პრემიერ-მინისტრმა, პარტია „ქართული ოცნება - დემოკრატიული საქართველოს“ თავმჯდომარე გიორგი კვირიკაშვილმა ოზურგეთში, გურიის რეგიონის მერობის კანდიდატები წარადგინა.   ადგილობრივი თვითმმართველობის არჩევნებში მერობისთვის პარტიის სახელით, სამი კანდიდატი იბრძოლებს.   ოზურგეთის მერობის კანდიდატი ბეგლარ სიორიძე იქნება; ლანჩხუთის - ალექსანდრე სარიშვილი, ხოლო ჩოხატაურის - ირაკლი კუჭავა.   მთავრობის მეთაურმა მერობის კანდიდატებს მომავალ საქმიანობაში წარმატება უსურვა და განაცხადა, რომ მმართველი გუნდი მათ სრულ ნდობას უცხადებს.   პრემიერ-მინისტრი მერობის კანდიდატებს საქართველოს მასშტაბით, ყველა რეგიონში წარადგენს.

„ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე გლდანის სხვადასხვა მიკრორაიონში მოსახლეობას შეხვდა და მათ საჭიროებებს ადგილზე გაეცნო.   მერობის კანდიდატმა, მოსახლეობასთან შეხვედრისას, ყურადღება სოციალურ, ეკოლოგიურ და ინფრასტრუქტურულ საკითხებზე გაამახვილა.   კახა კალაძის განცხადებით, ძველი რადიოქარხნის ტერიტორიაზე რადიოქალაქის მოწყობა იგეგმება, რომელიც სპორტულ-გამაჯანსაღებელ, გასართობ ინფრასტრუქტურას და სარეკრეაციო ზონებს მოიცავს. გარდა ამისა, რეაბილიტირდება თბილისის დენდროლოგიური პარკი.   მისივე თქმით, ეკოლოგიური მდგომარეობის გამოსწორების მიზნით, მოხდება მუნიციპალური ავტოპარკის განახლება და მეტროსადგურების რეაბილიტაცია. გარდა ამისა, მერია მხარს დაუჭერს ტექდათვალიერების შემოღებას.   თბილისის მერობის კანდიდატის განცხადებით, მერია იზრუნებს მცირე და საშუალო ბიზნესის განვითარებაზე, რათა დედაქალაქში მეტი სამუშაო ადგილი შეიქმნას.   კახა კალაძის თქმით, თავის გუნდთან ერთად იმუშავებს იმისათვის, რომ დედაქალაქს ხელშესახები ცვლილებები დაეტყოს და განვითარება  არამხოლოდ ცენტრალურ უბნებზე, არამედ თბილისის ყველა რაიონზე აისახოს.   თბილისის მერობის კანდიდატმა, მოსახლეობასთან შეხვედრისას, ხაზი გაუსვა ახალგაზრდებში ჯანსაღი ცხოვრების წესის პოპულარიზაციას და განაცხადა, რომ თბილისის რაიონებში სპორტულ-გამაჯანსაღებელი ცენტრები მოეწყობა, რომელიც ყველასთვის ხელმისაწვდომი იქნება.   შეხვედრა კითხვა-პასუხის რეჟიმში გაგრძელდა. გლდანის მცხოვრებლებმა კახა კალაძეს როგორც უბნის, ისე ინდივიდუალური საჭიროებები გააცნეს.   მოსახლეობასთან შეხვედრებს გლდანის მაჟორიტარობის კანდიდატი გულია გოცირიძე, პარლამენტარები მამუკა მდინარაძე და გიორგი ლილუაშვილი ესწრებოდნენ. 

პარტია „ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე, მოქალაქეებს, რომელთაც თბილისის განვითარებაში მონაწილეობის სურვილი აქვთ, თანამშრომლობას სთავაზობს.   როგორც კახა კალაძემ მხარდამჭერთა კლუბის გახსნაზე განაცხადა, მოქალაქეების მხრიდან ბევრი სატელეფონო ზარი და შეტყობინება განხორციელდა, რომლებიც ინტერესდებიან, თუ როგორ შეიძლება ჩაერთონ იმ პროცესებში, რაც თბილისის განვითარებისთვის უნდა დაიწყოს და სად შეიძლება წარადგინონ საკუთარი იდეები ამ მიმართულებით.   „ამიტომ გადავწყვიტეთ, გაგვეკეთებინა თბილისის გულშემატკივართა თავშეყრის ადგილი, სადაც მოვლენ ადამიანები, რომლებსაც სურვილი აქვთ მონაწილეობა მიიღონ ქალაქის განვითარებაში. ეს ადგილი იმუშავებს ყოველდღიურ რეჟიმში, შეგიძლიათ მოხვიდეთ ნებისმიერ დროს, მოგვაწოდოთ თქვენი იდეები, ხედვები - ჩვენ მზად ვართ, გავიზიაროთ“, - განაცხადა თბილისის მერობის კანდიდატმა.   კახა კალაძემ დედაქალაქის მერის პასუხისმგებლობაზეც ისაუბრა და აღნიშნა, რომ ის ამ ბრძოლაში მარტო არ არის.   რუსთაველის გამზირზე, პარტია „ქართული ოცნება - დემოკრატიული საქართველოს“ თბილისის მერობის კანდიდატის მხარდამჭერთა კლუბი გაიხსნა, რომელსაც თემურ მიქელაძე უხელმძღვანელებს.

  პარტია „ქართული ოცნება - დემოკრატიული საქართველოს“ თბილისის მერობის კანდიდატმა კახა კალაძემ თბილისის სხვადასხვა უბნების შემოვლა და მოსახლეობის საჭიროებების გაცნობა დაიწყო. მერობის კანდიდატმა პირველი შეხვედრა დღეს, მთაწმინდის რაიონის მოსახლეობასთან გამართა. კახა კალაძემ იმ ძირითად მიმართულებებზე ისაუბრა, რომელზეც მუშაობას გეგმავს.   მერობის კანდიდატი ეკოლოგიური მდგომარეობის გაუმჯობესებით მიზნით, არსებული სკვერების მოვლა-პატრონობის გარდა, რეკრეაციული სივრცეების მოწყობასაც გეგმავს. „ვგეგმავთ მასშტაბური პარკების მოწყობას. ერთ-ერთია დენდროლოგიური პარკი, რომელიც დასვენების საუკეთესო ადგილი იქნება. ასევე, დაწყებულია თბილისის ზღვაზე ზოოპარკის მოწყობა. ეს პროექტი გაგრძელდება, ხოლო ახლანდელი ზოოპარკის ტერიტორია და „მზიური“ საფეხმავლო ხიდით დაუკავშირდება და დასასვენებლად ერთიანი მწვანე სივრცე მოეწყობა“, - განაცხადა თბილისის მერობის კანდიდატმა.   კახა კალაძის თქმით, ის არ დაუშვებს, რომ სკვერებსა და სპორტულ მოედნებზე საცხოვრებელი სახლები აშენდეს. მისივე განცხადებით, ეკოლოგიური მდგომარეობის გაუმჯობესების მიზნით, მუნიციპალური ავტოპარკის განახლება, მეტროსადგურების რეაბილიტაცია და ახალი საბაგირო ხაზების დაპროექტება მოხდება. გარდა ამისა, მერია მხარს დაუჭერს ავტომობილების ტექნიკური დათვალიერების შემოღებას. კახა კალაძე მთაწმინდის მოსახლეობას დაჰპირდა, რომ ძველი თბილისის ისტორიული შენობების რეაბილიტაციაზე, თბილისის იერსახეზე და ვიზუალური სტანდარტის შექმნაზე იზრუნებს. მოსახლეობას „ქართული ოცნების“ მერობის კანდიდატთან ერთად, საკრებულოს მთაწმინდის მაჟორიტარობის კანდიდატი ჯაბა ჯიშკარიანი, კახა კალაძის საარჩევნო შტაბის ხელმძღვანელი არჩილ თალაკვაძე და საპარლამენტო უმრავლესობის წევრი მამუკა მდინარაძეც შეხვდნენ.

