ჩემთვის უდიდესი პასუხისმგებლობაა, დღეს ვიყო წარდგენილი აქ, თქვენს წინაშე. მე, ირაკლი ჩიქოვანი ვარ, ადამიანი, რომელიც ვაფასებ თქვენს გვერდში დგომას, ვაფასებ იმ ნდობას, რომელიც ჩემს მიმართ გამოავლინა პარტია „ქართულმა ოცნებამ“. მადლობა მინდა ვუთხრა პარტიის თავმჯდომარეს, ბატონ ბიძინა ივანიშვილს და მთლიანად „ქართული ოცნების“ გუნდს. მართლაც დიდი პატივია, ვიყო სახელისუფლებო პარტიის კანდიდატი ისეთ რეგიონში, ისეთ ქალაქში, როგორიც არის ზუგდიდი. ჩემთვის ეს ქალაქი არ არის მხოლოდ გეოგრაფიული ადგილი, ჩემთვის ეს ქალაქი არ არის მხოლოდ პოლიტიკური პლაცდარმი, ეს არის ქალაქი, სადაც მე ვიზიარებ ამ ადამიანებთან ერთად ყოველდღიურობას და სადაც ჩემთვის ყოველი კუთხე, ყოველი კუნჭული, პრობლემა და სიხარული არის ნაცნობი. მინდა მივესალმო ჩვენი გუნდის წევრებს, იმ ადამიანებს, რომლებმაც საკუთარი გამოცდილებით მოიტანეს „ქართული ოცნება“ ამ არჩევნებამდე. ასევე მივესალმო იმ ადამიანებს, რომლებიც აქ არიან, ჩვენი გუნდის ახალი წევრები, რომლებთან ერთადაც ჩვენ უნდა ვიმუშაოთ იმისათვის, რომ საქართველო იყოს წარმატებული. ჩვენ ერთად უნდა შევძლოთ, რომ მივაღწიოთ ჩვენი ქვეყნის უმთავრეს მიზანს - ტერიტორიული მთლიანობის აღდგენას. უდიდესია განაცხადი, რომელიც „ქართულმა ოცნებამ გააკეთა“, რომ ჩვენ გავაკეთებთ განაცხადს საქართველოს სრულფასოვან წევრობაზე ევროკავშირში. ეს არის უმნიშვნელოვანესი მიზანი, რომელსაც ჩვენ ერთად უნდა მივაღწიოთ. ეს მიზანი და საქართველოს ევროპული პერსპექტივა არის ჩვენი საერთო უსაფრთხოების უზრუნველმყოფელი ინსტისტუტი და ამ საერთო მიზანში ვგულისხმობ ჩვენს აფხაზ და ოს და-ძმებს. ჩვენ ყველამ კარგად უნდა ვიცოდეთ, რომ ეს მიზანი არის ჩვენთვის მშვიდობიანი და კეთილდღეობით აღსავსე მომავლის უზრუნველმყოფელი. ყველას კარგად გვესმის და ვიცით, რა ხდებოდა 2012 წელს ზუგდიდში და ვხედავთ იმასაც, თუ რა ხდება ზუგდიდში 2020 წელს, აბსოლუტურად განსხვავებული საარჩევნო გარემო, გარემო სადაც შეგვიძლია თავისუფლად კამპანია ვაწარმოოთ და არა ის, თქვენ კარგად გახსოვთ, როდესაც ქვებს გვიშენდნენ. ეს არის უმთავრესი და უდიდესი მონაპოვარი, მაგრამ ჩვენ არ შეგვიძლია ამაზე შევჩერდეთ, ჩვენ უნდა ვიმუშაოთ იმისათვის, რომ აქ არსებული პრობლემები გადავწყვიტოთ და უმთავრესი პრობლემა, რაც ჩვენს რეალობაშია არის ის, რომ ჩვენ გვჭირდება უფრო განვითარებული, უფრო უკეთესი ზუგდიდი. დღესდღეისობით ზუგდიდში მიმდინარეობს განვითარების პროცესი, მე ამას განახლების პროცესს ვეძახი. მართლაც, უპრეცედენტოა ის მასშტაბი, რომელი მასშტაბიც ჩვენ გვაქვს. ბოლო ორი წლის განმავლობაში ჩვენ შევძელით და ადგილობრივი საჭიროებებისთვის დაიხარჯა 200 მილიონზე მეტი, რა თქმა უნდა, ეს არ არის მხოლოდ და მხოლოდ ჩვენი მონაპოვარი, ეს არის ის მხარდაჭერა, რომელსაც ჩვენ ვგრძნობთ ცენტრალური ხელისუფლებისგან და რომელიც ჩვენთვის არის აუცილებელი და მართლაც ამ ყველაფერში ძალიან დიდი როლი უჭირავს ადგილობრივი ხელისუფლების წარმომადგენლებს, ადგილობრივ გუნდს - გეგას, მალხაზს და ყველას, თითოეულ თქვენგანს, საკრებულოს წარმომადგენლებს. მიღწევები მართლაც არის უზარმაზარი. ჩემს ვალდებულებად, რა თქმა უნდა, ჩვენს პოლიტიკურ გუნდთან ერთად მიმაჩნია, რომ ჩვენ უნდა გავაგრძელოთ ეს დინამიკა, უნდა გავაგრძელოთ ეს ინერცია და უნდა შევძლოთ, რომ ზუგდიდი ვაქციოთ ერთ-ერთ კომფორტულ ქალაქად, ერთ-ერთ ყველაზე განვითარებულ მუნიციპალიტეტად. ეს ნამდვილად შესაძლებელია და ეს შესაძლებლობა ზუგდიდს ნამდვილად გააჩნია, მაგრამ არ შეიძლება ყურადღება არ გავამახვილოთ იმ უმთავრეს და უდიდეს პრობლემაზე, რომელიც უდგას დევნილ მოსახლეობას. ჩვენ დევნილ მოსახლეობასთან ერთად ბოლო 30 წელია ერთად ვცხოვრობთ, დევნილ მოსახლეობასთან ერთად ვიზიარებთ სიხარულს, წარმატებას და წარუმატებლობასაც, რა თქმა უნდა, ჩვენ ერთნი ვართ. ჩვენ ვართ ზუგდიდელები და ერთად ვაშენებთ ზუგდიდს. ჩვენთვის ძალიან მნიშვნელოვანია ის პროგრამა, რომელსაც ახორციელებს „ქართული ოცნება“. რეალურად ბოლო რვა წლის განმავლობაში რაც განხორციელდა ჩვენი დევნილი მოსახლეობისათვის, ჯამში აღემატება ყველა იმ პროგრამას, რომელიც 19 წლის განმავლობაში საქართველოში გატარებულა, თუმცა ეს არ არის საკმარისი. ჩვენ კვლავაც გვრჩება დევნილი მოსახლეობა, რომელიც არის და აქვს საჭიროება, დაკმაყოფილდეს საჭირო საცხოვრებელი ფართებით. ეს არის ჩვენთვის დიდი გამოწვევა და ჩვენ ამ გამოწვევას აუცილებლად დავძლევთ მომავალ წელს. ჩვენ შევძლებთ ათასამდე ახალი მოსახლე იყოს ზუგდიდში. ათასამდე დევნილს გადაეცეს ბინა და რა თქმა უნდა, ეს არ არის საბოლოო ზღვარი. ჩვენ კვლავაც გავაგრძელებთ ამ მიმართულებით მუშაობას და ჩემს ვალდებულებად მიმაჩნია, ვიზრუნო ჩვენს დევნილ საზოგადოებაზე და შევძლო მათთვის უკეთესი მომავლის უზრუნველოფა. თუმცა აქ არის მხარდაჭერა ცენტრალური ხელისუფლების მხრიდან. აქვე გეტყვით, რომ ჩვენ არამხოლოდ განვითარებაზე ვფიქრობთ, ჩვენ ვფიქრობთ ჩვენს კულტურულ მემკვიდრეობაზე, ჩვენს კულტურულ სიძლიერეზე, როდესაც ვლაპარაკობთ საქართველოს ევროპულ პერსპექტივაზე, რომ საქართველო უნდა გახდეს ევროკავშირის წევრი. ზუსტად აქ, ამ ქალაქში და ამ ადგილას არის ერთ-ერთი ის ევროპული ფესვი, საიდანაც აღმოცენდება ევროპული მომავალი, ზუსტად აქ, ჩვენ შეგვიძლია შევქმნათ ისეთი ტიპის მუნიციპალიტეტი, სადაც ჩვენი სტუმრები, ევროპელები შეძლებენ დაინახონ ჩვენთან კავშირი და ურთიერთობა. ჩვენ გვაქვს უდიდესი სიმდიდრე და ეს სიმდიდრე არის ის სასახლეთა კომპლექსი, რომელიც არის აქ, ეს კომპლექსი ახლაც უნიკალურია ამიერკავკასიაში. ამ სასახლეს რეაბილიტაცია ჩაუტარა ფონდმა „ქართუმ,“ ამისთვის ძალიან დიდი მადლობა ფონდ „ქართუს“ და ბატონ ბიძინა ივანიშვილს, თუმცა ჩვენ გამოწვევად გვრჩება ბატონო პრემიერო, ბატონო კახი, ბატონო არჩილ, რეაბილიტაცია, რომელიც უნდა ჩავუტაროთ ეკატერინესეულ სასახლეს, თქვენი თანხმობით, თქვენი თანამონაწილეობით. ჩვენ ამასაც გავაკეთებთ და შევძლებთ ჩვენი ნანატრი ოცნების ასრულებას და ამ სასახლეთა კომპლექსს მივანიჭებთ იუნესკოს მსოფლიო მემკვიდრეობის ძეგლის სტატუსს. ეს განაცხადი ჩვენ უნდა გავაკეთოთ და ეს სავსებით შესაძლებელია. კიდევ ერთხელ მინდა დიდი მადლობა გადავუხადო თითოეულ თქვენგანს აქ მობრძანებისთვის, მინდა კიდევ ერთხელ მოგიწოდოთ, მიუხედავად იმისა, რომ შესაძლებელია ყველანი ვფიქრობდეთ, რომ 31 ოქტომბერს არჩევანი არის ერთი და ეს არჩევანი არის „ქართული ოცნება” და „ქართული ოცნების“ მაჟორიტარობის კანდიდატი. მინდა მოგმართოთ თხოვნით, მობრძანდეთ აუცილებლად არჩევნებზე. მობრძანდეთ მეგობრებთან, ახლობლებთან, ოჯახის წევრებთან ერთად და გააკეთეთ არჩევანი იმისათვის, რომ ჩვენ შევძლოთ ჩვენს ქვეყანაში მშვიდობიანი თანმიმდევრული განვითარების უზრუნველყოფა. ეს არის უალტერნატივო არჩევანი, რომელიც საშუალებას გაძლევს, რომ იმედიანად გავიხედოთ მომავალში. ზუგდიდი არის ქალაქი, სადაც არის უდიდესი ისტორია, ზუგდიდი არის ქალაქი, სადაც არის უდიდესი კულტურული მემკვიდრეობა. ზუგდიდი არის ქალაქი, სადაც არიან ადამიანები, რომლებსაც აქვთ უდიდესი ნიჭი და შრომისმოყვარეობა. მე მინდა ვიყო მათი კეთილსინდისიერი მსახური. კვლავ ერთად საქართველოს წარმატებისთვის!

