არ არსებობს სფერო, სადაც არ არის ძირეული და სერიოზული წინსვლა. მაგალითად, აგროპროექტები. ბოლო წლებში 400 მილიონი დოლარით გაიზარდა ქართული პროდუქციის ექსპორტი და როდესაც ასეთი ინერცია გაქვს აღებული ეროვნულ პროდუქციაზე, ეს განსაკუთრებით საამაყოა. ასევეა გზების, მოსახლეობის წყლით მომარაგების და სხვა საკითხების შემთხვევაში. როდესაც გზებზე ვსაუბრობთ, 3-ჯერ და 4-ჯერ მეტი გზებია გაკეთებული, მათ შორის, შიდა გზები, ვიდრე წინა პერიოდში. მაინც და მაინც წინა ხელისუფლების დროს არ ვადარებ. საუბარია, ზოგადად, 2012 წლამდე. როდესაც წყალმომარაგებაზე იყო საუბარი - მაქსიმალური შედეგი იყო ქვეყნის მოსახლეობის 25%-ის მომარაგება. დღეს კი 50%-ს გავცდით. 2024 წლისთვის საქართველოს მოსახლეობის 70%-ს ექნება უწყვეტი წყალი. ასეთი ციფრები გვაქვს ყველა მიმართულებით. ოპონენტები საუბრობენ ხოლმე სიღარიბეზე. 2002-2012 წლებში ოთხი პროცენტით დაიკლო ამ ქვეყანაში სიღარიბემ. ხოლო 2012 წლის შემდეგ, მსოფლიო ბანკის მონაცემებით, 10%-ზე მეტით შემცირდა. თუმცა, როდესაც გაჭირვებულები გყავს, თვითკმაყოფილებას ვერ მიეცემი, გამორიცხულია. დინამიკა უნდა იყოს მზარდი და კიდევ ერთხელ გავიმეორებ, პოზიტიური ინერცია არსებობს. ამ მიმართულებით სიარული მშვიდობით და განვითარებით ევროპისკენ, იძლევა იმის საფუძველს, რომ ჩვენ კიდევ გავძლიერდებით.

მოგესალმებით, ზესტაფონელებო! ზესტაფონი ყოველთვის გამორჩეული იყო საქართველოში, როგორც ინდუსტრიული ქალაქი და აქ არ არის საუბარი მხოლოდ და მხოლოდ მეტალურგიაზე. ზესტაფონი ასევე საკმაოდ კარგად იყო განვითარებული ელექტროენერგეტიკის, კვების მრეწველობის, სოფლის მეურნეობის და ბევრი სხვა მიმართულებით. ზესტაფონი უაღრესად მნიშვნელოვანი იყო, როგორც სატრანსპორტო კვანძიც, თუმცა დღეს სიმართლე უნდა ვუთხრათ ერთმანეთს, რომ ერთ-ერთი ყველაზე მნიშვნელოვანი პრობლემა, რაც ჩვენ ზესტაფონში გვაქვს, ეს არის სამუშაო ადგილები. მიუხედავად იმ ყველაფრისა, რაშიც ეს ქალაქი ყოველთვის ძლიერი იყო, სადღაც რაღაც კომპეტენციები დავკარგეთ, სადღაც კონკურენტულ გარემოს ვერ გავუძელით და დღეს ვართ იქ, სადაც ვართ. თუმცა, ყველას უნდა გვახსოვდეს, რომ როდესაც ზესტაფონის ინდუსტრიალიზაციის გაძლიერებაზე ვსაუბრობთ, რაც პირდაპირ ნიშნავს ადგილობრივი წარმოების გაძლიერებას, არ უნდა დაგვავიწყდეს ეკოლოგია და აქ უნდა ვიპოვოთ ის ბალანსი, როდესაც სამუშაო ადგილებიც გვჭირდება, საექსპორტო პროდუქციაც და მეტალურგიაც, მაგრამ არა იმის ფასად, რომ ჩვენი მომავალი თაობა და მოხუცები დაავადდნენ ეკოლოგიურად მძიმე ვითარებით. ამიტომ, ჩვენი ძირითადი ამოცანაა, გვქონდეს მაღალი ხარისხის კომპეტენცია, რომ დავაკმაყოფილოთ ეკოლოგიური სტანდარტებიც და ექსპორტზეც გავიტანოთ ჩვენი მანგანუმი. ფეროშენადნობი დღესაც ძირითადი საექსპორტო პროდუქტია. ქვეყნის მიმდინარე ანგარიშის ბალანსს ფეროშენადნობთა ქარხანა ასწორებს და ამას ძალიან დიდი მნიშვნელობა აქვს. შემდეგი ნაწილია ელექტროენერგეტიკა და ზესტაფონის, როგორც დასავლეთ და აღმოსავლეთ საქართველოს გამაერთიანებლის, გადამცემის სატრანზიტო ფუნქცია უაღრესად მნიშვნელოვანია. ასევეა სოფლის მეურნეობაც. ჩვენ ყველაფერი უნდა გავაკეთოთ იმისთვის, რომ პირველ რიგში სამუშაო ადგილების მაქსიმალურად შექმნას შევუწყოთ ხელი. ყველას კარგად გვესმის, რომ დღეს პანდემიაა, ზესტაფონში საკმაოდ კარგად მიდიოდა ტურისტული ნაკადებიც, გზიდან გამომდინარე, მაგრამ აქაც ცოტა გაგვიჭირდა და ყველამ პატივი უნდა ვცეთ ერთმანეთს, დავიცვათ პირველ რიგში ჩვენი ახლობლები, მოხუცები, გავითვალისწინოთ ელემენტარული წესები იმისთვის, რომ ამ ეკონომიკურ კრიზისსაც გავუძლოთ და ყველაზე კარგი, სწრაფი აღდგენა გვქონდეს საქართველოში, რისი შესაძლებლობებიც, მერწმუნეთ, გვაქვს. მინდა, ორიოდე სიტყვით გითხრათ, რას შეცვლის ზესტაფონში რიკოთის უღელტეხილი. ვინც მოძრაობთ საქართველოში, თბილისიდან დასავლეთით, ყველანი ხედავთ, რა მასშტაბური სამუშაოები მიმდინარეობს. მერწმუნეთ, რეგიონში მსგავსი სირთულის საინჟინრო სამუშაოები არასოდეს ჩატარებულა. 94 ხიდი, 56 გვირაბი, ურთულესი საინჟინრო ინფრასტრუქტურა კეთდება და 4 წელში უკვე თბილისიდან ზესტაფონამდე სულ რაღაც 2 საათი დაგვჭირდება, რაც, რა თქმა უნდა, მობილობას გაზრდის. იმედია, უკვე Covid-19 დამარცხებული გვექნება და ეს მობილობა არ იქნება რისკი ინფექციის გავრცელების თვალსაზრისით და ეს პირდაპირ იმოქმედებს ეკონომიკურ აქტივობებზე. ჩვენ ამ დროისთვის უნდა ვიყოთ მზად იმისთვის, რომ შევძლოთ სწრაფი ეკონომიკური აღდგენა ზესტაფონში და ზოგადად, საქართველოში. ჩვენ ყველანი ერთად ვშრომობთ იმისთვის, რომ ქვეყანაში ფიზიკური სისტემური ინფრასტრუქტურა მოვიყვანოთ წესრიგში - გზა, წყალი, გაზი, ელემენტარული, ცხოვრების ნორმალური პირობები რომ შევქმნათ და მომავალ თაობას დავუტოვოთ. ფიზიკური სისტემური ინფრასტრუქტურის გარდა არის სხვა მიმართულებებიც, არა ფიზიკური, მაგრამ უაღრესად მნიშვნელოვანი. ბავშვებისთვის - განათლება, მოხუცებისთვის - პენსია და სოციალური დახმარება, ჯანდაცვის გამართული სისტემა, ყველა შესაძლებლობა იმისთვის, რომ ღირსეულად ვიშრომოთ და ვარჩინოთ ჩვენი ოჯახები. სწორედ, ამიტომ დაიწყო სახელმწიფომ მთელი რიგი პროგრამები სხვადასხვა მიმართულებით - „აწარმოე საქართველოში“, სოფლის მეურნეობის დაკრედიტება, „დანერგე მომავალი“, ეს ყველაფერი კეთდება იმისთვის, რომ ინიციატივის მქონე მოქალაქეებს, ვისაც აქვს შესაძლებლობა, გადადგას პირველი ნაბიჯი, მაქსიმალურად მივეხმაროთ. სწორედ ამიტომ, ზესტაფონში, თქვენს იუსტიციის სახლში ყველა ეს პროგრამა თავმოყრილია და თითოეულ ადგილობრივს შეუძლია მივიდეს, მიიღოს მაქსიმალური ინფორმაცია და დაიწყოს საქმე. მესმის, რომ ეს არ არის მარტივი, მესმის, რომ ყოველთვის რთულია და ახალგაზრდა ადამიანსაც აქვს შიში, პირველი ნაბიჯი გადადგას, პასუხისმგებლობა აიღოს თავის თავზე, ოჯახზე, შემდგომ უკვე მეზობელსა და ნათესავზე, მაგრამ მერწმუნეთ, სახელმწიფო იქნება თქვენს გვერდით. ჩვენ ამ ყველაფერს ვაკეთებთ იმისთვის, რომ ნიჭიერ ადამიანებს მივცეთ შესაძლებლობა, გადადგან პირველი ნაბიჯი, ღირსეულად არჩინონ ოჯახი, შექმნან ძლიერი ბიზნესი, რადგან ვერავინ ვერასდროს შეცვლის ბიზნესის როლს. ბიზნესი უნდა იყოს თავისუფალი, ძლიერი, პირად ინიციატივაზე დაფუძნებული და ამ ბიზნესმა უნდა შექმნას სამუშაო ადგილები. რაც მთავარია, ეს ყველაფერი უნდა ხდებოდეს თანაბარ პირობებში, არანაირი მნიშვნელობა არ უნდა ჰქონდეს, ადამიანი ცხოვრობს ზესტაფონში, თბილისში, ბათუმში, ზუგდიდში, თუ სხვაგან. ყველა მოქალაქეს უნდა ჰქონდეს მაქსიმალურად დაახლოებული, თანაბარი პირობები და სახელმწიფოს მთავარი ამოცანაა, რომ სამართლიან პირობებში ადამიანს შეუწყოს ხელი, თავის თავზე აიღოს პასუხისმგებლობა და მისი ინიციატივა იყოს წარმატებული. ასე უნდა აშენდეს ძლიერი ზესტაფონი, ძლიერი რეგიონი და ძლიერი ქვეყანა. საბოლოო ჯამში, ჩვენი მიზანია, ეკონომიკურად ძლიერი, განათლებული, სამართლიანი და რა თქმა უნდა, ევროპული სახელმწიფო. ამ მიმართულებით, არჩევნები იქნება უაღრესად მნიშვნელოვანი ნაბიჯი. ჩვენ არავის არაფერს ვუმტკიცებთ, ჩვენ ვაკეთებთ იმას, რაც ჩვენს ქვეყანას და ჩვენს მოქალაქეებს სჭირდებათ. მერწმუნეთ, გამარჯვების შემდეგ, როდესაც მივაღწევთ საბოლოო მიზანს, ყველა იტყვის, რომ ამ საერთო საქმეში მასაც პატარა წვლილი აქვს შეტანილი, არანაირი მნიშვნელობა არ აქვს, დღეს რა პოზიციაზე, ან რომელ მხარეს არის. მთავარია, ქვეყანამ უნდა გაიმარჯვოს და დარწმუნებული ვარ, ჩვენ ამას ერთად გავაკეთებთ 31 ოქტომბერს. გამარჯვებას გისურვებთ სამართლიან ბრძოლაში. დარწმუნებული ვარ, ბეჟან წაქაძეს აქ ჩემი ქება და წარდგენა არ სჭირდება, აქაური კაცია, ჩემზე უკეთ შეაფასებთ მას, ჩემზე უკეთ იცით, რისი გამკეთებელია, მაგრამ ერთს გეტყვით, რომ ეს ადამიანი იქნება ზესტაფონელების ღირსეული ხმა საქართველოს უმაღლეს საკანონმდებლო ორგანოში. გამარჯვებას გისურვებთ!

