიტიკულად მნიშვნელოვანი სისტემური მიმართულებები, სადაც ჩვენ შემდგომი წლების განმავლობაში რეფორმები დაგვჭირდება. რა თქმა უნდა, ეს არის ჩვენი ბავშვები და მათ განათლებაზე ზრუნვა. ხელისუფლების და მთავრობის პასუხი ამ გამოწვევაზე იყო განათლების რეფორმა, რომელიც მიუხედავად ყველა კრიზისისა, არც ერთი დღით არ უნდა გაჩერდეს. ჩვენ უნდა ვიზრუნოთ ჩვენს მომავალზე, რადგან ჩვენს შვილებს, რომლებმაც ამ ქვეყანაში უნდა მიიღონ ხარისხიანი განათლება, ქვეყნის დატოვებისას უნდა შეეძლოთ სხვა ქვეყნის შვილებთან კონკურენცია და ეს ჩვენი პასუხისმგებლობაა ჩვენი შვილების წინაშე. ჩვენი ღვაწლმოსილი პენსიონერები, რომელთა ჯანმრთელობაზე და ელემენტარული სოციალური დონის შენარჩუნებაზე სახელმწიფომ და ხელისუფლებამ უნდა იზრუნოს. რა თქმა უნდა, სახელმწიფო ვალდებულია, შეუქმნას თანაბარი პირობები ყველას იმისთვის, რომ ვიშრომოთ, ვიყოთ ეფექტურები, გვქონდეს თვითრეალიზების შესაძლებლობა და ღირსეულად ვარჩინოთ ჩვენი ოჯახები. ეს არის ის ძირითადი ფუნდამენტური პრინციპები, რაზეც აქამდეც ვზრუნავდით და რაც უნდა გავაგრძელოთ. ეს არის ის, რის ირგვლივაც ჩვენ კიდევ წლების განმავლობაში მოგვიწევს ტრიალი, მაგრამ, რა თქმა უნდა, არის ისეთი მიმართულებები, რომელიც ასევე კრიტიკულად მნიშვნელოვანია. ეს არის სოფლის მეურნეობა, საინვესტიციო გარემო, ქვეყნის ინფრასტრუქტურა, რომელსაც წლები დასჭირდება, რომ ნორმალურ ევროპულ მდგომარეობამდე მივიყვანოთ. გზები, წყალმომარაგება, რომელიც დღეს მთელი ქვეყნის მასშტაბით უაღრესად დიდი პრობლემაა, რუსთავშიც მათ შორის. აქ ინფრასტრუქტურული პროექტების რაოდენობა და მათი ფინანსური მოცულობა რა თქმა უნდა, გაიზრდება. რუსთავში უახლოეს პერიოდში დასრულდება 25-ე და 26-ე სკოლების სრული რეაბილიტაცია, საბავშვო ბაღების რეაბილიტაცია. უამრავია საშრომი ჯერ კიდევ, მაგრამ ძირითადი პრინციპია, რომ დაწყებულია ბევრი უაღრესად კარგი საქმე და ეს საქმეები ერთად უნდა დავასრულოთ. დარწმუნებული ვარ, ნინო ლაცაბიძე იქნება რუსთავის საუკეთესო წარმომადგენელი ქვეყნის უმაღლესი საკანონმდებლო ორგანოში, მარტივი მიზეზის გამო. ჯერ კიდევ საკრებულოში შრომობს და მუშაობს, მაგრამ უკვე რუსთავის ინფრასტრუქტურულ პროექტებში - სკვერების, ბაღების რეაბილიტაციის პროცესში, უკვე ჩართულია. იგი იქნება უაღრესად ეფექტური და დარწმუნებული ვარ, ჩვენ ყველა ერთად, რაც მთავარია სამართლიან ბრძოლაში გავიმარჯვებთ. გამარჯვებას გისურვებთ!

ქალბატონებო და ბატონებო, მოგესალმებით! მივესალმები საქართველოს პრემიერ-მინისტრს, ბატონ გიორგი გახარიას, პარლმენტის თავმჯდომარეს, ბატონ არჩილ თალაკვაძეს, მთავრობისა და პარლამენტის წევრებს, დამსწრე საზოგადოებას, სრულიად საქართველოს! ძალიან მიხარია, რომ დღეს ვიმყოფები ამ ძალიან ლამაზ ქალაქში, ქალაქში, რომელიც ქვეყნის განვითარებისთვის სასიცოცხლოდ მნიშვნელოვან ფუნქციას ასრულებს, ქალაქში, სადაც ძალიან შრომისმოყვარე, პატრიოტი, საკუთარ ქალაქსა და ქვეყანაზე შეყვარებული ადამიანები ცხოვრობენ. რუსთავი საქართველოს ეკონომიკის ერთ-ერთი მთავარი ცენტრია, სადაც მშრომელი ადამიანები მთელი ქვეყნისთვის ქმნიან დოვლათს და ჩვენი ქვეყნის განვითარებაში მნიშვნელოვანი წვლილი შეაქვთ. აუცილებელია, რომ ამ გამორჩეულმა ქალაქმა, ბოლომდე აითვისოს თავისი პოტენციალი და ამავდროულად სხვა მიმართულებებითაც კიდევ უფრო განვითარდეს. რუსთავი უნდა იყოს დასაქმებისა და წარმოების ცენტრი მთელს საქართველოში. ჩვენ ამისთვის ერთად ბევრი უნდა ვიმუშაოთ და ყველა შესაძლო შანსი უნდა გამოვიყენოთ. ამავდროულად, უნდა გვახსოვდეს, რომ ეს ქალაქი ყოველთვის მნიშვნელოვან როლს ასრულებდა ქართული კულტურის განვითარებაში და წინსვლაში. ამის დასტურად თუნდაც მხოლოდ ანსამბლ „რუსთავის” და რუსთავის დრამატული თეატრის გახსენებაც კმარა. ამ შემოქმედებითმა ჯგუფებმა მნიშვნელოვანი წვლილი შეიტანეს გასული საუკუნის ქართული კულტურის განვითარებაში. დღესაც ჩვენი ვალია, მაქსიმალურად შევუწყოთ ხელი რუსთაველ ახალგაზრდებს თვითრეალიზაციაში, შევუწყოთ ხელი კულტურული ინდუსტრიების განვითარებას, შევქმნათ რეკრეაციული, დასასვენებელი სივრცეები და ცხოვრების ღირსეული პირობები. ეს ყველაფერი ადვილი ნამდვილად არ არის, მაგრამ მთავარია ჩვენი ერთად დგომა და სურვილი, რომ ჩვენი ქვეყანა, ჩვენი კუთხე, ჩვენი ქალაქი იყოს წარმატებული. მე დარწმუნებული ვარ, თითოეული რუსთაველი ანთებულია ამ სურვილით და ზუსტად ვიცი, ამ სურვილით ანთებულია თქვენი მაჟორიტარი დეპუტატობის კანდიდატი. დარწმუნებული ვარ, თქვენი გვერდით დგომით ჩვენ არა მხოლოდ არჩევნებში გამარჯვებას შევძლებთ, არამედ მივაღწევთ ყოველი ჩვენგანის უმთავრეს მიზანს, შევქმნით რუსთავის და ჩვენი ქვეყნის მომავალი წარმატების ისტორიას. ჩვენ ძალიან ბევრი შეგვიძლია ვისაუბროთ, თუ რა გაკეთდა ბოლო წლების განმავლობაში ჩვენს ქვეყანაში, ამ რეგიონში, რუსთავში, თუმცა მგონი ყველა ვთანხმდებით იმაზე, რომ მიუხედავად ბევრი წარმატებისა და განხორციელებული პროექტისა, დღესაც არსებობს პრობლემები, დღესაც ვდგავართ გამოწვევების წინაშე. შესაბამისად, ძალიან მნიშვნელოვანია მომდევნო წლებში ჩვენი ერთად დგომა. მე დარწმუნებული ვარ, როგორც ეს მოხდა 2012 წელს, როდესაც ყველა გავერთიანდით ადამიანის ირგვლივ, რომელმაც შექმნა პარტია, გუნდი, რომელსაც „ქართული ოცნება“ ჰქვია. მხედველობაში მყავს ბიძინა ივანიშვილი. მაშინ ჩვენ ჩვენი ერთსულოვნებით, ერთიანი ძალისხმევით მივაღწიეთ გამარჯვებას. მე მჯერა, რომ ახლაც, 2020 წლის საპარლამენტო არჩევნებზე, რომელიც ოქტომბრის ბოლოს გაიმართება, ჩვენ ერთიანი ძალიხმევით აუცილებლად გავიმარჯვებთ.

