მოგესალმებით, ქალბატონებო და ბატონებო, მივესალმები საქართველოს პრემიერ-მინისტრს ბატონ გიორგი გახარიას, მივესალმები პარტია „ქართული ოცნება - დემოკრატიული საქართველოს“ გენერალურ მდივანს ბატონ კახი კალაძეს, დამსწრე საზოგადოებას. განსაკუთრებით მინდა მივესალო ბათუმს და ბათუმელებს.  ჩემთვის დიდი პატივია დღეს ვისაუბროთ ჩემს საყვარელ ქალაქზე, მის აწმყოზე და მომავალზე. განსაკუთრებით მნიშვნელოვანია, რომ ბათუმმა, თავისი უდიდესი პოტენციალით, როგორც ეკონომიკური, ისე გეოგრაფიული და გეოპოლიტიკური მდებარეობით, როგორც ქვეყნის შიგნით, ასევე განსაკუთრებით საერთაშორისო ასპარეზზე ძალიან ბევრი სამართლიანი აღიარება ჰპოვა. გასული წელი მართლაც გამორჩეული იყო, ვინაიდან ბათუმი გახდა ევროპის ყველაზე მზარდი ტურისტული მიმართულება. წელს უკვე „ფორბსმა“ ბათუმი დაასახელა საინვესტიციო ქალაქების ხუთეულში. ასევე, გვქონდა უამრავი მიღწევა სპორტის მიმართულებით და სამართლიანად იქნა წარმოჩენილი როგორც ქვეყნის, ასევე ქალაქის სახელი ჩვენი სპორტსმენების მხრიდან. განსაკუთრებით მნიშვნელოვანი იყო, რომ ბოლო მოვლენების ფონზე, გლობალური პანდემიის ფონზე საქართველოს ხელისუფლების, პრემიერის ხელმძღვანელობით ჩვენ შევძელით, რომ ბათუმს შეენარჩუნებინა უსაფრთხო ქალაქის სტატუსი და მიუხედავად არსებული გამოწვევებისა, დღესაც მათ შორის, შიდა ტურიზმი ამ რეგიონში და ქალაქში შიდა ტურიზმი აქტიურად გრძელდება და ბათუმელები თავს გრძნობენ უსაფრთხოდ.  ჩვენი ე.წ. ოპონენტები ძალიან ხშირად გვაბრალებენ, თითქოს ჩვენ დავაპაუზეთ ამ ქალაქის, ამ რეგიონის განვითარება. მათ მინდა ვუპასუხო და დავეთანხმო მხოლოდ ერთ რამეში, რომ ჩვენ მართლაც 2012 წელს, „ქართულმა ოცნებამ“ მისი ლიდერის, ბიძინა ივანიშვილის ხელმძღვანელობით, დააპაუზა და გააჩერა მათი ძალადობა, ბიზნესის ტერორი, მეწარმეების გაკულაკება და დაამკვიდრა ერთადერთი და ყველაზე ღირებული: ადამიანის ღირსება, თითოეული საქართველოს მოქალაქის თავისუფლება და სწორედ ამ ყველაფრის საფუძველზე ჩვენ შევძელით ძალიან ბევრი მნიშვნელოვანი პროექტის განხორციელება.  სწორედ ამ სამართლიანობის პრინციპის საფუძველზე ჩვენ შევძელით, რომ გვქონოდა არაერთი მნიშვნელოვანი მიღწევა და მათ შორის ბათუმში, განსაკუთრებით ყველას, როგორც პატარებს, ახალგაზრდებს და უფროს თაობას ჰქონოდა ხვალინდელი დღის იმედი, ჰქონოდა პერსპექტივა. არაერთი მნიშვნელოვანი პროექტი განხორციელდა ამ მიმართულებით, რომელზეც ისაუბრეს ჩვენმა მეგობრებმა, თუმცა მე კიდევ ერთხელ გავიმეორებ, რომ „ოცნების ქალაქი“ იყო ჩვენი მთავრობისთვის, ხელისუფლებისთვის ღირსების საკითხი. რამდენიმე საათის წინ  პრემიერ-მინისტრთან და გენერალურ მდივანთან ერთად ჩვენ მოვინახულეთ მიმდინარე მშენებლობა, რომელიც მართლა იქნება 2000-ზე მეტი ბავშვის და მათი ოჯახების ახდენილი ოცნება და ძალიან მალე ისინი ღირსეულ საცხოვრისში შეძლებენ გააგრძელონ ცხოვრება ჩვენს რეგიონში, ჩვენს ქალაქში და ეს იქნება პირველი, უპრეცედენტო შემთხვევა, როცა ეკომიგრანტების საკითხი ასე გადაიჭრა ამ რეგიონში.  ასევე, ჩვენი ხელისუფლებისთვის მნიშვნელოვანია განათლება და განათლებისა და მეცნიერების ქალაქი, რომელსაც ვაშენებთ, მართლა გახდება ბათუმელებისთვის და ძალიან ბევრი ჩვენი თანამოქალაქისთვის ახალი საგანმანათლებლო კერა.  ასევე, მინდა კიდევ ერთხელ ყველას შეგახსენოთ, რომ 2006 წელს წინა ხელისუფლებამ ჩვენს ქალაქს, ბათუმს, ბათუმელებს და განსაკუთრებით სპორტისა და ფეხბურთის მოყვარულებს წაართვა და დაუნგრია სტადიონი. ძალიან მალე, რამდენიმე დღეში, საზეიმო ვითარებაში გავხსნით ამ მართლაც დიდებულ სტადიონს, რომელიც არის როგორც ინფრასტრუქტურის, ასევე მართლაც არქიტექტურული ნიმუში. ეს იქნება პასუხი ყველა სკეპტიკოსისადმი, ეს იქნება პასუხი იმ გაკეთებული საქმეების, რომელიც ჩვენმა ხელისუფლებამ მოახერხა და გააკეთა 2012 წლიდან დღემდე.  მართალია, არავის გვაქვს ილუზია, რომ ყველაფერი კარგად არის. ჩვენს მოქალაქეებს, რიგით ბათუმელებს ჯერ კიდევ ბევრი პრობლემა აქვთ გადასაჭრელი, მაგრამ ჩვენ კონკრეტული გეგმებით, კონკრეტული ნაბიჯებით ვმუშაობთ, რომ პირველ რიგში ადამიანებს ჰქონდეთ ხვალინდელი დღის რწმენა და რა თქმა უნდა, ყველაფერი კეთდებოდეს სამართლიანად, გამჭვირვალე გარემოში მოქალაქის ღირსების გაფრთხილების საფუძველზე. სწორედ ამიტომ, ჩვენ გავაგრძელებთ მუშაობას და დარწმუნებული ვარ, რომ ამაყი, თავისუფალი და თავმოყვარე ბათუმელები მიიღებენ ღირსეულ გადაწყვეტილებას და მხარს დაუჭერენ ჩვენ წარმოდგენილ კანდიდატებს, რომლებსაც ბევრი წარმოდგენა ბათუმელების წინაშე არ ჭირდებათ. იცით, რომ საქართველოს პარლამენტში ჩვენმა გუნდმა არჩევანი გააკეთა რესან კოცელიძეზე, ძალიან დამსახურებულ ადამიანზე, დამსახურებულ ბათუმელზე, რომელიც მთელი თავისი მოღვაწეობით ადასტურებს, რომ ის იყო სიმართლის და სამართლის მსახური და ის შეძლებს, რომ ჩვენი ქალაქი გახადოს კიდევ უფრო მეტად უსაფრთხო და მაღალი ტრიბუნიდან კიდევ უფრო უკეთ გაატაროს თითოეული ბათუმელის ინტერესები.  ასევე, უმაღლეს საბჭოში წარვადგენთ ჩვენი გუნდის გამორჩეულ წევრს, ტიტე აროშიძეს, რომელმაც ბოლო პერიოდში დაატყო თავისი ეფექტური ხელი სოფლის მეურნეობის განვითარებას და დარწმუნებული ვარ იმავე წარმატებით გააგრძელებს საქმიანობას აჭარის უმაღლეს საბჭოში.  გვაქვს თქვენი მხარდაჭერის იმედი, მადლობას გიხდით გვერდში დგომისთვის, ჩვენ ყველა ერთად გავიმარჯვებთ. ერთად საქართველოს წარმატებისთვის! 

