დღეს ჩვენ შევიკრიბეთ განსაკუთრებულ ადგილას, ვარძიაში, რომელიც არის კლდეში ნაკვეთი ქალაქი, XII-XIII საუკუნეების ქართული ისტორიულ-კულტურული ძეგლი, რომელიც ასოცირდება ჩვენი ქვეყნის სიძლიერესთან. ჩემთვის დიდი პატივია მოგესალმოთ სწორედ ამ ისტორიული ადგილიდან. ასპინძა არის უძველესი ისტორიული მხარე, სამშობლო შოთა რუსთაველისა, ნამდვილი სამოთხე კულტურულ-ისტორიული ძეგლებით დაინტერესებული ადამიანებისთვის, რომელთა ნახვისას თვალწინ გვიცოცხლდება ვეფხისტყაოსანი. იყო ამ ულამაზესი და დიდი ისტორიის მქონე მუნიციპალიტეტის მაჟორიტარი დეპუტატობის კანდიდატი დიდი პასუხისმგებლობაა. მე მზად ვარ ამ პასუხისმგებლობისთვის და მზად ვარ ვიყო ასპინძის და ასპინძელების სამსახურში! მინდა, მადლობა გადაგიხადოთ ყველას მობრძანებისთვის და მხარდაჭერის გამოცხადებისთვის, მადლობა „ქართული ოცნების“ პოლიტიკურ გუნდს იმ ნდობისთვის, რაც მე გამომიცხადა, მე ძალიან კარგად ვიცნობ ჩემს რეგიონს და ასპინძის მუნიციპალიტეტს და ასევე კარგად ვიცი, თუ რა უნდა გავაკეთოთ, რათა შევქმნათ მეტი დოვლათი ჩვენს მუნიციპალიტეტში და ამით თითოეულმა ჩვენგანმა მიიღოს მეტი სიკეთე და სარგებელი. ჩემთვის, ვინც 22 წლის განმავლობაში ვიყავი ბიზნესით დაკავებული, უმთავრესი ამოცანა იქნება გავაძლიერო ასპინძის მუნიციპალიტეტის ეკონომიკა და დავასაქმოთ მეტი ადამიანი, შევქმნათ მეტი სამუშაო ადგილი და გვქონდეს მეტი სარგებელი თითოეულ ჩვენგანს. დღეს, ჩვენი ხელისუფლების მიერ გამოცხადებულია, რომ ჩვენს ქვეყანაში ყველაზე დიდ ღირებულებას წარმოადგენს ადამიანი, მათზე ზრუნვა და მათი უფლებების დაცვა, დღეს ყველაზე უკეთაა დაცული ჩვენი მოქალაქეების უფლებები, დღეს ყველაზე უკეთაა დაცული ბიზნესი და საკუთრების უფლება. ჩვენმა სახელმწიფომ ყველა ძირითადი მიმართულებით არსებითი პროგრესი განიცადა, რასაც სხვადასხვა სფეროში არსებული ვითარების კარდინალურ გაუმჯობესებასა და მოქალაქეების განწყობებთან ერთად ავტორიტეტული საერთაშორისო რეიტინგებიც ადასტურებს. გასული წლების განმავლობაში მნიშვნელოვნად გაიზარდა ხელისუფლების მიერ ასპინძის მუნიციპალიტეტში განხორციელებული პროგრამებისა და პროექტების მოცულობა. ადგილობრივი ბიუჯეტის შემოსავლები და 2013 წლიდან დღემდე 5 მლნ ლარიდან 12 მლნ ლარამდე მიაღწია. ხორციელდება მრავალი პროექტი, რომელთა შორის გამოსარჩევია პროგრამა „დანერგე მომავალი“, ხორციელდება აგროდაზღვევის სახელმწიფო პროგრამა და „შეღავათიანი აგროკრედიტის“ სახელმწიფო პროგრამა, რომლის ფარგლებშიც, ასპინძის მუნიციპალიტეტში 5 მლნ ლარზე მეტი მოცულობის პროექტები განხორციელდა, გაგრძელდება სახელმწიფო პროგრამა „აწარმოე საქართველოში“, რომლის ფარგლებშიც მუნიციპალიტეტში დაფინანსდა 76 პროექტი, განსაკუთრებულ ყურადღებას იმსახურებს მუნიციპალიტეტში ტურიზმის განვითარება. ამ მიზნით, 2013-2019 წლებში ასპინძის მუნიციპალიტეტის ტერიტორიაზე განხორციელდა: კურორტ „ასპინძაში“ მისასვლელი საავტომობილო გზის და ხიდის რეაბილიტაცია; სოფლებში ნაქალაქევი და თმოგვი, სამონასტრო კომპლექსის ვანის ქვაბებისა და წუნდას ეკლესიის მისასვლელი საავტომობილო გზის რეაბილიტაცია; ასპინძაში, წმინდა გიორგის სახელობის ხვილიშისა და წმინდა გიორგის სკოლის მიმდებარე ტერიტორის კეთილმოწყობა; სოფელ ოთაში, სამონასტრო კომპლექსი „შორეთის“ რეაბილიტაცია; სოფელ ჭობარეთის ანტიკური ხანის ნამოსახლარის და სოფელ ძველში რაბათის ციხის არქეოლოგიორი კვლევა; ვარძიის სამონასტრო კომპლექსის სარეაბილიტაციო სამუშაოები; სოფელ დამალისა და სოფელ აწყვიტის ტერიტორიაზე არსებული ისტორიულ-არქიტექტურული ძეგლების რეაბილიტაცია; ახალი ტურისტული მარშრუტებისა და ტურისტული ბილიკების დაგეგმვა და მათი პასპორტიზაცია. ასევე ადგილობრივი მნიშვნელობის გზების სარეაბილიტაციოდ და მშენებლობისათვის დახარჯული იქნა 19 მლნ ლარზე მეტი. აღარ გავაგრძელებ ყველა განხორციელებული პროექტის ჩამოთვლას, თუმცა დანამდვილებით შემიძლია ვთქვა, რომ „ქართული ოცნების“ სახელისუფლებო გუნდი განვითარების სწორ გზას ადგას, აქვს მომავლის ხედვა, უნარი, რომ საკუთარ მოქალაქეზე, საკუთარ ქვეყანაზე იზრუნოს და ეტაპობრივად ყველა გამოწვევას გაუმკლავდეს. რა თქმა უნდა, კარგად გვესმის, რომ, მიუხედავად დიდი პროგრესისა, კიდევ უფრო მეტი უნდა გავაკეთოთ, რათა ჩვენს წინაშე არსებული გამოწვევები დავძლიოთ. ამისთვის აუცილებელია მოსახლეობის ჩართულობით, აქტიურად ვიზრუნოთ ჩვენს წინაშე არსებული პრობლემების მოგვარებაზე. ჩემი უპირველესი ამოცანა იქნება დავიცვა და გავატარო თითოეული თქვენგანის ინტერესები, ვიყო თქვენი ღირსეული წარმომადგენელი ჩვენი ქვეყნის უმაღელს საკანონმდენბლო ორგანოში. ვთვლი, რომ მაქვს გამოცდილება და ძალა იმისა, რომ ჩემი რეგიონის კიდევ უფრო მეტ განვითარებას ხელი შევუწყო. ჩვენ ერთად გავაძლიერებთ ჩვენს მუნიციპალიტეტს და ხელს შევუწყობთ ჩვენი მოსახლეობის დასაქმებას და კეთილდღეობას. დარწმუნებული ვარ, ერთად დგომით, სამშობლოს სიყვარულით აუცილებლად გავიმარჯვებთ და მომდევნო წლების განმავლობაში უამრავ წარმატებას მივაღწევთ. ერთად ასპინძის წარმატებისთვის! ერთად საქართველოს წარმატებისთვის!

დღეს, ჩვენ ვართ მიწაზე, რომელსაც განსაკუთრებული გაფრთხილება სჭირდება. ასპინძაში ცხოვრობენ მშრომელი ადამიანები, რომლებსაც სახელმწიფოსგან მუდმივად გვერდში დგომა და ხელის გამართვა სჭირდებათ. ეს იქნება ჩვენი ამოცანა შემდეგი 4 წლის განმავლობაში. ამისათვის ჩვენ გვაქვს ძალიან მკაფიო ხედვა, ძალიან მკაფიო პროგრამა, რომელიც წარვუდგინეთ საზოგადოებას და ჩვენ გვაქვს ხედვა თითოეული მუნიციპალიტეტისთვის, თუ როგორ უნდა განვითარდეს ასპინძის მუნიციპალიტეტი, რა უნდა გაკეთდეს იმისათვის, რომ ჩვენ მომავალში, 4 წლის შემდეგ კიდევ უფრო განვითარებული ასპინძის მუნიციპალიტეტი ვიხილოთ. ჩვენ ზურგს გვიმაგრებს ძალიან ძლიერი გუნდი. ჩვენი საპარლამენტო სიის სათავეშია პრემიერი გიორგი გახარია, რომელიც არის გამორჩეული ლიდერი, რომელიც არის ძალიან ძლიერი მენეჯერი და მისი მთავრობა იქნება გარანტია იმისა, რომ უახლოეს მომავალში დავძლევთ იმ პრობლემებს, რომელიც გამოიწვია პანდემიამ და წავალთ წინ სწრაფი განვითარების გზით. ჩვენ წარვადგინეთ ძალიან ძლიერი საპარლამენტო გუნდი, სადაც არიან როგორც გამოცდილი, ასევე ახალი წევრები. ჩვენ გვყავს ძალიან ძლიერი მაჟორიტარები და ამ თვალსაზრისით, ეს ოლქი ნამდვილად გამორჩეულია, სადაც ამ კუთხის შვილი წარდგენილია მაჟორიტარად. იგი მომდევნო 4 წლის განმავლობაში გააკეთებს ყველაფერს იმისათვის, რომ განვითარდეს ასპინძის მუნიციპალიტეტი. მას უყვარს ეს რეგიონი, მას გული შესტკივა ამ რეგიონზე და ეს არის საუკეთესო საფუძველი და საწინდარი იმისათვის, რომ ჩვენ ყველამ ერთად ხელი შევუწყოთ ასპინძის მუნიციპალიტეტის განვითარებას. ერთად დგომით, ჩვენ აუცილებლად მივაღწევთ ძალიან დამაჯერებელ გამარჯვებას 31 ოქტომბერს.

