„ქართულმა ოცნებამ“ საქართველოს პრემიერ-მინისტრის პოსტზე მამუკა ბახტაძის კანდიდატურა წარადგინა. გადაწყვეტილება პოლიტიკური გაერთიანება „ქართული ოცნება - დემოკრატიული საქართველოს“ ცენტრალურ ოფისში გამართულ უმრავლესობის გაფართოებულ სხდომაზე მიიღეს.     პრემიერ-მინისტრობის კანდიდატმა მადლობა გადაუხადა „ქართული ოცნების“ პოლიტიკურ გუნდს და მის ხელმძღვანელს გამოცხადებული ნდობისთვის.   „ეს არის დიდი პატივი და ამავე დროს დიდი პასუხისმგებლობა ჩემთვის, უახლოეს დღეებში კი მე საქართველოს პარლამენტში წარვდგები ჩემი ხედვით, რომელიც დამყარებული იქნება შემდეგ ძირითად  პრინციპებზე:   პირველი გახლავთ ქართველი ხალხის ისტორიული არჩევანის ბოლომდე მიყვანა და საქართველოს ევრო-ატლანტიკურ სივრცეში სრულფასოვანი ინტეგრაცია. ამ კუთხით „ქართულ ოცნებას“ აქვს დიდი წარმატებები და ამ წარმატებებს სჭირდება გაღრმავება და განმტკიცება.   მეორე, ჩვენ განვახორციელებთ ინოვაციურ და ფუნდამენტურ რეფორმებს ყველა საჭირო მიმართულებით. ამ რეფორმების შედეგად ჩვენ  ჩამოვაყალიბებთ ახალ ეკონომიკურ მოდელს, ახალი სამართლიანი თამაშის წესებით, რომელიც შეეხება თითოეულ ქართულ ოჯახს, ჩვენს ყველა მოქალაქეს. ჩვენ შევძლებთ და შევამცირებთ ჩამორჩენას დემოკრატიის მაღალ სტანდარტსა და ეკონომიკურ მდგომარეობას შორის. ბუნებრივია, ჩვენ გავაგრძელებთ დემოკრატიული ინსტიტუტების შემდგომ განვითარებას და გაძლიერებას.   მესამე, ეს არის მცირე მთავრობის კონცეფცია. საქართველოს სჭირდება მცირე, მაგრამ ამავე დროს მოქნილი, ეფექტური სამთავრობო უწყებები. ამასთან ერთად, მიზანშეწონილად მიმაჩნია გაძლიერდეს ინსტიტუციური და საზოგადოებრივი კონტროლი ამ უწყებებზე, ამავე დროს ანტიკორუფციული ხაზითაც.   მეოთხე, რომელიც მინდა პირდაპირ გითხრათ, არის ჩემი ცხოვრების მთავარი პრიორიტეტი, ეს არის განათლება, ინოვაცია და ახალგაზრდობა. სწორედ მოტივირებული, განათლებული, სამეწარმეო ენთუზიაზმით აღსავსე და რაც მთავარია თავიანთ შესაძლებლობებში დარწმუნებული ახალგაზრდობა მოიტანს იმ შედეგს, რასაც ჰქვია საქართველოს ჩართვა განვითარებული ეკონომიკების მქონე ქვეყანათა რიცხვში და სწორედ ასეთი საქართველო არის ერთადერთი და უალტერნატივო შეთავაზება ჩვენი აფხაზი და ოსი ძმებისთვის, რომ დავბრუნდეთ ერთიან ოჯახში. შესაბამისად, მასშტაბური ინვესტიციები განათლებაში და ამ სექტორის ფუნდამენტური რეფორმა იქნება საქართველოს მთავრობის აბსოლუტური პრიორიტეტი.   საქართველო ეს არის ადამიანთა და მოქალაქეთა ერთობლიობა და ადამიანი იყო, არის და იქნება პარტია „ქართული ოცნების“ მთავარი ფასეულობა. შესაბამისად, თითოეული ინიციატივა, თუ ძალისხმევა, რომელსაც ჩვენ განვახორციელებთ იქნება ორიენტირებული სწორედ ადამიანზე და მის მხარდაჭერაზე, ორიენტირებული მისი თავისუფლებისა და მისი სასიცოცხლო და საოჯახო გარემოს გაუმჯობესებაზე, ისეთი შესაძლებლობების შექმნაზე, სადაც ყველას მიეცემა საშუალება რეალიზაცია გაუკეთოს თავის ნიჭს და პოტენციალს თავის სამშობლოში,  მაგრამ ამისთვის ბუნებრივია საჭიროა პრინციპულობა, ერთიანობა, გუნდურობა, ძალიან მაღალი პასუხისმგებლობის ხარისხი, ძალიან მაღალი კომპეტენციის ხარისხი და რაც მთავარია, ყველა  ძალის და იდეის კონსოლიდაცია.   მე დარწმუნებული ვარ,  ჩვენ ამას ერთად აუცილებლად მივაღწევთ და საქართველო გახდება ერთიანი, ძლიერი და ევროპული ყაიდის ქვეყანა” - განაცხადა პრემიერ-მინისტრობის კანდიდატმა მამუკა ბახტაძემ.  