ჩემთვის დიდი პატივია ჩემს დედულეთში, სამეგრელოში და ზუგდიდში, საზოგადოებასთან შეხვედრა და საუბარი მომავალზე, საუბარი იმაზე, თუ რისი გაკეთება შევძელით ამ წლების განმავლობაში. ჩვენ ვაშენებდით სახელმწიფოს, სადაც ადამიანის ღირსება, უფლებები და საკუთრება არის დაცული. ვაშენებდით სახელმწიფოს, სადაც ჯანდაცვა არ არის მხოლოდ მდიდარი და შემოსავლიანი ადამიანების პრივილეგია, ავაშენეთ სამჯერ მეტი ინფრასტრუქტურა, რომელმაც ათასობით სამუშაო ადგილი მოიტანა, რაც მთავარია, თქვენი მხარდაჭერით, ჩვენ ჩვენი სამშობლო, ჩვენი სახელმწიფო, კიდევ უფრო ახლოს მივიყვანეთ ევროკავშირთან და ნატოსთან. დღეს გვაქვს ისტორიული შესაძლებლობა, რომ დემოკრატიული არჩევნებით, რომელიც ჩვენს მიერ მიღებული ეროვნულ ინტერესებზე დაფუძნებული ევროპული ტიპის კონსტიტუციით არის გარანტირებული, გადავდგათ კიდევ ერთი ძლიერი ნაბიჯი დემოკრატიის გაძლიერებისკენ. უფრო ძლიერი დემოკრატია ნიშნავს უფრო ძლიერ ეკონომიკას, უფრო მეტ ინვესტიციას, უფრო მეტ ნდობას ჩვენი სახელმწიფოს მიმართ და სწორედ ამიტომ გვჭირდება ჩვენ, რომ სამართლიანი და თავისუფალი არჩევნები ჩავატაროთ. აქ არის ჩვენი დიდებული ისტორია, მაგრამ ჩვენს წინაშე არის მომავალიც. ვერავინ შეაჩერებს საქართველოს სწრაფვას უკეთესი მომავლისკენ, ეს არის ჩვენს ხელში, საზოგადოების და თითოეული მოქალაქის ხელში, ვისაც სჯერა თავისუფალი, დემოკრატიული არჩევნების და სამართლიანი სახელმწიფოსი. სწორედ ასეთი ადამიანები ბრძანდებით თქვენ, ჩვენ ვენდობით ჩვენს საზოგადოებას, ჩვენ გვჯერა ჩვენი მხარდამჭერების და თქვენი გადაწყვეტილება 31 ოქტომბერს იქნება კიდევ ერთი ძლიერი ნაბიჯი დემოკრატიული განვითარებისკენ. მჯერა, რომ სამეგრელო და ზუგდიდი ღირსეულ არჩევანს გააკეთებს. მსურს, მადლობა გადავუხადო ჩემს კოლეგებს, პარლამენტის წევრებს, რომლებიც ამ ოთხი წლის განმავლობაში წარმოადგენდნენ სამეგრელოს და ზუგდიდის მუნიციპალიტეტს, და ასევე, მსურს მხარი დავუჭირო ირაკლი ჩიქოვანს. ახალგაზრდა, პროგრესულ, განათლებულ ადამიანს, ვისაც უყვარს თავისი სამშობლო და მისთვის ღირსება და პატივია, ემსახუროს თავის ქვეყანას. ის არის თქვენი კუთხის და თქვენი საზოგადოების ერთ-ერთი ყველაზე ღირსეული წარმომადგენელი, ვფიქრობ, ის იმსახურებს შესაძლებლობას და შანსს, რომ გახდეს საქართველოს პარლამენტის წევრი და საკანონმდებლო ორგანოდან ემსახუროს თავის ქვეყანას. პრემიერ-მინისტრმა ამომწურავად ილაპარაკა გეგმებზე, მას აქვს საქართველოს პარლამენტის და პოლიტიკური გუნდის სრული მხარდაჭერა, რომ განაგრძოს პროგრესი, ასევე, წარმატებით შევძლოთ იმ გამოწვევასთან გამკლავება, რასაც ჰქვია კოვიდ 19 და გლობალური პანდემია. მან წარმატებით შეძლო ყველაზე რთული პირველი ტალღის მოგერიება ექიმებთან, ექთნებთან, ეპიდემიოლოგებთან ერთად და ჩვენ ვიქნებით ჯანდაცვის პროფესიონალებთან ერთად, მათ გვერდით ბოლომდე, ვიდრე არ დავამარცხებთ ამ გამოწვევას.

საქართველოში ბევრი გამორჩეული კუთხეა, ყველა კუთხე გამორჩეულია თავისი ისტორიით, სილამაზით, მაგრამ არავინ მიწყენს, თუ ვიტყვი, რომ სამეგრელო გამორჩეულთა შორის გამორჩეულია. სამეგრელომ უამრავი ღირსშესანიშნაობა აჩუქა ამ ქვეყანას, სამეგრელომ აჩუქა ქვეყანას უდიდესი ადამიანები, სამეგრელომ აჩუქა ქვეყანას ისეთი ისტორიული მოვლენები, რომლებიც ოქროს ასოებით ჩაიწერა ამ ქვეყნის ისტორიაში, მაგრამ ჩვენ ყველას კარგად უნდა გვახსოვდეს, რომ ამ ყველაფრის განსახიერება და თავმოყრა არის ეს სატახტო ქალაქი - ზუგდიდი. ზუგდიდი არის სამეგრელოს წარმატების გასაღები და ყველას კარგად უნდა გვახსოვდეს ერთი რამ - დღეს, აქ, საოკუპაციო ხაზთან ასე ახლოს ზუგდიდის და სამეგრელოს წარმატება არ არის მხოლოდ მეგრელების წარმატება, ან საქართველოს წარმატება, ეს აფხაზეთის წარმატებაა და ამან დამატებითი მუხტი უნდა მოგვცეს თითოეულ ჩვენგანს და ამაშია ის დიდი მისია, რომელიც თითოეულ ჩვენგანს აქ, ამ კუთხეში გვაკისრია. ყველას კარგად უნდა გვახსოვდეს და გვესმოდეს, რომ თითოეული წარმატებული პროექტი ამ ქალაქში და ჩვენ ყველანი ვხედავთ, როგორ ლამაზდება დღითიდღე ზუგდიდი, არის კიდევ ერთი წინგადადგმული ნაბიჯი ჩვენი დიდი შერიგებისკენ. დღეს, საქართველოში ჩვენ აღვნიშნავთ ვეტერანების დღეს და მე მინდა, ქედი მოვიხარო თითოეული იმ ადამიანის წინაშე, რომელმაც თავი გასწირა საქართველოს ერთიანობისთვის და ასევე იმ ადამიანების წინაშე, რომლებიც დღესაც იბრძვიან ამ ერთიანობის მისაღწევად, მაგრამ ჩვენ ეს ყველაფერი უნდა გავაკეთოთ, რა თქმა უნდა, შრომით და მშვიდობიანად და შრომის ფასი სამეგრელოში ყველაზე კარგად იციან. ეს კარგად ჩანს იმ საწარმოებში, იმ სასტუმროებში, სოფლის მეურნეობის იმ პროექტებში, რომლებიც აქ ხორციელდება. 2012 წლიდან, სამეგრელოში ინვესტირებული იყო ინფრასტრუქტურულ პროექტებში 1 186 000 000 ლარი, მაგრამ ჩვენ ყველანი ვხედავთ, რომ კიდევ ბევრი რამ არის გასაკეთებელი, ამიტომ გეტყვით, რომ შემდგომ 4 წელში, რაც არის საარჩევნო ციკლი, საქართველოში ინფრასტრუქტურულ პროექტებში ინვესტირებული იქნება 20 მილიარდ ლარზე მეტი და, რა თქმა უნდა, დიდი ნაწილი აქედან მოხმარდება ამ კუთხეს და სამეგრელოს. ყველას კარგად გვესმის, რომ ბევრი ძალიან მნიშვნელოვანი დაწყებული საქმე უნდა გავიყვანოთ ბოლოში, მაგალითად წყალმომარაგება. ზუგდიდს ათწლეულების მანძილზე არ ჰქონდა ნორმალური წყალმომარაგების სისტემა. ბევრი ვიწვალეთ, საჭიროზე ცოტა მეტი დრო დავხარჯეთ, მაგრამ ეს პრობლემა ბოლოში გავიყვანეთ, თუმცა შემდგომი პრობლემა არის წყალარინების სისტემა. რა თქმა უნდა, ნორმალურ, თანამედროვე ქალაქს უნდა ჰქონდეს სრულფასოვანი წყალარინების სისტემა და მომავალ წელს ჩვენ ამ პროექტს დავიწყებთ. ზუგდიდში ვაკეთებთ გზებს, ვაკეთებთ მაგისტრალურ გზებს, მაგრამ შიდა სასოფლო გზები უკვე პრობლემაა. სასმელი წყალი სოფლებში, საირიგაციო წყლები - ეს ყველაფერი უნდა გავაკეთოთ ერთად და ის ინფრასტრუქტურული პროექტები, რომლებზეც ჩვენ ვსაუბრობთ, პირველ რიგში, მიმართული იქნება სისტემური ინფრასტრუქტურის წესრიგში მოსაყვანად. გზები, გაზიფიცირება, წყალმომარაგება, საირიგაციო წყლები, სკოლები, საბავშვო ბაღები, საავადმყოფოები - რა თქმა უნდა, ჩვენ ყველაფერი უნდა შევქმნათ იმისთვის, რომ ზუგდიდში, სენაკში, ფოთში, მარტვილში, ყველგან, ცხოვრება იყოს ზუსტად ისეთი, როგორიც არის თბილისში, ბათუმში, ქუთაისში და შესაძლებლობებში სხვაობა საქართველოს მოქალაქეებს არ უნდა ჰქონდეთ. საქართველოს წარმატება, პირველი რიგში, განისაზღვრება მისი რეგიონების წარმატებით და ყველას კარგად უნდა გვახსოვდეს და გვესმოდეს, ჩვენი ტერიტორიული მთლიანობა არის ჩვენი ყველაზე დიდი მიზანი. ვერ განვითარდება საქართველო სრულფასოვნად, თუ არ აღდგა ტერიტორიული მთლიანობა და ვერ აღდგება ტერიტორიული მთლიანობა მშვიდობიანი გზის გარეშე. ყველას უნდა გვესმოდეს, რომ ეს არის ჩვენი საბოლოო მიზანი. რა თქმა უნდა, ამ მიზნების მისაღწევად, ჩვენ გვჭირდება გამარჯვება 31 ოქტომბერს. მნიშვნელოვანია, რომ ეს გამარჯვება იყოს ღირსეული და სამართლიანი. ჩვენ ეჭვი არ გვეპარება ჩვენი მოქალაქეების მხარდაჭერაში. ერთადერთი, რაც გვინდა ვთხოვოთ ჩვენს მოქალაქეებს, არის ის, რომ არ წამოვეგოთ პროვოკაციებს. არაფერი არ გავაკეთოთ ისეთი, რაც ოდნავ მაინც რაიმე ეჭვის ქვეშ დააყენებს ჩვენს ღირსეულ და სამართლიან გამარჯვებას. რა თქმა უნდა, ჩვენ დღეს უნდა ვთქვათ ის, რასაც მთელი მსოფლიო, გლობალური სამყარო ებრძვის - ეს არის პანდემია. მესმის, რომ ჩვენთვის არ არის ბუნებრივი აქ პირბადეებით ჯდომა და ერთმანეთთან საუბარი, მაგრამ ეს ჩვენი პასუხისმგებლობაა, ჩვენი მომავალი თაობის, ეკონომიკის განვითარების, ჩვენი უხუცესების, ხანდაზმული ადამიანების ჯანმრთელობის და მათი სიცოცხლის წინაშე და ყველას კარგად უნდა გვესმოდეს, რომ დღეს ელემენტარული წესების დაცვა არის პატრიოტიზმი. ეს არის ის წითელი ხაზი, რომელიც ჩვენ განგვასხვავებს იმ ხალხისგან, რომლებიც გუშინ იდგნენ ბათუმში. ჩვენ ამას უნდა გავუფრთხილდეთ და ასე მივიდეთ საბოლოო გამარჯვებამდე. გამარჯვებას გისურვებთ!

დღეს, „ქართული ოცნების“ ერთიანი გუნდი ამ ულამაზეს ქალაქში, ზუგდიდში ვიმყოფებით, ქალაქში, რომელიც ჩვენი ქვეყნის მდიდარ კულტურასა და ისტორიას ინახავს. აქ ჩამოსვლა გულწრფელად მიხარია, რადგანაც თქვენ ხართ გამორჩეულად მშრომელი, ენერგიული, პატრიოტი და კულტურული ხალხი, რომელსაც ძალიან უყვარს თავისი მხარე, თავისი მუნიციპალიტეტი და თავისი ქვეყანა. სამეგრელომ და მეგრელებმა საკუთარ თავზე ბევრი სირთულე, ჩვენი ქვეყნის ისტორიის მძიმე მომენტები გადაიტანეს, თუმცა ყოველთვის ახერხებდით, რომ უდიდესი შემართებითა და მუხლჩაუხრელი შრომით ეს ყველაფერი გადაგელახათ და ახალი შემართებით გაგეგრძელებინათ ცხოვრება. არ წავალ შორს და ყველაფერს არ გავიხსენებ, თუმცა ყველას კარგად გვახსოვს, თუ რა ხდებოდა საქართველოში 2012 წლამდე, იმ დრომდე, ვიდრე გამოჩნდებოდა ბიძინა ივანიშვილი და მას რიგით ჯარისკაცებად გვერდში დავუდგებოდით საქართველოს მოქალაქეები. „ნაციონალური მოძრაობის“ დამნაშავე, ავტორიტარული რეჟიმის ხელწერა იყო და არის სიცრუე და ძალადობა. რეჟიმის ქმედებები განსაკუთრებით სასტიკი იყო სამეგრელოში, სადაც საწამებელი სამალავებით, კასრებში დამალული პირადი ცხოვრების ამსახველი კადრებით, ტერორითა და ძალადობით ცდილობდნენ ხალხის დამორჩილებას - თავიანთი ტელევიზიებით კი მოდელირებულ რეალობას გადმოსცემდნენ და სიცრუის ნიაღვარით ცდილობდნენ ნგრევა შენებად, წაგებული ომი გამარჯვებად, ადამიანების ღირსების შელახვა კი განვითარებად წარმოეჩინათ. ეს ხალხი ჩვენ ერთად, ერთიანი ძალისხმევით ჩამოვაშორეთ ხელისუფლებას და პირობას გაძლევთ, რომ საქართველოში არასდროს და ვერასდროს დაბრუნდება მოძალადე ხელისუფლება. ჩვენ ეს ყველაფერი მშვიდობიანი გზით, არჩევნების გზით ჩავაბარეთ წარსულს. 2012 წლის შემდეგ დავიწყეთ მშვიდობიანი, სტაბილური და დემოკრატიული განვითარება, ევროპულ და ევროატლანტიკურ სტრუქტურებთან ინტეგრაცია, მოქალაქეების საჭიროებებზე მორგებული რეფორმების განხორციელება ჯანდაცვის, განათლების, სოფლის მეურნეობის, ეკონომიკისა და სხვა სფეროებში. „ქართული ოცნების“ ხელისუფლების პირობებში, ზუგდიდში უამრავი პროექტი განხორციელდა. სახელმწიფო ადამიანს დაუდგა გვერდით და თანადაფინანსების პროგრამებით, ახალი საწარმოების გახსნით ბევრი ადამიანი დასაქმდა და საკუთარი საქმე წამოიწყო. განათლება და ჯანდაცვა ხელმისაწვდომი გახდა და რაც მთავარია, მოქალაქეებს დავუბრუნეთ ყველაზე მთავარი და ძვირფასი - თავისუფლება. ზუგდიდში არსებული ინფრასტრუქტურული სამუშაოები, რა თქმა უნდა, მომდევნო წლების განმავლობაშიც განხორციელდება. მომდევნო ოთხი წლის განმავლობაში, რა თქმა უნდა, განსაკუთრებული ყურადღება დაეთმობა ინფრასტრუქტურულ პროექტებს. ყველაფერს გავაკეთებთ იმისთვის, რომ ჯანდაცვა კიდევ უფრო ხელმისაწვდომი გავხადოთ ყველასთვის, განათლება კიდევ უფრო ხელმისაწვდომი გახდეს ახალგაზრდებისთვის, მომავალი თაობისთვის, რომ შემდეგ მათი განათლება გამოვიყენოთ ისევ და ისევ ქვეყნის საკეთილდღეოდ. დიდი ყურადღება დაეთმობა სოფლის მეურნეობის განვითარებას და ხელშემწყობ პროექტებს, ასევე, გაგრძელდება ეკონომიკის სამინისტროსთან არსებული სხვადასხვა ტიპის პროგრამა, რომელიც ხელს უწყობს მცირე და საშუალო ბიზნესის განვითარებას. მინდა, გამარჯვება და წარმატებები გისურვოთ. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ზუგდიდის მოსახლეობას მაჟორიტარი დეპუტატობის კანდიდატი ირაკლი ჩიქოვანი წარუდგინეს.