საოცარი, მისტიური კუთხის, საოცარი ისტორიის, საოცარი ციხესიმაგრეებისა და ღვთაებრივი ვარძიის კუთხის შვილებო, თქვენთან ერთად საუბარი საქართველოს და ასპინძის მომავალზე, რა თქმა უნდა, ჩვენთვის დიდი პატივია და ძალიან დიდი მნიშვნელობა აქვს. ყველას კარგად გვესმის, რომ ჩვენ არ გვაქვს დრო წარსულში ჩასარჩენად და წარსულზე სასაუბროდ, იმის გათვალისწინებით, რომ გვაქვს კონკრეტული გეგმა, შემდეგი 4 წლის განმავლობაში, რა უნდა გავაკეთოთ ყოველდღიურად და როგორ უნდა მოხმარდეს თითოეული დღე ჩვენს თითოეულ მოქალაქეს და თითოეულ მუნიციპალიტეტს. მარტივ ციფრს გეტყვით, 2013 წელს ასპინძის მუნიციპალიტეტის ადგილობრივი საბიუჯეტო შემოსავალი იყო დაახლოებით 180 000 ლარი, დღეს ეს არის 10 მლნ ლარზე მეტი. მარტივი ციფრებია. ასპინძაში მიმდინარეობს ისეთი სამუშაოები, როგორიც არის საირიგაციო წყლით მომარაგება, სარწყავი სისტემის წესრიგში მოყვანა. დაახლოებით 500 ჰექტარზე სისტემა უკვე მოყვანილია წესრიგში, ახლა მიმდინარეობს დამატებითი პროექტი და გაკეთდება კიდევ დამატებით 500 ჰექტრის სარწყავი სისტემით უზრუნველყოფა. რა თქმა უნდა, არის ბევრი პრობლემა. ჩვენ ვხედავთ, რომ სასმელი წყალი ისევე, როგორც წყალარინების სისტემა, ისევე, როგორც ბევრი სკოლა და საბავშვო ბაღი ჯერ კიდევ წესრიგშია მოსაყვანი. მარტივ ციფრს გეტყვით - მომავალი 4 წლის განმავლობაში საქართველოში სისტემურ ინფრასტრუქტურაზე დაიხარჯება მინიმუმ 20 მილიარდი ლარი. ყველაფერი, რასაც ბოლო წლების განმავლობაში ვაკეთებდით - გზები, სკოლების, ბაღების, სარწყავი და წყალმომარაგების სიტემების რეაბილიტაცია, რა თქმა უნდა, გაგრძელდება და პირველ რიგში იმიტომ, რომ სხვაობა არ უნდა იყოს, სად ცხოვრობს ადამიანი, თბილისში, ბათუმში, ასპინძაში თუ სხვაგან. ჩვენს ყველა მოქალაქეს უნდა ჰქონდეს დაახლოებით თანაბარი ცხოვრების დონე, სადაც არ უნდა ცხოვრობდეს ის. ყველა ადამიანს უნდა ჰქონდეს შესაძლებლობა, გლეხობიდან გახდეს ძლიერი ფერმერი, რომ შეძლოს ღირსეულად არჩინოს ჯერ თავის ოჯახი, შემდგომ კი სხვა ადამიანები დაასაქმოს. ასპინძას ამ მიმართულებით სერიოზული პოტენციალი აქვს, როგორც ტურიზმის განვითარების, ასევე, სოფლის მეურნეობის განვითარების თვალსაზრისით. ამიტომ, შესაბამისი პროგრამებით, არ აქვს მნიშვნელობა, რომელ მიმართულებას აირჩევს თითოეული თქვენგანი, იქნება ეს სოფლის მეურნეობის თუ მაგალითად ტურიზმის მიმართულებით, რა თქმა უნდა, სახელმწიფო გვერდით დაგიდგებათ. ამისთვის სახელმწიფოს გამოყოფილი აქვს კონკრეტული თანხები. პირველი ნაბიჯი ბიზნესში არ არის მარტივი, ბევრს ამის ეშინია, ამას საკმაოდ დიდი სითამამე და მხნეობა სჭირდება და ყველაფერს გავაკეთებთ იმისთვის, რომ ჩვენს მოქალაქეს ამ პირველი ნაბიჯის გადადგმისთვის გვერდით დავუდგეთ. ამიტომ, ყველა ის პროგრამა, რომლისთვისაც ადრე თქვენ გიწევდათ თბილისში, სამინისტროებში სიარული, ჩვენ უკვე ჩამოვიტანეთ თქვენთან რეგიონში და ასპინძაში, იქნება ეს საზოგადოებრივი ცენტრი თუ იუსტიციის სახლი, შეგეძლებათ ზუსტად იგივე მომსახურება და ინფორმაცია მიიღოთ. შეგეძლებათ, დატრენინგებული ადამიანების დახმარებით, კონკრეტულ კონტრაქტს მოაწეროთ ხელი, რათა პროგრამებში დაიწყოთ მონაწილეობა. სახელმწიფომ, რა თქმა უნდა, უნდა შეგვიქმნას ინფრასტრუქტურა, მაგრამ საბოლოო ჯამში, მაინც ყველაფერი ჩვენზეა დამოკიდებული და ჩვენს გასაკეთებელს არავინ გააკეთებს. მესმის, რომ ეს რთულია, ამას დიდი სითამამე სჭირდება, მაგრამ სახელმწიფო იმისთვის არსებობს, რომ ასეთ დროს ღირსეულ, თამამ და ნიჭიერ ადამიანებს გვერდით დაუდგეს. რაც შეეხება არჩევნებს - რა თქმა უნდა, არჩევნები არის ძალზედ მნიშვნელოვანი, მაგრამ ამ არჩევნებში ყველაზე მნიშვნელოვანი იქნება ის, რომ ჩვენ 31 ოქტომბერს ღირსეულად გავიმარჯვებთ. არავის მივცეთ შესაძლებლობა, რომ პროვოკაციების სახით რაიმე სახის ჩრდილი მიაყენოს ჩვენს გამარჯვებას. ეს არის ყველაზე მნიშვნელოვანი. ყველას კარგად უნდა გვესმოდეს, რომ შეიძლება ბევრის მოთმენა მოგვიწიოს, შეიძლება ბევრი პროვოკაცია მოვითმინოთ და თვალიც დავხუჭოთ იმისთვის, რომ ჩვენი ქვეყნის და ჩვენი შვილების მომავალი იყოს წყნარი, მშვიდობიანი და ყველამ ერთად შევძლოთ ამ ქვეყნის ეკონომიკურად კიდევ უფრო გაძლიერება, ევროპული, დემოკრატიული ქვეყნის ჩამოყალიბება. ასპინძელებო, გამარჯვებას გისურვებთ!

ძალიან ბედნიერი და ამაყი ვარ, რომ დღეს, თქვენს წინაშე ასპინძის მუნიციპალიტეტში, ჩვენი კულტურის გამორჩეულ ადგილას, ვარძიის უნიკალურ და ულამაზეს, ისტორიით სავსე კლდეში ნაკვეთ ქალაქთან ვიმყოფები. ჩვენი გუნდი, „ქართული ოცნება“ დღეს ასპინძის მაჟორიტარობის კანდიდატს წარადგენს. ჩვენი პარტია და მისი წევრები, ერთგული მებრძოლები და მხარდამჭერები კიდევ ერთი გამარჯვებისთვის ვემზადებით. 2020 წლის საპარლამენტო არჩევნებში გამარჯვება ჩვენი ქვეყნის სტაბილური, მშვიდობიანი, დემოკრატიული და სწრაფი ეკონომიკური განვითარებისთვის ძალიან მნიშვნელოვანი და გადამწყვეტი იქნება. ჩვენმა ხალხმა კიდევ ერთხელ უნდა გააკეთოს არჩევანი მზრუნველ, ეფექტურ ხელისუფლებასა და მოძალადე, ავტორიტარულ სახელმწიფოს შორის; არჩევანი უნდა გააკეთოს ხელმისაწვდომ განათლებას, ჯანდაცვას და მხოლოდ მცირე ჯგუფისთვის ხელმისაწვდომ საჯარო სიკეთეებს შორის; არჩევანი უნდა გავაკეთოთ თავისუფალ მეწარმეობასა და დატერორებულ, დარეკეტებულ ბიზნესს შორის; არჩევანი უნდა გავაკეთოთ ადამიანის უფლებების უმაღლეს სტანდარტსა და წამებას შორის, არჩევანი უნდა გავაკეთოთ სახელმწიფოებრივად მოაზროვნე ძალასა და ანტიეროვნულ, ანტისახელმწიფოებრივ, კრიმინალურ ძალებს შორის. დიახ, მიუხედავად იმისა, რომ „ქართული ოცნება“ მომავალზე ორიენტირებული პოლიტიკური ძალაა, ძალა, რომლისთვისაც მთავარი ხალხისა და ქვეყნის წინაშე არსებული გამოწვევების მოგვარებაა, ჩვენ არ უნდა დაგვავიწყდეს წარსული და ყოველთვის ვაკეთებთ შედარებებს, რა იყო, რა მდგომარეობა იყო და სად ვართ დღეს. ასევე, ჩვენ ვსაუბრობთ თუ როგორი გვინდა იყოს ჩვენი ქვეყანა, რა უნდა გავაკეთოთ იმისთვის, რომ მოგვარდეს ჯერ კიდევ არსებული პრობლემები, გამოწვევები. რა თქმა უნდა, ამას სჭირდება ჩვენი ერთად დგომა და ერთიანი ძალისხმევით ყველაფერი არის შესაძლებელი. ჩვენი ყოველდღიური ქმედებებით, ყოველდღიური წინ გადადგმული ნაბიჯებით უნდა შევქმნათ ძალიან ბევრი წარმატების ისტორია, იმისთვის რომ გავაძლიეროთ რაიონები, გავაძლიეროთ სოფლები, გავაძლიეროთ ქალაქები და გავაძლიეროთ ჩვენი ქვეყანა. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ასპინძის მოსახლეობას ახალციხის, ბორჯომის, ადიგენისა და ასპინძის მაჟორიტარი დეპუტატობის კანდიდატი ანტონ ობოლაშვილი წარუდგინეს.

საქართველოს პრემიერ-მინისტრმა გიორგი გახარიამ, „ქართული ოცნების" გენერალურმა მდივანმა კახა კალაძემ, „ქართული ოცნების“ აღმასრულებელმა მდივანმა ირაკლი კობახიძემ და ახალციხე, ადიგენი, ბორჯომი, ასპინძის მაჟორიტარი დეპუტატობის კანდიდატმა ანტონ ობოლაშვილმა ასპინძაში სარაგბო ბაზა დაათვალიერეს. რაგბის ბაზა გათვლილია 100 ადამიანზე, აქვს სტანდარტული და სათადარიგო ბუნებრივსაფარიანი თანამედროვე მოედნები. ბაზაზე შეკრებებზე წვრთნას გადიან საქართველოს სხვადასხვა სარაგბო კლუბების გუნდები, ტარდება საქართველოს პირველი ლიგის ჩემპიონატის მატჩები, ეწყობა საბავშვო ფესტივალები და საზაფხულო ბანაკები, მათ შორის ინკლუზიურიც. ადგილზე თანამედროვე სპორტული ბაზის არსებობამ ხელი შეუწყო მუნიციპალიტეტში რაგბით დაინტერესებას, სპორტული და ჯანსაღი ცხოვრების წესის პოპულარიზაციას. რაგბის ბაზის ტერიტორიაზე „ასპინძის შეზღუდული შესაძლებლობების მქონე პირთა უფლებების დაცვის ცენტრიც“ ფუნქციონირებს, სადაც განვითარების თავისებურების მქონე მოზარდებთან სამუშაოდ, მათთვის ფიზიკური და საკომუნიკაციო უნარების გასაუმჯობესებლად, გამოყენებულია რაგბის ელემენტებზე დაყრდნობით შემუშავებული სპეციალური სპორტული პროგრამა.