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა რუსთავის მოსახლეობას მაჟორიტარი დეპუტატობის კანდიდატი, ნინო ლაცაბიძე წარუდგინეს

საქართველოს პრემიერ-მინისტრმა, გიორგი გახარიამ, „ქართული ოცნების“ გენერალურმა მდივანმა, კახა კალაძემ, პარლამენტის თავმჯდომარემ, არჩილ თალაკვაძემ, რუსთავის მერმა, ირაკლი ტაბაღუამ და რუსთავის მაჟორიტარი დეპუტატობის კანდიდატმა, ნინო ლაცაბიძემ რუსთავში,  გიორგი ლეონიძის ქუჩაზე არსებული სკვერის სარეაბილიტაციო სამუშაოები დაათვალიერეს. 4 ჰექტარზე გაშენებული მრავალფუნქციური სკვერის სარეაბილიტაციო სამუშაოები მარტში დაიწყო და უკვე დასრულების ფაზაშია. სკვერის რეაბილიტაციაზე 1 775 000 ლარია გამოყოფილი. სკვერის ტერიტორიაზე მიმდინარეობს სპორტული მოედნების, სკეიტპარკის, სპორტულ-გამაჯანსაღებელი, შეზღუდული შესაძლებლობების მქონე პირებისთვის ადაპტირებული სივრცის, საბავშვო მოედნის, სველი წერტილის, განათების სისტემისა და ბილიკების მოწყობა.

საქართველოს პრემიერ-მინისტრი, გიორგი გახარია, „ქართული ოცნების“ გენერალური მდივანი, კახა კალაძე, პარლამენტის თავმჯდომარე, არჩილ თალაკვაძე, საქართველოს ფეხბურთის ფედერაციის პრეზიდენტი, ლევან კობიაშვილი და რუსთავის მაჟორიტარი დეპუტატობის კანდიდატი, ნინო ლაცაბიძე, საქართველოს ფეხბურთის ფედერაციის რუსთავის საფეხბურთო აკადემიაში იმყოფებოდნენ. „ქართული ოცნების“ ლიდერები რუსთავის აკადემიაში გამართულ მეორე ლიგის ოფიციალურ მატჩს დაესწრნენ, სადაც ერთმანეთს რუსთავისა და დუშეთის „არაგვის“ გუნდები დაუპირისპირდნენ. აღსანიშნავია, რომ რუსთავში 8 ჰექტარზე განთავსებულ საფეხბურთო აკადემიაში ორი ბუნებრივსაფარიანი და ორი ხელოვნურსაფარიანი მოედანი ფუნქციონირებს. ინდივიდუალური განათების სისტემა სამ მოედანს ემსახურება. ტერიტორიაზე ასევე განთავსებულია სასტუმრო, სასადილო, სასწავლო აუდიტორია და საკონფერენციო დარბაზი. შენობაში მოწყობილია გასახდელები, სატრენაჟორო დარბაზი და სხვა დამხმარე ოთახები. ამ ეტაპზე, აკადემიაში მთელი წლის განმავლობაში 14 წლამდე და 15 წლამდე ორი ასაკობრივი გუნდი ცხოვრობს, რომლებიც ადგილზე პრაქტიკულ საფეხბურთო წვრთნებთან ერთად თეორიულ ცოდნას იღებენ. ამას გარდა, აღსაზრდელები საჯარო სკოლის განათლებას იღებენ. მათ სხვადასხვა პროფესიის მასწავლებლები ამეცადინებენ. აკადემიის მოსწავლეები სამედიცინო შტაბის მუდმივი მეთვალყურეობის ქვეშ არიან და ასაკის შესაბამის ფიზიკურ მომზადებას გადიან. საქართველოს ფეხბურთის ფედერაციის საფეხბურთო აკადემია რუსთავში 2018 წლის 24 ოქტომბერს გაიხსნა. პროექტი საქართველოს ფეხბურთის ფედერაციის, უეფას პროგრამა „ჰეთ-თრიკისა“ და ფიფას პროგრამა „ფორვარდის“ დაფინანსებით განხორციელდა. აკადემიაში მუდმივად მცხოვრები ორი ასაკობრივი გუნდის გარდა, რუსთავის ტექნიკური ცენტრი ამხანაგური და საერთაშორისო მატჩების წინ საქართველოს 17-19 და 21-წლამდე ასაკობრივ ნაკრებთა საწვრთნელი შეკრებებისთვისაც გამოიყენება.