პარტია „ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე ჩუღურეთის მოსახლეობას შეხვდა და მაჟორიტარობის კანდიდატი რიმა ბერაძე წარუდგინა. „ადამიანი, რომელიც ჩემთან ერთად იბრძოლებს ყოველდღიურად, რომ იმ პრობლემების მოგვარება შევძლოთ, რომელიც ყველა ჩვენგანს გვაწუხებს“, - ასე შეაფასა თანაგუნდელი კახა კალაძემ. მისივე თქმით, თბილისის, კერძოდ, ჩუღურეთის პრობლემებს ძალიან კარგად იცნობს და მათ გადაწყვეტას მისი გუნდის დახმარებითა და მოსახლეობის ჩართულობით გეგმავს. „ჩუღურეთის მოსახლეობამ ძალიან კარგად იცის, რას ნიშნავს ძველი თბილისის ახალი სიცოცხლე აღმაშენებლის მაგალითზე. რა თქმა უნდა, ეს პროცესი მომავალშიც გაგრძელდება. იქნება განვითარება, მხოლოდ და მხოლოდ წინსვლა და გამარჯვება. ჩვენ ძალიან ხშირად შევხვდებით, არჩევნებამდე და არჩევნების შემდეგაც, რადგან როგორც გითხარით, მხოლოდ თქვენთან ერთად, თქვენი დახმარებითაა შესაძლებელი არსებული პრობლემების მოგვარება“, - აღნიშნა თბილისის მერობის კანდიდატმა.   კახა კალაძის განმარტებით, ეკოლოგიური პრობლემების გადაჭრის, სკოლამდელი განათლების, სოციალური პროგრამებისა და ჯანსაღი ცხოვრების წესის დანერგვის მიმართულებით აქტიურად იმუშავებს. „ბოლო სამი წლის განმავლობაში, დედაქალაქში 12 ახალი ბაღი გაიხსნა. მიმდინარეობს ათი საბავშვო ბაღის მშენებლობა, რომელიც მომავალ წელს დასრულდება. რა თქმა უნდა, ეს პროცესი გაგრძელდება, რადგან ჩვენს შვილებს ყველანაირი პირობა უნდა შევუქმნათ. სპორტი და სპორტული ცხოვრება - ეს ჩვენთვის ერთ-ერთი პრიორიტეტი იქნება. ჯანსაღი ცხოვრება ყველა თაობისთვის; განვითარება ყველა უბანში და არა მხოლოდ ცენტრალური უბნებისთვის; ძველი თბილისის - არა მხოლოდ კონკრეტული ქუჩების, არამედ მასშტაბური უბნების რეაბილიტაცია. მერიის პროგრამები გაგრძელდება მანამ, სანამ თბილისის თითოეული მცხოვრები შეძლებული და წელგამართული არ იქნება“, - განაცხადა კახა კალაძემ.   ლონდონის ბაღში შეკრებილ მოსახლეობას სიტყვით ჩუღურეთის მაჟორიტარობის კანდიდატმა რიმა ბერაძემაც მიმართა, რომელმაც მმართველ გუნდსა და მხარდამჭერებს მადლობა გადაუხადა. „ქართული ოცნების“ გუნდმა ჩუღურეთის მაჟორიტარი დეპუტატობის კანდიდატად კიდევ ერთხელ დამასახელა. ჩემთვის ორმაგი პატივია, ვიყო იმ გუნდის წევრი, რომელსაც კახა კალაძე ხელმძღვანელობს და რომელსაც ძალიან კარგად გამოსდის კაპიტნობა. მან კარგად იცის, თუ რა სჭირდება დედაქალაქს და შეუძლია, თბილისი სიცოცხლის ქალაქად გადააქციოს“, - განაცხადა რიმა ბერაძემ.   ამომრჩევლებთან შეხვედრას ასევე, განათლებისა და მეცნიერების მინისტრი ალექსანდრე ჯეჯელავა, საპარლამენტო უმრავლესობის ლიდერი, კახა კალაძის საარჩევნო შტაბის ხელმძღვანელი არჩილ თალაკვაძე და თბილისის საკრებულოს თავმჯდომარე გიორგი ალიბეგაშვილი ესწრებოდნენ.

„თბილისი გაიმარჯვებს!“ - ამგვარი წარწერა დატოვა პარტია „ქართული ოცნება - დემოკრატიული საქართველოს“ თბილისის მერობის კანდიდატმა კახა კალაძემ დედაენის ბაღში მოწყობილ სახელდახელო დაფაზე.   მერობის კანდიდატი წერა-კითხვის დღისადმი მიძღვნილ ღონისძიებას დაესწრო, რომელიც პარტიის ახალგაზრდული ორგანიზაციის ინიციატივით გაიმართა. ღონისძიების ფარგლებში, ხელნაწერების გამოფენა და პოეზიის საღამო მოეწყო, რომელშიც ახალგაზრდა პოეტები მონაწილეობდნენ. ასევე, გაიმართა კონკურსი საუკეთესო კალიგრაფიის მქონე ახალგაზრდების გამოსავლენად.   როგორც პარტიის ახალგაზრდული ორგანიზაციის ხელმძღვანელმა გიორგი ჩაკვეტაძემ აღნიშნა, დღევანდელი ღონისძიების მიზანი ახალგაზრდების წიგნიერების ამაღლება იყო. „ქართული ოცნების“ ახალგაზრდული ორგანიზაცია წერა-კითხვისა და წიგნიერების საერთაშორისო დღეს აღნიშნავს. მიგვაჩნია, რომ მსგავსი ღონისძიებით ახალგაზრდებში მაქსიმალურად შევეცდებით, რომ ამ კუთხით არსებული ინტერესები გავაღრმავოთ. ღონისძიებამ ახალგაზრდების დიდი ინტერესი გამოიწვია“, - განაცხადა გიორგი ჩაკვეტაძემ და ღონისძიების მონაწილეებს მადლობა გადაუხადა.

  პარტია „ქართული ოცნება - დემოკრატიული საქართველოს“ თბილისის მერობის კანდიდატმა კახა კალაძემ საბურთალოს მოსახლეობას მაჟორიტარობის კანდიდატები წარუდგინა. საბურთალოს მაჟორიტარობისთვის „ქართული ოცნებიდან“ ავთანდილ ცინცაძე, ვახტანგ შაქარიშვილი და დავით უთმელიძე იბრძოლებენ. კალაძის თქმით, ის ქალაქის მართვისთვის საჭირო პასუხისმგებლობას გრძნობს და ხედავს გამოწვევებს, რომელიც დასაძლევია. „როდესაც გუნდში მსჯელობა მიდიოდა და შემოთავაზება მივიღე, დაფიქრების დრო ვითხოვე. განა იმიტომ, რომ შემეშინდა და ბრძოლის მეშინია - არა. უბრალოდ ვიცოდი, თუ რამხელა ტვირთია და რა გამოწვევებია. ეს გადაწყვეტილება იმიტომ მივიღე, რომ თბილისელების იმედი მაქვს. მჯერა, რომ ამ ბრძოლაში მარტო არ ვარ. თქვენთან ერთად შევძლებთ ყველა იმ პრობლემის მოგვარებას, რომელიც აქტუალურია და ქალაქს აწუხებს“, - განაცხადა მერობის კანდიდატმა.   კახა კალაძემ ამომრჩეველთა ყურადღება ქალაქში არსებულ ეკოლოგიურ პრობლემებზე და ხეების ჭრის ფაქტზე გაამახვილა. „ნამდვილად გულდასაწყვეტია ისეთი ფაქტები, როცა გაურკვეველი ადამიანი, გაურკვეველი კომპანია, იმისთვის, რომ ჯიბე გაისქელოს და საკუთარი ბიზნესი გამართოს, ერთ-ერთ სკვერში ჩუმად შედის და ხეებს ჭრის. ეს ფაქტი სამწუხაროდ, გუშინ, თამარაშვილის ქუჩაზე მოხდა. მინდა დაგარწმუნოთ, რომ ძალიან პრინციპული ვიქნებით - არც ერთ სკვერში, არც ერთ ბაღში, არც ერთი სტადიონის ადგილზე საცხოვრებელი კორპუსები არ აშენდება“, - განაცხადა კახა კალაძემ. მისივე თქმით, ყველა მძიმე დაავადება სწორედ ეკოლოგიური პრობლემებით, გამონაბოლქვითა და გაუმართავი სატრანსპორტო საშუალებებით არის გამოწვეული, რის მოგვარებასაც არჩევნების შემდეგ, დიდი ძალისხმევით შეუდგება.   თბილისის მერობის კანდიდატმა იმ შვიდ პოლიტიკაზეც ისაუბრა, რომელიც სხვადასხვა მიმართულებით საარჩევნო ხედვების ფარგლებში ჩამოყალიბდა და განაცხადა, რომ უახლოეს დღეებში, მათი დეტალური განხილვა იგეგმება. წითელ ბაღში შეკრებილ მოსახლეობას სიტყვით საბურთალოს მაჟორიტარობის ერთ-ერთმა კანდიდატმა ავთანდილ ცინცაძემაც მიმართა და მათ მხარდამჭერისთვის მადლობა გადაუხადა. „მსოფლიო ასპარეზზე, საქართველოს სახელით არაერთხელ მიბრძოლია. გამარჯვების ქართული დროშაც არაერთხელ ამიფრიალებია. ახლა კი, თბილისის გამარჯვებისთვის ვიბრძოლებ. ვარ ამაყი, რომ საქართველოს სახელით მებრძოლი კახა კალაძის გვერდით ვდგავარ. მინდა ჩემი წვლილი შევიტანო თბილისის განახლების იმ დიდი გეგმის განხორციელებაში, რომელიც ჩვენმა გუნდმა შეიმუშავა და მჯერა, რომ ამ წარმატებას აუცილებლად მივაღწევთ“, - განაცხადა ავთანდილ ცინცაძემ.   მხარდამჭერებს ასევე, მადლობა გადაუხადა და გამარჯვების იმედი გამოთქვა მაჟორიტარობის კიდევ ერთმა კანდიდატმა ვახტანგ შაქარიშვილმა. „საოცარი ერთიანობა აჩვენა დღეს საბურთალომ, დიდი მადლობა ამისთვის. სწორედ ეს ერთიანობა მარწმუნებს, რომ 21 ოქტომბერს, თვითმმართველობის არჩევნებში „ქართული ოცნება“ დამაჯერებელ გამარჯვებას მოიპოვებს. ჩემთვის საამაყო და საპასუხისმგებლოა - ვიდგე თქვენს წინაშე და მომავალი ოთხი წლის განმავლობაში მქონდეს საშუალება, გემსახუროთ თქვენ - საბურთალოელებს, ვემსახურო თბილისს“, - განუცხადა ამომრჩევლებს ვახტანგ შაქარიშვილმა.

