მადლობა ნდობისთვის! ჩვენ ერთად გავიმარჯვეთ საქართველოს წარმატებისთვის!

გვინდა, გამოვეხმაუროთ რადიკალური ოპოზიციის დესტრუქციულ ქმედებებს, რომელთა მიზანი არჩევნებისთვის ჩრდილის მიყენებაა.ამ გეგმის შესახებ ჩვენ გვქონდა მათი ე.წ. რევოლუციური შტაბიდან გამოჟონილი ინფორმაცია, რაც დადასტურდა კიდეც. დღეს ამ შტაბის წევრები პისტოლეტებით შეიარაღებულები დარბიან საარჩევნო უბნებზე და ყველას გვახსენებენ იმ მძიმე საარჩევნო პრაქტიკას, რომელიც მათი ხელისუფლებაში ჰყოფნის პირობებში იყო ჩამოყალიბებული.ჩვენ გავაფრთხილეთ საზოგადოება, მედია და საერთაშორისო პარტნიორები იმის შესახებ, რომ რადიკალური ოპოზიცია არჩევნების დღის 4 საათიდან გეგმავდა მძიმე პროვოკაციების მოწყობას. ჩვენ ასევე გავაფრთხილეთ ყველა იმის შესახებ, რომ პროვოკაციების ეპიცენტრად განიხილებოდა რამდენიმე მუნიციპალიტეტი და რაიონი - მათ შორის ბოლნისი, დმანისი, მარნეული და გლდანი. თუ დააკვირდებით, მათი ზონდერების კონცენტრაცია და პროვოკაციები ძირითადად სწორედ ამ რაიონებში ფიქსირდება.ზემოხსენებული გეგმის შესაბამისად, ინციდენტი დაფიქსირდა გლდანში, სადაც ეგრეთწოდებულმა კრიმინალურმა ავტორიტეტმა, მეტსახელად „ჭყიპინამ“ , მისი სახელი და გვარი, თუ არ ვცდები ირაკლი ეძგვერაძეა, მძიმე პროვოკაცია მოაწყო.ყველას შევახსენებ, რომ არჩევნები ერთი დღე გრძელდება.  დღეს საღამოს დაფიქსირდება „ქართული ოცნება-დემოკრატიული საქართველოს“ შთამბეჭდავი გამარჯვება და ჩვენი პარტია მიიღებს დაახლოებით 100 მანდატს საქართველოს პარლამენტში. ამის თქმის უფლებას მაძლევს ის აქტივობა და მხარდაჭერა, რაც დღეს ფიქსირდება საარჩევნო უბნებზე. მინდა, კიდევ ერთხელ მივმართო ყველას, ვინც ადგენდა და ახორციელებდა დესტრუქციულ გეგმებს, მთელი სიმკაცრით აგებს პასუხს კანონის წინაშე. ზონდერებისა და დივერსანტების დრო ქართულ პოლიტიკაში აღარ არის.გვინდა მოვუწოდოთ სამართალდამცავ ორგანოებს განსაკუთრებული ყურადღებისკენ, რათა იმთავითვე აღიკვეთოს კანონის დარღვევისა და ძალადობის ნებისმიერი მცდელობა.

არჩევნები წარიმართება არსებითად მშვიდ გარემოში, არსებითი ხარვეზების გარეშე. ფიქსირდება გარკვეული მღელვარება და მცირე ინციდენტები, რამდენიმე საარჩევნო უბანთან. საინტერესოა, რომ ამ უბნებთან მღელვარებასა და მცირე ინციდენტებს ძირითადად წინ უსწრებს ხოლმე ადგილზე პარტიული ტელევიზიების მისვლა - შეიძლება დამთხვევაა. დასკვნები თქვენთვის მოგვინდვია. აღსანიშნავია, რომ ფიქსირდება მაღალი აქტივობა, რისთვისაც თითოეულ ამომრჩეველს მადლობა გვინდა გადავუხადოთ. ჩვენი ადგილობრივი საარჩევნო შტაბებიდან მიღებული ინფორმაციის თანახმად, „ქართული ოცნება“ დამაჯერებლად იგებს არჩევნებს. უკვე 15:00 საათისთვის სულ მცირე 700 ათასზე მეტმა ჩვენმა მხარდამჭერმა მისცა ხმა ჩვენ პარტიას და ჩვენს კანდიდატებს. კიდევ ერთხელ მოვუწოდებთ ჩვენს აქტივისტებსა და მხარდამჭერებს, მოთმინებისა და თავშეკავებისაკენ. კიდევ ერთხელ მოვუწოდებთ ამომრჩეველს მაქსიმალური აქტიურობისკენ. რაც უფრო აქტიური იქნება ამომრჩეველი, მით უფრო ნაკლებად იქნება წარმოდგენილი რადიკალური და დესტრუქციული ოპოზიცია პარლამენტში, რაც ასე მნიშვნელოვანია ჩვენი ქვეყნის სტაბილური დემოკრატიული განვითარებისთვის. აქვე მინდა აღვნიშნო, რომ თითოეული ხმა არის განსაკუთრებით მნიშვნელოვანი ჩვენი მაჟორიტარი დეპუტატობის კანდიდატებისათვის იმიტო, რომ ზოგ შემთხვევაში სწორედ მცირედით შეიძლება გადაწყდეს პირველი ტურის ბედი. შესაბამისად, ყველა ამომრჩეველს მაქსიმალური აქტიურობისკენ მოვუწოდებთ.

ბიძინა ივანიშვილმა საკუთარი არჩევანი ოჯახთან ერთად გააკეთა „ქართული ოცნება-დემოკრატიული საქართველოს“ თავმჯდომარე ბიძინა ივანიშვილმა საკუთარი არჩევანი გააკეთა. პარტიის ლიდერი საარჩევნო უბანზე ხმის მისაცემად მეუღლესთან და შვილთან ერთად მივიდა. როგორც ბიძინა ივანიშვილმა განაცხადა, საქართველოს მოქალაქეების თავისუფალი არჩევანი განსაზღვრავს ქვეყნის განვითარების უახლოეს ოთხ წელს და უფრო შორეულ პერსპექტივას. „დღეს საქართველო აკეთებს თავის არჩევანს. საქართველოს მოქალაქეების თავისუფალი არჩევანი განსაზღვრავს ქვეყნის განვითარების უახლოეს ოთხ წელს და უფრო შორეულ პერსპექტივას. მე ხმა მივეცი ქვეყნის სტაბილურ განვითარებას, მშვიდობას, ჩვენს ევროპულ მომავალს, ეკონომიკურ ზრდას, თითოეული ოჯახის კეთილდღეობას და რაც მთავარია, ადამიანის ღირსებას და პატივის დაცვას. ვფიქრობ, ეს ღირებულებები, რომელიც ადამიანზეა მორგებული, მოსახლეობის აბსოლუტურ უმრავლესობას აქვს განსაზღვრული და გააზრებული და ვფიქრობ, რომ მოსახლეობის უმრავლესობა სწორედ ამ მიმართულებას მისცემს ხმას. მოვუწოდებ ყველას, თავისი სინდისის, ოჯახის მომავლის და თავისი ქვეყნის მომავალს მისცენ ხმა და აუცილებლად მოვიდნენ" - ბიძინა ივანიშვილი

„მინდა წარმატება ვუსურვო ლევან კობიაშვილს, გამორჩეულად ღირსეულ ადამიანს. მას აშორებს ერთი ნაბიჯი გამარჯვებამდე. დარწმუნებული ვარ, რომ ის პირველსავე ტურში მოიგებს ამ არჩევნებს“, - განაცხადა „ქართული ოცნების“ შემაჯამებელ შეხვედრაზე პარტიის აღმასრულებელმა მდივანმა ირაკლი კობახიძემ. მისი თქმით,  ასევე  წინ გველოდება ძალიან დიდი და მნიშვნელოვანი გამარჯვება, რასაც ჰქვია საფეხბურთო ოცნების ახდენა. „ევროპის ჩემპიონატზე საქართველოს ნაკრების ასპარეზობა. იმაში, რომ ამ ოცნებამდე ერთი ნაბიჯი გვაშორებს, ლევან კობიაშვილის დიდი დამსახურებაა, რისთვისაც მას მადლობა უნდა გადავუხადოთ.  დღეს სრულდება ხანგრძლივი და ემოციებით აღსავსე საარჩევნო კამპანია. ამ კამპანიის მსვლელობისას ჩვენ მოვიარეთ საქართველოს თითოეული კუთხე. საზოგადოებას წარვუდგინეთ ღირსეული და გამორჩეული მაჟორიტარი დეპუტატობის კანდიდატები. წარვადგინეთ გამოცდილი და განახლებული საპარლამენტო გუნდი. ამომრჩეველს გავაცანით ჩვენი საარჩევნო პროგრამა, ჩვენი ხედვა ქვეყნის განვითარების ყველა მიმართულებით. გასული 2 თვის მანძილზე ჩვენი პარტიის ლიდერები ესტუმრნენ საქართველოს ყველა მუნიციპალიტეტს, მაჟორიტარობის კანდიდატები ესტუმრნენ თითოეულ ქალაქს, უბანსა და სოფელს, მოისმინეს უამრავი ადამიანის საფიქრალი და საწუხარი. საარჩევნო კამპანიამ ჩვენ მოგვცა ხალხთან , ადამიანებთან კიდევ უფრო დაახლოების შესაძლებლობა, რაც  გარწმუნებთ, რომ ჩვენი საქმიანობის კიდევ უფრო მეტად დახვეწის საფუძველი გახდება. „ქართული ოცნების“ საარჩევნო შტაბის სახელით მსურს, მადლობა გადავუხადო ჩვენი პარტიის თითოეულ წევრსა და მხარდამჭერს, ახალგაზრდული ორგანიზაციის თითოეულ წევრს კამპანიაში შეტანილი ფასდაუდებელი წვლილისთვის. ხვალიდნელი დღე არის „ ქართული ოცნებისა“ და ქართველი ხალხის მორიგი გამარჯვების დღე. ამ დღეს ქართველი ხალხი კიდევ ერთხელ ეტყვის უარს სიყალბესა და ბოროტებას, ანტიეროვნულ, ანტისახელმწიფოებრივ და ანტიეკლესიურ პოლიტიკურ ძალას. ქართველი ხალხი კიდევ ერთხელ დაუჭერს მხარს მშვიდობას, ღირსებას, განვითარებას, მხარს დაუჭერს პოლიტიკურ ძალას, რომელსაც უყვარს სამშობლო; რომელიც სათანადო პატივს მიაგებს ეკლესიას; რომლისთვისაც უზენაესი ღირებულებაა ადამიანი, განურჩევლად მისი ეთნიკური თუ რელიგიური კუთვნილებისა, პოლიტიკური, მსოფლმხედველობრივი თუ პირადი შეხედულებებისა. ამ დღეს ქართველი ხალხი მხარს დაუჭერს პოლიტიკურ ძალას, რომელსაც აქვს ქვეყნის განვითარების მკაფიო ხედვა, რომელსაც ჰყავს ძლიერი ლიდერები, გამოცდილი და თვისებრივად განახლებული პოლიტიკური გუნდი. ხვალ გაიმარჯვებს „ქართული ოცნება“, ხვალ გაიმარჯვებს ქართველი ხალხი, ხვალ გაიმარჯვებს საქართველო“, -განაცხადა ირაკლი კობახიძემ.

