პრემიერ-მინისტრმა, პარტია „ქართული ოცნება-დემოკრატიული საქართველოს“ თავმჯდომარე გიორგი კვირიკაშვილმა დღეს, რაჭა-ლეჩხუმისა და ქვემო სვანეთის რეგიონის მერობის კანდიდატები წარადგინა.   ამბროლაურში მერობის კანდიდატი ზვიად მხეიძე იქნება, ონში - ემზარ საბანაძე, ცაგერში - ავთანდილ უგრეხელიძე, ხოლო ლენტენხში - ბადრი ლიპარტელიანი.   მთავრობის მეთაურმა „ქართული ოცნების“ მერობის კანდიდატებს მომავალ საქმიანობაში წარმატება უსურვა.   „ქართულმა ოცნებამ“ საარჩევნო კამპანიის ფარგლებში, რეგიონული შეხვედრები და მერობის კანდიდატების წარდგენა გუშინ, ქუთაისიდან დაიწყო. შეხვედრები საქართველოს მასშტაბით, ყველა რეგიონში გაიმართება.

  პრემიერ-მინისტრმა, პარტია „ქართული ოცნება-დემოკრატიული საქართველოს“ თავმჯდომარე გიორგი კვირიკაშვილმა დღეს, იმერეთის რეგიონში მერობის კანდიდატები წარადგინა.   ადგილობრივი თვითმმართველობის არჩევნებში „ქართული ოცნებიდან“ ქუთაისის მერობის კანდიდატი გიორგი ჭიღვარია იქნება, ბაღდათში - არჩილ გოგსაძე, ვანში - ალექსანდრე გოგორიშვილი, თერჯოლაში - ბონდო სოფრომაძე, სამტრედიაში - ვალერიანე ფოცხვერია, საჩხერეში - ბენიამენ ფალავანდიშვილი, ტყიბულში - თემურ ჩუბინიძე, წყალტუბოში - გრიგოლ იოსელიანი, ჭიათურაში - პაატა ნადირაძე, ხარაგაულში - ნიკოლოზ თოფურიძე, ხონში - ლადო ჯურხაძე, ხოლო ზესტაფონში კახაბერ მახათაძე.   პრემიერის განცხადებით, იმერეთის რეგიონის მერობის კანდიდატები ხალხისა და ადგილობრივი თვითმმართველობის გაძლიერებისთვის მაქსიმუმს გააკეთებენ.   მისი თქმით, ბოლო ხუთი წლის განმავლობაში, ქართველი ხალხის უმრავლესობამ „ქართულმა ოცნებას“ ნდობა უკვე ოთხჯერ გამოუცხადა.   „ოქტომბერში თქვენ ისევ გეძლევათ საშუალება გადაწყვიტოთ, ვის ჩააბაროთ და ანდოთ საკუთარი ქალაქი, რაიონი თუ სოფელი, რომელი პოლიტიკური ძალა იფიქრებს და იზრუნებს თქვენი სოფლის, რაიონისა თუ ქალაქის ბედზე, ხალხის საჭიროებებზე, მათთვის ცხოვრების უკეთესი და ღირსეული პირობების შექმნაზე. „ქართული ოცნება - დემოკრატიული საქართველო“ ხელისუფლებაში მოსვლის დღიდან, ძალისხმევას არ იშურებს, რომ სწორი მიმართულებით და წინ წაიყვანოს ქვეყანა, რომ ჩვენი ხალხის მდგომარეობა უკეთესობისკენ შეიცვალოს“, - განაცხადა მთავრობის მეთაურმა.   გიორგი კვირიკაშვილის თქმით, ქუთაისი ძველ დიდებას დაიბრუნებს, ხოლო „ქართული ოცნების“ გამარჯვება თითოეული მოქალაქის გამარჯვება იქნება.   „ყველა არჩევნებში თქვენ „ქართული ოცნების“ გვერდით იდექით და ჩვენ ეს ბრძოლა ყოველთვის გამარჯვებით დავაგვირგვინეთ. მჯერა, რომ ადგილობრივი თვითმმართველობის არჩევნებშიც, 21 ოქტომბერს, ჩვენ გვერდით იქნებით და მხარს დაუჭერთ „ქართულ ოცნებას“. ჩვენ გავიმარჯვებთ და ეს გამარჯვება თითოეული თქვენგანის გამარჯვება იქნება“, - განაცხადა პრემიერ-მინისტრმა.   ქუთაისში შეკრებილ მხარდამჭერებს პარტიის გენერალურმა მდივანმა, „ქართული ოცნების“ თბილისის მერობის კანდიდატმა კახა კალაძემაც მიმართა.   მისი თქმით, ძალიან მნიშვნელოვანია თანამედროვე საქართველოში თვითმმართველობის სწორად ორგანიზება და განვითარება მოხდეს, რადგან ქვეყნის ძლიერება სწორედ ძლიერ თვითმმართველობაზეა დამოკიდებული.   კალაძის განცხადებით, ხელისუფლება მუშაობს და ჯანდაცვის, განათლების, სოფლის მეურნეობის სრულყოფისა და ხელმისაწვდომობის გაზრდის, ასევე, ახალი სამუშაო ადგილების შექმნის მიზნით, მუშაობას მომავალშიც განაგრძობს.   „ქართული ოცნება“ ეს არის გუნდი, რომელიც ქმნის საქართველოს რეალობას - პერსპექტიულს და პროგრესულს. ჩვენი ოცნებაა, ჩვენს შვილებს ჰქონდეთ ისეთი საქართველო, რომელიც საუკეთესო ქვეყანა იქნება მთელ მსოფლიოში - მშვიდი, უზრუნველყოფილი და განვითარებული“, - განაცხადა თბილისის მერობის კანდიდატმა.   „ქართულმა ოცნებამ“ დღეიდან, საარჩევნო კამპანიის ფარგლებში, რეგიონული შეხვედრები და მერობის კანდიდატების წარდგენა დაიწყო.

  პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა დღეს, თბილისის საკრებულოს მაჟორიტარობის კანდიდატები წარადგინა.   ადგილობრივი თვითმმართველობის არჩევნებში მთაწმინდის რაიონში მაჟორიტარი დეპუტატობის კანდიდატი ჯაბა ჯიშკარიანი იქნება; ვაკე - გიორგი მუსხელიშვილი და გიორგი ბირბიჩაძე; საბურთალო - ავთანდილ ცინცაძე, დავით უთმელიძე და ვახტანგ შაქარიშვილი; კრწანისი - თემურ გორგაძე; ისანი - ილია ჯიშკარიანი, ნინო ლაცაბიძე და ლევან დავითაშვილი; სამგორი - გიორგი დოხტურიშვილი, გიორგი ტყემალაძე, ქეთევან მამულაშვილი და რევაზ სოხაძე; ნაძალადევი - თამარ ტალიაშვილი, დავით ჭელიძე, მიხეილ ამაშუკელი და ალექსანდრე ხუჯაძე; ჩუღურეთი - რიმა ბერაძე; დიდუბე - ვლადიმერ ძნელაძე და თარაშ შურღაია; გლდანი - შალვა ოგბაიძე, ოთარ გრიგოლია, გულია გოცირიძე და ქეთევან ჯოხაძე.   პრემიერის განცხადებით, დედაქალაქის მოსახლეობა გადაწყვეტს, ვინ იზრუნებს მათ საჭიროებებსა და ცხოვრების უკეთესი პირობების შექმნაზე.   „დარწმუნებული ვარ, რომ ჩვენი ხალხი ამჯერადაც სწორ არჩევანს გააკეთებს და გადაწყვეტილებას „ქართული ოცნების“, ანუ კიდევ უფრო უკეთესი მომავლის სასარგებლოდ მიიღებს. „ქართულ ოცნებას“, როგორც მმართველ გუნდს, აღებული აქვს პასუხისმგებლობა, რომ ძლიერი თვითმმართველობები გვყავდეს და ქვეყნის თითოეული მმართველი რგოლი ხალხის სამსახურში იდგეს. ამისთვის კი, ახალი ენერგია გვჭირდება. დღევანდელობა განახლებულ დღის წესრიგსა და მოთხოვნებს გვიყენებს და ჩვენი პარტია მზადაა, ყველა ამ გამოწვევას უპასუხოს“, - განაცხადა გიორგი კვირიკაშვილმა.   მთავრობის მეთაურმა კანდიდატების შერჩევის კრიტერიუმებიც განმარტა. მისი თქმით, ესაა მაღალი პასუხისმგებლობა, პრობლემების გამკლავების უნარი და ქალაქის გაუმჯობესების მიზანი.   „სწორედ ამ ნიშნითაა შერჩეული თბილისის მერობის კანდიდატი კახა კალაძე და „ქართული ოცნების“ გუნდი თბილისის საკრებულოში. მინდა წარმოგიდგინოთ ის ადამიანები, რომლებსაც ზურგს რეპუტაცია, პროფესიონალიზმი და წესიერება უმაგრებთ. თითოეული მათგანი მზადაა, საკუთარი ცოდნა და ენერგია თბილისისა და თბილისელების სამსახურს მოახმაროს, რათა თბილისი სიცოცხლით სავსე ქალაქად იქცეს“, - აღნიშნა პრემიერ-მინისტრმა.   გიორგი კვირიკაშვილის განცხადებით, საკრებულოს მაჟორიტარობის თითოეული კანდიდატი მოქალაქეთა უმრავლესობის მხარდაჭერას მოიპოვებს.   „მჯერა, რომ თითოეული ჩვენი კანდიდატი მოქალაქეთა უმრავლესობის ნდობას, მხარდაჭერას მოიპოვებს და ხალხის იმედს ბოლომდე გაამართლებს. ბევრ მათგანს ჩვენი საზოგადოება მათი პოლიტიკური საქმიანობიდან გამომდინარე იცნობს. არიან ახალი სახეებიც, რომლებიც დარწმუნებული ვარ, დაიმკვიდრებენ თავს, როგორც ხალხზე მზრუნველი პოლიტიკოსები“, - განაცხადა პრემიერ-მინისტრმა.   „ქართული ოცნების“ მხარდამჭერებს მისასალმებელი სიტყვით ასევე, თბილისის მერობის კანდიდატმა კახა კალაძემ მიმართა და ყურადღება დედაქალაქის მერიისა და საკრებულოს მჭიდრო თანამშრომლობის მნიშვნელობაზე გაამახვილა.   „თბილისის მერიისა და საკრებულოს მჭიდრო და ქმედით თანამშრომლობას გადამწყვეტი მნიშვნელობა აქვს ყველა იმ ჩანაფიქრის განხორციელებისთვის, რომელიც მეტ სიცოცხლეს შეიტანს ჩვენს ქალაქში“, - აღნიშნა თბილისის მერობის კანდიდატმა.   კალაძის თქმით, სიცოცხლით სავსე ქალაქისა და თბილისის, მისი თითოეული უბნის ყოველდღიური განვითარება ის მიზანი იქნება, რომელიც თბილისსა და თბილისელებზე ზრუნვის საქმეში მერიისა და საკრებულოს ძალისხმევას გააერთიანებს.   მისივე განცხადებით, მმართველი გუნდის მიერ საკრებულოს წევრების შერჩევა კონკრეტული კრიტერიუმებით მოხდა, გათვალისწინებული იყო როგორც თითოეული მათგანის პროფესიონალიზმი, სამოქალაქო პოზიცია და მონაწილეობის მზაობა საერთო საქმეში, ასევე, ყველაზე მთავარი და მნიშვნელოვანი - თბილისის ერთგულება და სიყვარული.   „გვჯერა, რომ განახლებული საკრებულო განახლებული ენერგიით შეუდგება საქმიანობას დედაქალაქის საკეთილდღეოდ. გვჯერა, რომ ერთიანი ძალისხმევით შევძლებთ, უახლოეს მომავალში, თბილისი იყოს სიცოცხლით სავსე ქალაქი“, - განაცხადა კალაძემ.

  საქართველოს პრემიერ-მინისტრის, პარტია „ქართული ოცნება-დემოკრატიული საქართველოს“ თავმჯდომარის გიორგი კვირიკაშვილის ხელმძღვანელობით, დღეს „ქართული ოცნების” ცენტრალურ ოფისში პოლიტიკური საბჭოს სხდომა გაიმართა.   შეხვედრაზე ადგილობრივი თვითმმართველობის არჩევნებთან დაკავშირებული საორგანიზაციო საკითხები განიხილეს და თბილისის მაჟორიტარი დეპუტატობის კანდიდატების სია დაამტკიცეს.   საუბარი ასევე, შეეხო წინასაარჩევნო პერიოდში, თბილისსა და რეგიონებში დაგეგმილ სხვადასხვა ღონისძიებებს.