  პარტია „ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე ისნის მოსახლეობას შეხვდა და საკრებულოს მაჟორიტარობის კანდიდატები წარუდგინა. ისნის მაჟორიტარობის კანდიდატები „ქართული ოცნებიდან“ ილია ჯიშკარიანი, ნინო ლაცაბიძე და ლევან დავითაშვილი არიან.   „ეს ადამიანები მომავალი ოთხი წლის განმავლობაში საკრებულოში ყველა იმ პრობლემის გამზიარებელი იქნებიან, რომლებიც თქვენს რაიონში მცხოვრებ ადამიანებს აწუხებთ“, - განაცხადა კახა კალაძემ კანდიდატების წარდგენისას. შეხვედრაზე თბილისის მერობის კანდიდატმა ხაზი ეკოლოგიის მიმართულებით არსებულ გამოწვევებს გაუსვა და აღნიშნა, რომ ახალი გუნდი არამარტო არსებული პარკებისა და სკვერების მოწესრიგებაზე, არამედ ახალი რეკრეაციული ზონების შექმნაზეც იზრუნებს. მისივე თქმით, მნიშვნელოვანია, მუნიციპალური ტრანსპორტის მოწესრიგება და განახლება. „ოთხი წლის განმავლობაში, მუნიციპალური ტრანსპორტის სრულიად განახლებას მოვახერხებთ. ძველი, ყვითელი ავტობუსები ახალი, თანამედროვე, ევროპული ტიპის ავტობუსებით ჩანაცვლდება. საზოგადოებრივი ტრანსპორტი არა მხოლოდ კომფორტული უნდა გახდეს, არამედ პოპულარულიც უნდა იყოს და პირველი ვიქნები, ვინც ამის პოპულარიზაციაში ძალიან მნიშვნელოვან წვლილს შეიტანს. ძალიან მნიშვნელოვანია მეტროს განახლება-მოწესრიგება. ყველაფერს გავაკეთებთ, რომ მომავალი ოთხი წლის განმავლობაში, ამაზე ვიმუშაოთ და მეტროს, როგორც ვაგონების განახლება, ასევე, მეტროსადგურების რეაბილიტაცია შევძლოთ“, - განაცხადა კახა კალაძემ.   მისივე თქმით, ის პროგრამები გაგრძელდება, რომელსაც თბილისის მერია ჯანდაცვისა და სოციალური უზრუნველყოფის მიმართულებით ახორციელებს. „პირადად ჩემთვის და ჩვენი გუნდისთვის, ყველაზე მნიშვნელოვანი ადამიანია. ყველა ის რეფორმა, რომელიც ბოლო წლების განმავლობაში განხორციელდა, ზუსტად ადამიანის კეთილდღეობაზე იყო ორიენტირებული. მიუხედავად იმისა, რომ ბევრი საქმე გაკეთდა, ბევრი რეფორმა და პროექტი განხორციელდა, თავს ნუ მოვიტყუებთ. ძალიან კარგად ვიცით, რომ ქვეყანაში, დედაქალაქში ბევრი პრობლემაა, მაგრამ თუ ერთად დავდგებით, ერთიანი ძალისხმევით ამ პრობლემების მოგვარებას შევძლებთ“, - განაცხადა თბილისის მერობის კანდიდატმა.   მოქალაქეებს მისასალმებელი სიტყვით ასევე, რაიონის მაჟორიტარობის კანდიდატებმა მიმართეს და მხარდაჭერისკენ მოუწოდეს. როგორც ილია ჯიშკარიანმა აღნიშნა, მხარდამჭერებმა ნდობა მას ოთხი წლის წინაც გამოუცხადეს და სწორედ ამ ნდობით და დიდი პასუხისმგებლობით ცდილობდა, საკრებულოში თითოეული მათგანის პრობლემა მიეტანა. „რაიონში ბევრი რამ გაკეთდა და კეთდება დღესაც, მათ შორის, მიმდინარეობს ჩვენი 150 წლის სომხური თეატრის რეაბილიტაცია, რომელსაც ფონდი „ქართუ“ ახორციელებს“, - განაცხადა ჯიშკარიანმა. მაჟორიტარობის კანდიდატის თქმით, ინფრასტრუქტურული პროექტები და კულტურული მემკვიდრეობის რეაბილიტაცია ისანში მომავალშიც გაგრძელდება. ამომრჩევლებს სოციალური პრობლემატიკის მოგვარებას ჰპირდება მაჟორიტარობის კიდევ ერთი კანდიდატი ნინო ლაცაბიძე. მისი თქმით, სოციალურად დაუცველებს დღემდე აქვთ საცხოვრისის, წყლისა და დენის პრობლემები და ეს რაიონში მთავარ გამოწვევად რჩება, რაზეც აქტიური მუშაობის დაწყებას გეგმავს. „ერთია იცოდე, რა აწუხებს შენს უბანს, ქალაქს და მეორე - გქონდეს რეალური შესაძლებლობა, რომ ეს პრობლემები ღირსეულად გადაჭრა. სწორედ ამ შესაძლებლობას მაძლევს „ქართული ოცნება“ და თქვენთან ერთად, ამ გამოცხადებული ნდობით შევძლებ, რომ ეს რაიონი უფრო კომფორტული გახდეს“, - განაცხადა ლაცაბიძემ.   ისანში შეკრებილ მხარდამჭერებს მისასალმებელი სიტყვით ასევე, მიმართეს საპარლამენტო უმრავლესობის წევრმა მამუკა მდინარაძემ და ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების მინისტრმა სოზარ სუბარმა.