ჩვენ დღეს აქ, გლდანში, თბილისში, ჩვენი საარჩევნო კამპანიის ბოლო დღე გვაქვს. ხვალ, 31 ოქტომბერს, საქართველოს მოქალაქე გააკეთებს არჩევანს და ეს არჩევანი იქნება ეკონომიკურად ძლიერი, თავისუფალი, ღირსებით სავსე, დემოკრატიული და ევროპული სახელმწიფოს სასარგებლოდ. ეს იქნება არჩევანი, რომელიც უარს ეტყვის წარსულში დაბრუნებას. წარსულში - უუფლებობის, ძალადობის, ფეხქვეშ გათელილი ღირსების და ადამიანის ფეხქვეშ გათელილი ინტერესების დროს.  ყველას უნდა გვესმოდეს ერთი რამ, ეს არის საქართველოს მოქალაქეების დაკვეთა, რომ „ქართულმა ოცნებამ“ გააგრძელოს ქვეყნის აღმშენებლობა. ჩვენი ვალდებულებაა, გავაგრძელოთ ზრუნვა, პირველ რიგში, ყველაზე მოწყვლად ადამიანებზე, მათზე, ვისაც ჩვენი მხრიდან ზრუნვა ყველაზე უფრო სჭირდება - რა თმა უნდა, ჩვენს ღვაწლმოსილ მოხუცებსა და პენსიონერებზე. „ქართული ოცნება“ არის ერთადერთი გუნდი, რომელმაც შეძლო და საკანონმდებლო დონეზე დაადასტურა, რომ ყოველწლიურად ჩვენს პენსიონერებს პენსია გაეზრდებათ და ეს ვერ გახდება საარჩევნო, პოლიტიკური სპეკულირების საგანი. რა თქმა უნდა, ჩვენ ვიზრუნებთ ჩვენს ბავშვებზე, ბავშვებზე, რომელთა ჯანმრთელობა, განათლება, სოციალური მდგომარეობა სულ უფრო დიდი გამოწვევის წინაშეა და ჩვენ ეს ზრუნვა ყოველდღე უნდა გამოვავლინოთ. რა თქმა უნდა ჩვენ გვესმის, რომ ჩვენს დევნილებზე ზრუნვა ჩვენი უპირველესი პრიორიტეტია და 2013 წლიდან დღემდე ჩვენ დევნილებს გადავეცით 24 ათასზე მეტი საცხოვრებელი. ჩვენ უკვე გეგმაში გვაქვს, შემდგომი 4 წლის განმავლობაში კიდევ გადავცეთ 13 ათასი საცხოვრებელი, მაგრამ ჩვენ ყველას კარგადა გვესმის, რომ ჩვენი ვალდებულებაა, პირველ რიგში ვიზრუნოთ მშობლიურ სახლებში მათ დაბრუნებაზე. გონივრულად, მშვიდად, მშვიდობიანად, მაგრამ მათი დაბრუნებისთვის. რა თქმა უნდა, ჩვენ გავაგრძელებთ ზრუნვას ძლიერ საჯარო მოხელეზე. ჩვენ არ უნდა შეგვრცხვეს და არ უნდა მოგვერიდოს ვთქვათ, რომ სახელმწიფო დგას ეფექტურ და კეთილსინდისიერ პოლიციელზე და ჯარისკაცზე, მასწავლებელზე და ექიმზე და მაშინ, როდესაც ჩვენ ამის შესაძლებლობა გვექნება, ჩვენ ყო0ველთვის დავუდგებით მათ გვერდით, როგორც სოციალური დახმარებებით, ისე ყველა იმ საშუალებით, რომლითაც სახელმწიფო მათ გვერდით უნდა დაუდგეს. ეს არის ის ხალხი, რომელზეც დგას საქართველოს ხვალინდელი დღე.  რა თქმა უნდა, ჩვენ ყველაფერი უნდა გავაკეთოთ იმისთვის, რომ მხარი დავუჭიროთ ბიზნესს. ჩვენ გავაგრძელებთ და მივეხმარებით ჩვენს გლეხს, რომ ის გახდეს ძლიერი ფერმერი, შეძლოს დაასაქმოს თავისი ოჯახი, მეზობელი, ახლობელი და გახდეს დამსაქმებელი, ღირსეულად იშრომოს და ღირსეულად არჩინოთ თავისი ოჯახი. რა თქმა უნდა, თანაბარი პირობები ბიზნესის ყველა წარმომადგენლისთვის, დაცული საკუთრების უფლება, ეს ის პირობებია, რომლის გარეშეც განვითარებული ევროპული ქვეყანა შეუძლებელია. ჩვენ ყველას კარგად უნდა გვესმოდეს, რომ ჩვენ გავაგრძელებთ პრიორიტეტულად დასავლეთისკენ სვლას. ევროპული ინტეგრაცია და ის მიღწევები, რომლებიც ჩვენ გვაქვს - თავისუფალი სავაჭრო რეჟიმი, უვიზო რეჟიმი -  ეს ყველაფერი არის გარდამავალი ეტაპი იმ დიდი ნაბიჯისთვის, რომელიც ჩვენ უნდა გავაკეთოთ.  ჩვენი ქვეყნის სისტემური ინფრასტრუქტურა ჯერ კიდევ წესრიგში გვაქვს მოსაყვანი. 2013 წლიდან 2019 წლამდე, საქართველოს მთავრობამ ქვეყნის სისტემურ ინფრასტრუქტურაში 23 მილიარდი ლარის ინვესტირება მოახდინა. დღეს ჩვენ გვაქვს კონკრეტული გეგმა, რომლის მიხედვითაც, შემდგომი 4 წლის განმავლობაში, 20 მილიარდ ლარზე მეტის ინვესტირებას გავაკეთებთ, ორჯერ მეტს. ეს არის კეთილმოწყობილი გზები, სკოლები, წყალმომარაგება, გაზმომარაგება და ა.შ. ამ გეგმის მიხედვით, 2024 წლისთვის, საქართველოს მოსახლეობის 77 პროცენტს ექნება 24-საათიანი წყალმომარაგება, რომელიც სამწუხაროდ, დღეს კიდევ არის ჩვენი სერიოზული გამოწვევა. ჩვენ, სულ ახლახან, მთავრობის სხდომაზე დავამტკიცეთ დამატებით 2021-2024 წლის გაზიფიცირების პროგრამა და 2024 წელს სრულად დასრულდება ქვეყნის გაზიფიცირება. ეს იქნება პროცენტულად ევროპაში ერთ-ერთი საუკეთესო მაჩვენებელი. სისტემური ინფრასტრუქტურა, რომელზეც ჩვენ პრიორიტეტულად გავაგრძელებთ მუშაობას, საჭიროა ქვეყნის მთავარი მიზნის მისაღწევად - თანაბარი პირობები  ყველა ჩვენი მოქალაქისთვის, მიუხედავად იმისა, სად ცხოვრობენ ისინი, ეს იქნება თბილისი, ბათუმი, ქუთაისი, ჩხოროწყუ, ზუგდიდი, თელავი, ახალქალაქი, თუ ახალციხე. ჩვენ უნდა შევუქმნათ თანაბარი პირობები ყველა მოქალაქეს იმისთვის, რომ ჩვენი ქვეყანა გახდეს კიდევ უფრო ევროპული.  ყველა ეს ნაბიჯი მიმართულია ერთი ძირითადი მიზნისკენ -  რაც შეიძლება სწრაფად და ახლოს იყოს ჩვენი სტანდარტები ევროპულ სტანდარტებთან. ეს არის ის აუცილებელი პირობა, რომელმაც ჩვენ უნდა მოგვცეს შესაძლებლობა, გადავდგათ ჩვენი ქვეყნის ასწლეულების ყველაზე დიდი ოცნება და 2024 წელს გავაკეთოთ განაცხადი სრულფასოვან წევრობაზე ევროპის დიდ ოჯახში. ეს არის ჩვენი მიზანი და ჩვენ  ვშრომობთ იმისთვის, რომ თითოეულმა მოქალაქემ, გარდა იმისა, რომ იგრძნოს ეს ყოველდღიურ ცხოვრებაზე, ასევე მონაწილეობა მიიღოს ამ დიდ და ღირსეულ პროცესში. ჩემო ძვირფასებო, არჩევნებამდე დარჩა სულ რამდენიმე საათი. დარწმუნებული ვარ, „ქართული ოცნება“ მიაღწევს ღირსეულ გამარჯვებას სამართლიან ბრძოლაში. გამარჯვებას გისურვებთ!