მოგესალმებით, ბათუმელებო! აქ, აჭარაში, რაც პირველ რიგში გახსენდება და რითაც გინდა საუბარი დაიწყო, არის ის, რომ ვინ არ სცადა, ასწლეულების განმავლობაში, ეს კუთხე გადაეჩვია სამშობლოს სიყვარულს, მაგრამ ვერავინ მოახერხა. ასწლეულების მანძილზე აქაური მუსლიმი და მართლმადიდებელი ძმები ერთად იბრძოდნენ ქვეყნის ერთიანობისთვის და სამშობლოს სიყვარულში ეჯიბრებოდნენ ერთმანეთს. ეს არის ჩვენი ყველაზე დიდი მიღწევა, რასაც უნდა გავუფრთხილდეთ და რაც უნდა გავაძლიეროთ.  ბათუმი არის ქვეყნის კარიბჭე. ბათუმი არის წერტილი, საზღვაო, სარკინიგზო, საავტომობილო გზების კვანძი. ბათუმს წლებია ქვეყნისთვის უაღრესად დიდი სტრატეგიული მნიშვნელობა აქვს, არა მხოლოდ ეკონომიკური, რა თქმა უნდა, კულტურულიც, მაგრამ ეკონომიკა დღეს იქმნება არა მარტო თბილისში, არამედ აჭარაში, ბათუმში და ბევრ სხვა ქალაქში. ყველას კარგად უნდა გვახსოვდეს, რომ ბათუმი არის ის ქალაქი, რომლის წარმატებითაც თითოეული ქართველი ამაყობდა და იამაყებს.  რთული დღეები დაგვიდგა. ვგულისხმობ პირველ რიგში პანდემიას. განსაკუთრებით დაზიანდა ბათუმი, იმიტომ, რომ ბათუმი საქართველოს ტურისტული დედაქალაქია, მაგრამ ჩვენ ერთად ყველაფერი გავაკეთეთ და მომავალშიც გავაკეთებთ იმისთვის, რომ  ეს დარტყმა ბიზნესზე, ეკონომიკაზე, ბათუმის ეკონომიკაზე როგორმე მინიმუმამდე დავიყვანოთ და ამას მოვახერხებთ. ბათუმელებმა მოიგონეს პანდემიასთან ბრძოლაში წარმატებული საკარანტინე სივრცე. ყველას კარგად უნდა გვესმოდეს, რომ თუ ჩვენ ყველანი ერთად ვართ წარმატებულები პანდემიის რისკების მართვაში, ეს საკარანტინე სივრცეები არის ქართული მოდელის გასაღები, რომელიც ჩვენ ერთად შევქმენით. ეს გვიცავს თითოეულ ჩვენგანს. გარდა ამისა, გარკვეულ შესაძლებლობას აძლევს სასტუმრო ბიზნესს თანამშრომლების დასაქმებაში.  ჩვენ ყველა უნდა ვიყურებოდეთ ხვალინდელი დღისკენ. ჩვენ სწორება უნდა გავაკეთოთ მომავალზე და ყველანი უნდა მივხვდეთ იმას, რომ ამ ვირუსს დავამარცხებთ, მთავარია, გადავარჩინოთ ეკონომიკა და მთავარია, ყველამ ერთად, ეკონომიკური აღორძინებისთვის ვიშრომოთ და ვიბრძოლოთ. შემთხვევითი არ არის, რომ ისეთმა წამყვანმა საერთაშორისო სარეიტინგო კომპანიებმა, როგორიცაა Fitch და Standard & Poor's საქართველოს გლობალური გამოწვევების პირობებში შეუნარჩუნეს რეიტინგი, რაც უაღრესად ძლიერი მესიჯია ინვესტორებისთვის, ეკონომიკისთვის. ყველას კარგად უნდა გვესმოდეს, რომ ჩვენ ვებრძვით ვირუსს, ვიბრძვით ეკონომიკისა და სამუშაო ადგილების შესანარჩუნებლად და ჩვენ საარჩევნო წელი გვაქვს. ეს ყველაფერი ეკონომიკისთვის სტრესია. ცალკე აღებულიც კი - მხოლოდ ვირუსი, მხოლოდ საარჩევნო წელი, ეკონომიკური კრიზისი და ჩვენ ყველაფერი გვაქვს. ამას უნდა გავუძლოთ და გავუმკლავდეთ, რადგან ეს ჩვენი პასუხისმგებლობაა ჩვენი მომავლის წინაშე. ჩვენი მომავალი უნდა იყოს აბსოლუტურად პროგნოზირებადი და დაგეგმილი. ბოლო წლების განმავლობაში ბათუმში ბევრი რამ გაკეთდა, მაგრამ ეს საკმარისი არ არის. აჭარის რეგიონში აშენდა 5 ჰესი დადგმული სიმძლავრით, დაახლოებით 260 მეგავატი და ამაში 700 მლნ დოლარზე მეტი დაიხარჯა. მხოლოდ გზების დეპარტამენტმა ბათუმის სისტემურ ინფრასტრუქტურაში, გზებში 300 მილიონ ლარზე მეტი დახარჯა, მაგალითად, აშენდა ქობულეთის შემოვლითი გზა. თუმცა ეს საკმარისი არ არის, უნდა გაკეთდეს ბათუმის შემოვლითი გზა 13 კმ, რომელიც დაიწყება, უნდა გაკეთდეს ბათუმი-სარფი და შეუერთდეს ბათუმის შემოვლით გზას, რათა სატრანზიტო ტვირთი ქალაქის შუაში არ გადიოდეს, თითოეულ მოქალაქეს დისკომფორტს და ქალაქს და ქვეყანას ეკოლოგიურ პრობლემებს არ უქმნიდეს. ეს ყველაფერი გასაკეთებელია ყოველდღიურად. სერიოზული ინვესტიციები ხორციელდება აჭარის დაცულ ტერიტორიებზე და ეს გასაგრძელებელია.  ჩვენი დევიზი მარტივია - ბევრი კარგი საქმეა დაწყებული, რომელიც ყველამ ერთად უნდა მივიყვანოთ ლოგიკურ დასასრულამდე - ისეთ დასასრულამდე, რომ თითოეულმა მოქალაქემ იგრძნოს ცხოვრების ხარისხის გაუმჯობესება. დასასრულებელია ბათუმში წყალმომარაგების და წყალარინების სისტემა, სანიაღვრე სისტემები. 3 ფაზა უკვე დასრულებულია, მიმდინარეობს მე-4 ფაზა, მე-5 უნდა დავასრულოთ, რომ ქალაქში იყოს კომფორტული ცხოვრება და ჩვენი სანაპირო იყოს სუფთა, როდესაც დავხვდებით და ვეპატიჟებით სტუმრებს.  ბევრი რამ არის გასაკეთებელი განათლების სისტემაში და ახალი ცენტრი შენდება ბათუმში. ეს ყველაფერი ჩვენ ერთად უნდა გავაკეთოთ, მაგრამ უნდა ვიცოდეთ, რომ ამ ყველაფრის ცენტრში უნდა იყოს ადამიანი, მისი ღირსება და სამართლიანობა, ეფექტური სახელმწიფო მანქანა და რა თქმა უნდა, სამართლიანი სახელმწიფო აპარატი. ეს არის ჩვენი ძირითადი მიზანი. არავინ იცის ისე ზუსტად, როგორც „ქართულმა ოცნებამ“, სად, როდის და როგორ უნდა გავაკეთოთ. ზუსტი გეგმა გვაქვს, ყოველდღიურად გაწერილი და ეს ბათუმის მშენებლობის ტემპებსაც ეტყობა.  არ უნდა დაგვავიწყდეს, პირველი, რაც უნდა იყოს სისტემური ცვლილება ბათუმის ცხოვრებაში - „ოცნების ქალაქი“, რომელიც მართლა უნდა გახდეს ოცნების ქალაქი და სახელმწიფოს სოციალური პასუხისმგებლობა მოქალაქეების მიმართ უნდა გამოვლინდეს იმაში, რაც ამ მოქალაქეების ოჯახებში მოხდება უახლოეს თვეებსა და წლებში. რა თქმა უნდა, ბათუმის განაშენიანების გენერალური გეგმა, რომელიც, ყველა ვთანხმდებით, რომ ადრეც უნდა გაკეთებულიყო. ყველა ვთანხმდებით, რომ ბათუმის ყველანაირი განვითარება ჩვენ არ გვინდა და მას, რაც ძველი ბათუმიდან დარჩენილია, უნდა გავუფრთხილდეთ და შევინარჩუნოთ. ამისთვის საჭიროა განაშენიანების გეგმა, რომელიც ყველამ ერთად უნდა გავაკეთოთ. წელს ტენდერი გამოცხადდება, 1 წელიწადში დასრულდება და ეს უნდა იყოს განუხრელი კანონი თითოეული მშენებლისთვის. მორჩა მარტო ფულის კეთების დრო, უკვე აუცილებელია, ვიფიქროთ ბათუმის იერსახეზე და რაც დღეს დაგვრჩა, ის მაინც შევინარჩუნოთ. ეს არის უაღრესად მნიშვნელოვანი.  რა თქმა უნდა, დარწმუნებული ვარ, როგორც აჭარის უმაღლეს საბჭოში, ასევე საქართველოს პარლამენტში თქვენ გეყოლებათ ღირსეული წარმომადგენლები. რესან კონცელიძე არის ღირსეული ბათუმელი, რომელსაც თქვენ ჩემზე უკეთ იცნობთ და ტიტე აროშიძეც არის ახალგაზრდა, უაღრესად ნიჭიერი ადამიანი, რომელიც იქნება ძლიერი ხმა უმაღლეს საბჭოში.  დარწმუნებული ვარ, ყველა ერთად გავიმარჯვებთ, მაგრამ რაც მთავარია, გავიმარჯვებთ სამართლიან ბრძოლაში, აჭარის და საქართველოს წინსვლისთვის. გამარჯვებას გისურვებთ!