ჩემო გურჯაანელებო, ბატონებო და ქალბატონებო, ბატონო პრემიერო, ეს არის კუთხე და მუნიციპალიტეტი, რომლის მაჟორიტარობაც გასული 4 წლის განმავლობაში იყო და არის ჩემი სიამაყის არსი და დვრიტა. ეს არის მუნიციპალიტეტი, სადაც ჩვენ, მოსახლეობასთან ერთად 2016 წელს შევქმენით დეპუტატის წინასაარჩევნო პროგრამა და განსხვავებული, მთლიანად მუნიციპალიტეტის, ცალკეულ სოფლებზე და თითოეული ოჯახის საჭიროებებზე მორგებული სტრატეგიული ხედვა და შემდეგ 4 წლის განმავლობაში ზედმიწევნით თანმიმდევრულად განვახორციელეთ ეს გეგმა. გურჯაანი შეიცვალა, შეიცვალა სოფლები, შეიცვალა ინფრასტრუქტურა და, რაც მთავარია, შეიცვალა მიდგომები, როგორც ადგილობრივი თვითმმართველობის, ასევე მოსახლეობის მხრიდანაც. გურჯაანის ხედავს ახალ პერსპექტივას, გურჯაანში მკაფიოდ ესმით ცვლილებების არსი და მიმართულება, გურჯაანი თავად არის ცვლილებების მაგალითი. მთავარი, რაც ყველაზე მნიშვნელოვანი და გასათვალისწინებელია, შეიცვალა დამოკიდებულება. ჯერ კიდევ 2016 წელს, წინასაარჩევნო შეხვედრების დროს, ბევრ ადგილზე მხვდებოდნენ ჯან-ღონით აღსავსე ადამიანები, რომელთა მთავარი მოთხოვნაც საპენსიო ასაკის შემცირება იყო, ეკონომიკურად აქტიური მოქალაქეები, რომლებიც დაჟინებით ითხოვდნენ სოციალური შემწეობის მიმღებთა სიაში ჩაწერას. დინამიკაში კარგად ჩანს, როგორ შეიცვალა მოთხოვნები, როგორ გახდა მათი გზავნილები პიროვნულიდან საზოგადო და როგორი ცვლილებები განიცადა მომავლისადმი დამოკიდებულებამ. ვერ ვიტყვი, რომ ყველაფერი, რაც გააზრებული გვქონდა პირადად მე და ჩვენს გუნდს, ყველაფერი მოვახერხეთ ანდაც არაფერი დარჩა გასაკეთებელი, მოუხრეშავ-გასაუმჯობესებელი. მაგრამ თითოეული გურჯაანელი, ჩვენი მუნიციპალიტეტის თითოეული მაცხოვრებელი თამამად იტყვის, რომ შრომა, გარჯა, მონდომება და ძალისხმევა არ დაგვიკლია ყველა მიზნის განხორციელებისთვის. როდესაც ვამბობ, რომ გურჯაანი შეიცვალა, ვგულისხმობ, არამარტო მენტალურ ცვლილებებს. მუნიციპალიტეტი, რომელსაც ფუნქცია დაკარგული ქონდა, ღირსეულად იბრუნებს თავის მოწინავეობას. რთველი გურჯაანში აღარ არის მარტო ყურძნის რთველი და ისიც სექტემბერ-ოქტომბერში, რთველი გადაიქცა მოსავლის მიღების დღესასწაულად, რომელიც მარწყვისა და კიტრი-პომიდვრის რთველიდან მაისში იწყება, გრძელდება ზაფხულში ატმისა და ვაშლატამას მოსავლით, კენკროვანებისა და ბაღჩეულის მოყვანით, ესტაფეტას იღებს ადრე შემოდგომაზე ყურძნის რთველი და გვიან შემოდგომაზე სრულდება ხურმისა და კარალიოკის რთველით. ხილისა და ბოსტნეულის, ყურძნის მოყვანა-რეალიზაცია უკვე აღარ არის სპონტანური და გარე პირობებზე დამოკიდებული პროცესი. სოფლის მეურნეობისა და აწარმოე საქართველოს პროგრამებით, სწორი ეკონომიკური პოლიტიკის გატარებით, შესაძლებელი გახდა ჩამოყალიბებულიყო ერთიანი ღირებულებათა ჯაჭვი, რომელიც მინდვრიდან სუფრამდე საქართველოში, ხოლო მინდვრიდან ექსპორტზე საზღვარგარეთ სრულ ეკონომიკურ პროცესს უზრუნველყოფს. მუნიციპალიტეტში მგზავრობისას შეამჩნევდით ათეულობით ახალ საწარმოს, ახალ შენობებს, ახალ ტექნოპარკს, ახალ მოედნებსა და სკვერებს, ახალ სკოლებსა და საბავშვო ბაღებს, რეაბილიტირებულ საგანმანათლებლო დაწესებულებებს, ახალ გზებსა და სავაჭრო ობიექტებს, ახალ სასტუმროებსა და გესტჰაუსებს, ცხოველთა თავშესაფარს, მარნებსა და ღვინის ქარხნებს, გადამამუშავებელ და შემნახველ საწარმოებს, დასრულების პროცესში მყოფ გურჯაანის ცენტრალურ პარკსა და სხვა ინფრასტრუქტურულ ობიექტებს. ეს შესაძლებლობა გურჯაანის გაზრდილმა ბიუჯეტმა მისცა გურჯანელებს, რეგიონული და მუნიციპალური ფონდების გაზრდილმა სახსრებმა, რომელიც 4 ჯერ გაიზარდა ბოლო 4 წლის განმავლობაში. ეს შესაძლებლობა ქვეყნის ცენტრალური ხელისუფლების, ადგილობრივი თვითმმართველობისა და, რაც მთავარია, ადგილობრივი მოსახლეობის მჭიდრო თანამშრომლობამ და პარტნიორობამ განაპირობა. მოსახლეობის ჩართულობა, თანამონაწილეობა საკუთარი სოფლის, საკუთარი საჭიროებების წარმოჩენისა და მისი დაკმაყოფილების გზით, აღებულია საუკეთესო ევროპული გამოცდილებიდან. ეს შესაძლებლობა კერძო ინვესტიციების არნახული რაოდენობით მოზიდვის შედეგია. გურჯაანი აქაც მოწინავეა. 2016 წლიდან დღემდე 11-ჯერ გაიზარდა ინვესტირებული თანხის რაოდენობა. ეს შესაძლებლობა, სულ მოკლე ხანში მოგვცემს საშუალებას, გავაუმჯობესოთ და საბოლოოდ მოვაწესრიგოთ წყლით უზრუმველყოფის საკითხები, დავასრულოთ საგზაო და ინფრასტრუქტურული პროექტები და მივუახლოვდეთ ევროპულ სტანდარტებს. გურჯაანელები მშრომელი ხალხია. მათ გაქანებასა და გარჯას ბუნებრივი მოწინააღმდეგე არ ყავს. ასეთი მტერი არც უმუშევრობა და არც ბუნებრივი კატაკლიზმები იყო. წარსულში ასეთი მოწინააღმდეგე, უიმედობა და პერსპექტივის არქონა იყო. საჭირო იყო ამ საშინელი მტერის სამუდამოდ დამარცხება და ახალი ორიენტირების, ახალი პერსპექტივების ჩვენება. ქართულმა ოცნებამ, ჩვენმა ხელისუფლებამ ეს მოახერხა - აქ ყველამ კარგად იცის, რომ ნებისმიერ მოქალაქეს აქვს პერსპექტივა, აქ ბევრი ადამიანი გაცილებით იმედიანადაა განწყობილი, რადგან ხედავს, რომ ფართო შესაძლებლობები ფართო ასპარეზს აძლევს. ბევრი დაბრუნდა და ბევრი კიდევ დაბრუნდება გურჯაანში საქმიანობის გასაგრძელებლად. პროფესიული განათლების გაძლიერების, ღვინისა და კულინარიის ახალი კოლეჯების გახსნით, ჩვენ შევძლებთ ახალი უნარებით გავაძლიეროთ ყველა მსურველი. გურჯაანელები ამაყობენ, რომ მეღვინეობის მუნიციპლიტეტის მაცხოვრებლები არიან, გურჯაანელები ამაყობენ, რომ უკვე საერთაშორისო საუკეთესო ღვინისა და კულინარიის ფესტივალების მასპინძლები არიან. ვხედავ, ვიცი, და მჯერა, რომ წინსვლისთვის ეს გაუმჯობესებები ჯერ კიდევ არ არის სრულყოფილი. ვიცი, ყველა ის პრობლემა, რაც აწუხებთ ჩვენ გურჯაანელებს, ვიცი ყველა პრობლემა თითოეული სოფლის ჭრილში, წყლით მომარაგებიდან დაწყებული, მორწყვის სისტემების გაუმჯობესებით დამთავრებული. ამიტომ ჩვენი დაპირებაც არ იქნება მარტივი შესასრულებელი, მაგრამ დარწმუნებული ვარ, რომ როგორც 4 წლის წინ მიცემულ დაპირებებს, ახლაც ყველას შევასრულებთ. განვლილი 4 წელი ჩემთვის და ჩვენი თანამოაზრეებისთვის იყო იმედისა და ღირსების მარში! სახალხო მოძრაობის დასაწყისი უკეთესი გურჯაანისთვის! თვითდაჯერებული და მომავლის იმედით აღსავსე გურჯაანელებისთვის! დიახ, ჩვენი ხელისუფლება არის სიტყვის შემსრულებელი, სიტყვის საქმით შემსრულებელი ხელისუფლება! დიახ, მე ვარ გურჯაანის დეპუტატი ქართული ოცნებიდან დავით სონღულაშვილი და ვიცი სიტყვის ფასიც და სიტყვის საქმედ ქცევა! დიახ, ჩვენ ერთად უკვე მივაღწიეთ გარკვეულ წარმატებას! და დიახ, ჩვენ უფრო დიდ წარმატებას აუცილებლად ერთად მივაღწევთ! დიდი მადლობა, ჩემ გურჯაანელებს!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა გურჯაანის მოსახლეობას მაჟორიტარი დეპუტატობის კანდიდატი, დავით სონღულაშვილი წარუდგინეს.