მოგესალმებით ყველას, მივესალმები მთელ საქართველოს, მის მრავალეროვან ხალხს, საქართველოს ყველა მოქალაქეს, დედამიწის რომელ წერტილშიც არ უნდა ცხოვრობდეს, რადგან დარწმუნებული ვარ, რომ დღეს, ყველა მათგანის მზერა მოპყრობილია საკუთარი სამშობლოსკენ. დღეს იწურება მანდატი, რომელიც ქართველმა ხალხმა 4 წლის წინ მოგვცა, როდესაც  „ქართულ ოცნებას“ მეორე ვადით ანდო ქვეყნის ბედი და მისი განვითარების პერსპექტივა. როგორც მმართველი პოლიტიკური ძალის ლიდერმა, პირველ რიგში, გულითადი მადლობა მინდა გადაგიხადოთ ამ ნდობისთვის.  ხელისუფლების წყარო ხალხია და მხოლოდ ის წყვეტს, ვინ უნდა გაუძღვეს ქვეყანას. ასე მუშაობს დემოკრატია და მე ამაყი ვარ, რომ დღეს, ქართველ ხალხს კლავ მყარად უპყრია ხელთ ეს უზენაესი უფლება, რომელიც 2012 წლამდე მიტაცებული ჰქონდა უზურპატორს. მერწმუნეთ, დემოკრატიული ტრადიციის დამკვიდრება და მისი შეუქცევადობა, პირადად ჩემთვის, ყველაზე ღირებულია იმ მიღწევათა შორის, რომელიც „ქართული ოცნების“ მმართველობას და მის წარმატებებს უკავშირდება. ხვალ, ჩვენი ქვეყნის ისტორიაში ერთ-ერთი გადამწყვეტი დღეა. ხვალ, ყველა ჩვენთაგანმა კიდევ ერთხელ უნდა გავაკეთოთ არჩევანი საკუთარი რწმენის, ღირებულებების, სინდისისა და ინტერესების გათვალისწინებით და მე „ქართული ოცნების“ სახელით გაძლევთ გარანტიას, რომ ეს არჩევანი იქნება თავისუფალი და ხალხის ნება სრული სიზუსტით აისახება არჩევნების შედეგებში - ქართული სახელმწიფო არ დაუშვებს, რომ მცირედით მაინც გამრუდდეს ხალხის არჩევანი. დღეს კი, ემოციურად დატვირთული საარჩევნო კამპანიის მიწურულს,  კვლავ მახსენდება 2012 წლის ის ბობოქარი დღეები, როდესაც ერთ მუშტად შეკრულებმა, ერთად გავაკეთეთ ისტორიული არჩევანი თავისუფლების სასარგებლოდ, უარი ვუთხრით ადამიანის ჩაგვრაზე დაფუძნებულ რეჟიმს და მთელ მსოფლიოს გავაგებინეთ, რომ სამი ათასწლოვანი ისტორიის მქონე, თავისუფლებისმოყვარე, ღირსების მატარებელი ხალხი აღარასოდეს შეეგუება ძალადობას და უსამართლობას. ამიტომ მოგმართავთ თქვენ, „ქართული ოცნების“ მხარდამჭერებს, ოცნების ვეტერანებს და ახლადშემოერთებულ ჯარისკაცებს: ხვალ არცერთი ჩვენთაგანი არ უნდა დარჩეს სახლში და ყოველმიზეზგარეშე უნდა მივიდეს საარჩევნო ყუთებთან! ეს ჩვენი ვალია ქვეყნის, მისი მომავლის, ერთმანეთის და რაც არ უნდა უჩვეულოდ მოგეჩვენოთ, იმათ წინაშეც, ვინც ხვალ სხვა პარტიის სასარგებლოდ გააკეთებს არჩევანს! ფაქტია, რომ ყველას დარწმუნება ვერ შევძელით, რაც დემოკრატიის პირობებში სავსებით ნორმალურია! ფაქტია, რომ ყველა ის წარმატება, რისი მიღწევაც ოცნებამ ამ რთულ პერიოდში მოახერხა და შეძლო, არ აღმოჩნდა საკმარისი უმცირესობაში მყოფი, ჩვენდამი კრიტიკულად განწყობილი ადამიანების დასარწმუნებლად და ხვალ ისინი განსხვავებულ არჩევანსაც გააკეთებენ. მაგრამ ჩვენ მეტნი ვართ, გაცილებით მეტნი და სწორედ ეს არის უმრავლესობის პასუხისმგებლობა უმცირესობის წინაშე, რომ შევძლოთ და დავაზღვიოთ მათი შეცდომაც, რათა მათვე არ დაუჯდეთ ძვირი საკუთარი მცდარი გადაწყვეტილება. მე პატივს ვცემ საქართველოს ყველა მოქალაქის არჩევანს და დრამატულს ვერაფერს ვხედავ იმაში, რომ მათი გარკვეული ნაწილი მხარს არ უჭერს „ქართულ ოცნებას“. დრამატულია ვითარება, როდესაც ქართული პოლიტიკა დღემდე ვერ სთავაზობს ამომრჩეველს „ოცნების“ საპირწონე ჯანსაღ ალტერნატივას და პოლიტიკური მრავალფეროვნების მიუხედავად, ოპოზიციურ ველზე კვლავ დომინირებს რევანშზე ორიენტირებული, დესტრუქციული ძალა, რის გამოც, „ქართული ოცნების“ საწინააღმდეგო არჩევანი, პრაქტიკულად, ამ ძალის სასარგებლოდ გაკეთებულ არჩევანს ნიშნავს. ჩვენ ხომ ზედმიწევნით კარგად ვიცით, რას უქადის ეს არჩევანი ჩვენს სამშობლოს და სწორედ ამიტომ, ჩვენი ვალია, „ქართული ოცნების“ მხარდამჭერთა ასპროცენტიანი გამოცხადებით დავიცვათ ისინიც, ვინც მცდარ არჩევანს გააკეთებენ, რათა არ დავუშვათ, რომ ემოციით ნაკარნახევი გადაწყვეტილებით დასაჯონ ქვეყანა და საკუთარი თავი!   ისინი ხომ, განსხვავებული ხედვის მიუხედავად, ჩვენი სისხლი და ხორცი - ჩვენი ძმები და დები არიან! გახსოვდეთ, საკუთარ ხალხს არ უბრაზდებიან!  არ დაგავიწყდეთ, რომ ჩვენზე განაწყენებული ადამიანების დიდ ნაწილს, ისევ ჩვენ ვეიმედებით! ჩვენ არ გვაქვს უფლება, გავუწბილოთ მათ ეს იმედი! ჩვენ უნდა მივიდეთ არჩევნებზე, რათა ვერავინ და ვეღარასდროს გაბედოს მსახურად დაიყენოს ხალხი, დაჩაგროს და ღირსება შეულახოს მათ! ჩვენ უნდა მივიდეთ არჩევნებზე, რათა ქვეყანაში აღარასოდეს დაისადგუროს შიშმა და უსამართლობამ! ჩვენ უნდა მივიდეთ არჩევნებზე, რათა მოქალაქემ ყველაზე კრიტიკულ სიტუაციაშიც არ იგრძნოს მიტოვებულად თავი! ჩვენ უნდა მივიდეთ არჩევნებზე, რათა ადამიანს უსახსრობის გამო არ ეშინოდეს ექიმთან მისვლის! ჩვენ უნდა მივიდეთ არჩევნებზე, რათა ქართველ კაცს არასოდეს მოუწიოს აჩეხოს ვაზი! ჩვენ უნდა მივიდეთ არჩევნებზე, რათა ჩვენ შვილებს ჰქონდეთ ევროპული ხარისხის განათლების საქართველოში მიღების გარანტია, ჩვენ ოჯახებს - კეთილდღეობა, ხანდაზმულებს კი - ღირსეული სიბერე! ჩვენ უნდა მივიდეთ არჩევნებზე, რათა მშვიდობა და სტაბილურობა იყოს ურღვევი!  ჩვენ უნდა მივიდეთ არჩევნებზე, რათა გაგრძელდეს ქვეყნის შენება და დავიმკვიდროთ ღირსეული ადგილი ევროპულ ოჯახში! მოდით, კვლავაც ერთად ვატაროთ ჩვენი ქვეყანა გამარჯვების გზაზე და კვლავაც ერთად ვიბრძოლოთ საქართველოს წარმატებისთვის!

