პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ქარელის მოსახლეობას მაჟორიტარი დეპუტატობის კანდიდატი ზაალ (ზაზა) დუგლაძე წარუდგინეს. 

ძამას ხეობაში აქტიურად მიმდინარეობს ადგილობრივი მნიშვნელობის ყინწვისი-გვერძინეთი-ტყემლოვანის 16 კმ-მდე საავტომობილო გზის სარეაბილიტაციო სამუშაოები, რომლის დასრულებაც სექტემბრის ბოლოს იგეგმება. სამუშაოებს ადგილზე გაეცნენ საქართველოს პრემიერ-მინისტრი გიორგი გახარია, „ქართული ოცნების“ გენერალური მდივანი კახა კალაძე და ხაშური-ქარელის საარჩევნო ოლქში „ქართული ოცნების“ მაჟორიტარი დეპუტატობის კანდიდატი ზაზა დუგლაძე. მდინარე ძამაზე ახალი სახიდე გადასასვლელი, საყრდენი კედლები და სხვა შესაბამისი ინფრასტრუქტურა შენდება. სამუშაოებზე დასაქმებულია 100-ზე მეტი ადამიანი, მათ შორის, ადგილობრივი მცხოვრებლები.

ჩემთვის ძალიან დიდი პატივია დღეს ვიყო აქ, თქვენთან ერთად და მომავალში მქონდეს საშუალება წარმოვადგენდე პარლამენტში ამ უმნიშვნელოვანეს ქალაქს, რა თქმა უნდა გორთან ერთად.  არ მოგატყუებთ და გეტყვით, რომ  ორი წლის წინ დაწყებული საქმიანობა მხარის გუბერნატორის პოზიციაზე ჩემთვის გამოჩეული იყო იმით, რომ მართლაც აღმოჩენა იყო კასპის  მუნიციპალიტეტი. ნებისმიერი ცივილიზებული ერის ისტორიას დაამშვენებდა ამდენი ციხესიმაგრე, ისტორიულ-კულტურული ძეგლი, რომელიც მარტო კასპის მუნიციპალიტეტშია თავმოყრილი. ჩვენი ქვეყნის ძლიერებაზე, განათლებაზე, განვითარებაზე ყოველთვის ზრუნავდნენ აქაური თავისუფლებისმოყვარე, მშრომელი, გაუტეხელი და  პატრიოტი ადამიანები. ისეთი ადამიანები, როგორებიც იყვნენ გენერალი მაზნიაშვილი, ივანე ჯავახიშვილი, გიორგი სააკაძე, ყველასთვის, კასპელებისთვის ყველასთვის საამაყო ქართველი. თევდორე მღვდლის ისტორია, რომელიც კასპში განვითარდა,  მთელი ქვეყნისთვის სამაგალითო იყო და დარწმუნებული ვარ, რომ ამ ადამიანების კვალზე გაიზრდებიან ნამდვილი სასიქადულო და წარმატებული ქართლელი, კასპელი ადამიანები და ახალგაზრდები.  მართლაც ძალიან ბევრი რამ კეთდება კასპის მუნიციპალიტეტში.  ჩემთვის პატივი იყო, რომ  ორი წელი ამ პროექტებს აქტიურად ვადევნებდი თვალყურს, ბევრი ინიციატივაც სწორედ ჩვენი  ერთობლივი მუშაობის შედეგად იქნა შემუშავებული. უნდა ითქვას ისიც, რომ ძალიან ბევრი პროექტია, რომელიც ბოლოდმე  უნდა მივიყვანოთ. როდესაც ხვალინდელ წარმატებულ პროექტებზე ვსაუბრობთ, არ შეიძლება არ  ავღნიშნო ტექნოპარკი, პროფესიული კოლეჯი,  ახალი სტადიონი. ეს ის  პროექტებია, რომლებიც ჩემი წინამორბედის და მოქმედი მაჟორიტარის, ირაკლი მეზურნიშვილის მხარდაჭერით ხორციელდებოდა. ჩვენ ერთად, გუნდური მუშაობით შევძელით ამ პროექტების რეალიზება და საამაყოც არის, როდესაც ჩვენ განათლების აუცილებლობაზე ვსაუბრობთ, როდესაც ჩვენ ვსაუბრობთ იმაზე, რომ სოფლის მეურნეობა უნდა იყოს მხარდაჭერილი.  კასპის მუნიციპალიტეტში სოფლის მეურნეობის კუთხით მართლაც დიდი პონტენციალია. საჭიროა პროფესიონალი ადამიანები და სწორედ ესეთ პროფესიონალ ადამიანებს გადაამზადებს პროფესიული კოლეჯი. გვერდით იგივე სივრცეში იქნება ტექნოპარკი, რომელიც ნებისმიერი ინოვაციის, ნებისმიერი ასაკის ადამიანისთვის იქნება ხელმისაწვდომი და სხვადასხვა ინოვაციურ იდეებს დააფინანსებს.   რა თქმა უნდა, უნდა შევეხოთ დევნილების საკითხს და ოკუპაციას, რომელიც მართლაც  განსაკუთრებული სიმძაფრით იგრნძობა კასპსა და გორში. დავეთანხმები წინა გამომსვლელებს და გეტყვით, რომ ჩვენ ერთობით, ერთად დგომით შევძლებთ ქვეყნის დეოკუპაციას. რა თქმა უნდა, ამისთვის აუცილებელია შესაბამისი განათლება, კვალიფიკაციის მქონე  ადამიანები და შრომა, რომელიც ჩვენ ნამდვილად არ გვეზარება და პირიქით, ამისთვის ვართ მომართულები.  მომდევნო ოთხი წლის განმავლობაში აქტიურად ვიქნები ჩართული იმ პროექტების რეალიზებაში, რომელსაც სახელმწიფო სთავაზობს ჩვენი  ქვეყნის მოქალაქეებს სხვადასხვა მიმართულებით მათ შორის ტურიზმი, ეკონომიკის გაძლიერება, სოფლის მეურნეობა და აუცილებლად ერთობლივად ბევრ წარმატებულ პროექტს განვახორციელებთ.  არ დაგიმალავთ ასევე და გეტყვით, რომ კასპელი სპორტსმენები მართლაც გამორჩეული და განსაკუთრებული ადამიანები არიან, ვისაც ყოველთვის ვუცხადებდი  მხარდაჭერას და შემდგომი წლების განმავლობაშიც ვაპირებ, რომ ასე გავაგრძელო. ალბათ ამის გამოხატულებაა, რომ დღეს ჩვენ კასპში გვაქვს თანამედროვე სტანდარტების სტადიონი, რომელზეც ძალიან ბევრი ახალგზარდა აღიზრდება და რაც ყველაზე მნიშვნელოვანია, ეს არის ჯანსაღი ცხოვრების წესის პოპულარიზაცია. მე ვიცი, დარწმუნებული ვარ, რომ თქვენი გვერდზე დგომით ჩვენ ერთად ყველა გავიმარჯვებთ და ერთად ვიქნებით ყველა ფრონტზე, მათ შორის საქართველოს გამარჯვების ფრონტზე.