  „ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე ნაძალადევის რაიონის მოსახლეობას შეხვდა და საკრებულოს მაჟორიტარობის კანდიდატები წარუდგინა. კახა კალაძემ კიკვიძის ბაღში შეკრებილ მოქალაქეებს მხარდაჭერისთვის მადლობა გადაუხადა და დედაქალაქში არსებული პრობლემების მოგვარებაზე ისაუბრა. როგორც მერობის კანდიდატმა შეხვედრაზე აღნიშნა, ყველა ის პრობლემა, რომელიც თბილისსა და თბილისელებს აწუხებს, ერთიანი ძალისხმევით მოგვარდება.   „ვიცით, რომ ქალაქში ეკოლოგიური მდგომარეობა მძიმეა. ამას, რა თქმა უნდა, მოგვარება სჭირდება. საჭიროა, ახალი სკვერების გაშენება, ხოლო იმას, რაც გვაქვს, მოვლა-პატრონობა სჭირდება. დენდროლოგიურ პარკში მდგომარეობა არც თუ ისე სახარბიელოა, თუმცა ძალიან მალე თბილისს დენდროლოგიური პარკის სახით, დასვენებისთვის ერთ-ერთი საუკეთესო ადგილი ექნება“, - განაცხადა კახა კალაძემ.   მისივე თქმით, ერთ-ერთი მნიშვნელოვანი პრობლემა, რომელიც დედაქალაქის მოსახლეობას აწუხებს, საზოგადოებრივი ტრანსპორტია. შესაბამისად, მომავალი ოთხი წლის განმავლობაში, არსებული ყვითელი ავტობუსები ახალი ავტობუსებით ჩანაცვლდება, ხოლო მეტროს ვაგონების რეაბილიტაცია მოხდება. „თბილისის მერია მომავალშიც განაგრძობს იმ სოციალური პროგრამების განხორციელებას, რომელსაც ბევრი ადამიანი იყენებს, თუმცა ჩვენი მთავარი მიზანი და ამოცანა უნდა იყოს არა ამ პროგრამების განხორციელება, არამედ უნდა შევქმნათ ისეთი გარემო, რომ ქალაქში რაც შეიძლება მეტი სამუშაო ადგილი გაჩნდეს, მეტი დასაქმებული და ნაკლები სოციალურად დაუცველი ადამიანი არსებობდეს“, - აღნიშნა მერობის კანდიდატმა მოსახლეობასთან შეხვედრაზე. კახა კალაძემ ქალაქის მერის პასუხისმგებლობაზეც ისაუბრა და აღნიშნა, რომ არსებული პრობლემების მოგვარებას თბილისელებთან ერთად აპირებს.   „არ არის იოლი საქმე იყო თბილისის მერე, მაგრამ ფიქრის შემდეგ ეს გადაწვეტილება მივიღე. ვიცი, რომ ზურგს თქვენნაირი ადამიანები მიმაგრებენ. ვიცი, რომ ბრძოლაში მარტო არ ვარ და მე თქვენთან ერთად ვაპირებ ყველა იმ პრობლემის მოგვარებას, რომელიც გაწუხებთ. არ დავიღლები ვიმუშაო იმისთვის, რომ თითოეული თბილისელი გახარებული იყოს. მჯერა, რომ უახლოეს მომავალში ჩვენი ქალაქი სიცოცხლით სავსე იქნება“, - მიმართა კახა კალაძემ ამომრჩევლებს. ნდობის გამოცხადებისთვის ნაძალადევის მაჟორიტარობის კანდიდატებმა - მიხეილ ამაშუკელმა, ალექსანდრე ხუჯაძემ, თამარ ტალიაშვილმა და დავით ჭელიძემ „ქართულ ოცნებას“ მადლობა გადაუხადეს და მხარდამჭერებს სიტყვით მიმართეს. „ყველაზე დიდი პასუხისმგებლობა ხალხზე ზრუნვაა და იმედი მაქვს, თანადგომით შევძლებთ პრობლემების მოგვარებას. იმ გუნდის წევრი ვარ, რომლისთვისაც ადამიანის კეთილდღეობა მთავარი ღირებულებაა და ჩვენ ერთად უნდა გავაკეთოთ სწორი არჩევანი”, - განაცხადა დავით ჭელიძემ და მოქალაქეებს მხარდაჭერისკენ მოუწოდა. ამომრჩევლებს სიტყვით ასევე, მიმართა თამარ ტალიაშვილმა. მაჟორიტარობის კანდიდატის განცხადებით, სამი წლის წინ, როდესაც მმართველ გუნდთან ერთად თბილისის საკრებულოში მივიდა, ძალიან ბევრი საკითხი მოუგვარებელი დახვდა. „ჩვენ მოგვიწია ყველა მიმართულების თავიდან მოწესრიგება. ძალა, რომელიც გვაძლიერებდა ამ საქმეში, იყო თქვენი მხარდაჭერა და ერთგულება. საბავშო ბაღები, კულტურა, აღზრდა, განათლება - ეს ყველა თქვენგანს ეხება, ეს ჩვენი შვილების მომავალი დღეა. საქმე დაწყებულია და დედაქალაქის განვითარება ახალი ენერგიით უფრო უნდა გავაძლიეროთ ”, - განაცხადა ტალიაშვილმა. „ქართული ოცნების“ თბილისის მერობის კანდიდატმა მაჟორიტარობის კანდიდატები დღეს ისნის მოსახლეობასაც წარუდგინა.

  „ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე მთაწმინდის მოსახლეობას შეხვდა და მათ საკრებულოს მაჟორიტარობის კანდიდატი ჯაბა ჯიშკარიანი წარუდგინა.   მერობის კანდიდატმა ბესიკის ქუჩაზე მდებარე სკვერში შეკრებილ მოსახლეობას მისასალმებელი სიტყვით მიმართა და მხარდაჭერისთვის მადლობა გადაუხადა.   კალაძის განცხადებით, ქალაქის მერის პასუხისმგებლობა და ის პრობლემები, რომელიც დასაძლევია, კარგად აქვს გაცნობიერებული.   „ჩვენ წარმოვადგინეთ ის ხედვები, თუ რა გაკეთდება მომდევნო ოთხ წელიწადში, თუმცა მომავალი დღეების განმავლობაში ვგეგმავთ, ძირეულად გავაცნოთ საზოგადოებას ის პროექტები, რომლებიც ჩვენს დედაქალაქში განხორციელდება. ძალიან კარგად გვესმის, რომ ქალაქში მძიმე ეკოლოგიური მდგომარეობაა. ძალიან კარგად გვესმის, რომ მოსაწესრიგებელია ტრანსპორტი, ქაოტური განაშენიანება, უსახური შენობები - ეს ყველაფერი მოგვარებადია. ამ ყველაფერს სჭირდება ერთობა და ერთიანი ძალისხმევით, მათ მოგვარებას შევძლებთ“, - განაცხადა თბილისის მერობის კანდიდატმა.   კახა კალაძის თქმით, გუნდი ერთიანი ძალებით, პირველივე დღიდან შეუდგება იმ პრობლემების დაძლევას, რომელიც მთაწმინდას და მთელ თბილისს აწუხებს.   „რა თქმა უნდა, ამას სჭირდება სახელისუფლო მხარდაჭერა, რომელიც ჩვენ დღეს გვაქვს. ჩვენს გუნდთან ერთად, თქვენს მაჟორიტართან ერთად, პირველივე დღიდან ძირეულად დავიწყებთ იმ პრობლემების მოგვარებას, რომელიც ამ რაიონს აქვს. ჩვენ ძველი თბილისის განვითარების საკმაოდ ამბიციური გეგმა გვაქვს. ეს იქნება დამატებითი სტიმული - ახალი სიცოცხლე ძველი თბილისისთვის. კარგად ვიცი ავარიული სახლების პრობლემა, რომელიც თქვენს რაიონშია, კარგად ვიცი ის პრობლემები, რომელიც კომუნიკაციების მიმართულებით გაქვთ. ეს ყველაფერი გაკეთდება და ჩვენ ამას ერთობლივად აუცილებლად შევძლებთ. რაც მთავარია, ჩვენ მოვახერხებთ იმას, რომ თბილისი ძალიან მალე, ძალიან სწრაფად იყოს სიცოცხლით სავსე ქალაქი“, - აღნიშნა „ქართული ოცნების“ თბილისის მერობის კანდიდატმა.   კახა კალაძემ ამომრჩეველს რამდენიმეწლიანი მხარდაჭერის გამო, მადლობა კიდევ ერთხელ გადაუხადა და აღნიშნა, რომ გუნდი მხარდამჭერებთან შეხვედრებს აქტიურად განაგრძობს.   „ჩვენ მივალთ ყველა რაიონში, ყველა უბანში, მაქსიმალურად შევეცდებით, რომ გავესაუბროთ თითოეულ თბილისელს, რათა ერთად გავიაზროთ თუ რა უნდა გაკეთდეს სამომავლოდ. ამიტომ, ჩვენ გვექნება ძალიან ბევრი შეხვედრები როგორც მთაწმინდის, ისე თბილისის სხვა რაიონებში“, - განაცხადა თბილისის მერობის კანდიდატმა.   შეხვედრაზე მისულ ამომრჩეველსა და „ქართული ოცნების“ გუნდს მადლობა მაჟორიტარობის კანდიდატმა ჯაბა ჯიშკარიანმაც გადაუხადა.   „მადლობა ჩემ გუნდს, რომელმაც ჩემდამი დიდი ნდობა კიდევ ერთხელ გამოიჩინა. ძალიან ბედნიერი ვარ, რომ კიდევ ოთხი წლის განმავლობაში მეძლევა შესაძლებლობა, მთაწმინდაზე ვიზრუნო. უკვე ოთხი წელია მხარდამხარ მოვდივართ და თითოეული თქვენგანის პრობლემის გადაწყვეტაში ერთიანად ვართ ჩართული“, - განაცხადა ჯაბა ჯიშკარიანმა.   მისი თქმით, უბნის პრობლემებს კარგად იცნობს და მათი მოგვარებისთვის კახა კალაძესთან და მის გუნდთან ერთად, მომავალი ოთხი წლის განმავლობაშიც იზრუნებს.   „ბედნიერი ვარ, რომ თბილისი არ არის პოლიტიკური დევნის ქალაქი და თქვენ მარტივად, ძალიან ღიად და გამჭვირვალედ შეგიძლიათ შეაფასოთ, თუ როგორი ოთხი წელი გავიარეთ თითოეულმა ჩვენგანმა ერთად. დარწმუნებული ვარ, რომ კახა კალაძესთან ერთად, სიცოცხლით სავსე ქალაქს ავაშენებთ“, - მიმართა მაჟორიტარობის კანდიდატმა საკუთარ მხარდამჭერებს.   ადგილობრივი თვითმმართველობის არჩევნებში მონაწილე თანაგუნდელებს წარმატება უსურვეს და მხარდამჭერებს, ასევე, სიტყვით მიმართეს საპარლამენტო უმრავლესობის წევრმა მამუკა მდინარაძემ და შრომის, ჯანმრთელობისა და სოციალური დაცვის მინისტრმა დავით სერგეენკომ.