მოგესალმებით! ჩვენი დღევანდელი შეხვედრის მიზანი მომავალი საპარლამენტო არჩევნები და ზესტაფონის მაჟორიტარობის კანიდატის წარდგენაა. დღეს ჩვენ ვიმყოფებით ზესტაფონში, ერთ-ერთ ყველაზე ინდუსტრიულ ქალაქში, სადაც მშრომელი და პატრიოტი ადამიანები ყოველდღიური საქმიანობით აძლიერებენ ჩვენი ქვეყანის ეკონომიკას. 2012 წელს, „ქართულმა ოცნებამ“, ბიძინა ივანიშვილის ლიდერობით, ქართველ ხალხთან ერთად ძალადობრივი რეჟიმი ხელისუფლებას ჩამოაშორა და ქვეყნის დემოკრატიული, მშვიდობიანი და სტაბილური განვითარება დაიწყო. ადამიანი მთავარი ღირებულება გახდა, ხოლო მისი უფლებების დაცვის სტანდარტი ყველაზე განვითარებული, დემოკრატიული ქვეყნების დონეზე ავიდა. ბევრ სფეროში ჯერ კიდევ გასაუმჯობესებელია არსებული ვითარება, თუმცა „ქართულმა ოცნებამ“, მაგალითისთვის შრომითი უფლებები კარდინალურად გააუმჯობესა, აღადგინა წინა ხელისუფლების პირობებში გაუქმებული ინსტიტუტები, კანონმდებლობა და ზოგადად ევროპული სტანდარტების მიმართულება გახდა ერთ-ერთი უმნიშვნელოვანესი პრიორიტეტი. ჩვენ, ყველამ ერთად უნდა შევძლოთ და ეკონომიკური განვითარება, დემოკრატიული პროცესის მსგავსად განვავითაროთ, საბოლოოდ კი ერთიან ევროპულ ოჯახში, ძლიერი ეკონომიკითა და უნიკალური ქართული კულტურით დავიმკვიდროთ ღირსეული ადგილი. არ დავიწყებ იმის მოყოლას, ბოლო წლების განმავლობაში თუ რამდენი მნიშვნელოვანი პროექტი განხორციელდა, როგორ გაუმჯობესდა ინფრასტრუქტურა, სოფლებში მისასვლელი გზა, რა პროგრამები განხორციელდა ჯანდაცვაში, განათლებაში, სოფლის მეურნეობის მიმართულებით, ეკონომიკის სამინისტროს მხარდამჭერი პროგრამები იმისთვის, რომ მცირე და საშუალო ბიზნესი განვითარდეს. ეს ყველაფერი გასაგებია, მაგრამ ჯერ კიდევ არსებობს გამოწვევები, რომელსაც სჭირდება ჩვენი ერთიანი ძალისხმევა, რომ შევძლოთ მომდევნო წლების განმავლობაში ამ პრობლემების მოგვარება. მჯერა, თქვენი მხარდაჭერითა და თანამდგომით, ჩვენი ერთიანი ძალისხმევით აუცილებლად შევძლებთ 31 ოქტომბერს საპარლამენტო არჩევნებში გამარჯვებას. ეს არ იქნება მხოლოდ ზესტაფონის გამარჯვება, ეს არ იქნება მხოლოდ ამ რეგიონის გამარჯვება, ეს იქნება ჩვენი ქვეყნის გამარჯვება და წარმატება. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ზესტაფონის მოსახლეობას მაჟორიტარი დეპუტატობის კანდიდატი ბეჟან წაქაძე წარუდგინეს.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ და საპარლამენტო უმრავლესობის ლიდერმა მამუკა მდინარაძემ, ზესტაფონი-ბაღდათი-თერჯოლა-ტყიბულის საარჩევნო ოლქში “ქართული ოცნების“ მაჟორიტარი დეპუტატობის კანდიდატ ბეჟან წაქაძესა და თერჯოლის მერობის კანდიდატ ლაშა გოგიაშვილთან ერთად, თერჯოლის მუნიციპალიტეტის სოფელ სიქთარვაში რძის გადამამუშავებელი საწარმო დაათვალიერეს, რომელიც სახელმწიფოს მხარდაჭერით შეიქმნა.   თანამედროვე სტანდარტებით აღჭურვილი საწარმო დღეში 10 ტონა რძეს ამუშავებს, სამი სახის ყველს აწარმოებს და პროდუქციის რეალიზაციას ადგილობრივ ბაზარზე ახორციელებს. საწარმოში 17 ადამიანია დასაქმებული.   საწარმოში კომპანია „ზეკარმა“ 750 000 აშშ დოლარის ინვესტიცია განახორციელა, საიდანაც 20 000 აშშ დოლარი გარემოს დაცვისა და სოფლის მეურნეობის სამინისტროს სახელმწიფო გრანტი, ხოლო 250 000 აშშ დოლარი - შეღავათიანი აგროკრედიტია.

დარწმუნებული ვარ, ჩვენ ყველა ერთად, გვერდით დგომით, ბევრ რამეს გავაკეთებთ. დარწმუნებული ვარ, ბეჟან წაქაძის შემართება ისეთია, რომ არ მოასვენებს აღმასრულებელი ხელისუფლების არცერთ წარმომადგენელს, რომ თერჯოლაში კიდევ უფრო მეტი პროექტი განხორციელდეს. აქ უამრავი ადამიანია, რომელთაც შესწევთ უნარი, გაუმჯობესდეს ის სერვისები, პროგრამები და პროექტები, რომლებსაც დღეს სახელმწიფო სთავაზობს საზოგადოებას. ჩვენ ამ ყველაფერს წარმატებულად გამოვიყენებთ. წარმატება ჩვენ უნდა გავიხადოთ საფირმო ნიშნად, უამრავი პროექტი და საკითხია, რითაც შეგვიძლია ვიამაყოთ. განსაკუთრებით, ბოლო დროს ჩვენ ვნახეთ, რომ მსოფლიოს წინაშე შევძელით გვეამაყა კონკრეტული მენეჯმენტით, რომელმაც შეგვაძლებინა გვეთქვა, რომ დღეს ეს არის საჭირო, კონკრეტული ნაბიჯებია საჭირო, გადაგველახა ყველაზე კრიზისული პერიოდი და დღეს გამართულად, თავისუფლად გვესაუბრა რომ მეორე ტალღას გადავლახავთ ძალიან წარმატებით. დარწმუნებული ვარ, ერთად დგომით და შრომით ბევრს გავაკეთებთ, ბევრ წარმატებას მივაღწევთ. ბოლო დღეებში აღმასრულებელი ხელისუფლების ერთ-ერთი წარმომადგენელმა განაცხადა, რომ თუ 2012 წლამდე ავტობანი რამდენიმე წელში 68 კილომეტრი აშენდა, წელს ჩვენ ვაშენებთ 70 კილომეტრს და ასეთი მაგალითი ბევრია. 2007-2014 წლებში თურმე, არც ერთი ოქროს მედალი არ გვქონდა სპორტში, ოლიმპიურ სახეობაში, 2019 წელს ბიჭებმა აიღეს 1200 მედალი და არაერთი ოქრო მათ შორის. აი, ასეთი ბევრი კონკრეტული მაგალითები გვექნება და დარწმუნებული ვარ, როდესაც ასეთი ინერცია გვაქვს აღებული, განვითარების დინამიკა კიდევ უფრო მაღალი იქნება, თერჯოლა ამაში განსაკუთრებულ წვლილს შეიტანს და თავის სიტყვას იტყვის ამ არჩევნებიდან დაწყებული მომდევნო წლების განმავლობაში გაგრძელებული.