ჩემთვის განსაკუთრებული პატივი და პასუხისმგებლობაა ვიდგე თქვენს წინაშე მარტვილის მაჟორიტარი დეპუტატობის კანდიდატად. მარტვილი განსაკუთრებულ დატვირთვას სძენს ჩემს პასუხისმგებლობას, რადგან ჩემი ბავშვობის საუკეთესო წლები აქ მაქვს გატარებული. ეს ჩემთვის მშობლიური მხარეა. მარტვილი არის ძალიან მნიშვნელოვანი ისტორიული კუთხე. აქ მოღვაწეობდა გიორგი ჭყონდიდელი, აქ აღიზარდა დავით აღმაშენებელი. მარტვილმა მასზე დაკისრებული ფუნქცია ძალიან კარგად შეასრულა. აქიდან დაიწყო საქართველოს გაძლიერება, რამაც აქაურებზე დიდი კვალი დატოვა. მარტვილელები გამორჩეულნი არიან ცოდნისადმი ლტოლვით, სახელმწიფოებრივი აზროვნებით, პატრიოტიზმით და რაც მთავარია ძალიან დიდი შრომისმოყვარეობით. ჩვენ ერთად მოვახერხეთ აღგვედგინა და დაგვებრუნებინა მარტვილის ტაძრისთვის პირვანდელი იერსახე. როგორც მაშინ, ერთმანეთის გვერდიგვერდ, ერთად შრომით შევძელით ეს დიდი მამულიშვილური საქმე გაგვეკეთებინა მარტვილისა და ქვეყნისათვის, ასევე ერთად შრომა უნდა გავაგრძელოთ მომავალშიც, რათა მივაღწიოთ წარმატებებს. მომავალი 4 წელი იქნება დაუღალავი შრომის. იმედი მაქვს თქვენი თანადგომის, მხარდაჭერის. მარტვილი, რა თქმა უნდა, ცნობილია კანიონით, მაგრამ ასევე არის მხარე, რომელიც არის კოლხური ვაზის ჯიშების მარანი და აკვანი. სწორედ მარტვილმა შემოინახა ყველაზე მეტი, რაც ჩვენს ეროვნულ იდენტობასთან, მევენახეობასთან გვაკავშირებს - უძველესი ვაზის ჯიშები. ჩვენ უნდა გავაგრძელოთ მარტვილის აღორძინება, ჩვენ გვაქვს უფრო მეტი თვალწარმტაცი ადგილები, რომელთა ინფრასტრუქტურაც მოსაწყობია. მე, მჯერა იმისა, რომ ჩვენ ყველანი ერთად ვიშრომებთ და მივაღწევთ გამარჯვებას, ერთად მარტვილის, საქართველოს აღორძინებისათვის.

მადლობას გიხდით თითოეულ თქვენგანს, მთელ საზოგადოებას, ჩვენს მხარდამჭერებს, რომ ამ წლების განმავლობაში ჩვენ საფუძველი ჩავუყარეთ ისეთ სახელმწიფოს და ისეთ საჯარო სამსახურს, რომლის მთავარი ღირებულებაც არის მოქალაქე, დღეს ჩვენი მოქალაქეები საკუთარ ქვეყანაში თავს გრძნობენ დაცულად, გრძნობენ, რომ მათი ღირსება, მათი უფლებები არის მნიშვნელოვანი. უკვე 8 წელი გვაცილებს იმ ფასადურ დემოკრატიასთან, სადაც მედია იყო მონოპოლიზებული, სადაც ადამიანის სიცოცხლეს, მის უფლებებს ჰქონდა ნულოვანი ღირებულება და სადაც ფარდის წინ იდგნენ ხელისუფლების წარმომადგენლები, რომლებიც ატყუებდნენ თავის მოქალაქეებს და თავის საერთაშორისო მეგობრებს და ფარდის უკან იდგნენ მოქალაქეები პირისპირ ჯანდაცვის პრობლემებთან, სიღარიბესთან, იმ გამოწვევებთან, რომელიც ყველამ კარგად ვიცით, რომ მაშინ ძალიან ბევრი იყო. რა თქმა უნდა, დღეს ჩვენ მთლიანად ვართ ორიენტირებული მომავალზე, ჩვენი მთავარი საზრუნავი არის ეკონომიკური შესაძლებლობების შექმნა, ახალი სამუშაო ადგილები, მეტი სამუშაო ადგილები უფრო მაღალანაზღაურებადი სამსახურები, როგორც კერძო სექტორში, განსაკუთრებით, ასევე, რა თქმა უნდა, ჩვენ უნდა მივცეთ სრული შესაძლებლობა ახალ თაობას, ახალგაზრდებს, რომ შეიქმნან თავისი კარიერა საჯარო სამსახურშიც. მოგეხსენებათ, რომ 2020 წლის საპარლამენტო არჩევნებს აქვს ისტორიული მნიშვნელობა არა მხოლოდ იმიტომ, რომ თქვენ ირჩევთ ახალ პარლამენტს, არამედ იმიტომაც, რომ საქართველო ამ არჩევნებით დგამს კიდევ ერთ მნიშვნელოვან ნაბიჯს დემოკრატიის გაძლიერებისკენ. დემოკრატია, ძლიერი და ნამდვილი დემოკრატია თავისთავად ნიშნავს, რომ ბიზნესი, თქვენი შესაძლებლობები, თქვენი ოჯახის წევრები, უსაფრთხოება ქვეყანაში, ინვესტიციები, ეკონომიკური, სოციალური და კულტურული პროცესები იქნება უფრო მეტად დაცული და თქვენ გექნებათ უფრო ძლიერი დემოკრატიული კონტროლი თქვენს ხელისუფლებაზე, უფრო მეტ მონაწილეობას მიიღებთ ქვეყნის მართვის პროცესში. ჩვენ გვეამაყება, რომ თქვენთან ერთად შევძელით ისეთი მნიშვნელოვანი საქმეების გაკეთება, როგორიც არის საქართველოს ჯანდაცვის რეფორმა, რომლითაც 7 მილიონზე მეტი სამედიცინო შემთხვევა არის დღეისთვის დაფინანსებული, მხოლოდ „ც ჰეპატიტის ელიმინაციის პროგრამით“ 60 ათასზე მეტი ჩვენი მოქალაქის სიცოცხლე და ჯანმრთელობა გადავარჩინეთ. ჩვენ გვეამაყება, რომ შევძელით სამჯერ, ოთხჯერ მეტი ინფრასტრუქტურის აშენება, მაგისტრალური გზების აშენება, ვიდრე ნებისმიერმა წინა ხელისუფლებამ მოახერხა. და რასაკვირველია, მადლიერი ვართ თქვენი მხარდაჭერის, რომ საქართველოს აქვს შედეგზე ორიენტირებული, პროგრესული საგარეო პოლიტიკა. დღეს საქართველო არის თავისი მეგობრების, საერთაშორისო საზოგადოების საიმედო პარტნიორი უსაფრთხოების სფეროში, ჩვენი საზოგადოების წევრები, ჩვენი ჯარისკაცები, ნატოს ჯარისკაცების მხარდამხარ, მსოფლიოს ურთულეს წერტილებში იცავენ მშვიდობას და თავისუფლებას და ისინი იცავენ საქართველოს მშვიდობას და თავისუფლებასაც. დღეს არის ვეტერანთა დღე, და მე მსურს, ხელისუფლების სახელით, საქართველოს პარლამენტის სახელით, მადლობა გადავუხადო თითოეულ ვეტერანს, რომელიც მთელი გულით, პატრიოტიზმით, უანგაროდ ემსახურა თავის სამშობლოს. ეს არის მათი შენატანი მომავალში, რათა ჩვენ არა ომით, არა დესტაბილიზაციით, არამედ მშვიდობით, თანმიმდევრული განვითარებით და შრომით ავაშენოთ ჩვენი ქვეყანა. ჩვენს წინ არის დიდებული ისტორია, ჩვენი კულტურული მემკვიდრეობა, მაგრამ ასევე ჩვენს წინ არის მომავალი და ჩვენ შეგვიძლია, შევქმნათ უკეთესი მომავალი. მიუხედავად იმისა, რომ ამ წლების განმავლობაში დემოკრატიულმა რეფორმებმა მოიტანა იმ ძალების უპრეცენდენტო გააქტიურება, რომელთაც სურდათ რევანში, თქვენ, საქართველოს საზოგადოებამ, ყველა ამ პოლიტიკურ ძალას გაეცით უკვე პასუხი ორ არჩევნებში, რომ მათი დაბრუნება შეუძლებელია. დღეს არც ვსაუბრობთ, რომ მათ აქვთ დაბრუნების შანსები, მაგრამ ეს არჩევნები ასევე უნდა გამოვიყენოთ რომ ეს პოლიტიკური ჯგუფები გავიყვანოთ ბოლომდე პოლიტიკური სცენიდან და მათი ადგილი დაიკავოს ჯანსაღმა ოპოზიციამ. ეს იქნება ამ არჩევნებში ასევე მნიშვნელოვანი ამოცანა. გუშინ კიდევ ერთხელ, მთელმა ჩვენმა საზოგადოებამ დაინახა, რომ ამ პოლიტიკურ ჯგუფებს, მათ სატელიტურ სისტემას ადამიანი არ მიაჩნია ღირებულებად. რევანშისთვის ისინი გაწირავენ ნებისმიერ მოქალაქეს, თავის მხარდამჭერებსაც კი. როდესაც ბოლო ორი კვირის განმავლობაში აჭარაში ექიმების, ექთნების, ეპიდემიოლოგების, პრემიერ-მინისტრის და მთელი მთავრობის დაუღალავი შრომით ექიმებმა შეძლეს კოვიდ 19-ის შემთხვევების სტაბილიზაცია, გუშინ „ნაციონალური მოძრაობა“ აწყობს ხალხმრავალ შეკრებას, სადაც ჩაყავს სხვა მუნიციპალიტეტებიდან ხალხი ყოველგვარი წესების დაცვის გარეშე. ეს არის სამარცხვინო თავდასხმა საზოგადოებრივ ჯანმრთელობაზე, ეს არის სამარცხვინო თავდასხმა საკუთარი ქვეყნის სამედიცინო საზოგადოებაზე და მოქალაქეებზე. ჩვენ მოგვიწევს შემდეგ დღეებში, რომ გავაორმაგოთ აჭარაში ჯანდაცვის რესურსები, უფრო მეტი ექიმის მობილიზაცია გავაკეთოთ, მხოლოდ იმიტომ, რომ ასეთი უპასუხისმგებლო პოლიტიკოსები რჩებიან დღეს ოპოზიციაში. ეს ხალხი უნდა გავიყვანოთ პოლიტიკიდან და გზა უნდა მივცეთ ახალ, ჯანსაღ პოლიტიკურ ძალებს. ჩვენ მზად ვართ სტაბილური, მშვიდი, საქმეზე ორიენტირებული პოლიტიკური სისტემისთვის, ამისთვის გადავდგით ნაბიჯები, ჩავატარეთ დემოკრატიული რეფორმები და თქვენ ნახეთ, რომ „ქართული ოცნება“ არის ერთადერთი პოლიტიკური ძალა, რომელმაც ხელისუფლებაში ყოფნის დროსვე შეცვალა საარჩევნო სისტემა და ახლა ჩვენ ვატარებთ არსებითად პროპორციული სისტემით საპარლამენტო არჩევნებს. ასევე ხედავთ, რომ ეს ადამიანები გულზე მჯიღს იცემდნენ და ამბობდნენ, რომ მათ ძალიან უნდოდათ პროპორციული სისტემა და რა მოხდა მერე: როდესაც კენჭისყრები ჩატარდა პარლამენტში, ზუსტად ეს ხალხი, ეს ოპოზიცია, დილით რომელიც აღტკინებული გაიძახოდა, რომ ძალიან დიდ მხარს უჭერდნენ პროპორციულ სისტემას, კენჭისყრაზე მათ მხარი არ დაუჭირეს ამ ცვლილებებს. ასეთი მოჩვენებითი ხალხია და მათ ჰგონიათ, რომ საზოგადოება ამ ყველაფერს ვერ ხედავს. ჰგონიათ, რომ საზოგადოებას არ შეუძლია თეთრი შავისგან გაარჩიოს. ძალიან მწარედ ცდებიან და ამ ყველაფერს დაინახავენ ოქტომბრის არჩევნებშიც. ჩვენ შევძლებთ, რომ გადავიდეთ დემოკრატიის ახალ ეტაპზე, სადაც უფრო მშვიდი, უფრო გაწონასწორებული პოლიტიკა იქნება და მერწმუნეთ, რომ „ქართული ოცნება“ მოწოდებულია სწორედ ასეთი პოლიტიკური სისტემისთვის. მსურს, კიდევ ერთხელ, მადლობა გადაგიხადოთ მხარდაჭერისთვის, რომ არა თქვენი მხარდაჭერა, რომ არა თქვენი მოთმინება, თქვენი შრომა და გვერდით დგომა, ჩვენ ვერ შევძლებდით იმ საქმეების გაკეთებას, რომელიც გავაკეთეთ, ისიც კარგად გვესმის, რომ არაერთი ჩვენი თანამოქალაქე, არაერთი ოჯახი ჯერ კიდევ პირისპირ რჩება გაჭირვებასთან, თუმცა, ჩვენ შეგვიძლია, რომ ამ ადამიანებსაც მივხედოთ, მათი პრობლემებიც მოვაგვაროთ, თუ გვექნება თქვენი მხარდაჭერა და მე დარწმუნებული ვარ, რომ სამეგრელო და საქართველო ღირსეულ არჩევანს გააკეთებს.

