პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა სამტრედიის მოსახლეობას მაჟორიტარი დეპუტატობის კანდიდატი გივი ჭიჭინაძე წარუდგინეს.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ და პარლამენტის თავმჯდომარე არჩილ თალაკვაძემ სამტრედია-გრიგოლეთის ჩქაროსნული ავტომაგისტრალის პირველი მონაკვეთის მშენებლობა დაათვალიერეს. პროექტის დასრულების შემდეგ, მოძრაობა გაცილებით კომფორტული გახდება, გაიზრდება უსაფრთხოების დონე, შემცირდება საავტომობილო გადაზიდვების ხარჯი, რაც ხელს შეუწყობს სატრანზიტო მიმოსვლის ზრდას. 2020 წლის ბოლომდე, ჯამში, მთელი ქვეყნის მასშტაბით, ექსპლუატაციაში შევა 70 კმ-მდე ჩქაროსნული მაგისტრალური გზა, რაც ისტორიულად რეკორდული მაჩვენებელია.

მოგესალმებით, ვანელებო! პირველ რიგში, დიდი პატივია აქ, ანტიკურ ქალაქში თქვენთან ერთად საუბარი მომავალზე, თან მე-20 საუკუნის გენიოსი ქართველის - გალაკტიონის სახლ-მუზეუმში. ეს ისეთი სინერგიაა, რომელიც, რა თქმა უნდა, ძალიან დიდ ემოციებს იწვევს. მიუხედავად ჩვენი წარმატებებისა ბოლო წლების განმავლობაში, ქვეყანა, სამწუხაროდ, ისეთ მდგომარეობაშია, რომ ბევრი დაწყებული მაგარი, საჭირო საქმე ერთად გვაქვს დასასრულებელი. მარტივ, ელემენტარულ საკითხებზე ვსაუბრობთ - გზა, წყალი, გაზი, სკოლა, ბაღი და ა.შ. ამ მიმართულებითაც ბევრი გვაქვს გასაკეთებელი. ყველამ კარგად ვიცით, რომ ჩვენ 2012 წელს ქვეყანა ისეთ დღეში დაგვხვდა, რომ ადამიანის ჯანდაცვა საერთოდ იყო უგულებელყოფილი, ბავშვების საუკეთესო ინტერესები იყო უგულებელყოფილი, საერთოდ, გზები, წყალმომარაგება... როგორ შეიძლება, 21-ე საუკუნეში ვანში ნორმალური, 24-საათიანი წყალმომარაგება არ არსებობდეს. ამ ყველაფერს თავი უნდა დავანებოთ, არავის არაფერში უნდა შევეჯიბროთ, თავი უნდა დავხაროთ და 24-საათიანი შრომით, ყოველდღიურად, ჩვენი დღევანდელობა უნდა გავხადოთ უკეთესი, ვიდრე იყო გუშინ და უნდა გვქონდეს ხვალინდელი დღის იმედი. ერთად შრომით უნდა მივაღწიოთ იმას, რომ ხვალინდელი დღე იყოს უკეთესი. მარტივ, ელემენტარულ საკითხებზე უნდა ვიმსჯელოთ. მაგალითად იმაზე, რომ ქვეყანაში შიდა სოფლის გზები უნდა იყოს იდეალურ მდგომარეობაში. ვანში სერიოზული პრობლემაა როგორც წყალმომარაგება, ისე სანიაღვრე არხები, ასევე, მდინარეების კალაპოტების გაწმენდა და კიდევ ბევრი რამ. ყველაფერთან ერთად, რა თქმა უნდა, ჩვენი წარსულიც უნდა გვახსოვდეს და ვანის არქეოლოგიური მუზეუმის გახსნა იქნება სერიოზული ნაბიჯი წინ, იმისთვის, რომ ვანმა არა მხოლოდ ქვეყანაში შეიძინოს მნიშვნელოვანი ტურისტული ფუნქცია, არამედ საერთაშორისო დონეზე. აქ ტურისტების დიდი რაოდენობა ჩამოვა, იმდენად მნიშვნელოვანი ექსპონატები იქნება ამ არქეოლოგიურ მუზეუმში. ვანი ვერ გახდება მხოლოდ და მხოლოდ ტურისტული ცენტრი. ვანში ყოველთვის იყო და ყოველთვის დიდი მნიშვნელობა ექნება სოფლის მეურნეობას. შეუძლებელია, რომ სახელმწიფოს არ ჰქონდეს ის პასუხისმგებლობა, დაეხმაროს გლეხს, რომ გახდეს ძლიერი ფერმერი. სწორედ ამიტომ, ყველა ის პროგრამა, რომელსაც სახელმწიფო ახორციელებდა იმისთვის, რომ ვანში ადამიანს, რომელსაც აქვს სურვილი, თავის თავზე რისკი აიღოს, შიში გადალახოს, გადადგას პირველი ნაბიჯი და თავისი საქმე დაიწყოს, არ აქვს მნიშვნელობა, ეს იქნება სოფლის მეურნეობაში, ტურიზმში, თუ სხვა დარგებში, სახელმწიფო, რა თქმა უნდა, გვერდით უნდა დაუდგეს. ჩვენ ამისთვის გავაკეთეთ პროგრამა - „სახელმწიფო შენი პარტნიორია“, რომელმაც გააერთიანა ყველა ის პროგრამა, რომლითაც სახელმწიფო, თითოეულ ადამიანს ეხმარება. წელს, ვანში გაკეთდა საზოგადოებრივი ცენტრი, რომელიც იუსტიციის სამინისტრომ გახსნა. რა სერვისების, რა ცოდნის, რა ინფორმაციის მიღებაც შესაძლებელია თბილისში და იმისთვის, რომ პროგრამაში - „აწარმოე საქართველოში“ თუ სოფლის მეურნეობის სხვადასხვა პროგრამაში მიგეღოთ მონაწილეობა, ეს იქნება „დანერგე მომავალი“ თუ სხვა რამ, უნდა ჩასულიყავით თბილისში და იქ მიგეღოთ ინფორმაცია. ეს ყველაფერი დღეს აქ გაქვთ, ვანში, საზოგადოებრივ ცენტრში. ერთი ნაბიჯი გაქვთ გადასადგმელი და იქ სრული ინფორმაციაა იმ დონემდე, რომ კონტრაქტის გაფორმებაა შესაძლებელი ამ პროგრამაში მონაწილეობის მსურველებისთვის. ეს ყველაფერი კეთდება მხოლოდ და მხოლოდ იმისთვის, რომ ქვეყანაში შეიქმნას თანაბარი პირობები ყველასთვის და ნიჭიერ ადამიანს, რომელსაც შეუძლია პირველი ნაბიჯი გადადგას, სახელმწიფო დაუდგეს გვერდით და საქართველო გახდეს შესაძლებლობების ქვეყანა, თანაბარი შესაძლებლობის ქვეყანა ყველასთვის, ვისაც შეუძლია, ღირსეული შრომით, ღირსეულად არჩინოს თავისი ოჯახი და შემდეგ, გაძლიერდეს ისე, რომ დაასაქმოს მეზობელი, ნათესავი და ა.შ. ეს არის ძირითადი მიზანი. ეს იყო ყოველთვის „ქართული ოცნების“ მიზანი. „ქართული ოცნების“ ყველაზე მნიშვნელოვანი სამიზნე იყო ადამიანი, მისი ღირსება, სამართლიანობა. ჩვენ ყოველთვის ვამბობდით, რომ შეუძლებელია, სახელმწიფო არ ზრუნავდეს და არ ფიქრობდეს ბავშვებზე და მათი საუკეთესო ინტერესები არ იყოს სახელმწიფოსთვის ყველაზე მნიშვნელოვანი, ისევე, როგორც შეუძლებელია, სახელმწიფო არ ფიქრობდეს ჩვენს ღვაწლმოსილ მოხუცებზე და სამარცხვინო იყო, როდესაც პენსიის ზრდა, არჩევნების წინ, ყოველთვის იყო პოლიტიკური სპეკულაციის საგანი. დღეს, ჩვენ შევძელით ის, რომ საკანონმდებლო დონეზე ეს არის შეტანილი კანონში, რომელიც გარანტიას აძლევს თითოეულ პენსიონერს, ყოველწლიურად, ეკონომიკის ზრდის პარალელურად, მისი შემოსავალი გაიზარდოს. შეუძლებელია, ისეთი სისტემური პროფესიების წარმომადგენლები, როგორებიცაა მასწავლებელი, ექიმი, პოლიციელი, იყვნენ სახელმწიფოს ყურადღების გარეშე. ეს ის ხალხია, რომელიც სახელმწიფოს სახელით ემსახურება ჩვენს თითოეულ მოქალაქეს. რა თქმა უნდა, ამ მიმართულებით ჩვენ უდიდესი ყურადღება გვექნება და მიუხედავად ყველაფრისა, რაც არ უნდა თქვან და ვისაც რა არ უნდა მოსწონდეს, ჩვენ ამ ხალხის მიმართულებით ყურადღებას გავაგრძელებთ. ძირითადი მიზანი იქნება, თანაბარი პირობები შევქმნათ ყველასთვის, არ ჰქონდეს მნიშვნელობა, ახალგაზრდა ვანში ცხოვრობს, თბილისში, ბათუმში, სამტრედიაში თუ ქუთაისში. ყველას უნდა შეეძლოს, მიიღოს ერთნაირი განათლება, ჰქონდეს ერთნაირი შესაძლებლობები, ერთნაირი სამედიცინო და სოციალური დახმარება. ეს არის ჩვენი ძირითადი მიზანი. დარწმუნებული ვარ, ამ მიზნის განსახორციელებლად ჩვენ ერთად გავიმარჯვებთ. რაც მთავარია, ეს გამარჯვება იქნება სამართლიან ბრძოლაში და ეს არ იქნება ერთი პარტიის გამარჯვება, ეს იქნება ქვეყნის გამარჯვება. გამარჯვებას გისურვებთ, ვანელებო!