  პარტია „ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე გლდანის მოსახლეობას შეხვდა და მაჟორიტარობის კანდიდატები წარუდგინა. გლდანის რაიონში მაჟორიტარობისთვის „ქართული ოცნებიდან“ ოთხი კანდიდატი - ოთარ გრიგოლია, შალვა ოგბაიძე, გულია გოცირიძე, ქეთევან ჯოხაძე იბრძოლებს. მერობის კანდიდატმა მოსახლეობასთან შეხვედრაზე ბავშვობა გაიხსენა და აღნიშნა, რომ მისი კარიერული წინსვლა სწორედ გლდანის რაიონიდან დაიწყო. „ჩემი წარმატება ზუსტად ამ რაიონიდან და კონკრეტულად, ამ ადგილიდან - გლდანის მესამე მიკრო რაიონიდან დაიწყო. სულ რაღაც 13 წლის ვიყავი, როდესაც სამტრედიიდან ჩამოვედი. არ მქონდა სახლი და ვცხოვრობდი აქ, გლდანში, მესამე მიკრო რაიონში, მეოთხე კორპუსში, მამიდასთან. მინდა ამ რაიონს დღეს განსაკუთრებული მადლობა ვუთხრა“, - განაცხადა კახა კალაძემ.   მისი თქმით, გლდანში და ზოგადად, თბილისში არსებული პრობლემების მოგვარება ადვილი არ იქნება. „ჩვენს ქალაქში ცხოვრება გაუსაძლისი გახდება, თუ დროულად არ მოვაგვარეთ ეკოლოგიის პრობლემა, თუ არ მოგვარდა თბილისის მუნიციპალური ტრანსპორტის პრობლემა, თუ არ მოხდა მეტროსადგურების განახლება. ჩვენდა სამწუხაროდ, ჯერ კიდევ ბევრ ადამიანს უჭირს, ბევრს სჭირდება სოციალური დახმარება. მიუხედავად იმისა, რომ ამ მიმართულებით ძალიან მნიშვნელოვანი რეფორმები განხორციელდა, ჩვენ აუცილებლად გავაგრძელებთ მუშაობას და ამ მიმართულებით ადამიანების დახმარებას“, - განაცხადა, თბილისის მერობის კანდიდატმა და აღნიშნა, რომ პრობლემურ საკითხებს მერია, საკრებულო და ცენტრალური ხელისუფლება ერთად მოაგვარებენ.   კახა კალაძის თქმით, საგზაო და საკომუნიკაციო პრობლემების გარდა, გადაიჭრება იმ სტადიონების პრობლემაც, რომელიც კერძო საკუთრებაშია და მათ ადგილას მშენებლობა იგეგმება. მერობის კანდიდატმა მოსახლეობას პირობა მისცა, რომ სკვერებსა და მოედნებზე საცხოვრებელი კორპუსები არ აშენდება. მან ასევე, გლდანის რაიონში დაგეგმილ მსხვილ ინფრასტრუქტურულ პროექტებზეც ისაუბრა. „მუხიანში მდებარეობს ყოფილი რადიო ქარხნის ტერიტორია, რომელიც ძალიან მძიმე მდგომარეობაშია. ვაპირებთ, რომ ამ ტერიტორიაზე ახალი რადიო ქალაქი ავაშენოთ, რომელიც იქნება გლდანში, მუხიანში, ავჭალაში, ზაჰესში მცხოვრები ადამიანებისთვის ერთ-ერთი საუკეთესო დასვენების ადგილი. ეს იქნება ადგილი, სადაც ყველა თაობის წარმომადგენელს ექნება შესაძლებლობა, კომფორტულ, სასიამოვნო გარემოში დაისვენოს. ამ ადგილას ავაშენებთ გამაჯანსაღებელ ცენტრს, ახალგაზრდებისთვის დასასვენებელ ადგილს, კაფე-ბარებს იმისთვის, რომ არამარტო ამ რაიონში მცხოვრებ ადამიანებს, არამედ მთელი თბილისის მოსახლეობას ჰქონდეს შესაძლებლობა, რომ მოვიდეს და დაისვენოს“, - განაცხადა კახა კალაძემ და აღნიშნა, რომ თბილისის დენდროლოგიური პარკის კეთილმოწყობაც მოხდება. მხარდამჭერებს სიტყვით მაჟორიტარობის კანდიდატებმაც მიმართეს.   ოთარ გრიგოლიას განცხადებით, საკუთარი თანამოქალაქეების პრობლემებსა და კეთილდღეობაზე მუშაობა მისთვის უდიდესი გამოწვევაა. „ჩვენ გვაერთიანებს ქალაქის სიყვარული და ერთიანი საზრუნავი, რომელიც ამ ქალაქს აქვს. ამიტომ, წინ ვერაფერი დაგვიდგება“, - განაცხადა მაჟორიტარობის კანდიდატმა. გრიგოლიას თქმით, იმ გუნდთან ერთად, რომელსაც დღეს თავადაც წარმოადგენს, ყველა რესურს გამოიყენებს იმისთვის, რომ თბილისი და გლდანის რაიონი უკეთესი გახდეს.   ამომრჩევლებს, განსაკუთრებით კი ახალგაზრდებს სიტყვით ასევე, შალვა ოგბაიძემ მიმართა. როგორც მაჟორიტარობის კანდიდატმა აღნიშნა, სწორედ ახალგაზრდებმა, მომავალმა თაობამ უნდა აავსოს ქალაქი სიცოცხლით. მაჟორიტარობის კანდიდატმა ყურადღება რაიონში უკვე განხორციელებულ ინფრასტრუქტურულ თუ სოციალურ პროექტებზე გაამახვილა და აღნიშნა, რომ რაიონის ინფრასტრუქტურის კიდევ უფრო განვითარებას საკუთარ გუნდთან ერთად შეძლებს.