მოგესალმებით ჩემო ადიგენელებო, მეგობრებო და მოწვეულო სტუმრებო, მივესალმები პრემიერ-მინისტრს, ბატონ გიორგი გახარიას და ჩვენი გუნდის ლიდერებს! ჩემთვის ძალიან დიდი პატივი და სიამაყეა, ვიყო ადიგენის მუნიციპალიტეტის მაჟორიტარი დეპუტატობის კანდიდატი, ადგილი სადაც დავიბადე და გავიზარდე, სადაც მთელი ბავშვობა და ჩემი საუკეთესო წლები მაქვს გატარებული, რომელიც დატვირთულია საამაყო ემოციებით. ჩემთვის ადიგენი არის მშობლიური ადგილი, ეს არის მხარე, რომელსაც დიდი ისტორია აქვს, მხარე რომელსაც ბევრი ჩვენი ქვეყნის საამაყო მოქალაქე და გმირები გაუზრდია, იყო ადიგენელი და იყო ადიგენის მუნიციპალიტეტის მაჟორიტარი დეპუტატობის კანდიდატი არის საამაყო და ასევე დიდი პასუხისმგებლობა, მე მზად ვარ ამ პასუხისმგებლობისთვის და როგორც ყოველთვის დღესაც მთელი სიამაყით მინდა გითხრათ, რომ მუდმივად ვიქნები ჩემი ადიგენის სამსახურში!!  მე ვარ ადიგენის საპატიო მოქალაქე, ჩემთვის საამაყოა, როდესაც ვამბობ რომ ვარ ადიგენელი და ვარ მესხი!!! მინდა მადლობა გადაგიხადოთ ყველას მობრძანებისთვის და მხარდაჭერის გამოცხადებისთვის, მადლობა „ქართული ოცნების“ პოლიტიკურ გუნდს იმ ნდობისთვის, რაც მე გამომიცხადა. მე ძალიან კარგად ვიცნობ ჩემს ადიგენს და ასევე, კარგად ვიცი თუ რა უნდა გავაკეთოთ რათა შევქმნათ მეტი დოვლათი ჩვენს მუნიციპალიტეტში და ამით თითოეულმა ჩვენგანმა მიიღოს მეტი სიკეთე და სარგებელი. ჩემთვის, რომელიც 22 წლის განმავლობაში ვიყავი ბიზნესით დაკავებული უმთავრესი ამოცანა იქნება გავაძლიეროთ ჩვენი მუნიციპალიტეტის ეკონომიკა და დავასაქმოთ მეტი ადამიანი, შევქმნათ მეტი სამუშაო ადგილი და გვქონდეს მეტი სარგებელი თითოეულ ჩვენგანს. დღეს ჩვენი ხელისუფლების მიერ გამოცხადებულია, რომ ჩვენს ქვეყანაში ყველაზე დიდ ღირებულებას წარმოადგენს ადამიანი, მათზე ზრუნვა და მათი უფლებების დაცვა., დღეს ყველაზე უკეთაა დაცული ჩვენი მოქალაქეების უფლებები, დღეს ყველაზე უკეთაა დაცული ბიზნესი და საკუთრების უფლება. ჩვენმა სახელმწიფომ ყველა ძირითადი მიმართულებით არსებითი პროგრესი განიცადა, რასაც სხვადასხვა სფეროში არსებული ვითარების კარდინალურ გაუმჯობესებასა და მოქალაქეების განწყობასთან ერთად ავტორიტეტული საერთაშორისო რეიტინგებიც ადასტურებს.   გასული წლების განმავლობაში მნიშვნელოვნად გაიზარდა ხელისუფლების მიერ ადიგენის მუნიციპალიტეტში განხორციელებული ინფრასტრუქტურული  პროექტების მოცულობა. მუნიციპალიტეტის ბიუჯეტის ხარჯვითი ნაწილი - 2013 წლის მონაცემებით,  4 მილიონ ლარს შეადგენდა, დღეის მდგომარეობით კი ბიუჯეტი 15 მილიონ ლარს გადასცდა. ჩვენს მუნიციპალიტეტში კარგად ვიყენებთ სოფლის მეურნეობის სამინისტროს და ეკონომიკის სამინისტროს მიერ შემოთავაზებულ პროგრამა-პროექტებს, როგორიცაა „დანერგე მომავალი”, „რძის გადამამუშავებელი კოოპერატივები”, „აწარმოე საქართველოში" და სხვა, რომელთა ძალისხმევით იქმნება ახალი სამუშაო ადგილები. აუცილებელია ამ პროგრამების გაგრძელება, რაც კიდევ უფრო მეტ სიკეთეს მოუტანს ჩვენს მუნიციპალიტეტს. ასევე გაგრძელდება მიკრო და მცირე მეწარმეობის მხარდამჭერი პროგრამები.  ვიყოთ ადიგენში და არ ვახსენოთ კურორტ აბასთუმნის რეაბილიტაციის პროექტი არ შეიძლება, ამჟამად იგი კვლავ განხორციელების ფაზაშია. შესაბამისი საკურორტო და ტურისტული ინფრასტრუქტურის რეაბილიტაციის პროექტის ფარგლებში განსაზღვრულია აბასთუმნის მიწისქვეშა კომუნიკაციის სრული რეაბილიტაციის სამუშაოების განხორციელება. გარდა ამისა, ტურისტული ინფრასტრუქტურის განვითარებისა და ტურისტული პოტენციალის მაქსიმალური ამაღლების მიზნით, მუნიციპალიტეტში დაგეგმილია სხვადასხვა ისტორიულ-კულტურული ძეგლების რეაბილიტაცია,  რაც მოგვცემს საშუალებას, მოვიზიდოთ კიდევ უფრო მეტი ტურისტი.  აბასთუმანზე ზრუნვისთვის განსაკუთრებული მადლობა მინდა გადავუხადო ბატონ ბიძინა ივანიშვილს, მის მიერ განხორციელებული ქველმოქმედება აბასთუმანს მსოფლიოში გამორჩეულ და ერთ-ერთ ყველაზე მიმზიდველ ადგილად აქცევს. რა თქმა უნდა, კარგად გვესმის, რომ, მიუხედავად დიდი პროგრესისა, კიდევ უფრო მეტი უნდა ვიშრომოთ, რათა ჩვენს წინაშე არსებული გამოწვევები დავძლიოთ. ამისთვის აუცილებელია მოსახლეობის ჩართულობით, აქტიურად ვიზრუნოთ ჩვენს წინაშე არსებული პრობლემების მოგვარებაზე,  ჩემი უპირველესი ამოცანა იქნება დავიცვა და გავატარო თითოეული თქვენგანის ინტერესები, ვიყო თქვენი ღირსეული წარმომადგენელი ჩვენი ქვეყნის უმაღლეს საკანონმდებლო ორგანოში. ვთვლი, რომ მაქვს გამოცდილება,  და ძალა იმისა, რომ ჩემი რეგიონის კიდევ უფრო მეტ განვითარებას ხელი შევუწყო. ჩვენ ერთად გავაძლიერებთ ჩვენს მუნიციპალიტეტს და ხელს შევუწყობთ ჩვენი მოსახლეობის დასაქმებას და კეთილდღეობას.  დარწმუნებული ვარ, ერთად დგომით, სამშობლოს სიყვარულით აუცილებლად გავიმარჯვებთ და მომდევნო წლების განმავლობაში უამრავ წარმატებას მივაღწევთ.  ერთად ადიგენის წარმატებისთვის! ერთად საქართველოს წარმატებისთვის!