მოგესალმებით დედოფლისწყაროში, ძალიან ღირსეულ კახელებთან ერთად. დღევანდელ დღეს საუბარი უნდა დავიწყოთ იმის გახსენებით, რომ ზუსტად 28 წლის წინ საქართველოში, სოხუმში დაიწყო შეიარაღებული კონფლიქტი. ეს ის დღეა, რომელიც უნდა გვახსოვდეს და აგვისტო ის თვეა, როცა ყოველთვის უნდა გვახსოვდეს, რომ ჩვენი ქვეყანა ოკუპირებულია და ყველაფერი უნდა გავაკეთოთ ერთად, ვიშრომოთ ერთად, რომ ქვეყანა მშვიდობიანად გავამთლიანოთ. მოსავალზე რომ გადავიდეთ - რთველი იწყება აქედან და შეუძლებელია, რთველს გვერდი ავუაროთ. 2012 წელს კახეთში ჩაბარდა 52 000 ტონა ყურძენი, 2019 წელს - 278 000 ტონა ყურძენი და 2020 წელს ჩაბარდება 300 000 ტონა. ეს არის შრომის შედეგი, იმის შედეგი, რომ თქვენ კახელები, მოქალაქეები, მთავრობა, ყველა ერთად ვშრომობთ და ეს შრომა ხომ ამ ქვეყნისთვის გვინდა. ჩვენ ხომ ვამბობთ, რომ ბევრი კარგი საქმე გვაქვს დაწყებული და უნდა დავამთავროთ ეს კარგი საქმეები, ეს არის ყველაზე მნიშვნელოვანი. რაც არ უნდა იყოს, ეს მთავრობა, „ქართული ოცნება“ ყოველთვის გვერდით ედგა ქართველ გლეხს, ქართველ ფერმერს. ამის დადასტურება იყო ყველა გასული წელი 2012 წლიდან და ამის დადასტურება იქნება ეს რთველიც. ჩვენ ამ რთველსაც ჩავატარებთ ძალიან მაგრად და ქართველ გლეხს, კახელ გლეხს საამაყოდ ექნება, როგორ ჩავატარებთ ამ რთველს. ისევე, როგორც დავაბინავეთ ატამი, დავაბინავებთ ვაშლს, შემდეგ თხილს და შემდეგ ციტრუსს. ყველამ უნდა ვიცოდეთ, რომ არც ერთი გოჯი მიწა ამ ქვეყანაში დაუმუშავებელი არ უნდა დარჩეს, იმიტომ რომ ყველამ ერთად პირველ რიგში ჩვენს მოქალაქეს უნდა მივხედოთ. უნდა ვიცოდეთ, რომ ბევრი გვაქვს საშრომი, რათა ჩვენს ბავშვებს განათლების მაგარი სისტემა შევუქმნათ. ჩვენი ბავშვები, რომლებიც საქართველოში განათლებას მიიღებენ, აქედან რომ გავლენ, სხვა ქვეყნის შვილებზე უფრო მაგრები უნდა იყვნენ, იმიტომ რომ ნიჭიერები არიან. ჩვენ ყველაფერი უნდა გავაკეთოთ და ვიშრომოთ იმისთვის, რომ ჩვენი მოხუცები, ღვაწლმოსილი პენსიონერები ღირსეულად ცხოვრობდნენ, ჯანმრთელობა ჰქონდეთ, ჯანმრთელობის მომსახურება და ნორმალური სოციალური დახმარება ჰქონდეთ. ყველაფერი უნდა გავაკეთოთ იმისთვის, რომ ჯან-ღონით სავსე ადამიანებს სამართლიან გარემოში შრომის შესაძლებლობა ჰქონდეთ, რათა ჩვენი ოჯახები ღირსეულად ვარჩინოთ. ეს არის ჩვენი ძირითადი მიზანი, როდესაც ვამბობთ, რომ ჩვენი ძირითადი ამოცანაა ადამიანზე ზრუნვა. ადამიანზე ზრუნვის მიზანმა მოგვცა შესაძლებლობა, ეს ვირუსიც სხვა ქვეყნებთან შედარებით უკეთესად გვემართა. ადამიანზე ზრუნვის მიზანმა მოგვცა შესაძლებლობა, რომ სამუშაო ადგილები არ დავკარგოთ და მეტი უნდა შევქმნათ. ძალიან კარგად გვესმის, რომ დედოფლისწყაროში ბევრია საშრომი. ბევრია საშრომი, რომ პირველ რიგში, წყალმომარაგების პრობლემა მოვაგვაროთ. მთელს საქართველოში ასეა - გზა, წყალმომარაგება და გაზი სოფლად და რეგიონში მცხოვრები ადამიანების პირველადი მოთხოვნაა. ამას წლები არ უნდა დასჭირდეს. ბევრი წელია, ვშრომობთ. გზები შედარებით ნორმალურ მდგომარეობაშია. შიდა სასოფლო გზებია მოსაწესრიგებელი, მაგრამ წყალი ხდება სულ უფრო და უფრო დიდი პრობლემა. ხორნაბუჯსა და სამრეკლოში 2021 წლისთვის 24-საათიანი წყალმომარაგება უზრუნველყოფილი იქნება. ბავშვები და სკოლები - ინფრასტრუქტურის რეაბილიტაციას ვახორციელებთ, მაგრამ ეს საკმარისი არ არის. ქვეყნის მასშტაბით თითქმის ყველა სკოლა,  3000-მდე სკოლიდან, გასარემონტებელია. ასაშენებელია ახალი სკოლები. სამთაწყაროში ახლა აშენდება ახალი სკოლა 300 ბავშვზე, მშენებლობა მთავრდება მაჩხაანშიც. ეს საკმარისი არ არის. მთავარია, რომ იყოს სამართლიანობის შეგრძნება, ადამიანი იყოს დარწმუნებული, რომ არავინ შეეხება ღირსეული შრომით შექმნილ მის სიმდიდრეს და ბარაქას და ყველამ ერთად უნდა მოვუაროთ დედოფლისწყაროსაც და საქართველოსაც. დიდი მადლობა, გამარჯვებას გისურვებთ!

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე, „ქართული ოცნების“ პოლიტიკური მდივანი ირაკლი ღარიბაშვილი და გურჯაანის, საგარეჯოს, დედოფლისწყაროსა და სიღნაღის ოლქში „ქართული ოცნების” მაჟორიტარი დეპუტატობის კანდიდატი დავით სონღულაშვილი ხეცურიანის ღვინის მარანში იმყოფებოდნენ. „ქართული ოცნების“ ლიდერებს მარნის მფლობელმა შალვა ხეცურიანმა უმასპინძლა და ღვინის დამზადების ტექნოლოგიასა და პროდუქციის რეალიზაციასთან დაკავშირებით ესაუბრა. ლიდერებმა აღნიშნეს, რომ ხელისუფლებისთვის მეღვინეობა-მევენახეობის განვითარება პრიორიტეტულია და ხაზი გაუსვეს ქართული ღვინის ექსპორტის მნიშვნელობას. ხეცურიანის ღვინის მარანი წელიწადში 120 000 ბოთლს ღვინოს აწარმოებს. ღვინო ექსპორტზე გადის ევროკავშირის ქვეყნებში, აშშ-ში, ჩინეთსა და რუსეთში. ხეცურიანის ღვინის მარანში 70 ადამიანია დასაქმებული.