  პარტია „ქართული ოცნება - დემოკრატიული საქართველოს“ მერობის კანდიდატის კახა კალაძის საარჩევნო შტაბი ოფიციალურად გაიხსნა. მერობის კანდიდატი დღეიდან აქტიურ წინასაარჩევნო კამპანიას იწყებს. შტაბის გახსნას პარტიის თავმჯდომარე, პრემიერ-მინისტრი გიორგი კვირიკაშვილი ესწრებოდა, რომელმაც თანაგუნდელს გამარჯვება უსურვა.   „კახა ნამდვილად არის ის ადამიანი, რომელსაც ლიდერის გამორჩეული თვისებები გააჩნია. მისი გახსნილობა ყველაზე მთავარი დამახასიათებელი თვისებაა. ის სიახლეზე ორიენტირებული ადამიანია, მას თანამედროვე მიდგომები გააჩნია და თავი დაიმკვიდრა პოლიტიკოსად, რომლისთვისაც მთავარია ზნეობა და წესიერება. ამიტომ, დარწმუნებული ვარ, რომ კახა კალაძე სუფთა ხელებით, არჩევნებს აუცილებლად პირველივე ტურში მოიგებს. დარწმუნებული ვარ, რომ ეს თბილისისთვის ახალი გადაშლილი ფურცელი იქნება“, – განაცხადა გიორგი კვირიკაშვილმა. პრემიერ-მინისტრის თქმით, ადგილობრივი თვითმმართველობის არჩევანი თბილისისთვის ბევრი სიახლის მომტანი იქნება და ქალაქი დაიმკვიდრებს თავს, როგორც უძველესი ტრადიციებისა და ბევრი სიახლის მქონე ქალაქი.   საარჩევნო შტაბი თავად მერობის კანდიდატმა გახსნა, რომელიც თავდაპირველად, ბორჯომის ხეობაში შექმნილ ვითარებას გამოეხმაურა და სტიქიის სალიკვიდაციო სამუშაოებში ჩართულ თითოეულ ადამიანს მადლობა გადაუხადა.   „მინდა მადლობა გადავუხადო ყველა მეხანძრე-მაშველს, ყველა ჯარისკაცს, პოლიციელს, ყველა მოქალაქეს, ჩვენს მეგობარ ქვეყნებს, ვინც ჩართული იყო სტიქიასთან ბრძოლაში. განსაკუთრებულ მადლობას ვუხდი ჩვენს პრემიერს, გიორგი კვირიკაშვილს, რომელიც პირველივე წუთებიდან ჩართული იყო ხანძრის სალიკვიდაციო ღონისძიებაში და საგანგებო შტაბს ხელმძღვანელობდა. ეს არის ნათელი მაგალითი იმისა, რომ ერთად დგომით, ყველაფერი შესაძლებელია“, - განაცხადა კალაძემ.   მერობის კანდიდატმა მხარდაჭერისა და თანადგომისთვის ასევე, თბილისელებსა და მმართველ პოლიტიკურ გუნდს მადლობა გადაუხადა. „თბილისის მერობის კანდიდატად ჩემი დასახელება ძალიან დიდი პატივი და ამავდროულად, უდიდესი პასუხისმგებლობაა. ძალიან კარგად მაქვს გააზრებული და გაცნობიერებული თუ რას ნიშნავს - იყო თბილისის მერი. სახელისუფლო გუნდის პოლიტიკური მხარდაჭერით, თბილისის გამოწვევებთან გამკლავებას შევძლებთ. მინდა მადლობა გადავუხადო საზოგადოებას, თბილისელებს მუდმივი მხარდაჭერისა და თანადგომისთვის. ეს გამოცხადებული ნდობა მაძლევს ძალას - გადავლახო ნებისმიერი გამოწვევა, საკუთარი წვლილი შევიტანო ჩვენი ქალაქის, ჩვენი ქვეყნის განვითარებაში. ჩვენ ერთად ყოველთვის გავიმარჯვებთ“, - განაცხადა დედაქალაქის მერობის კანდიდატმა.    კალაძის თქმით, მის გუნდს კარგად ესმის ყველა ის პრობლემა, რომელიც თბილისსა და თბილისელებს აწუხებს. ასევე, კარგად იცის, როგორ უნდა მოგვარდეს აღნიშნული პრობლემები. როგორც მერობის კანდიდატმა განაცხადა, ბოლო წლების განმავლობაში, თბილისში ბევრი რამ გაკეთდა და დღესაც კეთდება, თუმცა საზოგადოება, თბილისი ვითარდება და საჭიროა, ბევრად უფრო მეტი გაკეთდეს.   „ვიშრომებ თითოეული თბილისელისთვის, თითოეული თქვენგანისთვის. არ დავიღლები მუშაობით, არ დავიღლები ვემსახურო თბილისსა და თბილისელებს. ჩვენ თბილისი ჯანსაღ, სიმწვანით სავსე ქალაქად უნდა ვაქციოთ“, - განაცხადა კალაძემ.   მერობის კანდიდატი ასევე დარწმუნებულია, რომ თბილისელები მაღალ სამოქალაქო პასუხისმგებლობას გამოიჩენენ და არჩევნებზე საკუთარი პოზიციის დასაფიქსირებლად აუცილებლად მივლენ.   „თქვენი ჩართულობა, თქვენი პოზიცია გადამწყვეტია, რადგან ყოველი ჩვენგანის ვალია, საკუთარი წვლილი შევიტანოთ სიცოცხლით სავსე ქალაქის წინსვლაში. დღეიდან, ჩვენი საარჩევნო შტაბი გახსნილია, იმუშავებს მუდმივ რეჟიმში და მისი კარი ღია იქნება თითოეული თქვენგანისთვის“, - აღნიშნა მან. კალაძის განცხადებით, საარჩევნო შტაბები, მთელი ქალაქის მასშტაბით, უკვე ყველა რაიონში ფუნქციონირებს, დანიშნული არიან შტაბის ხელმძღვანელები და გუნდი მზადაა, საარჩევნო კამპანია დაიწყოს.   რაც შეეხება მერობის კანდიდატის სამოქმედო გეგმებს, კალაძის თქმით, ის უახლოეს მომავალში, საზოგადოებას ხედვებსა და კონკრეტულ მიმართულებებს წარუდგენს, რაზეც ოთხი წლის განმავლობაში უნდა იმუშაოს.   საუბრის დასასრულს, თბილისის მერობის კანდიდატმა საარჩევნო შტაბის ხელმძღვანელად საპარლამენტო უმრავლესობის ლიდერი არჩილ თალაკვაძე წარადგინა. როგორც კახა კალაძემ განაცხადა, არჩილ თალაკვაძე შტაბის საიმედო ხელმძღვანელი იქნება. „არჩილ თალაკვაძე კარგი მეგობარი და თანაგუნდელია, კარგი მენეჯერული თვისებებით. ამ არჩევნებზე ჩემთვის მნიშვნელოვანი იყო გვერდით მყოლოდა ისეთი ადამიანი, რომელთანაც არამარტო პოლიტიკური ხედვები და მომავლის გეგმები მაერთიანებდა, არამედ პასუხისმგებლობა, ქვეყნის სიყვარული და დაგეგმილის განხორციელების სურვილი. ჩემი შტაბი საიმედო ადამიანის ხელშია. ჩვენი მიზანი საერთოა - თბილისი აუცილებლად გაიმარჯვებს და რაც მთავარი და მნიშვნელოვანია, ის აუცილებლად იქნება სიცოცხლით სავსე ქალაქი“, - განაცხადა კახა კალაძემ.   დედაქალაქის მერობის კანდიდატის საარჩევნო შტაბის ხელმძღვანელმა გამოცხადებული ნდობისთვის კახა კალაძესა და მმართველ გუნდს მადლობა გადაუხადა.   „მზად ვარ მივიღო და შევასრულო ეს მნიშვნელოვანი ამოცანა. საარჩევნო შტაბი საუკეთესო ფორმაშია. ჩვენს კამპანიაში ყველა სფეროდან საუკეთესო პროფესიონალები არიან ჩართული. თბილისში კიდევ ათი შტაბი უკვე სამუშაო რეჟიმშია. ამ ოფისის კარი კი, თითოეული ადამიანისთვის, მათი პრობლემებისა და იდეებისთვის ღია იქნება“, - აღნიშნა არჩილ თალაკვაძემ.   მისი თქმით, კახა კალაძე უახლოეს დღეებში, თბილისის განვითარების სამომავლო ხედვასა და პროგრამებს თემატურად წარადგენს.   „ჩვენ გავიმარჯვებთ არა მხოლოდ 21 ოქტომბერს, არამედ ყოველდღე არჩევნების შემდეგ, როდესაც ქალაქის ეკონომიკა, სიმწვანე, ურბანული განვითარება და სოციალური პოლიტიკა ახალი ენერგიით შეივსება. თბილისი გაიმარჯვებს, კახა კალაძე კი, სიცოცხლით სავსე ქალაქის მერი იქნება“, - განაცხადა არჩილ თალაკვაძემ.   „ქართული ოცნება - დემოკრატიული საქართველოს“ მერობის კანდიდატის საარჩევნო შტაბის გახსნას კახა კალაძის თანაგუნდელები, მხარდამჭერები, ასევე, კულტურის სფეროს წარმომადგენლები ესწრებოდნენ.