დღეს, ერთ–ერთი მნიშვნელოვანი დღეა ჩემს ცხოვრებაში. სიმართლე გითხრათ, როდესაც შევუდექი წინასაარჩევნო კამპანიას, მეგონა რომ ძალიან ბევრი მაქვს ცხოვრებაში ნანახი და ძალიან ბევრი რამ ვიცი. მაგრამ დამერწმუნეთ, ეს კიდევ სხვა ციკლი იყო ჩემს ცხოვრებაში, რომელმაც უფრო მეტად დამაფიქრა, იმ სიკეთესთან ერთად რაც ვნახე, ბევრი ბოროტებაც ვნახე. ამიტომ, დღეს ვამთავრებ წინასაარჩევნო კამპანიას, ხვალ ჩვენ გველოდება უმნიშვნელოვანესი დღე. თქვენ ხედავთ, რომ ჩვენი ხელისუფლება არის ის ხელისუფლება, რომელმაც, მიუხედავად იმისა, რომ შეიძლება ვინმე ფიქრობს – რაღაც ბოლომდე ვერ გააკეთა, ჩვენი ხელისუფლება ის ხელისუფლებაა, რომელიც არ შეხებია ადამიანის ღირსებას. ჩვენი ხელისუფლება ის ხელისუფლებაა, რომელმაც იზრუნა ადამიანის ჯანმრთელობაზე და საყიდელი აღარ არის ადამიანის სიცოცხლე და ყოველ შემთხვევაში, ახლობელს ხელს აღარ აწერინებენ ადამიანის სიკვდილზე, როგორც წლების განმავლობაში ხდებოდა. ჩვენი ხელისუფლება ის ხელისუფლებაა, რომელმაც პატივი და ღირსება შეუნარჩუნა ყველა ადამიანს. ჩვენი ხელისუფლება ის ხელისუფლებაა, რომელიც ბიუჯეტს არ ავსებს საპროცესო შეთანხმებებით.სხვათა შორის, დღეს ისნის რაიონი არის ერთერთი თვალსაჩინო ადგილი, სადაც ჩვენ შეგვიძლია ვნახოთ ის კონტრასტი, რომელიც არსებობდა ხელისუფლებასა და მოსახლეობას შორის. ეს ავლაბრის რეზიდენცია, ულამაზესი შენობა, რომელიც ძალიან მოუხდა თბილისს, მაგრამ ამის უკან არის ავარიული სახლები, დანგრეული ქუჩები და ადამიანები, რომლებიც ცხოვრობენ ძალიან მძიმე პირობებში. ეს იყო ის, რაც ხდებოდა - აქეთ ლამაზი ფასადი, იქით დანგრეული მოსახლეობა, რომელიც ითხოვდა დახმარებას და ერთი ხეც ვერ გაიმეტეს რომ დაერგოთ იმ ადამიანებისთვის, იმიტომ რომ ფასადის უკან რა ხდებოდა, არ აინტერესებდათ.დღეს ჩვენ ვხედავთ ძალიან ბევრ, მნიშვნელოვან პროგრესს თბილისში და საქართველოში ზოგადად, სადაც თითოეულ ადამიანს, შენარჩუნებული ღირსებით და პატივისცემით აქვს საშუალება, ყოველგვარი შიშის გარეშე, გამოთქვას ის, რაც სურს, და ამასთან ერთად დაუჭიროს მხარი იმას, ვისაც სურს.მე მინდა მადლობა გადავუხადო ყველას - პარტიის თავმჯდომარეს, ბატონ ბიძინა ივანიშვილს, საქართველოს პრემიერ–მინისტრს, პარლამენტის თავმჯდომარეს, ქალაქ თბილისის მერს, მინისტრებსა და აღმასრულებელი ხელისუფლების წარმომადგენლებს, იმისთვის, რომ გუნდმა მოიყვანა საქართველო დღევანდელ დღემდე იმისთვის, რომ გუნდმა მოიყვანა საქართველო დღევანდელ დღემდე.ჩვენთვის ძალიან მნიშვნელოვანია თითოეული ადამიანის მონაწილეობა არჩევნებში. მონაწილეობა არა ჩვენთვის , არა ჩვენი გამარჯვებისთვის, არამედ იმისთვის, რომ თქვენ გააგრძელოთ ცხოვრება ისეთ ვითარებაში, სადაც ადამიანის უფლებები იქნება პირველი პრიორიტეტი ამ ქვეყანაში. ზოგადად ხელისუფლების ამომრჩეველი არის პასიური და ფიქრობს ისედაც მოიგებს , რატომ წავიდე საარჩევნო უბანზე , მოდი ეს ერთი საათი არ დავკარგო და სხვა რამ ვქნა, მაგრამ დამიჯერეთ, იმ პირობებში, როდესაც ყოველთვის ოპოზიციური ამომრჩეველი არის ბევრად მოტივირებული, თითოეულ ხმას აქვს ძალიან დიდი მნიშვნელობა. მოგმართავთ და გთხოვთ - არ დაიზაროთ ეს ხვალინდელი ერთი საათი აჩუქეთ თქვენს თავს და რაც მთავარია აჩუქეთ თქვენს შვილებს , რომ ხვალ, ზეგ მათ იცხოვრონ ბევრად წარმატებულ საქართველოში.მინდა მადლობა გადავუხადო მთელს ჩემს საარჩევნო შტაბს და მოსახლეობას, რომელსაც ვხვდებოდი , ვიღებდი სითბოს და მხარდაჭერას. მინდა მადლობა გადავუხადო იმ ადამიანებს, რომლებიც ყოველგვარი ანგარების გარეშე იდგნენ ჩემს გვერდზე და რეალურად ცდილობდნენ და ცდილობენ, რომ ჩვენი გამარჯვება ხვალ იყოს 100 %-იანი . ჩვენ არ გვჭირდება გამარჯვება წკიპზე, ჩვენ გვჭირდება გამარჯვება ნაღდი, რომელიც თავად ოპონენტებსაც დაარწმუნებს იმაში, რომ მათ სამართლიან ბრძოლაში წააგეს ხვალინდელი არჩევნები.ამიტომ, ძალიან გთხოვთ, ხვალ აუცილებლად თითოეულმა თქვენგანმა და თქვენმა ახლობელმა , ყველა ადამიანმა, ვინც თუნდაც ნეიტრალურია და სიმართლე რომ გითხრათ, ნეიტრალური ამომრჩევლის არსი ვერ გავიგე, გადაუწყვეტელის იმიტომ, რომ როგორ შეიძლება იყოს ადამიანი გადაუწყვეტელი, რომელიც ცხოვრობდა მაშინაც და დღესაც ცხოვრობს საქართველოში.ყველას ვთხოვ, ხვალ აუცილებლად მივიდეს საარჩევნო უბანთან და დააფიქსიროს საკუთარი პოზიცია. კიდევ ერთხელ მინდა მადლობა გადავუხადო ისნის მოსახლეობას, ჩემი შტაბის წევრებს და მთლიანად საქართველოს, რომლებისგანაც მე ვიგრძენი ძალიან დიდი სითბო ამ სამი თვის განმავლობაში და რომელიც მამხნევებდა იმ პრობლემურ ვითარებაში, საარჩევნო კამპანიაში. ხვალ ჩვენ შევხვდებით აუცილებლად გამარჯვებით.

ჩემთვის დიდი პატივია, რომ დღეს თქვენს წინაშე ვდგავარ , როგორც ვაკის რაიონის მაჟორიტარი დეპუტატობის კანდიდატი. პირველ რიგში მადლობა მინდა გადავუხადო პარტიის თავმჯდომარეს ბატონ ბიძინა ივანიშვილს და "ქართული ოცნების" პოლიტიკურ გუნდს გამოცხადებული ნდობისათვის. რა თქმა უნდა, ყველაფერს გავაკეთებ, ძალისხმევას არ დავიშურებ , რომ ვემსახურო ჩემს ხალხს და ჩემს ქვეყანას. ჩვენი პოლიტიკური გუნდის ხელისუფლებაში მოსვლის დღიდან, ვაკეში არაერთი მნიშვნელოვანი პროექტი განხორციელდა . მიუხედავად იმისა, რომ პრემიერმა და ქალაქის მერმა უკვე ისაუბრეს ამაზე , არ შემიძლია არ აღვნიშნო ჭავჭავაძის გამზირი . ჩვენ ძალიან ბევრი შეხვედრა ჩავატარეთ წინასაარჩევნოდ და ადამიანების აბსოლუტური უმრავლესობა არის ძალიან გახარებული, რომ მათ მიიღეს შესაბამისი სივრცეები როგორც ველოსიპედით , ასევე საზოგადოებრივი ტრანსპორტით გადაადგილებისათვის. ასევე მიიღეს უფრო მეტად გამწვანებული სივრცე. არ შემიძლია არ ვთქვა ახლად რეაბილიტირებული მზიურის შესახებ იმიტომ, რომ ახალმა მზიურმა პრაქტიკულად გააცოცხლა ნოდარ დუმბაძის ოცნება ბავშვთა ქალაქზე. ასევე აუცილებლად უნდა ვთქვათ ვაჟას, თამარაშვილის ხეივანი. 35 წლის განმავლობაში საზოგადოება ელოდებოდა მეტრო უნივერსიტეტის გაკეთებას და დღეს ამ მეტროს 15 ათასზე მეტი მგზავრი გადაჰყავს ყოველდღიურად. ვაკის რაიონის შემოერთებულ ტერიტორიებზე პრაქტიკულად არ არსებობდა წყალმომარაგების ქსელი, არ არსებობდა ინფრასტრუქტურა. დღეს იქ მცხოვრებ მოსახლეობას აქვს წყალმომარაგების ქსელიც და ასფალტირებული გზებიც . როგორც ხედავთ, დღეს ვიმყოფებით ვაკის პარკში. არ შემიძლია არ შევეხო ამასაც - დარწმუნებული ვარ, რომ სულ მალე ეს იქნება ერთ -ერთი საუკეთესო სივრცე ჩვენს დედაქალაქში, თუმცა ეს ყველაფერი არ ნიშნავს იმას, რომ ჩვენ ვფიქრობთ, რომ ყველაფერი მოგვარებულია და მოსახლეობას, ჩვენ, გამოწვევები და პრობლემები არ გვაქვს.წარმატებული პროექტების მაგალითზე, ჩვენ შეგვიძლია ვისაუბროთ მთელი ქვეყნის მასშტაბით განსახორციელებელ პროექტებზე მომავალში. ჩვენგან სულ რამდენიმე კილომეტრში არის თბილისის სახელმწიფო უნივერსიტეტი, კიდევ უფრო ახლოს ილიას უნივერსიტეტი და არაერთი საჯარო სკოლა. ჩვენს რაიონში ცხოვრობენ დამსახურებული პროფესორ-მასწავლებლები - გპირდებით, მე ვიქნები განათლების სისტემის და ხელოვნების სფეროს განვითარების აქტიური მხარდამჭერი საქართველოს პარლამენტში. ვაკეში ჩვენ გვაქვს საქართველოში სიდიდით მეორე, მიხეილ მესხის სახელობის საფეხბურთო მოედანი, ახალი სპორტის სასახლე, სარაგბო კომპლექსი, ასევე მიმდინარეობს ევროპული სტანდარტების სპორტული მულტიფუნქციური ცენტრის მშენებლობა.ჩვენს რაიონში ვარჯიშობენ, ცხოვრობენ წარმატებული მორაგბეები, ფეხბურთელები, მოჭიდავეები და სხვა სპორტის წარმომადგენლები. ვაკეში ბოლო წლების განმავლობაში არაერთი სპორტული მოედანი და სპორტული სივრცე შეიქმნა ჯანსაღი ცხოვრების წესის ხელშესაწყობად. პარლამენტში მე გავაგრძელებ სპორტის მხარდაჭერას და თქვენთან ერთად ვიამაყებ ჩვენი სპორტსმენების წარმატებებით.ჩვენი გუნდისთვის ერთ-ერთი მთავარი პრიორიტეტია დევნილი მოსახლეობაა. პირადად ჩემთვის, ყოველდღიურობა იყო და იქნება მათ კეთილდღეობაზე ზრუნვა. მინდა ამ ტრიბუნიდან მადლობა გადავუხადო თითოეულ ექიმს, ჯანდაცვის სფეროს წარმომადგენლებს, რომლებიც ყოველდღიურად ზრუნავენ ჩვენზე ამ მძიმე პანდემიის პერიოდში. აქ ცხოვრობენ ექიმები რომელთა პროფესიული გამოცდილება ჩვენი ქვეყნისთვის საამაყო და შეუცვლელია. მე დავუჭერ მხარს ყველა იმ ინიციატივას, რომელიც ადამიანის ჯანმრთელობას მოემსახურება. არ შემიძლია გულწრფელი მადლობა არ გადავუხადო ყველა იმ ადამიანს, ვინც 24 საათის მანძილზე ჩვენს გვერდით იდგა წინასაარჩევნო კამპანიის მიმდინარეობისას. გპირდებით, თავს არ დავზოგავ ჩვენი ქალაქის, ჩვენი უბნის, ჩვენი ქვეყნის და ხალხის მსახურებაში. 31 ოქტომბერს ჩვენ ვირჩევთ ჩვენი საქართველოს წარმატებულ მომავალს.