  პრემიერ-მინისტრმა, პარტია „ქართული ოცნება-დემოკრატიული საქართველოს“ თავმჯდომარე გიორგი კვირიკაშვილმა მერობის კანდიდატები წარადგინა.   დედოფლისწყაროში მერობის კანდიდატი ნიკოლოზ ჯანიაშვილი იქნება; საგარეჯოში - გიორგი ერბოწონაშვილი; გურჯაანში - არჩილ ხანდამაშვილი; ახმეტაში - იოსებ ქარუმაშვილი; ლაგოდეხში - ჯონდო მდივნიშვილი; ყვარელში - როსტომ სესიაშვილი; სიღნაღში - გიორგი გოგილაშვილი; ხოლო თელავში - შოთა ნარეკლიშვილი.   მთავრობის მეთაურმა „ქართული ოცნების“ მერობის კანდიდატებს მომავალ საქმიანობაში წარმატება უსურვა.   „ქართულმა ოცნებამ“ საარჩევნო კამპანიის ფარგლებში, რეგიონული შეხვედრები და მერობის კანდიდატების წარდგენა რამდენიმე დღის წინ დაიწყო. შეხვედრები საქართველოს მასშტაბით, ყველა რეგიონში გაიმართება.  

ქალაქის ეკონომიკურ განვითარებასა და მისი პოტენციალის სათანადოდ ათვისებას საფუძვლად მუნიციპალური განვითარების გეგმა დაედება, - ამის შესახებ პარტია „ქართული ოცნება - დემოკრატიული საქართველოს“ თბილისის მერობის კანდიდატმა კახა კალაძემ ქალაქის ეკონომიკურ პოლიტიკაზე საუბრისას განაცხადა.   როგორც მან განაცხადა, აღნიშნული პოლიტიკის ფარგლებში, განხორციელდება მუნიციპალიტეტის ქონების ინვენტარიზაციაც.   „სამწუხაროდ, დღეს ქალაქს ერთიანი ეკონომიკური ხედვა არ აქვს. ამიტომ, პირველი, რასაც გავაკეთებთ, აუცილებლად ჩამოყალიბდება მუნიციპალური განვითარების გეგმა, რომელიც საფუძვლად ქალაქის ეკონომიკურ განვითარებასა და მისი პოტენციალის სათანადოდ ათვისებას დაედება. ასევე, განხორციელდება მუნიციპალიტეტის ქონების ინვენტარიზაცია“, - განაცხადა თბილისის მერობის კანდიდატმა.     მისივე თქმით, მოხდება მუნიციპალიტეტის ქონების ინვენტარიზაცია და ეკონომიკური მიზნებისთვის მისი მაქსიმალურად ეფექტიანი გამოყენება.   კახა კალაძემ ეკონომიკის პოლიტიკაზე საუბრისას ყურადღება ასევე, ღამის ეკონომიკასა და ამ მიმართულებით, სამუშაო ადგილების შექმნაზე გაამახვილა.   „ბევრ ევროპულ ქალაქში ეს სიახლეა. ამ მიმართულებით დაწყებული აქვთ მუშაობა და გამონაკლისი ჩვენი ქალაქიც არ იქნება. ღამის ეკონომიკის განვითარება მცირე და საშუალო ბიზნესის განვითარებისა და ახალი სამუშაო ადგილების შექმნის საშუალებას მოგვცემს. ჩამოყალიბდება და განხორციელდება ღამის ეკონომიკის კონცეფცია, რომელიც უბნების განვითარებას და ახალი სივრცეების ათვისებას უზრუნველყოფს“, - განაცხადა „ქართული ოცნების“ მერობის კანდიდატმა.   მისივე განმარტებით, ღამის კულტურული ცხოვრების გამოცოცხლება, ახალ სტარტაპებს წაახალისებს და ქალაქის საგადასახადო შემოსავლებს გაზრდის.   „იქნება გათვლილი ტურისტული პოტენციალი და ქალაქის ინტერესებისთვის ამის სწორად გამოყენება. მიხარია, რომ ყოველწიურად ტურისტული ნაკადი ჩვენს დედაქალაქში იზრდება, თუმცა მეტი შესაძლებლობები გვაქვს იმისთვის, რომ თბილისი უცხოელი ტურისტებისთვის უფრო მიმზიდველი გახდეს“, - განაცხადა კახა კალაძემ.   „ქართული ოცნების“ თბილისის მერობის კანდიდატმა ქალაქის განვითარების პროგრამული ხედვის პრეზენტაცია დღეს, პარტიის ცენტრალურ ოფისში გამართა.

  „ქართული ოცნება - დემოკრატიული საქართველოს“ მერობის კანდიდატმა კახა კალაძემ, პროგრამული ხედვის წარდგენისას ქალაქის მართვის პოლიტიკაზე ისაუბრა და განაცხადა, რომ სისტემაში ეფექტიანი და ობიექტური საკადრო პოლიტიკა განხორციელდება.   კალაძის თქმით, ასევე, აუცილებლად განხორციელდება მერიის არსებული სტრუქტურის ანალიზი, რომლის საფუძველზეც მერიის მართვის, კოორდინაციის, ანგარიშვალდებულებისა და კომუნიკაციისახალი სისტემა განისაზღვრება.   მისივე განცხადებით, შეისწავლიან მოქალაქეთა მომსახურების ხარისხს, გამოვლინდება არსებული ნაკლოვანებები და დაისახება მათი აღმოფხვრის გეგმა.   მერობის კანდიდატმა თბილისის ბიუჯეტის გაზრდის აუცილებლობაზეც ისაუბრა, რაც მისივე თქმით, მთავრობასთან კოორდინაციითა და საკუთარი შემოსავლების ხარჯზე უნდა მოხდეს.   „არსებული ბიუჯეტით, რომელიც მერიას გააჩნია, მერწმუნეთ, შეუძლებელია იმ პროექტების განხორციელება, რაზეც ვსაუბრობთ და გვაქვს დაგეგმილი. ამიტომ, მთავრობასთან მოგვიწევს მუშაობა, რათა მოვახერხოთ ბიუჯეტის გაზრდა, რათა მომავალი ოთხი წლის განმავლობაში, ყველა ამ პროექტის განხორციელება შესაძლებელი იყოს“, - განაცხადა კალაძემ.   მართვის პოლიტიკის განსაზღვრისას მერობის კანდიდატი პროცესში ხაზს უსვამს მოქალაქეთა ჩართულობის მნიშვნელობას.   როგორც კალაძემ აღნიშნა, თბილისი პარტია „ქართული ოცნების“, ან კონკრეტულად რომელიმე სუბიექტს არ ეკუთვნის - ის ქალაქში მცხოვრები თითოეული მოქალაქისაა. შესაბამისად, ქალაქის განვითარებასა და მართვაში მათი ჩართულობა, ძალიან მნიშვნელოვანია.   „მუნიციპალური გადაწყვეტილებების მიღების პროცესში დაიხვეწება თბილისელების მონაწილეობის მექანიზმები. დაინერგება მათი მონაწილეობის ინოვაციური მოდელი, რომლის საფუძველზეც, თბილისელები თავად მიიღებენ გადაწყვეტილებას საკუთარი უბნის განვითარების შესახებ. მათ ექნებათ შესაძლებლობა, თავად გააკეთონ არჩევანი, თუ რომელი პროექტია მათი უბნისთვის პრიორიტეტული“, - განაცხადა კალაძემ.

