პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა საგარეჯოს მოსახლეობას მაჟორიტარი დეპუტატობის კანდიდატი, დავით სონღულაშვილი წარუდგინეს. წარდგენას პარტიის გენერალური მდივანი, კახა კალაძე, პრემიერ-მინისტრი, გიორგი გახარია, „ქართული ოცნების“ პოლიტიკური მდივანი, ირაკლი ღარიბაშვილი და სხვა ლიდერები ესწრებოდნენ.

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე და გურჯაანის, საგარეჯოს, დედოფლისწყაროსა და სიღნაღის ოლქში ,,ქართული ოცნების” მაჟორიტარი დეპუტატობის კანდიდატი დავით სონღულაშვილი ჩირის საწარმო „ჯეო ორგანიკში“ იმყოფებოდნენ. პარტიის ლიდერები საწარმოს მუშაობის პროცესით დაინტერესდნენ. „ჯეო ორგანიკის“ მფლობელმა ალექსანდრე ნიკოლაიშვილმა „ქართული ოცნების“ ლიდერებს განხორციელებული ინვესტიციის შესახებ მიაწოდა ინფორმაცია და აღნიშნა, რომ სოფლის მეურნეობის სამინისტროს პროგრამების მხარდაჭერით შექმნილი საწარმო წელიწადში 600 ტონა ხილს ამუშავებს. მეწარმის ინფორმაციით, „ჯეო ორგანიკი“ მომავალი წლისთვის 1000 ტონამდე ხილის გადამუშავებას შეძლებს, ხოლო უკვე გადამუშავებულია 10 ტონა ატამი და 10 ტონა ნესვი. საწარმოს სრული ინვესტიცია 5 მლნ ლარია, საიდანაც საკუთარი წილი 3,1 მლნ ლარს, სახელმწიფო გრანტი 345 000 ლარს, ხოლო შეღავათიანი აგროკრედიტი - 1 500 000 ლარს შეადგენს. ადგილობრივ ბაზარზე რეალიზაციის გარდა, იგეგმება პროდუქციის ექსპორტი ჩეხეთში, შვედეთსა და უკრაინაში. „ჯეო ორგანიკში“ 50 ადგილობრივია დასაქმებული.

ლაგოდეხის მუნიციპალიტეტის სოფელ კაბალში 300 მოსწავლეზე გათვლილი სკოლა შენდება, რომელიც სრულად დააკმაყოფილებს თანამედროვე სტანდარტების მოთხოვნებს. სამშენებლო სამუშაოებს მთავრობის მეთაური დღეს „ქართული ოცნების“ გენერალურ მდივან კახა კალაძესთან, „ქართული ოცნების“ პოლიტიკურ მდივან ირაკლი ღარიბაშვილთან და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარი დეპუტატობის კანდიდატ ირაკლი ქადაგიშვილთან ერთად გაეცნო.   ლაგოდეხის მუნიციპალიტეტში 30 წელზე მეტია ახალი საგანმანათლებლო დაწესებულება არ აშენებულა, წელს კი საქართველოს მუნიციპალური განვითარების ფონდის დაფინანსებით, 2 საჯარო სკოლა შენდება: სოფელ კაბალში - 300, ხოლო სოფელ ჰერეთისკარში - 150 მოსწავლეზე გათვლილი სკოლები.   ამასთან, სრული რეაბილიტაცია უტარდება სოფელ ნინიგორის საჯარო სკოლას. სამივე სკოლა კეთილმოეწყობა სპორტული მოედნებით და სრულად დააკმაყოფილებს თანამედროვე სტანდარტებს.   პარალელურად, ინტენსიურად მიმდინარეობს მუნიციპალიტეტის 15 საჯარო სკოლის სველი წერტილების მოწესრიგება, რომელიც ადაპტირებული იქნება შშმ პირებისთვის. დანარჩენ სკოლებში ეტაპობრივად, საჭიროებისამებრ ჩატარდება სხვადასხვა სახის ინფრასტრუქტურული სამუშაოები.   გასულ წელს მუნიციპალიტეტში, ათასწლეულის გამოწვევის პროგრამის ფარგლებში, ლაგოდეხის №1, აფენის №1, ვარდისუბნისა და განჯალის სკოლის შენობების სარეაბილიტაციო სამუშაოები განხორციელდა.   მხოლოდ რეგიონული განვითარებისა და ინფრასტრუქტურის სამინისტრომ, 2019 წლიდან, საგანმანათლებლო ინფრასტრუქტურის მშენებლობისა და რეაბილიტაციის პროგრამის ფარგლებში, 66 სკოლის მშენებლობა, 100 სკოლის რეაბილიტაცია განახორციელა და ხელი შეუწყო ენერგოეფექტური კომპონენტის გაძლიერებას. საგანმანათლებლო პროგრამას საქართველოს მთავრობა და დონორები (CEB და NEFCO) აფინანსებენ. პროგრამის საერთო ღირებულება 300 მილიონ ლარზე მეტია.

საქართველოს პრემიერ-მინისტრი, გიორგი გახარია, „ქართული ოცნების“ გენერალურ მდივან, კახა კალაძესთან, „ქართული ოცნების“ პოლიტიკურ მდივან, ირაკლი ღარიბაშვილთან და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარი დეპუტატობის კანდიდატ ირაკლი ქადაგიშვილთან ერთად, ლაგოდეხის მუნიციპალიტეტის სოფელ კართუბანში საბავშვო ბაღის მშენებლობის პროცესს გაეცნო.   ბაღი, რომლის მშენებლობაც აქტიურ რეჟიმში მიმდინარეობს, 50 აღსაზრდელზეა გათვლილი. ამ ეტაპზე მიმდინარეობს რკინა-ბეტონის სამუშაოები, რის შემდეგაც დაიწყება მოპირკეთება, მოეწყობა შიდა ეზო და საბავშვო მოედანი. ახალი საბავშვო ბაღის მშენებლობა წლის ბოლომდე დასრულდება. სამუშაოებს მუნიციპალური განვითარების ფონდი აფინანსებს.   გარდა ამისა, საბავშვო ბაღები შენდება სოფელ თელასა და ბაისუბანშიც. მუნიციპალური განვითარების ფონდის დაფინანსებით, მიმდინარე წელს ასევე დაგეგმილია სოფელ ჭიაურსა და ჭაბუკიანში ახალი საბავშვო ბაღების მშენებლობა.   „ქართული ოცნების“ ლიდერებმა აღნიშნეს, რომ საგანმანათლებლო, ისევე, როგორც სკოლამდელი აღზრდის ინფრასტრუქტურის მშენებლობა პრიორიტეტულია და ამ კუთხით 2012 წლიდან არაერთი პროექტი განხორციელდა. მათი განცხადებით, ამ კუთხით განვითარება და დაგეგმილი პროექტები აქტიურად გაგრძელდება და უახლოეს წლებში საბავშვო ბაღები ყველა სოფელში გაიხსნება.