არ უნდა დაგვავიწყდეს, როდესაც მარტვილში ვიმყოფებით, პირველი, ვინც გვახსენდება დიდი მწიგნობართუხუცესი, დიდი გიორგი ჭყონდიდელია, რომელიც საქართველოს მართლმადიდებელმა ეკლესიამ წმინდანად შერაცხა. ეს საქართველოს სიძლიერის განსახიერებაა, რა თქმა უნდა, ამბროსი ხელაიასთან ერთად და ამ დიდი წინაპრების გზის გაგრძელება თითოეული ჩვენგანისთვის უდიდესი პასუხისმგებლობაა, პასუხისმგებლობა პირველ რიგში ჩვენი წარსულის, მაგრამ კიდევ უფრო პასუხისმგებლობა ჩვენი მომავლის, მომავალი თაობის წინაშე. მარტვილი ყოველთვის გამორჩეული კუთხე იყო სამეგრელოშიც და საქართველოშიც, პირველ რიგში განსაკუთრებული ნიჭის ადამიანებით და იმით, რომ ამ კუთხემ უამრავი საზოგადო მოღვაწე აჩუქა ჩვენს ქვეყანას - ღირსეული ადამიანები, რომლებიც ღირსეულად ემსახურებოდნენ ქვეყნის განვითარებას. როდესაც ჩვენ წინასაარჩევნო პერიოდში ვართ და მომავალზე ვსაუბრობთ, რა თქმა უნდა, ყოფით თემებზეც უნდა ვისაუბროთ. მიუხედავად იმისა, რომ ბოლო წლების განმავლობაში ყველა ვხედავთ, პროგრესი სახეზეა - ასე თუ ისე მოწესრიგდა საგზაო ინფრასტრუქტურა, ბევრი რამ კეთდება საგანმანათლებლო დაწესებულებების რემონტისთვის, მიმდინარეობს როგორც სასმელი, ისე საირიგაციო წყლის მოწესრიგების პროცესი, კიდევ ბევრი გვაქვს გასაგრძელებელი ერთად. ქვეყნისთვის და მარტვილისთვის მნიშვნელოვანი ბევრი საქმე გვაქვს დაწყებული, რომელიც ერთად უნდა გავიყვანოთ ბოლოში. უნდა დავასრულოთ მარტვილის მუნიციპალიტეტის გაზიფიცირება და არა მხოლოდ მარტვილის. სამეგრელოში ბევრი მუნიციპალიტეტი გვაქვს დარჩენილი გაზის გარეშე, ამიტომ მთავრობა 2021 წლიდან კიდევ გამოაცხადებს გაზიფიცირების 3-წლიან გეგმას, რომელიც მოგვცემს შესაძლებლობას, სამეგრელოს გაზიფიცირება ბოლოში გავიყვანოთ. რა თქმა უნდა, უნდა დავიწყოთ და დავასრულოთ ტალერი-ლებარდეს გზის მშენებლობა, უფრო სწორედ აღდგენა იმისთვის, რომ ლებარდე, როგორც საქართველოს ბრილიანტი, სულ უფრო და უფრო აქტუალური გახდეს. მოგეხსენებათ, ლებარდეს განვითარებისა და განაშენიანების გეგმის განხორციელება ჯერ კიდევ 2-3 წლის წინ დავიწყეთ, ეს სამუშაოები უკვე დასრულებულია და შეგვიძლია, უახლოეს პერიოდში დავსხდეთ და ერთად ვიმსჯელოთ, როგორ უნდა განვავითაროთ ლებარდე, მარტვილის კანიონი და კიდევ ბევრი რამ, მაგრამ მთავარი მაინც არის ის, რომ ჩვენ ზუსტად ვიცით, თითოეულ მუნიციპალიტეტში, თითოეულ რაიონში შემდგომი 4 წლის განმავლობაში რა უნდა გავაკეთოთ და რა არის პრიორიტეტულად მნიშვნელოვანი. ამისთვის, საქართველოს მთავრობა, მომავალი 4 წლის განმავლობაში, ინფრასტრუქტურული პროექტების წესრიგში მოსაყვანად დახარჯავს მინიმუმ 20 მილიარდ ლარს. რა თქმა უნდა, ეს მარტვილსაც შეეხება. პირველ რიგში, ეს ეხება საგზაო ინფრასტრუქტურას, წყალმომარაგებას, ისევე, როგორც წყალარინების სისტემას, სკოლების რემონტს, გაზიფიცირებას და ა.შ. მიუხედავად იმისა, რომ მარტვილში 24-საათიანი წყალი არის, ეს სისტემა რემონტს, განახლებას საჭიროებს, ისევე, როგორც წყალარინების სისტემა საერთოდ თავიდან ასაშენებელია, გამწმენდი ნაგებობებია გასაკეთებელი. ეს ყველაფერი 2021 წლის გეგმაში და პროექტში იქნება. მარტვილში, ტურიზმის განვითარებასთან ერთად, რა თქმა უნდა, უმნიშვნელოვანესია სოფლის მეურნეობაც. მარტვილში ბევრი პროექტი დაიწყო, თუმცა ცოტა მეტი უნდა ვიაქტიუროთ და ეკონომიკის ისეთი ტრადიციული სექტორები, როგორიც არის ჩაი, თხილი, ყურძენი, მეღვინეობა - ეს ყველაფერი უნდა განვავითაროთ. მე ერთს გპირდებით, რომ იქ, სადაც ჩვენს მოქალაქეს ექნება სურვილი, გადადგას პირველი ნაბიჯები, აიღოს გარკვეული რისკი თავის თავზე, დაიწყოს ბიზნესი და გლეხობიდან გახდეს ძლიერი ფერმერი, სახელმწიფო, რა თქმა უნდა, დაუდგება გვერდით, იმიტომ, რომ ეს ჩვენს ინტერესშია. ყველამ ერთად უნდა ვიშრომოთ იმისთვის, რომ ჩვენი რეგიონი იყოს უფრო ძლიერი. ძლიერი რეგიონი ნიშნავს ძლიერ ქვეყანას და ძლიერ სახელმწიფოს. ყველას კარგად უნდა გვესმოდეს, რომ აუცილებლად ყურადღება უნდა მივაქციოთ ჩვენს საგანმანათლებლო სისტემას, ამისთვის დავიწყეთ განათლების რეფორმა. მიზეზი და მიზანი ამ ყველაფრისა მარტივია, ჩვენ საბოლოოდ უნდა მივაღწიოთ იმას, რომ ჩვენი ახალგაზრდა თაობისთვის არ უნდა ჰქონდეს დიდი მნიშვნელობა, მარტვილში ცხოვრობენ ისინი, თბილისში, ბათუმში, ზუგდიდში თუ კიდევ სადმე. განათლების მიღების დონე თანაბარი უნდა იყოს ყველგან, ეს არის ნორმალური ქვეყნის ყველაზე მნიშვნელოვანი ნიშანი. არ უნდა ჰქონდეს მნიშვნელობა ჩვენი ღვაწლმოსილი მოხუცებისთვის, სად ცხოვრობენ ისინი, თბილისში თუ მარტვილში და არ უნდა იყოს ამაზე დამოკიდებული, როგორი ხარისხის სამედიცინო მომსახურებას მიიღებენ ისინი. ასე უნდა ავაშენოთ ყველამ ერთად დემოკრატიული, ეკონომიკურად ძლიერი, სამართლიანი და რაც მთავარია ევროპული სახელმწიფო. კარგად გვესმის, რომ დღეს პანდემიას ვებრძვით ყველა ერთად, უჩვეულოდ გვიწევს ცხოვრება. არავის ეგონა გაზაფხულზე და ზაფხულში, რომ ოქტომბერში და შემოდგომაზე მოგვიწევდა იმავე პრობლემებთან დაბრუნება, თუმცა ყოველთვის ვამბობდით, რომ იქნებოდა მეორე ტალღა, ვამბობდით, რომ უნდა გავუფრთხილდეთ ერთმანეთს და უნდა გავუფრთხილდეთ პირველ რიგში ჩვენი ოჯახების ხანდაზმულ წევრებს. მესმის, ეს უჩვეულოა, თუმცა, ჩვენი პასუხისმგებლობა არის იმაში, პირველ რიგში, რომ პირბადე ვატაროთ, არც თუ ისე რთულია, რაღაც პერიოდი დავიცვათ დისტანცია. სამწუხაროდ, ყველა ვხედავთ, რომ 8 თვე გავიდა ვირუსის დაწყების შემდგომ და ვერც ერთმა ქვეყანამ ვერ მოიგონა რაიმე იმაზე უფრო ქმედითი და ეფექტური, ვიდრე არის პირბადე. ეს არის უდიდესი გამოწვევა არა მხოლოდ ჩვენი და ჩვენი მოქალაქეების ჯანმრთელობისთვის, არამედ ჩვენი ეკონომიკისთვისაც, ამიტომ ჩვენ ყველაფერი უნდა გავაკეთოთ, რომ როგორც პირველ ტალღას გავუმკლავდით წარმატებით, ერთად უნდა გავაგრძელოთ ელემენტარული წესების დაცვა, რათა ჩვენი მოქალაქეების ჯანმრთელობაზე ვიზრუნოთ და სხვა ქვეყნებთან შედარებით რაც შეიძლება სწრაფად აღვადგინოთ ჩვენი ეკონომიკა. საბოლოო ჯამში, ჩვენი მიზანი რა თქმა უნდა არის სამუშაო ადგილები, ეს არის ყველაზე დიდი გამოწვევა. სამუშაო ადგილების შექმნა არის ყველაზე დიდი მიზანი. სახელმწიფოს ვალდებულება შემდეგშია - ჩვენ უნდა შევქმნათ ყველანაირი პირობები იმისთვის, რომ მშრომელმა, პატიოსანმა ადამიანმა შეძლოს, ღირსეული შრომით ღირსეულად არჩინოს ოჯახი. ეს არის ჩვენი საბოლოო მიზანი, ამ მიზნის მისაღწევად ჩვენ რა თქმა უნდა გვჭირდება 31 ოქტომბერს გამარჯვება. გამარჯვება იმისთვის, რომ ბევრი დაწყებული საქმე ღირსეულად და გამარჯვებამდე გავიყვანოთ ბოლოში. დარწმუნებული ვარ იმ მხარდაჭერაში, რომელსაც ჩვენ ყოველდღე ვგრძნობთ ჩვენი მოქალაქეებისგან, მაგრამ აქ ძალიან მნიშვნელოვანია, თუ როგორ გავიმარჯვებთ და ჩვენ უნდა გავიმარჯვოთ ღირსეულად. არავის უნდა მივცეთ შესაძლებლობა, რომ პროვოკაციებით, ყველანაირი წესების დარღვევით მიაყენონ ჩრდილი ჩვენს გამარჯვებას, ამიტომ უნდა გავუძლოთ ყველაფერს. იმასაც უნდა გავუძლოთ, რაც მოხდა გუშინ ბათუმში - უაღრესად უპასუხისმგებლო ქმედებას, უფრო მეტიც, შენი მოქალაქეების, თანამოქალაქეების ჯანმრთელობის და სიცოცხლის რისკის ქვეშ დაყენებას, მაგრამ ამასაც უნდა გავუმკლავდეთ. აქ მთავარი არის შემდეგი - არჩევნებიც გაივლის, ვირუსსაც დავამარცხებთ, ეკონომიკურ კრიზისსაც დავამარცხებთ, მაგრამ არ უნდა ვიმოქმედოთ ისე, რომ მერე ჩვენი შვილების თვალებში ჩახედვის შეგვრცხვეს, ეს არის ყველაზე მნიშვნელოვანი. ამიტომ, კიდევ ერთხელ მოგიწოდებთ, გავიმარჯვებთ, მაგრამ ამ გამარჯვებას უნდა მივაღწიოთ სამართლიანად და უდიდესი ღირსების გრძნობით. გამარჯვებას გისურვებთ!