ძვირფასო ბათუმელებო, ქალბატონებო და ბატონებო, მოგესალმებით, მივესალმები საქართველოს პრემიერ-მინისტრს, მივესალმები აჭარის მთავრობის ხელმძღვანელს, მივესალმები აჭარის უმაღლესი საბჭოს ხელმძღვანელს, დეპუტატებს, მთავრობის წევრებს, დამსწრე საზოგადოებას. ბათუმი საქართველოს ერთ-ერთი ულამაზესი ქალაქია, რომელსაც ზღვა, გადამწვანებული მთები, დიდებული კულტურული მემკვიდრეობა და რაც მთავარია, აქ მცხოვრები ადამიანები განსაკუთრებულ კოლორიტსა და ხიბლს სძენს. ბათუმელები ძალიან მშრომელი, საკუთარ კუთხესა და ქვეყანაზე შეყვარებული ადამიანები ბრძანდებით და მე, როგორც ამ ქვეყნის მოქალაქეს, ძალიან მიხარია, რომ დღეს ვიმყოფები ჩვენი ქვეყნის ამ ულამაზეს ქალაქში და მინდა, ბათუმიდან მივესალმო სრულიად საქართველოს.  აჭარა და ბათუმი სამაგალითოა ტოლერანტობის, სხვადასხვა ერებისა თუ რელიგიური კუთვნილების ადამიანების  მშვიდობიანი თანაცხოვრების ტრადიციით, სადაც გმირი ადამიანები დიდი საქმეებითა თუ ყოველდღიური საქმიანობით ჩვენს სამშობლოს აერთიანებდნენ და აძლიერებდნენ. ბათუმის თითოეულ მცხოვრებს, თითოეულ ქრისტიანს, თითოეულ მუსლიმს, თითოეულ ბერძენს, ებრაელს თუ უკრაინელს, ამ ქალაქის და ამ ქვეყნის სიყვარული აერთიანებს. არავითარი განსხვავებულობა, ამ სიყვარულზე მაღლა არასდროს არ მდგარა და ვერც ვერასდროს დადგება, რადგან ჩვენ ყველა ერთი ვართ, რადგან ჩვენ საერთო სამშობლო გვაქვს და საერთო საქმე გვაქვს ჩვენი ქალაქისა და ქვეყნისთვის გასაკეთებელი.  „ქართულმა ოცნებამ“ ხელისუფლებაში მოსვლის დღიდან   ქვეყანაში სახელმწიფოებრიობის, თავისუფლების, სამართლიანობისა  და ღირსების განცდა დაუბრუნა მოქალაქეებს. დღეს სახელმწიფო აღარ ცდილობს დათრგუნოს, დღეს სახელმწიფო არ ართმევს, არ ატერორებს და ეს ყველაფერი ჩვენ ერთიანი ძალისხმევით ჩავაბარეთ წარსულს. საქართველოში არასდროს არ დაბრუნდება ის წლები, როდესაც ადამიანები იჩაგრებოდნენ. პირიქით, დღეს სახელმწიფო ზრუნავს და ცდილობს მათ დახმარებას. ამის ყველაზე მკაფიო მაგალითი გლობალური პანდემია და სახელმწიფოს მხრიდან პანდემიის პირობებში გატარებული პოლიტიკაა. პანდემია, რომელიც ჩვენმა გუნდმა ეფექტურად მართა და ქვეყანას ზიანი მაქსიმალურად აარიდა, თუმცა ეკონომიკური თვალსაზრისით მაინც დაზარალდა ჩვენი ქვეყანა, განსაკუთრებით ტურისტული სექტორი, რომელიც ბათუმისა და ბათუმელებისთვის შემოსავლების ძალიან მნიშვნელოვანი წყაროა. სწორედ ამიტომ, ხელისუფლებამ ტურისტული სექტორის სტიმულირება და დახმარება აქტიურად დაიწყო, რითიც ამ სფეროში დასაქმებულ ადამიანებს მცირედით მაინც შევუმსუბუქეთ ზიანი. მაგრამ ჩვენ აუცილებლად გავაგრძელებთ ხალხის და ქართული ეკონომიკის გვერდში დგომას და ყველა საჭირო ღონისძიებას გავატარებთ, რაც კრიზისის მართვისთვის იქნება საჭირო.  დარწმუნებული ვარ, ერთად დგომით ჩვენ ყველაფერს შევძლებთ. ჩვენ ამის ბევრი საუკეთესო მაგალითი გვაქვს, დაწყებული 2012 წლიდან და ყველას გვახსოვს, თუ რა მდგომარეობა იყო, როგორი დამოკიდებულება იყო განსხვავებული აზრის მიმართ, როგორი დამოკიდებულება იყო განსხვავებული პოლიტიკური შეხედულებების მქონე ადამიანების მიმართ. ჩვენ ყველამ საკუთარ თავზე, საკუთარ ოჯახზე, ჩვენს ახლობლებზე, მეგობრებზე გამოვცადეთ ეს ყველაფერი, თუმცა კიდევ ერთხელ ვიმეორებ, საბედნიეროდ ჩვენ მოვახერხეთ ის, რომ მშვიდობიანი გზით, არჩევნების გზით, როგორც ეს ყველა ცივილიზებულ განვითარებულ ქვეყანაში ხდება, წარსულს ჩავაბარეთ ის ცუდი ყველაფერი, რაც ხდებოდა.  ახლა მთავარია, რომ გავერთიანდეთ და მე დარწმუნებული ვარ არჩევნები, რომელიც ახლოვდება, 2020 წლის საპარლამენტო არჩევნები მაქვს მხედველობაში, რა თქმა უნდა, თქვენი მხარდაჭერითა და თანადგომით ჩვენ აუცილებლად შევძლებთ გამარჯვებას და ეს არ იქნება მხოლოდ პარტია „ქართული ოცნება-დემოკრატიული საქართველოს“ გამარჯვება, ეს იქნება ჩვენი ქვეყნის გამარჯვება. ჩვენ ყველაფერი უნდა გავაკეთოთ ჩვენი მშობლებისთვის, ჩვენ ყველაფერი უნდა გავაკეთოთ ჩვენი შვილებისთვის, მომავალი თაობებისთვის , ახალგაზრდებისთვის, ჩვენი ბებიებისა და ბაბუებისთვის . შესაბამისად, საჭიროა ერთად დგომა. 

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ბათუმის მოსახლეობას მაჟორიტარი დეპუტატობის კანდიდატი, რესან კონცელიძე და აჭარის ავტონომიური რესპუბლიკის უმაღლესი საბჭოს მაჟორიტარი დეპუტატობის კანდიდატი, ტიტე აროშიძე წარუდგინეს.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ, აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ, ბათუმის მაჟორიტარი დეპუტატობის კანდიდატმა რესან კონცელიძემ და  აჭარის ავტონომიური რესპუბლიკის უმაღლესი საბჭოს დეპუტატობის კანდიდატმა ტიტე აროშიძემ, ბათუმში, ,,განათლებისა და მეცნიერების ქალაქის“ მშენებლობა დაათვალიერეს.  მმართველი გუნდის წარმომადგენლები პროექტის კონცეფციას გაეცნენ, რომელიც ერთ სივრცეში აერთიანებს როგორც საგანმანათლებლო ინფრასტრუქტურას, ასევე თანამედროვე ბიბლიოთეკას, საკონფერენციო, საბუნებისმეტყველო და ტექნოლოგიურ ლაბორატორიებს. „განათლების ქალაქი“ მოიცავს მათემატიკურ სკოლას, 100 ახალგაზრდაზე გათვლილ საერთო საცხოვრებელს, ხელოვნების სკოლას, პროფესიულ სასწავლებელს და სხვ. ამ ეტაპზე მიმდინარეობს მათემატიკური სკოლის სასწავლო კორპუსის და საცხოვრებელი კამპუსის მშენებლობა. მათემატიკური სკოლის შენობაში, რომელიც 250 მოსწავლეზეა გათვლილი, მოეწყობა საბუნებისმეტყველო და კომპიუტერული ლაბორატორიები, ბიბლიოთეკა, საკონფერენციო და სპორტული დარბაზები, ასევე, სპორტული მოედანი. სკოლა აღიჭურვება თანამედროვე სასკოლო ინვენტარით.  „განათლების ქალაქის“ პროექტს საქართველოს განათლების, მეცნიერების, კულტურისა და სპორტის სამინისტროს სსიპ საგანმანათლებლო და სამეცნიერო ინფრასტრუქტურის განვითარების სააგენტო ახორციელებს.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ, აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ, ბათუმის მაჟორიტარი დეპუტატობის კანდიდატმა რესან კონცელიძემ და  აჭარის ავტონომიური რესპუბლიკის უმაღლესი საბჭოს დეპუტატობის კანდიდატმა ტიტე აროშიძემ, ბათუმში, ახლად აშენებული სპორტული კომპლექსი დაათვალიერეს. მმართველი გუნდის ლიდერებს კომპლექსის დირექტორმა, ბაქარ ჩიტაიამ პროექტის დეტალები გააცნო და აღნიშნა, რომ ბათუმის უნივერსალურ სპორტულ კომპლექსში ახლა მოპირკეთების სამუშაოები მიმდინარეობს.  ამ ეტაპზე, სპორტულ კომპლექსში ხდება დარბაზებისა და ტრიბუნის მოპირკეთება, დასრულდა სკამების მონტაჟი. პროექტს აჭარის ავტონომიური რესპუბლიკის მთავრობა აფინანსებს.  ბათუმში კიდევ ერთი მასშტაბური სპორტული პროექტი, ახალი სპორტული ბაზისა და ბავშვთა საფეხბურთო აკადემიის მშენებლობა მიმდინარეობს. პროექტი 2 500 ბავშვზეა გათვლილი. მშენებლობაზე 50 ადამიანია დასაქმებული.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ, აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ, ბათუმის მაჟორიტარი დეპუტატობის კანდიდატმა რესან კონცელიძემ და  აჭარის ავტონომიური რესპუბლიკის უმაღლესი საბჭოს დეპუტატობის კანდიდატმა ტიტე აროშიძემ, ბათუმში, მასშტაბური სოციალური პროექტის - ე.წ. „ოცნების ქალაქის“ მშენებლობა დაათვალიერეს.  მიმდინარე სამუშაოების შესახებ მმართველი გუნდის ლიდერებს ინფორმაცია სამშენებლო კომპანიის წარმომადგენლებმა მიაწოდეს. მათი ინფორმაციით, მშენებლობა დადგენილ ვადებში დასრულდება. ამ ეტაპზე, საცხოვრებელი კორპუსის მე-5 სართულის სამშენებლო სამუშაოები მიმდინარეობს.  „ქართული ოცნების“ ლიდერების განცხადებით, ე.წ. „ოცნების ქალაქის“ ტერიტორიაზე ადგილობრივ მოსახლეობასაც გაესაუბრნენ და აღნიშნეს, რომ საცხოვრებელი კომპლექსის აშენების შედეგად, მათ ცხოვრების ღირსეული პირობები შეექმნებათ.  ე.წ. „ოცნების ქალაქის" ტერიტორიაზე მოსახლეობა წლების განმავლობაში უკიდურესად მძიმე, სიცოცხლისთვის საფრთხის შემცველ პირობებში ცხოვრობდა. 2019 წლის თებერვალში მიღებული უპრეცედენტო გადაწყვეტილებით, აჭარაში წლების განმავლობაში ერთ-ერთ ყველაზე დიდი სოციალური პრობლემა გადაიჭრება.  პროექტით გათვალისწინებულია სამი 12-სართულიანი სახლის მშენებლობა. პროექტის ღირებულება 38.7 მილიონი ლარია. მშენებლობის შემდეგ ეტაპზე გათვალისწინებულია სკოლის, საბავშვო ბაღის და სათამაშო მოედნების მოწყობა. პროცესში ჩართულია საერთაშორისო ორგანიზაციები - Unicef და  წითელი ჯვარი.