მოგესალმებით ჩემო ძვირფასებო, ჩემო ვანელებო! ჩემთვის პატივია, რომ დღეს ვიმყოფები ამ მშვენიერ მხარეში, ამ ლამაზ მუნიციპალიტეტში, რომელიც ჩემს მშობლიურ სამტრედიასთან ძალიან ახლოს არის. ამაყი ვარ, რომ დღეს ვიმყოფები ქალაქში, რომელიც ფასდაუდებელ ისტორიულ თუ კულტურულ საგანძურს ინახავს. აქ, ვანში, ჯერ კიდევ ანტიკურ ხანაში, კოლხეთისთვის უდიდესი პოლიტიკური, ეკონომიკური, სავაჭრო თუ კულტურული მნიშვნელობის ქალაქი მდებარეობდა, რომელიც იმ პერიოდის სამყაროში, ერთ-ერთი გამორჩეული იყო, რისი დასტურიც ამ მიდამოებში აღმოჩენილი უდიდესი ღირებულების სამკაულები, ხელოვნების ნიმუშები, სამარხები, ჭურჭელი თუ სხვა ექსპონატებია. რა თქმა უნდა, შეუძლებელია, არ აღვფრთოვანდეთ იმ უდიდესი წარსულით, რომელიც ამ ქალაქს გააჩნია, თუმცა, კარგად უნდა გვესმოდეს, რომ აუცილებელია სამომავლო განვითარებაზე ზრუნვა, რასაც, ჩვენი სახელისუფლებო გუნდი უკვე 8 წელია თქვენი აქტიური ჩართულობით აკეთებს. ყველაზე კარგად თქვენ იცით, რომ 2012 წლის შემდეგ, ქვეყანაში და მათ შორის, კონკრეტულად ვანში, ვითარება მკვეთრად უკეთესობისკენ შეიცვალა. დღეს უზრუნველყოფილია მშვიდობა და სტაბილური განვითარების შესაძლებლობა, ქვეყანაში უმთავრესი ღირებულება არის ადამიანი. ჩვენ კარგად გვახსოვს ის წლები, თუ რა დამოკიდებულება იყო კონკრეტული ადამიანების მიმართ, ვისაც ჰქონდა განსხვავებული მოსაზრება. იმ ადამიანებისა და ოჯახების მიმართ, ვისაც ჰქონდა განსხვავებული პოლიტიკური შეხედულებები. დღეს ქვეყანაში განსხვავებული აზრის გამო ადამიანები არ იდევნებიან. მნიშვნელოვანია რეფორმები, რომლებიც განხორციელდა ფაქტობრივად ყველა მიმართულებით: სოფლის მეურნეობა, ჯანდაცვა, განათლება , ეკონომიკის სამინისტროს მიერ წამოწყებული მნიშველოვანი პროგრამები , რითაც ჩვენ შევძელით, რომ ხელი შეგვეწყო მცირე და საშუალო ბიზნესის განვითარებისთვის. ყველა ვთანხმდებით იმაზე, რომ ქვეყანაში, ასევე რეგიონში და ვანში არსებობს პრობლემები, ჯერ კიდევ არსებობს გამოწვევები, რომელსაც სჭირდება ჩვენი თავდაუზოგავი შრომა და 24-საათიანი მუშაობა. ამისთვის, რა თქმა უნდა, ჩვენ გვჭირდება ერთობა, ჩვენ გვჭირდება ერთად დგომა, რადგან ერთი ადამიანი ან ერთი კონკრეტული პოლიტიკური გუნდი ვერაფერს გააკეთებს. ამას სჭირდება საზოგადოების მხარდაჭერა და თანადგომა. დარწმუნებული ვარ, ერთიანი ძალისხმევით შევძლებთ ყველა იმ გამოწვევას ვუპასუხოთ ღირსეულად და ყველა ის პრობლემა გადავლახოთ ღირსეულად, რომელიც აწუხებს ვანს, რომელიც აწუხებს იმერეთს და ჩვენს ქვეყანას. ერთად საქართველოს წარმატებისთვის !

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ვანის მოსახლეობას მაჟორიტარი დეპუტატობის კანდიდატი გივი ჭიჭინაძე წარუდგინეს.

ჩემთვის, ადამიანისთვის, ვისი ცხოვრება ამ განსაკუთრებულ ქალაქთან არის გადაჯაჭვული, დიდი პატივია, ვიყო „ქართული ოცნების“ გუნდის ნდობით აღჭურვილი მერობის კანდიდატი.  როცა ვდგავარ ამ ეზოში, ბაგრატის ტაძრის წინ, იმ საკრალურ თუ სიმბოლურ ადგილას, რომელიც უმნიშვნელოვანესია ქუთაისისათვის, გულწრფელად შემიძლია გითხრათ, რომ ყველაფერს გავაკეთებ ამ ქალაქისთვის და ქალაქელებისთვის, თქვენთან ერთად, თქვენი დახმარებით და თქვენი გვერდში დგომით.  ქუთაისი განსაკუთრებული ქალაქია, ამიტომ ამ ქალაქს სხვანაირი სიყვარული, დაფასება და მოვლა სჭირდება. ეს არის ქართული პოეზიის, სახვითი ხელოვნების, თეატრის, მუსიკის ნამდვილი მექა, ქართული კინემატოგრაფიის აკვანი და ადგილი, საიდანაც  მრავალი ტიტულოვანი სპორტსმენი გაიცნო ჩვენმა ქვეყანამ.  აქ, ამ მიწაზე, ჯერ კიდევ მეთერთმეტე საუკუნის მიჯნაზე შეიქმნა პირველი საგანმანათლებლო კერა - გელათის აკადემია, სხვა ათინად წოდებული. პირველი კლასიკური გიმნაზიაც ქუთაისში დაარსდა - დღევანდელი პირველი საჯარო სკოლა, რომლის კურსდამთავრებული მეც გახლავართ. როცა გვაქვს საუკუნეებით შექმნილი კულტურულ-საგანმანათლებლო სტატუსი, მიმაჩნია, რომ მისი გაძლიერება არის ერთ-ერთი უმნიშვნელოვანესი. ჩვენს პოლიტიკურ გუნდს და ჩვენი პარტიის დამფუძნებელს - ბატონ ბიძინა ივანიშვილს, ქუთაისთან დაკავშირებით შორს მიმავალი გეგმები აქვს. ქუთაისის საერთაშორისო უნივერსიტეტის მილიარდიანი პროექტი, რომელიც მართლაც უმნიშვნელოვანესია ჩვენს რეგიონში, როგორც ინფრასტრუქტურული, ასევე საგანმანათლებლო კუთხით, სულ მალე გახდება მეცნიერების და ტექნოლოგიების საერთაშორისო ცენტრი. ალბათ დამერწმუნებით, თითოეული ქუთაისელისთვის  საამაყოა, რომ ჩვენმა ქალაქმა ღირსეული ადგილი დაიკავა თანამედროვე განათლების საერთაშორისო რუკაზე.  2021 წელი იქნება განსაკუთრებული წელი კულტურისა და კულტურული ღონისძიებებისათვის. ჩემი დიდი თანადგომა ექნება კულტურის სფეროს თითოეულ წარმომადგენელს და  დაწესებულებას, ვინაიდან ჩვენ ქუთაისის ტრადიციებით, კულტურით, ცნობილი ისტორიული ტოლერანტობით ახალი გზა უნდა გავჭრათ ევროპაში. ეს ის სფეროა, რომელსაც ერთ-ერთი მოწინავე ადგილი უჭირავს ჩემს სამოქმედო გეგმაში და მე, ჩემს გუნდთან ერთად სულ მალე შევუდგები ამის განხორციელებას.  აქვე, დავეთანხმები ბატონ ზაზას და ვიტყვი, რომ 2021 წელი განსაკუთრებულია ჩვენი ქალაქისთვის იმიტომ, რომ ქუთაისი და საქართველო პირველად უმასპინძლებს ევროპის საბჭოს კულტურული მარშრუტების ფორუმს და ეს ნამდვილად მისასალმებელია. სიამაყით ვიტყვი, რომ ამ გადაწყვეტილებაში ჩემი წვლილიც არის. სწორედ ასეთი საერთაშორისო ფორუმების მეშვეობით შეგვიძლია ჩვენი ქალაქი გავხადოთ შესაძლებლობების ქალაქად. ეს შესაძლებელია მხოლოდ ეკონომიკურად ძლიერი და ინფრასტრუქტურულად გამართული ქალაქისათვის და ამის მიღწევა შესაძლებელია განვითარებული ტურიზმით, ჩვენი ულამაზესი, ახალი აეროპორტით და იმ საავტომობილო ქარხნით, რომელიც მოკლე ხანში დაიწყებს ელექტრომობილების წარმოებას. ქუთაისზე ზრუნვისთვის უნდა ვეძებოთ არა განსხვავებული, არამედ ერთმანეთისთვის მისაღები საერთო ინტერესები, შეხების წერტილები, რაც ჩვენი ქალაქის, ჩვენი კუთხის უკეთესი მომავლის უზრუნველსაყოფად არის აუცილებელი.   ძლიერი ქუთაისი ძლიერი იმერეთია. ძლიერი იმერეთი, ძლიერი რეგიონები - ეს ხომ ძლიერი საქართველოა. მინდა, ისეთი ქალაქი გადავაბარო ჩვენს შვილებს, რომელიც ტრადიციულად იქნება ქვეყნის სახელმწიფოებრიობის საფუძველი, განათლებისა და კულტურის ცენტრი, ქართული ურთიერთობების ეტალონი, ხალასი იუმორის აკვანი, იქ, სადაც ახალი გაბრიაძეები, ფალიაშვილები, ბალანჩივაძეები და ანჯაფარიძეები დაიბადებიან.  რა თქმა უნდა, არ გვავიწყდება, ჯერ კიდევ ბევრი გამოწვევა გვაქვს, ბევრ ადამიანს უნდა დავუდგეთ გვერდში. დარწმუნებული ვარ, ჩემი პოლიტიკური გუნდის და ჩემი ქუთაისელების მხარდაჭერით, თქვენი მხარდაჭერით, აუცილებლად გავიმარჯვებთ და შევუდგებით ჩვენი ქალაქის აღმშენებლობას.  ერთად საქართველოს წარმატებისთვის! თითოეული ქუთაისელის წარმატებისთვის!