მოგესალმებით, თერჯოლელებო! დიდი პატივია დღეს აქ, თქვენთან ერთად, დავით კლდიაშვილის სახლ-მუზეუმში მომავალზე საუბარი. ადამიანის, რომელმაც ჯერ კიდევ მაშინ, უაღრესად თბილი იმერეთი, მაგრამ ხანდახან მწარე რეალობით, უაღრესად ემოციურად გადმოსცა. ეს ყველას კარგად გვახსოვს, ჩვენი ბავშვობის ნაწილია. ამიტომ, ჩვენც არ უნდა შეგვეშინდეს სიმართლის და რაც ობიექტური რეალობაა, ყოველთვის იმაზე უნდა ვისაუბროთ. ჩვენი ძლიერი მხარეც კარგად უნდა ავხსნათ და ჩვენს სისუსტეებსაც უნდა ვხედავდეთ. დღეს, თერჯოლაში, მიუხედავად ყველაფრისა, კიდევ ბევრი გამოწვევაა დარჩენილი. რა თქმა უნდა, პრობლემაა შიდა გზები, რომლებიც მოსაგვარებელია, სასმელი წყალი, საირიგაციო წყალი, ასევე პრობლემაა წყალარინების სისტემა ქალაქში. ამას ყველაფერს ჩვენ ერთად გავაკეთებთ, მაგრამ ყველაზე მნიშვნელოვანია, რომ თერჯოლა, ნელ-ნელა უნდა დაუბრუნდეს სოფლის მეურნეობის თავის ისტორიულ კულტურებს. თერჯოლაში კიდევ და კიდევ უფრო უნდა განვითარდეს მევენახეობა. გპირდებით, სოფლის მეურნეობის სამინისტრო გააკეთებს სპეციალურ პროგრამას იმისთვის, რომ დასავლეთ საქართველოში და მათ შორის თერჯოლაში, ნელ-ნელა, დავიწყოთ მცირე მარნების შექმნა. არ უნდა დაგვავიწყდეს, რომ სულ მალე, სისტემური ინფრასტრუქტურის ნაწილში, როდესაც რიკოთის უღელტეხილის ჩქაროსნული გზა დამთავრდება, სულ რამდენიმე საათში იქნება შესაძლებელი თბილისიდან აქ ჩამოსვლა, რაც სერიოზულ იმპულსს მისცემს აქ ტურიზმის განვითარებას და ეს შენარჩუნებული, ულამაზესი, ისტორიული ბუნება, ულამაზესი ისტორიული ძეგლები, ციხესიმაგრეები, ის სავაჭრო გზები, რომლებიც ისტორიულად თერჯოლაზე გადიოდა, ეს არის ის ისტორია და სიმდიდრე, რომელიც ჩვენ გაგვაჩნია და რომელიც ყოველთვის უნდა გამოვიყენოთ. სახელმწიფოს ძირითადი ფუნქციაა, სისტემურად იზრუნოს ადამიანებზე და თანაბარი პირობები შეუქმნას ყველას. არ უნდა იყოს სხვაობა - ბავშვები რომელ სკოლაში სწავლობენ, თერჯოლაში თუ თბილისში, პენსიონერები - თერჯოლაში ცხოვრობენ თუ თბილისში. მათ მაქსიმალურად ერთმანეთთან დაახლოებული პირობები უნდა ჰქონდეთ, არ უნდა იყოს სხვაობა. სახელმწიფო ყოველთვის იზრუნებს მასწავლებელზე, ექიმზე, პოლიციელსა და ჯარისკაცზე, რადგან ეს ის ხალხია, რომლებიც სახელმწიფო სერვისებს აწვდიან მოქალაქეებს და ზრუნავენ თითოეულ მოქალაქეზე. ჩვენ არაერთ პროგრამას ვახორციელებთ, იქნება ეს სოფლის მეურნეობის მიმართულებით - „აწარმოე საქართველოში“, ტურიზმის, თუ წარმოების მხარდაჭერის. თერჯოლაში რამდენიმე საკმაოდ კარგი საწარმო გაიხსნა - ქვის, მეტალის გადამამუშავებელი. იმერეთის სხვა მუნიციპალიტეტებისგან განსხვავებით, ამ პროგრამების გამოყენებაში თერჯოლა ერთ-ერთი ჩემპიონია, ეს უნდა გავაგრძელოთ და ამისთვის ჩვენ დავიწყეთ პროგრამა - „სახელმწიფო - შენი პარტნიორი“, რაც ნიშნავს იმას, რომ ინიციატივის მქონე ადამიანებს, რომლებსაც შეუძლიათ, გადადგან პირველი ნაბიჯი გლეხობიდან გახდნენ ფერმერები, დაიწყონ ბიზნესი, წამოიწყონ ტურისტული საქმიანობა, აღარ დასჭირდებათ თბილისში ჩასვლა. თქვენთან, აქ, თერჯოლაში მიიღებთ სრულ ინფორმაციას იმ დონეზე, რომ შეგეძლებათ კონტრაქტის გაფორმებაც ამ პროგრამებში მონაწილეობის მისაღებად. ეს პროგრამები ჩვენ გავაკეთეთ ერთადერთი მიზნით, რომ საქართველოს თითოეულ მოქალაქეს, იმის მიუხედავად, რომელ რეგიონში ცხოვრობს, თუ შესწევს უნარი, აიღოს რისკები თავის თავზე, გარისკოს იმ დათქმით, რომ სახელმწიფო გვერდით დაუდგება, გადადგას პირველი ნაბიჯი და შექმნას ღირსეული პირობები შრომისთვის, ღირსეული პირობები შეუქმნას თავის ოჯახს და შემდგომ შეძლოს დაასაქმოს მეზობელი, ნათესავი და ა.შ. ასე უნდა შევქმნათ ყველამ ერთად ძლიერი ქვეყანა, იმიტომ რომ ძლიერი თერჯოლის გარეშე ძლიერი საქართველო შეუძლებელია. ნელ-ნელა უნდა გავაკეთოთ ისე, რომ ადამიანები აქ უნდა დაბრუნდნენ და ეს მათი პირადი გადაწყვეტილება და არჩევანი უნდა იყოს. ადამიანები აქედან სამუშაოდ არ უნდა მიდიოდნენ არათუ თბილისში, არამედ ქვეყნის გარეთაც. მათ, ვისაც სურვილი აქვთ თავის მამა-პაპისეულ ფუძეზე გააგრძელონ შრომა და ცხოვრება. ეს ის მინიმალური პირობებია, რომლებიც ჩვენ, როგორც მთავრობამ აუცილებლად უნდა შევუქმნათ თითოეულ მოქალაქეს. ის მდგომარეობა, რა მდგომარეობაშიც ჩვენ ქვეყანა მივიღეთ, გზები, წყალმომარაგება, გაზიფიცირება, ხიდები, ეს ყველაფერი იყო ისეთ სავალალო მდგომარეობაში, სისტემურად, მთელი ქვეყნის მასშტაბით, 8 წელი არ გამოდგა საკმარისი იმისთვის, რომ ეს სისტემური ინფრასტრუქტურა ნორმალურ ფორმაში მოგვეყვანა. მომავალი 4 წლის განმავლობაში, სახელმწიფო გეგმავს, სისტემურ ინფრასტრუქტურაში დახარჯოს 20 მილიარდი ლარი, მაგრამ იმასაც გეტყვით, რომ ესეც არ იქნება საკმარისი. ჩვენ ერთად უნდა გავაგრძელოთ ყველა იმ დიდი და მნიშვნელოვანი საქმის კეთება, რომელიც უკვე დავიწყეთ. მიზანი მარტივია და არის ის, რომ თითოეულ ადამიანს, თანაბარ პირობებში ჰქონდეს თვითრეალიზების შესაძლებლობა. ის არ უნდა იყოს დამოკიდებული იმაზე, თბილისში ცხოვრობს, თერჯოლაში, ბათუმში, თუ სხვაგან. საბოლოო ჯამში, ჩვენ, ყველა უნდა შევთანხმდეთ იმისთვის, რომ ყველანი ერთად, არ აქვს მნიშვნელობა, რომელ პოლიტიკურ ძალას წარმოვადგენთ, საბოლოო ჯამში, როდესაც მივაღწევთ ეკონომიკურად ძლიერ, სამართლიან, განათლებულ და ევროპულ სახელმწიფოს, მერწმუნეთ, რომ საქართველოს ყველა მოქალაქეს, მიუხედავად იმისა, რა პოლიტიკურ პლატფორმაზე დგას, მოუნდება თქვას, რომ ის იყო ამ დიდი საქმის ნაწილი. ამ დიდი საქმის ერთ-ერთი შემადგენელი ნაწილი იქნება ეს არჩევნებიც და დარწმუნებული ვარ, რაც მთავარია, სამართლიან ბრძოლაში, სამართლიანად გავიმარჯვებთ. გამარჯვებას გისურვებთ, თერჯოლელებო!

მოგესალმებით! ძალიან მიხარია, რომ დღეს, თერჯოლელების, ერთგული თანამებრძოლების წინაშე ვიმყოფები, ადამიანების, რომლებიც ყოველთვის მზად არიან, თავიანთი აქტიური ჩართულობით ქვეყნის ბედი გადაწყვიტონ. ასე იყო 2012 წელს, როდესაც ქვეყანაში გამეფებული იყო ტერორი და ძალადობა, როდესაც ადამიანებმა საკუთარი სიცოცხლე, პირადი კომფორტი გვერდზე გადადეს და ქვეყნის გათავისუფლების საქმეში ჩაერთვნენ, საბოლოოდ კი ბიძინა ივანიშვილის ლიდერობით, მტრული ძალა ერთად ჩამოვაშორეთ ხელისუფლებას და რაც ყველაზე მთავარი და მნიშვნელოვანია ეს მოვახერხეთ მშვიდობიანი გზით, არჩევნების გზით, როგორც ყველა განვითარებულ, ევროპულ ქვეყანაში ხდება. ასე არის დღესაც, როდესაც ქვეყანა მშვიდობიანი, სტაბილური განვითარების გზას ადგას, თუმცა ჯერ კიდევ ბევრია გამოწვევა და ჯერ კიდევ სამწუხაროდ არიან ძალები, რომლებსაც სურთ, რომ ქვეყანა ბნელ წარსულში, ძალადობაში დააბრუნონ. „ქართული ოცნების“ ერთიანი გუნდი, არსებულ პოლიტიკურ სივრცეში ერთადერთი ძალაა, რომელსაც ქვეყნის განვითარების მკაფიო ხედვა და არსებული გამოწვევების გადაჭრის რეალური რესურსი და უნარი გააჩნია. ეს კარგად გამოჩნდა კორონავირუსის პირობებში, გლობალურ პანდემიასთან ბრძოლის დროსაც, როდესაც საქართველომ ბევრად უფრო განვითარებულ ქვეყნებზე უფრო წარმატებით მოახერხა ვირუსის პირველ ტალღასთან გამკლავება და მოქალაქეების ჯანმრთელობისა და სიცოცხლის დაცვა. ამასთან ერთად, ხელისუფლებამ შეიმუშავა ანტიკრიზისული გეგმა, რომლის ფარგლებშიც დაეხმარა როგორც ეკონომიკურ სუბიექტებს, ასევე რიგით მოქალაქეებსა და განსაკუთრებით იმ სოციალურ ჯგუფებს, რომლებსაც კრიზისის პირობებში სახელმწიფოს თანადგომა ყველაზე მეტად სჭირდებოდა. მე აქ არ დავიწყებ წინა წლებში განხორციელებული პროექტებისა თუ წარმატებული პროგრამების ჩამოთვლას, თუმცა ფაქტია, რომ ჩვენი ხელისუფლების პირობებში, აბსოლუტურად ყველა სფეროში გვაქვს პროგრესი და წინ გადადგმული ნაბიჯები, რომელიც თითოეულ ოჯახზე უნდა აისახოს და თითოეულმა ოჯახმა საკუთარ თავზე უნდა იგრძნოს. მომდევნო წლებში, ჩვენი მიზანი სწორედ ეს იქნება, რომ ჯერ კიდევ მოუგვარებელი პრობლემები, არსებული გამოწვევები დავძლიოთ და თითოეული ოჯახი უფრო მეტად გავაძლიეროთ. 2020 წლის საპარლამენტო არჩევნებზე, რომელიც 31 ოქტომბერს გაიმართება მნიშვნელოვანია ჩვენი ერთობა, იმისთვის, რომ ჩვენმა ქვეყანამ გაიმარჯვოს. დარწმუნებული ვარ, ჩვენი ერთობით, ერთიანი ძალიხმევით, აუცილებლად მივაღწევთ გამარჯვებას. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა თერჯოლის მოსახლეობას მაჟორიტარი დეპუტატობის კანდიდატი ბეჟან წაქაძე და თერჯოლის მერობის კანდიდატი ლაშა გოგიაშვილი წარუდგინეს.