ფუნდამენტური დემოკრატიული რეფორმების გატარების შემდეგ, ჩვენ ვდგამთ კიდევ ერთ მნიშვნელოვან ნაბიჯს თავისუფალი და სამართლიანი არჩევნების ჩასატარებლად. „ქართული ოცნება” გამოდის ინიციატივით, საარჩევნო კოდექსში შევიდეს ცვლილება, რომლის თანახმადაც მკაცრი სანქციები განისაზღვრება ამომრჩევლის იძულების, დაშინების და ხმის მიცემის ფარულობის დარღვევის შემთხვევებზე.საარჩევნო კოდექსშივე მიეთითება, რომ მსგავსი ქმედების ჩადენის შემთხვევაში, პირს დაეკისრება სისხლის სამართლის პასუხისმგებლობა. ანალოგიური ცვლილება შევა სისხლის სამართლის კოდექსშიც. ხმის მიცემის ფარულობის დარღვევის მიზნით, ამომრჩევლის დაშინება ან იძულება, ჩადენილი სხვადასხვა ფორმით, გამოიწვევს ჯარიმას ან შინაპატიმრობას ვადით ექვსი თვიდან ორ წლამდე, ანდა თავისუფლების აღკვეთას სამ წლამდე. შესაბამისი ცვლილებები მომზადებულია და დღეს დარეგისტრირდება საქართველოს პარლამენტში. ამ ცვლილებებით, როგორც ხედავთ, კიდევ უფრო მკაცრდება პასუხისმგებლობა საარჩევნო პროცესში შესაძლო სამართალდამრღვევთა მიმართ და იზრდება ამომრჩევლის, მისი თავისუფალი არჩევანის და არჩევანის ფარულობის დაცვის ხარისხი. ჩვენი მიზანია 2020 წლის საპარლამენტო არჩევნები ჩატარდეს უმაღლესი დემოკრატიული სტანდარტით. ჩვენ პატივს ვცემთ და ვენდობით ჩვენი საზოგადოების თავისუფალ არჩევანს, გვჯერა ჩვენი მხარდამჭერების და გვჯერა, რომ „ქართული ოცნება” გაიმარჯვებს სამართლიან არჩევნებში.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ, პარლამენტის თავმჯდომარე არჩილ თალაკვაძემ და მარნეულისა და გარდაბნის მაჟორიტარი დეპუტატობის კანდიდატმა ზაურ დარგალმა გარდაბნის პარკის სარეაბილიტაციო სამუშაოების დაათვალიერეს. პარკში განხორციელებული სამუშაოების შესახებ მმართველი გუნდის ლიდერებს გარდაბნის მერი, რამაზ ბუდაღაშვილი ესაუბრა.   პროექტის მიხედვით, პარკი სრულად რეაბილიტირდება, მოეწყობა ახალი, თანამედროვე სტანდარტების შესაბამისი სცენა, კაფე და საბავშვო ატრაქციონები.  გარდაბანში დავით აღმაშენებლის ქუჩაზე არსებული სკვერის სარეაბილიტაციო სამუშაოები აქტიურად მიმდინარეობს. პროექტი გარდაბნის მუნიციპალიტეტის ადგილობრივი ბიუჯეტიდან ფინანსდება და მისი ღირებულება 962 897 ლარს შეადგენს.

მოგესალმებით, ძვირფასო  მეგობრებო! მივესალმები მთლიანად გარდაბანს! ჩემთვის დიდი პატივია თქვენთან შეხვედრა. შეხვედრა  ადამიანებთან, რომლებიც მუხლჩაუხრელად შრომობენ თავისი მუნიციპალიტეტისა და ქვეყნის წარმატებისთვის, ქვეყნის განვითარებისთვის. ნამდვილად ამაყები ვართ, რომ აქ,  ჩვენი ქვეყნის ერთ-ერთ გამორჩეულ მუნიციპალიტეტში, გამორჩეულად შრომისმოყვარე ხალხი ცხოვრობს.  ჩემო გარდაბნელებო, ჩვენ კარგად ვიცით, რომ მიღწეულ პროგრესს და  ჩვენს მუნიციპალიტეტს მოფრთხილება და კიდევ უფრო მეტი განვითარება სჭირდება. სწორედ ეს მიზანი გვაერთიანებს ყველას. სწორედ ამ მიზნისთვის ყველაფერს აკეთებს „ქართული ოცნება“ დღეს. სიამაყით ვარ აღვსილი, რომ მომეცა შესაძლებლობა, ვიყო  იმ მუნიციპალიტეტში მცხოვრები მოქალაქეების ხმა პარლამენტში, სადაც ძმობის, ერთობის,  ერთმანეთის გვერდში დგომის ფასი ყველაზე კარგად იციან. აქ ადამიანური ღირებულებები ფასობს. სწორედ ამიტომ, მე მსურს ვიყო თქვენი ღირსეული ხმა  საქართველოს პარლამენტში. არავისთვის იქნება უცხო, თუ ხაზგასმით აღვნიშნავთ, რომ  გარდაბანში ყველაზე მეტი მნიშვნელოვანი პროექტები განხორციელდა ჩვენი მთავრობის პერიოდში; სწორედ გარდაბანშია ყველაზე მეტი აშენებული საბავშვო ბაღი, მოწესრიგებული სასმელი წყლის სისტემები, მოასფალტებული გზები. ზუსტად გარდაბანს გააჩნია  განვითარების უსაზღვრო პოტენციალი, რომელსაც  კიდევ უფრო მეტი ეფექტიანი გამოყენება და განვითარება ესაჭიროება. ნათელია და თითოეული თქვენგანი დამეთანხმება, რომ 2012 წლის შემდეგ, რაც „ქართული ოცნების“ ხელისუფლება მოვიდა, მთლიანად ქვეყანაში და, მათ შორის, გარდაბნის მუნიციპალიტეტში ყველა მიმართულებით ხელშესახებ პროგრესს მივაღწიეთ. მსურს, ამ ადგილიდან კიდევ ერთხელ გადავუხადო მადლობა მმართველ გუნდს, რომ მომეცა შესაძლებლობა და დამეკისრა პასუხისმგებლობა, ვიყო  ორი უმნიშვნელოვანესი მუნიციპალიტეტის ხმა  საქართველოს პარლამენტში. გპირდებით როგორც დღეს, ისე 4 წლის შემდეგ, პირნათელი ვიქნები  თითოეული თქვენგანის წინაშე; გარდაბანთან მიმართებაში ორი ძირითადი მიზანი მაქვს - ერთი, ვიყო თითოეული გარდაბნელის ოჯახის წევრი და მეორე, ვიყო თითოეული გარდაბნელის ღირსეული ხმა საქართველოს პარლამენტში. დარწმუნებული  ვარ, 31 ოქტომბერს, ერთად დგომით,  სამშობლოს სიყვარულით, ჩვენ აუცილებლად გავიმარჯვებთ და მომდევნო წლების განმავლობაში უამრავ წარმატებას მივაღწევთ. ჩვენ გავიმარჯვებთ გარდაბანში, ჩვენ გავიმარჯვებთ მარნეულში;  ჩვენ გავიმარჯვებთ მთლიან საქართველოში!