მოხარული ვარ, რომ დღეს ჩვენი ქვეყნის ერთ-ერთ ულამაზეს მხარეში და ქალაქში ვიმყოფები, მუნიციპალიტეტში, რომელიც საკუთარი ბუნებით, ღირსშესანიშნაობებით, კულტურული მემკვიდრეობის ძეგლებითა და, რაღა თქმა უნდა - მარტვილის საოცარი კანიონით ჩვენი ქვეყნის ერთ-ერთ მთავარ სავიზიტო ბარათად იქცა. აქ, მარტვილის მუნიციპალიტეტში, განსაკუთრებული ღირსებისა და შეგნების ხალხი ცხოვრობს. პირადად ჩემთვის და დარწმუნებული ვარ, არაერთი ჩვენი თანამოქალაქისათვის, თქვენს დასახასიათებლად საქართველოს ეროვნული გმირის, სრულიად საქართველოს კათოლიკოს-პატრიარქის, ამბროსი ხელაიას სიტყვებიც კმარა, რომლითაც მან საბჭოთა ოკუპანტებს მიმართა - „ჩემი სული ღმერთს ეკუთვნის, ჩემი გული სამშობლოს, ჩემი გვამი კი თქვენთვის დამითმია, მტარვალებო!“ ჩემთვის, ერთი რიგითი ქართველისთვის, ეს სიტყვები ყველაზე უკეთ აღწერს თქვენს ბუნებას და შეუდრეკელ ხასიათს, მითუმეტეს, კარგად ვიცი, თუ რა გაჭირვებისა და ძალმომრეობის ატანა გიწევდათ 2012 წლამდე, „ქართული ოცნების“ ხელისუფლებაში მოსვლამდე. 2012 წლიდან მოყოლებული, ჩვენს ქვეყანაში და რასაკვირველია მარტვილის მუნიციპალიტეტში, ბევრი რამ უკეთესობისკენ შეიცვალა და ხელისუფლებაში მოვიდა ძალა, ვისთვისაც ადამიანი და მასზე ზრუნვა მთავარი ამოსავალი წერტილია და ეს არის ჩვენი გუნდის ერთ-ერთი მთავარი ღირებულება. სოფლის მეურნეობის, ტურიზმის თუ სხვადასხვა სფეროს განვითარების მიმართულებით რეგიონში განხორციელდა და დღესაც ხორციელდება უამრავი პროექტი თუ პროგრამა, რაც საბოლოო ჯამში, ხელს უწყობს მცირე და საშუალო ბიზნესის განვითარებას, ახალი სამუშაო ადგილების შექმნას და, რა თქმა უნდა, ეს პროგრამები მომავალშიც გაგრძელდება. ყველაზე მთავარია, გამოვასწოროთ არსებული სოციალურ- ეკონომიკური მდგომარეობა. ასევე, ჩვენი ქვეყნის ერთ-ერთი ყველაზე დიდი გამოწვევა არის ოკუპირებული ტერიტორიები. პირდაპირ შემიძლია გითხრათ და არ ჩამომართვათ ეს ტრაბახში, ერთადერთი პოლიტიკური ძალა, ვისაც რეალურად აქვს შესაძლებლობა, რომ ყველა ამ გამოწვევას უპასუხოს ღირსეულად, გახლავთ „ქართული ოცნება -დემოკრატიული საქართველო“. მინდა, გამარჯვებები და წარმატებები გისურვოთ. მჯერა და დარწმუნებული ვარ იმაში, რომ 31 ოქტომბერს ჩვენ ყველა ვიზეიმებთ გამარჯვებას, რასაც ქართული ოცნების წარმატება და ჩვენი ქვეყნის წარმატება ჰქვია. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა მარტვილის მოსახლეობას აბაშის, მარტვილის, წალენჯიხისა და ჩხოროწყუს მაჟორიტარობის კანდიდატი, ალექსანდრე მოწერელია წარუდგინეს

ჩვენ დღეს უკვე გვაქვს სახელმწიფო, სადაც მოქალაქეს აქვს განცდა, რომ მისი ღირსება, მისი საკუთრება, მისი უფლებები დაცულია და მე მინდა დავიწყო მადლობით და თითოეულ თქვენგანს გადაგიხადოთ მადლობა იმისთვის, რისი გაკეთებაც ჩვენ ერთად შევძელით ამ წლების განმავლობაში. თურმე შესაძლებელი ყოფილა სახელმწიფოს მართვა ბიზნესის ტერორის გარეშე, თურმე შესაძლებელი ყოფილა სახელმწიფოს მართვა თავისუფალი მედიის პირობებში, ჩვენ შევძელით სახელმწიფოს მართვა არჩევნების გაყალბების გარეშე, შევძელით სახელმწიფოს მართვა შურისძიების და რევანშის გარეშე. თქვენთან ერთად, ჩვენ მოვიგეთ ორი საპარლამენტო არჩევნები და შევძელით არაერთი მნიშვნელოვანი საქმის გაკეთება, დღეს ქვეყანაში დაცულია მშვიდობა და სტაბილურობა, დღეს სახელმწიფოს ყურადღების ცენტრში არის ადამიანი, ზრუნვა ადამიანზე, მისი უფლებების დაცვაზე არის სახელმწიფოს ნომერ პირველი პრიორიტეტი. დღეს ბიზნესის თავისუფლება და საკუთრების უფლება დაცულია. საქართველომ შეძლო პრაგმატული და შედეგიანი საგარეო პოლიტიკის გატარება, რომლითაც ჩვენ მივიღეთ უვიზო რეჟიმი ევროპასთან, თავისუფალი ვაჭრობის ხელშეკრულება, ასოცირების შეთანხმება და სხვა მნიშვნელოვანი წარმატებები, ძლიერი ურთიერთობები ჩვენს სტრატეგიულ პარტნიორებთან. ეს ყველაფერი გავაკეთეთ ჩვენ ერთად და დღეს სწორედ ეს საქმეები გვაძლევს იმის საფუძველს, რომ კვლავ მოვიდეთ თქვენთან და განვამტკიცოთ ნდობა, მომავალზეც ერთად ავიღოთ პასუხისმგებლობა. ეს საქმე არის ბოლომდე მისაყვანი, დღეს საქართველოს ამ პროპორციულ არჩევნებში აქვს შესაძლებლობა, რომ კიდევ ერთი ძლიერი ნაბიჯი გადადგას დემოკრატიის განმტკიცებისკენ, უსაფრთხოებისკენ, და რაც მთავარია, ეს უპასუხისმგებლო პოლიტიკური ძალები გავიყვანოთ პოლიტიკური ველიდან, „ნაციონალური მოძრაობის“ ადგილი მომავლის პოლიტიკაში უნდა დაიკავოს ჯანსაღმა ოპოზიციამ. ჩვენ გვჭირდება უფრო სტაბილური პოლიტიკური სისტემა, უფრო პასუხისმგებლიანი პოლიტიკოსები და არა ისეთი, როგორიც დავინახეთ გუშინ, როდესაც აჭარაში ექიმების, ექთნების და ეპიდემიოლოგების თავდაუზოგავი შრომის შედეგად, პრემიერ-მინისტრის და მთავრობის თავდაუზოგავი შრომის შედეგად, ჩვენ შევძელით კოვიდ 19-ის შემთხვევების სტაბილიზაცია და გუშინ ეს პოლიტიკური ძალა, რომელიც დეზინფორმაციაზე დგას, კრებს მხარდამჭერებს, ჩაჰყავს მხარდამჭერები სხვადასხვა მუნიციპალიტეტიდან, წესების ყოველგვარი დაცვის გარეშე, ეს რას ნიშნავს? ეს არის თავდასხმა საზოგადოებრივ ჯანმრთელობაზე, ეს არის შეტევა საკუთარ მოქალაქეებზე და ამ ძალას დღეს კიდევ აქვს პრეტენზია, რომ დარჩეს პოლიტიკაში, ყველაფერთან ერთად, რის გაკეთებასაც ჩვენ ვაპირებთ მომავალში, უნდა გამოვიყენოთ ეს შანსი და ასეთი უპასუხისმგებლო პოლიტიკური ჯგუფები, რომლებიც დღეს გადაფუთულები მოდიან და საზოგადოებას თხოვენ მხარდაჭერას, უნდა გავიყვანოთ ბოლომდე პოლიტიკური ველიდან. ჩვენ გვჭირდება მშვიდი, საქმიანი და პასუხისმგებლიანი მომავალი და სტაბილური პოლიტიკური სისტემა და ამის რესურსი და ამის პოტენციალი აქვს „ქართულ ოცნებას“. მადლობას გიხდით ჩვენს მხარდამჭერებს, ასევე, სრულ მხარდაჭერას ვუცხადებთ თითოეულ ექიმს, ექთანს, რომელიც ახლა კოვიდ 19-თან ბრძოლის წინა ხაზზე დგას და მე გარწმუნებთ, რომ ჩვენ სამოქალაქო პასუხისმგებლობით, სოლიდარობით შევძლებთ ამ პრობლემისგან მინიმალური ზიანით გამოსვლას და საქართველო დაბრუნდება განვითარების იმ ტემპებში, ძალიან მალე, რომელშიც ჩვენ ვიყავით, როდესაც 3 მილიონი ტურისტიდან 9 მილიონ ტურისტამდე გავზარდეთ ტურიზმის მოცულობები, როდესაც 20 მილიონი ბოთლი ღვინიდან თითქმის 100 მილიონი ბოთლის ექსპორტი ხორციელდებოდა და განხორციელდა წინა წელს. როდესაც სამჯერ მეტი მაგისტრალის დაგება შევძელით, როდესაც ავაშენეთ ახალი სკოლები და სრული რეაბილიტაცია ჩავუტარეთ არაერთს. ამიტომ, კიდევ ერთხელ გთხოვთ და მოგმართავთ გულწრფელად, რომ მხარი დაუჭიროთ მომავალზე ორიენტირებულ პოლიტიკურ გუნდს, ჩვენ წარვადგინეთ განახლებული გუნდი, გამოცდილი პოლიტიკური ლიდერებით და წარმატებული პროგრესული ადამიანებით, მათ შორის არიან თქვენი შვილები და ახალი თაობა, რომელიც შემოდის პოლიტიკაში ახალი იდეებით და ახალი მოტივაციით. ჩვენი მთავარი საზრუნავი მოქალაქეზე, მის უფლებებზე და ჩვენი სამშობლოს ერთიანობასთან ერთად, იქნება ახალი სამუშაო ადგილების შექმნა. ახალი შესაძლებლობების შექმნა და ჩვენ მაქსიმალურად გავხსნით ყველა რესურსს და ყველა შესაძლებლობას ამისთვის. დღეს საქართველო სავსეა მომავლის იმედით, ოპტიმიზმით, ჩვენ ვართ მომავალზე ორიენტირებული გუნდი და მე დარწმუნებული ვარ, რომ სამეგრელო ღირსეულ არჩევანს გააკეთებს. მსურს, მხარი დავუჭირო ბატონ ალექსანდრე მოწერელიას, რომელიც არის პასუხისმგებლიანი ადამიანი, მოტივირებული საჯარო მოხელე, გამოცდილი, მას უკვე აქვს საქმიანი ურთიერთობები როგორ სამთავრობო, ისე საპარლამენტო გუნდთან, და ვინ თუ არა ის, ყველაზე მეტად და ყველაზე სწრაფად შეძლებს იმ საკითხების გადაჭრას, რომელიც ჩვენს საზოგადოებაში ჯერ კიდევ რჩება. მე მეამაყება, რომ ჩემს დედულეთში, სამეგრელოში, ვხვდები ასეთ ბრწყინვალე საზოგადოებას და თქვენთან ერთად, მეც დიდი იმედი მაქვს მომავლის და ჩვენ გვაქვს ხედვა, გვაქვს ძალა, რომ შევქმნათ ჩვენი ქვეყნის უკეთესი მომავალი.