მე ამაყი ვარ დღეს, რომ ვდგავარ აქ, თქვენთან ერთად და მაქვს უფლება, ვიყო წარმოდგენილი ქუთაისის მაჟორიტარობის კანდიდატად საქართველოს პარლამენტში. ჩემთვის, როგორც ქუთაისელისთვის, მნიშვნელოვანია, რომ ამ ბრძოლაში თქვენთან, ჩემს ქუთაისელებთან, პარტია „ქართულ ოცნებასთან“ ერთად შევდივარ და აუცილებლად 31 ოქტომბერს თქვენთან ერთად გავიმარჯვებთ. მინდა გითხრათ, რომ ჩვენმა ხელისუფლებამ ქუთაისში უმნიშვნელოვანესი ინფრასტრუქტურული და სოციალურ-საგანმანათლებლო პროექტები განახორციელა და მკაფიოდ გამოიხატა ჩვენი ქალაქის, როგორც საგანმანათლებლო ცენტრის მნიშვნელობა. ამის მაგალითია ქუთაისის საერთაშორისო უნივერსიტეტი, რომელმაც პირველი სტუდენტები უკვე მიიღო. მინდა გითხრათ, რომ ზუსტად ეს არის მაჩვენებელი, საწინდარი და გარანტი იმისა, რომ ქუთაისი გელათის აკადემიის მემკვიდრეობას ღირსეულად გააგრძელებს. მე ექიმი ვარ, გულის ექიმი, როგორც თქვენ ამბობთ ხოლმე. ჩვენ ყოველდღიურად ვხვდებით ერთმანეთს, ვუსმენთ ერთმანეთის გულის ცემას და ქალაქის გულის ცემას. მინდა დაგარწმუნოთ და გითხრათ, რომ ამას აუცილებლად გავაგრძელებთ. ჩვენი ქალაქი საუკუნეების მანძილზე იყო და არის დონორი მთელი ქვეყნის ხელოვნების, განათლების , მეცნიერების და კულტურის სფეროში. მინდა მივესალმო ყველა ამ სფეროს წარმომადგენელს, რომლებიც დღეს ჩვენთან ერთად არიან. მივესალმები ჩვენს სპორტსმენებს , ქუთაისელ გამოჩენილ სპორტსმენებს, რომლებიც ოლიმპიური, მსოფლიოს და ევროპის ჩემპიონები არიან და მინდა მათ მომავალი წარმატებები ვუსურვო, მივმართო და ვუთხრა, რომ ქართული სპორტის მხარდაჭერა ჩვენი გუნდისა და ჩემს მიერ მომავალშიც აუცილებლად, უპირობოდ გაგრძელდება. მივესალმები ახალგაზრდებს - განათლებული, გონიერი , პრინციპული , უკომპრომისო თაობაა და მათი ენერგია ჩვენი ქალაქის განვითარებისთვის მაქსიმალურად უნდა გამოვიყენოთ. ქუთაისისთვის 2021 წელი მნიშვნელოვანი იქნება, რადგან ევროპის საბჭოს ტურისტული, კულტურული მარშრუტების რიგით XI საერთაშორისო ფორუმს ქუთაისი უმასპინძლებს და მინდა მოგილოცოთ ეს დიდი წარმატება. ქუთაისის საერთაშორისო აეროპორტიდან მსოფლიოს 30- მდე ქალაქში სრულდება პირდაპირი ავიამიმოსვლები, რაც მნიშვნელოვნად უწყობს ხელს ტურიზმის განვითარებას ჩვენს რეგიონში. მნიშვნელოვანია ადრონული თერაპიის ცენტრი, რომელიც ქუთაისის საერთაშორისო უნივერსიტეტში განთავსდება. ეს იქნება რეგიონში ერთადერთი და უნიკალური ცენტრი, სადაც მკურნალობის პარალელურად წარიმართება მაღალი რანგის სამეცნიერო კვლევითი პროექტები და სამეცნიერო მუშაობა, რაც ხელს შეუწყობს მეცნიერებისა და სამედიცინო ტურიზმის განვითარებას. ქალაქის ინფრასტრუქტურის რეაბილიტაცია და მოდერნიზაცია უმნიშვნელოვანესი ფაქტორია ქუთაისის გრძელვადიანი და ფუნდამენტური განვითარებისათვის. მინდა გითხრათ, რომ სულ მალე ქუთაისის გენერალური განვითარების გეგმა გვექნება. მიმდინარეობს მუშაობა ქუთაისის თანამედროვე ლოჯისტიკური ცენტრების განვითარებისათვის, რაც ხელს შეუწყობს ლოჯისტიკური სერვისების ერთ სივრცეში თავმოყრას. „ქართული ოცნების“ გუნდი განვითარების სწორ გზაზეა და აქვს მომავლის ხედვა, უნარი, რომ საკუთარ მოქალაქეებზე, საკუთარ ქვეყანაზე იზრუნოს და ეტაპობრივად ყველა გამოწვევას, მათ შორის COVID 19-საც წარმატებით გაუმკლავდეს. თქვენი მხარდაჭერის შედეგად, უკვე საქართველოს პარლამენტიდან ვიზრუნებ თქვენზე და ჩემს უსაყვარლეს ქუთაისზე. დარწმუნებული ვარ, რომ თქვენ სწორ არჩევანს გააკეთებთ. ერთად ქუთაისის წარმატებისათვის . ერთად საქართველოს წარმატებისათვის.

მოგესალმებით, ქუთაისელებო! პირველ რიგში, მინდა, დავიწყო მადლობით. იმ მადლობით, რომლის გამოც ჩვენ დღეს ყველანი ერთად აქ ვართ და ასე წყნარად, მშვიდად ვსაუბრობთ ქვეყნის მომავალზე. ჩემი მადლობა, პირველ რიგში, უკავშირდება იმ დიდ მოქალაქეობრივ პასუხისმგებლობას, რომელიც ქუთაისმა და იმერლებმა გამოავლინეს ამ ბოლო 5-7 თვის განმავლობაში. მე ძალიან კარგად მესმის, რამხელა პრობლემა და რამხელა ცვლილებები შემოიტანა ამ პანდემიამ თითოეული ჩვენგანის ცხოვრებაში. ძალიან კარგად მესმის, რას ნიშნავს ქუთაისში, ერთ ცალკე აღებულ 32-ე სკოლაში ინფიცირების ამხელა რაოდენობა. ძალიან კარგად მესმის, რას ნიშნავს გადადებული სწავლა ბავშვებისთვის, რამხელა დისკომფორტია ეს მშობლებისთვის, მაგრამ ყველამ უნდა ვიცოდეთ, რომ ჩვენ დღეს ვიბრძვით პირველ რიგში ჩვენი მოქალაქეებისთვის, ნათესავების, მეზობლების, მშობლების, შვილების ჯანმრთელობისთვის და ასევე ვიბრძვით იმისთვის, რომ ჩვენ ყველამ ერთად ქვეყნის ეკონომიკური აღორძინება სწრაფად დავიწყოთ და სამუშაო ადგილები კი არ დავკარგოთ, კიდევ უფრო მეტი შევქმნათ. იმ წყნარი, მშვიდი დამოკიდებულებისთვის, რომლითაც ქუთაისმა, იმერეთმა ეს ბოლო გამოწვევები გაიარა, მინდა, მადლობა გადაგიხადოთ. ქართველებს გვახასიათებს განსაცდელში, კრიზისებში გაერთიანება. საერთოდ, ერთიანობაზე ლაპარაკი უაღრესად ბუნებრივია ქუთაისიდან. ქუთაისიდან, რომელიც არის საქართველოს მეორე დედაქალაქი, რომელიც არის ევროპაში მე-5 უძველესი ქალაქი, ქუთაისიდან, რომელიც არის დავით აღმაშენებლის ქალაქი, ქუთაისიდან, საიდანაც დავით აღმაშენებელი 1089 წელს ეკურთხა მეფედ და ქუთაისიდან, რომელიც არის ჩვენი ქვეყნის, საქართველოს ერთიანობის და სიძლიერის სიმბოლო. ეს ერთიანობა არის ის, რამაც ჩვენ უნდა მიგვიყვანოს გამარჯვებამდე და ეს არ არის გამარჯვება არჩევნებში, მე არ ვსაუბრობ ახლა არჩევნებზე, ამ კონკრეტულ შემთხვევაში. მე ვსაუბრობ იმაზე, რამაც უნდა მიგვიყვანოს ეკონომიკურად ძლიერ, სამართლიან, განათლებულ, ევროპულ საქართველომდე და ამაზე ლაპარაკი ქუთაისში არის ყველაზე ბუნებრივი. ჩვენ, როდესაც ვამბობთ, რომ არ გვინდა საუბარი წარსულზე, არ გვინდა, იმიტომ, რომ არავის არ ვეჯიბრებით. არ გვინდა არავის შევედაროთ. ჩვენ, ჩვენი გასაკეთებელი გვაქვს ძალიან ბევრი და წყნარად, მშვიდად ამას ვაკეთებთ. დარწმუნებული ვართ, რომ ჩვენი თითოეული მოქალაქე, ამას ხედავს და შეაფასებს. მიუხედავად ამ განსაცდელისა, რომელშიც არა მარტო საქართველო, არამედ მთელი მსოფლიოა, არც ერთი წუთით და არც ერთი წამით სისტემური ინფრასტრუქტურული სამუშაოები ქვეყანაში არ შეჩერებულა. უნდა გავითვალისწინოთ, რომ ჩვენ, ქვეყანა დაგვხვდა ისეთ დღეში, სადაც ელემენტარული - სასმელი წყლის, სკოლის, ბაღის, გზის პრობლემები იყო, მიუხედავად იმისა, ვიღაცას ეგონა, რომ თურმე შეიძლება, ქალაქს, რომლის ისტორიაც ითვლება ძველი წელთაღრიცხვის მე-13 საუკუნიდან, ფუნქცია ვინმემ შესძინოს, ან ფუნქცია ვინმემ წაართვას. ქუთაისის შემთხვევაში, ეს უბრალოდ შეუძლებელია. აქ, ამ ქალაქში, ისტორიის დრო გაჩერებულია, იმიტომ, რომ აქ, მარადისობა სუფევს. ამიტომ, როდესაც ჩვენ ვსაუბრობთ ხვალინდელ დღეზე, ძალიან კონკრეტულები უნდა ვიყოთ და უნდა გვქონდეს კონკრეტული გეგმა, რომელზეც ჩვენ, მზად ვართ, ვისაუბროთ. მარტივ რამეს გეტყვით - რიკოთის უღელტეხილი. რიკოთს უღელტეხილი არის ის, რაც დასავლეთ და აღმოსავლეთ საქართველოს, თბილისს და ქუთაისს შეაერთებს ინფრასტრუქტურულად ისე, რომ ხარისხობრივად შეცვლის ქვეყნის განვითარების სისწრაფეს, ყველა განზომილებით. ეს იქნება უდიდესი სარგებელი ჩვენი თითოეული მოქალაქისთვის, ეკონომიკისთვის. წარმოიდგინეთ, რომ დღეს, რიკოთის უღელტეხილზე უკვე მიმდინარეობს სამუშაოები, 99 გვირაბის და 53 ხიდის. უაღრესად ურთულესი საინჟინრო სამუშაოები, რომელიც აქ, ამ რეგიონში ჯერ არ ჩატარებულა. ქუთაისის შემოვლითი გზა, ზემო იმერეთი-რაჭის დამაკავშირებელი გზა. ყველაფერს თავი რომ დავანებოთ, არ მინდა უკვე გაკეთებულზე საუბარი, მაგრამ ქუთაისის წყალმომარაგების პროექტით, რომელიც ივლისში გაეშვა, 200 000-მა ქუთაისელმა ოჯახმა, ისტორიაში პირველად, იგრძნო, რა არის 24-საათიანი წყალმომარაგება. კიდევ უამრავი საქმეა გასაკეთებელი და დასასრულებელი იმისთვის, რომ ქვეყანა ქვეყანას დაემსგავსოს და ქუთაისი იყოს ისეთი კომფორტული საცხოვრებლად, როგორც იმსახურებს. ვიღაცას ჰგონია, რომ ასეთ პირობებში, რაღაც ფუნქცია შესძინა ქალაქს, ან რაღაც ფუნქციას წაართმევს ქუთაისს. ჩვენი ძირითადი მიზანი ყოველთვის იქნება ადამიანი. როდესაც ვსაუბრობთ ხვალინდელ დღეზე, ვგულისხმობთ იმას, რომ სახელმწიფოს პირველადი მოვალეობა, აუცილებლობა, პირველადი ფუნქციები, არის ბავშვი, ჩვენი ახალგაზრდობა და რა თქმა უნდა, ჩვენი ღვაწლმოსილი მოხუცები. ყველაზე აუცილებელი სასიკეთო პირობები ბავშვებისთვის უნდა შევქმნათ, ამას ვაკეთებთ ბაღიდან დაწყებული, სკოლით გაგრძელებული. ჩვენი ღვაწლმოსილი მოხუცები, რომლების პენსიის გაზრდა-არგაზრდა ყოველთვის პოლიტიკური სპეკულაციების საგანი იყო. ჩვენ ბოლოსდაბოლოს შევძელით, რომ განვახორციელეთ საკანონმდებლო ცვლილებები, რომელიც ხანდაზმულებს აძლევს გარანტიას, რომ მათ პენსია ყოველწლიურად გაიზრდება. ყველაფერს თავი რომ დავანებოთ, მასწავლებლები, ჩვენი პოლიციელები, ჩვენი ექიმები, ეს ის ხალხია, რომლითაც სახელმწიფო ეხმარება, ემსახურება თავის მოქალაქეებს და ეს ის ადამიანები არიან, რომლებსაც ჩვენ ყოველთვის გვერდით ვედექით და დავუდგებით. ეს გამოჩნდა პანდემიის პირობებშიც. ყველას გვესმის, რომ სახელმწიფოს აქვს შეზღუდული რესურსები. სამწუხაროდ, ჯერ კიდევ არ ვართ მდიდარი სახელმწიფო, რომ შეგვეძლოს ვხარჯოთ იმდენი, რამდენიც გვინდა. როდესაც გაქვს უაღრესად მძიმე არჩევანი, სოციალურად დაეხმარო შენს მოქალაქეს პანდემიის დროს თუ ააშენო გზა, ან დაეხმარო გლეხს, გახდეს ფერმერი, ან - მევენახეს, მოიყვანოს ყურძენი და ა.შ, რა თქმა უნდა, ეს არის რთული არჩევანი და ეს ის არჩევანია, რომელსაც ყველანი ერთად ვაკეთებთ. მაგრამ აქ ყველაზე მნიშვნელოვანია ის, რომ ჩვენი თითოეული ნაბიჯი, თითოეული გეგმა განპირობებული იქნება მხოლოდ და მხოლოდ ერთი მიზნით - ჩვენ საბოლოოდ უნდა გავხდეთ ეკონომიკურად ძლიერი, სამართლიანი და ევროპული სახელმწიფო და ეს ყველაფერი უნდა გავაკეთოთ ერთად. დარწმუნებული ვარ, ჩვენ ამ გამოწვევებს ყველანი ერთად ვუპასუხებთ. დარწმუნებული ვარ, ყველანი ერთად, მას შემდეგ, რაც მივაღწევთ ამ მიზანს, მივაკაკუნებთ და შევაბიჯებთ იმ დიდ ევროპულ ოჯახში, სადაც ჩვენი ადგილი ყოველთვის იყო ისტორიულად. არა ცალკეული პარტიის ინტერესიდან გამომდინარე, არამედ ქვეყნის ინტერესიდან გამომდინარე, დარწმუნებული ვარ, ჩვენ ამ ბრძოლაშიც გავიმარჯვებთ, სამართლიან ბრძოლაშიც და მინდა, თითოეულ თქვენგანს, საქართველოს თითოეულ მოქალაქეს, თითოეულ ქუთაისელს, გამარჯვება გისურვოთ, გამარჯვება არა თითოეული ჩვენგანის, არამედ ქვეყნის გამო. გამარჯვებას გისურვებთ!