მოგესალმებით, ტყიბულელებო! მოგესალმებით, მაღაროელებო! საქართველოში არ არის ბევრი ქალაქი, რომელსაც შეიძლება ასეთი სწრაფი ეკონომიკური განვითარების პოტენციალი ჰქონდეს, თუმცა გამოწვევები ძალიან ბევრია, თუნდაც მაღაროელების ნაწილში და გარდა იმისა, რომ ეკონომიკა და წარმოება უნდა იყოს მომგებიანი, შრომის უსაფრთხოების ელემენტარული პირობები უნდა იყოს დაცული. ჩვენ ბევრი ტრაგედია გვაქვს აქ გადატანილი, ყველას ერთად. საქართველოს პარლამენტში უკვე განიხილება ახალი შრომის კოდექსი, რომელიც კიდევ უფრო უზრუნველყოფს მშრომელი ადამიანის შრომის პირობების უსაფრთხოებას, რაც კრიტიკულად მნიშვნელოვანია და წლების წინ საერთოდ არავის ახსოვდა. ის ბალანსი, რომელიც ჩვენ აუცილებლად უნდა დავიცვათ, როგორც ეკონომიკური განვითარების, ასევე მშრომელი ადამიანის უფლებების დაცვის თვალსაზრისით, სულ უფრო და უფრო მაღალ ხარისხში ავა. არანაირ ბიზნესს, არანაირ შემოსავალს არ ექნება ფასი, თუ ადამიანის ელემენტარული უსაფრთხოების პირობები არ დავიცავით და ეს იქნება თანმიმდევრული მიდგომა, ვინც არ უნდა იყოს აქ, ტყიბულში, ვინც არ უნდა მუშაობდეს და რანაირი კომპანიაც არ უნდა იყოს. ეს არის ის მინიმალური პირობები, რაზეც უნდა შევთანხმდეთ, რაც, რა თქმა უნდა, არ გვაძლევს გარანტიას, რომ ერთ წუთში, ან ერთ დღეში ყველაფერი გამოსწორდება და უმაღლეს ევროპულ დონეზე იქნება, მაგრამ თუ ჩვენ გვინდა, შევინარჩუნოთ ტყიბული, როგორც ინდუსტრიული ქალაქი, როგორც მაღაროელების ქალაქი, ამ მიმართულებით ნელ-ნელა ნაბიჯები უნდა გადავდგათ. გარდა ამისა, გულწრფელები უნდა ვიყოთ და ყველამ ერთმანეთს გავუზიაროთ ჩვენი გულისტკივილი იმასთან დაკავშირებით, რომ დღეს ტყიბულში, ბევრგან სხვაგან საქართველოშიც, მაგრამ ტყიბულში განსაკუთრებით, იგრძნობა სამუშაო ადგილების დეფიციტის საკითხი, რაც ჩვენს ტყიბულელებს აიძულებს, ხშირ შემთხვევაში, სხვაგან ეძებონ სამუშაო ადგილები. ეს არის მთავრობის ყველაზე დიდი გამოწვევა. ეს ის გამოწვევაა, რომელსაც ჩვენ ყველამ ერთად უნდა ვუპასუხოთ. ნებისმიერი ეკონომიკური რეფორმა, რომელსაც ჩვენ ვახორციელებთ, ძირითად მიზნად ისახავს ახალი სამუშაო ადგილების შექმნას. განსაკუთრებით დღეს არის ეს პრობლემური, როდესაც ჩვენ, ყველანი ერთად, ჯერ პანდემიის კრიზისში ვართ და შემდეგ უკვე ეკონომიკური კრიზისიც დაგვეწია. საქართველო, სხვებთან შედარებით, ერთ-ერთი საუკეთესო პოზიციებით შევა ეკონომიკური აღდგენის ფაზაში და ეს ჩვენ ყველამ ერთად უნდა გავიაზროთ და ამისთვის ერთობლივად უნდა ვიშრომოთ. ტყიბულისმაგვარ ქალაქებში, ყველაზე მნიშვნელოვანი, რა თქმა უნდა, არის ჩვენი სისტემური ინფრასტრუქტურა. ჩვენ უნდა მივაღწიოთ იმას, რომ არ იყოს განსხვავება, ადამიანი ცხოვრობს თბილისში, ბათუმში, ტყიბულში, თერჯოლაში, ზუგდიდში, თუ სხვაგან. სახელმწიფოს ძირითადი ფუნქციები და სერვისები ყველგან უნდა იყოს ერთი და იგივე. სისტემური ინფრასტრუქტურა უნდა იყოს დაახლოებული ერთმანეთთან. რა თქმა უნდა, გზები, წყალი, გაზი - ეს ყველაფერი ხელმისაწვდომი უნდა იყოს თითოეულ ქალაქში და სოფელში. ამისთვისაც ბევრი შრომა დაგვჭირდება, იმიტომ, რომ ყველამ კარგად იცის, რა მდგომარეობაში დაგვხვდა ჩვენ ეს ინფრასტრუქტურა და მიუხედავად იმისა, რომ მომავალი 4 წლის განმავლობაში სისტემურ ინფრასტრუქტურაში ინვესტირებული იქნება 20 მილიარდი ლარი, 4 წლის შემდეგაც, ჩვენი სისტემური ინფრასტრუქტურა, ევროპის დონეზე მაინც ვერ მივა. გარდა ამისა, მოგეხსენებათ, რომ სკოლები, საბავშვო ბაღებია გასარემონტებელი და ეს ყველაფერი ჩვენ ერთად უნდა გავაკეთოთ. მარტივი მაგალითებია, მაგალითად რაც დღეს ტყიბულში ხდება - იდგა სასმელი წყლის გამწმენდი ნაგებობის პრობლემა, რომლის რეკონსტრუქცია დავიწყეთ და დამთავრდება ისევე, როგორც ქსელების რეკონსტრუქციის პროექტი კეთდება იმისთვის, რომ როცა გამწმენდი ნაგებობა გვექნება, ტყიბულში 24-საათიანი წყალმომარაგება იყოს საბოლოოდ. ამასთან ერთად, რა თქმა უნდა, მოსაგვარებელია შიდა გზების პრობლემები და როგორც კი მაგისტრალების და ჩქაროსნული გზების პრობლემები გადაწყდება, რა თქმა უნდა, შიდა გზების პრობლემა დგება პირველ პრიორიტეტად. რა თქმა უნდა, ბავშვებს უნდა ჰქონდეთ თანაბარი პირობები იმისთვის, რომ მიიღონ ხარისხიანი განათლება. ჩვენ ყველაფერს ვაკეთებთ იმისთვის, რომ იმ ადამიანებს რეგიონებში, მათ შორის ტყიბულში, რომლებსაც უნდათ, პირველი ნაბიჯები ბიზნესში გადადგან, სახელმწიფო გვერდით დაუდგეს და ეს პირობები შეუქმნას, თანაბარი პირობები შეუქმნას ყველას, იმის მიუხედავად, ვინ სად ცხოვრობს და ვის როგორი შესაძლებლობები აქვს. ეს არის ჩვენი ძირითადი მიზანი, რომელზეც თქვენთან ერთად უნდა ვიშრომოთ ყოველდღიურად, იმისთვის, რომ საბოლოო ჯამში მივაღწიოთ ეკონომიკურად ძლიერ, სამართლიან, განათლებულ და ევროპულ სახელმწიფოს. ეს ის მიზანია, რომელსაც ჩვენ ერთად უნდა მივაღწიოთ, რომ საბოლოო ჯამში, უახლოეს მომავალში მივუკაკუნოთ ევროპული ოჯახის ქვეყნების დიდ გაერთიანებას და ვთქვათ, რომ ჩვენ ვიმსახურებთ და საქართველო უკვე არის სრულად ევროპული ქვეყანა. დარწმუნებული ვარ, ეს არჩევნები იქნება კიდევ ერთი წინგადადგმული ნაბიჯი იმისთვის, რომ ქართული დემოკრატიის ხარისხი კიდევ ერთხელ დავუდასტუროთ ყველას, რომ ჩვენ ძალიან კარგად გვესმის, რას ნიშნავს გამოხატვის თავისუფლება, ადამიანის ღირსება და პოლიტიკური პლურალიზმი. ამის დამადასტურებელი იქნება ეს არჩევნები. დარწმუნებული ვარ, ბეჟან წაქაძე იქნება თითოეული თქვენგანის ღირსეული ხმა საქართველოს პარლამენტში. გამარჯვებას გისურვებთ, რაც მთავარია, სამართლიან ბრძოლაში!