ჩემთვის დიდი პატივია დღეს აქ თქვენთან ერთად ქვეყნის მომავალზე, ჩხოროწყუს მომავალზე საუბარი, მშობლიურ მუხურში. რა თქმა უნდა, ეს პატივთან ერთად, დიდი პასუხისმგებლობაც არის. მიუხედავად იმისა, რომ ბოლო წლების განმავლობაში ბევრი რამ გაკეთდა, მათ შორის ჩხოროწყუშიც, ასე თუ ისე წესრიგში მოვიდა საგზაო ინფრასტრუქტურა, ბევრი პრობლემაა დარჩენილი წყალმომარაგების თვალსაზრისით და სოფლებში წყალი პრობლემაა, ვიცით ეს და გასაკეთებელი გვაქვს. გაზიფიცირება დავიწყეთ და მინდა გითხრათ, რომ მომავალი ახალი 3-წლიანი გეგმა იქნება გაზიფიცირების, რომელსაც მთავრობა უახლოეს პერიოდში დაამტკიცებს და გაზიფიცირებაც ბოლომდე უნდა გავიყვანოთ. სოფლებში და მათ შორის ჩხოროწყუში, კანალიზაციაა წესრიგში მოსაყვანი. ბევრი რამ არის კიდევ მოსაწესრიგებელი - სკოლებია ასაშენებელი, გასარემონტებელი. ჩხოროწყუში 2021 წელს ახალი სკოლის აშენება დაიწყება. ეს ყველაფერი ჩვენ ერთად უნდა გავაკეთოთ იმისთვის, რომ ღირსეულად ვცხოვრობდეთ ჩვენს კუთხეში და არ იყოს დიდი სხვაობა სად ვცხოვრობთ - თბილისში, ბათუმში, თუ რუსთავში. ამას ძალიან დიდი მნიშვნელობა აქვს, იმიტომ, რომ ასე იქმნება წარმატებული, ძლიერი ეკონომიკის ევროპული ქვეყნები და ჩვენ ეს ერთად უნდა გავაკეთოთ. ეს ჩვენ შეგვიძლია და ერთად უნდა ვიშრომოთ მიზნის მისაღწევად. მიუხედავად იმისა, რომ ჩხოროწყუში ბევრი რა გაკეთდა, ბევრია დარჩენილი. გვინდა, რომ ჩხოროწყუში იყოს სპორტული კომპლექსი, ასევე ძალიან გვინდა, რომ კულტურის სახლი გავარემონტოთ. ასევე, ძალიან გვინდოდა ყველას, რომ ტობავარჩხილზე გზა გაგვეკეთებინა, მაგრამ ჩვენ ჯერ კიდევ ღარიბი ქვეყნის შვილები ვართ და რესურსი, რომელიც გვაქვს, ძალიან გონიერად და რაციონალურად უნდა გამოვიყენოთ, თანმიმდევრულად და უნდა გვქონდეს სწორი პრიორიტეტები. ამიტომ, იმისთვის, რომ ჩხოროწყუს ეკონომიკა ავამუშაოთ და ტურისტი მოვიზიდოთ, გადავწყვიტეთ, რომ პირველ რიგში უნდა გაგვეკეთებინა ტობავარჩხილზე გზა. რაც უფრო მეტი ტურისტი ეყოლება ჩხოროწყუს, მით მეტი შემოსავალი ექნება ადგილობრივ ოჯახებს. შემდგომ უნდა გავაკეთოთ სპორტული კომპლექსი და 2021 წელს სპორტული კომპლექსის მშენებლობასაც დავიწყებთ, შემდგომ კულტურის სახლსაც მივადგებით. ეს ყველაფერი უნდა გავაკეთოთ თანმიმდევრულად და არ უნდა გვქონდეს იმის იმედი, რომ რაღაც საოცრება მოხდება, ვიღაც მოვა, დაგვპირდება და ერთ დღეში ყველაფერს ააშენებს, ასე არ ხდება. ჩვენი შრომა უნდა იყოს პირველ რიგში მიმართული იმ ძირითად დარგებზე, რომელიც აქ ისტორიულად ყოველთვის იყო, სოფლის მეურნეობის, მეცხოველეობის. მინდა გითხრათ, რომ ახლა მუხურში ვართ, ჩვენ უკვე დავიწყეთ და სულ რამდენიმე თვეში დაპატენტდება სპეციალური ბრენდი - მუხურის თაფლი, რაც მისცემს შესაძლებლობას ადგილობრივებს, აწარმოონ თაფლი და შემდგომ გაიტანონ ევროპის ბაზარზე. ეს შესაძლებლობა ყველას გვექნება. ეს ყველაფერი უნდა გავაკეთოთ ერთად, იმისთვის რომ სულ მალე, რამდენიმე წელიწადში ყველამ ერთად შევძლოთ ღირსეულად ცხოვრება აქ, მუხურში, ხაბუმეში, ახუთში, ჩხოროწყუში, ყველგან, ეს არის ჩვენი მიზანი. ამიტომ, მომავალი 4 წლის განმავლობაში, არჩევნების შემდეგ, მთავრობას უკვე მობილიზებული აქვს და ინფრასტრუქტურულ პროექტებში, მინიმუმ ინვესტირებული იქნება 20 მილიარდი ლარი. რა თქმა უნდა, ამ ფულიდან დიდი და მნიშვნელოვანი ნაწილი მოხმარდება სამეგრელოს, ჩხოროწყუსაც, წალენჯიხასაც, მარტვილსაც, ყველას და ყველაფერი უნდა გავაკეთოთ, რომ ის წარმატება, რომელიც ამ კუთხეს ყოველთვის ჰქონდა, ის წარმატებული შვილები, რომლებიც ამ კუთხეს ყოველთვის ჰყავდა კიდევ უფრო გავაძლიეროთ, კიდევ უფრო მეტი იყვნენ და კიდევ უფრო მეტი შესაძლებლობა მივცეთ ახალგაზრდებს, ისწავლონ აქ, იმისთვის, რომ შემდგომ გვასახელონ როგორც კუთხე, ისე ქვეყანა, როგორც საქართველოში, ასევე საზღვარგარეთ. დარწმუნებული ვარ, რომ ჩვენ ყველანი ერთად შევძლებთ 31 ოქტომბერს ღირსეული არჩევანი გავაკეთოთ და ეს არჩევანი ჩვენ არ გვჭირდება ჩვენთვის. ეს არჩევანი ჩვენ გვჭირდება ჩვენი ქვეყნის მომავლისთვის და დარწმუნებული ვარ, ეს არჩევანი უნდა იყოს სამართლიანი და ღირსეულ ბრძოლაში გამარჯვება, დარწმუნებული ვარ, ასეც გავიმარჯვებთ. ჩვენი დეპუტატობის კანდიდატი ალექსანდრე მოწერელია, მოგეხსენებათ, ბოლო 2 წლის განმავლობაში იყო მხარის გუბერნატორი, მან დეტალურად იცის სად, რომელ სოფელში რა პრობლემა არის და დარწმუნებული ვარ, გამარჯვებიდან მეორე დღეს მას ექნება ყველა შესაძლებლობა იმისთვის, რომ გააგრძელოს შრომა ჩხოროწყუს და საერთოდ სამეგრელოს წინსვლის და კეთილდღეობისთვის. გამარჯვებას და წარმატებებს გისურვებთ!

სამეგრელო ჩვენი ქვეყნის ულამაზესი და ჩემთვის ერთ-ერთი უსაყვარლესი ადგილია. შეუძლებელია, არ აღფრთოვანდე, როდესაც ამ უნიჭიერესი, შრომისმოყვარე, საკუთარ სამშობლოზე შეყვარებული, საოცრად სტუმართმოყვარე ადამიანების იმედიან და გულანთებულ სახეებს ხედავ. ძალიან ბედნიერი ვარ, რომ დღეს თქვენს წინაშე გამოსვლის შესაძლებლობა მაქვს. თქვენთან ერთად ვხედავ იმ უდიდეს სხვაობას, რომელიც 2012 წლამდე საქართველოს და დღევანდელ საქართველოს შორის არსებობს. სიამაყით შემიძლია ვთქვა, რომ „ქართული ოცნების“ ხელისუფლების პირობებში, უკლებლივ ყველა სფეროში, უდიდეს პროგრესს მივაღწიეთ. რაც მთავარია, ისეთ ფუნდამენტურ საკითხებზე, როგორიც არის ადამიანის უფლებების დაცვა, პოლიტიკური გავლენებისგან თავისუფალი მართლმსაჯულების სისტემა, დემოკრატიის დამკვიდრება და გაღრმავება, საზოგადოებაზე ზრუნვა-დღეს ამ მიმართულებით ხალხში კითხვები არ არსებობს. „ქართული ოცნების“ ხელისუფლება სწორედ იმ პრინციპებსა და ღირებულებებს ეყრდნობა, რომლის გარეშეც თანამედროვე, ძლიერი, ევროპული ქვეყნის აღმშენებლობა და განვითარება შეუძლებელია. თითოეული თქვენგანი კარგად ხედავს, რომ ქვეყანაში და მათ შორის ჩხოროწყუში, იგება გზები, ხორციელდება სხვადასხვა ინფრასტრუქტურული პროექტი სოფლებში, ქალაქის ცენტრალურ ქუჩებში. ასევე, სოფლის მეურნეობას განსაკუთრებული ყურადღება ეთმობა ბოლო წლების განმავლობაში, ტურიზმის განვითარებას. ეს, რა თქმა უნდა, ხელს უწყობს მცირე და საშუალო ბიზნესის განვითარებას და პირდაპირ აისახება ახალი სამუშაო ადგილების შექმნაზე. თუმცა, არსებობს გამოწვევები, პრობლემები, ყველა საკითხი ჯერ გადაჭრილი არ არის, ყველა სოფელში ჯერ ვერ შევედით, ყველგან გზა ვერ გავაკეთეთ, რჩება წყლის პრობლემა. ერთადერთი პოლიტიკური გუნდი, ვისაც აქვს რეალურად შანსი და შესაძლებლობა, პასუხისმგებლობა აიღოს საკუთარ თავზე და მომდევნო ოთხი წლის განმავლობაში თანმიმდევრულად, ეტაპობრივად ყველა პრობლემა მოაგვაროს, გახლავთ „ქართული ოცნება- დემოკრატიული საქართველო“. დარწმუნებული ვარ, თქვენი თანადგომით, თქვენი მხარდაჭერით ჩვენ აუცილებლად ვიზეიმებთ გამარჯვებას 31 ოქტომბერს და არ იფიქროს ვინმემ, რომ ეს იქნება მხოლოდ პარტიული გამარჯვება, ან რომელიმე კონკრეტული კანდიდატის გამარჯვება. ეს იქნება ჩვენი ქვეყნის გამარჯვება, იმიტომ რომ დღეს, ისე როგორც არასდროს, ჩვენს ქვეყანას სჭირდებას მშვიდობა, სტაბილურობა, ქვეყნის ეკონომიკური განვითარება და წინსვლა. მინდა, წარმატებები გისურვოთ, გამარჯვება გისურვოთ და დარწმუნებული ვარ, ჩვენ ერთად გავიმარჯვებთ 31 ოქტომბერს. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ჩხოროწყუს მოსახლეობას აბაშის, მარტვილის, წალენჯიხისა და ჩხოროწყუს მაჟორიტარობის კანდიდატი, ალექსანდრე მოწერელია წარუდგინეს