„ქართული ოცნების“ ლიდერები ყვარლის მუნიციპალიტეტში იმყოფებოდნენ, სადაც სახელმწიფო პროგრამა - შეღავათიანი აგროკრედიტის ფარგლებში, კომპანია „მარეულის“ 130 ჰა-ზე გაშენებული ვენახი და ღვინის საწარმო დაათვალიერეს.   „მარეულში“ საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი, კახა კალაძე, „ქართული ოცნების“ პოლიტიკური მდივანი, ირაკლი ღარიბაშვილი და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარი დეპუტატობის კანდიდატი ირაკლი ქადაგიშვილი იმყოფებოდნენ.   ამ ეტაპზე კომპანია „მარეულის“ ვენახებში ყოველდღიურად 70 ადამიანია დასაქმებული, ღვინის საწარმოში კი, მუდმივად, 30-35 ადამიანი მუშაობს.   ღვინის ქარხანა 10 000 ტონა ყურძენს ამუშავებს, ასევე, კომპანიის მფლობელობაშია სამედიცინო და საკონიაკე ბრენდის სპირტის გადამამუშავებელი საწარმო. მიმდებარედ კი სახელმწიფო პროგრამის - „აწარმოე საქართველოში“ მხარდაჭერით, 50 ნომერზე გათვლილი სასტუმრო შენდება.   ჯამში, აღნიშნული პროექტებისთვის სახელმწიფო მეწარმეს სხვადასხვა სახელმწიფო პროგრამით, 10 მილიონამდე ლარით დაეხმარა.   მთავრობის მეთაურმა კომპანია „მარეულის“ დირექტორთან საუბრისას აღნიშნა, რომ მნიშვნელოვანია, სახელმწიფომ იზრუნოს თავის ფერმერზე და გვერდში დაუდგეს თითოეულ მშრომელ ადამიანს. „ქართული ოცნების“ ლიდერების თქმით, ყველაფერი უნდა გაკეთდეს იმისთვის, რომ კახელი გლეხის შრომა იყოს დაფასებული და გაგრძელდეს ის აღმშენებლობა, რომელიც დღეს რეგიონში მიმდინარეობს.

  საქართველოს პრემიერ-მინისტრი, გიორგი გახარია, „ქართული ოცნების“ გენერალური მდივანი, კახა კალაძე და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარი დეპუტატობის კანდიდატი, ირაკლი ქადაგიშვილი ჰერეთის ფეხბურთის აკადემიაში იმყოფებოდნენ.   ლაგოდეხში მდებარე ნოდარ ახალკაცის სახელობის საფეხბურთო აკადემია, რომლის მიზანი ფეხბურთისა და ზოგადად სპორტის განვითარების პოპულარიზაცია და ახალგაზრდებში ჯანსაღი ცხოვრების წესის დამკვიდრების ხელშეწყობაა, 2018 წლის თებერვალში გაიხსნა. საქართველოს ფეხბურთის ფედერაციამ აღნიშნული ტექნიკური ცენტრის სრული რეკონსტრუქციისა და საფეხბურთო ინფრასტრუქტურის მოსაწყობად მილიონ ლარზე მეტი ინვესტიცია განახორციელა. როგორც ფედერაციის პრეზიდენტმა, ლევან კობიაშვილმა განაცხადა, ბაზის საცხოვრებელი კომპლექსი 110 ადამიანზეა გათვლილი. ამ ეტაპზე ბაზაზე, სრულიად უფასოდ, 40 ბავშვი ცხოვრობს და ვარჯიშობს. ისინი სწავლობენ საჯარო სკოლაში, გადიან უცხო ენის კურსებს, დღის მეორე ნახევარში კი ახალ სტადიონზე ვარჯიშობენ.   განახლებულ ბაზაზე ასევე სრულფასოვან შეკრებებს სისტემატურად გადიან სხვადასხვა ასაკობრივი ნაკრებების გუნდები.   „ქართული ოცნების“ ლიდერები სტადიონზე ახალგაზრდა სპორტსმენებს შეხვდნენ და მათ წარმატებები უსურვეს.   ლაგოდეხთან ერთად, ფეხბურთის ფედერაციის აკადემიები უკვე ფუნქციონირებს რუსთავში, ზუგდიდში და უახლოეს პერიოდში მსგავსი ბაზა გაიხსნება გურიაში. ასევე, აკადემიის მშენებლობა მოკლე ვადაში დაიწყება ქუთაისშიც.