დიდი პატივია აქ, ჯამბაკურ-ორბელიანის სახლ-მუზეუმში ყოფნა. გარდა ამისა, ლამისყანაში საოკუპაციო ხაზიდან აქვე, ხელის გაწვდენაზე. დიდი პატივია და პასუხისმგებლობაც რა თქმა უნდა, ივანე ჯავახიშვილის სამშობლოში ყოფნა და თქვენთან საუბარი და რაც ასევე უაღრესად მნიშვნელოვანია, გიორგი მაზნიაშვილის სამშობლოში ყოფნა. შეუძლებელია, ამ გარემოში, ამ სახლ-მუზეუმში, არ გავიხსენოთ 2008 წლის აგვისტო და ის გმირი ქართველები, რომლებმაც ქვეყნის ერთიანობისთვის სიცოცხლე გაწირეს. ყველას კარგად უნდა გვესმოდეს, რომ სადაც არ უნდა ვიყოთ - კასპში, გორში, ქართლში, სამეგრელოში თუ სამცხეში, ოკუპაცია არის ჩვენი ყველაზე დიდი პრობლემა. ოკუპაცია არის, ყოველდღიურად იქნება ჩვენთვის პრობლემა, ვიდრე მას არ მოვაგვარებთ. როდესაც რუსულ ოკუპაციაზე ვსაუბრობთ, ყოველდღიურად ვშრომობთ იმისთვის, რომ ჩვენს მიერ კონტროლირებად საქართველოში ქვეყანა გავაძლიეროთ, ეკონომიკა გავხადოთ წარმატებული, ვიზრუნოთ თითოეულ ადამიანზე, გაძლიერდეს და კეთილსინდისიერად ვიმუშაოთ ჩვენი მომავლისთვის, იმისთვის, რომ ჩვენმა მოქალაქეებმა საოკუპაციო ხაზს იქით, ჩვენმა ოსმა, აფხაზმა მოქალაქეებმა, ნახონ ეს სხვაობა. ეს არის ჩვენი ყოველდღიურობის მიზანი, განსაკუთრებით მაშინ, როდესაც ჩვენ ვართ კასპში. ყველას კარგად უნდა გვესმოდეს, რომ ყოველდღე, როდესაც ვდგებით და ვიწყებთ ჩვენს სამუშაო დღეს, განსაკუთრებით კასპში, არ არსებობს არანაირი მიღწევა ან წარმატება, რომელიც არ იქნება განპირობებული ოკუპაციით. როდესაც ვსაუბრობთ ოკუპაციაზე, ეს არ არის მხოლოდ მიწა, ესენი არიან ადამიანები, რომლებიც საკუთარ სამშობლოში გახდნენ დევნილები. შეუძლებელია ჩვენ ქვეყნის გამარჯვებაზე ან წარმატებაზე ვისაუბროთ, ვიდრე ამ ქვეყანაში, საკუთარ სამშობლოში ერთი ადამიანი მაინც იქნება დევნილი. ამიტომ, წარმატებული, ძლიერი ეკონომიკა, ევროპული სახელმწიფო, სადაც ადამიანის უფლებები და ღირსება დაცულია, ეს არის ის მიზანი, რომელსაც უნდა მივაღწიოთ და ყველამ უნდა ვიცოდეთ, რომ ამ მიზანს ჩვენ მხოლოდ ჩვენთვის არ ვაღწევთ - ვაღწევთ ჩვენი აფხაზი და ოსი ძმებისთვის. ეს არის ჩვენი მიზანი და ეს არის ერთადერთი გზა, როგორ შეგვიძლია დავძლიოთ ოკუპაცია. ყველა ის საქმე, რომელიც დაგვიწყია და ერთად ბოლომდე უნდა მივიყვანოთ, აქ კასპში, მიმართულია კონკრეტული ადამიანებისთვის. ყველაფერს თავი რომ დავანებოთ, საგზაო ინფრასტრუქტურა ასე თუ ისე წესრიგშია მოყვანილი და დღეს რაიონული ცენტრიდან სოფელში შეიძლება ნორმალურად მივიდეთ, მაგრამ შიდა სოფლის გზები მოსაწესრიგებელია ბევრგან და კიდევ ბევრია სამუშაო. სასმელი წყალი ამ რეგიონში განსაკუთრებული პრობლემაა. წელს, მაგალითად, დაიწყება კასპში საირიგაციო სისტემის რეაბილიტაცია, რომელიც 1 წლის თავზე, კასპის მუნიციპალიტეტში 400 ჰა მიწის მორწყვას შესაძლებელს გახდის. კასპში დაიწყება ქარის ელექტროსადგურის მშენებლობა და ეს ხომ პირდაპირ ადგილობრივ, მუნიციპალურ ბიუჯეტში შემოსავალია, რომელიც გაძლევთ შესაძლებლობას, ეს ფული უფრო ეფექტურად დახარჯოთ. საერთოდ, ადამიანი, ფერმერი, გლეხი, იქნება სახელმწიფოს, მთავრობის ყურადღების ცენტრში, ვიდრე ის ფეხზე არ დადგება, არ გაძლიერდება და არ შეძლებს თავის მეზობელზე თუ ნათესავზე ზრუნვას. ჩვენ მოსახლეობას უნდა მივეხმაროთ, რომ ყოველდღიური ღირსეული შრომით ღირსეულად არჩინონ ოჯახი. ეს არის სახელმწიფოს ვალდებულება და ეს ინფრასტრუქტურა უნდა შევქმნათ. ჩვენ ამას ყოველდღიურად ვაკეთებთ. სახელმწიფო პროგრამებს ვთავაზობთ ადამიანს, რომელსაც სურვილი აქვს იშრომოს, იღვაწოს და შექმნას უფრო უკეთესი ხვალინდელი დღე. კასპში ბოლო 2 წლის განმავლობაში 436 ჰა ბაღები არის განახლებული პროგრამით - „დანერგე მომავალი“. ეს, რა თქმა უნდა, უნდა გაგრძელდეს და არ უნდა დარჩეს არც ერთი ძველი ბაღი. დღეს კი ვამბობთ, რომ გლეხს გვერდით დავუდგებით და არასტანდარტულ ვაშლს მივიღებთ იმისთვის, რომ ადამიანის შრომა დაფასდეს, მაგრამ გვერდზე ხომ არის თანამედროვე ბაღი, რომელიც პროგრამით - „დანერგე მომავალი“ გაკეთდა და სულ სხვა სტანდარტებისაა, მას დახმარებაც არ სჭირდება, ევროპული ბაზრისთვის გამზადებული პროდუქტია. ჩვენი ამოცანაა, ამაში მოგეხმაროთ და ყველამ ერთად უნდა ვიშრომოთ იმისთვის, რომ რაც არ უნდა გავაკეთოთ ქართლში, ყოველთვის უნდა გვახსოვდეს ის დაღუპული ბიჭები და ის ხალხი, რომელიც საოკუპაციო ხაზის მიღმაა. არ უნდა დაგვავიწყდეს, რომ ეს ოკუპაცია არ არის ერთი, გამქრალი მოვლენა. ყველამ კარგად იცით და თქვენზე უკეთესად არავინ იცის, რა ხდება - ადამიანების მოტაცება, დატყვევება, დაპატიმრება. დღესაც გვყავს 3 ქართველი, რომლებიც მძიმე დღეში არიან და რომელთაც ყოველდღიურად დახმარება სჭირდებათ. ამიტომ შრომა, კეთილსინდისიერება, ქვეყანაზე ფიქრი და რაც მთავარია, ყველამ ერთად უნდა ვიზრუნოთ იმისთვის, რომ რუსული ოკუპაცია ამ ქვეყანაში დასრულდეს მშვიდობიანად, მაგრამ ძალიან მძიმე ყოველდღიური შრომით, იმისთვის, რომ ის წარმატებები და ის ძლიერი სახელმწიფო, რომელსაც ჩვენ ერთად შევქმნით, იყოს არა მარტო ჩვენი, არამედ იყოს ჩვენი ოსი და აფხაზი ძმებისთვის. რაც შეეხება არჩევნებს, არჩევნები არის კიდევ ერთი ეტაპი, რომელმაც უნდა მოგვცეს შესაძლებლობა, გავაგრძელოთ იმ საქმის კეთება, რომელიც დაწყებული გვაქვს. გიორგი ხოჯევანიშვილი არის ამ კუთხის ღირსეული შვილი. ის რამდენიმე წელი იყო გუბერნატორი. არავინ მასზე უკეთ არ იცის კასპში, გორში, სად რა პრობლემაა. მას არჩევნების მეორე დღიდანვე შეუძლია, დაჯდეს და დაიწყოს იმ პრობლემების მოგვარება, რომელიც აქ არსებობს და დარწმუნებული ვარ, თქვენი ღირსეული ხმა იქნება საქართველოს პარლამენტში. დარწმუნებული ვარ, რომ რაც მთავარია ღირსეულ და სამართლიან ბრძოლაში გავიმარჯვებთ 31 ოქტომბერს, გამარჯვებას გისურვებთ!