მოგესალმებით! მოხარული ვარ, რომ დღეს, „ქართული ოცნების“ გუნდთან ერთად, ვიმყოფები ტყიბულში - პატიოსანი, პატრიოტი და მშრომელი ადამიანების ქალაქში, სადაც მაღაროელები და სხვა პროფესიის წარმომადგენლები ჩვენი სამშობლოს განვითარებისთვის ყოველდღიურად მუშაობენ და ჩვენი ქვეყნის მომავალს ქმნიან. ჩვენმა გუნდმა, ქვეყანაში ბევრი მიმართულებით არსებული ვითარება უკეთესობისკენ შეცვალა, თუმცა გვესმის, რომ ჯერ კიდევ არსებობს პრობლემები, გამოწვევები, რომლებიც ერთად უნდა დავძლიოთ და გადავლახოთ. „ქართული ოცნების“ ხელისუფლებაში მოსვლის დღიდან, უკეთესობისკენ შეიცვალა შრომის კოდექსი. ამ მიმართულებით პარლამენტში კონკრეტული გადაწყვეტილებები არის მიღებული, რაც მნიშვნელოვანია იმისთვის, რომ დასაქმებულთა ღირსეული შრომის პირობები და სოციალური გარანტიები იყოს უზრუნველყოფილი. საქართველოს მსგავსი, მცირე ეკონომიკის მქონე ქვეყნებისთვის აუცილებელია, რომ დაცული იყოს ბალანსი ეკონომიკურ განვითარებასა და დასაქმებულთა უფლებრივ მდგომარეობას შორის. ეტაპობრივად, ჩვენ შევძლებთ, რომ შრომითი და სოციალური უფლებები ევროპულ სტანდარტებს მაქსიმალურად დავუახლოვოთ, გავაძლიეროთ ეკონომიკა და თითოეულ მოქალაქეს ღირსეული ანაზღაურება, ღირსეული შრომის პირობები ჰქონდეს. 2012 წლის შემდეგ, როდესაც ქვეყანას მოძალადე რეჟიმი ჩამოვაშორეთ, დავიწყეთ ყველა იმ სფეროში კოლოსალური თანხების ჩადება, რაც ქვეყნის განვითარების ფუნდამენტია. ხელმისაწვდომი გახდა განათლება და ჯანდაცვა, მეწარმეობა და სოფლის მეურნეობა, სადაც მოქალაქეს სახელმწიფოს გვერდით დგომისა და დახმარების რეალური შესაძლებლობა გაუჩნდა. დაიწყო მასშტაბური ინფრასტრუქტურული პროექტები, ახალი ტურისტული მიზიდულობის ცენტრების შექმნა და მოწესრიგება და ა.შ. ამ და სხვა პროექტების მიზანი ქვეყნის წინსვლა და თითოეული ოჯახის გაძლიერება, ჩვენი ქვეყნის მოქალაქეების შემოსავლების ზრდაა. როგორც საუბრის დასაწყისში ვთქვი, ქვეყანაში ჯერ კიდევ არსებობს პრობლემები, არსებობს გამოწვევები და ამას სჭირდება ერთმანეთის მხარდამხარ 24-საათიანი მუშაობა იმისთვის, რომ რაც შეიძლება სწრაფად და ღირსეულად ვუპასუხოთ ყველა იმ გამოწვევას, რომელიც აწუხებს ტყიბულს, რომელიც აწუხებს ამ რეგიონს და ზოგადად პრობლემებს, რომლებიც არსებობს ქვეყანაში. მე დარწმუნებული ვარ, რომ მომდევნო საპარლამენტო არჩევნებში, რომელიც 31 ოქტომბერს გაიმართება, აუცილებლად გავიმარჯვებთ, იმიტომ რომ დღეს ეს გამარჯვება ყველაზე მეტად სჭირდება ჩვენს ქვეყანას. ჩვენ დღეს ყველაზე მეტად გვჭირდება სიმშვიდე, მშვიდობა და სტაბილურობა. ერთადერთი პოლიტიკური ძალა, პოლიტიკური გუნდი, რომელსაც ამ ყველაფრის შენარჩუნება შეუძლია, არის პარტია „ქართული ოცნება-დემოკრატიული საქართველო“ და მჯერა, რომ ჩვენ ერთად გავიმარჯვებთ და ერთად მივაღწევთ წარმატებას. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ტყიბულის მოსახლეობას მაჟორიტარი დეპუტატობის კანდიდატი ბეჟან წაქაძე წარუდგინეს.

მოგესალმებით, წყალტუბოელებო! წყალტუბო, ყველანაირი გადაჭარბების გარეშე, საქართველოს ბრილიანტია და მე არ ვსაუბრობ მხოლოდ ბუნებაზე. აქ ყველაზე მნიშვნელოვანია ადამიანები, ყველაზე მნიშვნელოვანი ხართ თქვენ, თუმცა ეს ბუნება საქართველოსთვისაც შეუდარებელია. წყალტუბო, რომლის ბალნეოლოგიური ისტორია ასწლეულების განმავლობაში იწერებოდა, სამწუხაროდ, უყურადღებოდ იყო, მაგრამ გარწმუნებთ, ეს დასრულდება. საერთოდ, საქართველოს ბალნეოლოგიური, სამედიცინო-სამკურნალო ტურიზმის მომავალი წყალტუბოსთან იქნება დაკავშირებული და ჩვენ ამაში ეჭვი არ გვეპარება. დარწმუნებული ვარ, ის შესაძლებლობა, რომელსაც წყალტუბო შექმნის დასაქმების, მკურნალობის, ქვეყანაში სამედიცინო ტურიზმის განვითარების თვალსაზრისით, იქნება უნიკალური, თუმცა ამას დასჭირდება 24-საათიანი მძიმე შრომის წლები. ჩვენ ძალიან დიდი იმედი გვაქვს ბიძინა ივანიშვილის ახალი ინიციატივის - წყალტუბოს განახლების პროექტის მხარდაჭერის, რომელიც უახლოეს პერიოდში დაიწყება და ეს ახალ სიცოცხლეს, ახალ ენერგიას, ახალ ძალას შესძენს წყალტუბოს, მთლიანად იმერეთის რეგიონს და რა თქმა უნდა, საქართველოს. მიუხედავად იმ ფრთხილი მცდელობებისა, რაც ჩვენ გვქონდა წყალტუბოს განვითარებისთვის, ეს იმდენად დიდი და მასშტაბური პროექტია, რომ ყოველთვის გვიჭირდა მასთან შეხება, მისი წამოწყება. ტურისტული თვალსაზრისით საქართველოს საკმაოდ ბევრი მნიშვნელოვანი ადგილი აქვს განსავითარებელი და ყველამ კარგად ვიცით, რომ მთავრობის ყურადღება პირველ რიგში მიპყრობილი იყო ბაკურიანის, გუდაურის, ბათუმის, კახეთის რეგიონის მიმართულებით, თუმცა მერწმუნეთ, წყალტუბოს ჯერი მოვიდა. ეს გადადება არ იყო იმით გამოწვეული, რომ წყალტუბოს მნიშვნელობას ვერ ვაცნობიერებდით. პირიქით, ეს იმდენად დიდი და მნიშვნელოვანი პროექტია, თუ სრულად არ ვიქენით მზად იმისთვის, რომ ამას ხელი მოვკიდოთ, საერთოდ შეუძლებელია ამაზე საუბრის დაწყება. თუმცა, გარწმუნებთ, ჩვენ ამისთვის მზად ვართ და უახლოეს პერიოდში ყველანი ერთად ვნახავთ, წყალტუბოს განვითარების, აღდგენის ტემპები ეტაპობრივად როგორ დაჩქარდება. გარდა ამისა, რა თქმა უნდა, უნდა გვახსოვდეს, რომ წყალტუბოში ქვეყნის ენერგოდამოუკიდებლობისთვის უაღრესად მნიშვნელოვანი „ნამახვანის“ პროექტი მიმდინარეობს, რომელიც არის 433 მეგავატი დადგმული სიმძლავრის სადგური და რომლის საინვესტიციო ღირებულება 750 მლნ აშშ დოლარია. მშენებლობის ეტაპზე, გარანტირებულად არის 3 000 სამუშაო ადგილი ადგილობრივებისთვის და შემდგომ, ეს არის ადგილობრივ მუნიციპალიტეტში მინიმუმ 5 მლნ აშშ დოლარის დამატებითი შემოსავალი, რომელიც ჩვენს მოქალაქეებზე უნდა დაიხარჯოს. ძირითადი პრობლემა და ამოცანა დღეს არის სამუშაო ადგილები. ამიტომ, უნდა ვიშრომოთ იმისთვის, რომ მაქსიმალურად, ამ ეკონომიკური კრიზისის და პანდემიის შემდგომ სწრაფად მოხდეს ქვეყნის ეკონომიკური აღდგენა, აღორძინება, რათა, სამუშაო ადგილების შენარჩუნებასთან ერთად, სწრაფად შევქმნათ ახალი სამუშაო ადგილები. არ უნდა დაგვავიწყდეს და წყალტუბოში განსაკუთრებით ხმამაღლა უნდა ვთქვათ ჩვენს დევნილებზე. მოგეხსენებათ, მინიმუმი, რაც მთავრობას შეუძლია მათთვის გააკეთოს, იზრუნოს მათ სოციალურ მდგომარეობაზე, ელემენტარული საცხოვრებლით დააკმაყოფილოს ჩვენი მოქალაქეები, რომლებიც, საუბედუროდ, სამშობლოში გახდნენ დევნილები და ამ მიმართულებითაც წყალტუბოში საკმაოდ სერიოზული ნაბიჯები იდგმება. ჩვენ წლის ბოლომდე დავაკმაყოფილებთ კიდევ 3 000 ოჯახს, რომელთაგანაც 2 000 იქნება ახალი საცხოვრებელი, 1 000 ადამიანს კი დღევანდელი საცხოვრებელი დაუკანონდება. ხაზგასმით მინდა აღვნიშნო, რომ „ქართული ოცნების“ ყურადღების ცენტრში ყოველთვის იყო ადამიანი, ჩვენი ბავშვები, რომელთა განათლებაზეც ვზრუნავთ და ამიტომ გვაქვს სისტემური რეფორმა განათლების სისტემაში; ჩვენი ღვაწლმოსილი მოხუცები და მათი საპენსიო უზრუნველყოფა და ამიტომ გამოვიტანეთ საკანონმდებლო ცვლილება, რომელიც არ არის დამოკიდებული არჩევნებზე და პარტიულ ცვლილებებზე, არამედ კანონი განსაზღვრავს ყოველწლიურად პენსიონერებისთვის პენსიის ზრდას; ჩვენი მასწავლებლები, ექიმები, პოლიციელები - ეს ის ხალხია, რომელზეც ყოველდღიური ზრუნვა სახელმწიფოს ვალდებულებაა იმისთვის, რომ ეს ადამიანები უკეთესად მოემსახურონ საქართველოს თითოეულ მოქალაქეს. რა თქმა უნდა, წყალტუბოში არ უნდა დაგვავიწყდეს საუბარი სოფლის მეურნეობაზეც, იმიტომ, რომ უაღრესად ნაყოფიერი მიწა გაქვთ. ისევე, როგორც ბალნეოლოგია იყო წყალტუბოს ნიშანი, სოფლის მეურნეობის გარკვეული დარგებიც იყო წყალტუბოსთვის დამახასიათებელი და წამყვანი. ჩვენ აქ უახლოეს მომავალში დავბრუნდებით კონკრეტული წინადადებებითა და პროექტებით, რომლებზეც უკვე შეთანხმებული ვართ სოფლის მეურნეობის სამინისტროსთან და აქ, პირველად საქართველოში, შეიქმნება სოფლის მეურნეობის განვითარების კონკრეტული კლასტერი, რომელიც მიმართული იქნება კონკრეტული კულტურების წარმოების და შემდეგ მათი გადამუშავების, დასაწყობების, დაფასოების და უცხოურ ბაზრებზე წვდომისთვის. ამისთვის ჩვენ გამოვიყენებთ ქუთაისის აეროპორტს და ეს ინფრასტრუქტურა ამ ზონაში მოეწყობა. ბოლო წლების განმავლობაში, ბევრი ძალიან მნიშვნელოვანი საქმე გვაქვს დაწყებული ქვეყნისთვის, მაგრამ ყველა ვხვდებით, რომ ბევრი საქმე გვაქვს გასაგრძელებელი და დასასრულებელი. ეს ყველაფერი ერთად უნდა გავაკეთოთ. ერთ-ერთი ასეთი საქმე, რომელიც ჩვენ ერთად დავიწყეთ 2012 წელს და უნდა დავასრულოთ, რა თქმა უნდა, იქნება ოქტომბრის არჩევნები, იქნება არჩევნების ხარისხი, იქნება ის, რომ თითოეულ პოლიტიკურ ძალას შეეძლება, სამართლიან, დემოკრატიულ გარემოში წარმოაჩინოს თავი. დარწმუნებული ვარ, ჩვენი კანდიდატი, გივი ჭიჭინაძე, რომელიც ამ რეგიონის შვილია, რომელმაც იმიტომ, რომ აქ მუშაობდა გუბერნატორად, ზედმიწევნით, ზუსტად იცის თითოეული სოფლის, რაიონის და რეგიონის პრობლემები, იქნება ღირსეული ხმა საქართველოს პარლამენტში და ჩვენ ღირსეულად გავიმარჯვებთ სამართლიან ბრძოლაში. გავიმარჯვებთ, იმიტომ, რომ ჩვენი საბოლოო მიზანია, რა თქმა უნდა, ეკონომიკურად ძლიერი, განათლებული, სამართლიანი და ევროპული სახელმწიფოს აშენება. გამარჯვებას გისურვებთ!