მოგესალმებით ძვირფასო მეგობრებო, მივესალმები ამ საოცარი მუნიციპალიტეტის მკვიდრ მოსახლეობას! მივესალმები ჩვენს ერთგულ ამომრჩეველს, ქართული ოცნების ჯარისკაცებს. მინდა ჩემი გამოსვლა დავიწყო მადლობით - მადლობას გიხდით როგორც ამ პარტიის ერთ-ერთი რიგითი წევრი, როგორც ამ პარტიის პოლიტიკური მდივანი იმ მხარდაჭერისა და ერთგულებისთვის, რომელიც თქვენ გამოიჩინეთ არაერთგზის ჩვენი პარტიის მიმართ. ჩვენ წლების განმავლობაში ვემსახურებით ჩვენს სამშობლოს, ეტაპობრივად ვაძლიერებთ ჩვენს ქვეყანას, ჩვენს მოსახლეობას, ვუმსუბუქებთ იმ მძიმე ყოფას, რომელიც წლების განმავლობაში დაგროვდა ჩვენს ქვეყანაში. რა თქმა უნდა, ამას გვერდს ვერ ავუვლით და მე მინდა აღვნიშნო, რომ ეს კვირეული არის ტრაგიკული მოვლენების, აგვისტოს ომის კვირეული, რომელიც იყო და არის ჩვენი, თითოეული ქართველის ტკივილი და ტრაგედია. დღეს დილით ვიმყოფებოდი შინდისში, სადაც პატივი მივაგეთ ჩვენს გმირებს, 17 ვაჟკაცს, რომელმაც საოცარი მაგალითი დაგვიტოვა. მაგალითი თავდადების, თავგანწირვისა და სიყვარულისა ჩვენი სამშობლოს მიმართ. საოცარი მაგალითი, როგორც ამბობენ ჩვენი მტერი, ჩვენი ოკუპანტი, იმ დროს გაოცებული ყოფილა ამ ბიჭების საოცარი ვაჟკაცობითა და ბრძოლით. ჩვენი უბედურება და ტრაგედიაა ის, რაც მაშინ ვნახეთ, იმ დღეების განმავლობაში. სიმბოლური დამთხვევაა ის, რომ 2008 წლის 11 აგვისტოს მაშინდელი პრეზიდენტი და მთავარსარდალი იმყოფებოდა გორში, მაგრამ გმირობის და თავგანწირვის მაგალითის ნაცვლად, სამწუხაროდ და საუბედუროდ მან დატოვა კაცისთვის ყველაზე შეურაცხმყოფელი სიმხდალისა და ლაჩრობის მაგალითი. ამას შემთხვევით არ ვამბობ - ეს ადამიანი და მისი პოლიტიკური ძალა, რომელიც ჩვენს ქვეყანაში მთავარი დესტაბილიზაციის წყაროა, დღემდე უქმნის საფრთხეს ჩვენი ქვეყნის ეროვნულ უსაფრთხოებას. ამასაც არ ვამბობ გადაჭარბებით. ჩვენ კარგად გვახსოვს 2019 წლის ივნისის მოვლენები. ცალკე განსახილველია ის შეცდომა, რომელიც ჩვენ ვაღიარეთ და ვთქვით, რომ შეცდომა იყო, მაგრამ ამის შემდეგ როგორც განვითარდა მოვლენები, რა თქმა უნდა იყო და არის პირდაპირი მცდელობა ჩვენი ქვეყნის დესტაბილიზაციის. რა თქმა უნდა, მაშინ სახელმწიფო დადგა მოწოდების სიმაღლეზე და პასუხი გავეცით საკადრისი, ისეთი, როგორიც უნდა გაგვეცა ჩვენ მაშინ, მაგრამ ეს ძალა, რომელიც ქმნის დესტაბილიზაციას ქვეყანაში, რომელიც არის მთავარი დესტრუქციული ძალა და ქაოსის შემომტანი ჩვენს ქვეყანაში, ყველამ ერთად უნდა გავიყვანოთ პოლიტიკური ველიდან. 2012 წელს ბატონი ბიძინა ივანიშვილის ხელმძღვანელობით ჩვენ ყველამ ერთად შევძელით შეუძლებელი და მაშინ ხელისუფლებას, მმართველობას ჩამოვაცილეთ ეს ყველაზე საშიში ადამიანების გაერთიანება. გუშინ ვთქვი და მინდა გავიმეორო - ადამიანი არის საშიში და მით უფრო ხელისუფალი არის საშიში მაშინ, როცა ძალაუფლებას არ აბალანსებს ღირსება. ამ ადამიანებში ღირსების არავითარი ნატამალი არ არსებობს. სწორედ ამიტომ იყო ჩვენი საერთო ეროვნული ამოცანა ამ ადამიანების ჩამოშორება ხელისუფლებიდან. ახლა ჩვენი საერთო ამოცანა უნდა იყოს 2020 წელს ამ ადამიანების, ამ ანტიეროვნული ძალის პოლიტიკური ველიდან გაყვანა. ეს შეუძლებელია თქვენი მხარდაჭერის გარეშე. მე მინდა კიდევ ერთხელ ხაზი გავუსვა წლევანდელი არჩევნების მნიშნელობას და კიდევ ერთხელ გავიხსენოთ, თუ რაოდენ მნშვნელოვანია ჩვენთვის, ჩვენი ქვეყნითვის,თქვენთვის, ჩვენი შვილებისთის მშვიდობა და სტაბილურობა. ის მთავარი საყრდენი ფუნდამენტი, რომელიც ბიძინა ივანიშვილის მმართველობამ მოიტანა და დაამკვიდრა ამ ყვეყანაში. სწორედ მშვიდობა, სტაბილურობა და თავისუფლებაა მყარი სააფუძველი, რასაც უნდა დაეშენოს განვითარება და ჩვენი მოსახლეობის კეთილდღეობა. ვმოგზაურობთ რა ჩვენს რეგიონებში, ვხედავთ რომ ჩვენი მოსახლეობა არის გაჭირვებული. პრემიერი თავის გამოსვლებში მუდმივად საუბრობს იმაზე, თუ როგორ უნდა დავაჩქაროთ ეკონომიკა და განვითარება. გამოწვევები ძალიან ბევრია და ჩვენ კარგად გვესმის, რომ ეს სიტუაცია გააუარესა პანდემიის შემოსვლამ ჩვენ ქვეყანაშიც იმის მიუხედავად, რომ მართლაც უნიკალურად იმართა ჩვენი მთავრობის და ჩვენი გუნდის პარტიის ხელმძღვანელის ჩართულობით ეს კრიზისი და მოსახლეობას ჩვენ ავარიდეთ ძალიან სერიოზული გამოწვევა და ძალიან სერიოზული განსაცდელი. მაგრამ ასევე უნდა გავიხსენოთ, რომ ეს გაჭირვება და ეს სიდუხჭირე არ დამდგარა ბოლო წლების განმავლობაში. ჩვენ უნდა ვუთხრათ ჩვენს თავს, რომ ბოლო 30 წლის განმავლობაში თვითონ ვანგრევდით ჩვენს ქვეყანას, თითქოს რაღაც მოჩვენებითს ვაშენებდით და ერთი ხელის მოსმით, ჩვენივე ხელით ვანგრევდით. აგვისტოს ომი ამის ნათელი მაგალითია. 2008 წელს, მაშინდელმა ხელისუფლებამ ძალიან დიდ ჩიხში შეიყვანა ჩვენი ქვეყანა, ჩვენი მოსახლეობა - დაკანონდა ოკუპაცია, ჩვენ დავკარგეთ 100-ზე მეტი სოფელი, კოდორი, ახალგორი, ათიათოსობით დევნილი მივიღეთ და ამ გამოწვევის წინაშე ვართ თქვენთან ერთად. ამიტომ, მთავარი რაც ჩვენ ახლა გვჭირდება და რისი შენარჩუნებაც გვჭირდება არის სწორედ იმ თავარი მონაპოვარის, სიმშვიდის, სტაბილურობის და თავისუფლების შენარჩუნება, რომელიც უნდა გავამყაროთ ყველამ ერთად ოქტომბრის არჩევნებში იმისთვის, რომ გვქონდეს გრძელვადიანი განვითარება და სტაბილურობა ჩვენი შვილებისთვის და მომავალი თაობისთვის. ღმერთი იყოს ჩვენი მფარველი ამ საქმეში.