ჩემთვის დიდი პატივია დღეს ამ შეხვედრაში მონაწილეობა და მე მინდა დავიწყო, პირველ რიგში, მადლობით. მინდა, მადლობა გადაგიხადოთ თქვენ -  თითოეულ მოქალაქეს. გლობალური პანდემიის პერიოდში ჩვენ რთული დღეები გამოვიარეთ. თქვენი მხარდაჭერით, მოთმინებით და სახელმწიფოებრივი აზროვნებით, ჩვენ ყველამ ერთად შევძელით, რომ ეს რთული დღეები უკან მოგვეტოვებინა. დღესდღეობით, პრემიერ-მინისტრ გიორგი გახარიას ხელმძღვანელობით, ხელისუფლება ახერხებს ვირუსის ეფექტურად შეკავებას და ეს შესაძლებელი არის იმიტომ, რომ თითოეული მოქალაქე, თითოეული თქვენგანი მხარში უდგას სახელმწიფოს ამ რთულ მომენტში. ჩვენ მომავალზე ორიენტირებული გუნდი ვართ. ჩვენ გვაქვს გეგმები და გვყავს უკვე გამოცდილი გუნდი, რომელსაც შეუძლია, თქვენი მხარდაჭერით, მომავალზეც აიღოს პასუხისმგებლობა. რასაკვირველია, ჩვენი მთავარი საფიქრალი არის მომავალი და მხოლოდ და მხოლოდ მომავალი. ისტორია, რომელიც აქ გარდაბანში არსებობს, ჩვენ დიდ პასუხისმგებლობას გვაკისრებს, რომ მშვიდობიანი, ჰარმონიული თანაცხოვრებით, სამოქალაქო საზოგადოების განვითარებით, ერთად განვაგრძოთ ჩვენი ქვეყნის დემოკრატიული განვითარება. მე ძალიან მოკლედ შევაჯამებ, რაც ჩვენ შევძელით ერთად ამ წლების განმავლობაში და არგუმენტები, რისთვისაც საზოგადოება მხარს უჭერს „ქართულ ოცნებას“, რისთვისაც ჩვენი მოქალაქეები მხარს უჭერენ ჩვენს სახელისუფლებლო გუნდს, არის ძალიან მკაფიო. ეს არგუმენტები დღეს ხელისგულზეა. „ქართულმა ოცნებამ“ ყველაზე უკეთ შეძლო მშვიდობის და სტაბილურობის დაცვა ქვეყანაში. ჩვენ ყველაზე უკეთ შევძელით ზრუნვა ადამიანის ჯანმრთელობაზე და ადამიანის უფლებების დაცვა. ბიზნესი დღეს არის თავისუფალი და მეწარმეებს აქვთ მაქსიმალური ხელშეწყობა. „ქართულმა ოცნებამ“, ჩვენმა ხელისუფლებამ, ჩვენმა სახელმწიფომ შეძლო პრაგმატული, პროგრესული და სახელმწიფოებრივი საგარეო პოლიტიკის გატარება, რის შედეგადაც დღეს ჩვენი მოქალაქეები უვიზოდ მოგზაურობენ ევროპაში. ჩვენი შექმნილი პროდუქცია ექსპორტზე გადის ევროკავშირში, ჩვენ გვაქვს ასოცირების ხელშეკრულება და უფრო ძლიერი ურთიერთობები ჩვენს პარტნიორებთან, როგორც ევროკავშირთან, ასევე, ამერიკის შეერთებულ შტატებთან. 2020 წლის ოქტომბერში ჩვენ ვატარებთ ძალიან მნიშვნელოვან საპარლამენტო არჩევნებს. არა მხოლოდ იმიტომ, რომ მე-9 მოწვევის პარლამენტის მანდატი იწურება და მე-10 მოწვევის პარლამენტი უნდა შეიკრიბოს. არამედ, უფრო მეტად იმიტომ, რომ საქართველომ ამ წლებში გაატარა მნიშვნელოვანი დემოკრატიული რეფორმები, შექმნა უფრო სამართლიანი გარემო, შექნა უფრო სწორი თამაშის წესები, შექმნა უფრო გამჭვირვალე სისტემა, უფრო სამართლიანი სისტემა და სწორედ ეს არჩევნები უნდა გახდეს ჩვენი მომავალი სტაბილურობის და შედეგზე ორიენტირებული პოლიტიკური სისტემის დასაბამი. ჩვენ მაქსიმალურად ვმუშაობთ, რომ უსაფრთხოდ შევძლოთ რაც შეიძლება მეტი საერთაშორისო დამკვირვებლის ჩამოყვანა ქვეყანაში, რადგან, პირველ რიგში, ჩვენს ინტერესებში შედის, რომ ჩვენმა მოქალაქეებმა და მთელმა მსოფლიომ დაინახოს, რომ საქართველო აძლიერებს თავის დემოკრატიას და ატარებს უპრეცენდენტოდ გამჭვირვალე და სამართლიან არჩევნებს არსებითად პროპორციული სისტემით. ამაში ჩვენ გვაქვს ძლიერი მხარდაჭერა ჩვენი მოქალაქეების და ჩვენი პარტნიორების. მინდა, ორიოდ სიტყვით ვისაუბრო ზაურ დარგალზე. ახალგაზრდა ენერგიული კაცი, რომელმაც უკვე საკმაო გამოცდილება მიიღო საჯარო სექტორში და მან, ვფიქრობ, უკვე დაამტკიცა, რომ თქვენი ღირსეული არჩევანია.  ყველაზე რთულ დღეებში, როდესაც ეს რაიონები იყო ჩაკეტილი, როდესაც მისი ქალაქი იყო ჩაკეტილი, ის რჩებოდა თავის მოქალაქეებთან ერთად, მათ გვერდით და ბოლომდე, სანამ ყველა ფუნქცია არ აღდგა, სანამ თითოეულ ადამიანს, ვისაც დახმარება სჭირდებოდა, არ მიაქცია ყურადღება, ის ბოლომდე იდგა თავისი ქალაქის და თავისი საზოგადოების გვერდით. მან იცის, რა სჭირდება მარნეულს, მან იცის, რა სჭირდება გარდაბანს და მას ძალიან უყვარს. ის არის უზომოდ თავდადებული ადამიანი თავისი კუთხის და თავისი საზოგადოების. სწორედ ასეთი ადამიანი სჭირდება „ქართულ ოცნებას“ საპარლამენტო გუნდში, რომ თქვენი ხმა, თქვენთან საუბარი, თქვენთან თანამშრომლობა იყოს შეუფერხებელი და იყოს ეფექტური და შედეგიანი. მინდა გავიხსენო 2010-2012 წლები, როდესაც ზაური მუშაობდა დემოკრატიული მმართველობის პროგრამაში. ამ პროგრამას ჩვენ ვახორციელებდით ჩვენი ამერიკელი პარტნიორების, ამერიკის მთავრობის მხარდაჭერით. მაშინ, როდესაც დემოკრატიაზე იყო უპრეცენდენტო წნეხი, ადამიანებს არ ჰქონდათ კრიტიკული აზრის გამოთქმის საშუალება, მედია იყო მთლიანად მონოპოლიზებული, ან კონტროლირებული და დაბლოკილი, როდესაც პოლიტიკურ პარტიებს, ელემენტარულად, ოფისების ქირაობის საშუალებასაც არ აძლევდა ხელისუფლება. როდესაც ეს პრობლემები არსებობდა ქვეყანაში, ზაურ დარგალი მუშაობდა დემოკრატიული მმართველობის პროგრამაში და ჩვენ ერთად შევქმენით ქვეყანაში ცენტრები, სადაც ჩვენი მოქალაქეებისთვის, მედიისთვის, ახალგაზრდებისთვის გახსნილი იყო სივრცე. შეიძლებოდა დისკუსია, შეიძლებოდა პოლიტიკური შეხვედრები, მედიასთან ურთიერთობა და სხვა. სწორედ ამიტომ და ვინაიდან იმ პროგრამაში ზაური იყო 20 საუკეთესო თანამშრომელში მთელი ქვეყნის მასშტაბით, ვფიქრობ, რომ ის არის საუკეთესო კადრი და ძალიან მნიშვნელოვანი არჩევანი თქვენთვის. ვფიქრობ, რომ თქვენი საუკეთესო არჩევანი სწორედ ზაურ დარგალი იქნება და ის საუკეთესოდ შეძლებს, რომ ამ მხარის და თქვენი კუთხის ინტერესები წარმოადგინოს საქართველოს პარლამენტში. რა თქმა უნდა, დღეს ძალიან მნიშვნელოვანი პოზიცია უკავია მას და ბევრის გაკეთება შეძლო, ბევრი საქმეები ბოლომდეა მისაყვანი, თუმცა, დამიჯერეთ, რომ პარლამენტიდან ის იქნება არანაკლებ აქტიური და არანაკლებ წარმატებული, ვიდრე დღეს. ერთად გავიმარჯვოთ, ერთად გავაგრძელოთ ჩვენი ქვეყნის განვითარება, ერთად გავაკეთოთ ის საქმეები, რაც აქ საზოგადოებას სჭირდება, რაც ჩვენს ქვეყანას სჭირდება. ერთად საქართველოს წარმატებისთვის!

მოგესალმებით, გარდაბნელებო! დღეს, საქართველოში, ეს ერთ-ერთი გამორჩეული მუნიციპალიტეტი და კუთხეა. პირველ რიგში, თქვენი შრომით მიაღწიეთ იმას, რომ გარდაბანში ბევრი რამ იცვლება. ყველა უნდა შევთანხმდეთ, რომ ჩვენი ეთნიკური მრავალფეროვნება, ჩვენი სიძლიერეა. ეს არის შეთანხმება, რომელსაც ყველამ უნდა მივაღწიოთ და ამის შემდეგ უნდა ვიზრუნოთ, გავიხედოთ წინ, როგორ უნდა ავაშენოთ ეს ქვეყანა ერთად. მარტივ მაგალითებს მოვიყვან. გარდაბანი, სოფლის მეურნეობის თვალსაზრისით,  ერთ-ერთი ძლიერი მუნიციპალიტეტია, რომელიც ფაქტობრივად ამარაგებს არა მხოლოდ თბილისს, არამედ ქვეყნის სასოფლო-სამეურნეო ექსპორტშიც სერიოზული წვლილი შეაქვს. დღეს უნდა გავიხსენო, რომ ზუსტად 2013 წელს ქვეყნის სასოფლო-სამეურნეო პროდუქციის ექსპორტი 511 მილიონი დოლარი იყო, 2019 წელს, 900 მილიონამდე ავიდა - ფაქტობრივად გავაორმაგეთ. ეს ჩვენი ყველას ერთობლივი და პირველ რიგში, თქვენი დამსახურებაა. ყველას კარგად უნდა გვახსოვდეს, რომ გარდაბანში, 2012 წლის შემდეგ 2 უმსხვილესი თბოელექტროსადგური აშენდა, რომლის დადგმული სიმძლავრე 461 მგვტ-ია, რაც 410 მილიონი დოლარი დაჯდა. ეს ნიშნავს იმას, რომ გარდაბნის ბიუჯეტს ძალიან სერიოზული შემოსავალი აქვს ქონების გადასახადიდან. მე გაგახარებთ, რომ ჩვენ ვიწყებთ მე-3 თბოელექტროსადგურის მშენებლობას, რომელიც, დაახლოებით, 200 მგვტ სიმძლავრის იქნება და გარდაბნის მუნიციპალიტეტს კიდევ დაემატება შემოსავალი, რომელსაც დღევანდელი ადგილობრივი ხელისუფლება ძალიან ეფექტურად იყენებს. ეფექტურად იყენებს იმიტომ, რომ დღეს ჩვენ ვხედავთ, გარდაბანში, ძირითადი სისტემური ინფრასტრუქტურის მოწესრიგების პროცესი მიმდინარეობს, გზები მოწესრიგებულია, ძირითად სოფლებთან დამაკავშირებელი გზები მოწესრიგებულია, შიდა სასოფლო გზების მოწესრიგებაც დაწყებულია და ეს, რა თქმა უნდა, ყველამ ერთად უნდა გავიყვანოთ ბოლოში. მიუხედავად იმისა, რომ ბევრი რამ კეთდება, სერიოზული პრობლემები გვაქვს წყალმომარაგებაში, მაგრამ ეს პროცესები გრძელდება. წლების განმავლობაში, მაგალითად კუმისის წყალმომარაგება იყო პრობლემა, ეს პროცესი დაწყებულია და დასრულდება. საირიგაციო, სარწყავი წყლები არის ნაწილობრივ პრობლემა და ესეც დაწყებულია და უნდა გავაკეთოთ. არავინ ამბობს, რომ ჩვენ ვართ შეუცდომლები, მაგრამ ჩვენ რასაც ვამბობთ, იმას ვაკეთებთ. ყველაზე კარგად ვიცით, რა უჭირს ჩვენს თითოეულ მოქალაქეს, თითოეულ რეგიონში, ქალაქში, დაბაში, მუნიციპალიტეტში და სოფელში. ზუსტი გეგმა გვაქვს, რა უნდა გავაკეთოთ. არ ვამბობთ იმას, რომ პრობლემები არ არის. არის პრობლემები, მაგრამ გუნდია, რომელმაც ეს პრობლემები იცის, სად არის და როგორ უნდა აღმოფხვრას. ეს არის, რაზეც ჩვენ უნდა შევთანხმდეთ და უნდა ვიცოდეთ, რომ ქვეყანა დღეს არის ბევრად უფრო უკეთესი, ვიდრე იყო გუშინ. ყველამ ერთად უნდა ვიშრომოთ, რომ ჩვენი ხვალინდელი დღე იყოს კიდევ უკეთესი, ვიდრე დღეს. ეს შრომა, პირველ რიგში, მიმართული უნდა იყოს იმისკენ, რომ ჩვენს ბავშვებს მივცეთ უკეთესი განათლება და გავატაროთ სისტემური რეფორმა განათლებაში. ჩვენი მოხუცები და პენსიონერები იყვნენ უფრო დაფასებულები. ჩვენს ახალგაზრდებს შეეძლოთ და სახელმწიფომ შეუქმნას პირობები, რომ თვითრეალიზებით არჩინონ თავიანთი ოჯახები და ხვალინდელი დღე გახადონ უკეთესი, ვიდრე იყო დღევანდელი. ეს არის ჩვენი ძირითადი პრინციპი  და თქვენ ყველანი კარგად ხედავთ, რომ გზები, ის სისტემური ინფრასტრუქტურა, რომელიც საბაზისოა - გზა, წყალი, გაზი - ეს ყველაფერი დღითიდღე კეთდება და ყოველდღე არის უკეთესი, ვიდრე იყო გუშინ. რა თქმა უნდა, დახმარება სჭირდება ჩვენს გლეხს, რომელიც უნდა გახდეს ძლიერი ფერმერი. ჩვენ უკვე გავაკეთეთ სახელმწიფო პროგრამები, რომლებიც აძლევს თითოეულ მოქალაქეს შესაძლებლობას, რომ თუ მას უნდა, დაიწყოს ბიზნესი, ამის შესაძლებლობა უნდა ჰქონდეს. სახელმწიფომ უნდა შეუქმნას ყველა პირობა, რომ მან ბიზნესში პირველი ნაბიჯი გადადგას და თავისი საქმე დაიწყოს. ამისთვის ჩვენ გავაკეთეთ პროგრამა - „სახელმწიფო - შენი პარტნიორი“, აღარ მოგიწევთ თბილისში ჩასვლა, აქ, გარდაბანში, იუსტიციის სახლში შეძლებთ, მიიღოთ ყველა ის მომსახურება, რომლისთვისაც უნდა ჩასულიყავით თბილისში, გევლოთ ეკონომიკისა და სოფლის მეურნეობის სამინისტროებში, ტურიზმის ეროვნულ ადმინისტრაციაში. ვისაც აქვს ინიციატივა, იცოდეთ, რომ სახელმწიფო დაგიდგებათ გვერდით და ყოველთვის შექმნის თანაბარ და სამართლიან პირობებს ყველასთვის. სამართლიანობა არის ჩვენი ყველაზე დიდი მიღწევა და ამ სამართლიანობისთვის ჩვენ უნდა გავაგრძელოთ ბრძოლა. ამიტომ, ძალიან მნიშვნელოვანია, როგორი ადამიანი წარმოადგენს თქვენს ხმას საქართველოს პარლამენტში და ზაურ დარგალი არის ის ადამიანი, რომელსაც ყველაზე ღირსეულად შეუძლია წარმოადგინოს თქვენი ხმა პარლამენტში. დარწმუნებული ვარ, რომ უახლოეს პერიოდში, არჩევნების დღეს, ჩვენ ყველანი გავიმარჯვებთ, მაგრამ უნდა გავიმარჯვოთ სამართლიანად, ყველამ ერთად და ისე, რომ საერთოდ საუბარიც არ იყოს მეორე ტურზე. გამარჯვებას გისურვებთ!