მოგესალმებით მესხებო, მოგესალმებით აჭარლებო, მოგესალმებით ადიგენელებო! საერთოდ, ეს ძალზედ მნიშვნელოვანი მუნიციპალიტეტი იყო ყოველთვის და გახდება კიდევ უფრო, იმიტომ რომ უამრავი ინფრასტრუქტურული პროექტი ხორციელდება აქ, ძალიან მნიშვნელოვანი ინფრასტრუქტურული პროექტები. ადიგენი სულ მალე გახდება გზაჯვარედინების ცენტრი. მოგეხსენებათ, რომ ხულო-ზარზმის გზა როგორც იქნა დაიწყო და მალე ბოლოში გავიყვანთ, ისევე როგორც ბაღდათი-აბასთუმნის გზა დააკავშირებს ადიგენს ქუთაისის აეროპორტთან საათ-ნახევრით უფრო მოკლე დროში. ეს ყველაფერი კეთდება ჩვენი მოქალაქეებისთვის, ჩვენი მოსახლეობისთვის, იმისთვის, რომ საქართველოს ერთიანობის სიმბოლო - ზარზმა, პირველ რიგში რაც შეიძლება ბევრმა ქართველმა და ჩვენი ქვეყნის ბევრმა სტუმარმა ნახოს. ზარზმა - ადიგენის და ზოგადად საქართველოს ერთ-ერთი ყველაზე მნიშვნელოვანი ძეგლი, ქართველობის, ქართულისა და ერთიანი, ძლიერი საქართველოს სიმბოლო, უნდა იყოს ადვილად მისასვლელი და ამ ქვეყნის ყურადღების ცენტრში. გარდა ამისა, მოგეხსენებათ ის, რაც ხდება აბასთუმანში, - აბასთუმანი სულ მალე იქნება მსოფლიოს ერთ-ერთი საუკეთესო ბალნეოლოგიური კურორტი, ეს იქნება საერთაშორისო დონის, საერთაშორისო მასშტაბის კურორტი, რომელიც კიდევ უფრო ცნობადს გახდის ადიგენს, საქართველოს და მთლიანად სამცხე-ჯავახეთს. ეს ყველაფერი ჩვენ უნდა გავაკეთოთ ერთად, მაგრამ ამაზე რომ ვსაუბრობთ, ყველას კარგად გვესმის, რომ მიმდინარე ინფრასტრუქტურული პრობლემები გვაქვს, რომელებიც ნელ-ნელა უნდა გადავლახოთ, ყველამ ერთად უნდა ვიმუშაოთ ამისთვის. მე ერთ ციფრს მოგიყვანთ - 2012 წლის შემდეგ სამცხე-ჯავახეთში ინფრასტრუქტურულ პროექტებში სულ ინვესტირებულია დაახლოებით 512 მილიონი ლარი. როდესაც „ქართული ოცნება“ დამაჯერებლად გაიმარჯვებს ამ არჩევნებში, შემდგომი საარჩევნო 4-წლიანი ციკლის განმავლობაში სისტემურ ინფრასტრუქტურულ პროექტებში ინვესტირებული იქნება მინიმუმ 20 მილიარდი ლარი. სასმელი წყალი, რომელიც ადიგენში რამდენი წელია უკვე პრობლემაა, სულ რაღაც ერთ თვეში დასრულდება და 24-საათიანი წყალმომარაგება გექნებათ, მაგრამ 24-საათიან წყალმომარაგებას უნდა მოჰყვეს წყალარინება. წყალმომარაგება ნორმალური უნდა იყოს სოფლებში ისევე, როგორც სარწყავი წყალი არ უნდა იყოს პრობლემა. მაგისტრალური გზები ნორმალურ მდგომარეობაში გვაქვს, მაგრამ შიდა სოფლის და ქალაქებს შორის გზები წესრიგშია მოსაყვანი. ეს ყველაფერი არის სისტემური, ელემენტარული ინფრასტრუქტურა, რომელიც ნორმალურ ევროპულ ქვეყნებში კარგა ხანია მოწესრიგებული აქვთ, მაგრამ კიდევ დაგვჭირდება რაღაც დრო ერთად შრომით, რომ ეს ყველაფერი მოვიყვანოთ წესრიგში. ეს სისტემური ინფრასტრუქტურა ჩვენს მოქალაქეებს აძლევს შესაძლებლობას, მიუხედავად იმისა, სად ცხოვრობენ ისინი, თბილისში, ადიგენში, ბათუმში, რუსთავში, ქუთაისში ერთ დონეზე შეეძლოთ ცხოვრება. ამიტომ, ჩვენ ეს ყველაფერი უნდა გავაკეთოთ ერთად. ბოლო 8 წლის განმავლობაში თქვენ ყველამ კარგად ნახეთ. ჩვენ არ ვართ მომხრე პოპულიზმის და ბევრი ლაპარაკის, ყველაზე მნიშვნელოვანი არის საქმე. ამ საქმესაც ბევრი პიარი და რეკლამა არ სჭირდება. იმიტომ, რომ ადამიანები ამას თვითონ ხედავენ. ეს არის ჩვენი ყველაზე ძლიერი მხარე. ჩვენ, ამ არჩევნების დროსაც, არანაირ პოპულისტურ დაპირებას არ ვიძლევით. გვაქვს კონკრეტული გეგმა, კონკრეტული ნაბიჯებით და კონკრეტული მიზნებით. მიზანი, როგორც იცით, ყველაზე მნიშვნელოვანია, რომ იყოს გაზომვადი. ჩვენი თითოეული მიზანი არის გაზომვადი და არა ფუჭი დაპირება. ამიტომ, იმ მხარდაჭერით, რომელიც საბედნიეროდ, ჩვენ, ჩვენი მოქალაქეების მხრიდან გვაქვს, წყნარად, მშვიდად, აბსოლუტურად მშვიდ გარემოში უნდა მივიდეთ არჩევნებამდე, არ უნდა წამოვეგოთ არანაირ პროვოკაციას, არავის უნდა მივცეთ შესაძლებლობა, რომ ჩვენი ღირსეული და სამართლიანი გამარჯვება რაიმე რისკის, ან კითხვის ნიშნის ქვეშ დააყენონ. ამიტომ, არ უნდა წამოვეგოთ არანაირ პროვოკაციებს, უნდა გავიმარჯვოთ ღირსეულად, სამართლიან ბრძოლაში. გამარჯვებას გისურვებთ!

ძალიან მიხარია, რომ დღეს, ადიგენის მუნიციპალიტეტში ვიმყოფები და „ქართული ოცნების“ ერთიანი გუნდი მომავალი საპარლამენტო არჩევნებისთვის მაჟორიტარობის კანდიდატს წარმოგიდგენთ. რა თქმა უნდა, როდესაც ჩვენ ადიგენის მუნიციპალიტეტში ვიმყოფებით, არ შემიძლია, არ ვისაუბრო აბასთუმანზე, სადაც ბატონი ბიძინა ივანიშვილის მხარდაჭერითა და სახელმწიფოს ძალისხმევით მსოფლიოში ერთ-ერთი საუკეთესო საკურორტო ცენტრი კეთდება. „ქართული ოცნება“ ხელისუფლებაში, თქვენთან ერთად, ერთობლივი ბრძოლით მოვიდა, როდესაც ქვეყანას მოძალადე რეჟიმი ჩამოვაშორეთ და ქვეყნის განვითარება დავიწყეთ, სწორ რელსებზე დავაყენეთ. ადიგენის მუნიციპალიტეტი, კონკრეტულად კი აბასთუმანი, წლების მანძილზე მიტოვებული იყო და ყურადღება არ ექცეოდა, თუმცა „ქართული ოცნების” ხელისუფლების პირობებში, რეგიონში ბევრი ინფრასტრუქტურული პროექტი განხორციელდა, დაინერგა და ამოქმედდა უამრავი სახელმწიფო პროგრამა, რომელიც მოქალაქეების საჭიროებებსა და გამოწვევებზეა მორგებული. თუმცა, ამასთან ერთად, რეგიონში გარდამტეხ მომენტად იქცა ბიძინა ივანიშვილის ინიციატივა, აბასთუმანს აღორძინებასთან დაკავშირებით. მისი ინიციატივით, დაბა აბასთუმანში უამრავი ინფრასტრუქტურული პროექტი ხორციელდება, მიმდინარეობს კულტურულ-ისტორიული ძეგლების აღდგენა, მათ შორის რომანოვების სასახლის და, რაც მთავარია, უახლოეს მომავალში განხორციელებული ინვესტიციები, რომელიც თავისი არსით ასევე საქველმოქმედოა, რეგიონს მსოფლიოში ერთ-ერთ ყველაზე მიმზიდველს და საინტერესოს გახდის. ბიძინა ივანიშვილის ქველმოქმედება, ერთი მხრივ, აზღვევს და ეხმარება სახელმწიფოს, მეორე მხრივ კი, კერძო სექტორისა და ბიზნესისთვის ყინულმჭრელის როლს ასრულებს, რაც რეგიონში დამატებითი ინვესტიციების შემოსვლასა და დამატებითი სამუშაო ადგილების გაჩენას უზრუნველყოფს. რეგიონისა და თითოეული ოჯახის ეკონომიკურად გაძლიერებასთან ერთად, უმნიშვნელოვანესი საკითხია ეკოლოგია, რისთვისაც ასევე ჩვენი პარტიის თავმჯდომარის ინიციატივით, უახლოეს მომავალში, ელექტრომობილების შემოყვანა იგეგმება და აბასთუმანს ტერიტორიაზე მხოლოდ ეკოლოგიურად სუფთა ტრანსპორტი გადაადგილდება, რათა უნიკალური ბუნება და ჯანსაღი გარემო მაქსიმალურად შევინარჩუნოთ. დარწმუნებული ვარ, მუნიციპალიტეტის წინაშე არსებულ გამოწვევებს ერთად გადავლახავთ და ამ საქმეში თითოეული თქვენგანის როლი არის ძალიან მნიშვნელოვანი. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ადიგენის მოსახლეობას მაჟორიტარი დეპუტატობის კანდიდატი ანტონ ობოლაშვილი წარუდგინეს.

საქართველოს პრემიერ-მინისტრი გიორგი გახარია, „ქართული ოცნების" გენერალური მდივანი კახა კალაძე, “ქართული ოცნების” აღმასრულებელი მდივანი ირაკლი კობახიძე და ახალციხე-ადიგენი-ბორჯომი-ასპინძის მაჟორიტარი დეპუტატობის კანდიდატი ანტონ ობოლაშვილი ადიგენის მუნიციპალიტეტის სოფელ ბენარაში იმყოფებოდნენ, სადაც სკოლის მშენებლობის პროცესს გაეცნენ. სოფელ ბენარაში, ახალი საჯარო სკოლის მშენებლობა აქტიურად მიმდინარეობს. 150 მოსწავლეზე გათვლილი სკოლა თანამედროვე სტანდარტების გათვალისწინებით შენდება, მოეწყობა შიდა და გარე სივრცეები, რეკრეაციული ზონები, ღია სპორტული მოედანი, ბიბლიოთეკა წიგნსაცავით, ლაბორატორია, ექიმის კაბინეტი. შენობა სრულად ადაპტირებული იქნება შეზღუდული შესაძლებლობების მქონე პირთათვის. სკოლის მშენებლობა 2021 წლის თებერვალში დასრულდება.