  თბილისის მერია იმუშავებს იმ მიმართულებით, რომ დედაქალაქის მოსახლეობის გადაადგილების უზრუნველყოფა საქართველოში წარმოებული ავტობუსებით მოხდეს, - ამის შესახებ პარტია „ქართული ოცნება - დემოკრატიული საქართველოს“ თბილისის მერობის კანდიდატმა კახა კალაძემ ქალაქის სატრანსპორტო პოლიტიკაზე საუბრისას განაცხადა.   მისი თქმით, შეიქმნება ქალაქის სატრანსპორტო სტრატეგია, რომელიც  თბილისის ურბანულ განვითარებაში მნიშვნელოვანი კომპონენტია.   „დღეს სამწუხაროდ, კონკრეტულ რაიონებში არსებობს უბნები, სადაც არ მოძრაობს საზოგადოებრივი ტრანსპორტი. განისაზღვრება ახალი სატრანსპორტო დერეფნები და გაფართოვდება საზოგადოებრივი ტრანსპორტის სამარშრუტო სქემა. ასევე, ძალიან მნიშვნელოვანია საზოგადოებრივი ტრანსპორტის განახლება. ის უნდა გავხადოთ არა მხოლოდ კომფორტული და მოწესრიგებული, არამედ პოპულარულიც“, - განაცხადა კახა კალაძემ.   მისივე თქმით, განხორციელდება მეტროს რეაბილიტაციის მასშტაბური სამუშაოები, არსებული მეტროსადგურების რეკონსტრუქცია. დაიგეგმება მეტროს ახალი ხაზების განვითარება.   კახა კალაძის განცხადებით, ასევე, თბილისის ავტობუსისა და მიკროავტობუსების პარკი თანამედროვე ტიპის კომფორტული ავტობუსებით განახლდება.   „იმის გათვალისწინებით, რომ ჩვენ მომავალი წლების განმავლობაში, ძალიან დიდი რაოდენობის ავტობუსების შეძენა მოგვიწევს, ვიმუშავებთ იმაზე, რომ ამ ავტობუსების აწყობა-წარმოება საქართველოში მოვახერხოთ და თბილისელების გადაადგილების უზრუნველყოფა ქვეყანაში წარმოებული ავტობუსებით მოხდეს“, - აღნიშნა „ქართული ოცნების“ თბილისის მერობის კანდიდატმა.      კახა კალაძემ საცობებსა და ცენტრალური უბნების გადატვირთვასთან დაკავშირებითაც გაამახვილა ყურადღება და აღნიშნა, რომ ამ მიმართულებით, სპეციალური პროგრამა ამუშავდება.   მისი თქმით, აღნიშნული პროგრამის მეშვეობით,  თბილისის ქუჩების მონიტორინგი, გადატვირთული წერტილების გამოვლენა და მათი  გადაჭრის ოპტიმალური გზების დასახვა მუდმივ რეჟიმში მოხდება.   „გარდა ამისა, განხორციელდება მასშტაბური საგზაო-ინფრასტრუქტურული პროექტები; მოწესრიგდება პარკირების სისტემა; მოეწყობა მიწისზედა და მიწისქვეშა პარკინგის ინფრასტრუქტურა; ამოქმედდება ჯარიმების სამართლიანი სისტემა. მერიას ამ მიმართულებით აქვს ნამუშევარი, ჩატარებულია კვლევა და უკვე გვაქვს სრული სურათი, თუ რამდენი მიწისქვეშა პარკინგის პროექტი უნდა განხორციელდეს თბილისში. არჩევნების შემდეგ ამ პროექტის განხორციელებისთვის მუშაობას აუცილებლად დავიწყებთ“, - აღნიშნა კახა კალაძემ.   ამასთან, მისივე განმარტებით, ყველა პირობა შეიქმნება იმისთვის, რომ სამომავლოდ, პარკირების მომსახურება უშუალოდ მუნიციპალური სამსახურის მიერ განხორციელდეს.     „ქართული ოცნების“ თბილისის მერობის კანდიდატმა ქალაქის განვითარების პროგრამული ხედვის პრეზენტაცია პარტიის ცენტრალურ ოფისში გამართა. 

  პარტია „ქართული ოცნება - დემოკრატიული საქართველოს“ თბილისის მერობის კანდიდატის კახა კალაძის განცხადებით, 2012 წლიდან საქართველოს ხელისუფლებამ მნიშვნელოვანი რეფორმები განახორციელა.   ამის შესახებ მან ქალაქის სოციალურ პოლიტიკაზე საუბრისას განაცხადა და საზოგადოებას ამ მიმართულებით საკუთარი ხედვა გააცნო.   „ჩვენ 2012 წელს, როდესაც ხელისუფლებაში მოვედით, ძალიან მნიშვნელოვანი რეფორმა განვახორციელეთ. მახსოვს წლები, როდესაც უფულობის, უსახსრობის გამო, ადამიანები სამწუხაროდ, საოპერაციო მაგიდებზე იღუპებოდნენ, თუმცა დღეს, ძალიან განსხვავებული რეალობა გვაქვს, რადგან ჩვენი ქვეყნის თითოეული მოქალაქე დაზღვეულია“, - განაცხადა კახა კალაძემ და ჯანდაცვისა და სოციალური დაცვის მინისტრ დავით სერგეენკოს საყოველთაო ჯანდაცვის პროგრამის განხორციელებისთვის მადლობა გადაუხადა.   თბილისის მერობის კანდიდატის თქმით, აუცილებლად გაგრძელდება, დაიხვეწება და გაფართოვდება ჯანდაცვისა და სოციალური დახმარების მუნიციპალური პროგრამები. ასევე, მოხდება სასწრაფო-სამედიცინო სამსახურის გაძლიერება და მისი ავტოპარკის განახლება.   „მერია იზრუნებს შესაბამისი საჭიროების მქონე ადამიანების უზრუნველყოფაზე ღირსეული საცხოვრებლით; ძალიან აქტუალურია ქალაქის ინფრასტრუქტურის ადაპტირების საკითხი შშმ პირებისთვის. უზრუნველყოფილი იქნება ქალაქის ინფრასტრუქტურის, საზოგადოებრივი ტრანსპორტისა და სხვადასხვა ობიექტების ადაპტირება“, - აღნიშნა კახა კალაძემ.   „ქართული ოცნების“ თბილისის მერობის კანდიდატმა ქალაქის განვითარების პროგრამული ხედვის პრეზენტაცია პარტიის ცენტრალურ ოფისში გამართა.

  თვითმმართველობის არჩევნებში „ქართული ოცნება-დემოკრატიული საქართველოს“ გამარჯვების შემთხვევაში, მმართველი გუნდის ერთ-ერთი მთავარი მიმართულება ძველი თბილისის რეაბილიტაცია იქნება, - ამის შესახებ თბილისის მერობის კანდიდატმა კახა კალაძემ პარტიის ცენტრალურ ოფისში, „სიცოცხლის სავსე ქალაქის“ განვითარების პროგრამის პრეზენტაციისას განაცხადა.   კალაძის თქმით, ძველი თბილისის რეაბილიტაცია გაგრძელდება, ხოლო მშენებლობის ზედამხედველობისას განსაკუთრებული ყურადღება თბილისის ისტორიული ნაწილის ავთენტურობის შენარჩუნებას დაეთმობა.   როგორც მერობის კანდიდატმა აღნიშნა, პირველი პრობლემა, რაც დედაქალაქს აწუხებს, ეს არის ქალაქის ურბანული განვითარების, მათ შორის, მისი ისტორიული ნაწილის ერთიანი კონცეფციის არ არსებობა, თუმცა თბილისის მიწათმოწყობის გენერალური გეგმის დამტკიცების შემდეგ, რაზეც მისივე თქმით, ექსპერტთა და არასამთავრობო სექტორის წარმომადგენლების ჩართულობით მუშაობა მიმდინარეობს,  ქალაქის ქაოტური განვითარებისა და განაშენიანების პრობლემა საბოლოოდ მოწესრიგდება.   „უსახური შენობები, რომელიც ჩვენს ქალაქში მომრავლდა, გარკვეულ პრობლემას წარმოადგენს. შეიქმნება სტანდარტები ფასადებისთვის. გარდა ამისა, შემუშავდება დიზაინის ერთიანი სტილი, ეს იქნება ვიზუალური სტანდარტი, რომელიც ყველა განვითარებულ ქალაქს გააჩნია და ეს გულისხმობს წარწერების, ვიტრინების, აბრებისა და ზოგადად, იერსახის მოწესრიგებას. განსაკუთრებული ყურადღება დაეთმობა ქართული შრიფტის სათანადო დაცვას“, - განაცხადა კალაძემ.   პროგრამული ხედვის წარდგენისას მერობის კანდიდატმა ასევე, განსაკუთრებული ყურადღება დედაქალაქში ავარიული შენობების პრობლემას დაუთმო და აღნიშნა, რომ ავარიული და ძველი შენობების ინვენტარიზაციისა და გამაგრება-ჩანაცვლების ერთიანი გეგმა შემუშავდება.     „ჩვენ ვიმუშავებთ რაიონების, უბნების თანაბარ განვითარებაზე. უზრუნველყოფილი იქნება თბილისის თითოეული უბნის თანაბარი განვითარება. ყველა უბანში გამოიკვეთება ცენტრები სხვადასხვა ფუნქციური დატვირთვით, რომელთა განვითარებაზე იზრუნებს მერია კერძო სექტორთან თანამშრომლობით“, - განაცხადა „ქართული ოცნების“ მერობის კანდიდატმა.