მოგესალმებით! ჩემთვის ძალიან დიდი პატივია თქვენს წინაშე, საკუთარ სამშობლოზე შეყვარებული, მშრომელი, მომავლის იმედით აღსავსე ხალხის წინაშე წარდგომა. შეუძლებელია, არ აღფრთოვანდე უნიკალური ბალნეოლოგიური კურორტით, გამორჩეული ბუნებით, იმ უდიდესი პოტენციალით, რომელიც ამ ულამაზეს ქალაქს, წყალტუბოს გააჩნია. შეუძლებელია მომავლის უდიდესი იმედი არ გაგიჩინოს ამ ქალაქში მიმდინარე სამუშაოებმა, რომელიც წყალტუბოს, არა მხოლოდ რეგიონში, არამედ მთელს ევროპაში კვლავაც ერთ-ერთ გამორჩეულ კურორტად, ტურისტულ ცენტრად აქცევს და მთლიანად მუნიციპალიტეტს ახალ სიცოცხლეს შესძენს. ამის გარანტი, რა თქმა უნდა, ჩვენი პარტიის დამფუძნებელი და თავმჯდომარე, უანგარო ქველმოქმედი ბიძინა ივანიშვილია, რომელმაც მთელი ქვეყნის მასშტაბით ძალიან ბევრი, მნიშვნელოვანი საქველმოქმედო პროექტი განახორციელა. წყალტუბოს აღმშენებლობა ათობით ათას სამუშაო ადგილს შექმნის, წყალტუბოს კი ასობით ათასი ტურისტის მიღება შეეძლება, რაც განვითარებულ ტურიზმს, ეკონომიკას, მეტი სიმდიდრის გაჩენას ნიშნავს. აუცილებელია ითქვას, რომ წყალტუბოს აღორძინების პროექტი თავისი მასშტაბებით, იმდენად გამორჩეულია, რომ, ეკონომიკური თვალსაზრისით, მთელი იმერეთის რეგიონზე მოახდენს უდიდეს პოზიტიურ გავლენას. განვითარება და ადამიანზე ზრუნვა, რომ ჩვენი პოლიტიკური გუნდის ამოსავალი წერტილია, რასაც ყველაზე უკეთ, დარწმუნებული ვარ, თითოეული თქვენგანი ხედავს. მარტივად შესამჩნევია, რომ 2012 წლის შემდეგ, უძრაობიდან, ქვეყანა და მათ შორის წყალტუბო მნიშვნელოვნად განვითარდა. იმ აღმშენებლობასთან ერთად, რომელიც მუნიციპალიტეტში ახლა მიმდინარეობს, განვლილი 8 წლის განმავლობაში, მსხვილი ინფრასტრუქტურული, ეკონომიკური და სოციალური პროექტები თუ პროგრამები განხორციელდა, რამაც მოსახლეობას მცირე ბიზნესის კეთების გამარტივებული შესაძლებლობა, დამატებითი სამუშაო ადგილები და მეტი კეთილდღეობა შეუქმნა. კარგად გვესმის, რომ წარმატებების კვალდაკვალ, ჩვენს წინაშე კვლავაც უამრავი გამოწვევაა, არსებობს პრობლემები, რომლებიც ერთად, აქტიური თანამშრომლობით უნდა დავძლიოთ. მე დარწმუნებული ვარ, რომ ამ ყველაფერში თითოეული თქვენგანის როლი, მუნიციპალიტეტში მცხოვრები თითოეული ადამიანის როლი არის მნიშვნელოვანი. მინდა, ყველას წარმატებები გისურვოთ და დარწმუნებული ვარ, 2020 წლის საპარლამენტო არჩევნებში, რომელიც 31 ოქტომბერს გაიმართება, აუცილებლად გავიმარჯვებთ! გავიმარჯვებთ ერთიანი ძალისხმევით, ერთმანეთის მხარდამხარ და ეს არ იქნება მხოლოდ პარტიული გამარჯვება, ეს არ იქნება მხოლოდ ჩვენი კანდიდატის გამარჯვება, ეს იქნება სრულიად საქართველოს გამარჯვება! ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა წყალტუბოს მოსახლეობას მაჟორიტარი დეპუტატობის კანდიდატი გივი ჭიჭინაძე წარუდგინეს.

მოგესალმებით, ხონელებო! დიდი პატივია დღეს აქ თქვენთან ერთად უძველეს ქალაქში ყოფნა და მომავალზე საუბარი. ეს ძალიან მნიშვნელოვანია, ვინაიდან, როდესაც მომავალზე ვსაუბრობთ, არ უნდა დაგვავიწყდეს წარსული, ყოველთვის უნდა გვახსოვდეს, საიდან მოვდივართ და ვისი შვილები ვართ. დღეს გლობალური პანდემიის პირობებში ვართ და ერთმანეთთან საუბარი პირბადეების ტარებით გვიწევს, ამასაც დრო დასჭირდება, ერთმანეთს უნდა გავუფრთხილდეთ და წესები უნდა დავიცვათ. ეს ვახსენე იმიტომ, რომ ბოლო წლების განმავლობაში ხონისთვის ტურიზმს ძალიან დიდი მნიშვნელობა ჰქონდა. აქ სერიოზული მოძრაობა და ინვესტიციები იყო, მაგრამ დროებით ეს ყველაფერი გაჩერდა. ამით იმის თქმა მინდა, რომ ოკაცეს კანიონი და კინჩხის ჩანჩქერი ძალიან კარგია, ძალიან მაგარია და რაც უფრო მეტი ასეთი პროექტი იქნება, მით უკეთესია, მაგრამ მარტო ტურიზმზე არ უნდა ვიყოთ დამოკიდებული. უნდა განვავითაროთ სხვა მიმართულებებიც, როგორიც ხონში იყო სოფლის მეურნეობის მიმართულება, რომელსაც უფრო აქტიურად უნდა დავუბრუნდეთ. დღეს სახელმწიფო ბევრი სხვადასხვა პროგრამით - „შეღავათიანი აგროკრედიტი“, „დანერგე მომავალი“, „აწარმოე საქართველოში“ სხვადასხვა პროგრამით, ეხმარება თითოეულ მოქალაქეს, ვისაც აქვს სურვილი, თავისი საქმე დაიწყოს, გლეხობიდან გახდეს ძლიერი ფერმერი. ციფრებში რომ ჩავიხედე, ხონში ამ მხრივ რა ხდება, საკმაოდ მცირე ციფრებია. „შეღავათიანი აგროკრედიტის“ თვალსაზრისით, ბოლო 5 წლის განმავლობაში დაახლოებით 7 მილიონი ლარია გამოყენებული, რაც ხონისთვის საერთოდ არაფერია. „დანერგე მომავლის“ ნაწილში ჩაის პლანტაციებია გამოყენებული და ისიც ბევრი არ არის, მიუხედავად იმისა, რომ ხონს ამის ძალიან დიდი პოტენციალი აქვს. ხონში შესანიშნავი იუსტიციის სახლი გაქვთ. ჩვენ გავაკეთეთ სპეციალური პროგრამა - „სახელმწიფო - შენი პარტნიორი“, რაც ნიშნავს იმას, რომ ხონელს თბილისში, რომელიმე სამინისტროში ჩასვლა აღარ დასჭირდება. ყველა ის სერვისი, რომლითაც სახელმწიფო დღეს თითოეულ მოქალაქეს ეხმარება, შეგიძლიათ, ხონის იუსტიციის სახლში მიიღოთ. დეტალურად არის განმარტებული ყველა პროგრამა, რომელსაც დღეს სახელმწიფო ახორციელებს მოსახლეობის დასახმარებლად. ასე რომ, უნდა გვქონდეს უფრო მეტი ინიციატივა, მეტი პასუხისმგებლობა, უფრო მეტი რისკი უნდა ავიღოთ ჩვენს თავზე და გვქონდეს იმის იმედი, რომ სახელმწიფო გვერდით დაგვიდგება. მიუხედავად პანდემიისა და ეკონომიკური კრიზისისა, არც ერთი წუთით და არც ერთი წამით, სისტემური ინფრასტრუქტურული პროექტები არ გაჩერებულა, ისეთი, როგორიც არის რიკოთი, ქუთაისის აეროპორტი და სხვა. ეს ყველაფერი გამოგვადგება იმისთვის, რომ უახლოეს პერიოდში, როგორც კი გავიმარჯვებთ პანდემიაზე, რა თქმა უნდა, სულ უფრო და უფრო მეტი ტურისტი უნდა მივიღოთ, რაც სწრაფ ეკონომიკურ აღდგენაში დაგვეხმარება. საბოლოო ჯამში, ხონში, თბილისში, ბათუმში, ზუგდიდში, თელავში, საქართველოში დღეს ყველაზე მძიმე პრობლემა სამუშაო ადგილებია და ამ პრობლემას, ყველა ერთად უნდა გავუმკლავდეთ და ყველამ ერთად უნდა გავიმარჯვოთ ამ პრობლემაზეც. ყველას უნდა გვახსოვდეს, რომ დღეს, სახელმწიფო თავის სოციალურ პასუხისმგებლობას თითოეული მოქალაქის მიმართ სრულად აცნობიერებს. ჩვენ ძალიან კარგად გვესმის, რას ნიშნავს სახელმწიფოს პასუხისმგებლობა ბავშვების მიმართ და ამიტომ დავიწყეთ სისტემური რეფორმა განათლებაში. ჩვენ ძალიან კარგად გვესმის, რას ნიშნავს სახელმწიფოს პასუხისმგებლობა ჩვენი ხანდაზმული მოხუცების და პენსიონერების წინაშე, ამიტომ შევიტანეთ საკანონმდებლო ცვლილებები და არჩევნებიდან არჩევნებამდე ჩვენს პენსიონერებს აღარ ექნებათ იმის მოლოდინი, რომ ვიღაც პოლიტიკური ძალა მოვა და პენსიას გაუზრდის. დღეს, საკანონმდებლო დონეზე არის შეტანილი ცვლილებები და ყოველ წელს, პენსიის ზრდა მოხდება ეკონომიკური ზრდის პარალელურად. ეს არ იქნება მცირე თანხა. გარდა ამისა, ჩვენ ძალიან კარგად გვესმის, რომ სახელმწიფომ უნდა გააძლიეროს მასწავლებელი, ექიმი, პოლიციელი. ეს ის ხალხია, რომლებიც ჩვენს მოქალაქეებზე ზრუნავენ და რომლებიც სახელმწიფო სერვისებით ემსახურებიან საქართველოს მოქალაქეებს. ჩვენ ყველას კარგად უნდა გვესმოდეს, რომ ქვეყნისთვის მნიშვნელოვანი ბევრი საქმე ერთად გვაქვს დაწყებული და ეს ერთად დაწყებული საქმე ერთად უნდა დავასრულოთ, იმისთვის, რომ საბოლოო ჯამში ჩვენი გამარჯვების ნიშანი იყოს ეკონომიკურად ძლიერი, განათლებული, სამართლიანი და ევროპული სახელმწიფო, იმისთვის, რომ ჩვენ ყველამ ერთად შევძლოთ, სულ მალე მივუკაკუნოთ ჩვენს ევროპელ მეგობრებს და ვუთხრათ, რომ საქართველო იმსახურებს ამ ღირსეულ ოჯახში გაწევრიანებას. დარწმუნებული ვარ, ამ ნაბიჯის კიდევ ერთი დამადასტურებელი ფაქტი იქნება, ყველაზე სუფთა, ყველაზე დემოკრატიული არჩევნები, რომელსაც ჩვენ ჩავატარებთ 31 ოქტომბერს. ჩვენ უბრალოდ არ გვჭირდება არაფერი, ჩვენი მოსახლეობა ყველაფერს ძალიან კარგად ხედავს. ჩვენ უნდა ჩავატაროთ სუფთა არჩევნები და სამართლიან ბრძოლაში ყველამ ერთად უნდა გავიმარჯვოთ. ეს იქნება საქართველოს გამარჯვება და დარწმუნებული ვარ, ბატონი გივი ჭიჭინაძე იქნება უაღრესად კეთილსინდისიერი და ხონელების ეფექტური ხმა საქართველოს პარლამენტში. ეს ადამიანი იყო ამ რეგიონის გუბერნატორი, ზედმიწევნით იცის ყველა პრობლემა, თითოეულ სოფელში მისულია და დარწმუნებული ვარ, არჩევნებიდან მეორე დღეს, როდესაც გაიმარჯვებს, ის შეუდგება იმერეთის და, რა თქმა უნდა, ხონის ღირსეულ მსახურებას. გამარჯვებას გისურვებთ!