მოგესალმებით ჩემო ახალციხელებო, მეგობრებო და მოწვეულო სტუმრებო, მივესალმები პრემიერ-მინისტრს, ბატონ გიორგი გახარიას და ჩვენი გუნდის ლიდერებს! ჩემთვის ძალიან დიდი პატივი და სიამაყეა, ვიყო ახალციხის მუნიციპალიტეტის მაჟორიტარი დეპუტატობის კანდიდატი, ქალაქის სადაც გავიზარდე და მივიღე განათლება , ქალაქის სადაც  მთელი ბავშვობა და ჩემი საუკეთესო წლები მაქვს გატარებული,  რომელიც დატვირთულია საამაყო ემოციებით. ჩემთვის ახალციხე, რომელიც იყო და არის ცენტრი ისტორიული მესხეთისა, აკვანი საქართველოს დიდებისა არის მშობლიური ქალაქი, ეს არის ქალაქი, რომელსაც დიდი ისტორია აქვს, ქალაქი რომელსაც ბევრი ჩვენი ქვეყნის საამაყო მოქალაქე და გმირები გაუზრდია, იყო ახალციხელი და იყო ამ ქალაქის მუნიციპალიტეტის მაჟორიტარი დეპუტატობის კანდიდატი არის დიდი პასუხისმგებლობა, მე მზად ვარ ამ პასუხისმგებლობისთვის და როგორც ყოველთვის დღესაც მთელი სიამაყით მინდა გითხრათ, რომ მუდმივად ვიქნები ჩემი ქალაქის და მუნიციპალიტეტის სამსახურში!!  ჩემთვის საამაყოა, როდესაც ვამბობ რომ ვარ ახალციხელი და ვარ მესხი!!! მინდა მადლობა გადაგიხადოთ ყველას მობრძანებისთვის და მხარდაჭერის გამოცხადებისთვის, მადლობა „ქართული ოცნების“ პოლიტიკურ გუნდს იმ ნდობისთვის, რაც მე გამომიცხადა, მე ძალიან კარგად ვიცნობ ჩემს ქალაქს და ჩემს მუნიციპალიტეტს და ასევე კარგად ვიცი თუ რა უნდა გავაკეთოთ რათა შევქმნათ მეტი დოვლათი ჩვენს მუნიციპალიტეტში და ამით თითოეულმა ჩვენგანმა მიიღოს მეტი სიკეთე და სარგებელი. ჩემთვის, რომელიც 22 წლის განმავლობაში ვიყავი ბიზნესით დაკავებული უმთავრესი ამოცანა იქნება გავაძლიეროთ ჩვენი მუნიციპალიტეტის ეკონომიკა და დავასაქმოთ მეტი ადამიანი, შევქმნათ მეტი სამუშაო ადგილი და გვქონდეს მეტი სარგებელი თითოეულ ჩვენგანს..   დღეს ჩვენი ხელისუფლების მიერ  გამოცხადებულია, რომ ჩვენს ქვეყანაში ყველაზე დიდ ღირებულებას წარმოადგენს ადამიანი, მათზე ზრუნვა და მათი უფლებების დაცვა., დღეს ყველაზე უკეთაა დაცული ჩვენი მოქალაქეების უფლებები, დღეს ყველაზე უკეთაა დაცული ბიზნესი და საკუთრების უფლება. ჩვენმა სახელმწიფომ ყველა ძირითადი მიმართულებით არსებითი პროგრესი განიცადა, რასაც სხვადასხვა სფეროში არსებული ვითარების კარდინალურ გაუმჯობესებასა და მოქალაქეების განწყობებთან ერთად ავტორიტეტული საერთაშორისო რეიტინგებიც ადასტურებს.   გასული წლების განმავლობაში მნიშვნელოვნად გაიზარდა ხელისუფლების მიერ ახალციხის მუნიციპალიტეტში განხორციელებული ინფრასტრუქტურული  პროექტების მოცულობა. მუნიციპალიტეტის ბიუჯეტის ხარჯვითი ნაწილი - 2013 წლის მონაცემებით, 10 მილიონ ლარს შეადგენდა, დღეის მდგომარეობით კი ბიუჯეტი 29 მილიონ ლარს გადასცდა. ჩვენს მუნიციპალიტეტში კარგად ვიყენებთ სოფლის მეურნეობის სამინისტროს და ეკონომიკის სამინისტროს მიერ შემოთავაზებულ პროგრამა-პროექტებს, როგორიცაა „დანერგე მომავალი”, „რძის გადამამუშავებელი კოოპერატივები” , „აწარმოე საქართველოში" და სხვა, რომელთა ძალისხმევით იქმნება ახალი სამუშაო ადგილები. აუცილებელია, ამ პროგრამების გაგრძელება, რაც კიდევ უფრო მეტ სიკეთეს მოუტანს ჩვენს მუნიციპალიტეტს. 2013-2019 წლებში ახალციხის მუნიციპალიტეტში 4422 ოჯახს მიეცა ბუნებრივი გაზის მიწოდების ქსელში ჩართვის საშუალება. მიმდინარეობს მუნიციპალიტეტის დანარჩენ სოფლებში გაზიფიცირებისათვის საჭირო საპროექტო-სამშენებლო სამუშოები, რომელიც უახლოეს მომავალში დასრულდება და მუნიციპალიტეტი იქნება სრულად გაზიფიცირებული. მსგავსი მშენებლობა რომელიც ბოლო წლებში ახალციხის მუნიციპალიტეტში ხორციელდება დიდი ხანია ჩვენს მხარეს არ ახსოვს, ჩვენს მუნიციპალიტეტს ტურისტული განვითარების უდიდესი პოტენციალი აქვს და მისი მაქსიმალური ათვისების მიზნით, დაგეგმილია და უკვე მიმდინარეობს შემდეგი პროექტები: აწყურის ღვთისმშობლის ტაძრის, აწყურის ციხის, თისელის წმინდა გიორგის გუმბათოვანი ტაძრის, თისელის ღვთისმშობლის ტაძრის, ბიეთის ღვთისმშობლის ტაძრის რეაბილიტაცია დ სხვა. 2013-2019 წლებში განხორციელდა უამრავი ინფრასტრუქტურული პროექტი, მხოლოდ ადგილობრივი მნიშვნელობის გზების სარეაბილიტაციოდ და მშენებლობისათვის  დახარჯული იქნა 28  მლნ. ლარზე მეტი. შემდეგი წლები კი დაეთმობა სისტემური ინფრასტრუქტურის სრულად კეთილმოწყობას. მე ყველა განხორციელებული პროექტის ჩამოთვლას აღარ გავაგრძელებ, თუმცა ცხადია, რომ „ქართული ოცნების“ სახელისუფლებო გუნდი განვითარების სწორ გზას ადგას, აქვს მომავლის ხედვა, უნარი, რომ საკუთარ მოქალაქეზე, საკუთარ ქვეყანაზე იზრუნოს და ეტაპობრივად ყველა გამოწვევას გაუმკლავდეს. ისიც ფაქტია რომ ჯერ კიდევ ბევრია გამოწვევა, რომელთა გადასჭრელად ერთობლივად უნდა ვიმუშაოთ. ჩემთვის რეგიონში მიმდინარე პროექტები და არსებული პრობლემები კარგად არის ცნობილი და თქვენი მხარდაჭერით, უკვე საქართველოს პარლამენტიდან ვიზრუნებ ჩვენთვის უსაყვარლეს ახალციხეზე და ახალციხელებზე. ჩემი უპირველესი ამოცანა იქნება დავიცვა და გავატარო თითოეული თქვენგანის ინტერესები, ვიყო თქვენი საამაყო წარმომადგენელი ჩვენი ქვეყნის უმაღლეს საკანონმდებლო ორგანოში. ვთვლი, რომ მაქვს გამოცდილება და ძალა იმისა, რომ ჩვენი რეგიონის კიდევ უფრო მეტ განვითარებას ხელი შევუწყო. ჩვენ ერთად გავაძლიერებთ ჩვენს მუნიციპალიტეტს და ხელს შევუწყობთ ჩვენი მოსახლეობის დასაქმებას და კეთილდღეობას.  დარწმუნებული ვარ, ერთად დგომით, სამშობლოს სიყვარულით აუცილებლად გავიმარჯვებთ და მომდევნო წლების განმავლობაში უამრავ წარმატებას მივაღწევთ.  ერთად ახალციხის წარმატებისთვის!  ერთად საქართველოს წარმატებისთვის!

მიხარია, რომ დღეს ჩვენ ვიმყოფებით გამორჩეულ ქალაქში, გამორჩეულ რეგიონში , რომელსაც საქართველოს ისტორიაში განსაკუთრებული როლი აქვს შესრულებული , რომელსაც განსაკუთრებული წვლილი აქვს შეტანილი ქართული გენის განვითარებაში, საქართველოში ქრისტიანობის გავრცელებასა და დამკვიდრებაში. ეს არის რეგიონი, სადაც ცხოვრობენ გამორჩეულად მებრძოლი და მშრომელი ადამიანები. შესაბამისად, ამ რეგიონს სჭირდება განსაკუთრებული ყურადღება. ძალიან ბევრი რამ უნდა გაკეთდეს და ეს მხარდაჭერა, ეს ყურადღება  კონკრეტულ ქმედებაში უნდა გამოიხატოს იმისათვის, რომ რეგიონი იყოს კიდევ უფრო მეტად განვითარებული , ვიდრე არის დღეს. ჩვენ გვაქვს კონკრეტული ხედვა, კონკრეტული პროგრამა და ეს გამოგვარჩევს სხვა  პოლიტიკური პარტიებისგან. ჩვენ გვაქვს პროგრამა, რომელიც ითვალისწინებს ქვეყნის განვითარებას,  თითოეული რეგიონის და თითოეული მუნიციპალიტეტის განვითარებას.  გასული წლების განმავლობაში ძალიან ბევრი რამ გაკეთდა იმისათვის, რომ წინ წაწეულიყო როგორც ქვეყანა, ასევე თითოეული რეგიონი  ინფრასტრუქტურის კუთხით, სოფლის მეურნეობის კუთხით  თუ ტურიზმის თვალსაზრისით.  ყველას გვესმის, ბევრად მეტია გასაკეთებელი იმისათვის, რომ ჩვენ საბოლოოდ ვიხილოთ ძლიერი ქალაქები, ძლიერი რეგიონები და ამისთვის მომდევნო 4 წლის განმავლობაში ყველაფერი გაკეთდება. ამის გარანტია პირველ რიგში ძლიერი გუნდია, რომელიც  ჩვენ გამოგვარჩევს ამ არჩევნებში . ჩვენ ვართ წარმოდგენილი ძალიან ძლიერი საპარლამენტო გუნდით და ამ სიის სათავეში დგას  მთავრობის მეთაური, პრემიერ - მინისტრი  გიორგი გახარია, რომელმაც განსაკუთრებით ამ რთულ პერიოდში, პანდემიის დროს მთელს მსოფლიოს აჩვენა მართვის საუკეთესო მაგალითი და რა თქმა უნდა, ის არის საუკეთესო გარანტია იმისა, რომ მთავრობა ძალიან მალე შეძლებს იმ პრობლემების დაძლევას, რომელიც პანდემიიდან გამომდინარეობს და უზრუნველყოფს ჩვენი ქვეყნის სწრაფ განვითარებას, რაც მთავარია სწრაფ ეკონომიკურ განვითარებას  იმიტომ, რომ პირველ რიგში ჩვენს მოსახლეობას აწუხებს ეკონომიკური და სოციალური საკითხები. ამ კუთხით, კიდევ ერთხელ გავიმეორებ,  ჩვენ გვაქვს ძალიან მკაფიო ხედვა , ძალიან მკაფიო პროგრამა და სწორედ ამ პროგრამის შესაბამისად გაგრძელდება ჩვენი ქვეყნის განვითარება. ჩვენ ასევე წარვადგინეთ ძალიან ძლიერი საპარლამენტო გუნდი  როგორც გამოცდილი წევრებით, ასევე ახალი სახეებით და ესეც არის საუკეთესო გარანტია იმისა, რომ ჩვენ გვექნება ბევრად უფრო ძლიერი პარლამენტი , ვიდრე იყო თუნდაც გასული 4 წლის განმავლობაში და ჩვენ გვეყოლება ძალიან ძლიერი მაჟორიტარი თქვენი რეგიონიდან , რომელიც იქნება საუკეთესო შუამავალი რეგიონსა და ცენტრალურ ხელისუფლებას შორის. ეს არის სწორედ მაჟორიტარის მთავარი ფუნქცია. ჩვენ დარწმუნებულნი ვართ, რომ ბატონი ანტონის ძალისხმევით უამრავი საკითხი მოგვარდება, რომელიც აწუხებს ამ რეგიონს და რეგიონის მოსახლეობას. შესაბამისად, ყველა წინაპირობა არსებობს იმისთვის , რომ შემდეგი 4 წლის განმავლობაში გაგრძელდეს ჩვენი ქვეყნის განვითარება. მთავარია, ჩვენი სრული მობილიზაცია , თითოეული ჩვენგანის აქტიურობა იმისათვის , რომ 31 ოქტომბერს ყველამ ერთად ვიზეიმოთ გამარჯვება.