  დღეს, 26 აგვისტოს, 20:00 საათზე „ქართული ოცნება - დემოკრატიული საქართველოს“ თბილისის მერობის კანდიდატის კახა კალაძის საარჩევნო შტაბი ოფიციალურად გაიხსნება. შტაბს პრემიერ-მინისტრი, პარტიის თავმჯდომარე გიორგი კვირიკაშვილი გახსნის. დღესვე, შტაბის ხელმძღვანელს წარადგენს თბილისის მერობის კანდიდატი კახა კალაძე.   მისამართი: კოსტავას N14 (გამომცემლობა „სამშობლოს“ ყოფილი შენობა)

ბორჯომის ხეობაში ხანძრის სალიკვიდაციო სამუშაოები გრძელდება. სტიქიის ადგილზე ჩავიდა “ქართული ოცნების” თბილისის მერობის კანდიდატი კახა კალაძე.   საგანგებო შტაბი 24 საათიან უწყვეტ რეჟიმში აგრძელებს მუშაობას. ბორჯომის ხეობაში იმყოფება საქართველოს პრემიერ-მინისტრი გიორგი კვირიკაშვილი მთავრობის წევრებთან ერთად.

  „პირველი, რაც მნიშვნელოვანი და აუცილებლად გასაკეთებელია, უნდა შემუშავდეს ტრანსპორტის განვითარების ერთიანი ხედვა. ასეთი ხედვის გარეშე, მგონია რომ მხოლოდ ერთ წერტილში, ლოკალურად მოგვარებული პრობლემა, აუცილებლად კვლავ იჩენს თავს და გადაინაცვლებს სხვა ადგილას. ჩემი მერობის პირობებში შეიქმნება სატრანსპორტო სტრატეგია, რომელიც მნიშვნელოვანი კომპონენტი იქნება ქალაქის ურბანულ განვითარებაში“ - აცხადებს „ქართული ოცნება - დემოკრატიული საქართველოს“ მერობის კანდიდატი კახა კალაძე. მერობის კანდიდატის თქმით, სწორედ ამ სტრატეგიის გათვალისწინებით მოხდება სამშენებლო ნებართვების გაცემა, რათა ქაოტურმა მშენებლობებმა არ გამოიწვიოს ქალაქის სატრანსპორტო არტერიების დახშობა.   კახა კალაძე ამომრჩეველს ჰპირდება, რომ თბილისში ახალი ხიდებისა და ესტაკადების მშენებლობა დაიწყება, ასევე გადაიხედება არსებული სამარშუტო ხაზები და დაემატება ახალი მარშუტები, განვითარდება საზოგადოებრივი ტრანსპორტი, ასევე, მოხდება თბილისის რკინიგზის ტერიტორიის გამოთავისუფლება და მისი ქალაქის ინტერესებისთვის გამოყენება.   „საზოგადოებრივი ტრანსპორტის განვითარება კი ნიშნავს, რომ მისი მომსახურებით მეტი ხალხი სარგებლობს და ინდივიდუალური ტრანსპორტის საჭიროება ნაკლებია, რაც მნიშვნელოვანია როგორც ეკოლოგიისთვის, ასევე ქალაქის საცობებისგან გასათავისუფლებლად. საცობების განტვირთვის მიზნით ასევე დაინერგება თანამედროვე ტექნოლოგიები, სპეციალური პროგრამა, რომლის მეშვეობითაც მუდმივ რეჟიმში მოხდება თბილისის ქუჩების მონიტორინგი, გადატვირთული წერტილების გამოვლენა და მათი გადაჭრის ოპტიმალური გზების დასახვა“. მერობის კანდიდატის მოსაზრებით, მხოლოდ კომპლექსური მიდგომა გადაჭრის საცობებისა და ტრანსპორტის პრობლემას.   კახა კალაძემ საკუთარი ხედვა ამომრჩეველს სოციალური ქსელის საშუალებით გააცნო.