ქალბატონებო და ბატონებო, მოგესალმებით, მივესალმები საქართველოს პრემიერ-მინისტრ ბატონ გიორგი გახარიას, პარლამენტის თავმჯდომარე ბატონ არჩილ თალაკვაძეს, მთავრობისა და პარლამენტის წევრებს, სასულიერო პირებს. მინდა, ყველას მადლობა მოგახსენოთ დღეს აქ მობრძანებისთვის. გარდაბანი საქართველოს ერთ-ერთი უმნიშვნელოვანესი და გამორჩეული ადგილია. თქვენ საქართველოს გამორჩეული მოქალაქეები ხართ, მოქალაქეები, რომლებიც თქვენი ყოველდღიური შრომით აძლიერებთ საქართველოს და ჩვენი ქვეყნის წარმატებაში უდიდესი წვლილი შეგაქვთ. „ქართული ოცნება“ თქვენთან ერთად კიდევ ერთი გამარჯვებისთვის ემზადება. ჩვენმა ერთობამ, ჩვენმა ერთობლივმა ბრძოლამ, ბიძინა ივანიშვილის ხელმძღვანელობით, ხელისუფლებას დამნაშავე, ძალადობრივი რეჟიმი ჩამოაშორა. რეჟიმი, რომელიც ამცირებდა, კლავდა, ატერორებდა ადამიანებს და უპასუხისმგებლო, დანაშაულებრივი ნაბიჯებით ჩვენი ქვეყანა ჩიხში შეყავდა, რაც ძალიან მტკივნეული იყო ჩვენი ქვეყნის თითოეული მოქალაქისთვის. „ქართულმა ოცნებამ“ ყველა მიმართულებით მნიშვნელოვანი რეფორმა განახორციელა. განათლება და ჯანდაცვა ყველასთვის ხელმისაწვდომი გახდა, ადამიანებს სამართლიანობის განცდა დაუბრუნდათ და დღეს, ყველა მოქალაქეს შეუძლია, სახელმწიფოს დახმარებით, საკუთარი ოჯახი და საკუთარი რეგიონი ეკონომიკურად გააძლიეროს. გაიხსნა უამრავი საწარმო, გაიზარდა მეურნეობების რაოდენობა და მოქალაქეს მისი პროდუქციის რეალიზაციის პრობლემა აღარ უდგას. ასევე სოფლის მეურნეობის მიმართულებით, სადაც ძალიან ბევრი პროგრამა იქნა განხორციელებული და ადამიანებს მიეცა შესაძლებლობა, ესარგებლათ სხვადასხვა პროგრამით, რომელიც სახელმწიფოს მხარდაჭერით დღესაც წარმატებით ფუნქციონირებს. ჩვენ გვაქვს მომავლის სწორი ხედვა და გამარჯვების რწმენა, რწმენა, რომ ჩვენი ქვეყანა გლობალური პანდემიით გამოწვეული კრიზისის მიუხედავად, წარმატებული იქნება და თქვენთან ერთად ყველა გამოწვევას ნაბიჯ-ნაბიჯ, ეტაპობრივად აუცილებლად გავუმკლავდებით. დღეს ჩვენ აქ შევიკრიბეთ იმისთვის, რომ წარმოგიდგინოთ ადამიანი, რომელიც იქნება თქვენი წარმომადგენელი, თქვენი ხმა საქართველოს უმაღლეს საკანონმდებლო ორგანოში. მას ჭირდება თქვენი მხარდაჭერა, თქვენი თანადგომა და მე დარწმუნებული ვარ, ჩვენ ერთიანი ძალისხმევით აუცილებლად გავიმარჯვებთ და ეს არ იქნება მხოლოდ პარტია „ქართული ოცნება-დემოკრატიული საქართველოს“ გამარჯვება, ეს იქნება სრულიად ჩვენი ქვეყნის გამარჯვება.

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა გარდაბნის მოსახლეობას მაჟორიტარი დეპუტატობის კანდიდატი, ზაურ დარგალი წარუდგინეს

საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე, პარლამენტის თავმჯდომარე არჩილ თალაკვაძე და მარნეულისა და გარდაბნის მაჟორიტარი დეპუტატობის კანდიდატი ზაურ დარგალი, გარდაბანში მცხოვრებ სტუდენტ ანა ონიანს შეხვდნენ. გარდაბანში მცხოვრები აბიტურიენტი, ანა ონიანი, ეროვნული გამოცდების წარმატებით ჩაბარების შედეგად, კონსერვატორიაში 100-პროცენტიანი გრანტით ჩაირიცხა. ანა ონიანს გამოცდის ჩაბარების შემდეგ კოვიდინფექცია დაუდასტურდა, რის გამოც მან ინგლისური ენის  გამოცდა ბოქსირებულ პალატაში ჩააბარა. როგორც საგამოცდო ცენტრში, ამ შემთხვევაშიც პროცესს აკვირდებოდა ორი მეთვალყურე, სპეციალური ეკიპირებით, რაზეც დაავადებათა კონტროლისა და საზოგადოებრივი ჯანმრთელობის ეროვნული ცენტრის სპეციალისტებმა იზრუნეს. აბიტურიენტმა, სხვა აბიტურიენტების მსგავსად, გამოცდის დღეს, იმავე დროში და იმავე პრინციპით წერა იგივე ტესტი.

მოგესალმებით, ძვირფასო მარნეულელებო! მოგესალმებით, ძვირფასო მეგობრებო! ბატონებო და ქალბატონებო! აქედან მივესალმები მთელს გარდაბანს! მოხარული ვარ, რომ დღეს საშუალება მეძლევა საქართველოზე შეყვარებული ამდენი ადამიანის წინაშე ვიმყოფებოდე. ჩემთვის განსაკუთრებით საამაყოა, რომ ვარ იმ მუნიციპალიტეტიდან, სადაც სხვადასხვა ერები, რელიგიური აღმსარებლობის მქონე ადამიანები თანაცხოვრების,  ურთიერთსიყვარულის ისტორიულ მაგალითს ქმნიან. მე ამ მუნიციპალიტეტის შვილი ვარ. აქ დავიბადე, აქ გავიზარდე, აქ ცხოვრობენ ჩემი მშობლები, აქ იზრდებიან ჩემი ბავშვები და ჩემთვის განსაკუთრებით მნიშვნელოვანია ჩემი მუნიციპალიტეტის განვითარება.  მე უდიდეს პასუხისმგებლობას ვგრძნობ, თითოეული თქვენგანის წინაშე, რომ ვიყო თქვენი ხმა საქართველოს პარლამენტში. ჩვენ ყველაფერი უნდა გავაკეთოთ იმისთვის, რომ ის სიკეთეები, რომელსაც ჩვენი მთავრობა ახორციელებს მთელი საქართველოს მასშტაბით, მივიდეს თითოეულ ოჯახთან, რომ თითოეულმა ოჯახმა იგრძნოს ეს პროგრესი და განვითარება, რომელსაც „ქართული ოცნება“ ნაბიჯ-ნაბიჯ ქმნის ჩვენს ქვეყანაში.  მსურს მადლობა გადავუხადო პარტიის ლიდერს, ბატონ ბიძინა ივანიშვილს, პარტიის ერთიან გუნდს, რომ 1 წლის წინ მე საშუალება მქონდა კენჭი მეყარა მერის არჩევნებში. ზუსტად 1 წელი გავიდა და მე დღეს მაქვს საშუალება და უდიდესი პასუხისმგებლობა დამეკისრა, ვიყო თქვენი ხმა პარლამენტში.  მერწმუნეთ, მეგობრებო, რომ  არა თქვენი უანგარო მხარდაჭერა, თქვენი ნდობა, რომელსაც ამ ერთი წლის განმავლობაში ყოველდღიურად ვგრძნობდი, ასევე, ჩემი უდიდესი სურვილი, რომ ჩვენი რეგიონი გავითარდეს და, რაც ყველაზე მთავარია, ჩვენი გუნდის ღირებულება, მე არასდროს ვიფიქრებდი ამ პასუხისმგებლობის აღებაზე.  ჩვენ ერთმანეთს ვაძლიერებთ და სწორედ ამიტომ, სიამაყით შემიძლია ვთქვა, რომ ამ ერთი წლის მანძილზე ჩვენ ერთად, ერთმანეთის გვერდში დგომით, ძალიან ბევრი სირთულე დავძლიეთ. განვახორციელეთ და დავგეგმეთ ბევრი  მნიშვნელოვანი და ინოვაციური  პროექტი, რომელიც ჩვენი მუნიციპალიტეტის განვითარებისკენ იყო მიმართული.   ყოველივე ამის გათვალისწინებით, მზად ვარ კვლავ ვემსახურო მარნეულისა და გარდაბნის მუნიციპალიტეტებს, ამჯერად უკვე მაჟორიტარი დეპუტატის პოსტიდან,  რომ გავხდე თითოეული თქვენგანის ღირსეული ხმა პარლამენტში. „ქართული ოცნების“ სახელისუფლებო გუნდი ყველაფერს აკეთებს 2012 წლიდან იმისათვის, რომ მარნეულსა და გარდაბანში  პროგრესი არ შენელდეს. ჩვენ გვაქვს ძალიან ბევრი მნიშვნელოვანი პროექტი დაგეგმილი ჩვენი რეგიონისთვის.   ჩვენ განვახორციელეთ ისეთი ისტორიული პროექტები, რომლებიც ვერცერთი მთავრობისა და ხელისუფლების პირობებში ვერ მოხერხდა. განსაკუთრებით მინდა აღვნიშნო, რომ ჩვენ მივიყვანეთ გზები ისეთ სოფლებში, სადაც  ისტორიულად არასდროს ყოფილა გზა.  მივიყვანეთ წყალი ისეთ სოფლებში, სადაც არასოდეს ჰქონიათ სასმელი წყალი.  მარტო წელს მარნეულში 8 ახალი სკოლა შენდება და ამ სიაში ჩვენ ვართ ლიდერები საქართველოს მასშტაბით. გარდაბანში აშენდა ათეულობით ახალი საბავშვო ბაღი.  ეს ყველაფერი მხოლოდ და მხოლოდ სახელისუფლებო გუნდის ეფექტიანობასა და პროფესინალიზმზე მეტყველებს. თუმცა კარგად გვესმის, რომ ჩვენ წინაშე კიდევ უფრო დიდი გამოწვევები დგას, რომელიც ერთად უნდა დავძლიოთ.  მეგობრებო, ჩვენ ერთად დგომით ყველაფერს შევძლებთ! ჩვენ გავიმარჯვებთ  მარნეულში,  ჩვენ გავიმარჯვებთ გარდაბანში, ჩვენ გავიმარჯვებთ მთლიანად საქართველოში! ერთად ჩვენი სამშობლოს წარმატებისთვის!