ძალიან მიხარია, რომ ვიმყოფებით კასპში, მუნიციპალიტეტში, სადაც უამრავი ისტორიული და კულტურული ძეგლი გვხვდება. ამ ადგილებში ადამიანები ჯერ კიდევ ბრინჯაოს ხანაში სახლობდნენ და იმ დროიდან მოყოლებული, ჩვენმა წინაპრებმა განავითარეს და შემოგვინახეს ეს მხარე ისეთი მშვენიერი, როგორიც დღეს გვაქვს. კასპი ჩვენი ქვეყნის ეკონომიკისთვის ერთ-ერთი მნიშვნელოვანი მამოძრავებელი ძალაა. კასპში არის ბევრი მნიშვნელოვანი საწარმო, რომლის პროდუქციით მარაგდება მთლიანად საქართველო. მე მოხარული ვარ, რომ ამ დოვლათს თქვენ - მშრომელი ადამიანები ქმნით, რისთვისაც მინდა, თითოეულ თქვენგანს მადლობა გადაგიხადოთ. ჩვენი ხელისუფლების მიზანიც სწორედ ის არის, რომ ქვეყანაში, კასპის მუნიციპალიტეტში, განვითარება იყოს დინამიური და ხელშესახები. განვლილი წლების მანძილზე ქვეყანამ მნიშვნელოვანი პროგრესი  განიცადა აბსოლუტურად ყველა მიმართულებით. მდგომარეობა მკვეთრად გაუმჯობესდა ჯანდაცვის, განათლების, ეკონომიკისა და სხვა ძირეულ საკითხებში, თუნდაც სოფლის მეურნეობის მიმართულებით. ძალიან მიხარია, რომ ამ 8 წლის განმავლობაში ძალიან ბევრი პროგრამა განხორციელდა, რომლითაც ისარგებლა ჩვენი ქვეყნის მოსახლეობამ და შედეგი უკვე სახეზეა. წარმოების განვითარებაზე ზრუნვის პარალელურად, ინერგება გარემოს დაცვითი მაღალი სტანდარტები, ეს კასპისთვის მნიშვნელოვანი საკითხია და ამაზე ჩვენი ხელისუფლება ნამდვილად განსაკუთრებით ზრუნავს და მომავალშიც გააგრძელებს ზრუნვას. ამ ყველაფერთან ერთად, ბუნებრივია, გამოწვევები ჩვენს წინაშე ისევ ბევრი რჩება. რა თქმა უნდა, უმნიშვნელოვანესია, ის პრობლემური საკითხები, რომლებიც თითოეულ თქვენგანს აწუხებს. სწორედ ამიტომ, დღეს ჩვენ შევიკრიბეთ აქ იმისთვის, რომ საზოგადოებას, ადგილობრივ მოსახლეობას წარვუდგინოთ ადამიანები, რომლებიც, რა თქმა უნდა, კასპის და კასპელების ინტერესებს გაატარებენ საქართველოს უმაღლეს საკანონმდებლო ორგანოსა და ადგილობრივ თვითმმართველობაში. მინდა, ერთ რამეს ხაზი გავუსვა: 2012 წლიდან მოყოლებული, ჩვენ ძალიან ბევრი გამარჯვება მოვიპოვეთ ერთიანი ძალისხმევით და ეს ყველაფერი შესაძლებელი იყო მხოლოდ და მხოლოდ ერთად დგომით. ამჯერადაც, მე დარწმუნებული ვარ, თქვენი მხარდაჭერითა და თანადგომით ჩვენ შევძლებთ გამარჯვებას და ეს გამარჯვება შესაძლებელი იქნება პირველივე ტურში. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა კასპის მოსახლეობას მაჟორიტარი დეპუტატობის კანდიდატი გიორგი ხოჯევანიშვილი და კასპის მერობის კანდიდატი ვახტანგ მაისურაძე  წარუდგინეს.

საქართველოს პრემიერ-მინისტრმა გიორგი გახარიამ და „ქართული ოცნების“ გენერალურმა მდივანმა კახა კალაძემ, კასპის მაჟორიტარმა დეპუტატმა ირაკლი მეზურნიშვილმა და გორი-კასპის საარჩევნო ოლქში „ქართული ოცნების“ მაჟორიტარი დეპუტატობის კანდიდატ გიორგი ხოჯევანიშვილთან ერთად, კასპის ფეხბურთის ცენტრალური სტადიონი და საფეხბურთო სკოლა დაათვალიერეს. 2019 წელს კასპში ხელოვნურსაფარიანი, უეფას II დონის საფეხბურთო  ცენტრალური სტადიონი აშენდა, რომელიც 480 მაყურებელზეა გათვლილი. მოეწყო 4 გასახდელი, სამსაჯო, სამედიცინო და დელეგატთა ოთახები, დამონტაჟდა განათების თანამედროვე სისტემა, ასევე აღდგა ცენტრალური სტადიონის მიმდებარე  მინი მოედანი. სრული რეაბილიტაცია ჩაუტარდა საფეხბურთო სკოლის შენობასაც, რომელიც 250 აღსაზრდელს ემსახურება. სტადიონის და საფეხბურთო სკოლის მშენებლობა საქართველოს ფეხბურთის ფედერაციამ და რეგიონული განვითარების ფონდმა დააფინანსა.

კასპში 200 სტუდენტზე გათვლილი სამსართულიანი, სრულად ადაპტირებული პროფესიული სასწავლებელი აშენდა. შესრულებული სამუშაოები „ქართული ოცნების“ ლიდერებმა, საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ და  გორი-კასპის საარჩევნო ოლქში „ქართული ოცნების“ მაჟორიტარი დეპუტატობის კანდიდატმა გიორგი ხოჯევანიშვილმა დაათვალიერეს. თანამედროვე სტანდარტების პროფესიული სასწავლებლის საგანმანათლებლო პროგრამები რეგიონში მოთხოვნად პროფესიებს ეფუძნება და ხელს უწყობს კვალიფიციური, სერტიფიცირებული სპეციალისტების მომზადებას, რაც მათი დასაქმების გარანტია.  პროფესიული სასწავლებელი რეგიონისთვის პრიორიტეტული სოფლის მეურნეობის მიმართულებისა და მასთან დაკავშირებული დარგების - ვეტერინარიის, მექანიზაციისა და მებაღეობა-მეხილეობის სპეციალისტებს მოამზადებს. ასევე, მომზადდებიან ელექტრო შედუღების, მაღალი ძაბვის ელექტროობის, ელექტროსამონტაჟო სამუშაოები სპეციალისტები, ამწის ოპერატორ-მემანქანეები და ა.შ. სასწავლებელი ორიენტირებული იქნება ახალი ტექნოლოგიების გამოყენებაზე.