  მინდა გამოვეხმაურო ჭავჭავაძის 82-ში მწვანე ნარგავების მოჭრის ფაქტს, რაც ყოვლად დაუშვებელია. ჩვენმა ხელისუფლებამ ბიზნესი გაათავისუფლა პოლიტიკური წნეხისგან, რაც არ ნიშნავს, რომ ბიზნესის განვითარება ხეების ჩეხვის, ქალაქის დასახიჩრებისა და ჩვენი შვილების ჯანმრთელობის ხარჯზე უნდა ხდებოდეს.   თბილისის მერიამ შესაბამისი ზომები უნდა მიიღოს მსგავსი პრობლემების აღმოსაფხვრელად. დღევანდელი ფაქტი აუცილებლად უნდა იქნას შესწავლილი, რათა პასუხი გაეცეს საზოგადოების კითხვებს. მომხდარი ცხადყოფს, რომ საჭიროა გამკაცრდეს და დაიხვეწოს კანონმდებლობით გათვალისწინებული პროცედურები, რათა ჩვენი ქალაქი რეალურად იყოს დაცული მსგავსი ფაქტებისგან.   ცხადია, არ ვართ შენებისა და განვითარების წინააღმდეგი, თუმცა კიდევ ერთხელ ვიმეორებ: ეს არ უნდა მოხდეს ბუნების განადგურების ხარჯზე.   ეკოლოგია ჩემი და ჩემი გუნდის ერთ-ერთი მთავარი პრიორიტეტი იქნება. ჩვენ-თვითმმართველობამ, საზოგადოებამ, ერთად უნდა შევცვალოთ არსებული რეალობა თბილისის ეკოლოგიის გასაუმჯობესებლად და მოქალაქეების საკეთილდღეოდ.

  პარტია „ქართული ოცნება - დემოკრატიული საქართველოს“ თბილისის მერობის კანდიდატი, კახა კალაძე, თბილისის ზღვის მიმდებარედ არსებული დენდროლოგიური პარკის რეკონსტრუქციის ინიციატივით გამოდის. მერობის კანდიდატი აღნიშნულთან დაკავშირებით ვიდეომიმართვას ავრცელებს, სადაც პარკში არსებულ პრობლემებსა და მის პოტენციურ შესაძლებლობებზე საუბრობს. კალაძის განცხადებით, დენდროლოგიური პარკის ტერიტორია, რომელიც არის უნიკალური და მოიცავს უზარმაზარ ფართობს, დღეს აბსოლუტურად მოუვლელი და გამოუყენებელია. მისივე თქმით, ეს პრობლემა სასწრაფოდ უნდა გადაიჭრას და აღნიშნულ ტერიტორიაზე მოეწყოს ისეთი რეკრეაციული სივრცე, რომელიც არა მხოლოდ მიმდებარე რაიონების მოსახლეობას, არამედ მთელ თბილისს მოემსახურება.   „აქ შესაძლებელია მოეწყოს ოჯახური დასვენების უზარმაზარი სივრცე. თბილისელებს შეეძლებათ მოვიდნენ ამ პარკში, რომელიც მათი კომფორტული დასვენებისთვის შესაბამისად იქნება მოწყობილი, აქ იქნება სპორტისთვის განკუთვნილი ადგილები, სარბენი თუ ველობილიკები, ასევე, აუცილებელია საპიკნიკე ზონების და სასეირნო სივრცეების მოწყობა“, - აღნიშნავს კალაძე. მერობის კანდიდატის განცხადებით, მომზადდება შესაბამისი პროექტი, რის შემდეგაც დაიწყება რეკონსტრუქცია. მერობის კანდიდატი დარწმუნებულია, რომ ეს იქნება თბილისის ზღვის სიგრილისა და გამწვანების შედეგად შექმნილი უნიკალური ადგილი, სადაც თბილისელები ოჯახებით დაისვენებენ.   „ამ პარკის რეკონსტრუქცია სიცოცხლით გაავსებს არა მარტო მიმდებარე უბნებს, არამედ მთელ ქალაქს. თბილისს აქვს უდიდესი პოტენციალი, იყოს ევროპის ერთ-ერთი ყველაზე მწვანე ქალაქი. მე მჯერა, რომ ჩვენ ამას ერთად შევძლებთ და მოვახერხებთ. მჯერა, რომ თბილისი ძალიან მალე იქნება სიცოცხლით სავსე ქალაქი“, - აცხადებს კალაძე ვიდეომიმართვაში.

პარტია „ქართული ოცნება-დემოკრატიული საქართველოს“ თბილისის მერობის კანდიდატი კახა კალაძე მიიჩნევს, რომ თბილისს ეკოლოგიური განვითარების ერთიანი ხედვა და შესაბამისი სტრატეგია უნდა ჰქონდეს. სოციალურ ქსელში გავრცელებულ მორიგ ვიდეომიმართვაში კახა კალაძე ეკოლოგიური მდგომარეობის გაუმჯობესების მიზნით გადასადგმელ ნაბიჯებზე საუბრობს. „მინდა, შევეხო თბილისისთვის ერთ-ერთ ყველაზე მნიშვნელოვან და მტკივნეულ საკითხს, რომელიც თითოეულ ჩვენგანს აწუხებს და რომლის მოგვარება ჩვენი ერთ-ერთი პრიორიტეტი იქნება-ეს არის ეკოლოგია. არაფერი არ ღირს ჩვენი და ჩვენი შვილების ჯანმრთელობის ფასად. ყველამ უნდა ვისუნთქოთ სუფთა ჰაერი და ვიცხოვროთ ჯანსაღ გარემოში. დღეს გარემოს ყველაზე მეტად რაც აბინძურებს, მგონია, რომ არის ტრანსპორტი და მშენელობები. ასევე, მნიშვნელოვანია პარკების, რეკრეაციული ზონების არსებობა-განვითარება, ნარჩენების მართვის საკითხიც გვაქვს მოსაგვარებელი. სიცოცხლით სავსე ქალაქს აუცილებლად უნდა ჰქონდეს ქალაქის ეკოლოგიური განვითარების ერთიანი ხედვა,”-აღნიშნავს კახა კალაძე.   თბილისის მერობის კანდიდატი მიიჩნევს, რომ თბილისის ეკოლოგიური მდგომარეობის გასაუმჯობესებლად აუცილებელია: ამოქმედდეს ავტომობილების სავალდებულო ტექდათვალიერება, განახლდეს საზოგადოებრივი ტრანსპორტი, განვითარდეს საბაგირო ხაზები, მოხდეს ელექტრომობილების პოპულარიზაცია.   „პირველი, რაც მნიშვნელოვანი და გასაკეთებელია, მე ვფიქრობ, ეს არის საზოგადოებრივი ტრანსპორტის განახლება. საზოგადოებრივი ტრანსპორტი უნდა გავხადოთ არა მხოლოდ კომფორტული და მოწესრიგებული, არამედ, პოპულარული. იმის გათვალისწინებით, რომ ჩვენ მოგვიწევს დიდი რაოდენობით ავტობუსების შესყიდვა, ყველაფერს გავაკეთებთ საიმისოდ, რომ მათი წარმოება და აწყობა მოხდეს საქართველოში. აუცილებლად მოხდება მეტროს მოდერნიზაცია. ხელს შევუწყობთ საბაგირო ხაზების განვითარებასა და ელექტრომობილების პოპულარიზაციას. უნდა ამოქმედდეს ავტომობილების სავალდებულო ტექდათვალიერება,რაც მგონია, რომ კიდევ დაგვეხმარება ქალაქის ეკოლოგიური მდგომარეობის გაუმჯობესებაში,”-აცხადებს მერობის კანდიდატი.   გავრცელებულ ვიდეომიმართვაში კახა კალაძე სამშენებლო რეგულაციების გამკაცრებაზეც საუბრობს. მისი თქმით, მოხდება მოსახლეობისთვის, დასაქმებულისთვის და თბილისის ეკოლოგიისთვის უსაფრთხო სამუშაოების წარმოება ქალაქის ნებისმიერ წერტილში. „ქართული ოცნების“ მერობის კანდიდატის განმარტებით, შემუშავდება პარკებისა და სკვერების განვითარების ერთიანი ხედვა. „მხოლოდ ერთი ცენტრალური პარკის შექმნა არ არის საკმარისი თბილისისთვის, მისი განლაგებიდან და პერსპექტივაში ურბანული განვითარების გეგმიდან გამომდინარე. შეგახსენებთ, რომ თბილისში გვაქვს დაახლოებით 1400-მდე სკვერი და პარკი, რომელსაც სისტემატური ზრუნვა და განახლება სჭირდება. თითოეულ მათგანში შევქმნით ისეთ გარემოს, სადაც დროის გატარება იქნება ყველასთვის სასიამოვნო. ასევე, მნიშვნელოვანია, თბილისში არსებული რეკრეაციული პოტენციალის მქონე სივრცეების ათვისება. მტკვრის მიდამოებში ჩვენ გვაქვს უამრავი აუთვისებელი ადგილი, სადაც არის შესაძლებლობა იმისა, რომ მოვაწყოთ დასვენების ზონები და გამწვანებული სივრცეები. თბილისში დავნერგავთ ნარჩენების შეგროვება-გადამუშავების თანამედროვე სისტემას, რომელიც კიდევ უფრო გააუმჯობესებს ეკოლოგიურ გარემოს. ყველაფერი ეს, რაზეც ვისაუბრე, მთლიანობაში, უზრუნველყოფს ეკოლოგიურად სუფთა სივრცის შექმნას, სადაც ჩვენი შვილები, მომავალი თაობები გაიზრდებიან. მე დარწმუნებული ვარ იმაში, რომ თბილისი ერთ-ერთი ყველაზე მწვანე და სიცოცხლით სავსე ქალაქი იქნება,”-ნათქვამია ვიდეომიმართვაში.