  პარტია „ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე, დედაქალაქში წყალმომარაგების პრობლემის გადაჭრის მიზნით, „ჯორჯიან უოთერ ენდ ფაუერის” ხელმძღვანელობასთან შეხვედრას გეგმავს.   ამის შესახებ კალაძემ პარტიის ცენტრალურ ოფისში, „სიცოცხლით სავსე ქალაქის“ განვითარების პროგრამის პრეზენტაციისას განაცხადა.   მისი თქმით, წყალმომარაგება ერთ-ერთი სერიოზული პრობლემაა, რომელიც თბილისსა და თბილისელებს აწუხებს და მიუხედავად იმისა, რომ ამ საკითხის მოგვარება მერიის პირდაპირი საქმიანობა არ არის, მოსახლეობის ინტერესებიდან გამომდინარე, ამ პროცესში აქტიური ჩართულობაა საჭირო.     „უახლოეს პერიოდში ვგეგმავ, GWP-ის ხელმძღვანელობას შევხვდე და მომდევნო წლების გეგმებს გაგაცნობთ, თუ რას აპირებს ეს კომპანია, რა კონკრეტული პროექტები განხორციელდება და რა თანხები დაიხარჯება“, - განაცხადა თბილისის მერობის კანდიდატმა და აღნიშნა, რომ უწყვეტი წყალმომარაგების პრობლემის სრულად გადაჭრას თბილისის ყველა უბანში განსაკუთრებული ყურადღება დაეთმობა.

  თბილისის რაიონებში ახალგაზრდობის ცენტრები აშენდება, სადაც ახალგაზრდებს შემოქმედებით და სპორტულ ცხოვრებაში ჩაბმის შესაძლებლობა ექნებათ, - ამის შესახებ პარტია „ქართული ოცნება - დემოკრატიული საქართველოს“ თბილისის მერობის კანდიდატმა კახა კალაძემ განათლების, კულტურის, სპორტისა და ახალგაზრდობის პოლიტიკაზე საუბრისას განაცხადა.   მისივე თქმით, სპორტული ინფრასტრუქტურა თბილისის ყველა რაიონში მოეწყობა, ახლებურად დაიგეგმება „თბილისობა“ და სხვა კულტურული ღონისძიებები.   მერობის კანდიდატმა ყურადღება გაამახვილა საბავშვო ბაღების საჭიროებაზე და განაცხადა, რომ მომავალ წელს გაგრძელდება როგორც არსებული საბავშვო ბაღების რეაბილიტაცია, ასევე, ახალი ბაღების მშენებლობა.   „2012 წელს, საბავშვო ბაღების მიმართულებით განვახორციელეთ რეფორმა - საბავშვო ბაღები ბავშვებისთვის გახდა უფასო და ყოველწლიურად ბაღებში ბავშვების რაოდენობა მატულობს. ეს, რა თქმა უნდა, მისასალმებელია, თუმცა ჩვენ ამ მატებას უნდა დავხვდეთ მომზადებული. მერიამ, გასული წლების განმავლობაში, 12 საბავშვო ბაღის პროექტი განახორციელა, ათის მშენებლობა უკვე მიმდინარეობს და მომავალ წელს უკვე დასრულებული იქნება. ჩვენ, მომავალ წელს, აუცილებლად გავაგრძელებთ საბავშვო ბაღების რეაბილიტაციასა და ახალი ბაღების მშენებლობას. დადგინდება მომსახურების ახალი, მაღალი სტანდარტი და მერია უზრუნველყოფს ამ სტანდარტის შესაბამისად მათ ავტორიზაციას“, - აღნიშნა კახა კალაძემ.

  მუნიციპალიტეტი მხარს დაუჭერს ავტომობილების ტექდათვალიერების სისტემის დანერგვას, - ამის შესახებ „ქართული ოცნება - დემოკრატიული საქართველოს“ თბილისის მერობის კანდიდატმა კახა კალაძემ, პარტიის ცენტრალურ ოფისში, ქალაქის განვითარების პროგრამული ხედვის პრეზენტაციაზე, ეკოლოგიურ პოლიტიკაზე საუბრისას განაცხადა.   მისი თქმით, თბილისში ჰაერის დაბინძურების მაღალი დონე ფიქსირდება, რაც გაუმართავი ტრანსპორტის გამონაბოლქვით, მშენებლობებისა და გრუნტის მტვერითაა გამოწვეული.   როგორც მერობის კანდიდატმა აღნიშნა, მუნიციპალიტეტი მხარს დაუჭერს ავტომობილების ტექდათვალიერების სისტემის დანერგვას, გამკაცრდება მშენებლობის ეკოლოგიური სტანდარტები, უზრუნველყოფილი იქნება გრუნტის ეტაპობრივი დაფარვა შესაბამისი საფარით და ჩამოყალიბდება ჰაერის დაბინძურების მონიტორინგის სისტემა, რომლის საფუძველზეც, დაბინძურების პრევენციის ეფექტიანი მექანიზმები განისაზღვრება.   კახა კალაძემ ზოოპარკის ტერიტორიის, მზიურის, ვაკის პარკის,  მუშტაიდის პარკის და სხვა მწვანე სივრცეების რეაბილიტაციაზეც ისაუბრა.   „თბილისში 1400-მდე პარკი და სკვერია, რომლებსაც მოვლა-პატრონობა და მოწესრიგება სჭირდება და ამას აუცილებლად მოვახერხებთ. თითოეულ მათგანში შევქმნით ისეთ გარემოს, სადაც დროის გატარება ყველასთვის სასიამოვნო იქნება. განსაკუთრებული ყურადღება დაეთმობა დენდროლოგიური პარკის აღდგენასა და კეთილმოწყობას. ეს პარკი დაახლოებით, 200 ჰექტარზეა გადაჭიმული, თუმცა იქ არსებული სიტუაცია არც თუ ისე სახარბიელოა. გპირდებით, რომ ეს ადგილი თბილისისა  და თბილისელებისთვის ძალიან მალე იქნება ერთ-ერთი საუკეთესო დასვენების ადგილი“, - განაცხადა მერობის კანდიდატმა.   მისივე თქმით, მოწესრიგდება ნაგავსაყრელები და ინფრასტრუქტურის სამინისტროსთან თანამშრომლობით შემუშავდება ნარჩენების გადამუშავების პროექტი.   კახა კალაძე აღნიშნავს, რომ ასევე, ითანამშროლებს გარემოს დაცვის სამინისტროსთან და იზრუნებს მტკვრის დაბინძურების პრევენციაზე და რეკრეაციული დანიშნულებით მის გამოყენებაზე.   დედაქალაქის მერობის კანდიდატმა პროგრამული ხედვის ფარგლებში, შვიდი ძირითადი მიმართულება გამოყო. კერძოდ, ურბანული განვითარების პოლიტიკა; სატრანსპორტო პოლიტიკა; ეკოლოგიური პოლიტიკა; ეკონომიკური პოლიტიკა; განათლების, კულტურის სპორტისა და ახალგაზრდობის პოლიტიკა; სოციალური პოლიტიკა და მართვის პოლიტიკა.     კახა კალაძის პროგრამული ხედვის პრეზენტაციას, რომელიც „ქართული ოცნების“ ცენტრალურ ოფისში გაიმართა, პრემიერ-მინისტრი გიორგი კვირიკაშვილი, მინისტრთა კაბინეტისა და საპარლამენტო უმრავლესობის წარმომადგენლები ესწრებოდნენ.