მინდა, ვისარგებლო შემთხვევით და მადლობა გადავუხადო „ქართული ოცნება-დემოკრატიული საქართველოს“ გუნდს გამოცხადებული ნდობისთვის. დარწმუნებული ვარ, რომ ამ ნდობას გავამართლებ. უნდა ითქვას, რომ გორი და შიდა ქართლი არის საქართველოს გული, ცენტრი და ლიტერატურულად „გულქართლსაც“ უწოდებენ. ეს არის მხარე, რომელსაც გაზრდილი ჰყავს ისეთი ადამიანები, ისეთი სასახელო შვილები, თუნდაც ამ ორი სახელის დასახელება, როგორიც არის იაკობ გოგებაშვილი და ივანე ჯავახიშვილი ცხადყოფს, თუ როგორი კულტურის, განათლებისა და განსაკუთრებული ქართველობის კერა იყო, არის და იქნება მომავალშიც შიდა ქართლი. უნდა ითქვას, რომ ჩვენს რეგიონში და ამ ქალაქში მართლაც ბევრია გაკეთებული და დაწყებული საქმეები ბოლომდე ისევ ჩვენი მისაყვანია. ხვალინდელი დღე კიდევ უფრო წარმატებული რომ იყოს, ჩვენ უნდა შევძლოთ ყველა გამოწვევას თვალი გავუსწოროთ, ქმედითი ნაბიჯები გადავდგათ და ამისთვის მზად ვართ. რა თქმა უნდა, ბევრი შრომაა საჭირო, მაგრამ შრომა არის ის, რაც ჩვენი ქვეყნის უკეთესი მომავლისთვის აუცილებელია. ძლიერი და განვითარებული რეგიონი არის საქართველოს ძლიერების საწინდარი და საქართველოს ძლიერებაში თავისი წვლილი ამ რეგიონმაც, გორმა და კასპმა უნდა შეიტანოს. ამ მიმართულებით შეიძლება ორი ძირითადი საკითხი გამოვყოთ - ეს არის სოფლის მეურნეობა და ტურიზმი. ჩვენი რეგიონისთვის სოფლის მეურნეობა მართლაც ერთერთი წამყვანი დარგია და ბოლო წლების განმავლობაში ვხედავთ ასობით ახალ, თანამედროვე, ერთწლიან თუ მრავალწლიან კულტურის ბაღებს, თანამედროვე ტიპის სასაწყობე და სამეურნეო მეურნეობებს. ეს არის ის, რაც ქმნის დოვლათს და აისახება ხვალინდელ დღეზე, საზოგადოების სოციალურ-ეკონომიკურ მდგომარეობაზე დადებითად და სწორედ ეს არის ჩვენი ქვეყნის ხვალინდელი დღისთვის აუცილებელი. რაც შეეხება ტურიზმს, შემიძლია გითხრათ, რომ ჩემი საქმიანობის შემდგომი 4 წლის განმავლობაში აქტიურად ვაპირებ ტურიზმის მხარდაჭერას. ახალი ტურისტული მარშრუტები, ახალი ტურისტული ლოკაციების აღმოჩენა, ციხე-სიმაგრეების რეაბილიტაცია, რელიგიური ძეგლების აღდგენა - ეს მხოლოდ მცირე ჩამონათვალია იმ საკითხების, რომლებზეც ზრუნვას შემდგომ წლებში აქტიურად ვაპირებ. ჩვენი ქვეყნისთვის უდიდეს პრობლემად და უმთავრეს გამოწვევად ოკუპაცია რჩება და ამ ოკუპაციასთან საბრძოლველად ქმედითი ნაბიჯები უნდა გადაიდგას. ამ ქმედითი ნაბიჯების გადადგმა შესაძლებელია მხოლოდ შრომით და მშვიდობიანი განვითარებით. მშვიდობას რა თქმა უნდა ალტერნატივა არ აქვს. ჩვენ მზად ვართ, რომ ჩვენს მოძმე ხალხთან, ჩვენს ოს და აფხაზ მეგობრებთან ერთად გავაგრძელოთ მშვიდობიანი თანაცხოვრება. შიდა ქართლზე როცა ვსაუბრობ, ჩემი ბოლო ორი წლის საქმიანობიდან გამომდინარე, მინდა განსაკუთრებით შევეხო ახალგაზრდებთან და სპორტსმენებთან ურთიერთობას. ახალგაზრდული ჟინი და ძალა, რომელიც ჩვენი რეგიონის ახალგაზრდებში იგრძნობა, ყოველთვის დამატებითი, დადებითი მუხტის მომცემი იყო ჩემთვის ამ ორი წლის განმავლობაში და არ დაგიმალავთ, რომ შემდეგი წლების განმავლობაში ალბათ განსაკუთრებული ყურადღებით მათზე ზრუნვით ვიქნები დაკავებული და ეს იმიტომ, რომ სწორედ ახალგაზრდა თაობაშია ჩვენი ქვეყნის მომავალი, სწორედ მათი მხარდაჭერა, განათლების უზრუნველყოფა არის ის, რაც ჩვენს ქვეყანას სამშვიდობოს გაიყვანს და საბოლოო ჯამში, ჩვენი ქვეყანა გამთლიანდება. სწორედ ამ თაობამ და ამ ახალგაზრდობამ უნდა მიიყვანოს ქვეყანა დეოკუპაციამდე, რომელიც ჩვენი, თითოეული ადამიანის ოცნებაა და რომელიც აუცილებლად ასრულდება. რაც შეეხება სპორტსმენებს, შიდა ქართლთან და განსაკუთრებით, ალბათ გორთან და კასპთან დაკავშირებით უნდა ითქვას, რომ ნამდვილი ჩემპიონების სამჭედლოა. ამის დასტური ჩვენს გვერდით მყოფი მეგობრები არიან, რომლებიც სხვადასხვა თაობის მსოფლიო, ოლიმპიური, თუ ევროპის ჩემპიონები და პრიზიორები არიან. ესენი არიან ადამიანები, რომლებმაც შექმნეს ეპოქა და მათ გვერდით იზრდებიან ახალგაზრდები, რომლებიც საქართველოს კიდევ ბევრ სიხარულს და გამაჯვებას მოუტანენ. ეჭვი არ მეპარება და აბსოლუტურად დარწმუნებული ვარ, რომ ერთად დგომით წარმატებამდე მივალთ. ბოლომდე გათვითცნობიერებული მაქვს ის პასუხისმგებლობები და ის ვალდებულებები, რაც ჩემს წინაშე აქამდე იყო და ამის შემდგომ იქნება. ამიტომ, თქვენი მხარდაჭერის იმედით, ერთად დგომით, ჩვენ შევძლებთ უფრო ძლიერ, უფრო ლამაზ, გამთლიანებულ საქართველოში ცხოვრებას და ისევ თქვენი მხარდაჭერით საშუალება მექნება, შემდგომი წლების განმავლობაში ერთად ვიზრუნოთ გორისა და კასპის კეთილდღეობისათვის.