მოგესალმებით ქალბატონებო და ბატონებო, ჩემო იმერლებო, ჩემო ქუთათურებო! ჩემთვის დიდი პატივია ამ დიდებულ ქალაქში, საკუთარ ქალაქზე, კუთხესა და ქვეყანაზე უზომოდ შეყვარებული ხალხის წინაშე წარდგომა. ქუთაისი თავის თავში უამრავ საგანძურს იტევს, რაზეც დიდხანს, ძალიან დიდხანს შეიძლება საუბარი, თუმცა, პირადად ჩემთვის, ქუთაისი ყოველთვის იყო და იქნება ქართული სულის და კულტურის ერთ-ერთი მთავარი ცენტრი ჩვენს ქვეყანაში. ამისთვის შორეულ ისტორიაში რომ არ წავიდეთ, გალაკტიონის და ცისფერყანწელების გახსენებაც საკმარისია. ამ დიდი ადამიანების, რომლებიც სწორედ აქ, ამ ქუჩებში დააბიჯებდნენ, თქვენი მშობლების, ბებია-ბაბუების გვერდით სწავლობდნენ, მათთან ერთად იზრდებოდნენ, ემზადებოდნენ საქართველოს ისტორიაში საკუთარი სახელების ოქროს ასოებით ჩაწერისთვის. სწორედ ამ საოცარ ქალაქს წარმოადგენდნენ ის დიდი ქართველები, ვინც უმნიშვნელოვანესი როლი შეასრულეს ჩვენი ქვეყნის კულტურისა და განათლების სფეროების განვითარებისთვის. ამ ფონზე, მითუმეტეს იმის გათვალისწინებით, რომ სწორედ აქ მდებარეობდა ჩვენი ერისთვის ფუნდამენტური მნიშვნელობის მქონე საგანმანათლებლო დაწესებულება - გელათის აკადემია, სულაც არ არის შემთხვევითი, რომ ჩვენი პარტიის დამფუძნებლის - ბიძინა ივანიშვილისა და მისი ოჯახის უმსხვილესი ინვესტიციით, ქუთაისის საერთაშორისო უნივერსიტეტის გრანდიოზული პროექტი ხორციელდება. პროექტის საერთო ჯამური ღირებულება მილიარდი ევროა და ბუნებრივია, რომ ასეთი გრანდიოზული მასშტაბის პროექტის განხორციელება უმნიშვნელოვანესია არა მხოლოდ ქუთაისის და რეგიონის, არამედ მთელი საქართველოსთვის. ეს მოგვცემს შესაძლებლობას ის პოტენციალი, რომელიც ამ ქალაქს აქვს, მაქსიმალურად ავითვისოთ. ქუთაისში ისწავლიან საუკეთესო ახალგაზრდები მთელი ქვეყნიდან და აქ განათლებამიღებული ახალგაზრდები სხვა სიმაღლეზე აიყვანენ ჩვენი ქვეყნის განვითარებას. ქუთაისი დაიბრუნებს საქართველოს ინტელექტუალური და კულტურული დედაქალაქის ისტორიულ ფუნქციას. მე აღარ მოვყვები, თუ რამდენი რამ გაკეთდა ბოლო წლების განმავლობაში, მას შემდეგ, რაც „ქართული ოცნება - დემოკრატიული საქართველო” მოვიდა ხელისუფლებაში - რამდენი გზა დაიგო, რამდენად უფრო სწრაფად შენდება შემოვლითი ავტომაგისტრალი და ა.შ. არც იმას მოვერიდები გითხრათ, რომ ქუთაისს, როგორც მთელს ქვეყანას, წინ ძალიან ბევრი გამოწვევა აქვს. ჩვენ, რა თქმა უნდა, არ გვიჭირს საუბარი იმაზე, რომ ქვეყანაში არსებობს გამოწვევები. ზუსტად ვიცით, რომ თვითკმაყოფილების უფლება ამ ქვეყანაში ხელისუფლებას არ აქვს და არც ექნება, მანამდე სანამ ერთ მოქალაქეს მაინც უჭირს და ერთ ოჯახს მაინც აქვს ცხოვრების ელემენტარული პირობები დასაკმაყოფილებებლი. სამწუხაროდ, დღეს ჯერ კიდევ ბევრ ადამიანს უჭირს ქუთაისშიც და მთლიანად ქვეყანაშიც, მაგრამ ყველაფერი შედარებითია. მე არ მიყვარს წარსულზე საუბარი, საუბარი იმაზე, თუ რა ხდებოდა წინა ხელისუფლების პირობებში, მაგრამ მინდა, უბრალოდ მაგალითები მოვიყვანო მხოლოდ და მხოლოდ შედარებისთვის - რა იყო და რა არის დღეს, ასევე, რა გვინდა, საით მივდივართ, როგორი საქართველო გვინდა ავაშენოთ. ამისთვის მნიშვნელოვანია გავიხსენოთ, თუ რა ხდებოდა წინა წლების განმავლობაში. რა თქმა უნდა, ჩვენ ყველა მიმართულებით გვაქვს წინგადადგმული ნაბიჯები, მაგრამ ამით არ უნდა დავკმაყოფილდეთ. როგორც გითხარით, გვაქვს გამოწვევები და ჩვენ შევძლებთ, ამ გამოწვევებს ერთიანი ძალისხმევით ღირსეულად ვუპასუხოთ მომდევნო წლების განმავლობაში, თუმცა აქაც მნიშვნელოვანია ჩვენი ერთობა, როგორც ეს იყო 2012 წლიდან მოყოლებული, ყველა არჩევნების დროს, ყველა პრობლემის მოგვარების დროს, ყველა წარმატების დროს. ახლაც, მომდევნო საპარლამენტო არჩევნებში მნიშვნელოვანია, რომ ჩვენ ვიყოთ ერთად. ჩვენ ძალიან ძლიერები ვართ. ჩვენი ერთობით ჩვენ ძალიან ბევრჯერ დავამტკიცეთ, თუ რისი გაკეთება შეგვიძლია და ახლაც, 2020 წლის საპარლამენტო არჩევნებში, რომელიც 31 ოქტომბერს გაიმართება, დარწმუნებული ვარ, ერთად გავიმარჯვებთ. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ქუთაისის მოსახლეობას მაჟორიტარი დეპუტატობის კანდიდატი ზაზა ლომინაძე და ქუთაისის მერობის კანდიდატი იოსებ ხახალეიშვილი წარუდგინეს.

