07 სექტემბერი, 2017
პარტია „ქართული ოცნება - დემოკრატიული საქართველოს“ თბილისის მერობის კანდიდატი კახა კალაძე ისნის მოსახლეობას შეხვდა და საკრებულოს მაჟორიტარობის კანდიდატები წარუდგინა. ისნის მაჟორიტარობის კანდიდატები „ქართული ოცნებიდან“ ილია ჯიშკარიანი, ნინო ლაცაბიძე და ლევან დავითაშვილი არიან.
„ეს ადამიანები მომავალი ოთხი წლის განმავლობაში საკრებულოში ყველა იმ პრობლემის გამზიარებელი იქნებიან, რომლებიც თქვენს რაიონში მცხოვრებ ადამიანებს აწუხებთ“, - განაცხადა კახა კალაძემ კანდიდატების წარდგენისას. შეხვედრაზე თბილისის მერობის კანდიდატმა ხაზი ეკოლოგიის მიმართულებით არსებულ გამოწვევებს გაუსვა და აღნიშნა, რომ ახალი გუნდი არამარტო არსებული პარკებისა და სკვერების მოწესრიგებაზე, არამედ ახალი რეკრეაციული ზონების შექმნაზეც იზრუნებს. მისივე თქმით, მნიშვნელოვანია, მუნიციპალური ტრანსპორტის მოწესრიგება და განახლება. „ოთხი წლის განმავლობაში, მუნიციპალური ტრანსპორტის სრულიად განახლებას მოვახერხებთ. ძველი, ყვითელი ავტობუსები ახალი, თანამედროვე, ევროპული ტიპის ავტობუსებით ჩანაცვლდება. საზოგადოებრივი ტრანსპორტი არა მხოლოდ კომფორტული უნდა გახდეს, არამედ პოპულარულიც უნდა იყოს და პირველი ვიქნები, ვინც ამის პოპულარიზაციაში ძალიან მნიშვნელოვან წვლილს შეიტანს. ძალიან მნიშვნელოვანია მეტროს განახლება-მოწესრიგება. ყველაფერს გავაკეთებთ, რომ მომავალი ოთხი წლის განმავლობაში, ამაზე ვიმუშაოთ და მეტროს, როგორც ვაგონების განახლება, ასევე, მეტროსადგურების რეაბილიტაცია შევძლოთ“, - განაცხადა კახა კალაძემ.
მისივე თქმით, ის პროგრამები გაგრძელდება, რომელსაც თბილისის მერია ჯანდაცვისა და სოციალური უზრუნველყოფის მიმართულებით ახორციელებს. „პირადად ჩემთვის და ჩვენი გუნდისთვის, ყველაზე მნიშვნელოვანი ადამიანია. ყველა ის რეფორმა, რომელიც ბოლო წლების განმავლობაში განხორციელდა, ზუსტად ადამიანის კეთილდღეობაზე იყო ორიენტირებული. მიუხედავად იმისა, რომ ბევრი საქმე გაკეთდა, ბევრი რეფორმა და პროექტი განხორციელდა, თავს ნუ მოვიტყუებთ. ძალიან კარგად ვიცით, რომ ქვეყანაში, დედაქალაქში ბევრი პრობლემაა, მაგრამ თუ ერთად დავდგებით, ერთიანი ძალისხმევით ამ პრობლემების მოგვარებას შევძლებთ“, - განაცხადა თბილისის მერობის კანდიდატმა.
მოქალაქეებს მისასალმებელი სიტყვით ასევე, რაიონის მაჟორიტარობის კანდიდატებმა მიმართეს და მხარდაჭერისკენ მოუწოდეს. როგორც ილია ჯიშკარიანმა აღნიშნა, მხარდამჭერებმა ნდობა მას ოთხი წლის წინაც გამოუცხადეს და სწორედ ამ ნდობით და დიდი პასუხისმგებლობით ცდილობდა, საკრებულოში თითოეული მათგანის პრობლემა მიეტანა. „რაიონში ბევრი რამ გაკეთდა და კეთდება დღესაც, მათ შორის, მიმდინარეობს ჩვენი 150 წლის სომხური თეატრის რეაბილიტაცია, რომელსაც ფონდი „ქართუ“ ახორციელებს“, - განაცხადა ჯიშკარიანმა. მაჟორიტარობის კანდიდატის თქმით, ინფრასტრუქტურული პროექტები და კულტურული მემკვიდრეობის რეაბილიტაცია ისანში მომავალშიც გაგრძელდება. ამომრჩევლებს სოციალური პრობლემატიკის მოგვარებას ჰპირდება მაჟორიტარობის კიდევ ერთი კანდიდატი ნინო ლაცაბიძე. მისი თქმით, სოციალურად დაუცველებს დღემდე აქვთ საცხოვრისის, წყლისა და დენის პრობლემები და ეს რაიონში მთავარ გამოწვევად რჩება, რაზეც აქტიური მუშაობის დაწყებას გეგმავს. „ერთია იცოდე, რა აწუხებს შენს უბანს, ქალაქს და მეორე - გქონდეს რეალური შესაძლებლობა, რომ ეს პრობლემები ღირსეულად გადაჭრა. სწორედ ამ შესაძლებლობას მაძლევს „ქართული ოცნება“ და თქვენთან ერთად, ამ გამოცხადებული ნდობით შევძლებ, რომ ეს რაიონი უფრო კომფორტული გახდეს“, - განაცხადა ლაცაბიძემ.
ისანში შეკრებილ მხარდამჭერებს მისასალმებელი სიტყვით ასევე, მიმართეს საპარლამენტო უმრავლესობის წევრმა მამუკა მდინარაძემ და ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების მინისტრმა სოზარ სუბარმა.