ჩვენ ყოველთვის ვსაუბრობთ იმაზე, მომავალში ერთად რა უნდა გავაკეთოთ, თუმცა ქართლში, საქართველოს ჭეშმარიტად ისტორიულ რეგიონში, ხერხემალში, შეუძლებელია, არ გავიხსენოთ ჩვენი უახლოესი წარსულის, ისტორიის ყველაზე მძიმე და სევდიანი დღეები. წარმოუდგენელია, რომ 21-ე საუკუნეში ქართველებს მოგვიწია იარაღით ხელში, ჩვენი ტერიტორიული მთლიანობის და მიწის დაცვა, 21-ე საუკუნეში, მაგრამ, ჩვენ ეს მოგვიწია და ამან თქვენს მხრებზე გადაიარა. რა თქმა უნდა, ჩვენ უნდა გვახსოვდეს თითოეული ადამიანი, რომელმაც ამ ბრძოლაში სიცოცხლე გასწირა და ჩვენი ვალდებულებაა, გავზარდოთ ჩვენი შვილები ისე, რომ მსგავსი ტრაგედია ჩვენი ქვეყნის ისტორიაში აღარ განმეორდეს. მაგრამ, ამავდროულად, ჩვენი ვალდებულებაა, რომ პირველ რიგში ვიზრუნოთ ადამიანებზე, რომლებიც საკუთარ სამშობლოში დევნილები გახდნენ. ეს არის სახელმწიფოს ვალდებულება, მაგრამ ძალიან კარგად მესმის, რომ თქვენ, ქართლელები, გორელები ცხოვრობთ ამ ადამიანების გვერდით, თქვენს მიერ გაწვდილი ხელი არის უფრო ახლო და თქვენი და სახელმწიფოს ერთობლივი ზრუნვა ჩვენს დევნილებზე უნდა იყოს ყოველდღიური, ყოველწამიერი. ჩვენ რასაც არ უნდა ვაკეთებდეთ ამ ხალხისთვის სხვადასხვა მიმართულებით, მაგალითად, მაღალმთიანი სტატუსის მინიჭებით, რასაც მოაქვს თავისი დამატებითი სოციალური ბენეფიტები, ასევე გაზმომარაგებით, სასმელი და სარწყავი წყლით დახმარებით, საბოლოო ჯამში, როდესაც ამ ადამიანებს ელაპარაკები, ხვდები, რომ ეს ყველაფერი საჭიროა, მაგრამ არაფერია იმ ტკივილთან და იმ მიზანთან შედარებით, რასაც ქვეყნის გამთლიანება ჰქვია. ქვეყნის გამთლიანება, რომელიც შესაძლებელია მხოლოდ და მხოლოდ მშვიდობიანად და შრომით, დარწმუნებული ვარ, რომ დაიწყება აქედან - ქართლიდან. ამ გამთლიანების ერთადერთი გზა არის ყოველდღიური კეთილსინდისიერი შრომა, ამ გამთლიანების ერთადერთი გზა არის მაგალითად ისიც, რომ მიუხედავად გლობალური პანდემიისა, ქვეყანაში არც ერთი დღით არანაირი ინფრასტრუქტურული სისტემური პროექტი არ შეჩერებულა და არც უნდა შეჩერდეს. ჩვენ ყოველდღიურად უნდა ვიშრომოთ იმისთვის, რომ სულ უფრო და უფრო წარმატებულ, ევროპულ სახელმწიფოში ვიცხოვროთ. ყველას კარგად უნდა გვესმოდეს, რომ ადამიანი იყო და იქნება „ქართული ოცნების“ ზრუნვის ძირითადი საგანი. ეს უნდა იყოს ყველაზე მნიშვნელოვანი, ყოველდღიური შრომა მთავრობისა, რომელმაც ღირსეული ყოველდღიური შრომის პირობები უნდა შეუქმნას ჩვენს თითოეულ მოქალაქეს. შიდა ქართლში 2013 წლიდან მხოლოდ ინფრასტრუქტურულ პროექტებში ინვესტირებული იყო 840 მლნ ლარი. გარდა ამისა, მოგეხსენებათ აქ გაკეთდა ქარის პირველი ელექტროსადგური. ეს იყო კახა კალაძის წამოწყება, 20-მეგავატიანი ქარის ელექტროსადგური, რომლისაც, მერწმუნეთ, არავის სჯეროდა, მაგრამ ეს გაკეთდა. დღეის მდგომარეობით, აქ, შიდა ქართლში, გორში უკვე არის 2 პროექტი - „ნიქოზი“ და „ქართლი ორი“, რომლებიც 200-მლნ-იანი პროექტებია და რომლებიც უახლოეს პერიოდში განხორციელდება. გარდა ამისა, ბოლო წლების განმავლობაში გაზიფიცირების თვალსაზრისით შიდა ქართლში გაჩნდა 30 000 ახალი აბონენტი, წყალმომარაგების ნაწილშიც ბევრი პროექტი დაიწყო, თუმცა ეს არ არის საკმარისი და როდესაც ჩვენ გორში ამაზე ვსაუბრობთ, ყველას უნდა გვესმოდეს, რომ ეს არის მხოლოდ და მხოლოდ ის ელემენტარული სისტემური პირობები, რომელიც ჩვენ მოქალაქეებს უნდა შევუქმნათ. გორში, შიდა ქართლში, ჩვენი ყოველდღიური მოქმედების საბოლოო მიზანი არის, რა თქმა უნდა, ქვეყნის ტერიტორიული ერთიანობა, მაგრამ ამ მიზნის მიღწევა, უნდა შევთანხმდეთ, რომ შესაძლებელია მხოლოდ და მხოლოდ შრომით, მხოლოდ და მხოლოდ იმ გზით, რომ ქვეყანა გახდეს წარმატებული, ეკონომიკურად ძლიერი, კეთილდღეობის დონე იყოს მაღალი და ჩვენ უნდა გავხდეთ მიმზიდველი ევროპული სახელმწიფო ჩვენი ძმებისთვის. უაღრესად მძიმეა, როდესაც ხედავ შენს მოქალაქეებს ოკუპაციის ხაზის ორივე მხარეს. უაღრესად მძიმეა ის, რაც დღეს ხდება მაგალითად ახალგორში, ახალგორის მიმართულებით, სხვა მიმართულებითაც, როდესაც მდგომარეობა ჰუმანიტარული კატასტროფის დონეზეა მისული, ადამიანებს საოკუპაციო ხაზის ჰუმანიტარული მიზნებით გადაკვეთის საშუალებასაც არ აძლევენ. ეს ყველაფერი მძიმე საყურებელია და მძიმე სალაპარაკოა, თუმცა ჩვენ მომავალზე უნდა ვიფიქროთ, ეს უნდა გვახსოვდეს და უნდა ვიშრომოთ ყოველდღიურად. შიდა ქართლში შეუძლებელია მომავალზე საუბარი, თუ აქცენტი არ გავაკეთეთ სოფლის მეურნეობაზე. შემიძლია გითხრათ, რომ „აწარმოე საქართველოში“ და სოფლის მეურნეობის პროგრამებით შიდა ქართლში დაფინანსებულია 500 მილიონზე მეტის ღირებულების სხვადასხვა პროექტი. მნიშვნელოვანი და ხელშესახებია ის, რომ წელს, როდესაც მთავრობამ, სახელმწიფომ დაიწყო გლეხის მოსავლის დაბინავებაზე ზრუნვა, ეს დავიწყეთ კახეთით, ატმის მოსავლით და პირველად წელს 30 ათასი ტონა ატმის ექსპორტი განხორციელდა, მაშინ, როდესაც გვეუბნებოდნენ, რომ სოფლის მეურნეობაში გადაყრილი ფული გაქვთო, შეიძლება სოფლის მეურნეობაში განხორციელებული ინვესტიციის ეფექტიანობაზე ვიმსჯელოთ, მაგრამ საერთოდ ქართველი გლეხისა და ფერმერის დახმარების კითხვის ნიშნის ქვეშ დაყენება შეუძლებელია. წელს შიდა ქართლში ვაშლის ძალიან კარგი მოსავალი იქნება, დაახლოებით 3-ჯერ მეტი, დაახლოებით 150 ათას ტონა მოსავალს ველოდებით. რა თქმა უნდა, ჩვენი ისტორიული პოსტსაბჭოთა წარსულიდან გამომდინარე, ყველა სტანდარტული ვერ იქნება, თუმცა ისიც უნდა გვესმოდეს, რომ წელს იქნება პირველი წელი, როდესაც „დანერგე მომავლის“ პროექტებიდან 30 ათასი ტონა იქნება აბსოლუტურად კარგი პროდუქტი, რომელიც შეგვიძლია, ევროპის ბაზარზე გავიტანოთ. სხვას რა ვუყოთ? სხვა გლეხი მივატოვოთ? რა თქმა უნდა, ჩვენ ამას არ ვიზამთ და არასტანდარტული ვაშლის შესყიდვის ის პროგრამა, რომელიც იყო ინიცირებული, როდესაც მთავრობა ადგილობრივ მეწარმეს გარანტიის სახით ეხმარება, გაგრძელდება. ასევე გაგრძელდება „დანერგე მომავალი“, სოფლის მეურნეობის პროგრამები, „აწარმოე საქართველოში“, თან შიდა ქართლში მშრომელი ხალხი ხართ და ამ პროგრამების ათვისების ერთ-ერთი ყველაზე მაღალი მაჩვენებელი გვაქვს. სოფლის მეურნეობის მიმართულებით კიდევ ერთხელ ხაზგასმით უნდა აღვნიშნო, დაწყებული ატმით, გაგრძელებული ვაშლით, სამეგრელოში უკვე დაიწყო თხილი, შემდგომ იქნება რთველი, შემდგომ - ციტრუსი, ქართულ მიწაზე მოყვანილი არც ერთი კილოგრამი მოსავალი დაუბინავებელი არ დარჩება და ამის გარანტიას იძლევა ხელისუფლება. ყველას კარგად უნდა გვესმოდეს, რომ ეს ყველაფერი არის ის მინიმუმი, რითაც ჩვენ შეგვიძლია, მოქალაქეებს დავეხმაროთ. ჩვენ ეკონომიკურად ჯერ კიდევ სუსტი ქვეყანა ვართ და მთავარია, ჩვენი შეზღუდული რესურსი სამართლიანად და თანაბრად გადავანაწილოთ ჩვენი თითოეული მოქალაქისთვის. ეს არის მთავრობის ყველაზე დიდი პასუხისმგებლობა და ვალდებულება, რაც ჩვენ თქვენთან ერთად უნდა გავაკეთოთ და ქვეყნისთვის საჭირო ძალიან ბევრი ღირებული საქმე, რომელიც ერთად დავიწყეთ, ასევე ერთად უნდა დავასრულოთ. დარწმუნებული ვარ, ამას ყველანი ერთად გადავწყვეტთ 31 ოქტომბერს, დარწმუნებული ვარ, გიორგი ხოჯევანიშვილი იქნება გორელების ღირსეული ხმა საქართველოს პარლამენტში. დარწმუნებული ვარ, ყველანი ერთად გავიმარჯვებთ სამართლიან ბრძოლაში. გამარჯვებას გისურვებთ