მოგესალმებით, დუშელებო! დიდი პატივია ჩემთვის, ვაჟას სამშობლოში ვისაუბროთ ამ ქვეყნის მომავალზე, ეკონომიკურად ძლიერი, ევროპული ქვეყნის მომავალზე. ეს არის უაღრესად მნიშვნელოვანი. ჩვენი ყველაზე დიდი გამოწვევა და მიზანი უნდა იყოს, რომ ახალგაზრდობა დავუბრუნოთ მთას. ამის ირგვლივ უნდა ვიტრიალოთ და ყველაფერი გავაკეთოთ იმისთვის, რომ დუშეთში ზუსტად იგივე ცხოვრების პირობები იყოს, როგორიც არის თბილისში. ახალგაზრდას, რომელიც აქ იბადება, მას უნდა ჰქონდეს ისეთივე პირობები, როგორიც არის თბილისში, ბათუმში, ქუთაისში და ა.შ. ეს არის სამართლიანობა და ამას ჰქვია ქვეყანაში წარმატების თანაბარი გადანაწილება. მიუხედავად იმისა, რომ დუშეთის ბიუჯეტი 2013 წლის შემდგომ 10-ჯერ გაიზარდა, იყო 2 მილიონი ლარი, დღეს არის 22 მილიონი ლარი, რაც ნიშნავს მეტ გარემონტებულ სკოლას, საბავშვო გზას, ბევრ ახალ გზას, საკმარისი არ არის. მხოლოდ ამით არ უნდა იზომებოდეს ქვეყნის და ამ კუთხის წარმატება. ამ კუთხის წარმატება უნდა იზომებოდეს იმ მებრძოლი და მშრომელი ხალხის წარმატებით, რომელიც აქ ცხოვრობს. ეს არის ყველაზე მნიშვნელოვანი და ყველაფერი უნდა გავაკეთოთ იმისთვის, რომ ეს ხალხი აქ დარჩეს, წარმატებულად იშრომოს, იღვაწოს თავისი ოჯახისთვის და ქვეყნისთვის. ეს არის მთავარი მიზანი, ვინაიდან „ქართული ოცნების“ ყურადღების ცენტრში ყოველთვის იყო ადამიანი, მისი ღირსება და სამართლიანობა და ჩვენ ასე უნდა გავაგრძელოთ ერთად. რა თქმა უნდა, ჩვენ ერთად დასაგებ გზებსაც დავაგებთ, ვიცით, რომ სასმელი წყალი ჯერ კიდევ პრობლემაა, დუშეთში და მიმდებარე სოფლებში გაზია პრობლემა, ამ ყველაფერს სწრაფად მოვაგვარებთ, ყველგან მივალთ, ყველას მივხედავთ, მაგრამ საბოლოო ჯამში, ყველაზე დიდი წარმატება უნდა იყოს, რომ აქ უნდა ცხოვრობდნენ ახალგაზრდები და არ უნდა იყურებოდნენ ქალაქისკენ, ან ქალაქში თუ მიდიან უმაღლესი განათლების მისაღებად, შემდგომ დაბრუნდნენ და თავიანთ კუთხეს ემსახურონ. ეს არის ჩვენი მთავარი მიზანი. ამიტომ ვაკეთებთ ჩვენ ყველა იმ პროგრამას, რომლითაც ახალგაზრდებს, ყველა ადამიანს ვეხმარებით, დაიწყოს თავისი საქმე, გლეხს - გახდეს ფერმერი. ადამიანს, რომელსაც უნდა, დაიწყოს თავისი ბიზნესი ვეხმარებით, რომ გადადგას პირველი ნაბიჯები, ჯერ თავის ოჯახს მიხედოს, შემდეგ - მეზობელი, ნათესავი დაასაქმოს. მაგრამ ეს ყველაფერი უნდა იყოს სწრაფად. ამიტომ გავაკეთეთ ჩვენ ყველა ის პროგრამა, რომელიც სხვადასხვა სამინისტროშია თავმოყრილი - „აწარმოე საქართველოში“, სოფლის მეურნეობის სამინისტრო, ტურიზმის სააგენტო. ეს ყველაფერი დღეს გაქვთ თქვენ აქ, დუშეთში, თქვენს საზოგადოებრივ ცენტრში, ან იუსტიციის სახლში, სადაც უბრალოდ რომ მიხვიდეთ, ყველაფერს აგიხსნიან, დახმარების რა სერვისებს სთავაზობს სახელმწიფო თითოეულ ადამიანს. ეს ძალიან მარტივია. ეს ყველაფერი იმ დონეზეა გაკეთებული და ხალხი ისეა დატრენინგებული, რომ თბილისში ჩასვლაც და სამინისტროში სიარული არ დაგჭირდებათ, კონტრაქტის გაფორმება შეიძლება აქ, ბენეფიციარმა როგორ დაიწყოს მონაწილეობა ამა თუ იმ პროგრამაში. ეს ელემენტარული მხარდაჭერაა. როდესაც დაქირავებული, ან სახელმწიფო სამსახურში ხარ და გინდა, შენი ბიზნესი დაიწყო, პირველ ნაბიჯს რომ დგამ, ძალიან დიდი რისკი და ფსიქოლოგიური წნეხია. ჩვენ ყველაფერი უნდა გავაკეთოთ იმისთვის, რომ თამამ, გულად და მშრომელ ადამიანებს, დუშელებს, ამის შესაძლებლობა მივცეთ. დღეს, ამის შესაძლებლობა ყველას აქვს. ამის შესაძლებლობა აქვს საქართველოს თითოეულ მოქალაქეს და რა თქმა უნდა, ეს შესაძლებლობები აქ, დუშეთში გვაქვს მოტანილი. სახელმწიფოს ვალდებულება, საბაზისო მოთხოვნების დაკმაყოფილება არის კრიტიკულად მნიშვნელოვანი - გზა, ელექტროენერგია, კანალიზაცია, წყალი, გაზი. რა თქმა უნდა, აქაც, ათწლეულებია, ბევრი არაფერი არ გაკეთებულა. მე ბევრი კონკრეტული პროექტი შემიძლია ჩამოვთვალო, მაგრამ ამას არ ვაკეთებ, იმიტომ, რომ თქვენ, ამას ყველანი კარგად ხედავთ. ბევრი კარგი საქმე ერთად გვაქვს დაწყებული და ვიცით, რომ ერთად უნდა დავამთავროთ. გარდა ამისა, რა თქმა უნდა, ჩვენ გავაგრძელებთ, პირველ რიგში, განათლების რეფორმას, იმიტომ, რომ ძლიერი განათლების გარეშე, ქვეყანას, დუშეთს, მომავალი არ აქვს. ამიტომ, ჩვენ ყველაფერი უნდა გავაკეთოთ იმისთვის, რომ კონცენტრირებულად, რესურსი ჩავდოთ განათლებაში, იმიტომ, რომ ბავშვებს, რომლებიც იბადებიან, არ უნდა ჰქონდეთ განსხვავება, სად ცხოვრობენ და სად იზრდებიან. ყველას უნდა ჰქონდეს თანაბარი წვდომა თანაბარი დონის განათლებაზე. რა თქმა უნდა, ჩვენ უნდა ვიზრუნოთ ჩვენს ღვაწლმოსილ მოხუცებზე და მათი მოხუცებულობა უნდა იყოს ღირსეული. სწორედ ამიტომ, დუშეთში, 276 სოფელი არის მაღალმთიანი სტატუსის მატარებელი. ეს ხალხი კიდევ უფრო მეტს იმსახურებს, მაგრამ ამით, ჩვენ ამოვავსეთ სოციალური დისბალანსი, რომელსაც ქალაქსა და მთას შორის ვგრძნობთ. ეს არ არის დიდი სხვაობა, მაგრამ ეს არის ელემენტარული სწორი მიმართულება. სახელმწიფომ ეს დისბალანსი უნდა ამოავსოს და ადამიანებს უნდა შეეძლოთ, ღირსეულად იცხოვრონ იქ, სადაც მათ ცხოვრება უნდათ. ყველა იმ ახალგაზრდას, რომელსაც აქვს კარგი განათლება, ნიჭი, სითამამე და სურვილი, უნდა შევუქმნათ თანაბარი პირობები იმისთვის, რომ გადადგან პირველი ნაბიჯები იმ საქმის დასაწყებად, რომელიც მათ უნდათ. კიდევ ერთხელ ვიტყვი - გლეხი უნდა გახდეს ძლიერი ფერმერი და ყველას, ვისაც აქვს სურვილი, რომ თვითონ გახდეს დამსაქმებელი, სახელმწიფო ამაში უნდა მიეხმაროს, იმიტომ, რომ ეს ძალიან რთული პირველი ნაბიჯებია. იმისთვის, რომ ამას ყველაფერს მივაღწიოთ, გვჭირდება ერთობლივი გამარჯვებები. ეს არ არის დუშეთის ან თიანეთის გამარჯვება, ეს ქვეყნის გამარჯვება უნდა იყოს. მე დარწმუნებული ვარ, ეს ახალგაზრდა ადამიანი - შალვა კერესელიძე, რომელმაც უნდა წარმოადგინოს დუშეთი, მცხეთა, თიანეთი და ყაზბეგი საქართველოს უმაღლეს საკანონმდებლო ორგანოში, რომელსაც თქვენ ჩემზე უკეთ იცნობთ, იქნება თითოეული დუშელის ღირსეული ხმა საკანონმდებლო ორგანოში. ის ყველაფერს გააკეთებს იმისთვის, რომ მცხეთა-მთიანეთის რეგიონი იყოს ერთ-ერთი ყველაზე წარმატებული და იყოს ჩემპიონი საქართველოს რეგიონებს შორის. ეს ამ რეგიონსაც შეუძლია და ამ კაცსაც ამის გაკეთება შეუძლია. მინდა, თითოეულ თქვენგანს სამართლიან ბრძოლაში სამართლიანი გამარჯვება გისურვოთ. მადლობა და გამარჯვებას გისურვებთ, დუშელებო!