  „ჩემი აზრით, სწორი მოდელია, როდესაც პარკირების მენეჯმენტს ადგილობრივი ხელისუფლება ახორციელებს. ასეთ შემთხვევაში გათვალისწინებული იქნება მძღოლების და ფეხით მოსიარულეების ინტერესები და სათანადოდ იქნება დაცული მათი უფლებები. თბილისელების მიერ გადახდილი თითოეული თეთრი ვინმეს ჯიბეში კი არ წავა, არამედ პირდაპირ იქნება მიმართული ქალაქის ბიუჯეტში და მთლიანად მოხმარდება პარკირების პროექტების განხორციელებას. ეს არის ის, რაც ჭირდება თბილისელებს“ - აღნიშნული განცხადება პარტია „ქართული ოცნება-დემოკრატიული საქართველოს“ თბილისის მერობის კანდიდატმა კახა კალაძემ ახალ ვიდეომიმართვაში გააკეთა, რომელიც დღეს გავრცელდა.   კახა კალაძემ ვიდეომიმართვა მთლიანად პარკირების პრობლემას და მისი მოგვარების გზებს მიუძღვნა. „როგორც მოგეხსენებათ, წლების წინ გაფორმდა მიუღებელი და არასწორი ვალდებულებებით დატვირთული ხელშეკრულება, რამაც თბილისელებს რეალურად მოუტანა ძალიან ბევრი ჯარიმა და ნაკლები ადგილი პარკირებისთვის. თბილისის საცობების ერთ-ერთი მთავარი მიზეზი არასწორი, ქაოტური პარკირება და შესაბამისი ინფრასტრუქტურის არარსებობაა.   პარკინგის მართვა ეს არ არის მხოლოდ კონკრეტული ადგილების შემოხაზვა, მონიშვნა თეთრი საღებავით და არც თუნდაც ჯარიმების გამოწერა. მე მგონია, რომ ყველას ძალიან კარგად გვესმის, რომ რაც უფრო ნაკლები მანქანის გასაჩერებელი ადგილი იქნება ქალაქში, მით უფრო მეტ ჯარიმას გამოწერს კერძო კომპანია. ეს, შეიძლება ითქვას, ინტერესთა კონფლიქტია. ჩვენ ვისმენთ შეუსწავლელ, პოპულიზმისკენ მიმართულ ვერსიებს - ხან ახალი კომპანიის შემოსვლაზე, ხან ბიუჯეტიდან ვიღაცის გასტუმრებაზე, რაც, მგონია, რომ კიდევ უფრო დააწვება თითოეულ თბილისელს ჯიბეზე. რეალურად ეს არის თბილისელების დისკომფორტის გადამისამართება ერთი კომპანიიდან მეორეზე და არა იმ პრობლემის რეალურად აღმოფხვრა, რომელიც აწუხებს თბილისს და თბილისელებს. ამიტომაც, საჭიროა საკითხის მიმართ სწორი სამართლებრივი და კომპლექსური მიდგომა და სწორი გამოსავლის პოვნა.“ - განაცხადა თბილისის მერობის კანდიდატმა.