მოგესალმებით! ჩვენ გავიმარჯვებთ და ჩვენ გავიმარჯვებთ, რაც ყველაზე მთავარია, სამართლიან ბრძოლაში. ამ სამართლის ფასი დღეს ამ ქვეყანამ და ჩვენი ქვეყნის მოქალაქეებმა უკვე იციან. ეს არის ძალიან მნიშვნელოვანი. დღეს, აქ, ყვარელში, ილიას სახლმუზეუმიდან ჩვენ უნდა მივმართოთ ჩვენს მოქალაქეებს. მიუხედავად იმისა, რომ ზოგიერთებს უნდათ წარსული დაგვავიწყონ, ეს წარსული არ უნდა დავივიწყოთ და დღეს, 11 აგვისტოს, პირველ რიგში, უნდა მოვიხსენიოთ ჩვენი შინდისის გმირები, 17 ქართველი ახალგაზრდა, რომლებმაც უთანასწორო ბრძოლაში სამშობლოს ერთიანობისთვის ყველანაირი ყოყმანის გარეშე ამ ცხოვრებაში ყველაზე ძვირფასი - სიცოცხლე გასწირეს. ეს ის ადამიანები არიან, რომლებიც ყოველთვის უნდა გვახსოვდეს, რომლებზეც უნდა მოვუყვეთ ჩვენს შვილებს და მომავალ თაობას. ვინც რაც არ უნდა გვითხრას, ჩვენს წარსულს და ტრადიციებს არ დავივიწყებთ, თუმცა ეს იმას არ ნიშნავს, რომ სიახლისთვის ღია არ ვიქნებით. ჩვენ ვიყურებით მხოლოდ წინ, მხოლოდ მომავალში, ჩვენი თითოეული ნაბიჯი ორიენტირებულია ჩვენს მოქალაქეებზე და ხვალინდელ დღეზე. ყოველთვის ასე იყო. ეს არის „ქართული ოცნების“ მახასიათებელი ნიშანი, ის, რომ ადამიანი არის ჩვენი ზრუნვის ძირითადი საგანი, ჩვენი მოქალაქე არის ჩვენი ზრუნვის ძირითადი საგანი. ყველას კარგად გვესმის, რომ ჯერ პრობლემები ქვეყანაში ბევრია. დაგვემთხვა პანდემია - გარდა იმისა, რომ უნდა ვიზრუნოთ ადამიანების ჯანმრთელობაზე, ეკონომიკაზე უნდა ვიზრუნოთ და ყველაფერი უნდა გავაკეთოთ, რომ ჯერ შევინარჩუნოთ ქვეყანაში სამუშაო ადგილები და შემდგომ უკვე ეკონომიკური აღდგენის ეტაპზე შევქმნათ ახალი სამუშაო ადგილები. ეს ყველაფერი ჩვენ ერთად უნდა გავაკეთოთ. ასევე გვეუბნებოდნენ, რომ რა საჭიროა სოფლის მეურნეობაო. არა, ბატონო! სოფლის მეურნეობა და ქართველი ადამიანის, ქართველი კაცის ქართულ მიწასთან ბმა არის სულ სხვა ემოციური სფერო. ამიტომ ჩვენ, რა თქმა უნდა, ეს ყველაფერი პრაგმატულ, ეფექტიან განზომილებაში უნდა გადავიყვანოთ, უნდა მივეხმაროთ ქართველ გლეხს, რომელმაც უნდა მოიყვანოს ქართული პროდუქტი. ყველამ ხომ კარგად დავინახეთ, პირველი პრობლემა პანდემიის დროს გახდა ის, ქვეყანა საიდან და როგორ მოგვემარაგებინა პირველადი მოთხოვნის პროდუქტებით. ეს იყო პრობლემა. ამიტომ ჩვენ უნდა გავაძლიეროთ ჩვენი ადგილობრივი წარმოება. ყველაფერი უნდა გავაკეთოთ იმისთვის, რომ ჩვენმა ახალგაზრდებმა აიღონ პასუხისმგებლობა თავიანთ ოჯახებზე, თავიანთ თავებზე, დაიწყონ ბიზნესი, გახდნენ ფერმერები, აწარმოონ პროდუქტი, ეს არის ის, რაშიც ჩვენ უნდა მივეხმაროთ ჩვენს მოქალაქეებს. რა თქმა უნდა, შეუძლებელია დღეს აქ ყვარელში არ ვაღიაროთ ის, რომ მუნიციპალურ დონეზეც ბევრი რამ არის კიდევ გასაკეთებელი. ერთხელ და სამუდამოდ ყვარლის 24-საათიანი წყალმომარაგება არის დასასრულებელი და ეს პრობლემა არის გადასაწყვეტი. რა თქმა უნდა, კიდევ ბევრი გზა არის გასაყვანი, რა თქმა უნდა, კიდევ ბევრი სკოლა და საბავშვო ბაღია გასარემონტებელი ან ასაშენებელი, მაგრამ ამას ჩვენ ხომ ბოლო წლების განმავლობაში ყველანი ერთად ვაკეთებთ. ყველას კარგად გვესმის, რომ ჩვენ კიდევ ბევრი წელი გვჭირდება შრომა იმისთვის, რომ ქვეყანა გახდეს წარმატებული, ქვეყანამ მისცეს ახალგაზრდებს შესაძლებლობა თავიანთი თავი გამოავლინონ, ქვეყანა გახდეს სრულად ევროპული იმისთვის, რომ ჩვენ საბოლოოდ მიზანს მივაღწიოთ და ქვეყნის ერთიანობა აღვადგინოთ. ჩვენ ყველას უნდა გვესმოდეს, შეუძლებელია ვილაპარაკოთ ქვეყნის წარმატებაზე თუ არ ვსაუბროთ ამავდროულად თითოეული ქართული ოჯახის წარმატებაზე. ამიტომ ჩვენ, ყველამ ერთად, თითოეულმა ქართველმა, თითოეულმა ამ ქვეყნის მოქალაქემ უნდა გავაკეთოთ ჩვენი გასაკეთებელი და უნდა გავაკეთოთ საერთო საქმე. მე დარწმუნებული ვარ, რომ ჩვენ ამ ბრძოლაშიც გავიმარჯვებთ. ჩვენ გვყავს ყველაზე ღირსეული კანდიდატი რეგიონისთვის. ყველა შეხვედრაზე ვთქვი და აქაც გავიმეორებ. ირაკლიმ ზედმიწევნით ზუსტად იცის კახეთის პრობლემები, ამიტომ ამ ადამიანს მომზადება არ დასჭირდება. როგორც კი გავიმარჯვებთ და ავირჩევთ, ის მეორე დღიდან ვალდებული იქნება დაიწყოს ზრუნვა კახეთის თითოეული მოქალაქის კეთილდღეობაზე. რა თქმა უნდა, ცოტა სხვა არის, როცა შენ ხარ გუბერნატორი, აღმასრულებელი ხელისუფლების წარმომადგენელი, ახლა კი მან კახეთის ხმა უნდა წარმოადგინოს ქვეყნის უმაღლეს საკანონმდებლო ორგანოში. დარწმუნებული ვარ ირაკლი ამას თავს გაართმევს ღირსეულად და ყვარლის მუნიციპალიტეტის თითოეული მოქალაქის ხმა იქნება ხმამაღალი, ეფექტური და გასაგონი საქართველოსთვის, საქართველოს პარლამენტიდან.

ქალბატონებო და ბატონებო, ძვირფასო სტუმრებო, მოგესალმებით, მივესალმები მთავრობისა და პარლამენტის წევრებს, დამსწრე საზოგადოებას. ძალიან მიხარია, რომ ბევრ ნაცნობ სახეს ვხედავ, ადამიანებს, რომლებთან ერთადაც 2012 წელს ყვარლის ფაქტობრივად ყველა სოფელი გვაქვს შემოვლილი ფეხით. ეს იყო ის დრო, როდესაც ყველას კარგად გვახსოვს, თუ როგორ ებრძოდნენ განსხვავებულ აზრს, განსხვავებული პოლიტიკური შეხედულებების მქონე ადამიანებს, მაგრამ ჩვენმა ერთად დგომამ, ჩვენმა შრომამ მოგვაპოვებინა ის მნიშვნელოვანი გამარჯვება, რომელიც ჩვენი ქვეყნის განვითარებისთვის, სიმშვიდისა და სტაბილურობისთვის ძალიან მნიშვნელოვანი იყო. ჩვენი გუნდი ახალი ენერგიით, ახალი ძალებით, ქვეყნის განვითარების სწორი ხედვითა და საქართველოს წარმატებისთვის მოდის. სიმბოლურია, რომ დღეს ჩვენ ილია ჭავჭავაძის სახლ-მუზეუმის ეზოში ვიმყოფებით, ადამიანის, რომელმაც ყველაზე კარგად იცოდა განათლების, პროგრესისა და ამავდროულად, ეროვნული ღირებულებების ფასი. „ქართული ოცნება” მიჰყვება იმ გზას, რომელი გზაც დაუსახა ქართველ ერს ილიამ - საქართველოს ევროპული ოჯახის სრულფასოვანი წევრობა, თანამედროვე, სამართლებრივი და დემოკრატიული სახელმწიფოს შენება და ეს ყველაფერი ქართული იდენტობის, კულტურისა და ღირებულებების შენარჩუნებისა და განვითარების კვალდაკვალ კეთება. ამ მიზნის საბოლოოდ მისაღწევად, ჩვენ იარაღის ჟღარუნის, პროვოკაციების, ერთმანეთის მტრობისა და შუღლის, დესტრუქციისა და რევანშის ნაცვლად, გვჭირდება განათლება, პროფესიონალიზმი, შრომისმოყვარეობა, სოლიდარობა და სამშობლოს ყოველდღიური სამსახური. სწორედ სამშობლოს ყოველდღიური სამსახურია ჩვენი გუნდის მთავარი მიზანი და სწორედ ამისთვის ირჩევთ თქვენს წარმომადგენელს საქართველოს უმაღლეს საკანონმდებლო ორგანოში. ყვარელს ძალიან დიდი ეკონომიკური და ტურისტული პოტენციალი აქვს, რომელიც, სამწუხაროდ, პანდემიის გამო დაზარალდა, თუმცა ერთიანი ძალებით აუცილებლად შევძლებთ, რომ არა მარტო იმ ნიშნულს და ეკონომიკურ ზრდას დავუბრუნდეთ, რომელზეც ქვეყანა პანდემიამდე იყო, არამედ ყველაფერი უნდა გავაკეთოთ იმისთვის, რომ კახეთის რეგიონი, ჩვენი ქვეყანა, ჩვენი ქალაქები კიდევ უფრო წინ წავიდეს, კიდევ უფრო გავაძლიეროთ ეკონომიკა, რათა ჩვენი ქვეყნის თითოეულმა მოქალაქემ იგრძნოს კეთილდღეობა და შვება, ეს ყველაფერი კი შესაძლებელია მხოლოდ და მხოლოდ ერთობით, ერთიანი ძალისხმევით, როგორც ეს 2012 წელს და შემდგომ არჩევნებში ძალიან ბევრჯერ გვიჩვენებია. მე დარწმუნებული ვარ, რომ ჩვენ აუცილებლად გავიმარჯვებთ საპარლამენტო არჩევნებში, რომელიც 31 ოქტომბერს გაიმართება, მაგრამ მინდა, დაგარწმუნოთ ყველა, რომ ეს არ იქნება მხოლოდ ყვარლის და კახეთის რეგიონის გამარჯვება, ეს იქნება სრულიად საქართველოს გამარჯვება. ერთად, საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ყვარლის მოსახლეობას მაჟორიტარი დეპუტატობის კანდიდატი, ირაკლი ქადაგიშვილი წარუდგინეს. წარდგენას პარტიის გენერალური მდივანი, კახა კალაძე, პრემიერ-მინისტრი, გიორგი გახარია, „ქართული ოცნების“ პოლიტიკური მდივანი, ირაკლი ღარიბაშვილი და სხვა ლიდერები ესწრებოდნენ.