მოგესალმებით! ძალიან მოხარული ვარ, რომ დღეს თქვენთან შეხვედრის შესაძლებლობა მაქვს ამ ისტორიულ ადგილზე, რომელსაც ჩვენი ქვეყნის განვითარებისთვის, საუკუნეების მანძილზე, საკმაოდ დიდი როლი ჰქონდა. ხონის მუნიციპალიტეტის ტერიტორიაზე ჯერ კიდევ ადრეულ ბრინჯაოს ხანაში ცხოვრობდნენ ადამიანები, რაც საქართველოს უდიდესი წარსულის ერთ-ერთი თვალსაჩინო მაგალითია. ჯერ კიდევ მე-16 საუკუნიდან ხონი საეპისკოპოსო ცენტრად იქცა, რაც მის უდიდეს მნიშვნელობაზე, კულტურულ, ისტორიულ და რელიგიურ ღირებულებაზე მეტყველებს. ყველაზე კარგად აქ შეკრებილმა ადამიანებმა იციან, თუ რა ხდებოდა ხონში 2012 წლამდე. მუნიციპალიტეტი, ფაქტობრივად, ჭაობში იყო ჩაფლული, შეფერხებული იყო განვითარება, ქალაქში შექმნილი დოვლათი კი ერთეული ადამიანების კეთილდღეობას ხმარდებოდა. ამის საპირისპიროდ, ხელისუფლებაში „ქართული ოცნების“ მოსვლის შემდეგ, მდგომარეობა ყველა მიმართულებით არსებითად გაუმჯობესდა. ხალხის ხარჯზე სარგებლის მიღების ნაცვლად, დღეს ხელისუფლება საზოგადოებაზე, ჩვენი ქვეყნის თითოეულ მოქალაქეზე ზრუნავს. კონკრეტულად ხონის მუნიციპალიტეტში ადგილობრივებზე, რეგიონის სპეციფიკაზე მორგებული უმსხვილესი ინფრასტრუქტურული პროექტები, ეკონომიკური, სოფლის მეურნეობის, ტურიზმისა და ადგილობრივი ბიზნესის განვითარებისკენ მიმართული პროგრამები მოქმედებს, რაც სახელმწიფოსა და მოქალაქეების თანამშრომლობის უნიკალურ მაგალითებს ქმნის და საბოლოოდ კეთილდღეობის ზრდისკენ, დამატებითი სამუშაო ადგილების შექმნისა და მეტი განვითარებისკენ არის მიმართული. რა თქმა უნდა, ამაზე არ უნდა შევჩერდეთ და მომდევნო წლების განმავლობაში კვლავ გაგრძელდება რეგიონების, მუნიციპალიტეტების, სოფლების განვითარების ხელშეწყობა. ასევე დიდი ყურადღება დაეთმობა მომავალში განათლებას, კულტურის განვითარებას, რადგან ჩვენ გვყავს ძალიან ნიჭიერი, ძალიან მაგარი მომავალი თაობები და ახალგაზრდები. დამერწმუნეთ, წინსვლის პარალელურად, ხელისუფლების თითოეული წარმომადგენელი კიდევ უფრო დიდ პასუხისმგებლობას გრძნობს. ჩვენ ზუსტად ვიცით, რომ მიღწეული საკმარისი არ არის. ზუსტად ვიცით, რომ ჯერ კიდევ არსებობს გამოწვევები, ჯერ კიდევ არსებობს პრობლემები და ისიც ვიცით, თუ როგორ უნდა მოვაგვაროთ ეს პრობლემები, როგორ უნდა ვუპასუხოთ ამ გამოწვევებს და აქაც ძალიან მნიშვნელოვანია ჩვენი ერთად დგომა. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ხონის მოსახლეობას მაჟორიტარი დეპუტატობის კანდიდატი გივი ჭიჭინაძე წარუდგინეს.

მოგესალმებით, სამტრედიელებო! დიდი პატივი და პასუხისმგებლობაა, დღეს აქ, დიდი ნიკო ნიკოლაძის სახლ-მუზეუმში მომავალზე საუბარი. ასევე დიდი პატივია, დღეს სამტრედიაში მომავალზე საუბარი კახი კალაძესთან ერთად. წარსულიც არ უნდა დაგვავიწყდეს და უნდა გვახსოვდეს ყოველთვის და ეს წარსული იყო ამ ქალაქის სიძლიერის წარსული. სამტრედია ყოველთვის იყო გამორჩეული ქალაქი საქართველოში, თავისი სარკინიგზო, სატრანსპორტო კვანძით და სამწუხაროდ, 90-იანი წლების შემდეგ, ეს ფუნქციაც შენელდა, დაიკარგა. ახლა, ჩვენ ყველაფერი უნდა გავაკეთოთ იმისთვის, რომ ეს ფუნქცია, სულ უფრო და უფრო აქტუალური გახდეს. ყველამ კარგად იცით, რომ სახელმწიფო, დიდ, მსხვილ, სისტემურ ინფრასტრუქტურულ პროექტებში დიდ ფინანსურ რესურსს ხარჯავს. მიუხედავად იმისა, რომ მთელი მსოფლიო პანდემიას, ეკონომიკურ კრიზისს ებრძვის და ჩვენც, ყველანი აქ ვსხედვართ და იძულებული ვართ პირბადით ვიყოთ, არც ერთი დღე, არც ერთი სისტემური პროექტის, ჩქაროსნული გზის მშენებლობა არ გაჩერებულა. ესეც სამტრედიის მომავალია, იმიტომ, რომ ქუთაისის შემოვლითი გზა და შემდეგ უკვე სამტრედია-გრიგოლეთის გზა, სულ სხვა ხარისხის სიცოცხლე იქნება აქ. აქაურ ახალგაზრდებს არ დასჭირდებათ, საცხოვრებლად სხვაგან გადავიდნენ. მათ სახელმწიფოს მხრიდან უნდა მიიღონ საბაზისო სერვისები - განათლება, ჯანდაცვა, სპორტი, კულტურა, ყველაფერი ისეთი, როგორც სხვა ქალაქებში. გარდა ამისა, სამტრედიის სატრანსპორტო კვანძის ფუნქციას, ასევე, დაემატება აეროპორტი. ქუთაისის აეროპორტს კი ეძახიან, მაგრამ ეს აეროპორტი სამტრედიასთან უფრო ახლოს არის და მას თავისი ფუნქცია აქვს. ჩვენ ყველაფერი უნდა გავაკეთოთ იმისთვის, რომ სამტრედია გახდეს სატრანსპორტო კვანძის შემდგომი გაძლიერების ყველაზე მნიშვნელოვანი ცენტრი საქართველოში. ეს ფუნქცია ამ ქალაქს ისტორიულად ჰქონდა და იმის მაგივრად, რომ ჩვენ რაღაც ახალი მოვიგონოთ, უნდა გავაგრძელოთ ის, რაც ყოველთვის ვიცოდით და რაშიც ყოველთვის ძლიერები ვიყავით. გარდა ამისა, რა თქმა უნდა, სამტრედია სოფლის მეურნეობის გარეშე შეუძლებელი და წარმოუდგენელია. ამიტომ, უნდა ვიშრომოთ და მივეხმაროთ ჩვენს გლეხს, გახდეს ძლიერი ფერმერი. ვიდრე ჩამოვიდოდი, ციფრებში ჩავიხედე და ცოტა ნაწყენი დავრჩი, იმიტომ, რომ სახელმწიფო ძალიან ბევრ პროგრამას სთავაზობს, განსაკუთრებით გლეხებს. რაც ვნახე, 2012 წლიდან, სამტრედიაში სოფლის მეურნეობის დახმარების პროგრამებით დაახლოებით 16 მლნ ლარია გამოყენებული, ეს ძალიან ცოტაა. „დანერგე მომავლის“ ფარგლებში, სამტრედიაში გაშენებულია ახალი, თანამედროვე ინტენსიური კულტურებიც, სულ რაღაც 60 ჰა, საერთოდ არაფერია ეს. მარტო სამტრედიაში არ ხდება ეს, სხვაგანაც ასეა. ამიტომ, ჩვენ გავაკეთეთ ახალი პროგრამა, რომელსაც ჰქვია „სახელმწიფო - შენი პარტნიორი“, რაც ნიშნავს იმას, რომ თითოეულ ქალაქში, მათ შორის, სამტრედიაშიც საზოგადოებრივ ცენტრში, ან იუსტიციის სახლში ზუსტად იმავე სერვისებს მიიღებთ, რისთვისაც გიწევდათ თბილისში ჩასვლა. ჩვენ ყველაფერი უნდა გავაკეთოთ იმისთვის, რომ ახალგაზრდობას, რომელიც მზად არის, დაიწყოს თავისი საქმე, გახსნას ბიზნესი, ეს იქნება ტურისტული, სოფლის მეურნეობა, სატრანსპორტო, არ აქვს მნიშვნელობა, სახელმწიფო მას უნდა მიეხმაროს, წაახალისოს და მივეხმარებით. აქ ხომ ყველაზე მნიშვნელოვანი არის ის, რომ ადამიანმა იგრძნოს პასუხისმგებლობა, არა მთავრობას და სახელმწიფოს შეჰყურებდეს ხელში, არამედ გადადგას პირველი