მოგესალმებით! მოხარული ვარ, რომ დღეს ამ ულამაზეს და გამორჩეულ მხარეში ვიმყოფები. დუშეთში ძალიან მაგარი, ერთგული, მშრომელი და პატრიოტი ადამიანები ცხოვრობენ, რომელთა მხარდაჭერას მუდმივად ვგრძნობთ, რასაც ძალიან ვაფასებთ და ვუფრთხილდებით. თქვენ ჯერ კიდევ მაშინ იდექით ჩვენს გვერდში, როდესაც ქვეყანაში გამეფებული იყო ძალადობა და სწორედ ერთად დგომით, ერთად ბრძოლით, ჩვენი პარტიის დამფუძნებლის, ბიძინა ივანიშვილის ლიდერობით ქვეყანაში დავაბრუნეთ მშვიდობა, თავისუფლება და სახელმწიფო საკუთარი მოქალაქის სამსახურში ჩავაყენეთ. დუშეთის მუნიციპალიტეტში სხვა ღირსშესანიშნაობებთან ერთად, ერთი გამორჩეული ადგილია, ჩარგალი, სადაც ყველა ქართველისთვის საყვარელი და საამაყო, მსოფლიო დონის მოაზროვნე, გენიოსი დაიბადა. ვაჟამ ქართული მთა, მთიელი ადამიანის ყოფა და ანტიკური ეპოსი ერთმანეთს დაუკავშირა და მსოფლიო დონის შედევრები შექმნა. ვაჟა-ფშაველა არის ქართული კულტურის, ტრადიციების, ქრისტიანობის, ჰუმანიზმის, კაცობრიობის ზნეობრივი ღირებულებებისა და ადამიანობის სიმბოლო, რომლისგანაც დღესაც ბევრი რამ გვაქვს სასწავლი. დუშეთი სწორედ ასეთი, განათლებული, მებრძოლი და პატრიოტი ადამიანების ადგილია. დუშეთი და დუშეთში მცხოვრები ადამიანები ჯერ კიდევ ბევრი გამოწვევის წინაშე იმყოფებიან, მიუხედავად იმისა, რომ მუნიციპალიტეტში „ქართული ოცნების“ ხელისუფლებამ კარგი პროექტი განახორციელა, ბევრი საქმე გააკეთა. თუმცა მგონი, ყველა ვთანხმდებით, რომ ჯერ კიდევ არსებობს გამოწვევები. დუშეთი გამორჩეულია ულამაზესი ხედებითა და უნიკალური სამზარეულოთი, რაც ტურიზმის განვითარებისთვის ნაყოფიერ ნიადაგს ქმნის და ამ მიმართულებით სახელმწიფო კიდევ უფრო მეტად გააგრძელებს ადგილობრივების მხარდაჭერას, რათა თქვენ გქონდეთ უფრო მეტი შესაძლებლობა, ისარგებლოთ ყველა იმ პროგრამით, რომელიც ჩვენ განვახორციელეთ სხვადასხვა მიმართულებით: სოფლის მეურნეობა, „აწარმოე საქართველოში“, ეკონომიკის სამინისტროს სხვადასხვა პროგრამა. ჩვენ მოხარული ვიქნებით, რაც მეტი ადამიანი ჩაერთვება ამ პროგრამებში, ჩვენ ხელს შევუწყობთ მცირე და საშუალო ბიზნესის განვითარებას, შესაბამისად სამუშაო ადგილების შექმნას. ამიტომ, ეს პროგრამები მომდევნო წლების განმავლობაშიც აუცილებლად უნდა გაგრძელდეს. ყოველთვის ვამბობ და ახლაც გავიმეორებ, რომ ჩვენთვის მთავარია, ჩვენი ყოველდღიური მუშაობით, ყოველდღიური საქმიანობით, განხორციელებული ქმედებებით შევქმნათ წარმატებების ისტორიები. დღეს ჩვენ გვჭირდება ძლიერი გლეხი, ძლიერი სოფლის მეურნეობა, ძლიერი სოფლები და რაიონები, ძლიერი ქალაქებისა და ძლიერი ქვეყნისთვის. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა დუშეთის მოსახლეობას მაჟორიტარი დეპუტატობის კანდიდატი შალვა კერესელიძე წარუდგინეს.

მოგესალმებით, თიანეთელებო! ჩემთვის დიდი პატივია მირზა გელოვანის სახლ-მუზეუმში თქვენთან ერთად მომავალზე საუბარი. მიუხედავად იმისა, რომ თიანეთში ბევრი რამ გაკეთდა, ჩვენი წარმატებები და ცხოვრება არ უნდა იზომებოდეს გზების, წყლის ან გაზის გაყვანის რაოდენობით. ჩვენი მიღწევები და ცხოვრება უნდა იზომებოდეს იმით, რამდენ ახალგაზრდას დავაბრუნებთ ამ კუთხეში. ეს არის ყველაზე მნიშვნელოვანი. ამის მისაღწევად ყველაფერი უნდა გავაკეთოთ იმისთვის, რომ თბილისში, თიანეთში, ქუთაისში, ბათუმში, ზუგდიდში, თელავში, ყველგან, ჩვენს მოქალაქეებს ჰქონდეთ ერთნაირი სამართლიანი და თანაბარი პირობები. სწორედ ამისთვის გვჭირდება ჩვენ რეფორმა განათლების სისტემაში. სწორედ ამისთვის გვჭირდებოდა, რომ თიანეთი ყოფილიყო მაღალმთიანი სტატუსის მატარებელი მუნიციპალიტეტი, იმიტომ, რომ შეგვძლებოდა, ამით დავხმარებოდით აქ მცხოვრებ ადამიანებს სოციალურად, სხვადასხვა კომუნალური გადასახადით, ასევე მათ, ვინც ბიზნესს წამოიწყებდა. თიანეთში გზები ნორმალურია, გასაკეთებელი გვაქვს შიდა გზები, მოსაწესრიგებელია წყალმომარაგება. ბევრი სოფელია, სადაც არის წყალმომარაგების პრობლემა. გაზიფიცირების პრობლემაც არის. ეს ყველაფერი დროის ამბავია. ამას ყველაფერს გავაკეთებთ ერთად. საბოლოო მიზანი ის უნდა იყოს, რომ აქ, ამ ულამაზეს, დიდი ისტორიის მქონე კუთხეში დავაბრუნოთ ახალგაზრდები. ახალგაზრდები აქ უნდა ცხოვრობდნენ, ვითარდებოდნენ, შრომობდნენ და ღირსეულად უნდა არჩენდნენ თავიანთ ოჯახებს. ეს არის ძირითადი მიზანი და ეს უნდა იყოს თქვენი მაჟორიტარის და ადგილობრივი ხელისუფლების ძირითადი მიზანიც. გარდა იმისა, რომ თიანეთი სრულად არის მაღალმთიანი მუნიციპალიტეტი და ეს ბევრ შესაძლებლობას უხსნის აქ მცხოვრებ ადამიანებს, ყველა ის პროგრამა, რომელიც სახელმწიფოს გააჩნია - „აწარმოე საქართველოში“, სოფლის მეურნეობის, ტურიზმის დახმარების სხვადასხვა პროგრამა, იმისთვის, რომ თქვენ არ შეგშლოდათ ხელი და ყველა ამ პროგრამაში მონაწილეობის მისაღებად არ მოგიწიოთ თბილისში ჩასვლა, ეს ყველაფერი მოვიტანეთ თქვენთან, აქ, თიანეთში. შეგიძლიათ, აქ, იუსტიციის სახლში, საზოგადოებრივ ცენტრებში ყველა ეს მომსახურება მიიღოთ. ძალიან მნიშვნელოვანია, რომ ადამიანს, რომელიც აქ, მთაში ცხოვრობს, განსაკუთრებით, ახალგაზრდას, რომელიც მზად არის, პირველი ნაბიჯები გადადგას, წამოიწყოს თავისი საქმე, გლეხობიდან გახდეს ფერმერი, გაძლიერდეს და დაასაქმოს სხვა ადამიანები, სახელმწიფომ ეს პირობები შეუქმნას და მერწმუნეთ, ჩვენ ამას ვაკეთებთ. არ არის მარტივი საქმე, რომ გარისკო, ჯერ შენზე და შემდეგ შენს ოჯახზე აიღო პასუხისმგებლობა, სახელმწიფოს არ შეჰყურებდე ხელებში, დაქირავებით შრომა არ გინდოდეს და მერე ამ საქმეში გახდე წარმატებული. სახელმწიფოს მოვალეობაა, რომ ეს ყველაფერი მოაწესრიგოს, რომ ასეთ ადამიანებს, გამბედავ, მებრძოლ ადამიანებს ამის შესაძლებლობა ჰქონდეთ და ამის შესაძლებლობა თქვენ აქ, თიანეთში გაქვთ. სახელმწიფოს ძირითადი ფუნქციაა, რომ სისტემური ინფრასტრუქტურა - გზა, წყალი, გაზი, სარწყავი წყალი იყოს სრულად მოწესრიგებული. ბევრი რამ გაკეთდა, მაგრამ კიდევ ბევრი დაწყებული მნიშვნელოვანი საქმეა დასამთავრებელი. როგორც ვთქვით, გაზიც, სასმელი წყალიც მოსაგვარებელია და მიუხედავად იმისა, რომ მიღწევები არის, ეს ყველაფერი ერთად უნდა მივიყვანოთ ბოლომდე. ამასთან ერთად, რა თქმა უნდა, ჩვენი ღვაწლმოსილი მოხუცები არ უნდა დაგვრჩეს ყურადღების გარეშე. ამიტომ არის, რომ დღეს, მთაში, 70 წელს გადაცილებული ადამიანი იღებს ყველაზე მეტ პენსიას. მათი ჯანმრთელობა და სოციალური მომსახურება უნდა იყოს იმავე დონეზე, რა დონეზეც არის თბილისში. ამისთვის, პირველადი ჯანდაცვის სისტემა, სტაციონარული სისტემაც უნდა იყოს წესრიგში. ეს ელემენტარული, საბაზისო მოთხოვნებია, რომ თიანეთი, როგორც მუნიციპალიტეტი, ყველა ადამიანისთვის იყოს კომფორტული საცხოვრებლად. სახელმწიფოს ვალია, ყველა იმ ახალგაზრდას, ვისაც აქ დარჩენა, ცხოვრება და მუშაობა უნდა, შეუქმნას სამართლიანი და თანაბარი პირობები, იმისთვის, რომ ღირსეულად არჩინოს თავისი ოჯახი, განურჩევლად იმისა, თბილისში ცხოვრობს, რუსთავში, ბათუმში, თუ თიანეთში. ამის მისაღწევად, ჩვენ კიდევ ერთი გამარჯვება უნდა მოვიპოვოთ. დარწმუნებული ვარ, თქვენი მაჟორიტარობის კანდიდატი იქნება თიანეთელების ღირსეული ხმა საქართველოს უმაღლეს საკანონმდებლო ორგანოში. ამასთან ერთად, მთაში ვართ და დარწმუნებული ვარ, რომ გავიმარჯვებთ, მაგრამ რა თქმა უნდა, გავიმარჯვებთ სამართლიან ბრძოლაში და ეს არ იქნება მარტო თიანეთის გამარჯვება, ეს იქნება საქართველოს გამარჯვება. გამარჯვებას გისურვებთ!