მოგესალმებით, ძვირფასო მეგობრებო. მინდა, განსაკუთრებით მივესალმო  ამ შესანიშნავი, ლამაზი მუნიციპალიტეტის მოსახლეობას და, ასევე, განსაკუთრებით მივესალმო ქართული ოცნების დამფუძნებლებს, ჯარისკაცებს რომლებმაც 2012 წელს შეუძლებელი შესძლეს ჩვენი ლიდერის, პარტიის თავმჯდომარის, ბატონი ბიძინა ივანიშვილის ხელმძღვანელობით. იმ დროს ეს გამარჯვება ბევრისთვის დაუჯერებელი იყო, მაგრამ ჩვენ ეს შევძელით. ამისთვის მადლობა თქვენ. მადლობა იმისთვის, რომ ამ წლების განმავლობაში ჩვენს გვერდით დგახართ და მადლობა თქვენი მხარდაჭერისთვის. რაც შეეხება დღევანდელ დღეს, ბუნებრივია, ჩვენ ვიმყოფებით 2008 წლის აგვისტოს კვირეულში. დღეს დილით ვიმყოფებოდი შინდისში, სადაც ჩვენმა გმირმა ჯარისკაცებმა სამაგალითო თავგანწირვა და თავდადება აჩვენეს - სრულიად უთანასწორო ბრძოლაში ჩვენს მტერთან, ოკუპანტთან გმირულად გაწირეს თავი. 17 ვაჟკაცი, რომლის სახელიც მინდა რომ იცოდეს და კიდევ ერთხელ შევახსენო ჩვენს ძვირფას მოსახლობას. ესენი არიან -  ალექსანდრე ონიანი, ემზარ წილოსანი, ვეფხია ჯიშკარიანი, ზვიად კაცაძე, თეიმურაზ ბერიძე, ილია გაბუნია, ილია შეყლაშვილი,  ირაკლი ჯანელიძე, კახა კოშაძე, ლევან მელქაძე, მარლენ ბარამია, მიხეილ დვალიშვილი, ნიკოლოზ ფორჩხიძე, რომან ზოიძე, რუსლან წულაძე, ფელიქს კაკაურიძე და შმაგი კუპატაძე.    12 წლის წინ ამ გმირებმა მართლაც სამაგალითო გმირობა, თავგანწირვა გვაჩვენეს, მაგრამ ჩვენდა საუბედუროდ და ჩვენდა სამარცხვინოდ, ჩვენი ერის სირცხვილი ვიხილეთ - ყოფილი პრეზიდენტის, მიხეილ სააკაშვილის სამარცხვინო ქმედება. რა სიმბოლური დამთხვევაა მეგობრებო, რომ სწორედ ამ დღეს, 2008 წლის 11 აგვისტოს, იმ დროს ყოფილი პრეზიდენტი იმყოფებოდა ქალაქ გორში, საფრანგეთის საგარეო საქმეთა მინისტრთან ერთად და იმ დროს როდესაც ჩვენი ეს გმირები, რომლებიც მე ჩამოგითვალეთ მტერთან იბრძოდნენ თავგანწირვით და სიცოცხლეს, ყველაზე ძვირფასს სწირავდნენ ჩვენი სამშობლოსთვის, ჩვენი მაშინდელი პრეზიდენტი, რომელიც დღესაც გვეცხადება როგორც ყველაზე დესტრუქციული, ანტისახელმწიფოებრივი ძალის ლიდერად, ჩვენ ყველამ ვიხილეთ მიწაზე გართხმული. ეს იყო ჩვენი შეურაცხყოფა, ეს იყო ჩვენი გმირების შეურაცხყოფა, ჩვენი ჯარის, რომელმაც დღემდე მოიტანა ჩვენი ძვირფასი სამშობლო. ჩვენ დღეს მოვედით დღევანდელობამდე ჩვენი რწმენით და ჩვენი ბრძოლით. ჩვენ რაც ვიხილეთ არის აბსოლუტურად ამის საწინააღმდეგო.  რა თქმა უნდა, აქ არ მოვედი იმისთვის, რომ  ვისაუბრო ყველაზე დეგრადირებულ ადამიანზე, მაგრამ, ვინაიდან ჩვენ ვართ პოლიტიკურ კამპანიაში და მე ვარ  ამ პარტიის პოლიტიკური მდივანი, ჩვენ უნდა შევახსენოთ ჩვენს მოსახლეობას, თუ რა ძალასთან, რა მტრულ და ბოროტ ძალასთან გვქონდა ჩვენ საქმე და როგორი ვერაგი, მტრული ძალა ყველამ ერთად, ბატონი ბიძინა ივანიშვილის ხელმძღვანელობით მოვიცილეთ. მოვიცილეთ, როგორც ერთგვარი სახადი, მაგრამ  ჩვენ ვხედავთ, რომ ჯერ კიდევ გრძელდება მუდმივი დესტაბილიზაციის მცდელობები ამ კონკრეტული პოლიტიკური ანტისახელმწიფოებრივი ძალის მხრიდან. გუშინ გაგვაკრიტიკეს ოპონენტებმა, რომ ჩვენ აქ მხოლოდ წარსულზე ვსაუბრობთ. უკაცრავად, მაგრამ  ჩვენ წარსული კარგად გვახსოვს და გვემახსოვრება ყოველთვის. როგორ შეიძლება ადამიანმა, მოქალაქემ დაივიწყოს აგვისტოს ომი, ის ტრაგიკული დღეები და ის სამარცხვინო საქციელი, რომელიც ჩვენმა ქვეყანამ, მთელმა მსოფლიომ იხილა. არც ერთ შემთხვევაში მეგობრებო, ჩვენ ამას  ყოველთვის გავახსენებთ ჩვენს დესტრუქციულ, ანტიეროვნულ ძალას.  რა თქმა უნდა, ჩვენი ხელისუფლება, პრემიერ-მინისტრის ხელმძღვანელობით, პარტიის თავმჯდომარის ლიდერობით ყველაფერს აკეთებს იმისთვის, რომ ჩვენი მოქალაქეების ყოფა გააუმჯობესოს.  მოგეხსენებათ, რომ 30 წლის განმავლობაში ჩვენმა ქვეყანამ არაერთი ომი, არერთი შიდა ომი, სამოქალაქო დაპირისპირება გადაიტანა და ჩვენივე ხელებით დავანგრიეთ ჩვენი ქვეყანა.  ასეთი უპასუხისმგებლო მთავრობების  და ხელისუფლებების შედეგად ვართ იქ, სადაც ვართ. ამ ყველაფრის აღდგენას, ბუნებრივია, სჭირდება დრო. დრო, რომელიც ყველაზე ძვირფასია და რომელიც ჩვენ ყველას გვეჩქარება. მაგრამ მე გარწმუნებთ, რომ ჩვენი ლიდერის და ჩვენი მთლიანი გუნდის  საერთო მობილიზებით, საერთო ორგანიზებით ჩვენ ნაბიჯ-ნაბიჯ ყველაფერს ვაკეთებთ იმისთვის, რომ ფეხზე დავაყენოთ ჩვენი ძვირფასი სამშობლო. 2020 წლის ოქტომბერში ჩვენ კიდევ ერთი გარდამტეხი ეტაპი გვიდგება  პოლიტიკურ ცხოვრებაში. კიდევ ერთხელ უნდა გავამყაროთ ის მონაპოვარი, რომელიც ჩვენ მოვიპოვეთ.  ეს არის მშვიდობა, უპრეცედენტო,  8-წლიანი სტაბილურობა, რომელიც  ჩვენს ქვეყანას, პრაქტიკულად,  30 წლის განმავლობაში არ გამოუცდია.  ყველას გავახსენოთ კიდევ ერთხელ, ყველა მმართველის პირობებში ჩვენმა ხალხმა გამოსცადა ომი, ნგრევა დესტაბილიზაცია, მუდმივი ქაოსი, მუდმივი დაპირისპირება და კიდევ ერთხელ გავიმეორებ, რომ ბიძინა ივანიშვილის მმართველობა არის ის უიშვიათესი გამონაკლისი, როცა ჩვენს ქვეყანაში დამყარდა მშვიდობა, სტაბილურობა და თავისუფლება. თავისუფლებას გისურვებთ ჩემო მეგობრებო!