ნაბიჯი, დაიწყოს თავისი საქმე. მას, რა თქმა უნდა, მიხმარება სჭირდება, იმისთვის, რომ ღირსეულად იშრომოს და ღირსეულად არჩინოს თავისი ოჯახი, შემდგომ დაეხმაროს მეზობელს, ნათესავს და ასე გაძლიერდეს ნელ-ნელა, გლეხი გახდეს ძლიერი ფერმერი. ამისთვის კეთდება ყველა ეს პროგრამა, რათა ჩვენმა მოქალაქეებმა ეს პირველი ნაბიჯი გადადგან. ეს არ არის მარტივი, რთულია, მაგრამ მინდა იცოდეთ, რომ ყველა ასეთ ადამიანს, ვისაც არ შეეშინდება, ვისაც ცოდნა, ინიციატივა აქვს, სახელმწიფო დაუდგება გვერდით. სახელმწიფოს პირდაპირი ვალდებულებაა, რომ ბავშვის საუკეთესო ინტერესი დაიცვას, საერთოდ არავის ახსოვდა ეს წლების წინ. ამიტომ ჩვენ ყველაფერი უნდა გავაკეთოთ იმისთვის, რომ ჩვენს ბავშვებს სხვაობა არ ჰქონდეთ, დაიბადებიან ისინი თბილისში, ბათუმში, დიდ ჯიხაიშში, თუ კიდევ სხვაგან, მათ ერთნაირი დონის განათლება უნდა მიიღონ და ამისთვის ტარდება განათლების რეფორმა. ჩვენი ღვაწლმოსილი მოხუცები, არ უნდა იყვნენ დამოკიდებულნი არჩევნებიდან არჩევნებამდე მოსული პოლიტიკური ძალა დაპირდება თუ არ დაპირდება პენსიის გაზრდას. სწორედ ამიტომ შევცვალეთ ჩვენ ეს საკანონმდებლო დონეზე და დღეს გარანტირებულია პენსიის ზრდა ყოველწლიურად, ის ეკონომიკურ ზრდასთან მიბმულია. სახელმწიფოს ფუნდამენტი არის ძლიერი მასწავლებელი, ძლიერი ექიმი, ძლიერი პოლიციელი და ჩვენ ყველაფერი უნდა გავაკეთოთ იმისთვის, რომ ამ ხალხს გვერდით დავუდგეთ, რადგან ეს არის სახელმწიფოს განსახიერება, ეს ის ხალხია, რომლებიც ზრუნავენ ჩვენს მოქალაქეებზე. ადამიანი ხვდება ჩვენი ყოველი ნაბიჯის, ყველანაირი პოლიტიკის ცენტრში. ყველაფერი უნდა გავაკეთოთ იმისთვის, რომ მას შემდეგ, რაც ერთად, ერთობლივი შრომით ქვეყანას, სისტემურ ინფრასტრუქტურას მოვიყვანთ წესრიგში, მას შემდგომ, რაც გვეყოლება ძლიერი მასწავლებელი, ძლიერი ექიმი და პოლიციელი, გვეყოლება ღირსეული სიბერის მქონე პენსიონერი, ვიზრუნებთ ბავშვებზე, რა თქმა უნდა, ჩვენ თანაბარი პირობები უნდა შევქმნათ თითოეული ადამიანისთვის და მივცეთ საშუალება, მოახდინონ საკუთარი თავის რეალიზება. ეს არის ყველაზე მნიშვნელოვანი. ყველამ კარგად იცით, რომ სამტრედიაში დღეს ძალიან მწვავე პრობლემებია, როგორიც არის წყალმომარაგება. სამტრედიის წყალმომარაგების და წყალარინების სისტემა ძალიან ცუდ მდგომარეობაშია. ეს პროექტი უკვე დაწყებულია და მისახედია. უნდა გავაკეთოთ, ისევე, როგორც სარწყავი წყალი. თქვენს შემთხვევაში, ზოგჯერ წყალი გასატანია, პირიქით, საირიგაციო სამუშაოები სხვანაირად არის გასაკეთებელი, მაგრამ ესეც ძალიან მნიშვნელოვანია იმისთვის, რომ არც ერთი გოჯი მიწა არ დარჩეს დაუმუშავებელი. ეს ყველაფერი ჩვენ უნდა გავაკეთოთ ერთად. აქ, ყველაზე მთავარი არის ის, რომ „ქართულმა ოცნებამ“ ზედმიწევნით იცის, სად, რომელ სოფელში რა პრობლემაა. ამ პრობლემების გადაწყვეტა უკვე დაწყებულია და ჩვენ, ყველაფერი უნდა გავაკეთოთ იმისთვის, რომ ერთად, უახლოეს პერიოდში ვიამაყოთ ეკონომიკურად ძლიერი, სამართლიანი, რა თქმა უნდა, განათლებული და ევროპული სახელმწიფოთი. ეს არის ჩვენი ძირითადი მიზანი. დარწმუნებული ვარ, რომ გივი ჭიჭინაძე, ადამიანი, რომელიც ამ კუთხის შვილია, რომელსაც უმუშავია გუბერნატორად და ზედმიწევნით ზუსტად იცის თითოეული სოფლის, თითოეული რეგიონის პრობლემა, იქნება სამტრედიელების ღირსეული ხმა ქვეყნის პარლამენტში. დარწმუნებული ვარ, ჩვენ, ყველანი ერთად, რაც მთავარია სამართლიან ბრძოლაში გავიმარჯვებთ. გამარჯვებას გისურვებთ!

მოგესალმებით! დღეს ჩემთვის აქ დგომა განსაკუთრებით ამაღელვებელია. სწორედ ამ ქალაქში გავატარე ყველაზე ტკბილი, ბავშვობის წლები. სამტრედიაში გატარებული ბავშვობა ყველაზე მხიარულ, ყველაზე საყვარელ, წარუშლელ მოგონებებად იქცა და უკვე ათწლეულებია განსაკუთრებულ ადგილს იკავებს ჩემს ცხოვრებაში. ჩემთვის განსაკუთრებულად სასიხარულოა თქვენთან კიდევ ერთხელ შეხვედრა, უამრავი მეგობრის, მომავლის იმედით სავსე ნაცნობი სახეების დანახვა, რომელთაგანაც უდიდეს სიყვარულს ვგრძნობ ყოველდღიურად. აქ არიან ადამიანები, ვისთანაც ერთად მთელი ამ წლების განმავლობაში ჩვენ ძალიან ბევრი სირთულე გამოვიარეთ. მინდა გავიხსენო წლები, როდესაც მართლაც მარტივი არ იყო დამდგარიყავი სიმართლის მხარეს, არ იყო მარტივი დაგეფიქსირებინა შენი განსხვავებული მოსაზრება, დაგეფიქსირებინა განსხვავებული პოლიტიკური შეხედულებები. ეს ძალიან მძიმე და ძალიან რთული იყო. თუ როგორ გამოვიარეთ ეს, მე მგონი ყველამ კარგად ვიცით. საქართველოში არ არსებობდა ოჯახი, ვისაც საააკშვილის რეჟიმი არ შეხებოდა, მაგრამ ჩვენ მოვახერხეთ ის, რომ არჩევნების გზით, მშვიდობიანი გზით, როგორც ეს ნორმალურ, ყველა განვითარებულ ევროპულ ქვეყანაში ხდება, არჩევნების გზით მოვიგეთ 2012 წლის არჩევნები. დღეს ჩვენი ხელისუფლებისთვის, თანაგუნდელებისთვის ყველაზე მთავარი ღირებულება გახლავთ ადამიანი, ადამიანის თავისუფლება. ბევრი მნიშნელოვანი პროექტი განხორციელდა, თუნდაც იმერეთის რეგიონში, თუნდაც სამტრედიაში, მაგრამ რომ არ დავიწყო ყველა პროექტისა და პროგრამის მოყოლა, რომელიც ჩვენ დავნერგეთ და რომლითაც ძალიან ბევრი მოქალაქე სარგებლობს, მგონი ყველა ვთანხმდებით იმაზე, რომ ჯერ კიდევ არსებობს პრობლემები, ჯერ კიდევ არსებობს გამოწვევები და ამას სჭირდება ბევრი შრომა, 24-საათიანი მუშაობა და ჩვენ მზად ვართ ამისთვის. მზად ვართ იმისთვის, რომ ვემსახუროთ ჩვენს ქვეყანას, ვემსახუროთ ჩვენს ხალხს, ვემსახუროთ იმერეთის რეგიონს, სამტრედიას, სამტრედიელებს, მაგრამ ამ ყველაფერში საჭიროა თქვენი მხარდაჭერა. არ აქვს მნიშვნელობა ეს პოლიტიკა იქნება, ბიზნესი თუ სპორტი. მარტო შეუძლებელია იყო წარმატებული. მნიშვნელოვანია გყავდეს და ზურგს გიმაგრებდეს ძლიერი გუნდი. ზუსტად ასეთ გუნდს წარმოადგენს პარტია „ქართული ოცნება - დემოკრატიული საქართველო“. მე დარწმუნებული ვარ ჩვენი ერთობლივი ძალიხსმევით, ჩვენი ერთიანობით, ჩვენ შევძლებთ იმას, რომ ჩვენი ქვეყანა იყოს წარმატებული. შესაბამისად, ერთად საქართველოს წარმატებისთვის!