ჩემო მთაწმინდელებო და კრწანისელებო, ჩვენ ოთხი წლის შემდეგ შევძლებთ, რომ თვალებში ჩაგხედოთ, ერთად საქართველოს წარმატებისთვის!“, - ასე მიმართა „ქართული ოცნება-დემოკრატიული საქართველოს“ მთაწმინდა-კრწანისის მაჟორიტარი დეპუტატობის კანდიდატმა ბექა ოდიშარიამ მის წარდგენაზე შეკრებილ საზოგადოებას.როგორც ბექა ოდიშარიამ განაცხადა, მისთვის დიდი პატივია იყოს იმ გუნდის წევრი, რომელიც არის მშვიდობისმყოფელი და ამ რვაწლიანი მშვიდობის პერიოდში აშენებს მაგისტრალებს, გვირაბებს, ხიდებს, ზრუნავს სოფელზე, ღირსეულად ეპყრობა ყველა პროფესიის ადამიანს, ადამიანის უფლებებს, პედაგოგებს, მედიცინის მუშაკებს, ჯარისკაცებს თუ პოლიციელებს, პატივს სცემს დედა ეკლესია და ყველა სხვა კონფესიას საქართველოში.„ჩემთვის პატივია ვიყო იმ გუნდის წევრი, რომელიც ზრუნვას საკუთარი ქვეყნის ისტორიაზე, კულტურულ მემკვიდრეობაზე, დედაქალაქზე, გუნდის წევრი, რომელიც დედაქალაქს უბრუნებს ძველ ისტორიულ იერსახეს, უბრუნებს ორბელიანს და გუდიაშვილის მოედნებს, აშენებს ახალ ქუჩებს, ოღონდ უკვე გამოკვეთილად ევროპული იერსახით, უბრუნებს მზიურს, კიკვიძის ბაღს, მალე განახლებულ ვაკის პარკს და რაც მთავარია, მალე თბილისელებს აჩუქებს ცენტრალ პარკს“, - განაცხადა მაჟორიტარი დეპუტატობის კანდიდატმა.მან ხაზგასმით აღნიშნა, რომ მისთვის დიდი პატივია იყოს იმ გუნდის წევრი, რომელმაც შექმნა საქართველოს ახალი კონსტიტუცია - ნამდვილი ევროპული კონსტიტუცია.„ჩვენ ვართ გუნდი, რომელმაც პირველად თავად თქვა უარი ძალაუფლების უზურპაციაზე, გუნდი, რომელმაც მომცა საშუალება ურთიერთობა მქონოდა დიასპორის წარმომადგენლებთან. ჩემთვის, როგორც პირველი პოლიტიკური ემიგრაციის შთამომავლისთვის, რომლის ოჯახის წევრები დაკრძალული არიან ლევილის სასაფლაოზე, ეს იყო ძალიან ემოციური და ძალიან მნიშვნელოვანი“, - განაცხადა ბექა ოდიშარიამ.„ქართული ოცნება-დემოკრატიული საქართველოს“ მაჟორიტარი დეპუტატობის კანდიდატმა აღნიშნა, რომ დიასპორის წარმომადგენლებმა მართლაც გმირობა გამოიჩინეს პანდემიის ჟამს და 31 ოქტომბერსაც მათი ხმა უმნიშვნელოვანესი იქნება.„ჩემო ძვირფასებო, სადაც თქვენ ხართ, იქ ყველგან საქართველოა. ამიტომ, ძალიან მნიშვნელოვანია, რომ ყველა თქვენს ადგილსამყოფელ ქვეყნაში ისევ გამოიჩინოთ გმირობა და 31 ოქტომბერს დააფიქსიროთ „ქართული ოცნების“ გამარჯვება“, - განაცხადა ბექა ოდიშარიამ.თავის გამოსვლაში ბექა ოდიშარიამ ახლგაზრდებსაც მიმართა და აღნიშნა, რომ „ქართული ოცნებისთვის“ უმნიშვნელოვანესია მათი თავისუფლება და ევროპული ხარისხის განათლება.„მინდა მივმართო ახალგაზრდებს, ჩემი შვილების თაობას, განსაკუთრებით იმათ, ვინც პირველად აკეთებს პოლიტიკურ არჩევანს და მათზე უფრო ასაკით უფროს ახალგაზრდებს - ჩვენი გუნდისთვის, „ ქართული ოცნებისთვის“ უმნიშვნელოვანესია მთავარი რამ - თქვენი სრული თავისუფლება, თქვენი ევროპული ხარისხის განათლება. სწორედ, ამიტომ შენდება თქვენთვის ქუთაისის საერთაშორისო უნივერსიტეტი, თქვენთვის იქმნება ახალი გამწვანებული სივრცეები, შენდება საკონცერტო თუ სპორტული არენები.თქვენთვის, სწორედ „ქართულმა ოცნებამ“ მოაწერა ხელი ასოცირების შეთანხმებას. თქვენ, ძალიან მალე, ისარგებლებთ ღრმა და ყოვლისმომცველი თავისუფალი ვაჭრობის ხელშეკრულებით. თქვენთვის, რომ ადვილად გემოგზაურათ თავისუფალ სამყაროში „ქართულმა ოცნებამ“ მოიპოვა ვიზალიბერალიზაციის შეთანხმება და ძალიან მალე, მე-10 მოწვევის პარლამენტის დასრულებამდე ჩვენ წარვადგენთ დასაბუთებულ განცხადებას ევროკავშირის სრულუფლებიან წევრობაზე.

დიდი მადლობა მინდა მოგახსენოთ ყველას, დიდი მადლობა მხარდაჭერისთვის, ჩემთვის მართლაც განსაკუთრებით ძვირფასია ეს შეხვედრა, სადაც მაქვს შესაძლებლობა კიდევ ერთხელ გამოვხატო მადლიერება იმ პოლიტიკური გუნდისადმი, რომლის წევრიც მეც გახლავართ და რომლის პოლიტიკურმა გადაწყვეტილებებმა ამ წლების განმავლობაში ათეულ ათასობით ადამიანის სიცოცხლე გადაარჩინა. მე ნამდვილად მეამაყება, რომ ამ გუნდთან ერთად ვარ და მაქვს იმის შესაძლებლობა, რომ გადაწყვეტილებების მიღებაში აქტიური მონაწილეობა მივიღო. ჩვენ 31 ოქტომბერს, ორ დღეში, გვექნება ძალიან მნიშვნელოვანი გადაწყვეტილება მისაღები, თუ როგორი უნდა იყოს ჩვენი ქვეყანა მომავალი ოთხი წლის განმავლობაში. დარჩება ადამიანის უფლებები, მათ შორის ადამიანის ჯანმრთელობის უფლება ქვეყნის უმაღლეს პრიორიტეტად, თუ ეს პრიორიტეტი შეიცვლება. ეს გადაწყვეტილება თითოეული ჩვენგანის ხელშია და ამიტომ კიდევ ერთხელ მინდა ყველას ვთხოვო, რომ 31–ში ყველამ გამოხატოს თავისი მოქალაქეობრივი პოზიცია. რაც შემეხება მე, ჩემი გადაწყვეტილება უკვე მიღებული მაქვს და კიდევ ერთხელ მინდა მადლიერება გამოვხატო იმ პოლიტიკური გუნდისადმი, რომლის გადაწყვეტილებებმაც არა მარტო პოლიტიკურმა, არამედ რეალურმა მხარდაჭერამ, რეალურად გადაარჩინა ათასობით ადამიანის სიცოცხლე ამ წლების განმავლობაში. ჩვენი გუნდი ყოველთვის შორს იყო იმისგან, რომ გაკეთებული საქმე ვინმესთვის დაემადლებინა და ვცდილობთ, რომ მოკრძალებულად, შედეგზე ორიენტირებულად ვაკეთოთ ჩვენი საქმე. თუმცა, ეს არის ის რეალობა, რომელიც აუცილებლად უნდა ითქვას, გადარჩენილი ადამიანების სიცოცხლე. ასევე მინდა დიდი მადლიერება მინდა გამოვხატო ჩემი კოლეგების მიმართ, რომელთაც მართლაც გასაოცარი, ბრწყინვალე მუშაობა, ბრწყინვალე კომპეტენცია, სახელმწიფოებრივი აზროვნება გამოიჩინეს და ქვეყანა გადაარჩინეს დამანგრეველი ტალღისგან და მჯერა, რომ ჩვენ ერთად დგომით დავძლევთ ნებისმიერ გამოწვევას, როგორც ჯანდაცვის სფეროში ასევე ეკონომიკურ სფეროში, რადგანაც ეს არის ერთადერთი სწორი მიმართულება, ადამიანის უფლებები, ადამიანის ჯანმრთელობა და მხარში დგომა ერთმანეთისადმი. განსაკუთრებით მინდა გამოვყო, ამ სამი თვის განმავლობაში, წინასაარჩევნო პერიოდი პრაქტიკულად უკვე დასრულდა და ამ სამი თვის განმავლობაში მე მქონდა ასეულობით შეხვედრა საბურთალოელებთან, საბურთალოს რაიონის მოსახლეობასთან, საზოგადოებასთან. მადლიერება მინდა გამოვხატო მათ მიმართ, რადგან თითოეულმა მათგანმა ძალიან ბევრი რამე მასწავლა. ის პრიორიტეტები, რაც მქონდა განსაზღვრული პარლამენტში მუშაობის შემთხვევაში, მნიშვნელოვნად გამდიდრდა იმ ხედვით, რაც მე მივიღე თითოეული მოქალაქისგან და ამისთვის მინდა უღრმესი მადლობა მოგახსენოთ ყველას. დიდი მადლობა ყველას მობრძანებისათვის, მზად ვარ, რომ თითოეული ის პრობლემა, თითოეული შესაძლებლობა რაც აქვს საბურთალოს რაიონს, რაც აქვს დედაქალაქს და საქართველოს გახდეს ასევე ჩემი ვალდებულება, მათზე ზრუნვა.