მოგესალმებით! ჩემთვის დიდი პატივია, რომ დღეს დიდი ისტორიისა და კულტურის მქონე მხარეში ვიმყოფები, სადაც საკუთარი კუთხისა და ქვეყნის მოყვარული, ამაყი და მშრომელი ხალხი ცხოვრობს. მრავალფეროვანი, ლამაზი ბუნება, მაღალი მთები, კულტურულ-ისტორიული ძეგლები - ეს ყველაფერი კარგად მეტყველებს თქვენზე, თუმცა, ჩემთვის, როგორც პოლიტიკოსისთვის, დაუვიწყარია ის განსაკუთრებული გამბედაობა, რაც ჩვენი ქვეყნისთვის ყველაზე რთულ პერიოდში გამოიჩინეთ და არ შეუშინდით არცერთ დაბრკოლებას, როცა „ქართულ ოცნებასთან“ ერთად, მხარდამხარ იბრძოდით წინა ხელისუფლების წინააღმდეგ. ჩვენ გვახსოვს, თუ რამდენად რთული იყო ეს პერიოდი, მხედველობაში მაქვს 2012 წლის საპარლამენტო არჩევნები, როგორი დამოკიდებულება იყო განსხვავებული აზრისა და პოლიტიკური შეხედულებების მქონე ადამიანების მიმართ, მაგრამ ჩვენ ეს ყველაფერი ერთად გამოვიარეთ და გადავლახეთ. მოგეხსენებათ, რომ „ქართული ოცნების“ ხელისუფლებაში მოსვლის დღიდან, რეგიონებს განსაკუთრებული ყურადღება ექცევა და 2012 წლიდან მოყოლებული, თიანეთში, არაერთი მნიშვნელოვანი პროექტი განხორციელდა. მასშტაბური ინფრასტრუქტურული, ენერგეტიკული, გარემოსდაცვითი პროექტების და ტურიზმის განვითარების პარალელურად, დიდი ყურადღება ექცევა რეგიონში სოფლის მეურნეობისა და მეწარმეობის განვითარებას; სხვადასხვა სახელმწიფო პროგრამებით არაერთმა თქვენგანმა ისარგებლა და მომავალშიც, ერთად უნდა შევძლოთ, რომ ეს სიკეთე თითოეულმა თქვენგანმა საკუთარი ოჯახის კეთილდღეობისთვის გამოიყენოს. რასაკვირველია, ამ ეტაპისთვის მიღწეული წარმატებით არც თქვენ და არც ჩვენ არ ვკმაყოფილდებით, რადგან მიგვაჩნია, რომ ერთად, ხელისუფლებისა და თითოეული ჩვენთაგანის პასუხისმგებლიანი ნაბიჯებით, შევძლებთ, რომ ეს მხარე და აქ მცხოვრები ადამიანები ბევრად უკეთ და უფრო შეძლებულად ცხოვრობდნენ. ამ თვალსაზრისით, ძალიან მნიშვნელოვანია ჩვენთვის მომავალი გამარჯვებები. ჩვენ ძალიან კარგად ვიცით გამარჯვებების გემო, 2012 წლიდან დაწყებული, ყველა არჩევნებში ჩვენ გამოვდიოდით წარმატებულად და თიანეთი ყოველთვის მოწოდების სიმაღლეზე იყო. ამისთვის, მინდა მადლობა გადაგიხადოთ თითოეულ თქვენგანს, თითოეულ ჩვენს თანამებრძოლს. დარწმუნებული ვარ, მომდევნო საპარლამენტო არჩევნებში, რომელიც 2020 წლის 31 ოქტომბერს გაიმართება, ერთიანი ძალისხმევით ჩვენ შევძლებთ გამარჯვების მიღწევას და ეს არ იქნება მხოლოდ ადგილობრივების, თქვენი კანდიდატის ან პარტიის გამარჯვება, ეს იქნება მთელი ქვეყნის გამარჯვება. იმიტომ რომ დღეს ჩვენს ქვეყანას ყველაზე მეტად სჭირდება სიმშვიდე, მშვიდობა და სტაბილურობა. მე დარწმუნებული ვარ, ჩვენ ამას შევძლებთ. მინდა, ყველას წარმატებები გისურვოთ თქვენს ყოველდღიურ ცხოვრებაში. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა თიანეთის მოსახლეობას მაჟორიტარი დეპუტატობის კანდიდატი შალვა კერესელიძე წარუდგინეს.

საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ და მცხეთის, დუშეთის, თიანეთისა და ყაზბეგის საარჩევნო ოლქში „ქართული ოცნების“ მაჟორიტარმა დეპუტატობის კანდიდატმა შალვა კერესელიძემ კობის წყლის საწარმო „აქვა გეო“ დაათვალიერეს. კომპანია „აქვა გეო“ მინერალურ წყალს აწარმოებს. მოპოვებული ბუნებრივი წყალი მაღალი ხარისხით, სისუფთავით ხასიათდება და ყველა სასარგებლო მინერალს შეიცავს. პროდუქციის რეალიზაციას კომპანია ადგილობრივი ბაზრის გარდა, ექსპორტზეც ახორციელებს. საწარმოსთვის, სახელმწიფო პროგრამის - „აწარმოე საქართველოში“ ფარგლებში, 3,5 მლნ ლარის საინვესტიციო ვალდებულებით კომპანიას 27 300 კვმ მიწა გადაეცა. საბოლოო ჯამში, კომპანიამ პროექტში 24 მლნ-ზე მეტი ლარის ინვესტირება განახორციელა და 50 თანამშრომელი დაასაქმა, რომელთა უმეტესობა ადგილობრივია.    

ხევი, თავისი ისტორიიდან გამომდინარე, ყოველთვის იყო ჩვენი ქვეყნის ერთ-ერთი ყველაზე საიმედო დასაყრდენი კუთხე და მხარე. ამიტომაც იყო, რომ ხევი და დარიალის ხეობა ქართული სახელმწიფოებრიობისთვის ყოველთვის განსაკუთრებულ ყურადღებას იმსახურებდა. აქ არის ხალხი შესანიშნავი ბუნებით, შესანიშნავი ტრადიციებით. ჩვენი ქვეყნის ისტორიაში უხვადაა მაგალითები მოხევეების გმირობისა და თავდადებისა ქვეყნის, სამშობლოს წინაშე. არ არსებობს არცერთი ფურცელი საქართველოს ისტორიაში, სადაც იქნება მოხევეების მხრიდან ღალატი. ისინი ყოველთვის გამოირჩეოდნენ ქვეყნის მიმართ უსაზღვროდ დიდი სიყვარულით და ერთგულებით. განსაკუთრებული ხალხი ცხოვრობს ხევში - განსაკუთრებული მეგობრობაც იცით და განსაკუთრებული ერთგულებაც, ტრადიციებსაც განსაკუთრებულად იცავთ და ქვეყანასაც. ჩემთვის და ჩვენი გუნდისთვის ერთ-ერთი მთავარი მიზანი მაღალმთიანი ხეობების და სოფლების მხარდაჭერა იქნება. ამ მხრივ, დამეთანხმებით, ძალიან ბევრი რამ გაკეთდა ყაზბეგში და მთელი ყაზბეგის მუნიციპალიტეტში, განსაკუთრებით ინფრასტრუქტურული კუთხით. არ შემიძლია არ გავამახვილო ყურადღება ტურიზმზე, რომელმაც გამოაცოცხლა მთელი ყაზბეგის მუნიციპალიტეტი. მოსახლეობასთან შეხვედრების დროს ყოველთვის ვამბობდი და ვამბობ, რომ ყაზბეგი შესანიშნავი, კლასიკური მაგალითია იმისა, თუ როგორ შეიძლება მაღალმთიან ხეობაში, მაღალმთიან მუნიციპალიტეტში ადამიანებმა იცხოვრონ ნორმალურად და ღირსეულად. გვახსოვს,რამდენიმე წლის წინ რა ხდებოდა ყაზბეგში, რა მდგომარეობა იყო და ახლა, ყველა კარგად ვხედავთ, თუ როგორ სწრაფად ვითარდება ეს მშვენიერი და დალოცვილი მხარე. ეს სწორედ ტურიზმის დამსახურებაა და სწორედ მაღალმთიანი რეგიონების მხარდაჭერა, მაღალმთიანი სოფლების და ხეობების მხარდაჭერა, ეს იქნება ჩვენი ერთ-ერთი მთავარი, მნიშვნელოვანი პრიორიტეტი როგორც ტურიზმის მიმართულებით, ასევე სოფლის მეურნეობის მიმართულებით, რომ შევქმნათ ის სახელმწიფო მიზნობრივი პროგრამები და პროექტები, რომელიც უშუალოდ ორიენტირებული იქნება მაღალმთიან სოფლებში მოსახლეობის დაბრუნებაზე, ახალგაზრდების დამაგრებაზე და ხევის განვითარებაზე. მჯერა, რომ მოხევეები კიდევ ერთხელ მიიღებენ ისეთ ღირსეულ გადაწყვეტილებას, როგორც ისინი ყოველთვის ქვეყნის, ხელისუფლების და ხალხის სასარგებლოდ მოქმედებდნენ. მჯერა, რომ პარტია„ქართული ოცნება“ მთელი ყაზბეგის რაიონის მასშტაბით ღირსეულად გაიმარჯვებს და ჩვენ 31 ოქტომბერს ერთად ვიზეიმებთ დიდ წარმატებას. დარწმუნებული ვარ, რომ ჩვენს რეგიონში, თითოეულ მუნიციპალიტეტში და განსაკუთრებით ყაზბეგის მუნიციპალიტეტში პარტია „ქართულ ოცნებას“ ჰყავს ძალიან დიდი და ძლიერი გუნდი. მე უკვე 2 წელია თქვენთან ერთად ვმუშაობ, ერთად ბევრი პროექტები განვახორციელეთ. კიდევ ძალიან ბევრი პროექტების განხორციელებას ვგეგმავთ და თქვენი მხარდაჭერის გარეშე ვერანაირ წარმატებას ვერ მივაღწევთ. მჯერა თქვენი მხარდაჭერის და მჯერა, რომ ჩვენ ერთად გავიმარჯვებთ ჩვენი საქართველოს წარმატებისთვის.