ჩვენ ვართ მომავალზე ორიენტირებული, ჩვენ წარვადგინეთ გამოცდილი გუნდი, ბატონი გიორგი გახარიას ხელმძღვანელობით და ჩვენ მზად ვართ, თქვენთან ერთად, თქვენი მხარდაჭერით, მომავალზეც ავიღოთ პასუხისმგებლობა. თითოეული მოქალაქე დემოკრატიული არჩევნების დროს ფიქრობს, რისი გაკეთება შეძლო ამ გუნდმა და რის გაკეთებას შეძლებს ის მომავალში. ნებისმიერი სფერო რომ ავიღოთ, ჩვენ მზად ვართ, რომ შედარება გავაკეთოთ იმასთან, რაც 2012 წელს ჩავიბარეთ, რაზეც თქვენ გადმოგვეცით 2012 წელს პასუხისმგებლობა. „ქართული ოცნების“ სახელისუფლებლო გუნდმა ყველაზე უკეთ შეძლო ქვეყანაში მშვიდობის და სტაბილურობის უზრუნველყოფა. ყველაზე უკეთ შეძლო ზრუნვა ადამიანზე, მისი უფლებების დაცვაზე, რა ხდებოდა ჩვენს ქვეყანაში და როგორია დღეს ამ კუთხით ვითარება: ყოველწლიურად 5 ათასზე მეტი საქართველოს მოქალაქე თავის სახელმწიფოს წინააღმდეგ აგზავნიდა საჩივარს ევროსასამართლოში, დღეს ეს რიცხვი რვაჯერ არის შემცირებული და დარჩენილ რაოდენობაშიც ძალიან ბევრია ისეთი შემთხვევები, რომელიც წინა ხელისუფლების დროს მომხდარ დანაშაულს და დარღვევებს ეხება. მოგეხსენებათ, ევროსასამართლოს წლები სჭირდება, რომ საქმეები სრულად განიხილოს. რა იყო ჯანდაცვაში? ჯანდაცვა იყო სრულად პრივატიზებული და მოქალაქეებს ელემენტარული მკურნალობისთვის უწევდათ სესხების აღება, სახლების გაყიდვა, დანაზოგების დახარჯვა, დღეს ახლა, როდესაც ჩვენ აქ ვხვდებით წალენჯიხაში, 7 მილიონზე მეტი შემთხვევა აქვს დაფინანსებული ჯანდაცვაში სახელმწიფოს, 60 ათასზე მეტი ჩვენი მოქალაქის სიცოცხლე და ჯანმრთელობა მხოლოდ ერთმა პროგრამამ - „ C ჰეპატიტის ელიმინაციის პროგრამამ“ გადაარჩინა. განათლების სფეროში ჩვენ უზრუნველვყავით ხელშესახები პროგრესი და ვაგრძელებთ ამ მიმართულებით მუშაობას. ორნახევარჯერ და მეტჯერ არის გაზრდილი დაფინანსება, გავზარდეთ პედაგოგების ანაზღაურება, ავაშენეთ ახალი სკოლები და ახლაც მიმდინარეობს არაერთი სკოლის მშენებლობა და რეაბილიტაცია. ინფრასტრუქტურის სფეროში სამჯერ მეტი საგზაო ინფრასტრუქტურა არის გაკეთებული ამ წლების განმავლობაში წინა ანალოგიურ პერიოდთან შედარებით. ჩვენ გვაქვს ხელშესახები წარმატებები საგარეო პოლიტიკის მიმართულებით. სწორედ „ქართული ოცნების“ ხელისუფლების პერიოდში, თქვენი მხარდაჭერით, ჩვენ შევძელით ასოცირების ხელშეკრულების გაფორმება ევროკავშირთან, შევძელით თავისუფალი ვაჭრობის ხელშეკრულების და რეჟიმის მიღწევა და შევძელით უვიზო მიმოსვლის რეჟიმის მიღება. ეს ნიშნავს, რომ დღეს ევროპა ენდობა საქართველოს, ენდობა მის ხელისუფლებას. სხვა ნებისმიერ მიმართულებაში ჩვენ მზად ვართ, რომ ასეთი შედარებები გავაკეთოთ, მაგრამ დღეს, ყველაზე მეტად, ჩვენს საზოგადოებას აინტერესებს მომავალი, რის გაკეთებას ვაპირებთ ჩვენ. ჩვენი მთავარი საზრუნავი, მთავარი პრიორიტეტი მომდევნო წლების განმავლობაში, რა თქმა უნდა, მოქალაქეებზე ზრუნვასთან ერთად, იქნება ახალი სამუშაო ადგილების შექმნა. ყველა პრიორიტეტი, რომელიც „ქართული ოცნების“ სამომავლო პროგრამაში არის გაწერილი, უკავშირდება, პირველ რიგში, ჩვენი მოქალაქეების კეთილდღეობის გაზრდას, ახალი სამუშაო ადგილების შექმნას და ახალი ეკონომიკური შესაძლებლობების შექმნას. ეს არის, პირველ რიგში, განათლება, რომელიც უფრო კონკურენტულ და უფრო ხარისხიან ცოდნას მისცემს თქვენს შვილებს, ახალ თაობას, პროფესიული განათლება, ინფრასტრუქტურული პროექტები, რაზეც პრემიერ-მინისტრმა ისაუბრა, და ეს 20 მილიარდი ლარი, რასაკვირველია, პირდაპირ ნიშნავს ახალ სამუშაო ადგილებს, მეტ დასაქმებულ ადამიანს. ეს არის სოფლის მეურნეობის მხარდაჭერა, ეს არის ბიზნეს-ინიციატივების მხარდაჭერა სხვა მიმართულებებითაც. ეს არის ჩვენი პროგრამა სამომავლოდ. ჩვენ მთლიანად მომავალზე ვართ ორიენტირებული, თუმცა, არ დავუშვებთ, რომ ვინმემ სცადოს ჩვენი ქვეყნის წარსულში დაბრუნება. არ დავუშვებთ, რომ ისეთი უპასუხისმგებლო პოლიტიკური ძალები მომავალში იყვნენ პოლიტიკაში, როგორიც არის „ნაციონალური მოძრაობა“ და გუშინ კიდევ ერთხელ ვნახეთ, მას შემდეგ, რაც აჭარაში ჯანდაცვის პროფესიონალებმა თავდაუზოგავი შრომით, შეძლეს კოვიდ-19-ის შემთხვევების სტაბილიზაცია, ამ უპასუხისმგებლო ძალამ ჩაატარა გუშინ ხალხმრავალი აქცია, ჩაიყვანეს ხალხი ყველა სხვა მუნიციპალიტეტიდან, ყოველგვარი წესების დაცვის გარეშე - ეს არის საზოგადოების და სახელმწიფოს წინააღმდეგ მიმართული ქმედება. რასაკვირველია, ამას მოყვება ის, რომ ჩვენ კვლავ მოგვიწევს, აჭარაში გავაორმაგოთ სამედიცინო რესურსები, დავტვირთოთ ორჯერ უფრო მეტად ექიმები, ექთნები და ეპიდემიოლოგები, რომ ამას არ მოყვეს კიდევ შემდეგი გართულებები. არა მხოლოდ აჭარაში, არამედ სხვა რეგიონებშიც. ასეთ პოლიტიკურ ძალასთან გვაქვს დღეს საქმე და მის სატელიტურ სისტემასთან, რომელიც დეზინფორმაციით ცდილობს, რომ ხალხს თეთრი შავად მოაჩვენოს და კარგი ცუდად დააჯეროს. არ დავუშვებთ, რომ ასეთი უპასუხისმგებლო ძალები დაბრუნდნენ ხელისუფლებაში. ეს არის წარსული, მათ აქვთ პრობლემები საკუთარ წარსულთან, ჩვენ კი ვფიქრობთ მომავალზე და მთლიანად მომავალზე ვართ ორიენტირებული. მე მინდა, მხარი დავუჭირო ჩვენს კანდიდატს ამ ოლქში, ბატონ ალექსანდრე მოწერელიას. რატომ უნდა ავირჩიოთ ეს ადამიანი? ის არის გამოცდილი საჯარო მოხელე, უკვე აქვს ჩამოყალიბებული ურთიერთობები და პოლიტიკური მხარდაჭერა როგორც სამთავრობო გუნდთან, ისევე საპარლამენტო პოლიტიკურ გუნდთან, პარტია „ქართულ ოცნებასთან“. მან ზუსტად იცის სად და როგორ უნდა გადაჭრას საკითხები, რომელიც თქვენს საზოგადოებას აწუხებს, შესაბამისად, მე ვფიქრობ, რომ სწორედ ის იქნება ყველაზე ღირსეული წარმომადგენელი თქვენი ოლქიდან და ჩვენ ერთად შევეცდებით, რომ გადავჭრათ საკითხები და უზრუნველვყოთ ჩვენი ქვეყნის, ჩვენი სამეგრელოს, თქვენი ქალაქის, თქვენი სოფლების წინსვლა და პროგრესი.

დიდი პატივი და პასუხისმგებლობაა დღეს თქვენთან ერთად აქ ყოფნა და ქვეყნის, წალენჯიხის და სამეგრელოს ხვალინდელ დღეზე საუბარი. დღეს საქართველოში ვეტერანების დღეა. წალენჯიხა საოკუპაციო ხაზთან მდებარე მუნიციპალიტეტია და თავის თავზე გამოიარა, თუ რა არის ოკუპაცია. ჩვენ ყველამ პატივი უნდა ვცეთ ჩვენს ვეტერანებს და უნდა გავიხსენოთ საქართველოს ერთიანობისთვის და მთლიანობისთვის დაღუპული გმირები, რომლებიც მთელი ისტორიის განმავლობაში შეეწირნენ ქვეყნის ერთიანობას და მთლიანობას. ჩვენ ყველას კარგად უნდა გვახსოვდეს, საიდან მოვდივართ და ჩვენი წარსულის ტრადიციებით და ფასეულობებით უნდა გავიკვლიოთ გზა მომავლისკენ. ჩვენი მომავალი არის ეკონომიკურად ძლიერი, სამართლიანი და დემოკრატიული ევროპული სახელმწიფო და ყველამ უნდა ავაშენოთ ეს სახელმწიფო, მაგრამ ეს ყველაფერი იწყება ელემენტარული წესებიდან, ჩვენი ქუჩის, ეზოს მოვლიდან, ასფალტირებული გზებიდან, ნორმალური სკოლებიდან. 2021 წლიდან, შემდგომი 4 წლის განმავლობაში, საქართველოში სისტემურ ინფრასტრუქტურაში სახელმწიფოს მიერ ინვესტირებული იქნება 20 მილიარდ ლარზე მეტი, რომლითაც ჩვენ ზუსტად ვიცით, სად, რამდენი და რა პროექტი უნდა გაკეთდეს. ეს ყველაფერი ძირითადად მიმართული იქნება გაზიფიცირების, წყალმომარაგების, წყალარინების, სკოლების რემონტის, გზების გაყვანისკენ. მიუხედავად იმისა, რომ წალენჯიხაში ბევრი რამ გაკეთდა, კიდევ ბევრი რამ დარჩა მოსაწესრიგებელი. რომ არაფერი ვთქვათ ჭალე-ფახულანის გზაზე, რომელსაც ამდენი ხანია ველოდებით, წყალმომარაგების საკითხი ჯერ კიდევ ბევრ სოფელში პრობლემაა. ჯვარში კეთდება წყალმომარაგების პროექტი და ჯვრის 10 ათას მოსახლეს 24-საათიანი წყალმომარაგება ექნება, მაგრამ როგორც კი ამას მოვრჩებით, წყალარინების სისტემაა გასაკეთებელი. ეს ყველაფერი გეგმის სახით არსებობს. ხან პანდემიაა, ხან ეკონომიკური კრიზისია და ყველას კარგად გვესმის, რომ შეიძლება დროში რაღაც პატარა შეფერხება იყოს, მაგრამ მთავარი მიზანია, სხვაობა, სად იზრდება ბავშვი, სად ცხოვრობს ჩვენი ღვაწლმოსილი ხანდაზმული და როგორ ვითარდებიან ადამიანები, არ უნდა იყოს თბილისს, წალენჯიხას, ფოთს, ბათუმს, ზუგდიდს თუ რუსთავს შორის. ეს არის ჩვენი ძირითადი მიზანი. ასე იქმნება წარმატებული ქვეყნები და სახელმწიფოები. ამიტომ, როდესაც ჩვენ ვსაუბრობთ ხვალინდელ დღეზე, ჩვენი ერთობლივი შრომა არის იმის გარანტი, რომ ჩვენ პანდემიასაც დავამარცხებთ, ეკონომიკური კრიზისიდანაც გამოვალთ და ქვეყნის მშენებლობასაც წარმატებით გავაგრძელებთ. არ დაგვავიწყდეს, რომ პანდემიის მიუხედავად, ბოლო ერთი წლის განმავლობაში, ქვეყანაში სისტემურ ინფრასტრუქტურაზე მუშაობა არც ერთი წუთით არ შეჩერებულა და არც შეჩერდება. მიუხედავად იმისა, რომ გამოწვევა გლობალურია და ვხედავთ, რომ მთელს მსოფლიოში ინფიცირების რაოდენობა ყველგან რეკორდულად იზრდება, ჩვენ გვაქვს პასუხისმგებლობა და გვესმის, რომ როდესაც ერთად ვიკრიბებით თუნდაც საარჩევნო კამპანიაში, რა თქმა უნდა, უნდა გავიკეთოთ პირბადე, რადგან ეს არის ჩვენი პასუხისმგებლობა ჩვენი ხანდაზმულების, ჩვენი ოჯახის წევრების, ჩვენი თანამოქალაქეების წინაშე და რაც მთავარია, ეს არის ჩვენი პასუხისმგებლობა ჩვენი ქვეყნის შემდგომი განვითარების წინაშე, იმიტომ რომ მხოლოდ ასე შეგვიძლია გავაგრძელოთ ჩვენი ეკონომიკური აღმასვლა. უპასუხისმგებლო ქცევა ნიშნავს ქვეყნის განვითარების შეფერხებას, სხვას არაფერს. მთავარი ამ ყველაფერში არის ის, რომ რა თქმა უნდა, 31 ოქტომბერს, ჩვენ ყველამ ერთად უნდა გავიმარჯვოთ და ეს არ იქნება მხოლოდ წალენჯიხის, სამეგრელოს და ამ მუნიციპალიტეტის გამარჯვება, ეს მთელი ქვეყნის გამარჯვება იქნება. ჩვენ დარწმუნებული ვართ ჩვენი მოქალაქეების მხარდაჭერაში. დღეს ჩვენი მთავარი ამოცანაა, რომ ასე წესების დაცვით, ყველამ ერთად გავიმარჯვოთ ისე, სამართლიან და ღირსეულ ბრძოლაში, რომ არავის მივცეთ შესაძლებლობა, მცირედი ჩრდილი მიაყენოს ჩვენს გამარჯვებას. ყველას კარგად უნდა გვესმოდეს, რომ დღეს ელემენტარული წესების დაცვა, პირბადის ტარება, დისტანციის დაცვა - ეს არის პატრიოტიზმი. ეს არის ის, რითაც ჩვენ ვაძლევთ ჩვენს ქვეყანას შესაძლებლობას, განვითარდეს და ამ განვითარებაში არ იყოს არანაირი შეფერხება. დარწმუნებული ვარ და მჯერა, რომ ყველანი ერთად გავიმარჯვებთ, მაგრამ რაც მთავარია, გავიმარჯვებთ სამართლიან ბრძოლაში და გავიმარჯვებთ ღირსეულად. გამარჯვებას გისურვებთ!