დღეს ჩვენ ვდგავართ დიდი ისტორიის წინაშე და ეს დიდი ისტორია დიდ პასუხისმგებლობას გვაკისრებს. აქ არის მაგალითი, თუ რას ნიშნავს მოქალაქეობა, რას ნიშნავს სახელმწიფო და როგორ ესმის თითოეულ ჩვენს თანამოქალაქეს მარნეულსა და გარდაბანში თავისი სახელმწიფო და თავისი სამშობლო. ჩვენ დღეს შევიკრიბეთ, რათა ერთად შევაჯამოთ, თუ რისი გაკეთება შევძელით ამ წლების განმავლობაში და ასევე ვისაუბროთ უფრო მეტი მომავალთან დაკავშირებით - რისი გაკეთება შეგვიძლია ჩვენ ერთად ხვალ. თქვენი მხარდაჭერით, „ქართულმა ოცნებამ“ ყველაზე უკეთ მოახერხა მშვიდობის და სტაბილურობის დაცვა. ეს არის ქვეყნის განვითარების და მომავლის ფუნდამენტური პირობა. „ქართულმა ოცნებამ“ ყველაზე უკეთ შეძლო ადამიანის ჯანმრთელობაზე ზრუნვა, ადამიანის უფლებების დაცვა და მძიმე დღეებმა, რომელიც ერთად გამოვიარეთ, გლობალური პანდემიის პირობებში, კიდევ ერთხელ დაგვანახა, რომ ქვეყანას ჰყავს ძალიან ღირსეული მოქალაქეები, მათ შორის, მარნეულში. ქვეყანას ჰყავს ძალიან ღირსეული და ეფექტური ხელისუფლება. პრემიერ-მინისტრ გიორგი გახარიას ხელმძღვანელობით ჩვენ ერთად შევძელით, ხელისუფლებამ და საზოგადოებამ, შეგვეკავებინა ვირუსის ფართოდ გავრცელება და დღეს ჩვენი ქვეყანა ატარებს დემოკრატიულ არჩევნებს, დღეს ჩვენ ვსაუბრობთ მომავალზე, დღეს ჩვენ გვაქვს გეგმები და დღეს ჩვენ გვაქვს ქვეყანაში სტაბილური ვითარება. ზუსტად ეს არის იმის დამსახურება, რომ ამ წლების განმავლობაში ჩვენ ერთად შევქმენით დემოკრატიული სახელმწიფო, ძლიერი ინსტიტუტები და ამავე დროს, შევძელით, რომ ერთად ვყოფილიყავით გამოწვევებსა თუ პროგრესში. მე იმედს ვიტოვებ, რომ მომავალშიც ასე გაგრძელდება. ჩვენ გვაქვს გეგმები, ისაუბრა პრემიერ-მინისტრმა - განათლების სფეროში, რეფორმები, დაფინანსების ზრდა, ბიზნესის ხელშეწყობა, ფერმერთა დახმარება. მთელი რიგი პროგრამები, რომლებიც მოიტანს ახალ სამუშაო ადგილებს, მოიტანს ახალ ეკონომიკას ოჯახებისთვის, გააძლიერებს ჩვენს ქვეყანას და თითოეულს მისცემს თავისი პოტენციალის რეალიზების საშუალებას. მე მინდა განსაკუთრებული აქცენტი გავაკეთო ახალგაზრდებთან დაკავშირებით: დარწმუნებული ვარ, რომ ზაურ დარგალთან ერთად, ჩემს მეგობრებთან ერთად, თქვენთან ერთად, ჩვენ შევძლებთ რომ უფრო მეტი კარი გავუღოთ ახალგაზრდებს, ჩვენ შევძლებთ, რომ თქვენს შვილებს მივცეთ უფრო მეტი შესაძლებლობა, მათ შორის, სახელმწიფო სამსახურში. ორიოდ სიტყვით მინდა ვთქვა ზაურ დარგალთან დაკავშირებით. ახალგაზრდა, განათლებული კაცი. თქვენ ჩემზე კარგად იცნობთ მას, თუმცა, მე მინდა დავახასიათო ის, როგორც ძალიან ეფექტური და პროგრესული საჯარო მოხელე. ვფიქრობ, ამ მძიმე დღეებში, რომელიც ერთად გამოვიარეთ, ზაურმა დაამტკიცა, რომ ის თავისი ქალაქის ღირსეული მერია. მან გაამართლა თავისი არჩევანი და მე დარწმუნებული ვარ, ახლაც, საპარლამენტო არჩევნებში გამარჯვების შემდეგაც, ის გაამართლებს თავის არჩევანს. მინდა გავიხსენო რამდენიმე მნიშვნელოვანი მომენტი მისი სამუშაო გამოცდილებიდან. 2010, 2011 და 2012 წლებში ჩვენ ერთად ვიმუშავეთ დემოკრატიული მმართველობის პროგრამაში, რომელიც ამერიკის მთავრობის მიერ იყო მხარდაჭერილი. ეს იყო წლები, როდესაც განსხვავებული აზრი იდევნებოდა. როდესაც პოლიტიკურ პარტიებს არ ჰქონდათ საშუალება, ელემენტარულად, ხალხთან მისულიყვნენ. ზუსტად იმ წლებში, ზაურთან ერთად, ჩვენ შევქმენით დემოკრატიული ჩართულობის ცენტრები, სადაც თითოეულ მოქალაქეს შეეძლო კითხვების დასმა, კრიტიკული მოსაზრების გამოთქმა, შევქმენით ერთად თავისუფლების კუნძულები და ზაურ დარგალი იყო საქართველოში 20 საუკეთესო თანამშრომელს შორის, რომელიც ჩვენ ჩვენს ამერიკელ პარტნიორებთან ერთად შევარჩიეთ. ეს იყო ძალიან მნიშვნელოვანი წლები. შემთხვევით არ ვამბობ. ძალიან პრინციპული და ძალიან კრიტიკული იყო მაშინ მუშაობა იმ პროგრამაში, სადაც ზაური მუშაობდა, იმიტომ, რომ იყო ძალიან დიდი წნეხი, დიდი ზეწოლა თავისუფალ აზრზე და დემოკრატიაზე, საერთო ჯამში. მაგრამ მან წარმატებით იმუშავა. შემდეგ ის იყო საჯარო სამსახურში, შემდეგ იყო არჩეული მერი და დღეს, მე ვფიქრობ, მას აქვს სრული შესაძლებლობა, რომ იყოს წარმატებული პარლამენტარი და თქვენი მაჟორიტარი. ახალგაზრდა, ენერგიული კაცია, მას აქვს მთელი გუნდის მხარდაჭერა - საპარლამენტო, სამთავრობო გუნდის, მას აქვს უშუალო კომუნიკაცია ჩვენთან და მას აქვს ყველა უნარი და შესაძლებლობა, რომ ყველაზე საჭირო პროექტები დაამუშაოს, მოიტანოს და გადაწყვიტოს. მე ვფიქრობ, ზუსტად ეს არის ის უპირატესობა, რისთვისაც, ზაურ დარგალი, ვფიქრობ, თქვენი საუკეთესო არჩევანი იქნება ამ საპარლამენტო არჩევნებში. ერთად გავიმარჯვებთ, ერთად გავაგრძელებთ საქმის კეთებას! ერთად საქართველოს წარმატებისთვის!