დიდი პატივია დღეს აქ, საქართველოს, ქართული იდენტობის და ქართული კულტურის აკვანში, თქვენთან ერთად საუბარი ქვეყნის მომავალზე. ეს პასუხისმგებლობა ჩვენ ყველას კარგად გვესმის და ყველა ვმუშაობთ, ვშრომობთ იმისთვის, რომ ვიზრუნოთ ხვალინდელ დღეზე. სამცხე ყოველთვის იყო ქვეყნის სიძლიერის საფუძველი, ქვეყნის ის კუთხე, რომელსაც დღეს განსაკუთრებული მოვლა სჭირდება. ამიტომ, როდესაც ვსაუბრობთ ხვალინდელ დღეზე, ყველას უნდა გვახსოვდეს, რომ ის მრავალეთნიკურობა, რომელიც დღეს აქ არის, არის ჩვენი სიძლიერის გარანტი. ყველამ ერთად უნდა ვიშრომოთ და ვიბრძოლოთ იმისთვის, რომ ჩვენი სამშობლო ხვალ იყოს უკვე უფრო ძლიერი, ვიდრე დღეს არის და ამას უნდა მივაღწიოთ ერთობლივი შრომით. დღეს, მსოფლიოში გლობალური გამოწვევებია, გლობალური ეკონომიკური კრიზისია, არის პანდემია, ბევრი პროცესი გაჩერდა, მათ შორის ტურიზმის მიმართულებით, ეკონომიკური კრიზისი რეალობაა, სამუშაო ადგილებს ვკარგავთ ჩვენც და ბევრი ქვეყანა მსოფლიოშიც. ქვეყანაში არის გამოწვევები, რომლის მოგვარებისთვის არც ერთი დღე არ უნდა გავჩერდეთ და ამის მაგალითია ის სისტემური ინფრასტრუქტურული პროექტები, რომლებიც პანდემიის მიუხედავად ყოველდღე გრძელდებოდა და არც ერთი დღე არ გაჩერებულა. ახალციხის, ვალეს სისტემური პრობლემაა წყალმომარაგება, კანალიზაცია, ამ კუთხით მუშაობა არც ერთი დღე არ გაჩერებულა და უახლოეს პერიოდში დასრულდება, რაც არასდროს ყოფილა, 24-საათიანი წყალმომარაგებაც და კანალიზაციაც იქნება. ასევე, არასოდეს ყოფილა ისეთი დონის და ისეთი სისწრაფის რეკონსტრუქცია გზაზე, როგორიც არის ახალციხე-ნინოწმინდა. ერთი ლოტი დამთავრდა, მეორე ლოტი გაგრძელდება, ეს ყველაფერი კეთდება იმისთვის, რომ ჩვენ ნორმალურ ქვეყანაში ვიცხოვროთ და ნორმალურ ქვეყანაში გავზარდოთ ჩვენი შვილები. ყველაფერი უნდა გავაკეთოთ, რომ სხვაობა არ იყოს, ადამიანი, ახალგაზრდა ცხოვრობს ახალციხეში, ახალქალაქში, ვალეში, თბილისში, ბათუმში, ქუთაისსა თუ რუსთავში, თანაბარი პირობები უნდა იყოს ყველასთვის და ამისთვის ვატარებთ ჩვენ ისეთ სისტემურ რეფორმებს, როგორიც არის განათლების რეფორმა, როგორიც არის სოციალური დახმარების რეფორმა. ეს ყველაფერი კეთდება იმისთვის, რომ საქართველოს ნებისმიერ კუთხეში ჩვენს თითოეულ მოქალაქეს ჰქონდეს შესაძლებლობა, იშრომოს ღირსეულად და ღირსეულად არჩინოს თავისი ოჯახი. მინდა, ახალციხელებს მადლობა გითხრათ. ახალციხელები აქტიურად მონაწილეობენ სახელმწიფო მხარდაჭერის ისეთ პროგრამებში, როგორიც აქვს „აწარმოე საქართველოში“ და სოფლის მეურნეობის სამინისტროს. ახალციხე ერთ-ერთი გამორჩეული მუნიციპალიტეტია, სადაც ამ სახელმწიფო პროგრამებით სარგებლობენ, რაც კარგია, რადგან ეს ხელს უწყობს ქართველ გლეხს, გახდეს ძლიერი ფერმერი. ეს უნდა გაგრძელდეს. ჩვენ ყოველთვის ვამბობდით - საქართველოს მოქალაქის, გლეხის გვერდით ვიქნებით ყოველთვის, ვინც რა შეფასება არ უნდა მისცეს ამას და რასაც ყოველთვის ვაკეთებდით, იმას გავაგრძელებთ, რათა ადამიანს დავუდგეთ გვერდით. ამიტომ, ჩვენ დავიწყეთ ახალი პროგრამა - „სახელმწიფო - შენი პარტნიორი“ და თუ ადრე ამ პროგრამებში მონაწილეობისთვის საჭირო იყო თბილისში ჩასვლა, იმავე ინფორმაციას, იმავე მხარდაჭერას დღეს თქვენს ქალაქებში მიიღებთ, იქნება ეს საზოგადოებრივი ცენტრი თუ იუსტიციის სახლი. ამ ყველაფერს ჩვენ ვაკეთებთ იმისთვის, რომ ჩვენი დღევანდელი დღე იყოს უკეთესი, ვიდრე იყო გუშინ და ხვალინდელი დღე გავხადოთ კიდევ უფრო უკეთესი. ამისთვის გვჭირდება, წყნარად, მშვიდად, ყველანაირი გართულებების და პროვოკაციების გარეშე 31 ოქტომბერს მივიდეთ და ღირსეულად გავიმარჯვოთ. ყველას კარგად უნდა გვახსოვდეს, რომ „ქართული ოცნება“ არ არის ის ძალა, რომელიც რაიმე პოპულისტურ დაპირებას გასცემს. ჩვენ ვაკეთებთ იმას, რასაც ვპირდებით ჩვენს მოქალაქეებს. ჩვენ თითოეული დღე გაწერილი გვაქვს პროგრამის შესაბამისად და მინდა ახლავე გითხრათ, რომ მომავალი 4 წლის განმავლობაში, იმ ინფრასტრუქტურულ პროექტებში, რომელზეც ჩვენ უკვე ვსაუბრობთ, დამატებით ინვესტირებული იქნება ჯამში მინიმუმ 20 მილიარდი ლარი. ეს ის კონკრეტული პროგრამები და პროექტებია, რომელიც ჩვენ უკვე განხილული გვაქვს და ვიცით, სად გზა უნდა გავიდეს, სად წყალმომარაგების სისტემის რეაბილიტაცია უნდა მოხდეს, სად სასმელი წყალი უნდა იყოს, სად საირიგაციო სისტემა უნდა განახლდეს და ა.შ მაგრამ ეს ყველაფერი ჩვენ უნდა გავაკეთოთ ერთად. რამდენიმე ხნის წინ ჩვენ ახალციხელებთან ერთად ვმსჯელობდით და ახალციხეში უახლოეს დროში აუცილებლად იქნება ბექა ჯაყელის ქუჩაც და გიორგი ბრწყინვალეს ძეგლიც. ეს თითოეული ჩვენგანის ის ვალდებულებაა, რომელიც ჩვენი დიდი წინაპრების წინაშე უნდა შევასრულოთ. გამარჯვებას გისურვებთ, ახალციხელებო!

ჩემთვის დიდი პატივია მშრომელი, პატრიოტი, საკუთარ ქალაქსა და კუთხეზე შეყვარებული ხალხის წინაშე წარვდგე ამ ქალაქში, რომელიც ისტორიული სამცხის ცენტრი და სამხრეთ საქართველოს ერთ-ერთი გამორჩეული მარგალიტია. აქ არსებული ციხის კედლები უამრავ საგმირო საქმეს, ვაჟკაცობის, სიყვარულისა და საკუთარი სამშობლოსთვის თავგანწირვის ძალიან ბევრ ისტორიას ინახავს. ამ ადგილებში ადამიანები ჯერ კიდევ ადრეული ბრინჯაოს ხანაში სახლობდა, თქვენი ქალაქი კი საუკუნეების მანძილზე საქართველოსთვის უდიდესი პოლიტიკური თუ ეკონომიკური მნიშვნელობის ცენტრს წარმოადგენდა. ახალციხე განსხვავებული ეთნიკური თუ რელიგიური ჯგუფების მშვიდობიანი თანაცხოვრების ერთ-ერთი უნიკალური მაგალითია, რისი განმაპირობებელიც საკუთარი სამშობლოს სიყვარული და მასზე ზრუნვაა. დღესაც გვხვდება ამ ქალაქში ისტორიული მეჩეთი, სინაგოგა, თუ ეკლესია, რომელიც ამ ქალაქს ალამაზებს და გასაკუთრებულ ხიბლს, ისტორიულ და კულტურულ დანიშნულებას სძენს. რა თქმა უნდა, უდიდეს ისტორიულ ღირებულებასთან ერთად, არ უნდა დაგვავიწყდეს, რომ ეს ადგილები უნიკალური მინერალური და სამკურნალო წყლებით არის ცნობილი, რომელიც გამორჩეულ ბალნეოლოგიურ კურორტს ქმნის, რომლის არ გამოყენებაც კატეგორიულად მიუღებელია. ამ მიმართულებით 2012 წლის შემდეგ, რაც ხელისუფლებაში "ქართული ოცნება" მოვიდა, ვითარება მკვეთრად გაუმჯობესდა. განვლილი 8 წლის განმავლობაში, მუნიციპალიტეტში განხორციელდა უამრავი ინფრასტრუქტურული, ეკონომიკური თუ სოციალური პროექტი, რომელიც ადგილობრივი მოსახლეობის კეთილდღეობის ხარისხის ზრდაზე პირდაპირ გავლენას ახდენს. ახალციხეში, ისევე, როგორც მთელ საქართველოში სოფლის მეურნეობისა და ტურიზმის განვითარებისთვის უამრავი პროგრამა მოქმედებს, რომელიც სახელმწიფოსა და კერძო სექტორის უნიკალური თანამშრომლობის მაგალითს, განვითარებულ ბიზნესსა და წარმოებას, ახალ სამუშაო ადგილებსა და მუნიციპალიტეტში დამატებით შემოსავლებს ქმნის. რა თქმა უნდა, ჩვენ კარგად გვესმის, რომ წინ ჯერ კიდევ ბევრია სამუშაო, ბევრი პრობლემაა, გამოწვევები, რომელსაც სჭირდება 24-საათიანი მუშაობა. ამ ყველაფერს მხოლოდ ადგილობრივი და ცენტრალური ხელისუფლება ვერ გააკეთებს. აქაც მნიშვნელოვანია ჩვენი ერთობა. ჩვენ, ჩვენი ყოველდღიური მუშაობით და ქმედებებით უნდა შევქმნათ პატარ-პატარა წარმატების ისტორიები. ერთად საქართველოს წარმატებისთვის!