ჩემთვის პატივია, რომ დღეს თქვენს წინაშე გამოვდივარ საქართველოს გულში, შიდა ქართლში, საქართველოს ერთ-ერთ უმნიშვნელოვანეს ქალაქში, გორში. სწორედ აქ, ამ ქალაქმა გადაიტანა საკუთარ თავზე ყველაზე მძიმე დღეები, სწორედ ამ ადგილებში შეიქმნა გმირობის, ვაჟკაცობის, თავდადებისა და ერთგულების უამრავი ისტორია, რომელზეც ჩვენი შვილები, მომავალი თაობები აღიზრდებიან. პირდაპირ ვიტყვი, რომ ქართლზე გადის ფრონტის ხაზი. აქ, გორში, ყველა იმ საერთო საქმეს, რაც ქვეყნის წინაშეა, ერთვის ის განსაკუთრებულობა, რომ თქვენ უყურებთ ომის დანატოვარს. სისხლზე და ცრემლზე გადახვეულ მავთულხლართს. ჩვენი მიწა-წყლის წაგლეჯილ ნაწილებს. ეს ქალაქი მებრძოლი და გმირი ქალაქია. თქვენ, გორის მცხოვრებლებმა ყველაზე კარგად იცით, თუ რას ნიშნავს ოკუპაცია, ეს მოუშუშებელი იარა, რომელიც ყოველდღიურად გვახსენებს თავს. კარგად იცით, რა მძიმე შედეგები შეიძლება მოყვეს პოლიტიკოსების არასწორ ნაბიჯებს. თქვენ გახსოვთ, წინა ხელისუფლებამ, რომელიც წამოეგო რუსულ პროვოკაციას, იმის ნაცვლად საკუთარი დანაშაულების გამო ხალხისთვის პატიება ეთხოვა და სახლში წასულიყო, პირიქით, რეპრესიები გააძლიერა. პირადად მე, როდესაც 2012 წელს, წინასაარჩევნო კამპანიაში ჩართული ვიყავი და ბევრ ნაცნობ ადამიანს შევხვდი, ვისთან ერთადაც, შეიძლება ითქვას, გორის მიმდებარე სოფლები ფეხით შემოვიარეთ, გვახსოვს, თუ როგორი აგრესიით შეეცადა დაგვპირისპირებოდა მაშინდელი რეჟიმი. ამან მხოლოდ და მხოლოდ განგვიმტკიცა რწმენა, რომ ეს იყო სამკვდრო-სასიცოცხლო ბრძოლა თავისუფლებისთვის, სამართლიანობისთვის და ქართველმა ხალხმა ეს ბრძოლა მოიგო და წარმატებით დაასრულა. „ქართული ოცნების“ ხელისუფლებაში მოსვლის დღიდან, ხელისუფლების ერთ-ერთი უმთავრესი მიზანი სწორედ ადამიანზე ზრუნვა, ადამიანის პატივისცემა და ყოველგვარი ჩაგვრისა და უსამართლობის დასრულება გახდა ქვეყანაში, რაშიც თქვენი როლი და წვლილი არის არის ძალიან დიდი და ამისთვის მინდა, თითოეულ მათგანს, იმათაც, ვინც დღეს აქ ვერ შეძლო მოსვლა, მადლობა გადავუხადო. ამასთან ერთად, რა თქმა უნდა, ჩვენი მთავარი მიზანი ოკუპირებული ტერიტორიების საბოლოო დეოკუპაციაა, რომელიც სწორი საგარეო პოლიტიკის წარმოებასთან ერთად, ქვეყანაში დემოკრატიის ხარისხის, ეკონომიკური მდგომარეობის გაუმჯობესებასა და განვითარებას უკავშირდება. ჩვენ ზუსტად ვიცით, რომ საოკუპაციო ხაზთან მცხოვრებ და ოკუპირებული ტერიტორიებიდან იძულებით გამოსახლებულ მოსახლეობას განსაკუთრებული ზრუნვა ესაჭიროება და ამისთვის სახელმწიფო ყველაფერს აკეთებს. ჩვენ ზუსტად ვიცით, რომ თუ ღირსეული ცხოვრების პირობები და სიამაყე არ ექნება შენს მოქალაქეს შენს ქვეყანაში, თუ საოკუპაციო ხაზს მიღმა მყოფმა ადამიანმა არ დაინახა, რომ სწორედ აქეთ არის სამართლიანობა, თავისუფლება, განვითარება და მშვიდობა, სხვანაირად გაგვიჭირდება ქვეყნის გამთლიანება. ამიტომ, ჩვენ, თქვენთან ერთად, ყველაფერი უნდა გავაკეთოთ, რომ საქართველო და მითუმეტეს ეს მხარე, იყოს განვითარებული, ეკონომიკურად ძლიერი და მიმზიდველი ყველასთვის. ჩვენ ჩვენი ყოვედლღიურობით, ჩვენი ქმედებებით უნდა შევქმნათ წარმატებების ისტორია, უნდა შევქმნათ წარმატებული გლეხები, წარმატებული სოფლები, წარმატებული რაიონები, წარმატებული ქალაქები. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა გორის მოსახლეობას მაჟორიტარი დეპუტატობის კანდიდატი, გიორგი ხოჯევანიშვილი წარუდგინეს.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ და გორისა და კასპის მაჟორიტარი დეპუტატობის კანდიდატმა გიორგი ხოჯევანიშვილმა, გორში, ბიო-დეგრადირებადი პარკების საწარმო დაათვალიერეს. კომპანია „ეკო ჯორჯია“ პირველი საწარმოა საქართველოში, რომელიც აწარმოებს ბიოპლასტიკის გრანულებს, მასალას, რომლისგანაც ბიოდეგრადირებადი პარკი მზადდება. პროდუქტი პოლიეთილენის ალტერნატივაა და სრულად შეესაბამება საქართველოს მთავრობის მიერ მიღებულ 472-ე დადგენილებას, რომელიც პოლიეთილენის პარკების მოხმარებას, იმპორტს და რეალიზებას არეგულირებს. კომპანია „ეკო ჯორჯიამ“ სახელმწიფო პროგრამის - „აწარმოე საქართველოში“ სესხის თანადაფინანსების კომპონენტით ისარგებლა. საწარმოში განხორციელებული ჯამური ინვესტიციის მოცულობამ 3 მილიონ ლარს გადააჭარბა.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ და გორისა და კასპის მაჟორიტარი დეპუტატობის კანდიდატმა გიორგი ხოჯევანიშვილმა, სოფელ კვარხეთში, ვაშლის ბაღი -  „ტირიფონის ბაღები“ დაათვალიერეს. კომპანია ქართველ მევაშლეთა შორის ამ დროისთვის ერთადერთია, ვინც GlobalGAP სერტიფიკატს ფლობს. „ტირიფონის ბაღები“ გორის მუნიციპალიტეტის სოფელ კვარხეთში 31 ჰა ფართობზე გაშენებულ ვაშლისა და მსხლის სუპერ ინტენსიურ ბაღებს ფლობს. ბაღებში, ჯამურად, ინვესტირებულია 7 მილიონ ლარზე მეტი, საიდანაც 5 მილიონ ლარამდე შეღავათიანი აგროკრედიტია. კომპანიაში მუდმივად 20-მდე თანამშრომელი, სეზონურად კი 50-მდე დასაქმებულია. 2019 წელს, კომპანიამ გარემოს დაცვისა და სოფლის მეურნეობის სამინისტროს შემნახველი და გადამამუშავებელი საწარმოების დაფინანსების პროგრამის დახმარებით, დაიწყო 1000 ტონაზე გათვლილი თანამედროვე სამაცივრე საცავის მშენებლობა, რომლის საპროექტო ღირებულება 2,1 მილიონ ლარს შეადგენს და რომლის დასრულებაც სექტემბერში იგეგმება.

დღეს ჩემთვის პატივია წარმოგიდგინოთ ორი ღირსეული ადამიანი, რომელიც იქნება თქვენი წარმომადგენელი უმაღლეს საბჭოში და საქართველოს პარლამენტში. ჩვენი ხელისუფლება, როგორც პოლიტიკის დაგეგმვის ნაწილში, ისე გადაწყვეტილებების ნაწილში ბოლომდე ისმენს თითოეული მოქალაქის სატკივარს. დღევანდელი გადაწყვეტილება, კიდევ ერთხელ მოწმობს, რომ ჩვენ არავის დავტოვებთ განსაცდელში. ქობულეთი განსაკუთრებით დაზარალდა პანდემიის დროს, როგორც ინფექციის გავრცელების ნაწილში, ასევე მეწარმეებს, ფერმერებს შეექმნათ უამრავი პრობლემა. ჩვენი ხელისუფლების მხრიდან, პრემიერ-მინისტრის ხელმძღვანელობით, ტარდება ღონისძიებები, რაც ჩვენს მოქალაქეებს გამოიყვანს ძალიან მძიმე გამოწვევიდან და ქვეყანას სამშვიდობოს გაიყვანს. მესმის, რომ არ იყო ადვილი რამდენიმე კვირის განმავლობაში ჩაკეტილ რეჟიმში ცხოვრება. თუმცა, თქვენი უდიდესი სამოქალაქო პასუხისმგებლობით და ჩვენი ერთიანობით ვფიქრობ, რომ ღირსეულად გავართვით ამ ყველაფერს თავი. მადლობა მინდა გადავუხადო ქობულეთს და ქობულეთელებს გამოჩენილი სამოქალაქო პასუხისმგებლობისთვის. აქვე, მინდა აღვნიშნო, რომ ჩვენი ხელისუფლების დროს ქობულეთში დაიწყო და ბიძგი მიეცა ახალ რეალურ პროექტებს. ქობულეთი გახდება საერთაშორისო ბრენდების ქალაქი. წინა ხელისუფლების დროს, დიადი ინვესტიციების და ფასადური აღმშენებლობის სახელით აჭარაში გაასხვისეს 4 მილიონი კვადრატი ტერიტორია. აღნიშნული მიწის ნაკვეთები დაახლოებით 1 ლარად გაიყიდა. მათ თავი ვერ შეიკავეს და 1 ლარად გაყიდეს ჩვენი გმირი წინაპრების, იუნკერების საფლავი. თუმცა, ჩვენ ამ ყველაფერს 2012 წელს, ჩვენი ლიდერის, ბატონი ბიძინა ივანიშვილის ხელმძღვანელობით, ერთხელ და სამუდამოდ დავუსვით წერტილი. ჩვენ ყველანი ვფიქრობთ აწმყოზე და, კიდევ უფრო მეტს, მომავალზე. ვფიქრობთ როგორი იქნება ხვალინდელი დღე. თუმცა, ამ ყველაფერს უნდა ანალიზი, ამ კითხვებს სჭირდება პასუხის გაცემა, რომ მომავალში არავის არ მოუვიდეს აზრად მსგავსი პრაქტიკის მობრუნება. ქობულეთს აქვს უდიდესი ტურისტული პოტენციალი. ჩვენ ვაკეთებთ ყველაფერს, რომ ქობულეთი წამყვან, წარმატებულ ტურისტულ დანიშნულებად ვაქციოთ, მაქსიმალური ხელშეწყობა ჰქონდეს ქობულეთელ გლეხს, ფერმერს, როგორც ციტრუსის რეალიზაციაში, ასევე სხვა მოსავლის რეალიზაციაში. ჩვენ გავაკეთებთ ყველაფერს, რომ გაგრძელდეს როგორც სუბსიდირების პროგრამები, ასევე მოხდეს საექსპორტო ბაზრების მაქსიმალური დივერსიფიცირება. მადლობა თქვენი გვერდში დგომისთვის. გვაქვს თქვენი მხარდაჭერის იმედი და თქვენთან ერთად, 31 ოქტომბერს ვიზეიმებთ კიდევ ერთ დიდ გამარჯვებას ქობულეთის წარმატებისთვის და საქართველოს წარმატებისთვის.     