ჩვენ საზოგადოებას, საერთაშორისო პარტნიორებსა და მედიასაშუალებებს რეგულარულად ვაწვდით ინფორმაციას რადიკალური ოპოზიციის იმ გეგმების შესახებ, რომელთა მიზანი საარჩევნო გარემოსთვის ჩრდილის მიყენებაა. ამჯერად, გვსურს, მოგაწოდოთ ინფორმაცია რადიკალური ოპოზიციის დესტრუქციული გეგმების შესახებ, რომლებიც არჩევნების დღეს უკავშირდება: -  პირველი, იგეგმება ერთი და იგივე საკითხებზე სხვადასხვა წარმომადგენლებისა და დამკვირვებლების მიერ საჩივრების დიდი რაოდენობით შეტანა, რათა ხელოვნურად შეიქმნას მაღალი სტატისტიკა საჩივრების კუთხით -  გარდა ამისა, რადიკალური პარტიები და მათი ფეიკ-დამკვირვებლები გეგმავენ საარჩევნო კომისიებიდან არჩევნების დღეს ჭარბი ინფორმაციის გამოთხოვას, რათა კომისიების წევრებმა ვერ შეძლონ ძირითად საქმიანობაზე ჯეროვანი კონცენტრირება და ამით, შეფერხდეს კომისიების საქმიანობა -  ასევე, იგეგმება საუბნო კომისიების პირველ სხდომებზე არაუფლებამოსილი პირების დასწრება (მაგალითად, პარტიის მიერ დანიშნული და შემდეგ მოულოდნელად მოხსნილი წევრის მისვლა), რითაც სურთ შექმნან საბაბი სხდომების ლეგიტიმურობის საკითხის შესახებ სპეკულირებისათვის -  იგეგმება საუბნო კომისიის წევრებს შორის ფუნქციების გასანაწილებელ წილისყრებში არმონაწილეობა ან წილისყრით განსაზღვრული ფუნქციის შესრულებაზე უარის თქმა და პროცედურების საბოტაჟი -  მთელ რიგ უბნებზე იგეგმება მნიშვნელოვანი ინვენტარის ან დოკუმენტაციის (მაგალითად, რეგისტრატორის ან კომისიის ბეჭდის, სარეგისტრაციო ჟურნალის, ჩანაწერთა წიგნის) დაზიანება ან მოპარვა - იგეგმება უბნებიდან ბიულეტენების გატანა რადიკალური ოპოზიციის მიერ დანიშნული კომისიის წევრი რეგისტრატორების მიერ და შემდგომ სიუჟეტების ინიცირება, თითქოსდა ე.წ. კარუსელის მცდელობები ამხილეს -  ასევე იგეგმება რადიკალური ოპოზიციის აქტივისტების მიერ უბნებზე გაკრული ამომრჩეველთა სიების საჯარო ვერსიის ჩამოხევა და იმ მომენტის დაფიქსირება, როდესაც უბანზე ასეთი სია გამოკრული არ არის -  იგეგმება ცრუ ბრალდებების გავრცელება, თითქოს, ამომრჩევლების ფოტოსურათიანი სიის საჯარო ელექტრონული ვერსიები ცესკოდან მხოლოდ მმართველ პარტიას აქვს მიღებული, აგრეთვე ცრუ ბრალდებების გავრცელება იმის თაობაზე, რომ გაცემულ სიებში აღნიშნულია ამომრჩეველთა პირადი ნომრებიც -  იგეგმება უსაფუძვლო აჟიოტაჟი სიებში ე.წ. მკვდარი სულების არსებობის შესახებ -  იგეგმება მარკირებაგავლილი ამომრჩევლების უბანზე ხელახლა მიყვანა და აჟიოტაჟის შექმნა იმის შესახებ, რომ თითქოს, აღნიშნული პირი „ქართული ოცნების“ ამომრჩეველია და ცდილობს მეორედაც მისცეს ხმა -  იგეგმება მათ მიერ დანიშნული კომისიის წევრი რეგისტრატორების მიერ ამომრჩევლისთვის  სხვის, კერძოდ, ოპოზიციური პარტიის მხარდამჭერი ამომრჩევლის გრაფაში შეგნებულად ხელის მოწერინება, ხოლო ამ უკანასკნელის უბანზე გამოცხადების შემდეგ აჟიოტაჟის შექმნა, რომ სხვების მაგივრად ხდება ხმის მიცემა უცნობი პირების მიერ -  იგეგმება ამავე რეგისტრატორების მიერ ამომრჩეველზე ბიულეტენის გაცემა სიაში ხელმოწერის გარეშე, აგრეთვე ხელმოწერების დათვლის დროს ხელმოწერების გამოტოვება ოქმის შევსების პროცედურების გაჭიანურებისა და შესაბამის მონაცემებში ბუნდოვანების შეტანის მიზნით -  იგეგმება სხვადასხვა პროვოკაციების მოწყობა უბნებზე, სადაც აღინიშნება ოპოზიციის მიერ მიღებული ხმების განსაკუთრებით დაბალი დინამიკა -  იგეგმება საარჩევნო კომისიის წევრებისა და წარმომადგენლების სიტყვიერი შეურაცხყოფა ფიზიკური დაპირისპირების პროვოცირების მიზნით -  იგეგმება საარჩევნო უბნებთან ხელოვნური რიგების შექმნა ამომრჩევლის აქტივობის შემცირების მიზნით -  იგეგმება კოვიდ-უსაფრთხოებასთან დაკავშირებული წესების განზრახ დარღვევა ამომრჩევლებს შორის შიშის გასაჩენად -  უბნებზე, სადაც რადიკალური ოპოზიცია განსაკუთრებით დიდი უპირატესობით აგებს არჩევნებს, იგეგმება ცრუ ინფორმაციის გავრცელება კომისიის წევრის, დამკვირვებლის ან წარმომადგენლის ინფიცირების შესახებ - ამ ინფორმაციას განსაკუთრებული ყურადღება უნდა მიაქციონ ჩვენმა ამომრჩევლებმა. -  საერთაშორისო პარტნიორების წინაშე ხელმოწერილი მემორანდუმის დარღვევით, იგეგმება საარჩევნო უბნების გარშემო ე.წ. პერიმეტრის წესის დარღვევა, აქტივისტების გარკვეული კონცენტრაცია და ამომრჩევლის გადაადგილების ფიზიკურად შეფერხება ეს არის ის ძირითადი დესტრუქციული ქმედებები და მათი ჩამონათვალი, რომლებიც რადიკალურ ოპოზიციას არჩევნების დღისათვის აქვს მოაზრებული. შეგახსენებთ, რომ ამ ქმედებების უმეტესობას ისინი წინა არჩევნებზეც მიმართავდნენ, თუმცა საბოლოო ჯამში მათ რეალურად ჩრდილი ვერ მიაყენეს საარჩევნო პროცესს. გარდა ზემო აღნიშნულისა, არჩევნების დღის მთავარ გამოწვევად რჩება რადიკალური ოპოზიციის ძალადობრივი პროვოკაციებისა და ინციდენტების პრევენცია. როგორც უკვე აღვნიშნეთ, ისინი პროვოკაციების ეპიცენტრებად მოიაზრებენ ბოლნისს, დმანისს, მარნეულს, ბათუმს, ზუგდიდსა და გლდანს. ვაფრთხილებთ მათ, რომ ნებისმიერი ამგვარი ქმედება უმკაცრესად დაისჯება. კიდევ ერთხელ მოვუწოდებთ ჩვენს აქტივისტებსა და მხარდამჭერებს მაქსიმალური მოთმინებისა და თავშეკავებისაკენ. დესტრუქციული სცენარის მნიშვნელოვან მონაწილეებად განიხილებიან რადიკალური ოპოზიციის საკუთრებაში არსებული რადიკალური პარტიული ტელევიზიები - „მთავარი არხი“ და „ტვ პირველი“. მაგალითისთვის, გუშინ შედგა საუბარი „ტვ პირველის“ ჟურნალისტს, ნატო გოგელიასა და ნაცმოძრაობის ოზურგეთის ორგანიზაციის ლიდერს, ბესო ქათამაძეს შორის, რა დროსაც მხარდაჭერის მიზნით გოგელიამ ქათამაძეს მოსთხოვა ინფორმაცია იმ უბნების შესახებ, სადაც, ვციტირებ,, „აპირებენ ხმაურს და არეულობას“, რაზეც მიიღო ინფორმაცია იმის შესახებ, რომ ხმაური და არეულობა იგეგმება ნასაკირალსა და ჭანიეთში. დესტრუქციულ გეგმებში პარტიული ტელევიზიების თანამონაწილეობა განსაკუთრებულ აღნიშვნას იმსახურებს. ბოლოს, კიდევ ერთხელ გვინდა გამოვეხმაუროთ ნაცმოძრაობის მიერ არჩევნების დღეს დანიშნულ აქციას, რომლის მიზანი მათ მიერ წინასწარ დაანონსებული „ქართული ოცნების“ დამაჯერებელი გამარჯვების გაპროტესტებაა. გვაქვს დამატებითი ინფორმაცია, რომლის თანახმად აღნიშნულ აქციაზე დამონტაჟებულ მონიტორებზე ნაცმოძრაობის წარმომადგენლები გეგმავენ მხოლოდ იმ უბნების მონაცემების ჩვენებას, სადაც ამ პარტიას უკეთესი შედეგები შეიძლება ჰქონდეს. მიზანი არის აქტივისტებს შორის გამარჯვების ილუზიის შექმნა და მათი მობილიზაციის უზრუნველყოფა. ასევე, გვაქვს ინფორმაცია, რომ ლევან ვაშალომიძე გეგმავს ინფორმაციის გავრცელებას საქართველოს სახმელეთო საზღვართან მიხეილ სააკაშვილის ჩამოსვლის შესახებ. ამგვარი იდეები მხოლოდ ვაშალომიძისნაირი ინტელექტუალის გონებაში შეიძლება მომწიფდეს და ზემოხსენებული რისკებისგან განსხვავებით, ბუნებრივია, ეს განზრახვა სერიოზულ კომენტარს არ იმსახურებს. ხაზგასმით გვინდა აღვნიშნოთ, რომ რადიკალური ოპოზიციის ნებისმიერი დესტრუქციული განზრახვა ისეთივე წარუმატებლობისთვის არის განწირული, როგორც ეს მოხდა 2016, 2017, 2018, 2019 წლებში. რადიკალური ოპოზიცია საზოგადოებისგან მიიღებს მკაცრ პასუხს ყველა იმ დანაშაულისთვის, რომელიც მას როგორც ხელისუფლებაში, ისე ოპოზიციაში ჰყოფნის დროს აქვს ჩადენილი. „ქართული ოცნების“ რეიტინგი 55-დან 60 პროცენტამდე მერყეობს და ქართველი ამომრჩევლის მხარდაჭერით, ეს შედეგი დაფიქსირდება 31 ოქტომბერს. ამასთან, რაც უფრო აქტიური იქნება ამომრჩეველი, მით უფრო ჩამოსცდება ნაცმოძრაობა 19 პროცენტიან ნიშნულს, ხოლო ანტიევროპული საქართველო - 4 პროცენტიან ნიშნულს.