მოხარული ვარ, რომ დღეს მაქვს საშუალება, წარვსდგე ადამიანების წინაშე, რომელთაც განსაკუთრებით უყვართ თავიანთი მხარე, ქვეყანა და განსაკუთრებული როლი აქვთ ჩვენი ქვეყნის განვითარებასა და წინსვლაში. თქვენი ულამაზესი მხარე პირველსავე ჯერზე ახერხებს, აღაფრთოვანოს სტუმარი. ადამიანს, ყოველი შემდეგი ვიზიტის შემდეგ უფრო და უფრო უყვარდება ეს კუთხე - სამეგრელო, რომლის ერთ -ერთი თვალსაჩინო მარგალიტი წალენჯიხაა, ადგილი, რომელიც უკვე საუკუნეებია უდიდეს ისტორიას ინახავს. აქ, ამ ტერიტორიებზე ადამიანები ჯერ კიდევ ბრინჯაოს ხანაში ცხოვრობდნენ, შუა საუკუნეებში კი წალენჯიხა სამეგრელოსთვის ერთ-ერთ უმნიშვნელოვანეს პოლიტიკურ და რელიგიურ ცენტრად იქცა. ეს ნათლად მიანიშნებს, ამ ქალაქის როლზე ჩვენი ქვეყნის ისტორიაში. რა თქმა უნდა, საამაყოა უდიდესი წარსული, თუმცა, არ უნდა დაგვავიწყდეს აწმყო და მომავალი, რომელიც ყველამ ერთად, ერთიანი მუშაობით უნდა შევქმნათ. თითოეულ თქვენგანს კარგად ახსოვს, რომ სულ რაღაც ათიოდე წლის უკან წალენჯიხა ისევე, როგორც მთელი საქართველო, ერთ დიდ უძრაობის ჭაობში იყო ჩაძირული. არათუ განვითარება იყო შეფერხებული, არამედ ფეხქვეშ იყო გათელილი ადამიანის ფუნდამენტური უფლებები, მთელი სახელმწიფო რესურსი კი ერთი ადამიანის გარემოცვის ინტერესების დაკმაყოფილებას ხმარდებოდა. ეს ყველაფერი 2012 წლის შემდეგ რადიკალურად შეიცვალა. ხელისუფლება რეალურად ზრუნავს ადამიანზე და ჩვენთვის ყველაზე მთავარი მამოძრავებელი გახლავთ ადამიანი. ასევე, საზოგადოების კეთილდღეობის ზრდაზეა ორიენტირებული ჩვენი ყოველდღიური ქმედებები და გადადგმული ნაბიჯები. ყველაზე უკეთ თქვენ იცით, რომ ქართული ოცნების ხელისუფლების პირობებში წალენჯიხის მუნიციპალიტეტში ძალიან ბევრი ინფრასტრუქტურული პროექტი განხორციელდა. ძალიან დიდი ყურადღება ეთმობა სოფლის მეურნეობის განვითარებას, არსებობს ბევრი საინტერესო პროგრამა, რომლის გამოყენება შეუძლია ჩვენი ქვეყნის მოსახლეობას. 2012 წელს, როდესაც ჩვენ საარჩევნო კამპანიას ვატარებდით, მთელი სოფლები გვაქვს ფეხით შემოვლილი სამეგრელოში და კარგად მახსოვს თვალცრემლიანი მშობლები, რომლებსაც, ელემენტარულად, იმის შესაძლებლობა არ ჰქონდათ, რომ მათ შვილებს წიგნებიდან მიეღოთ განათლება. ქსეროქსზე გადაღებული ფურცლებიდან სწავლობდნენ პატარები. დღეს, როდესაც ჩევნი შვილები მიდიან სკოლებში, მათ სახელმძღვანელოები მერხებზე დალაგებული ხვდებათ, ყველანაირი გადასახადის გარეშე. თუმცა ამ წინგადადგმული ნაბიჯების მიუხედავად, არსებობს გამოწვევები, პრობლემები, რომელზეც ჩვენ საუბარი არ გვერიდება. რა თქმა უნდა თვალი უნდა გავუსწოროთ რეალობას, რომ ეს გამოწვევები რაც შეიძლება სწრაფად დავძლიოთ და ღირსეულად ვუპასუხოთ. ამას, რა თქმა უნდა, სჭირდება ჩვენი ერთად მუშაობა და მე დარწმუნებული ვარ, ჩვენი ერთიანი ძალისხმევით მოვახერხებთ, რომ ღირსეულად ვუპასუხოთ ყველა პრობლემას, რომელიც წალენჯიხას აწუხებს, რომელიც სამეგრელოსა და ზოგადად, საქართველოში არსებობს. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა წალენჯიხის მოსახლეობას აბაშის, მარტვილის, წალენჯიხისა და ჩხოროწყუს მაჟორიტარობის კანდიდატი, ალექსანდრე მოწერელია წარუდგინეს

პირველ რიგში, მინდა, მადლობა გადავუხადო კახის ასეთი პოზიტიური შეფასებისთვის, და მართლაც, ვთქვა, რომ მეამაყება ამ ოთხი წლის განმავლობაში, რომ ამ თავისუფლების მოყვარე, განათლებულ მხარეს და ჩემს მშობლიურ მხარეს - ოზურგეთს წარმოვადგენდი საქართველოს პარლამენტში. კეთილი იყოს თქვენი მობრძანება თავისუფლების, პროგრესის და პოლიტიკის მხარეში-გურიაში. ჩვენი მხარე სავსეა ოპტიმიზმით და მომავლის იმედით. რასაკვირველია, ჩვენ გვეამაყება, რომ საზოგადოების მხარდაჭერით, ძალიან მნიშვნელოვანი სამუშაო გავატარეთ ოზურგეთში და გურიაში.  აქ მნიშვნელოვანი პროექტები გაკეთდა. თვისობრივად ახალი ეკონომიკა დაიწყო და საფუძველი ჩაეყარა ამ ყველაფერს ბიძინა ივანიშვილის და მისი ოჯახის მხარდაჭერით. შავი ზღვის სანაპირო ზოლი-ეს არის მსოფლიო ტურიზმის რუკაზე სრულიად ახალი მიზიდულობის ცენტრი, სრულიად ახალი ეკონომიკა, სრულიად ახალი ეკოსისტემა და ჩვენ მზად ვართ, ათი ათასობით სტუმარს ვუმასპინძლოთ ჩვენს მხარეში, ჩვენ გვეამაყება, რომ შევძელით, ბიძინა ივანიშვილის მხარდაჭერით, ჩვენი საამაყო თეატრის აღდგენა, ჩვენ ავაშენეთ და გავარემონტეთ ფოლკლორის ახალი ცენტრი, სადაც ჩვენი საამაყო მრავალხმიანი მუსიკა ახალ თაობებს გადაეცემა, ვამთავრებთ უკვე მუზეუმის მშენებლობას და ჩვენი კულტურა, ისტორია ახალი სახით წარდგება უკვე ახალი თაობის სტუმრების წინაშე. რაც მთავარია, ეს არის ბიზნესპროექტები, მსხვილი საინვესტიციო პროექტები, რომელიც ახალ სამუშაო ადგილებს, დასაქმებას უკავშირდება და ასეთი არაერთი მაგალითი გვაქვს ოზურგეთში და რასაკვირველია, მომავლის საზრუნავი იქნება ახალი სამუშაო ადგილები და უფრო მეტი ეკონომიკა თითოეული ოზურგეთელის ოჯახში. ჩვენ განვაგრძობთ სოფლის მეურნეობის მხარდაჭერას, განსაკუთრებით, ახალგაზრდების ბიზნესინიციატივების მხარდაჭერას. ჩვენი მიზანი არის, რომ ბიზნესში შევქმნათ ახალგაზრდა კლასი, ახალი თაობა ბიზნესში, რომელმაც უნდა განავითაროს ჩვენი ქვეყნის ეკონომიკა და აქ არიან ჩვენი საამაყო გურულები, ახალგაზრდა ადამიანები, ვინც ახალ თაობას აძლევენ ამ მნიშვნელოვან მაგალითს კონკრეტული პროექტებით, იქნება ეს სასტუმროს ბიზნესი, იქნება ეს სოფლის მეურნეობა თუ იქნება ეს მსუბუქი მრეწველობის მიმართულება. ამიტომ, ჩვენი მთავარი საზრუნავი იქნება პროფესიული განათლების, ხარისხიანი განათლების მიწოდება და ამასთან ერთად, კაპიტალის ხელმისაწვდომობის უზრუნველყოფა, რომ თითოეულმა ადამიანმა, ვისაც სურს ახალი სამუშაო ადგილების შექმნა და ვისაც სურს მეტის გაკეთება, ამის შესაძლებლობა მიიღოს. შემდეგი ოთხი წელი ოზურგეთისთვის, გურიისთვის იქნება შესაძლებლობების წლები და ჩვენ მაქსიმალურად გავხსნით კარს, მაქსიმალურად გავხსნით შესაძლებლობებს ყველა ადამიანისთვის, ვისაც ეს ჭირდება. რა თქმა უნდა, განვაგრძობთ ზრუნვას თითოეულ ჩვენს თანამოქალაქეზე და მე კიდევ ერთხელ მსურს, ხელისუფლების სახელით, მადლობა გადავუხადო ეპიდემიოლოგებს, ექიმებს, ექთნებს, რომლებიც ახლა, ამ მომენტში მოწინავე ხაზზე დგანან პანდემიასთან ბრძოლაში, გვეამაყება, რომ გიორგი გახარიას ხელმძღვანელობით, მთავრობამ ყველაზე რთულ პერიოდში ეფექტურად შეძლო ვირუსის გავრცელების შეკავება და მე მჯერა, რომ თითოეული თქვენგანის თანადგომით, ჩვენ შევძლებთ ამ ურთულესი  გამოწვევის დამარცხებას ცივილიზებულ მსოფლიოსთან ერთად. რა თქმა უნდა, გურულებს ყველაზე მეტად გვაინტერესებს საქართველოს პერსპექტივა ევროკავშირში, როდის გავწევრიანდებით ნატოში და საგარეო პოლიტიკა. ამ მიმართულებით გვაქვს ხელშესახები წარმატებები და მე მაქვს თქვენი იმედი, ჩვენი საზოგადოების იმედი, რომ ევროპულ და ევროატლანტიკურ მისწრაფებებს მხარს დაუჭერს ჩვენი საზოგადოება მომავალშიც, ჩვენ მზად ვართ, თქვენტან ერთად, მომავალზეც ავიღოთ პასუხისმგებლობა.

მოგესალმებით, ჩვენო გურულებო, ჩვენო ოზურგეთელებო! დიდი პატივია დღეს თქვენთან აქ ყოფნა, ამ მშვენიერ ეზოში, მყუდრო, შინაურულ გარემოში და გურიის მომავალზე საუბარი. ეს კუთხე არის უნიკალური ნიჭის ადამიანების კუთხე და შემთხვევითობა არ არის, რომ უამრავი ღირსეული საზოგადო მოღვაწე აჩუქა ამ კუთხემ ჩვენს ქვეყანას, მის პოლიტიკას, ხელოვნებას, კულტურას - ყველა სფეროს. ამიტომ, ძალზე დიდი პასუხისმგებლობაა თქვენთან საუბარი. თითოეულ სიტყვას ზომავ, განსაკუთრებით სიტყვას, რომელიც მომავალზეა ორიენტირებული. სამწუხაროა, რომ ჩვენ დღეს ამ გლობალური გამოწვევის, პანდემიის პირობებში ვხვდებით, მაგრამ ყველას უნდა გვესმოდეს რომ ორი კვირა დაგვრჩა, ორი კვირა, საკმაო გამოწვევებით სავსე, თუმცა ჩვენ ეს ორი კვირაც ღირსეულად უნდა გავიაროთ, ისე, როგორც გამოვიარეთ ეს ბოლო წლები. ღირსეულად უნდა გავიაროთ და ღირსეულად უნდა გავიმარჯვოთ. ეს ყველაფერი უნდა გავაკეთოთ ისე, როგორც გავუმკლავდით პირველ ტალღას, დავიცვით ჩვენი მოქალაქეების ჯანმრთელობა და ჩვენი ეკონომიკა. როგორც ვამბობდით, დავდექით მეორე ტალღის გამოწვევის წინაშე და ყველას უნდა გვესმოდეს - ერთიანობა, დიდი სამოქალაქო პასუხისმგებლობა არის გამოსავალი, რომ ჩვენ მეორე ტალღაც დავამარცხოთ კოვიდთან ბრძოლაში და რაც მთავარია, დავამარცხოთ ისე, რომ გადავარჩინოთ ჩვენი ეკონომიკა, დავიცვათ თითოეული სამუშაო ადგილი და ამასთან ერთად, ჩავატაროთ ყველაზე დემოკრატიული, ღირსეული არჩევნები. ეს ძალზე სერიოზული გამოწვევაა და დარწმუნებული ვარ, ღირსეულად გავუმკლავდებით. ჩვენ გვაქვს კონკრეტული გეგმა, მომავალი 4 წლის განმავლობაში - სად, რომელ ქალაქში, რომელ დაბასა და სოფელში რა უნდა გავაკეთოთ, რომ ჩვენი მოქალაქეების სიცოცხლე და ყოველდღიური ცხოვრება იყოს უფრო უსაფრთხო და ღირსეული. ამისთვის გვაქვს კონკრეტული გეგმა. ინფრასტრუქტურულ პროექტებს, რომლებიც ჩვენ ბოლო წლების განმავლობაში განვახორციელეთ, ყველა ხედავს. ამ ინფრასტრუქტურული პროექტების გაგრძელებასა და შემდგომ განვითარებაზე მომავალი 4 წლის განმავლობაში მინიმუმ 20 მილიარდი ლარი დაიხარჯება. ეს ფული მოხმარდება გზების მშენებლობის გაგრძელებას, სასმელი წყლის, საირიგაციო წყლის, სკოლების მშენებლობას, საბავშვო ბაღების აღდგენას, ეს ყველაფერი უნდა გავაკეთოთ იმისთვის, რომ ჩვენი ღვაწლმოსილი მოხუცები, ჩვენი ბავშვები ცხოვრობდნენ ღირსეულ და რაც მთავარია თანაბარ გარემოში. არ უნდა იყოს სხვაობა, სად ვცხოვრობთ ჩვენ - თბილისში, ოზურგეთში, ბათუმში, რუსთავში თუ კიდევ სხვაგან. ეს არის ჩვენი ძირითადი მიზანი და ასე იქნება ეკონომიკურად ძლიერი, სამართლიანი და დემოკრატიული ევროპული სახელმწიფო. გისურვებთ გამარჯვებას 31 ოქტომბერს ღირსეულ და რაც მთავარია სამართლიან ბრძოლაში! გამარჯვებას გისურვებთ!