პოლიტიკური გაერთიანება „ქართული ოცნება - დემოკრატიული საქართველოს“ ლიდერებმა ახალციხის მოსახლეობას მაჟორიტარი დეპუტატობის კანდიდატი ანტონ ობოლაშვილი წარუდგინეს.

ჩემთვის დიდი პატივია ვიყო ბორჯომის მუნიციპალიტეტის მაჟორიტარი დეპუტატობის კანდიდატი. ქალაქის, რომელიც არის ისტორიული მესხეთის კარიბჭე და ქალაქის, რომელსაც ბევრი ჩვენი ქვეყნის საამაყო მოქალაქე და გმირები გაუზრდია. ვიყო ამ ქალაქის მუნიციპალიტეტის მაჟორიტარი დეპუტატობის კანდიდატი, დიდი პასუხისმგებლობაა. მზად ვარ, რომ ვიყო ბორჯომის და ბორჯომელების სამსახურში.  მე ძალიან კარგად ვიცნობ ჩვენს რეგიონს და ბორჯომის მუნიციპალიტეტს. ასევე, კარგად ვიცი თუ რა უნდა გავაკეთოთ, რათა შევქმნათ მეტი დოვლათი ჩვენს მუნიციპალიტეტში და ამით თითოეულმა ჩვენგანმა მიიღოს მეტი სიკეთე და სარგებელი. ჩემთვის, ადამიანისთვის რომელიც 22 წლის განმავლობაში ვიყავი ბიზნესით დაკავებული, უმთავრესი იქნება გავაძლიეროთ ბორჯომის მუნიციპალიტეტის ეკონომიკა და დავასაქმოთ მეტი ადამიანი, შევქმნათ მეტი სამუშაო ადგილი და ჰქონდეს მეტი სარგებელი თითოეულ ჩვენგანს. ჩვენი ხელისუფლებისთვის, ყველაზე დიდ ღირებულებას წარმოადგენს ადამიანი, ადამიანზე ზრუნვა და ფუნდამენტური უფლებების დაცვა. დღეს ყველაზე მეტად არის დაცული ჩვენი მოქალაქეების უფლებები, ყველაზე მეტადაა დაცული ბიზნესი და დღეს ყველაზე მეტადაა დაცული საკუთრების უფლება. სახელმწიფომ ყველა ძირითადი მიმართულებით არსებითი პროგრესი განიცადა, რასაც სხვადასხვა სფეროში არსებული კარდინალური გაუმჯობესება და მოქალაქეების განწყობასთან ერთად ავტორიტეტული საერთაშორისო რეიტინგებიც ადასტურებს.  გასული წლების განმავლობაში მნიშვნელოვნად გაიზარდა ხელისუფლების მიერ ბორჯომის მუნიციპალიტეტში განხორციელებული პროგრამებისა და პროექტების მოცულობა. ადგილობრივი ბიუჯეტის შემოსავლები 2013 წლიდან დღემდე 14 მილიონი ლარიდან 33 მილიონ ლარს გადასცდა. მნიშვნელოვანი შედეგები გვაქვს სოფლის მეურნეობის, მეწარმეობის, ენერგეტიკის, ტურიზმის და ინფრასტრუქტურის განვითარების სფეროში. აქტიურად ხორციელდება  გადამამუშავებელი და შემნახველი საწარმოების თანადაფინანსების პროექტი, სახელმწიფო პროგრამა „აწარმოე საქართველოში“. ბორჯომის მუნიციპალიტეტში პროგრამის „აწარმოე საქართველოში“ სასტუმროს კომპონენტში, ხელი შეეწყო 17 სასტუმროს მშენებლობას. პროექტების ჯამურმა საინვესტიციო მოცულობამ შეადგინა 57  მილიონ ლარზე მეტი. აღნიშნულ სასტუმროებში პროგრამის ფარგლებში დასაქმდა 441 ადამიანი. მუნიციპალიტეტს 696 ახალი სასტუმრო ნომერი შეემატა. ენერგეტიკული პროგრამების მშენებლობით სამცხე- ჯავახეთის რეგიონში დამატებით 470 მილიონ დოლარამდე ინვესტიცია განხორციელდება. მშენებლობის ეტაპზე ხელი შეეწყობა ადგილობრივი მოსახლეობის დასაქმებას. ვისაუბროთ ბორჯომზე და არ შევეხოთ ტურიზმს არ შეიძლება. ტურიზმის განვითარების მიზნით მუნიციპალიტეტში განხორციელდა რეგიონის ტურისტული რესურსების სრული ინვენტარიზაცია. გარდა ამისა, მუნიციპალიტეტში  ტურისტული ობიექტების მიმზიდველობის მაქსიმალური ზრდისა და არსებული ტურისტული პოტენციალის ათვისების  მიზნით განხორციელდა რიგი ინფრასტრუქტურული პროექტები - დაბა ბაკურიანში ხელოვნური გათოვლიანების სისტემა და   სათხილამურო ტრასებზე ღამის განათების პროექტი, კოხტა გორის საბაგიროს შუალედური სადგურის და სასრიალო ტრასის პროექტი, დაბა მიტარბში ორი საბაგიროს მშენებლობის პროექტი, ბორჯომ-ხარაგაულის ტყე - პარკში განახლდა საგანმანათლებლო ბილიკები და ასევე ეროვნული პარკის ადმინისტრაციაში განახლდა საგამოფენო დარბაზები. თვალშისაცემია ის ინფრასტრუქტურული პროექტები, რომლებიც ბორჯომის მუნიციპალიტეტში ბოლო წლებში განხორციელდა.   2013-2019 წლებში ადგილობრივი მნიშვნელობის გზების სარეაბილიტაციოდ და მშენებლობისათვის დახარჯული იქნა 27 მილიონ ლარზე მეტი.  აღარ გავაგრძელებ ყველა განხორციელებული პროექტის ჩამოთვლას, თუმცა დანამდვილებით შემიძლია ვთქვა, რომ „ქართული ოცნების“ სახელისუფლებო გუნდი განვითარების სწორ გზას ადგას, აქვს მომავლის ხედვა და უნარი, რომ საკუთარ მოქალაქეზე, საკუთარ ქვეყანაზე იზრუნოს და ეტაპობრივად ყველა გამოწვევას გაუმკლავდეს. ბორჯომში ჯერ კიდევ ბევრია გამოწვევა, რომელთა გადასაჭრელად ერთობლივად უნდა ვიმუშაოთ - უნდა გავაძლიეროთ  ბორჯომის საკურორტო, ბალნეოლოგიური მნიშვნელობა მთელი რეგიონის მასშტაბით. ჩემი უპირველესი ამოცანა იქნება დავიცვა და გავატარო თითოეული თქვენგანის ინტერესები. ვთვლი, მაქვს გამოცდილება და ძალა იმისა, რომ ჩემი რეგიონის კიდევ უფრო  მეტ განვითარებას შევუწყო ხელი.  ამ რეგიონის შვილი ვარ და მზად ვარ ვიყო ამ რეგიონის ღირსეული და თქვენი საამაყო წარმომადგენელი ჩვენი ქვეყნის უმაღლეს საკანონმდებლო ორგანოში. ჩვენ ერთად გავაძლიერებთ ჩვენს მუნიციპალიტეტს და ხელს შევუწყობთ ჩვენი მოსახლეობის დასაქმებას და კეთილდღეობას. დარწმუნებული ვარ, ერთად დგომით, სამშობლოს სიყვარულით აუცილებლად გავიმარჯვებთ და მომდევნო წლების განმავლობაში უამრავ წარმატებას მივაღწევთ.

ბორჯომი არის უსაყვარლესი ქალაქი,  ბევრ ჩვენგანს ბავშვობა აქვს გატარებული ამ ქალაქში, შესაბამისად ეს დამოკიდებულება განსაკუთრებულია.  ყველამ კარგად ვიცით, რამხელა პოტენციალი აქვს ბორჯომს, როგორც ტურისტული, ისე ბევრი სხვა თვალსაზრისით. აქედან გამომდინარე ვიცით, რომ ამ ქალაქს განსაკუთრებული ყურადღება სჭირდება. ბევრი რამ გაკეთდა გასული წლების განმავლობაში, თუმცა გვესმის, რომ კიდევ უფრო ბევრი რამ არის გასაკეთებელი იმისთვის, რომ ჩვენ საბოლოოდ ვიხილოთ კიდევ უფრო განვითარებული, გაძლიერებული ბორჯომი და ბორჯომის მუნიციპალიტეტი. აქედან გამომდინარე ჩვენ გვჭირდება მკაფიო ხედვა.  ჩვენი პარტია სხვა პარტიებისგან გამოირჩევა იმით, რომ გვაქვს ჩამოყალიბებული, მკაფიო ხედვა,  თუ როგორ უნდა განვითარდეს ჩვენი ქვეყანა, თითოეული მუნიციპალიტეტი. ეს ხედვა არის ასახული პროგრამაში და  იმ დოკუმენტებში, რომელიც თითოეულ მუნიციპალიტეტთან დაკავშირებით არის შემუშავებული.  ჩვენ გამოგვარჩევს ძალიან ღირსეული გუნდი, რომლის საპარლამენტო სიის სათავეში დგას პრემიერი გიორგი გახარია. ჩვენ წარვადგინეთ ახალი საპარლამენტო გუნდი, რომელიც წარმოდგენილია, როგორც გამოცდილი, ისე ახალი წევრებით. ჩვენ, გვყავს ძალიან ღირსეული მაჟორიტარი დეპუტატობის კანდიდატები, ვიტყოდი რომ მართლაც გამორჩეული ამ კანდიდატებს შორის ანტონ ობოლაშვილი, რომელიც წარმოადგენს ამ რეგიონს,  არის რეგიონზე უაღრესად შეყვარებული ადამიანი და ძალიან ბევრ რამეს გააკეთებს რეგიონისთვის.  გვაქვს მკაფიო ხედვა, გვყავს ძლიერი გუნდი და დარწმუნებული ვართ, რომ ეს ყველაფერი არის საუკეთესო გარანტი იმისა, რომ ჩვენი ქვეყანა კიდევ უფრო წინ წაიწევს და ბორჯომის რაიონი კიდევ უფრო მეტად განვითარდება.