მადლობა მინდა გადავუხადო მთლიანად „ქართული ოცნების“ გუნდს და განსაკუთრებით ბ-ნ ბიძინა ივანიშვილს, რომლებმაც ნდობა გამომიცხადეს და მაჟორიტარობის კანდიდატად დამასახელეს ქალაქის ისეთ ძირძველ უბანში, როგორიც არის ნაძალადევის რაიონი. ეს უზარმაზარი პატივი და პასუხისმგებლობაა ჩემთვის! უკვე 4 წელია ამ რაიონის მაჟორიტარი ვარ და უცხო არ არის ჩემთვის, ეს ის რაიონია, სადაც ჩემთვის ყოველი უბანი,  თითოეული ადამიანის პრობლემა და სიხარული არის ნაცნობი  და ახლობელი. ჩვენი შეხვედრა შემთხვევითი არ იყო ამ ულამაზეს „ვეტერანთა კულტურისა და დასვენების პარკში“. გარდა იმისა, რომ ის უნიკალურია, მის მიმართ მაქვს ჩემი საკუთარი სენტიმენტებიც, რადგან ამ პარკის რეაბილიტაცია განხორციელდა ჩემი მაჟორიტარობის პერიოდში.  4 წლის განმავლობაში უდავოდ ბევრი რამ გაკეთდა ადგილობრივი საჭიროებებისთვის ნაძალადევის რაიონში და ამ შესრულებული საქმიანობისთვის ძალიან დიდი მადლობა მინდა გადავუხადო ნაძალადევის რაიონის გამგეობას, ქალაქის მუნიციპალიტეტს და ყველას, ვისი ინიციატივით და ხელშეწყობით განხორციელდა მრავალი პროექტი, თუმცა, არსებობს რიგი პრობლემური საკითხებისა, რომლის გადაჭრასაც ვაპირებთ ეტაპობრივად. 31 ოქტომბერს მოგიწოდებთ ყველას, მობრძანდეთ არჩევნებზე, მეგობრებთან, ნათესავებთან, ახლობლებთან და ოჯახის წევრებთან ერთად, რომ გავაკეთოთ ღირსეული არჩევანი ქვეყნის საკეთილდღეოდ და ხმა მივცეთ პარტია „ქართულ ოცნება – დემოკრატიულ საქართველოს!

მინდა საზოგადოებას მივაწოდო ინფორმაცია ნაციონალური მოძრაობის მიერ დაგეგმილი კიდევ ერთი მავნებლობის შესახებ, რომელიც არჩევნების ნაცვლად აქციებისთვის და არეულობისთვის რომ ემზადება,  ეს სიახლე არ არის საზოგადოებისთვის. ჩვენი ინფორმაციით, თბილისის მერიაში შესულია წერილი, რომლის მიხედვითაც, ისინი არჩევნების დღეს პარლამენტის წინ 12 საათიდან იკრიბებიან, არჩევნების დღეს, ხაზს ვუსვამ. როგორც ჩანს, სრული რესურსის მობილიზაციას ამ მიმართულებით და არა საარჩევნო მიმართულებით აპირებენ და აანონსებენ  მრავალათასიანი აქციის ჩატარებას. ეს ნიშნავს, რომ ნაციონალური მოძრაობა სასოწარკვეთილების პიკშია. მათ ზუსტად იციან, რომ დემოკრატიულ არჩევნებში რაიმე სახის წარმატების  შანსი არ გააჩნიათ, შესაბამისად, მაშინ, როდესაც პოლიტიკური პარტიები, მათი აქტივისტები, მხარდამჭერები და მთელი მოსახლეობა ხმის მიცემის საარჩევნო პროცესში იქნება ჩართული, როგორც ჩანს,  ხმების პარალელური დათვლის შედეგად მიღებული მონაცემების დაცვის აბსურდული საბაბით, ნაციონალური მოძრაობა ფსონს სიტუაციის რადიკალიზაციაზე, არეულობის შექმნაზე აკეთებს და სრული რესურსით ქვეყნის მთავარ გამზირზე იკრიბება. ფაქტია, რომ ამ პარტიას არჩევნებში ამომრჩევლის მობილიზების ნაცვლად, სხვა სახის -  დესტრუქციული მიზნები აქვს და მნიშვნელოვანია, საზოგადოებამ მათ მორიგ მავნებლურ ზრახვებს, ამ უკიდურესად პროვოკაციულ ქმედებას კიდევ ერთხელ გასცეს ღირსეული და საკადრისი პასუხი. სწორედ ამიტომ, ყველა ადამიანი, რომელიც ფიქრობს, რომ საჭიროა საქართველო წინსვლა, კიდევ უფრო სწრაფი ტემპებით განვითარების გაგრძელება,  ვინც ფიქრობს, რომ საჭიროა 2024 წელს  ჩვენმა ქვეყანამ ევროკავშირის წევრობის განაცხადი გააკეთოს, მომდევნო წლებში კი სრულფასოვანი ინტეგრირება და მოქალაქეებისთვის უკეთესი ცხოვრების პირობების უზრუნველყოფა შევძლოთ, აუცილებელია, უარი ვუთხრათ რევანშს, დესტრუქციას, მივიდეთ არჩევნებზე და ერთად დავუჭიროთ მხარი წარმატებულ საქართველოს.ამ არჩევნებში არამხოლოდ ნაციონალური მოძრაობა და მისი დანაყოფები უნდა დამარცხდნენ, არამედ უნდა გაიმარჯვოს ქართველმა ხალხმა. ხალხთან ერთად, უნდა უზრუნველვყოთ ისეთი შედეგი, რომელიც მათ , ნაციონალურ მოძრაობას და მის კლასტერს  წარმატების ილუზიების შანსებს გაუქრობს საბოლოოდ   და გზას ახალ, ჯანსაღ, პროფესიონალ პოლიტიკურ ძალებს გაუხსნის.მე დავამატებ ერთს, რომ საზოგადოებამ ძალიან კარგად იცით, რომ ძალიან მაღალია ალბათობა იმისა, რომ ქართულმა ოცნებამ დაახლოებით 60 %-იანი რეიტინგი დაიჭიროს ამ არჩევნებზე. ამისათვის საჭიროა ყველა მოქალაქე, ყველა ადამიანი, ვინც განვითარებაზე და ქვეყნის რეალურ წარმატებაზე ფიქრობს, ვინც მხარს უჭერს ამ მიზნით „ქართულ ოცნებას“,  უკლებლივ ყველა მივიდეს არჩევნებზე. ამ შემთხვევაში ეს პროცენტი იქნება გაცილებით მაღალი, ვიდრე ვინმეს წარმოუდგენია. ამ შემთხვევაში გაცილებით დაბალი იქნება მათ შორის მთავარი, სამწუხაროდ მთავარი ოპოზიციური მავნებელი, ამავე დროს პარტიის რეიტინგი და საარჩევნო შედეგი და გაძლევთ პირობას, რომ ამ შემთხვევაში სწორედ, ნაციონალური მოძრაობა, რომელიც ისედაც დაშლის პირასაა და ისინი წკიპზე არიან და ელოდებიან არჩევნებს, საბოლოოდ დაიშლება და მართლაც ახალ და ჯანსაღ ძალებს გაეხსნებათ გზა პოლიტიკურ ასპარეზზე და ოპონირებაც იქნება უფრო საქმიანი და საზოგადოებრივი ინტერესებიდან გამომდინარე. ამიტომ, მოვუწოდებ ყველა მხარდამჭერს, მთელი შემართებით, ყველანი მივიდნენ არჩევნებზე, ამისათვის ყველა პირობა შექმნილია, რომ არჩევნებზე უზრუნველყოფილი იყოს უსაფრთხოების მაქსიმალური ხარისხი, აქ საშიშროება ნულის ტოლია, რისთვისაც ცესკოს გვინდა მადლობა გადავუხადოთ, ასეთი უზრუნველყოფისთვის ასეთი მაღალი ხარისხისა და ხმა მივცეთ საქართველოს წინსვლას და წარმატებას. რაც შეეხება მეორე თემას, თქვენ იცით რომ გუშინ ჩატარდა ბრიფინგი ამავე დარბაზში, სადაც საუბარი იყო ე.წ დამკვირვებლებზე, რომლებიც რეალურად წარმოადგენენ პოლიტიკურ პარტიებს და პარადოქსული იყო , ნახეთ თქვენ ყველამ, მათი პასუხები. აქამდე ვიცოდით, რომ არსებობენ დამკვირვებლები , ობიექტური დამკვირვებლები და ახლა უკვე ვიცით, რომ თურმე არსებობენ სუბიექტური დამკვირვებლებიც, ასეთი ტერმინი შემოვიდა პრაქტიკულად. მათი პასუხები საერთო ჯამი და ანალიზი ეს იყო. ისინი ამბობენ, რომ ეს არის კანონიერი და ამის არანაირი შეზღუდვა არ არსებობს - მართალია, მაგრამ ვერასდროს იქნებიან ობიექტური დამკვირვებლები, ისინი ყოველთვის ტენდენციურები და იმ მავნებლური საქმის გამკეთებლები იქნებიან, რასაც აქამდე აკეთებდნენ. უბრალოდ ჩვენ ისინი ვამხილეთ იმისათვის , რომ ვერ შეძლონ პირველი , ქართული საზოგადოების და მეორე, ჩვენი საერთაშორისო დამკვირვებლების შეცდომაში შეყვანა და ამ მხილებით უზრუნველვყავით ის, რომ მაქსიმალურად შემცირდება რისკი იმისა, რომ რომელიმე მათი ტენდენციური და მიკერძოებული და სუბიექტური გამონათქვამი მოხვდეს საერთაშორისო დამკვირვებლების ანგარიშში და ამით რაღაც ჩრდილი მიადგეს იმ დემოკრატიულ პროცესს, რომელიც არჩევნების დღეს ამ ქვეყანაში გაიმართება.