  პარტია „ქართული ოცნება-დემოკრატიული საქართველოს“ თბილისის მერობის კანდიდატი კახა კალაძე 2008 წლის აგვისტოს ომის ამსახველ ფოტოგამოფენას - „ომი ჩვენს ობიექტივში“ დაესწრო, რომელიც პარლამენტის ეზოში გაიხსნა.   „ის, რაც 2008 წლის 8 აგვისტოს მოხდა ძალიან მძიმე იყო ჩვენი ქვეყნისთვის და თითოეული ჩვენგანისთვის. ჩვენ დაკვარგეთ გმირი ჯარისკაცები, მოხალისეები და მშვიდობიანი მოსახლეობა. ყველაფერი უნდა გავაკეთოთ იმისთვის, რომ ის გაუცხოება, რაც ბოლო ორი ათწლეულზე მეტია ჩვენსა და ოსებს, ჩვენსა და აფხაზებს შორის არსებობს, სიყვარულით, ძმობით უნდა დავარეგულიროთ, რისთვისაც შესაბამისი ნაბიჯები უნდა გადაიდგას“, - განაცხადა კახა კალაძემ.   გამოფენა „ომი ჩვენს ობიექტივში“, რომელიც პარლამენტის თავმჯდომარე ირაკლი კობახიძემ გახსნა, აგვისტოს ომის ცხრა წლისთავს და ომში დაღუპულ კორესპონდენტებს ეძღვნება. გამოფენის იდეის ავტორი და ერთ-ერთი ორგანიზატორი ფოტორეპორტიორი გიორგი აბდალაძეა. მის რეზონანსულ კადრებთან ერთად, გამოფენაზე ფოტორეპორტიორების - ზურაბ ქურციკიძის, ივანე შლამოვის, ნოდარ ცხვირაშვილის და გლებ გორანიჩის ფოტოებია წარმოდგენილი, რომლებმაც მსოფლიოს ომის რეალური სახე დაანახეს.

  პარტია „ქართული ოცნება-დემოკრატიული საქართველოს“ თბილისის მერობის კანდიდატი, კახა კალაძე, დედაქალაქის ურბანული განვითარების გზებზე საუბრობს. როგორც მერობის კანდიდატი სოციალურ ქსელში გავრცელებულ ვიდეომიმართვაში აღნიშნავს, თითოეულ გაცემულ ნებართვასა და დამტკიცებული პროექტზე გადაწყვეტილება მიღებული იქნება მხოლოდ და მხოლოდ ერთიანი, ურბანული კონცეფციიდან გამომდინარე.   „წლებია თბილისს არ ჰქონია ურბანული განვითარების ერთიანი კონცეფცია; არ ჰქონია მოსახლეობის კეთილდღეობაზე, ჯანმრთელობასა და კომფორტზე მორგებული საცხოვრებელი გარემოს შექმნის გეგმა; არ ჰქონია თბილისის ვიზუალური მხარის, არქიტექტურული უნიკალურობისა და მშენებლობის უსაფრთხოების უზრუნველყოფის ხედვა. ასეთია ჩვენი, სულ მცირე ბოლო 25-წლიანი მემკვიდრეობა და თუ გნებავთ, დანაშაულიც კი. ჩვენი გუნდი აპირებს ერთობლივად, კომპლექსურად, ყველა პრობლემის მოგვარებაზე მუშაობის დაწყებას“, - აცხადებს კალაძე. მისივე თქმით, დედაქალაში ყველა საცხოვრებელი კომპლექსი თუ კორპუსი უნდა აკმაყოფილებდეს არა მარტო უსაფრთხოების ნორმებსა და ხარისხს, არამედ არქიტექტურულ გემოვნებას და ქალაქის ერთიან სტილს. „ქალაქი, ეს არის ერთიანი, ცოცხალი ორგანიზმი, რომელიც ადამიანივით ცოცხლობს და ამიტომ, სიცოცხლისთვის აუცილებელმა კომპონენტმა საათის მექანიზმივით, უნისონში აწყობილად უნდა იმუშაოს“, - აღნიშნავს თბილისის მერობის კანდიდატი.   კახა კალაძე დარწმუნებულია, რომ დედაქალაქის განაშენიანება და განვითარება ჰარმონიული იქნება. „გაძლევთ პირობას, რომ თბილისში დასრულდება ე.წ. ურბანული გენოციდი და ქალაქი თანამედროვე, რაც მთავარია, სიცოცხლით სავსე გახდება. დარწმუნებული ვარ, რომ ჩვენ ამას ძალიან მალე, ერთიანი ძალიხმევით შევძლებთ“, - განაცხადა მან.

  პარტია „ქართული ოცნება-დემოკრატიული საქართველოს“ თბილისის მერობის კანდიდატი კახა კალაძე უახლოეს მომავალში დედაქალაქში განსახორციელებელი პროექტების შესახებ საკუთარ ხედვას წარადგენს. აღნიშნულთან დაკავშირებით, კახა კალაძე ვიდეომიმართვას ავრცელებს და ყურადღებას დედაქალაქში სამუშაო ადგილების შექმნაზე ამახვილებს. „სიცოცხლით სავსე ქალაქი“ - ეს არის თბილისის ცხოვრება. უახლოეს მომავალში ვგეგმავთ, წარმოვადგინოთ ჩვენი ხედვები იმასთან დაკავშირებით, თუ რა პროექტების განხორციელებას ვგეგმავთ მომავალი წლების განმავლობაში. ერთ-ერთი ასეთი მიმართულებაა თბილისის ღამის ცხოვრების განვითარება. ეს მხოლოდ გართობა ან დასვენება არ არის.   პირიქით, ეს პირდაპირ კავშირშია ახალი სამუშაო ადგილების შექმნასთან, მცირე და საშუალო ბიზნესის განვითარებასთან და რაც ყველაზე მთავარი და მნიშვნელოვანია, ჩვენი სიცოცხლით, ენერგიით სავსე ახალგაზრდების ჩართულობასთან“, - განაცხადა კახა კალაძემ. „ქართული ოცნების“ თბილისის მერობის კანდიდატი მიესალმება იმ ფაქტს, რომ ქვეყანაში ტურისტების რაოდენობა ყოველწლიურად იზრდება. „მსგავსი პროექტების განხორციელებით შევძლებთ, უფრო მეტი ტურისტი მოვიზიდოთ, უფრო მიმზიდველი და საინტერესო გახდეს ჩვენი ქვეყანა უცხოელებისთვის. ტურისტული განვითარების მთლიან კონცეფციაში ერთ-ერთ მიმართულებად ღამის თბილისის განვითარებასა და კეთილმოწყობას განვიხილავთ. ეს იქნება სტიმული დასვენებისა და ამ მიმართულებით ბიზნესის კეთების მსურველებისთვის, ხოლო მეორე მხრივ, ღამის წესრიგის დამყარება - იქნება ეს უსაფრთხოების უზრუნველყოფა თუ ხმაურისა და სიწყნარის ზონების გააზრებული გამიჯვნა და დაგეგმარება“, - აცხადებს კახა კალაძე ვიდეომიმართვაში. თბილისის მერობის კანდიდატის თქმით, აღნიშნული პროექტი ახალგაზრდული ინტერესისა და მოტივაციის სფეროს ეხება, რომელთა იდეების განხორციელებისთვის ყველაფერი უნდა გაკეთდეს.