დიდი პატივია დღეს ჩემთვის საუბარი აქ, თქვენთან ერთად, ქვეყნის მომავალსა და ბორჯომის განვითარებაზე. ყველა ვხედავდით, რომ მიუხედავად იმ დიდი გამოწვევისა, რომელსაც არა მხოლოდ საქართველო, არამედ გლობალურად ყველანი შევეჯახეთ, რაც ვირუსის გავრცელებას და მასთან დაკავშირებულ ეკონომიკურ კრიზისს ეხება, არც ერთი დღით, არც ერთი საათით ქვეყანაში სისტემური ინფრასტრუქტურული პროექტები არ გაჩერებულა და არც გაჩერდება. ჩვენთვის კრიტიკულად მნიშვნელოვანია, თუ როგორი გზები გვექნება, როგორი იქნება ჩვენი წყალმომარაგების სისტემა, როგორი იქნება გაზიფიცირება, როგორი იქნება საგანმანათლებლო ინფრასტრუქტურა, საბავშვო ბაღები და ა.შ. ყველას კარგად უნდა გვესმოდეს, რომ როდესაც ვსაუბრობთ არჩევნების შემდგომ პერიოდზე, ვსაუბრობთ კონკრეტულ გეგმაზე, რომელიც შეთანხმებულია უკვე ჩვენს საერთაშორისო პარტნიორებთან, გეგმაზე, რომელიც ითვალისწინებს ამ ეკონომიკური კრიზისიდან სწრაფ გამოსვლას, რომელიც დეტალურად არის გაწერილი და ამ გეგმის მიხედვით, მომავალი 4 წლის განმავლობაში, სისტემურ ინფრასტრუქტურაში ქვეყანაში მინიმუმ 20 მილიარდი ლარი დაიხარჯება. ეს ის ფულია, რომელიც მაგისტრალური გზების წესრიგში მოყვანის გარდა, მოხმარდება შიდა სასოფლო გზებსაც, წყალმომარაგებას, რომელიც უკიდურესად დიდი პრობლემაა. ყველას კარგად გვახსოვს, შარშან ზამთრის სეზონზე რა პრობლემა გვქონდა ბაკურიანში, იგივე ეხება გაზიფიცირებას და ამ მუნიციპალიტეტისთვის გაზიფიცირების შემდგომი განვითარება ასევე კრიტიკულად მნიშვნელოვანია. ჩვენი საშუალო განათლება და მისი ინფრასტრუქტურის მდგომარეობის წესრიგში მოყვანა - სკოლების რემონტი და ახალი სკოლების მშენებლობა, ისევე როგორც საბავშვო ბაღების, ხორციელდება, მაგრამ ჩვენ გვაქვს კონკრეტული გეგმა, მომავალი 4 წლის განმავლობაში, კონკრეტულად სად რა უნდა გაკეთდეს. მაგალითისთვის, შარშანდელი შემთხვევის შემდგომ ბაკურიანში უკვე დაიწყო როგორც სათავო ნაგებობის, ასევე წყლის კიდევ ერთი რესურსის მოძიების სამუშაოები. წელს უკვე 10 მლნ დაიხარჯა ამ პროექტში და 2021 წლის სეზონისთვის ეს პროექტი დასრულდება. ბაკურიანში წყლის პრობლემა არ უნდა არსებობდეს. ყველას კარგად გვესმის, რომ ბაკურიანში მუნიციპალური ტრანსპორტი, იქიდან გამომდინარე, რომ ტურისტების რაოდენობა ყოველწლიურად იმატებს, აუცილებლად მოსაგვარებელია და წელსაც სეზონის დაწყებამდე მოესწრება სპეციალური, 10 ავტობუსი, რომელიც შესაძლებლობას აძლევს მოთხილამურეებსაც, აღჭურვილობა თან ატარონ. ნაბიჯ-ნაბიჯ ჩვენ ყველაფერი უნდა გავაკეთოთ იმისთვის, რომ როდესაც ბაკურიანში ჩემპიონატი ჩატარდება, ბაკურიანი სრულად უნდა იყოს მომზადებული იმისთვის, რომ ევროპულ დონეზე დავხვდეთ და ვუმასპინძლოთ ამ ჩემპიონატს. ეს ყველაფერი კეთდება იმისთვის, რომ ბორჯომში, ბაკურიანში ჩვენ ცხოვრების ისეთი პირობები შევქმნათ, რომ ადამიანს არ ჰქონდეს აუცილებლობა საცხოვრებლად არათუ თბილისში არ გადავიდეს, არამედ, ელემენტარული სახელმწიფო სერვისებიც აქ მიიღოს, ისეთი სერვისები, რომელსაც ვაწვდით „აწარმოე საქართველოში“ თუ სოფლის მეურნეობის სხვადასხვა პროგრამით. ეს ძალზედ მნიშვნელოვანია, რადგან ყველა კარგად ვხედავთ, როგორც ბორჯომში, ასევე ბაკურიანში ახალი სასტუმროების გახსნის რაოდენობას. მესმის და ყველას გვესმის, რომ ტურისტი დაგვაკლდა, კოვიდის გამო მთლიანად მსოფლიოში მოგზაურობა შემცირდება, მაგრამ ეს ხომ დროებითია, ყველა ხომ კარგად ხვდებით, რომ ჩვენ პირველ ტალღას გავუმკლავდით, როგორც ერთ-ერთი საუკეთესო ქვეყანა ევროპაში. ჩვენ ყველანაირი შესაძლებლობა გვაქვს იმისთვის, რომ მეორე ტალღის გამკლავებაშიც ვიყოთ წარმატებული ქვეყნების მოწინავე რიგებში. ძირითადი მიზანი არის ის, რომ სწრაფად დავიწყოთ ეკონომიკის აღდგენა და სწრაფად აღვადგინოთ სამუშაო ადგილები. მიუხედავად იმისა, რომ მძიმე ეკონომიკურ და მძიმე ეპიდემიოლოგიურ მდგომარეობაში გვიწევს 31 ოქტომბრის არჩევნების ჩატარება, წყნარად, მშვიდად, იმ მხარდაჭერის გათვალისწინებით, რომელიც ჩვენი მოქალაქეებისგან გვაქვს, რაც მთავარია, ღირსეულ, სამართლიან, მშვიდობიან, ყველა სახის ძალადობისგან თავისუფალ გარემოში უნდა გავიმარჯვოთ. ბორჯომელებო, გისურვებთ ამ გამარჯვებას!

ძალიან მიხარია, რომ ვიმყოფები ამ მშვენიერ ქალაქში, მშვენიერ მხარეში, ბორჯომში, რომლის ბუნება და ბუნებრივი რესურსები მთელ მსოფლიოშია განთქმული. ყველაზე მთავარი და მნიშვნელოვანი არის ის, რომ აქ ცხოვრობენ ადამიანები, რომლებსაც ძალიან უყვართ თავიანთი კუთხე, ქალაქი, ჩვენი ქვეყანა. და კიდევ ერთხელ მინდა, მადლობა გადაგიხადოთ თქვენ იმ ყოველდღიურობისთვის, იმ საქმიანობისთვის, რასაც აკეთებთ ჩვენი ქვეყნისთვის და ხალხისთვის. „ქართული ოცნების” ერთიანი გუნდი, თქვენთან ერთად, კიდევ ერთი გამარჯვებისთვის ემზადება, რათა მომავალ წლებში, განახლებული ენერგიით, ახალი ძალებითა და შემართებით, საქართველოს წარმატებისთვის ვიზრუნოთ. ჩვენმა სამშობლომ რთული პერიოდები გამოიარა, თუმცა 2012 წლის გამარჯვების შემდეგ, რომლის შემოქმედიც ჩვენი პარტიის დამფუძნებელი და თავჯდომარე, ბიძინა ივანიშვილია, ქვეყანაში მშვიდობამ და სტაბილურობამ დაისადგურა. ჩვენი ხელისუფლების მმართველობის პერიოდში, ქვეყანა ყველაზე მეტად დაუახლოვდა დასავლეთს და დასავლურ სტრუქტურებს, ყველაზე მეტად არის უზრუნველყოფილი უსაფრთხოება, ყველაზე მეტად არის შექმნილი პირობა, რომ თითოეული ოჯახი ეკონომიკურად გაძლიერდეს. დღეს, მოქალაქე სახელმწიფოს დამსჯელი მექანიზმის ნაცვლად, როგორც ეს წინა ხელისუფლების პირობებში იყო, პარტნიორად, დამხმარედ და საკუთარ ნაწილად აღიქვამს და განიხილავს. დღეს, თითოეული ადამიანი კანონის წინაშე თანასწორია და უკლებლივ ყველა მოქალაქეს აქვს შესაძლებლობა, სახელმწიფოს გვერდში დგომითა თუ საკუთარი ძალებით ახალი საქმე, ახალი ბიზნესი წამოიწყოს, გააძლიეროს რეგიონი, ადგილობრივები დაასაქმოს და ქვეყნის ეკონომიკაში მნიშვნელოვანი წვლილი შეიტანოს. დღეს, ბიზნესი თავისუფალია და მას სახელმწიფოს მხარდაჭერა აქვს, რაც უფრო მეტ მოტივირებულ ადამიანს, მეტ ინვესტიციასა და მეტ დასაქმებულს ნიშნავს. ბორჯომში ბევრი ინფრასტრუქტურული პროექტი განხორციელდა, ბევრი ინვესტიცია ჩაიდო, თუმცა ეს არ არის საკმარისი, განსაკუთრებით იმ კრიზისულ ფონზე, რაც კორონავირუსმა გამოიწვია. „ქართული ოცნების” ერთიანი და ეფექტური გუნდი, მზად არის, ყველა გამოწვევას თქვენთან ერთად გაუმკლავდეს. ჩვენ ვხედავთ მსოფლიოში ამ მიმართულებით რამდენად მძიმე ვითარებაა და ყველაფერი უნდა გავაკეთოთ იმისთვის, რომ მაქსიმალურად შევძლოთ მომდევნო წლების განმავლობაში ქვეყნის ეკონომიკური განვითარება და წინსვლა. ამ ყველაფერში ძალიან მნიშვნელოვანია ჩვენი ერთად დგომა, რათა მოვახერხოთ გამოწვევებისა და პრობლემებისთვის ღირსეული პასუხის გაცემა, რაც თქვენს მუნიციპალიტეტში და ზოგადად ქვეყანაში არსებობს. 31 ოქტომბერს არის ძალიან მნიშვნელოვანი არჩევნები და მე დარწმუნებული ვარ, მომავალ საპარლამენტო არჩევნებში წარმოდგენილი ჩვენი გუნდი, რომელსაც პარტია „ქართული ოცნება-დემოკრატიული საქართველო“ ჰქვია, აუცილებლად გაიმარჯვებს და ამ ყველაფერში თქვენი თანადგომა და მხარდაჭერა უმნიშვნელოვანესია.