ქობულეთი მე-19 საუკუნიდან ჩამოყალიბდა, როგორც ელიტური კურორტული ზონა, ქალაქი. რა თქმა უნდა, ახლა ტურიზმის გარეშე ქობულეთი წარმოუდგენელია ქვეყნის შიგნითაც და ქვეყნის გარეთაც. სამწუხაროდ, წელს გლობალური პანდემიის გამო დავზარალდით ყველანი, ქვეყანაც და აჭარაც, პირველ რიგში ქობულეთიც, თუმცა ჩვენ, რითაც შეგვეძლო, სწრაფად დავუდექით გვერდით, განსაკუთრებით ტურისტულ და სასტუმრო ბიზნესს. აქამდე არ მითქვამს აჭარაში, რადგან აჭარის ფარგლებშიც ქობულეთი ალბათ ყველაზე უფრო დაზარალდა, აქედან ვიტყვი, რომ უახლოეს დღეებში ჩვენ გამოვიტანთ ტურისტული ბიზნესის დახმარების ახალ პაკეტს, რომელიც გულისხმობს პროცენტის თანადაფინანსებას სახელმწიფოს მხრიდან დამატებით კიდევ 6 თვით. ეს ეხება ყველა ტურისტულ ბიზნესს, პირველ რიგში, სასტუმროებს, რომელთა ბრუნვებიც არის 20 მლნ-მდე, მაგრამ არიან ადამიანები, რომლებიც 2-3 ოთახს საოჯახო სასტუმროს პრინციპით აქირავებდნენ და აქაც მინდა დაგპირდეთ, რომ ჩვენ გუშინ, გუშინწინ გვქონდა საუბრები რეგულატორთან, ცალკეულ ბანკებთან და თითოეულ მათგანთან იქნება პერსონალური მიდგომა. ჩვენ ამას გავაკონტროლებთ, ყველაფრით დავეხმარებით ადამიანებს, რომ სესხების გადავადება მოხდეს შემდგომი სეზონის დაწყებამდე. ყველამ ერთად ვიშრომოთ, ვიზრუნოთ, ეპიდემიოლოგიებთან ერთად დავიცვათ ყველა წესი და კანონი, რათა შემდგომი სეზონი გვქონდეს ნორმალური. ჩვენ ხომ სხვებთან შედარებით უკეთ შევძელით, რომ დაგვეცვა და გავმკლავებოდით გლობალურ პანდემიას. არ უნდა ვამბობდე ამას, საამაყო ამაში არაფერია, შეიძლება, ერთის მხრივ, ეპიდემიოლოგების და ექიმების მხრივ, მაგრამ დღეს, როცა ბათუმში ვმოძრაობ და ვსეირნობ, ვხედავ, რომ საქართველოში საქართველოს მოქალაქეებს პანდემია ცოტა ხნით დაავიწყდათ. მივცეთ ახლა ახალგაზრდებს იმის შესაძლებლობა, რომ სწავლის დაწყებამდე ცოტა მოდუნდნენ და დაისვენონ, მაგრამ ყველას კარგად უნდა გვესმოდეს, რომ სექტემბრიდან ყველამ უნდა დავიცვათ ელემენტარული წესები იმისთვის, რომ პირველ რიგში გავუფრთხილდეთ ჩვენს ბავშვებსა და მოხუცებს, რა თქმა უნდა, უნდა გავუფრთხილდეთ ჩვენს ეკონომიკას. შეუძლებელია, ებრძოლო პანდემიას წარმატებით და პარალელურად არ ზრუნავდე ეკონომიკაზე. ერთთან პრობლემა მომენტალურად, იმ წუთში ქმნის მეორე პრობლემას. ჩვენ თუ ვერ დავამარცხეთ პანდემია ეფექტურად, ჩათვალეთ, რომ ეკონომიკას ვერ მოვუვლით. რაც შეეხება ეკონომიკას, ქობულეთი გარდა ტურისტული ქალაქისა, რა თქმა უნდა, სოფლის მეურნეობის თვალსაზრისითაც საკმაოდ კარგად ვითარდება. საქართველოს მთავრობა ქართველ გლეხს, ვიდრე ის ფეხზე მყარად არ დადგება და არ გახდება ძლიერი ფერმერი, არ მიატოვებს. ეს არის აბსოლუტურად გააზრებული გადაწყვეტილება, როგორი სპეკულირებაც არ უნდა იყოს ზოგიერთი ვაიოპონენტის მხრიდან. როდესაც ჩვენ ამას ვაკეთებთ, მარტივი მიზანი გვაქვს, ამ ქვეყანაში არც ერთი გოჯი მიწა არ უნდა დარჩეს დაუმუშავებელი. მადლობას ვუხდი თორნიკე რიჟვაძეს იმისთვის, რაც მან წელს გააკეტა და 1500 ჰექტარი ხელუხლებელი მიწა აჭარაში დამუშავდა. წელსაც, გასული წლის მსგავსად დავუდგებით ციტრუსის ნაწილში გვერდით ჩვენს გლეხს, როგორც არასტანდარტული, ისე სტანდარტული მოსავლის ნაწილში და მივეხმარებით ექსპორტზე მის გატანაში. შარშან გავიტანეთ 30 ათასი ტონა, წელს გვექნება კიდევ უფრო უკეთესი მოსავალი. ამ რეგიონში ცოტა თხილიც გვაქვს და გახსოვთ ფაროსანასთან ბრძოლის ნაწილიც. ესეც ადამიანზე ზრუნვის ერთ-ერთი შემადგენელი ნაწილია. რა თქმა უნდა, სამეგრელოში, გურიაში, იმერეთში, კახეთში, თხილი ცოტა უფრო ბევრი მოდის, მაგრამ წელს აჭარაში დაახლოებით 5 ათას ტონა თხილს ველოდებით. ძალიან კარგი, საუკეთესო ფასი იქნება და აქაც გლეხს ყველანაირად გვერდით დავუდგებით. ჩვენ ყველამ ერთად უნდა ვიზრუნოთ ჩვენს ქვეყანაზე. მთავრობის ვალდებულება უნდა იყოს, გაუფრთხილდეს თითოეულ მოქალაქეს, იყოს სამართლიანი, კეთილსინდისიერი, ეფექტიანი და თითოეულ ადამიანს მისცეს საშუალება, ღირსეულად იშრომოს, თავისი ოჯახის, სოფლის ქალაქის და ქვეყნის საკეთილდღეოდ. გასაკეთებელი საქმე ყოველთვის ბევრი გვექნება. ზოგიერთებმა თქვეს, პრემიერ-მინისტრმა 8 წლის შემდეგ აღმოაჩინა, რომ თურმე გზა არის დასაგებიო. არა, ბატონებო! ამ გზას ვაგებდით და კიდევ 8 წელი დავაგებთ და ყველა ერთად გავაგრძელებთ შრომას. ჩვენ არ გვჭირდება ფასადური რეკლამები და პიარი, რადგან დაგებული გზა, აშენებული სკოლა კიდევ უფრო თვალსაჩინო მაგალითია და გაკეთებულ საქმეს ბევრი ხმაური და ყვირილი არ სჭირდება. მაგალითისთვის, ნაპირსამაგრი სამუშაოები ქობულეთში, ქობულეთის ბულვარი, ბევრი რამ არის კიდევ გასაკეთებელი, გაზგაყვანილობა ბოლომდეა მისაყვანი, დეტალურად ვიცი მაღალი ძაბვის გადამცემი ანძების პრობლემა ქობულეთში ბინათმშენებლობის ნაწილში და მოსაფიქრებელი გვაქვს რაღაც, რომ ეს ყველაფერი მიწისქვეშ ჩავიტანოთ, მაგრამ ეს არ არის მხოლოდ მთავრობის საზრუნავი, ეს ყველამ ერთად უნდა გავაკეთოთ და ერთად ვიშრომოთ იმისთვის, რომ მოვუაროთ ამ პატარა ლამაზ კუთხეს და ლამაზ ქვეყანას. ეს არის ჩვენი მიზანი ყველანაირი ხმაურის, ყვირილის და რეკლამის გარეშე, წყნარად, მშვიდად, ვისაც რა უნდა, ის ილაპარაკოს, ჩვენ კი მშვიდად გავაკეთოთ ჩვენი საქმე. ამ ნაწილში დიდი მნიშვნელობა აქვს, ვინ იქნება თქვენი წარმომადგენელი როგორც უმაღლეს საბჭოში, ასევე ქვეყნის უმაღლეს საკანონმდებლო ორგანოში. დარწმუნებული ვარ, ეს ღირსეული ადამიანები გააგონებენ თითოეული ქობულეთელის ხმასა როგორც პარლამენტში, ასევე უმაღლეს საბჭოში. ჩვენ ყველა ერთად, რაც მთავარია სამართლიანად, მშვიდად უნდა მივიდეთ 31 ოქტომბერს და რა თქმა უნდა, სამართლიანად გავიმარჯვოთ. გამარჯვებას გისურვებთ!