დაიწყო ბოლო საარჩევნო კვირა, არჩევნებამდე რჩება რამდენიმე დღე და ძალზე მნიშვნელოვანია, ამ დღეების განმავლობაში შევინარჩუნოთ კონსტრუქციული და მშვიდი საარჩევნო გარემო. ბუნებრივია, არჩევნების დღის მოახლოებასთან ერთად, იზრდება პროვოკაციების რისკი და უსათუოდ მოიმატებს სიცრუის ტირაჟირების ინტენსივობა, მათ შორის რუსული რესურსის გამოყენებით, რისი მომსწრეც გავხდით ჩვენ გუშინ ნაციონალური მოძრობის კუთვნილ ერთ-ერთ ტელეარხზე. კიდევ ერთხელ მოვუწოდებთ ყველა პოლიტიკურ სუბიექტს, თავი შეიკავონ იმგვარი ქმედებებისგან, რომლებიც შეიძლება უარყოფითად აისახოს საარჩევნო გარემოზე. ჩვენი პარტიის წევრებს, აქტივისტებსა და მხარდამჭერებს მოვუწოდებთ, გამოიჩინონ მაქსიმალური მოთმინება და თავშეკავება, რათა არავის მიეცეს საარჩევნო გარემოსთვის ჩრდილის მიყენების შესაძლებლობა. ამომრჩეველს ვთხოვთ, მაქსიმალური სიფრთხილით მოეკიდონ ტელევიზიებით თუ სოციალური ქსელებით გავრცელებულ ნებისმიერ ინფორმაციას, რათა არ მოექცნენ დეზინფორმაციის გავლენის ქვეშ, რისი ტირაჟირების ინტენსივობა უკანასკნელი კვირების განმავლობაში დღითი-დღე იზრდება. გვაქვს ინფორმაცია, რომ რადიკალური ოპოზიციის წარმომადგენლები ამზადებენ მასალებს ისეთი პროგრამების გამოყენებით, როგორიცაა, მაგალითად, „დიპფეიკი“. შეგახსენებთ, რომ ამგვარი პროგრამების მეშვეობით ადამიანის ვიდეოგამოსახულების გაყალბებაც კი არის შესაძლებელი. ამგვარი მასალები სოციალურ ქსელებში შეიძლება განთავსდეს არჩევნების წინა დღეს ან არჩევნების დღეს, რასაც ამომრჩეველი განსაკუთრებული ყურადღებით უნდა მოეკიდოს. კიდევ ერთხელ გვინდა მადლობა გადავუხადოთ საარჩევნო ადმინისტრაციას საარჩევნო უბნების სრული კოვიდ-უსაფრთხოების უზრუნველყოფისათვის. 31 ოქტომბერს საარჩევნო უბანი იქნება ბევრად უფრო უსაფრთხო სივრცე, ვიდრე, მაგალითად, მაღაზიები, საზოგადოებრივი ტრანსპორტი და სხვა. შესაბამისად, ყველა პირობა არის შექმნილი იმისათვის, რომ არჩევნებზე ამომრჩევლის მაღალი აქტივობა დაფიქსირდეს. ღრმად გვწამს, „ქართული ოცნების“ გამარჯვება არის აუცილებელი პირობა იმისათვის, რომ ჩვენი ქვეყანა არ დაუბრუნდეს მძიმე წარსულს და განაგრძოს წინსვლა და განვითარება სახელმწიფოებრივი აღმშენებლობის ყველა მიმართულებით. „ქართული ოცნების“ 73-ივე ადგილობრივი საარჩევნო შტაბი სრულად არის მობილიზებული იმისათვის, რომ ამომრჩეველს მიეცეს საკუთარი არჩევანის თავისუფალ გარემოში გამოხატვის შესაძლებლობა და 31 ოქტომბერს ვიზეიმოთ დამაჯერებელი გამარჯვება.

პარტია „ქართული ოცნება - დემოკრატიული საქართველო“ რეგიონებში 2020 წლის საარჩევნო პროგრამის თემატურ პრეზენტაციებს განაგრძობს. ამჯერად, 2020 წლის საარჩევნო პროგრამის თემატური პრეზენტაცია გორში გაიმართა. წარმოდგენილი იყო საგარეო პოლიტიკის, შერიგების, დემოკრატიული მმართველობის, მართლწესრიგის, უსაფრთხოებისა და თავდაცვის პროგრამული მიმართულებები.

პარტია „ქართული ოცნება - დემოკრატიული საქართველო“ რეგიონებში 2020 წლის საარჩევნო პროგრამის თემატურ პრეზენტაციებს განაგრძობს.   ამჯერად, 2020 წლის საარჩევნო პროგრამის თემატური პრეზენტაცია ქუთაისში გაიმართა.   წარმოდგენილი იყო განათლების, კულტურის, სპორტისა და ახალგაზრდობის მიმართულებები.

გვინდა დავიწყოთ მადლობით, მადლობით გმირი პოლიციელების მიმართ, რომლებმაც საკუთარი სიცოცხლის რისკის ფასად უზრუნველყვეს 43 ჩვენი თანამოქალაქის სიცოცხლის დაცვა. გამორჩეულია სამხარეო პოლიციის უფროსის, ავთანდილ გალდავას გმირული ქმედება, რომელიც საკუთარი სიცოცხლის რისკის ფასად ჩაენაცვლა მძევლებს და უზრუნველყო მათი უვნებლად განთავისუფლება. მადლობა სამართალდამცავი სტრუქტურების თითოეულ წარმომადგენელს, რომელიც ჩართული იყო სპეცოპერაციის პირველი ეტაპის წარმატებით დასრულებაში. მადლობა შინაგან საქმეთა სამინისტროს, შინაგან საქმეთა მინისტრს, ვახტანგ გომელაურს, რომელმაც სპეცოპერაციის დაგეგმვითა და ჩატარებით უზრუნველყო 43-ვე მძევლის ეტაპობრივი განთავისუფლება. გუშინ კიდევ ერთხელ გამოჩნდა „ქართული ოცნების“ ხელისუფლების ხელწერა, რომლისთვისაც მთავარი ღირებულება და პრიორიტეტი ადამიანია. სპეცოპერაციის მთავარი მიზანი 43-ვე მძევლის უვნებლად განთავისუფლება შესრულებულია. ახლა მთავარია, სპეცოპერაცია წარმატებით იქნეს ბოლომდე მიყვანილი. დარწმუნებული ვართ, სამართალდამცავი ორგანოების ეფექტიანი მუშაობით, ოპერაცია წარმატებით დასრულდება. ძალიან მოკლედ, კიდევ ერთხელ გვინდა ხაზი გავუსვათ უპასუხისმგებლო პოლიტიკოსებისა და მათი მედიასაშუალებების არაჯანსაღ საქციელს, რისი თვითმხილველიც გუშინ მთელი დღის მანძილზე გახდა ქართული საზოგადოება. ამ ტიპის კრიმინალზე პოლიტიკური ქულების დაწერის იაფფასიანი მცდელობა, შემთხვევის ადგილთან პოზიორობა, დამნაშავესთან უპასუხისმგებლო მოლაპარაკებების პირდაპირ ეთერში წარმოება, სამართალდამცავი ორგანოების დისლოკაციის ადგილების პირდაპირ ეთერში გადაცემა და ასე შემდეგ, პოლიტიკური თუ ჟურნალისტური ეთიკისა და მორალის ყოველგვარ ზღვარს სცდება. გუშინაც, სხვა მსგავსი შემთხვევების ანალოგიურად, ერთ მხარეს იდგნენ ხელისუფლება, გმირი პოლიციელები და მძევლების უვნებლად გათავისუფლებით დაინტერესებული ჩვენი თანამოქალაქეები, ხოლო მეორე მხარეს იდგნენ ბანკში შეჭრილი დამნაშავე, ექსტრემისტული ზრახვებით შეპყრობილი პოლიტიკოსები და მათი მედიასაშუალებები. არანაკლებ შემაშფოთებელია ამ ადამიანების დღევანდელი გაწბილებული კომენტარები 43-ვე მძევლის უვნებლად გათავისუფლებასთან დაკავშირებით. ამ ყველაფერს 31 ოქტომბერს საზოგადოების მხრიდან საკადრისი პასუხი გაეცემა.

პარტია „ქართული ოცნება - დემოკრატიული საქართველო“ რეგიონებში 2020 წლის საარჩევნო პროგრამის თემატურ პრეზენტაციებს განაგრძობს. ამჯერად, 2020 წლის საარჩევნო პროგრამის თემატური პრეზენტაცია თელავში გაიმართა. წარმოდგენილი იყო სოფლის მეურნეობის, მეწარმეობის ხელშეწყობის, ტურიზმისა და რეგიონული განვითარების მიმართულებები.

გვინდა, მოკლე განცხადება გავაკეთოთ ზუგდიდში მიმდინარე მოვლენებთან დაკავშირებით. ამ ვითარებაში, თითოეული ჩვენგანის მთავარი სურვილი მძევლების რაც შეიძლება სწრაფად, უვნებლად გათავისუფლებაა. მთავარია, სამართალდამცავ ორგანოებს მიეცეთ საკუთარი პასუხისმგებლობით მოქმედების შესაძლებლობა. განსაკუთრებული პასუხისმგებლობა მართებთ პოლიტიკოსებსა და ჟურნალისტებს, რათა მათმა ქმედებებმა ხელი არ შეუშალოს დანაშაულის აღკვეთასა და მძევლების გათავისუფლებას. სამწუხარო და შემაშფოთებელია, რომ კონკრეტულმა უპასუხისმგებლო პოლიტიკოსებმა სცადეს ასეთი ვითარებაც კი საკუთარი პოლიტიკური ქულების დასაწერად გამოეყენებინათ. ეს არის პოლიტიკური მოროდიორობა, რასაც ჩვენ მათგან, სამწუხაროდ, უკვე დიდი ხანია, მიჩვეულები ვართ. საგანგაშო და გამაოგნებელია კონკრეტული მედიასაშუალებების მიერ განხორციელებული ქმედებები, რომელთა ნაწილი სისხლის სამართლის დანაშაულის ნიშნებსაც კი შეიცავს. გამაოგნებელია, როდესაც მედიასაშუალების წარმომადგენელი პირდაპირ ეთერში აწარმოებს მოლაპარაკებებს ამ ტიპის დანაშაულის ჩამდენ პირთან. ამ მოლაპარაკებების დეტალები კიდევ უფრო გამაოგნებელია, რაზეც დღეს თქვენს ყურადღებას აღარ შევაჩერებთ. კიდევ ერთხელ გავიმეორებთ, ყველას პასუხისმგებლობაა, სამართალდამცავ ორგანოებს მიეცეთ საკუთარი პასუხისმგებლობით მოქმედების შესაძლებლობა.