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე, „ქართული ოცნების“ პოლიტიკური მდივანი ირაკლი ღარიბაშვილი და გურჯაანის, საგარეჯოს, დედოფლისწყაროსა და სიღნაღის ოლქში „ქართული ოცნების“ მაჟორიტარი დეპუტატობის კანდიდატი დავით სონღულაშვილი, სოფელ ჩუმლაყში იმყოფებოდნენ, სადაც სამაცივრე მეურნეობა დაათვალიერეს და ატმის ჩაბარების პროცესს დაესწრნენ. „ქართული ოცნების“ ლიდერები ხილის ჩაბარების პროცესის მიმდინარეობით დაინტერესდნენ და მეურნეობაში დასაქმებულ ადგილობრივ მოსახლეობას გაესაუბრნენ. მათი თქმით, მნიშვნელოვანია ყველა გლეხმა და ფერმერმა, საკუთარი მოყვანილი პროდუქციის ჩაბარება შეუფერხებლად შეძლოს. სოფელ ჩუმლაყში არსებული, თანამედროვე სტანდარტებით აღჭურვილი სამაცივრე მეურნეობა „ერთიანი აგროპროექტის“ ფარგლებში შეიქმნა. მასში 1 100 000 ლარის ინვესტიცია განხორციელდა, საიდანაც 800 000 ლარი შეღავათიანი აგროკრედიტია. აღსანიშნავია, რომ სამაცივრე მეურნეობაში 450 ტონა სხვადასხვა სახეობის ხილის შენახვაა შესაძლებელი. სამაცივრე მეურნეობაში სეზონზე დასაქმებულია 150-დან 350-მდე ადამიანი.

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე, „ქართული ოცნების“ პოლიტიკური მდივანი ირაკლი ღარიბაშვილი და გურჯაანის, საგარეჯოს, დედოფლისწყაროსა და სიღნაღის ოლქში „ქართული ოცნების” მაჟორიტარი დეპუტატობის კანდიდატი დავით სონღულაშვილი სასტუმრო „ამპელოში” იმყოფებოდნენ. „ქართული ოცნების“ ლიდერებმა კომპლექსი დაათვალიერეს და მუშაობის პროცესით დაინტერესდნენ. სასტუმროს მფლობელმა გურამ მახოშვილმა აღნიშნა, რომ სასტუმროს მშენებლობის მთავარი მაპროვოცირებელი სახელმწიფო პროგრამა „შეღავათიანი აგროკრედიტი“ იყო. სასტუმროს მშენებლობა 2014 წელს დაიწყო და საერთო ბიუჯეტი 6 მილიონ ლარს შეადგენს, რომლიდანაც სახელმწიფოს ხელშეწყობით 1 მილიონი ლარი აგროკრედიტია, 5 მილიონი კი კომპანიის ინვესტიცია. კომპლექსი ღვინის საწარმოს (მარანს), რესტორანს და სასტუმროს 20 ნომერს მოიცავს. კომპანიას მევენახეობის კუთხით 10 ადამიანი სტაბილურად ჰყავს დასაქმებული, სეზონურად კი 40-მდე ადამიანი. ამჟამად, სასტუმროში 36 ადამიანი მუშაობს.

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა დედოფლისწყაროს მოსახლეობას მაჟორიტარი დეპუტატობის კანდიდატი, დავით სონღულაშვილი წარუდგინეს.

ძვირფასო საგარეჯოელებო, ბატონებო და ქალბატონებო, ბატონო პრემიერო, ჩემთვის პატივია, წარმოვადგენდე დედოფლისწყაროს, საგარეჯოს, სიღნაღისა და გურჯაანის მუნიციპალიტეტებს საქართველოს უმაღლეს საკანონმდებლო ორგანოში. ვიყო კახეთის მოსახლეობის ხმა პარლამენტში და ვიზრუნო მათი ხედვების, გზავნილებისა და მოთხოვნების  განხორციელებაზე. რთულ პერიოდში გვიწევს საქმიანობა. პანდემიის გლობალური ხასიათიდან გამომდინარე, გამოწვევებიც ერთიორად ამწვავებს ეკონომიკურ თუ სოციალურ ფონს. სირთულეების ნამდვილად არ გვეშინია, ჩვენმა ხელისუფლებამ, ქართული ოცნების მთავრობამ დაამტკიცა, რომ ყველანაირი დაბრკოლებების გადალახვის რესურსი აქვს. როცა ზრუნვა ადამიანზე არის უპირველესი ღირებულება, როცა მოქალაქის სიცოცხლე და ჯანმრთელობა მთავარი ორიენტირია, ეკონომიკური თუ სოციალური ზედნაშენები აღარ წარმოადგენს სირთულეს.  მოსახლეობა, ჩვენი ხალხი, ჩვენი კახელები ამას კარგად ხედავენ და კარგად გრძნობენ. ხელისუფლების ანტიკრიზისული პაკეტები უკვე მოქმედებაშია და მის ნაყოფსა და შედეგს უმრავლესობა პოზიტიურად აფასებს. წარდგენასდავასწარიდასაგარეჯოსუმრავლესსოფელშიუკვეშევხვდიმოსახლეობას. ცხარე დისკუსიებიც გვქონდა და ჯანსაღი კრიტიკაც მოვისმინე, ერთობლივი გეგმებიც დავსახეთ და სამომავლო პერსპექტივებზეც ვისაუბრეთ. ის, რაც ვნახე და მოვისმინე შთამბეჭდავია - უამრავი პროექტი განხორციელდა, უზარმაზარი სამუშაოა ჩატარებული - ინფრასტრუქტურული პროექტები, სოფლისა და ეკონომიკის განვითარების, სოფლის მეურნეობის აღორძინების, წარმოების გამართვის, განათლების სისტემის გაუმჯობესების, სკოლებისა და ბაღების რეაბილიტაციის, კულტურის, ძეგლთადაცვისა და სპორტული მოედნების მიმართულებით. შედეგები მართლაც თვალსაჩინო და ხელშესახებია.