ვინც ერთხელ მაინც ყოფილა ქობულეთში, აქ დაბრუნებისას შეუძლებელია გულწრფელი სიხარული არ დაეუფლოს, რადგან მზე, ზღვა, ბუნება, შესანიშნავი ადამიანები ყოველთვის დადებით მუხტს და განწყობას სძენს თითოეულ ადამიანს. ალბათ დამეთანხმებით, რომ ქობულეთი, ეს მუნიციპალიტეტი, ზოგადად - აჭარა ერთნაირად საყვარელია ჩვენი მოსახლეობისათვის; ამ ქალაქში, ამ მხარეში, ტოლერანტობა და სტუმარ-მასპინძლობა არავის ესწავლება; წლების განმავლობაში და ბუნებრივია, დღესაც, აქ, როგორც მთლიანად მუნიციპალიტეტში, მშვიდობიანად თანაცხოვრობენ სხვადასხვა ეთნიკური თუ რელიგიური ჯგუფის წარმომადგენლები და ისინი ერთად ყველაფერს აკეთებენ ჩვენი ქვეყნის გაძლიერებისთვის. წინა ხელისუფლებისგან განსხვავებით, „ქართული ოცნების“ ხელისუფლებაში მოსვლის შემდეგ, ქობულეთის მუნიციპალიტეტს განსაკუთრებული ყურადღება ექცევა. ამ ხნის განმავლობაში, ბევრი მნიშვნელოვანი პროექტი განხორციელდა. ავიღოთ ჯანდაცვის მიმართულება, მთლიანი რეფორმა, დანერგილი პროგრამები; განათლება, ინფრასტრუქტურული მიმართულება, თუ რამდენი პროექტი განხორციელდა, რამდენი გზა დაიგო, რამდენი ხიდი შეკეთდა; ავიღოთ სოფლის მეურნეობა და მისი პროგრამები, ეკონომიკის სამინისტროს მიერ განხორციელებული მცირე და საშუალო ბიზნესის განვითარების ხელშემწყობი პროგრამები, რომლითაც ძალიან ბევრმა ადამიანმა ისარგებლა. ძალიან მარტივია, გაიარო ყველა მუნიციპალიტეტში, ყველა რეგიონში და ნახავთ, თუ რამდენი პროექტი განხორციელდა სხვადასხვა მიმართულებით, თუმცა, სამწუხაროდ, ჯერ კიდევ არსებობს პრობლემები, არსებობს გამოწვევები, რომელთაც ჭირდება შესაბამისი პასუხები და რეაგირება. მე დარწმუნებული ვარ, ღირსეული პასუხებით, ღირსეული ქმედებებით და წინგადადგმული ნაბიჯებით დავძლევთ ყველა არსებულ გამოწვევას, რომელიც აწუხებს ჩვენს ქვეყანას. მჯერა, ჩვენი ქვეყნის თითოეული მოქალაქე გააკეთებს სწორ არჩევანს და ეს იქნება პარტია „ქართული ოცნება-დემოკრატიული საქართველოს“ გამარჯვება მომდევნო საპარლამენტო არჩევნებში. ჩვენ ყველაფერი უნდა გავაკეთოთ, რათა შევქმნათ წარმატებების ისტორიები, პატარ-პატარა გამარჯვებები, რაც ძალიან მნიშვნელოვანია თითოეული სოფლისთვის, თითოეული რაიონისა და ქალაქისთვის. ერთად საქართველოს წარმატებისთვის!

მაჟორიტარი დეპუტატობის კანდიდატის, ზაალ მიქელაძის და აჭარის ა/რ უმაღლესი საბჭოს მაჟორიტარი დეპუტატობის კანდიდატის, ცოტნე ანანიძის წარდგენა ქობულეთში 

რეაბილიტაცია უკვე ჩაუტარდა ციხის დასავლეთ და სამხრეთ-აღმოსავლეთ კედლებს, ასევე - დერეფნის უბანს. ტერიტორიაზე ინფრასტრუქტურული სამუშაოები აქტიურ რეჟიმში მიმდინარეობს.   აჭარის ავტონომიური რესპუბლიკის მთავრობას პეტრას ციხის განახლებისთვის 750 ათასი ლარი აქვს გამოყოფილი.

დღევანდელი დღის მთავარი მიზანი, მიზეზი - კიდევ ერთხელ გაგაცნოთ ორი ძალიან ღირსეული ადამიანი, რომელზეც ჩვენ არჩევანი შევაჩერეთ. ისინი ღირსეულად წარმოადგენენ ხელვაჩაურის მუნიციპალიტეტს როგორც აჭარის უმაღლეს საბჭოში, ისე საქართველოს პარლამენტში. ჩვენ გავითვალისწინებთ სიით შემადგენლობაში, რომ ყველა მუნიციპალიტეტს ჰყავდეს თავისი  წევრი წარმომადგენლობით ორგანოში. 2012  წლიდან დღემდე არაერთი მნიშვნელოვანი საქმე გაკეთდა და ამ 8 წლის განმავლობაში არაერთი მიღწევა  გვაქვს, როგორც სოციალური სახლების მშენებლობის ნაწილში, ასევე ინფრასტრუქტურული პროექტების განხორციელების კუთხით. ამ ყველაფერზე, ჩვენ, ყოველდღიურ რეჟიმში ვაწარმოებთ აქტიურ კომუნიკაციას   როგორც თქვენთან, ისე სოფლის, დაბის დონეზე. ყველა ის მიმდინარე პროექტი, რომელიც ხორციელდება მაქსიმალურად შემჭიდროებულ ვადებში, მაღალი ხარისხით, მიმართულია იქით, რომ თითოეულმა ხელვაჩაურელმა საკუთარი ოჯახის კეთილდღეობის დონეზე იგრძნოს ეს მიღწევები. ძალიან მალე დასრულდება გაზიფიცირება და ყველა მიიღებს ბუნებრივ აირს საკუთარ ოჯახებში. ასევე, ჩვენ ერთად, ძალიან აქტიურად ვავითარებთ წყალმომარაგების და წყალარინების სისტემებს, რაც მოგვცემს საშუალებას, რომ ხელვაჩაურში, არცერთ დასახლებულ პუნქტში, მწვავედ აღარ იდგეს წყალმომარაგების პრობლემა. ამავე დროს,  ცენტრალურ მთავრობასთან ერთად, გავაგრძელებთ მუშაობას, რომ არცერთი დაბა, ხეობა არ დარჩეს თანამედროვე გზების და შესაბამისი ინფრასტრუქტურის გარეშე. ამ ყველაფერს სჭირდება თქვენი თანადგომა. ბუნებრივია, მოველით და გვაქვს იმის იმედი, რომ კიდევ ერთხელ დაგვიდგებით გვერდში, რათა ერთად გავაგრძელოთ იმ ღირსეული და სამართლიანი სახელმწიფოს მშენებლობა, რომელსაც 2012 წელს ჩაეყარა საფუძველი.