მოგესალმებით, მარნეულელებო! პირველი, რაზეც ყველანი ვთანხმდებით არის ის, რომ ჩვენი ეთნიკური მრავალფეროვნება ჩვენი სიძლიერეა. ეს არის ის, საიდანაც უნდა დავიწყოთ ყოველდღიური შრომა ამ ქვეყნის, ჩვენი სამშობლოს გასაძლიერებლად. ეს ჩვენ ყველას გვაერთიანებს. ვილაპარაკოთ მომავალზე, არ ვისაუბროთ გუშინდელ დღეზე. მარნეული არის საქართველოს ყველაზე განვითარებული რეგიონი სოფლის მეურნეობის მიმართულებით. მარტივ ციფრებს მოგიყვანთ - 2013 წელს საქართველოდან ექსპორტირებული იყო 511 მლნ დოლარის ღირებულების სოფლის მეურნეობის პროდუქტი, 2019 წელს - 900 მლნ დოლარის. სხვაობა თითქმის ორჯერ მეტია. ეს ამ კუთხის შვილების დამსახურებაც არის. სახელმწიფო, როგორც დაპირდა თითოეულ მოქალაქეს, სოფლის მეურნეობის მხარდაჭერას გააგრძელებს. სოფლის მეურნეობის ბევრი პროგრამაა, რომელიც აძლევს გლეხს შესაძლებლობას, გახდეს ფერმერი, თან ძლიერი. ისიც უნდა გავითვალისწინოთ, რომ მიუხედავად იმისა, რომ მარნეული თბილისთან ახლოს არის, ბევრი ქალაქია, რომელიც თბილისიდან შორს არის და გლეხს, ფერმერს უწევდა ჩასულიყო თბილისში, მიეღო იქ რაღაც პროგრამებში მონაწილეობა, მისულიყო ერთ სამინისტროში, მეორეში, მესამეში, დღეს ეს ყველაფერი იქნება მარნეულში. იუსტიციის სახლში მიხვალთ, ყველა სახელმწიფო პროგრამა ეკონომიკის სამინისტროს, ტურიზმის ეროვნული ადმინისტრაციის, სოფლის მეურნეობის სამინისტროსი - ყველაფერი გაქვთ ადგილზე. იუსტიციის სახლში ყველა ადამიანი მოგემსახურებათ ისე, რომ თავიდან ბოლომდე, მთელ პროცესს გაივლით, თუნდაც კონტრაქტის ხელმოწერამდე, იმისთვის, რომ თითოეულ  ადამიანს, ვისაც შეუძლია, თავის თავზე აიღოს პასუხისმგებლობა, დაიწყოს ბიზნესი, გარისკოს, სახელმწიფო მიეხმაროს. ეს ძალიან მნიშვნელოვანია. ეს ნიშნავს იმას, რომ მომსახურება, სახელმწიფო სერვისები თბილისში არ რჩება, მიდის თითოეულ ქალაქში, ჩვენს ყველა მოქალაქესთან, ადამიანებთან, რომლებსაც უნდათ, რომ საქმე დაიწყონ და თავის თავზე, თავის ოჯახზე, რეგიონსა და ქვეყანაზე იზრუნონ. ეს არის ძალიან მნიშვნელოვანი, ეს დაიწყო გუშინ და გაგრძელდება მუდმივად. ახლა რაც შეეხება კონკრეტულად მარნეულს. მარნეული არის ძლიერი რეგიონი, მაგრამ ინფრასტრუქტურულად ბევრი რამ არის გასაკეთებელი. დღეს ჩვენ ვნახეთ მაგალითად წყალმომარაგების და წყალარინების სისტემა. ეს არის სისტემა, რომელზე მუშაობაც დაიწყო და რომელიც ბიუჯეტიდან დაფინანსდება 200 მილიონი ლარით და მარნეულს და გარშემო სოფლებს ერთხელ და სამუდამოდ ექნება 24-საათიანი წყალმომარაგება და წყალარინების სისტემა, ისევე, როგორც ბოლნისს. მარნეულში დღეს 8 სკოლის რეკონსტრუქცია ხდება, შენდება სამი ახალი სკოლა. რა თქმა უნდა, სარწყავი წყალი მთელს ქვეყანაში არის პრობლემა და აქ, მარნეულშიც ბევრი რამ კეთდება, მაგრამ ყველამ უნდა ვიცოდეთ და შევთანხმდეთ, რომ ჩვენ არ ვამბობთ რომ ეს საკმარისია, ჩვენ ვამბობთ, რომ ეს არის სისტემურ ინფრასტრუქტურაზე ზრუნვა, რომელიც ყველამ ერთად უნდა გავაგრძელოთ და ხვალინდელი დღე უნდა გავხადოთ კიდევ უფრო უკეთესი, ვიდრე დღევანდელი დღე. ეს არის ის, რაზეც უნდა შევთანხმდეთ. ჩვენ უნდა შევთანხმდეთ იმაზე, რომ ყველამ ერთად უნდა შევქმნათ ქვეყანაში სამართლიანი პირობები ყველასთვის, იმისთვის, რომ ყველა ახალგაზრდამ მიიღოს კარგი განათლება; ჩვენ უნდა ვიზრუნოთ განათლების სიტემის რეფორმირებაზეც, რაც უკვე დაწყებულია, იმისთვის, რომ საქართველოს ყველა მოქალაქემ იცოდეს ქართული, რათა მათ შეეძლოთ განათლების მიღება საქართველოში და შემდგომ სახელმწიფო სტრუქტურებში მათი კარიერის გზა ხსნილი იყოს. ეს არის ის, რაც ჩვენ ყველამ ერთად უნდა გავაკეთოთ, ერთად უნდა ვიბრძოლოთ, ერთად უნდა გავიმარჯვოთ და დარწმუნებული ვარ, ამ არჩევნებშიც ჩვენ ერთად გავიმარჯვებთ. გამარჯვებას გისურვებთ!

ქალბატონებო და ბატონებო, მოგესალმებით, მივესალმები საქართველოს პრემიერ-მინისტრ ბატონ გიორგი გახარიას, პარლამენტის თავმჯდომარე ბატონ არჩილ თალაკვაძეს, მთავრობისა და პარლამენტის წევრებს, დამსწრე საზოგადოებას. მინდა, პირველ რიგში, ყველას მადლობა მოგახსენოთ დღეს აქ მობრძანებისთვის. მოხარული ვარ და დიდი პატივია, რომ დღეს, ძალიან შრომისმოყვარე, ლაღი და მაგარი ხალხის წინაშე ვიმყოფები. ხალხის, რომელიც საქართველოს აძლიერებს და ჩვენი ქვეყნის მრავალფეროვნებას განსაკუთრებულ ხიბლს სძენს. თქვენი რეგიონი გამორჩეულია ნაყოფიერი მიწებით და რაც მთავარია, ძვირფასი, მშომელი ადამიანებით. მოგმართავთ ამ დიდებულ მიწაზე მცხოვრებ საქართველოს მოქალაქეებს. მარნეული და მთლიანად ეს მხარე არის ყველაზე ნათელი დასტური, თუ როგორ შეუძლიათ კავკასიელ ხალხებს ერთმანეთის თანადგომით, ურთიერთსიყვარულით და საუკუნოვანი მეგობრობით შექმნან შრომისა და წარმატების მაგალითი. მარნეული ერთ-ერთი ყველაზე ძლიერი და მდიდარი ქალაქია ამ მხარეში და ეს თქვენი, ამ რაიონის მკვიდრების დამსახურებაა. ეს არის ადგილი სადაც ყველა ერთად, მეგობრულად ცხოვრობს, ემსახურება თავისი რაიონის ინტერესებს და ეთნიკური, რელიგიური, თუ ნებისმიერი  განსხვავებები მხოლოდ ეხმარება და ავსებს აქაურობას სილამაზით და კულტურული მრავალფეროვნებით. საქართველო ჩვენი ყველას საერთო სამშობლოა და მინდა მადლობა გითხრათ თითოეულ თქვენთაგანს, რომ ამ თავდაუზოგავი შრომით ქმნით მარნეულის წარმატებას, რაც ნიშნავს, საქართველოს საერთო წარმატებაში მნიშვნელოვანი წვლილის შეტანას. „ქართული ოცნების“ ხელისუფლებაში მოსვლის დღიდან, რეგიონებს განსაკუთრებული ყურადღება ექცევა, რაც თუნდაც იმაში გამოიხატება, რომ სოფლის მეურნეობის განვითარებაში კოლოსალური თანხები ჩაიდო, ამოქმედდა სხვადასხვა სახელმწიფო პროგრამა და ეს პროგრამები ძალიან ბევრმა ადამიანმა საკუთარი ბიზნესის განვითარებისთვის, ადამიანების დასაქმებისთვის გამოიყენა. მარნეულმა და გარდაბანმა საკუთარ თავზე გამოსცადა, თუ რას ნიშნავს ჰყავდეს მზრუნველი, ეფექტური მთავრობა და ადგილობრივი ხელისუფლება. თქვენს რეგიონში გლობალური პანდემიის, კოვიდ-19-ის გავრცელების საფრთხე ძალიან მაღალი იყო. ჩვენ ყველას გვახსოვს, რომ როდესაც ჩაიკეტა მარნეული და რამდენიმე სოფელი, იყო ძალიან ვნებათაღელვა და უკმაყოფილება და ჩვენ ყველას ძალიან კარგად გვესმის ეს ყველაფერი, მაგრამ ის ადამიანები, ვინც იმ დღეებში უკმაყოფილებას გამოხატავდა, კრიტიკულად იყო განწყობილი, დღეს მადლობას გვეუბნებიან, იმიტომ რომ ყველამ კარგად დაინახა და მიხვდა, თუ რამდენად მნიშვნელოვანია ჩვენი ხელისუფლებისთვის ადამიანის, ადამიანის სიცოცხლე და ჯანმრთელობის უსაფრთხოება. მინდა, ყველას ჯანმრთელობა გისურვოთ. კრიზისის პირობებში კარგად გამოჩნდა, რომ თქვენს გვერდით არიან ძალიან ენერგიული, აქტიური, პატრიოტი ადამიანები, რომლებიც 24 საათი შრომობდნენ, რათა რეგიონს ზიანი მაქსიმალურად არიდებოდა. როდესაც ჩვენ ვსაუბრობთ წინგადადგმულ ნაბიჯებზე, განხორციელებულ პროექტებზე, ეს რა თქმა უნდა, კარგია, მაგრამ თვალი უნდა გავუსწოროთ რეალობას და უნდა ვისაუბროთ იმაზეც, რომ არის პრობლემები, გამოწვევები და ეს ყველაფერი ერთად უნდა დავძლიოთ. ეს მხოლოდ და მხოლოდ ერთიანი ძალისხმევითაა შესაძლებელი. მე დარწმუნებული ვარ, თქვენი მხარდაჭერითა და თანადგომით აუცილებლად გავიმარჯვებთ მომავალ საპარლამენტო არჩევნებში.

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა მარნეულის მოსახლეობას მაჟორიტარი დეპუტატობის კანდიდატი, ზაურ დარგალი წარუდგინეს