მოგესალმებით, მოხევეებო! ჩემთვის პატივია აქ, ისტორიულ ხევში ხვალინდელ გეგმებზე და ხვალინდელ დღეზე საუბარი, რადგან ჩვენი მიზანია, ჩვენი დღევანდელობა იყოს უკეთესი, ვიდრე გუშინდელი დღე და ერთად ვიშრომოთ და შევქმნათ კიდევ უკეთესი ხვალინდელი დღე. ეს არის ჩვენი აქ შეკრების ძირითადი მიზანი. ადგილობრივი ხელისუფლება სულ უფრო და უფრო უნდა გაძლიერდეს. 2012 წელს ყაზბეგის მუნიციპალიტეტის ბიუჯეტი იყო დაახლოებით 3-3,5 მილიონი ლარი, დღეს ეს ბიუჯეტი 12 მილიონი ლარია და მომავალ წელს კიდევ უფრო მეტი უნდა იყოს. ადამიანი ყაზბეგში ცხოვრობს თუ თბილისში, ბავშვებისთვის, ხანდაზმულებისთვის, ადგილობრივებისთვის არ უნდა იყოს არანაირი სხვაობა, შესაძლებლობები ყველგან და ყველაფერში უნდა იყოს თანაბარი - განათლება, სამედიცინო დახმარება, სოციალური დახმარება უნდა იყოს ერთნაირი. ეს არის ჩვენი ძირითადი მიზანი. ყველა ის პროგრამა, რომელსაც სახელმწიფო ახორციელებს, ეს იქნება - „აწარმოე საქართველოში“ თუ სოფლის მეურნეობის პროგრამები, ჩვენ ეს ყველაფერი ადგილობრივ მოსახლეობასთან უფრო ახლოს მივიტანეთ. ყველა რეგიონში, მუნიციპალიტეტებში თქვენ შეგიძლიათ, თქვენს საზოგადოებრივ ცენტრში ან იუსტიციის სახლში მიხვიდეთ და ზუსტად იგივე მომსახურება მიიღოთ, რასაც მიიღებდით თბილისის იუსტიციის სახლში ან რომელიმე სამინისტროში. ეს არის ძალიან კარგი საშუალება იმისთვის, რომ აქ, ადგილზე ახალგაზრდები დავამაგროთ, მათ, ვისაც აქვთ ნიჭი, შესაძლებლობა და სითამამე, პირველი ნაბიჯი გადადგან ბიზნესში, დაიწყონ თავიანთი საქმე, გახსნან სასტუმრო ან კიდევ ბევრი რამ. ჩვენი მთავარი მიზანია, ადამიანებს შევუქმნათ ერთნაირი სამართლიანი პირობები ყველგან, ქალაქში იქნება ეს თუ მთაში. ძალზედ მნიშვნელოვანია ინფრასტრუქტურული პროექტები. მოგეხსენებათ, პრაქტიკულად უკვე დაწყებულია ქვეშეთი-კობის გზის მშენებლობა, ეს უპრეცედენტოდ დიდი და მნიშვნელოვანი გზა იქნება ამ რეგიონისთვის, რომელიც გააძლიერებს აქაურობის სატრანზიტო პოტენციალს. სოფლის მეურნეობა კარგია, ტურიზმიც კარგია, მაგრამ ტრანზიტი ყოველთვის იყო ამ რეგიონის ძალიან ძლიერი მხარე. სულ უახლოეს პერიოდში დაიწყება ჟინვალამდე გზის პროექტირება. მოკლედ რომ გითხრათ, თბილისიდან აქ ამოსვლა დაახლოებით 1 საათით უფრო სწრაფად იქნება შესაძლებელი და ამას სულ 3-4 წელი დასჭირდება. ქვეშეთი-კობი დამთავრდება 2023-2024 წლებში და ნატახტარი-ჟინვალის გზის მშენებლობასაც, რომლის პროექტირება უკვე დაწყებულია, ძალიან სწრაფად დავიწყებთ. ეს სულ სხვა რეგიონი გახდება და აქ სულ სხვა ცხოვრება იქნება. გარდა ამისა, იცით, რომ უდიდეს ყურადღებას ვაქცევთ გუდაურს. უკვე წლების განმავლობაში გუდაურში დაგროვილი პრობლემა, ჩვენთვისაც გაჭიანურებული, გუდაურის წყალმომარაგება, წლევანდელ სეზონზე იქნება გადაწყვეტილი და ეს პრობლემა გუდაურში აღარ იარსებებს. ყველას უნდა გვესმოდეს, რომ წელს, ამ პანდემიის პირობებში, ტურისტების რაოდენობა ბუნებრივად შეგვიმცირდა. ცალკე აღებული საქართველო ვირუსს ვერ დაამარცხებს, ამიტომ, ყველაფერი უნდა გავაკეთოთ იმისთვის, რომ ყველაზე ეფექტურად და ყველაზე სწრაფად მოვახერხოთ ჩვენი ეკონომიკის აღდგენა. ეს არის ჩვენი ძირითადი მიზანი. ყველამ უნდა ვიშრომოთ იმისთვის, რომ ჩვენს შვილებს მივცეთ საუკეთესო განათლება და არ ჰქონდეს მნიშვნელობა, ეს არის თბილისის, თუ ყაზბეგის სკოლაში, ჩვენს მოხუცებს ჰქონდეთ ძლიერი სოციალური დახმარება და ამიტომ არის, რომ ყაზბეგის ყველა სოფელს აქვს მაღალმთიანი სოფლის სტატუსი, რაც პირდაპირი სოციალური დახმარებაა აქ მცხოვრები თითოეული მოქალაქისთვის. ყველაფერი უნდა გავაკეთოთ იმისთვის, რომ ყველას გვქონდეს თანაბარი, სამართლიანი პირობები, იმისთვის, რომ ვიშრომოთ და სამართლიანად, ღირსეულად ვარჩინოთ ჩვენი ოჯახები. დარწმუნებული ვარ, რომ ამ საქმეში, თქვენ მოგეხმარებათ თქვენი მაჟორიტარობის კანდიდატი. შალვა კერესელიძე ამ კუთხის შვილია და ის იყო ამ რეგიონის გუბერნატორი. მან ძალიან კარგად იცის თითოეული პრობლემა, დრო არ დასჭირდება და როგორც კი გავიმარჯვებთ, მეორე დღესვე დაიწყებს აქაური მოსახლეობის ინტერესების დაცვას. დარწმუნებული ვარ, ის იქნება ყაზბეგელების ღირსეული ხმა საქართველოს საკანონმდებლო ორგანოში. მოხევეებო, კიდევ ერთხელ გისურვებთ გამარჯვებას, სამართლიან ბრძოლაში!

ქალბატონებო და ბატონებო, მოგესალმებით! აქ ცხოვრობენ განსაკუთრებული ადამიანები, ადამიანები, რომლებიც დარაჯობენ დარიალის კარს და საქართველოს საზღვრებს იცავენ. სამშობლოს სიყვარულთან ერთად, აქ, ამ ხეობაში გაზრდილი ადამიანი სიყრმიდანვე ეზიარება თავისუფლებასა და ქრისტიანობას! სხვაგვარად ხომ შეუძლებელიცაა, მითუმეტეს, როცა ღრუბლების სიმაღლეზე, გერგეტის სამებიდან, საკუთარი თვალით ხედავ ამ ხეობის სილამაზეს და დიდებულებას, რითაც ვამაყობთ ამ ქვეყნის თითოეული მოქალაქე! თქვენ, ამაყი მოხევეები მაღალი მორალური ღირსების მატარებელი ხალხი ხართ, ადამიანები, რომელთა დასახასიათებლად მხოლოდ ის ფაქტიც კმარა, რომ სწორედ ამ კუთხის შვილია ყველასათვის საყვარელი დიდი ქართველი მწერალი ალექსანდრე ყაზბეგი! ყველაფერთან ერთად, კარგად ვიცი, რომ ჩემს წინაშე დიდად გამრჯე ადამიანები დგანან, რომლებიც მუხლჩაუხრელად შრომობენ საკუთარი ოჯახებისა და ქვეყნის კეთილდღეობისათვის. ბუნებრივია, ხელისუფლება ყველაფერს აკეთებს და მომავალშიც გააკეთებს, რათა თითოეულმა თქვენგანმა, ისევე, როგორც ჩვენი ქვეყნის თითოეულმა მოქალაქემ, მუდმივად იგრძნოთ, რომ მარტო არ ხართ და თქვენს გვერდით თქვენი მთავრობა დგას. დარწმუნებული ვარ დამეთანხმებით, რომ „ქართული ოცნების“ ხელისუფლებაში მოსვლის დღიდან, ყაზბეგის მუნიციპალიტეტში ვითარება მკვეთრად შეიცვალა უკეთესობისკენ და დღეს რეგიონს ისეთი ყურადღება ექცევა, როგორც არასდროს. ძალიან ბევრი მნიშვნელოვანი პროექტი განხორციელდა სახელმწიფოს მხარდაჭერითა და თანადგომით. ამასთანავე, იზრდება თვითმმართველობის ხარისხი და ადგილობრივი ბიუჯეტი, რაც მუნიციპალიტეტის განვითარებას, თქვენს წინაშე არსებული მიზნებისა და ამოცანების ეფექტიან განხორციელებას უზრუნველყოფს. არსებული წარმატებებისა და წინსვლის მიუხედავად, ჯერ კიდევ რჩება გამოწვევები, პრობლემები, რომელსაც მოგვარება ჭირდება და დარწმუნებული ვარ, ერთიანი ძალისხმევით, მომდევნო წლების განმავლობაში ჩვენ მათ ღირსეულად ვუპასუხებთ. დღეს ჩვენ აქ შევიკრიბეთ, რათა წარმოგიდგინოთ ადამიანი, რომელიც თქვენს ინტერესებს დაიცავს და გაატარებს საკანონმდებლო ორგანოში. რა თქმა უნდა, მხოლოდ ერთი ადამიანი ვერ მიაღწევს გამარჯვებას. ამას ჭირდება თითოეული ჩვენგანის მხარდაჭერა და თანადგომა, როგორც ეს ბოლო წლების განმავლობაში ყველა არჩევნებზე ხდებოდა. ჩვენ ჩვენი ყოველდღიური ქმედებებით, გადადგმული ნაბიჯებით უნდა შევქმნათ წარმატებული ისტორიები, უნდა გავაძლიეროთ სოფელი, უნდა გავაძლიეროთ გლეხი, გავაძლიეროთ რაიონები, ქალაქები, იმისთვის, რომ შევქმნათ წარმატებული საქართველო. ერთად წარმატებული საქართველოსთვის!