თბილისში სიმსივნით დაავადებულ ბავშვთა სარეაბილიტაციო-სასტუმრო ცენტრი აშენდება. „ბედნიერი სახლის“ საძირკველში დღეს მემორიალური კაფსულა მოთავსდა. ღონისძიებას, მიწვეულ სტუმრებთან ერთად, პარტია “ქართული ოცნება-დემოკრატიული საქართველოს” თბილისის მერობის კანდიდატი კახა კალაძე დაესწრო. სოციალური პროექტის- „ბედნიერი სახლის“ ინიციატორი ბერი ანდრიას სახელობის საქველმოქმედო ფონდია. სარეაბილიტაციო სასტუმრო-სახლი ერთდროულად 20 ბავშვს და მათ მშობლებს გაუწევს მომსახურებას. ასევე იმოქმედებს დღის ცენტრი, სადაც ბავშვები დღის განმავლობაში საჭირო მომსახურებას მიიღებენ.

  პარტია „ქართული ოცნება-დემოკრატიული საქართველოს“ თბილისის მერობის კანდიდატი კახა კალაძე ეროვნულ-დემოკრატიული ინტიტუტის (NDI) მიერ გამოქვეყნებული კვლევის შედეგებს აფასებს. დედაქალაქის მერობის კანდიდატი იმედოვნებს, რომ თბილისელების მხარდაჭერით, ადგილობრივი თვითმმართველობის არჩევნებში გამარჯვებას პირველივე ტურში შეძლებს. „2012 წლიდან მოყოლებული, რაც მე პოლიტიკაში ჩართული ვარ, NDI-ის მიერ ჩატარებული არცერთი კვლევა შედეგებს არ ემთხვეოდა, აბსოლუტურად ყველა ცდომილებაში იყო. ეს კვლევები სხვა რამეს უკავშირდება - მაქსიმალურად ცდილობენ საზოგადოებაში დაამკვიდრონ მოსაზრება იმის შესახებ, რომ არჩევნების მეორე ტური გარდაუვალია“, - განაცხადა კახა კალაძემ.   თბილისის მერობის კანდიდატის შეფასებით, „ქართული ოცნება“ დემოკრატიული ინსტიტუტების გაძლიერებასა და აღნიშნულ პროცესში NDI-ს მონაწილეობას მიესალმება, თუმცა მისი თქმით, ორგანიზაციის მიერ ჩატარებული კვლევები ძალიან ბევრ კითხვას აჩენს. „მინდა დაგარწმუნოთ იმაში, რომ თბილისის და თბილისელების მხარდაჭერით, არჩევნები დედაქალაქში პირველივე ტურში დასრულდება. თუნდაც ის 30%, რაც კვლევის შედეგებშია მოცემული, მაშინ, როდესაც საარჩევნო კამპანია არ დაგვიწყია, მეტყველებს იმაზე, რომ „ქართულ ოცნებასა“ და მის კანდიდატს, ძალიან დიდი მხარდაჭერა აქვს. თბილისელების იმედი მაქვს, რომ ჩვენ პირველივე ტურში აუცილებლად გავიმარჯვებთ. მივესალმებით დემოკრატიული ინსტიტუტების გაძლიერებას და აღნიშნულ პროცესში ამ ორგანიზაციის მონაწილეობას,ეს ძალიან მნიშვნელოვანია, თუმცა კვლევები ბევრ კითხვებს აჩენს და ამ ორგანიზაციის, განსაკუთრებით კი, ქართული ოფისის დისკრედიტაციას იწვევს“, - განაცხადა „ქართული ოცნების“ თბილისის მერობის კანდიდატმა.

პარტია “ქართული ოცნება-დემოკრატიული საქართველოს” თბილისის მერობის კანდიდატი კახა კალაძე მიიჩნევს, რომ შრომითი უსაფრთხოების ზომები უნდა გამკაცრდეს. შესაბამისი ვიდეომიმართვა კახა კალაძემ სოციალური ქსელით გაავრცელა. “სამწუხაროდ, გუშინ სამშენებლო ობიექტებზე ორი ადამიანი დაიღუპა -კოკა მიქიაშვილი და ნუკრი სალია. მინდა, მივუსამძიმრო დაღუპულთა ოჯახის წევრებს, მათ ახლობლებსა და ნათესავებს. ერთხელ და სამუდამოდ უნდა დაესვას წერტილი სამშენებლო ობიექტებზე თანამედროვე სტანდარტების მიღმა არსებულ მდგომარეობას. უნდა ვიზრუნოთ თითოეული ჩვენი თანამოქალაქის კეთილდღეობასა და უსაფრთხოებაზე. აუცილებლად უნდა დაინერგოს მშენებლობის კიდევ უფრო მაღალი სტანდარტები და რეგულაციები. ამ საკითხში ჩვენ ვიქნებით კატეგორიულები, ძალიან პრინციპულები, რათა ეს ყველაფერი მოვიყვანოთ აღსრულებაში, რაც პირდაპირ კავშირშია მშენებლობებზე მომუშავე ადამიანების უსაფრთხოებასთან, მათ ჯანმრთელობასთან. დასაქმებულთა უსაფრთხოება, მათი სიცოცხლის დაცვა უნდა იყოს ნებისმიერი ბიზნესის ამოსავალი წერტილი და უპირველესი ინტერესი,” - აცხადებს კახა კალაძე.

საქართველოს პარლამენტის თავმჯდომარის, პარტია „ქართული ოცნება-დემოკრატიული საქართველოს“ აღმასრულებელი მდივნის, ირაკლი კობახიძის ხელმძღვანელობით, დღეს „ქართული ოცნების” ცენტრალურ ოფისში საპარლამენტო უმრავლესობის წევრებთან შეხვედრა გაიმართა.   შეხვედრაზე პარლამენტის საგაზაფხულო სესიის შედეგები შეაჯამეს და საორგანიზაციო თემებზე იმსჯელეს. საუბარი შეეხო საკონსტიტუციო ცვლილებებთან დაკავშირებით, ოპოზიციური პარტიების წარმომადგენლებთან პოლიტიკური დიალოგისა და კონსულტაციების საკითხებს.

გვსურს, გამოვეხმაუროთ ახალციხის მუნიციპალიტეტის სოფელ ურაველში მომხდარი ფიზიკური დაპირისპირების ფაქტს. პარტია "ქართული ოცნება-დემოკრატიული საქართველო" მომხდარის გამო, შეშფოთებას გამოთქვამს და ვინც უნდა იყოს დაპირისპირების მხარე, ძალადობის ყოველგვარ ფაქტს კატეგორიულად გმობს. მოვუწოდებთ სამართალდამცავ ორგანოებს, სამართალდარღვევის ფაქტზე დროული რეაგირება მოახდინონ. ასევე, მოვუწოდებთ პოლიტიკურ პარტიებს, მსგავსი ფაქტები პოლიტიკური მიზნებისთვის არ გამოიყენონ.