ჩემთვის უდიდესი პატივია დღეს, საქართველოს ამ ერთ-ერთ ყველაზე ლამაზ კუთხეში მქონდეს  თქვენთან საუბრის შესაძლებლობა. ჩვენ ყველანი ქართველები ვართ, საქართველოში ვართ და უნდა გავიხსენოთ დღევანდელი დღე. დღეს 11 აგვისტოა და ზუსტად 12 წლის წინ, 17 ქართველი გმირი უთანასწორო ბრძოლაში ქვეყნის ერთიანობას და მთლიანობას შეეწირა. ეს ის ადამიანები არიან, ეს ის ქართველები არიან მთელი საქართველოდან, რომლებიც ასე პირდაპირ, ვაჟკაცურად, ქართულად მტერს დაუპირისპირდნენ და არ დაუთმეს არაფერი მიუხედავად იმისა, რომ ეს ბრძოლა იყო უთანასწორო. ჩვენი შინდისის გმირები ჩვენი უახლოესი ისტორიის ყველაზე დიდი ქართველები არიან, რომელთა თითოეულთა სახელი უნდა გვახსოვდეს, მათ პატივი უნდა მივაგოთ და ჩვენი შვილები უნდა გავზარდოთ ამ მაგალითზე. მაგრამ, ამასთან ერთად და იმის გათვალისწინებით, რომ საქართველოს ყოველთვის ჰყავდა და ყოველთვის ეყოლება ასეთი გმირები, ჩვენ უნდა ვიზრუნოთ თითოეულ ჩვენს მოქალაქეზე და ჩვენ უნდა ვიზრუნოთ, რაც მთავარია, მშვიდობაზე ამ ქვეყანაში, იმიტომ, რომ მშვიდობის გარეშე არ არსებობს არანაირი განვითარება, ქვეყანაში ვერაფერი ვერ განვითარდება, თუ არ იქნება მშვიდობა, ვერც ტურიზმი, ვერც ეკონომიკა, ვერც განათლება, ვერაფერი. ამიტომ, ჩვენ უნდა გვყავდნენ გმირები, ჩვენ უნდა გვყავდეს ძლიერი ჯარი, მაგრამ ჩვენ ყოველთვის უნდა ვიზრუნოთ მშვიდობაზე.   „ქართული ოცნება“ ყოველთვის ზრუნავდა ადამიანზე. ჩვენი პოლიტიკის ცენტრში ყოველთვის იყო და იქნება ადამიანი. ადამიანი ყველა მიმართულებით - მისი ჯანმრთელობა, მისი ეკონომიკური კეთილდღეობა. მოგეხსენებათ, რომ დღეს ჩვენ, თქვენთან ერთად გვიწევს, ვებრძოლოთ, როგორც ეპიდემიას, ასევე უნდა ვიბრძოლოთ ეკონომიკის აღორძინებისთვის, მაგრამ ყველაზე მთავარი ამ ბრძოლაში, რა თქმა უნდა, არის ის, რომ გავაძლიეროთ ჩვენი ქვეყნის კეთილდღეობა. ყველას კარგად უნდა გვესმოდეს, რომ არ არსებობს წარმატებული საქართველო, თუ თითოეული ოჯახი საქართველოში არ იქნება წარმატებული. თითოეული ოჯახის წარმატების საფუძველი არის კარგი შემოსავალი და კარგი სამუშაო ადგილი. ამიტომ, დღეს ჩვენი ქვეყნის ყველაზე მთავარი გამოწვევა ეს არის სამუშაო ადგილები და ეკონომიკის აღორძინება და ჩვენ ყოველდღიურად უნდა ვიბრძოლოთ თითოეული სამუშაო ადგილისთვის, ეკონომიკის გაძლიერებისთვის, თითოეული გლეხი კახეთში უნდა იყოს მყარად ფეხზე მდგომი, მას სახელმწიფო უნდა ეხმარებოდეს. მიუხედავად ყველაფრისა, დღესაც, როდესაც ქვეყანას ასე უჭირს პანდემიიდან გამომდინარე, კახელი გლეხი, რომელიც ვაზს უვლის, მას სახელმწიფო გვერდით უნდა დაუდგეს და დაეხმაროს, განსაკუთრებით დღეს და რა თქმა უნდა, ჩვენ გლეხს დავეხმარებით. ეს ყველაფერი გაგრძელდება მანამ, ვიდრე თითოეული ქართული ოჯახი ეკონომიკურად არ გაძლიერდება. ეს არის ჩვენი ძირითადი მიზანი, რომ ადამიანს მივცეთ შესაძლებლობა, იზრუნოს თავის თავზე, თავის ოჯახზე და დღეს, როდესაც პანდემიის ეპოქაში ვცხოვრობთ, უნდა გავუფრთხილდეთ პირველ რიგში, ჯანმრთელობას, მაგრამ არ უნდა დაგვავიწყდეს, რომ ბევრ ქართულ ოჯახს დააკლდა შემოსავალი. საქართველოში აღარ გვყავს ბევრი ტურისტი, რომელიც თითოეული ჩვენგანის შემოსავალი იყო. ქვეყანაში შემოსული ტურისტი მიდიოდა თითოეული გლეხის ოჯახამდე. ამიტომ, ჩვენ ვდგევართ სოფლის მეურნეობის,  ჩვენი ფერმერების, ჩვენი გლეხების გვერდით და ვიდგებით ბოლომდე, სანამ ქართული მეღვინეობა არ დადგება ფეხზე.   ლაგოდეხში ბევრი რამე გაკეთდა, მაგრამ ეს არ არის საკმარისი. არავინ ამბობს, რომ უკვე ყველაფერი კარგად არის, მარამ მთავარია ის, რომ ბევრი ძლიერი, კარგი საქმე გვაქვს დაწყებული, რომელიც უნდა დავასრულოთ. დაწყებულია წყალმომარაგების რამდენიმე პროექტი, მაგრამ ლაგოდეხის 24-საათიანი წყალმომარაგების პროექტი დასასრულებელია. დაწყებულია საბავშვო ბაღების და სკოლების რეაბილიტაცია. კაბალში ასაშენებელია ახალი სკოლა, რომელიც აუცილებლად უნდა აშენდეს. რა თქმა უნდა გასაგრძელებელია  ინფრასტრუქტურის წესრიგში მოყვანა, გზების პირველ რიგში, იმისთვის, რომ ლაგოდეხმა რაც შეიძლება მეტი ტურისტი მიიღოს და მეტი ბარაქა შემოვიდეს რაიონში. ყველაფერი ეს, რა თქმა უნდა, გასაკეთებელია, მაგრამ რა თქმა უნდა, ჩვენ ყველამ ერთად უნდა ვიზრუნოთ ჩვენი ქვეყნის ტერიტორიული მთლიანობის აღსადგენად და ამის საფუძველი არის წარმატებული ქართული ოჯახი, წარმატებული საქართველო, ძლიერი ეკონომიკა და ევროპული ქვეყანა, რომელიც უნდა გახდეს სასურველი ჩვენი ძმებისთვის, რომ გავერთიანდეთ ერთ მთლიან, ერთობლივ სახელმწიფოში. მე მინდა ხაზგასმით აღვნიშნო, რომ ჩვენი კანდიდატი თქვენთან არის ყოფილი გუბერნატორი, ადამიანი, რომელმაც ყველა ის დეტალი, ყველა ის პრობლემა, რომელზეც მე ვისაუბრე იცის ზედმიწევნით კარგად, ამიტომ, როგორც კი თქვენთან ერთად ჩვენ გავიმარჯვებთ და ის იქნება არჩეული, მეორე დღესვე მისი ძირითადი ამოცანა იქნება ხალხის მსახურება და არ არის არაფერი იმაზე უფრო დიდი ღირსება ვიდრე ემსახურო შენს მოქალაქეებს. მადლობა და გამარჯვებას გისურვებთ!