განსაკუთრებული მადლობა მინდა გადავუხადო საგარეჯოს მაჟორიტარ დეპუტატს, ბატონ რომან მუჩიაშვილს და მის გუნდს. ამ ყველაფერს მოსახლეობა ძალიან კარგად ხედავს და აფასებს. ძალიან კარგად იცის, რომ ქართულ ოცნებას ქვეყნისა და საგარეჯოს წინსვლისთვის ალტერნატივა არ ყავს. ფაქტია, რომ უიმედობა, რომელიც გამეფებული იყო ჩვენი თანამოქალაქეების გულებში, უკეთესი ცხოვრების, კეთილდღეობის ზრდის, წინსვლის შესაძლებლობებმა და იმედმა ჩაანაცვლა სამუდამოდ! თუმცა, საკეთებელსა და გასაუმჯობესებელს რა გამოლევს. როგორც რიგით კახელსა და როგორც ამ ოლქის მაჟორიტარობის კანდიდატს უკვე დავალებაც მაქვს და სათხოვარიც გადმოსაცემი მთავრობისა და ხელისუფლების მიმართ. ეს თხოვნა თითოეული საგარეჯოელის, თითოეული სოფლისა და ქალაქ საგარეჯოს მოსახლეობისგანაა. ეს თხოვნა და სურვილი ჩემთვის არის უპირველესი შესასრულებელი ამოცანაც შემდეგი 4 წლის განმავლობაში. საკითხი ეხება მუნიციპალიტეტის წყალმომარაგების სისტემის კარდინალურ გაუმჯობესებას, ისეთი სისტემის შექმნას, რომელიც უზრუნველყოფს საგარეჯოს მუნიციპალიტეტის ქალაქისა და ყველა სოფლის მოსახლეობას, თითოეულ მოქალაქესა და ოჯახს სასმელი წყლით გაუმჯობესებული ციკლით. ჩვენი დაპირება ბოლომდე უნდა შესრულდეს გზებისა და სხვა ინფრასტრუქტურული პროექტების მიმართულებით, სასწრაფოდ უნდა მოხდეს რეფორმა ირიგაციისა და მელიორაციის კუთხით, მიწების სრული ინვენტარიზაციის შემდგომ, უნდა მოხდეს ფაქტობრივ საკუთრებაში არსებული მიწების შესწავლა და საკუთრების ფორმების განსაზღვრა-დამტკიცება.  თხოვნას, კიდევ ერთ თხოვნას დავამატებ, რომელიც ინტერნეტის ხარისხსა და ხელმისაწვდომობას ეხება სოფლებში. დისტანციურ და შერეულ სწავლებაზე გადასვლამ ინტერნეტზე მოთხოვნის მასშტაბები გაზარდა და სოფლების მოსახლეობის ნაწილისთვის გარკვეული პრობლემები შეიქმნა. ეს საკითხი უსწრაფეს გადაჭრას მოითხოვს. ყველაფერი უნდა გავაკეთოთ, რომ მოსწავლეებსა და მოსახლეობას ინტერნეტზე წვდომის ბარიერი არ ქონდეს უახლოეს მომავალში.  ეს და კიდევ სხვა საკითხების მოგვარება ხელს შეუწყობს ხელისუფლების მიერ გატარებული რეგიონული განვითარების პოლიტიკის განხორცილებას, რომლის ნაწილიც არის ქალაქში და სოფლად მცხოვრები მოსახლეობის ცხოვრების პირობების დაახლოება. სწორედ ეს სტრატეგია უნდა გახდეს ქვაკუთხედი ჩვენი, როგორც სახელმწიფოს და ჩვენი, როგორც კახეთის რეგიონის დაახლოების ევროპასთან.  ღირებულებები, რომელიც გაგვაჩნია ნამდვილად ევროპულია, ფასეულობები, რომელიც ჩვენ ცხოვრებასა და საქმიანობას განსაზღვრავს ნამდვილად ევროპულია. ჩვენი ამოცანა არის კეთილდღეობის იმ სტანდარტებთან მიახლოება, რასაც ევროპული სტანდარტები ქვია.  მე დარწმუნებული ვარ, რომ ამის მიღწევა ერთად, ჩვენ მოქალაქეებთან, ჩვენ მოსახლეობასთან ერთად, შესაძლებელია უახლოეს მომავალში. მე კახელი ვარ და მაჟორიტარობის კანდიდატობა კახეთში არ არის მხოლოდ რაღაც პოზიცია ან მომავალი თანამდებობის დაკავების სურვილი.  მე ამ კულტურის ნაწილი ვარ და კახეთის მსახურება არის ჩემი სულიერი მისიის დიდი ნაწილი. ამიტომ ვერ იქნება ჩემი სიტყვები, ჩვენი დაპირებები, ჩვენი საქმეები ფუჭი. მე მარტო არ ვარ და ჩემს უკან დიდი გამოცდილებაა, ყველაზე წარმატებული გუნდია ჩვენი ხელისუფლების, ქართული ოცნების სახით!ჩემო საგარეჯოელებო! მიმიღეთ თქვენ სამსახურში რიგით ჯარისკაცად. ვემსახურები საგარეჯოს! ვიბრძოლოთ ერთად თითოეული საგარეჯოელის წარმატებისთვის! ერთად, ჩვენი ქვეყნის წარმატებისთვის!

მოგესალმებით ძვირფასო მეგობრებო! განსაკუთრებული მადლიერებით მოგესალმებით ქართული ოცნების რიგით ჯარისკაცებს, თქვენ ყველას. მე მინდა მადლობა გადაგიხადოთ პირველ რიგში გვერდში დგომისთვის, თქვენი ერთგული მსახურებისთვის და რა თქმა უნდა იმ თავგანწირვისთვის, რომელიც თქვენ გამოიჩინეთ 2012 წელს, მაშინ როცა ჩვენი პარტიის თავმჯდომარის ბიძინა ივანიშვილის ლიდერობით ჩვენ ძალიან დიდი განსაცდელი ავარიდეთ ჩვენს ქვეყანასა და მოსახლეობას. დღეს, რა თქმა უნდა, არის მძიმე დღე, მე მინდა გამოვეხმაურო ბატონი პრემიერის ნათქვამს და კიდევ ერთხელ გავიხსენო აფხაზეთის ომში დაღუპული ათი ათასამდე ჩვენი თანამოქალაქე. 28 წელი გავიდა მას შემდეგ, ომი გაგრძელდა 13 თვესა და 13 დღეს და დასრულდა 1993 წლის 27 სექტემბერს, სოხუმის დაცემით. ეს მე შემთხვევით რა თქმა უნდა არ მიხსენებია, ვინაიდან ეს არის თითოეული ჩვენგანის ტკივილი, ტრაგედია და ეს არის გაკვეთილი, რაზეც ჩვენ ყველამ ერთად უნდა ვისწავლოთ და აღარ დავუშვათ არავითარი შეცდომა. საუბედუროდ 2008 წლის აგვისტოს მოვლენები ჩვენ კიდევ ერთხელ გვახსენებს, რომ ჩვენმა ყოფილმა უგუნურმა ხელისუფლებამ ვერ აარიდა ჩვენს მოსახლეობას ის უბედურება, ის ნგრევა და დესტაბილიზაცია, რომელიც გამოიწვია აგვისტოს ომმა. შედეგად ჩვენ მივიღეთ ასზე მეტი დაკარგული სოფელი, ამას გარდა კოდორი დავკარგეთ, დავკარგეთ ახალგორი და დამატებით მივიღეთ 10 ათასზე მეტი, დაახლოებით 25 ათასი დევნილი. ეს არის მწარე გაკვეთილი ძვირფასო მეგობრებო და რაოდენ გამაოგნებელია ის, რომ ასეთი მემკვიდრეობის დანატოვარი ხელისუფლება, ჩვენი ქვეყნის მთავარი დესტაბილიზაციის წყარო და მისი ხელმძღვანელი, ბელადი, ჯერ კიდევ საფრთხეს უქმნის და განსაცდელის წინაშე აყენებს ჩვენი ქვეყნის სტაბილურობას. მთავარი მონაპოვარი, რაც ჩვენმა ხელისუფლებამ და პირადად ბატონი ბიძინა ივანიშვილის მოსვლამ განაპირობა, ეს არის მშვიდობა, სტაბილურობა და თავისუფლება ჩვენი მოქალაქის. თითოეული მოქალაქის თავისუფლება მეგობრებო. ჩვენ კარგად გვახსოვს, რომ აფხაზეთის