ქალბატონებო და ბატონებო, ძვირფასო სტუმრებო, მოგესალმებით, მივესალმები ჩვენს ძვირფას ლაგოდეხელებს.    დღეს ჩვენი პოლიტიკური გუნდი წარმოგიდგენთ მაჟორიტარობის კანდიდატს, ადამიანს, რომელიც საქართველოს პარლამენტში თქვენი წარმომადგენელი, თქვენი ხმა იქნება. ადამიანს, რომელიც ყველა იმ გამოწვევას გაიზიარებს, რაც თქვენს ქალაქს და რაიონს უდგას.   „ქართული ოცნება“ პასუხისმგებლიანი პოლიტიკური ძალაა, რომელსაც ქვეყნის განვითარების რეალური ხედვა და ამ ხედვის განხორციელების უნარი გააჩნია. ჩვენ ვართ გუნდი, რომელიც ქვეყანაში სიმშვიდის, სტაბილურობის და  უსაფრთხოების გარანტია. ეს ფაქტი ძალიან კარგად გამოჩნდა პანდემიის პირობებშიც, როდესაც გლობალური საფრთხე ხელისუფლებამ ეფექტურად მართა და მსოფლიოში ერთ-ერთი საუკეთესო შედეგი აჩვენა. ამაში, რა თქმა უნდა, თქვენი, რიგითი ადამიანების მხარდაჭერა, თანადგომა იყო ძალიან მნიშვნელოვანი და ამისთვის ჩვენი ქვეყნის თითოეულ მოქალაქეს, მინდა, კიდევ ერთხელ, ძალიან დიდი მადლობა გადავუხადო.    „ქართული ოცნება” არის გუნდი, რომელიც ზრუნავს რეგიონების განვითარებაზე, მასშტაბურ ინფრასტრუქტურულ სამუშაოებს და ეკონომიკური თუ ტურისტული პოტენციალის ათვისების კუთხით უამრავ პროექტსა თუ ბიზნესის თანადაფინანსების პროგრამას ახორციელებს.   ამ ნაკრძალის ტერიტორიაზე მდგომებს თამამად შეგვიძლია ვთქვათ, რომ ლაგოდეხი ერთ-ერთი ყველაზე ლამაზი, მოსავლიანი და ბარაქიანი მუნიციპალიტეტია ქვეყანაში და უდიდესი ეკონომიკური პოტენციალი აქვს. სახელმწიფოს მხრიდან მშვიდობა და ხელშეწყობა სჭირდება ამ პოტენციალის სრულფასოვნად ათვისებას, რაც ჩვენი ვალია და დარწმუნებული ვარ, თქვენთან ერთად, თქვენი მაჟორიტარი კანდიდატის ძალიხმევით ამას აუცილებლად შევძლებთ. ჩვენ ყველაფერი უნდა გავაკეთოთ იმისთვის, რომ გამარჯვებას მივაღწიოთ. ერთად, საქართველოს წარმატებისთვის

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ლაგოდეხის მოსახლეობას მაჟორიტარი დეპუტატობის კანდიდატი, ირაკლი ქადაგიშვილი წარუდგინეს. წარდგენას პარტიის გენერალური მდივანი, კახა კალაძე, პრემიერ-მინისტრი, გიორგი გახარია, „ქართული ოცნების“ პოლიტიკური მდივანი, ირაკლი ღარიბაშვილი და სხვა ლიდერები ესწრებოდნენ.

„ქართული ოცნების“ ლიდერები თელავის მუნიციპალიტეტში ხილის გადამამუშავებელ საწარმოში - „აჩინებული“ იმყოფებოდნენ, რომელიც სახელმწიფოს დახმარებით, „ერთიანი აგროპროექტის“ ფარგლებში შეიქმნა. თანამედროვე სტანდარტებით აღჭურვილი საწარმო საქართველოს პრემიერ-მინისტრმა გიორგი გახარიამ „ქართული ოცნების“ პოლიტიკურ მდივან ირაკლი ღარიბაშვილთან, „ქართული ოცნების“ გენერალურ მდივან კახა კალაძესა და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარობის კანდიდატ ირაკლი ქადაგიშვილთან ერთად დაათვალიერა. საწარმოს ფინანსური მხარდაჭერა „სოფლის მეურნეობის პროდუქციის გადამამუშავებელი და შემნახველი საწარმოების თანადაფინანსების პროექტის“ ფარგლებში განხორციელდა. ინვესტიციის ჯამურმა მოცულობამ 2 500 000 ლარის შეადგინა, საიდანაც 975 402 ლარი შეღავათიანი აგროკრედიტია, ხოლო 632 835 ლარი - სახელმწიფოს მიერ გაცემული გრანტი. თელავის ხილის გადამამუშავებელი საწარმო „აჩინებული“, რომელიც 2019 წლიდან ფუნქციონირებს, გადაამუშავებს 400-500 ტონა ხილს, ამზადებს ნატურალურ წვენებს, ასევე პროდუქცია ექსპორტზე გააქვს აშშ-სა და კანადაში. „შეღავათიანი აგროკრედიტის“ ფარგლებში 2013-2019 წლებში თელავის მუნიციპალიტეტში 207 მილიონი ლარის მოცულობის პროექტები განხორციელდა. სახელმწიფოს თანამონაწილეობის მოცულობამ 28 მილიონ ლარამდე შეადგინა, ხოლო „შეღავათიანი აგროკრედიტით“ 1 945-მა ბენეფიციარმა ისარგებლა.

საქართველოს პრემიერ-მინისტრმა, გიორგი გახარიამ, „ქართული ოცნების“ გენერალურმა მდივანმა, კახა კალაძემ, „ქართული ოცნების“ პოლიტიკურმა მდივანმა, ირაკლი ღარიბაშვილმა და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარობის კანდიდატმა ირაკლი ქადაგიშვილმა, ახმეტის მუნიციპალიტეტის სოფელ ქვემო ალვანში საქართველოს ეროვნული გმირის, გიორგი ანწუხელიძის მემორიალი ყვავილებით შეამკეს და პატივი მიაგეს 2008 წლის რუსეთ-საქართველოს ომის დროს გარდაცვლილი გმირის ხსოვნას. lV ქვეითი ბრიგადის უმცროსი სერჟანტი, გიორგი ანწუხელიძე 2008 წლის აგვისტოს ომში ტყვედ ჩავარდა. იგი სეპარატისტებმა წამებით მოკლეს. გარდაცვალების შემდეგ, გიორგი ანწუხელიძეს ეროვნული გმირის წოდება მიენიჭა და 2013 წელს სოფელ ქვემო ალვანში მისი ხსოვნისადმი მიძღვნილი მემორიალი გაიხსნა.

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი, კახა კალაძე, „ქართული ოცნების“ პოლიტიკური მდივანი, ირაკლი ღარიბაშვილი და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარობის კანდიდატი ირაკლი ქადაგიშვილი ალავერდის მონასტერში იმყოფებოდნენ. მმართველი გუნდის ლიდერებმა მონასტრის ტერიტორიაზე მდებარე საფუტკრე მეურნეობა „თაფლიკაცი“ დაათვალიერეს, რომელიც ცვილს, დინდგელს, ფუტკრის რძეს და თაფლს აწარმოებს. სტუმრებს მონასტერში ალავერდელმა მიტროპოლიტმა, მეუფე დავითმა უმასპინძლა.  

საქართველოს პრემიერ-მინისტრი, გიორგი გახარია „ქართული ოცნების“ გენერალურ მდივან კახა კალაძესთან,  „ქართული ოცნების“ პოლიტიკურ მდივან ირაკლი ღარიბაშვილთან და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარობის კანდიდატ ირაკლი ქადაგიშვილთან ერთად რუისპირის ბიოდინამიურ მეურნეობაში იმყოფებოდა. მეურნეობის მფლობელი ხელისუფლების წარმომადგენლებს ესაუბრა პროდუქციის წარმოების შესახებ და აღნიშნა, რომ მეურნეობის მოწყობისთვის ჯამში 500 000 ლარამდე ინვესტიცია განხორციელდა. საწარმომ ევროპაში ექსპორტზე დაახლოებით 11 000 ბოთლი სხვადასხვა ჯიშის და დასახელების ბიოღვინო გაიტანა. მეურნეობაში ათობით ადამიანია დასაქმებული. პრემიერ-მინისტრმა აღნიშნა, რომ ეს მეურნეობა არის ნათელი მაგალითი, რომ აუცილებელია იმ უდიდესი პოტენციალის გამოყენება, რომელიც ამ რეგიონს ბუნებრივად აქვს. ხელისუფლებისთვის ფერმერების მაქსიმალური მხარდაჭერა პრიორიტეტულია და ამ კუთხით სხვადასხვა სახელმწიფო პროგრამის სახით უკვე არაერთი მნიშვნელოვანი ნაბიჯი გადაიდგა. გარდა ამისა, გრძელდება მოსახლეობის მხარდაჭერა რთველის სეზონზე, რათა შექმნილი კრიზისული ვითარების მიუხედავად, ადგილობრივებს ყურძნის მოსავალი დაუბინავებელი არ დარჩეთ. 2013-2019 წლებში ჯამურად რეგიონში 1 120 000-მდე ტონა ყურძენი გადამუშავდა. ფერმერების მიერ მიღებულმა შემოსავალმა კი ერთ მილიარდ ლარს გადააჭარბა.

ახალ სასტუმროში, რომელმაც ვიზიტორების მიღება ივლისიდან დაიწყო, მთავრობის მეთაური „ქართული ოცნების“ პოლიტიკურ მდივან ირაკლი ღარიბაშვილთან, „ქართული ოცნების“ გენერალურ მდივან კახა კალაძესთან და თელავის, ახმეტის, ყვარლისა და ლაგოდეხის საარჩევნო ოლქში „ქართული ოცნების“ მაჟორიტარობის კანდიდატ ირაკლი ქადაგიშვილთან ერთად იმყოფებოდა. სასტუმროს მფლობელმა, ლევან თორაძემ სტუმრებს მიაწოდა ინფორმაცია განხორციელებული ინვესტიციისა და არსებული სერვისების შესახებ. „აწარმოე საქართველოში“ პროგრამის სასტუმროს კომპონენტით მხარდაჭერა ამ დრომდე 19-მა სასტუმრომ მიიღო, ჯამურმა ინვესტიციამ 56 მილიონი ლარი, ხოლო დასაქმებულთა რაოდენობამ 621 ადამიანი შეადგინა. პრემიერ-მინისტრმა აღნიშნა, რომ „აწარმოე საქართველოში“ არის ერთ-ერთი ყველაზე წარმატებული სახელმწიფო პროგრამა, რომლის მხარდაჭერით მუნიციპალიტეტში 992 ათასი ლარის მოცულობის გრანტი გაიცა. დაფინანსდა ჯამში 112 პროექტი, აქედან 19 სასტუმროა. 2012 წლიდან დღემდე სააგენტო „აწარმოე საქართველოშის“ ფარგლებში 1105 სასტუმრო დაფინანსდა.

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ახმეტის მოსახლეობას მაჟორიტარი დეპუტატობის კანდიდატი, ირაკლი ქადაგიშვილი წარუდგინეს. წარდგენას პარტიის გენერალური მდივანი, კახა კალაძე, პრემიერ-მინისტრი, გიორგი გახარია, „ქართული ოცნების“ პოლიტიკური მდივანი, ირაკლი ღარიბაშვილი და სხვა ლიდერები ესწრებოდნენ.