ომის შედეგად 300 ათასი ჩვენი მოქალაქე გახდა დევნილი. სულ რაღაც 10 წლის წინ, ყოფილმა ხელისუფლებამ 300 ათასი ჩვენი თანამოქალაქე გაასამართლა. როცა ჩვენ ვდგებით არჩევანის წინაშე, ჩვენ ყოველთვის უნდა გვახსოვდეს, თუ რასთან გვაქვს საქმე. მე მჯერა, რომ ჩვენი მოსახლეობის აბსოლუტური უმრავლესობა, აბსოლუტურად საღად და პასუხისმგებლობით უყურებს ამ არჩევნებს. ჩვენ, რა თქმა უნდა, ღრმად ვართ დარწმუნებული გამარჯვებაში. ვინაიდან ალტერნატივა ჩვენს ხელისუფლებას და ჩვენს პარტიას ქვეყანაში არ აქვს. მე არ ვამბობ იმას, რომ ჩვენ ვართ იდეალურები. ბუნებრივია, ჩვენ მოგვდის შეცდომები, მაგრამ ჩვენ ამ შეცდომებს ვასწორებთ და წინ მივდივართ. ჩვენ გვაქვს ჩვენი შეცდომების დანახვის უნარიც, ამის აღიარების უნარიც და ამის გამოსწორების შესაძლებლობაც. ჩვენი გუნდი, პრემიერის ხელმძღვანელობით, ჩვენი მთლიანი „ქართული ოცნება“ მისი ლიდერის - ბიძინა ივანიშვილის ხელმძღვანელობით მე მჯერა, რომ ამ მთავარ მონაპოვარს თქვენთან ერთად კიდევ უფრო განამტკიცებს 2020 წლის ოქტომბრის არჩევნებში. ჩვენ გვჭირდება გრძელვადიანი მშვიდობა, სტაბილურობა და თავისუფლება. ეს არის ის მყარი ფუნდამენტი, რასაც უნდა დაეფუძნოს ჩვენი შემდგომი განვითარება, ძირითადი კეთილდღეობა ჩვენი მოსახლეობის.  ჩვენ კარგად გვესმის, და პრემიერმაც აღნიშნა თავის გამოსვლაში, რომ ჩვენი მთავარი გამოწვევა არის ეკონომიკა, უმუშევრობა, სიღარიბე... რომელიც, რა თქმა უნდა, ჩვენს ხელისუფლებას არ მოუტანია. ჩვენი ოპონენტები, დესტრუქციული ძალა ყოველთვის აპელირებს იმით, რომ თითქოს ყველაფერი იყო იდეალურ ქვეყანაში და 2012 წლის შემდეგ ერთიანად დაინგრა ყველაფერი. ეს არის ის ნარატივი, ტყუილი და სიცრუე, რასაც ჩვენი ოპონენტები ავრცელებენ. 30 წლის განმავლობაში, მოდით ვაღიაროთ, ჩვენ თვითონ, ჩვენი ხელებით ვანგრევდით ჩვენს ეკონომიკას, ვუქმნიდით ჩვენს მოქალაქეებს უამრავ პრობლემას და სწორედ ამ უგუნური პოლიტიკის შედეგი არის ის, რამაც განაპირობა აგვისტოს ომის შემდგომ რაც მოხდა ქვეყანაში.  აქედან გამომდინარე, მე მინდა კიდევ ერთხელ მხარდაჭერა გამოვუცხადო ჩვენს ღირსეულ მაჟორიტარობის კანდიდატს, ბატონ დავით სონღულაშვილს, რომელიც არის გამორჩეული პარლამენტის წევრი, რომელიც გამოირჩევა თავისი ნიჭიერებით, კრეატიული იდეებით და მე მჯერა, რომ იგი საუკეთესოდ მოემსახურება ამ რეგიონის მოსახლეობას და თქვენს ინტერესებს დაიცავს საქართველოს პარლამენტში.  კიდევ ერთხელ მინდა მადლობა გადაგიხადოთ მხარდაჭერისთვის, და გისურვოთ წარმატება და ერთად გამარჯვება!

მოგესალმებით კუთხეში, სადაც ბრძოლის ფასიც იციან, სითამამეც და სტუმარ-მასპინძლობაც. აუცილებლად უნდა დავიწყოთ იმით, რომ დღეს 28 წელი გავიდა მას შემდეგ რაც სოხუმში დაიწყო შეიარაღებული კონფლიქტი. საერთოდ, აგვისტო მძიმე თვე დაგვებედა ბოლო ათწლეულების განმავლობაში და ყოველთვის უნდა გვახსოვდეს, რომ დღეს ჩვენი ქვეყანა არის ოკუპირებული. ყოველთვის უნდა გვახსოვდეს და ვიცოდეთ, რომ ეს ის პრობლემაა, რომელიც რადაც არ უნდა დაგვიჯდეს, უნდა გადავწყვიტოთ მშვიდობით, შრომით და იმით, რომ ავაშენებთ წარმატებულ ევროპულ სახელმწიფოს. ჩვენი დევნილები, რომლებიც თავის სამშობლოში ცხოვრობენ დევნილად, აუცილებლად უნდა დავაბრუნოთ სახლებში და ერთიან, გამთლიანებულ ქვეყანაში უნდა ვიცხოვროთ, მაგრამ ყველაფერი უნდა გავაკეთოთ ჩვენი მიზანმიმართულობით, ერთიანობით, რა თქმა უნდა, ჩვენი შრომით და რაც ყველაზე მთავარია, მშვიდობიანად. შრომა აქ, კახეთის ამ რეგიონში არ არის ფუჭი სიტყვა და ამის დამადასტურებელი ფაქტი არის ის, რომ 2012 წელს სრულად კახეთში წარმოებული იყო 52 000 ტონა ყურძენი. 2019 წელს კახეთში შარშან ჩვენ ყველამ ერთად ვაწარმოეთ და ჩავიბარეთ 278 000 ტონა ყურძენი -ხუთჯერ მეტი. ეს იყო უფრო ხარისხიანი, უფრო კარგი. წელს ჩვენ ველოდებით უფრო მეტს - დაახლოებით 300 000 ტონა ყურძენს. მერე ვიღაც გვეტყვის, რომ სოფლის მეურნეობა არ არის მნიშვნელოვანი. სოფლის მეურნეობა მნიშვნელოვანია და როგორც აქამდე სახელმწიფო ეხმარებოდა გლეხს, ფერმერს, გააგრძელებს ამ დახმარებას და ამისი ყველაზე კარგი მაგალითი იქნება წლევანდელი რთველი. ამ დახმარების ყველაზე  კარგი მაგალითი წელს იყო ის, როგორც იყო ატამი ჩაბარებული. ამ მიხმარების ყველაზე კარგი მაგალითი იქნება ის, როგორ ვაშლის მოსავალსაც მივიღებთ წელს გორის რეგიონებში. ამიტომ, შრომა უნდა იყოს დაფასებული და არც ერთი მტკაველი მიწა უპატრონო და დაუმუშავებელი არ უნდა დარჩეს. ჩვენთვის, „ქართული ოცნებისთვის“ ყველაზე მნიშვნელოვანი არის ადამიანი და ადამიანზე ზრუნვა. ჩვენ ძალიან კარგად გვესმის, რომ გასაკეთებელი საქმე უამრავია. ძალიან ბევრი მნიშვნელოვანი საქმეა დაწყებული, რომელიც ბოლოშია გასაყვანი და დასასრულებელი. ბევრი დრო არ გვაქვს, ეს პანდემიაც დაგვემატა, მაგრამ შინაარსობრივად რომ მივყვებით, ჩვენი მთავარი ამოცანაა, რომ პირველ რიგში, ჩვენს შვილებს, ახალგაზრდობას, შევუქმნათ ყველა პირობა იმისთვის, რომ ქვეყანაში მიიღონ კარგი განათლება, იყვნენ მაგრები, ეფექტურები და ქვეყნიდან რომ გავლენ, როცა დაიზრდებიან და კონკურენციაში შევლენ სხვა ქვეყნის ახალგაზრდებთან, ჩვენი ნიჭიერი ახალგაზრდები იყვნენ ძლიერები. ჩვენი ვალდებულებაა და ეს ასეც უნდა გავაკეთოთ, რომ ჩვენი ღვაწლმოსილი მოხუცები, ჩვენი პენსიონერები იყვნენ უზრუნველყოფილები, რომ მათ სოციალურად ჰქონდეთ იმის შესაძლებლობა, რომ პენსიაზე გასვლის შემდეგ ნორმალური ცხოვრება გააგრძელონ. იყოს დაცული მათი ჯანმრთელობა და რა თქმა უნდა, მშრომელ ადამიანებს უნდა მივცეთ სამართლიანი გარემო იმისათვის, რომ სახელმწიფომ შეუქმნას ყველა პირობა, რომ მშრომელმა ადამიანმა იშრომოს, იზრუნოს თავის ოჯახზე და რა თქმა უნდა, არ იყოს დამოკიდებული სახელმწიფოზე. ჩვენი ძირითადი ზრუნვის საგანია ბავშვი, ახალგაზრდა, განათლება, მოხუცი, ღვაწლმოსილი მოხუცი, მისი პენსია, მისი სოციალური უზრუნველყოფა, მისი ჯანმრთელობა და ჩვენ ყველა უნდა ავდგეთ და ვიშრომოთ და ამისთვის სახელმწიფომ უნდა შექმნას შესაბამისი სამართლიანი გარემო, რასაც ჩვენ ვაკეთებთ და რის კეთებასაც გავაგრძელებთ.  ყველას კარგად გვესმის, რომ ასაშენებელი ამ ქვეყანაში კიდევ ბევრია. მიუხედავად იმისა, რომ მე შემიძლია ბევრი ჩამოვთვალო თუ რა გაკეთდა, გაკეთდა ბევრი წყალმომარაგებისთვის და წყალმომარაგების სისტემის გასაუმჯობესებლად, მაგალითად, სოფელ უდაბნოში არასოდეს წყალი რომ არ ყოფილა, დღეს წყალი აქვთ. თუმცა ისიც კარგად ვიცი, რომ საგარეჯოში წყალი ორი წლის უკან უნდა დამთავრებულიყო, მაგრამ ახლაც ჯერ კიდევ გრძელდება რეაბილიტაცია და გპირდებით, რომ 2021 წლის გაზაფხულამდე 24-საათიანი წყალმომარაგება აქაც დასრულებული იქნება. სკოლები და საბავშვო ბაღები - კი მიმდინარეობს მათი რეკონსტრუქცია და ახლის მშენებლობა, მაგრამ არ არის ეს საკმარისი და ამ ბავშვებს ის გარემო უნდა შევუქმნათ რომ მათ ნორმალური განათლება მიიღონ და ეს პროცესიც გაგრძელდება. მაგისტრალური გზები, რომლებიც  ნორმალურ მდგომარეობაშია, კიდევ ბევრია სამუშაო, ბოლო-ბოლო კახეთი-თბილისის დამაკავშირებელი გზა რეაბილიტაციას მოითხოვს და ესეც გასაკეთებელია. ბევრი რამ არის კიდევ გასაკეთებელი და ეს ყველაფერი ერთად უნდა გავაკეთოთ. არ არის იმაზე უფრო დიდი ღირსება ვიდრე როგორც რიგითი ჯარისკაცი, შენს ადგილზე, ფერმერი, მუშა, სახელმწიფო მოღვაწე, ჯარი, პოლიციელი, დეპუტატი - ემსახურო შენს ქვეყანას და შენს რეგიონს. მე დარწმუნებული ვარ, რომ დავით სონღულაშვილი, როგორც ამ კუთხის ერთ-ერთი ყველაზე განათლებული, ამბიციური ადამიანი თავის რეგიონს წარმოადგენს პარლამენტში ღირსეულად და თქვენი ხმა ღირსეულად გაისმება საქართველოს პარლამენტში. წარმატებებს გისურვებთ და გამარჯვებას!

მოგესალმებით, ქალბატონებო და ბატონებო! მოგესალმებით ბატონო პრემიერო, მთავრობის წევრებო, დეპუტატებო, დამსწრე საზოგადოებავ!  ძალიან მიხარია, რომ დღეს, კახეთში, საქართველოს ამ ულამაზეს მხარეში თქვენთან ერთად ვიმყოფები, მხარეში, სადაც იციან სიტყვისა და საქმის ფასი, მხარეში, რომელიც სავსეა ისტორიით, ტრადიციებით, კულტურით,  ბარაქიანი მიწით და თავისუფლებისმოყვარე ხალხით.  კახეთი საუკუნეების განმავლობაში უამრავი შემოსევის, უამრავი დამპყრობელის მნახველია, დამპყრობლების, რომლებიც ცდილობდნენ, კახელი ადამიანისთვის წაერთმიათ ყველაზე ძვირფასი, თავისუფლება, სარწმუნოება და ის, რაც ამ ორ ღირებულებას ერთმანეთთან აერთიანებს - ქართული ვაზი. თუმცა, უამრავი მცდელობის მიუხედავად, ქართველი, კახელი ადამიანი ისევ ამუშავებდა მიწას, ისევ ადიდებდა უფალს და მსოფლიო დონის კულტურას ქმნიდა. დარწმუნებული ვარ, მომავალშიც ასე გაგრძელდება.  სწორედ ამიტომ, ამ მხარეს ვერავინ, ვერასდროს ვერაფერს დააკლებს. აქ მცხოვრები ადამიანები ყოველთვის დაიცავენ წინაპრებისგან დატოვებულ სიწმინდეებსა და ღირებულებებს. დღეს, ჩვენი შეკრების მიზეზი, მგონი ყველამ ძალიან კარგად იცის. დღეს ჩვენ წარმოგიდგენთ მაჟორიტარობის კანდიდატს, რომელიც იქნება თქვენი, საგარეჯოელების ინტერესების დამცველი საქართველოს უმაღლეს საკანონმდებლო ორგანოში.  ჩვენ ძალიან ბევრს ვსაუბრობთ, თუ რა პროექტები განხორციელდა 2012 წლის შემდეგ, რა რეფორმები გავატარეთ, თუ როგორია მხარდაჭერა და თანადგომა სახელმწიფოს მხრიდან სხვადასხვა მიმართულებით - სოფლის მეურნეობა, ჯანდაცვა, განათლება და ა.შ. თუმცა რა თქმა უნდა, პრობლემებიც ბევრი გვაქვს, ქვეყანაში არის გამოწვევები, რომლებსაც ჩვენი მხრიდან ღირსეული პასუხი სჭირდება. მე დარწმუნებული ვარ, ჩვენი ერთობით, ერთიანი ძალისხმევით ყველა გამოწვევას გადავლახავთ და ყველა პრობლემას ღირსეულად ვუპასუხებთ ჩვენი გაკეთებული საქმეებით.  ერთად, საქართველოს წარმატებისთვის!