  პოლიტიკური გაერთიანება „ქართული ოცნება - დემოკრატიული საქართველოს“ ცენტრალურ ოფისში  გამართულ პოლიტსაბჭოს სხდომაზე პარლამენტში დროებითი საგამოძიებო კომისიის ფორმირების პრინციპებზე იმსჯელეს.   „როგორც ორი დღის წინ მოგახსენეთ, უახლოეს დღეებში გაიმართება პარლამენტის რიგგარეშე სხდომა, რომელზეც საგამოძიებო კომისიის შემადგენლობა დამტკიცდება. ხვალიდანვე, საპარლამენტო უმრავლესობის ლიდერები გამართავენ კონსულტაციებს უმცირესობის წარმომადგენლებთან ამ საკითხებთან დაკავშირებით, შეჯერდება პოზიციები, ხოლო კომისიის შემადგენლობის სხდომაზე დამტკიცების შემდეგ, კანონით გათვალისწინებულ ვადებში, რამდენიმე დღეში უკვე კომისიის პირველი სხდომა გაიმართება. ასე რომ, ეს პროცესი დაიწყო“ - განაცხადა პოლიტსაბჭოს სხდომის შემდეგ პრემიერ-მინისტრმა გიორგი კვირიკაშვილმა.   მისი თქმით , შინაგან საქმეთა მინისტრსა და მთავრობის ადმინისტრაციის ხელმძღვანელთან ერთად იგი შეხვდა სახალხო დამცველს ნინო ლომჯარიას. „მან მოგვაწოდა ის კითხვები, რომლებიც კონკრეტულად სარალიძისა და დადუნაშვილის, ხორავას ქუჩაზე მომხდარი მკვლელობის საკითხთან დაკავშირებით არსებობს. შინაგან საქმეთა სამინისტრომ უკვე დაიწყო დაკითხვების პროცედურები კონკრეტულად დანაშაულის შეუტყობინებლობისა და მოწმეებზე ზეწოლის მიმართულებით. ასე, რომ ეს პროცესიც დაწყებულია” - განაცხადა პრემიერმა.   რაც შეეხება მთავარი პროკურორის კანდიდატურას, გიორგი კვირიკაშვილის თქმით, კანდიდატურაზე მსჯელობას ხვალიდან იუსტიციის სამინისტრო საზოგადოების მაქსიმალური ჩართულობით დაიწყებს.  „როგორც საზოგადოებას შევპირდით, ეს კონსულტაციები იქნება მაქსიმალურად ფართო. ჩვენი მიზანია, მთავარი პროკურორის კანდიდატურას, რომელიც იქნება შერჩეული, ჰქონდეს მაქსიმალური ლეგიტიმაცია საზოგადოების მხრიდან. დღეს შევჯერდით მხოლოდ პრინციპებზე. კონკრეტულ კანდიდატურებზე პოლიტსაბჭოზე ჯერ არ გვიმსჯელია. ეს საკითხი პოლიტსაბჭოზე მხოლოდ და მხოლოდ მას შემდეგ დადგება, რაც მთავრობის მიერ დამტკიცებული კონკრეტული კანდიდატურა პარლამენტს გაეგზავნება. რაც შეხება ამ პროცესებს და იმ ადამიანებს, რომლებსაც აქვთ უსამართლობის განცდა, ჩვენ, რა თქმა უნდა, ვართ ხელისუფლება, რომლისთვისაც ეს არის სერიოზული გამოწვევა და ასეთ კითხვებზე, რომელიც საზოგადოებაშია, პასუხის გაცემისთვის არის ის ფორმატები, რომლებზეც ახლა მოგახსენეთ. ასეთ ფორმატებში უნდა გაეცეს პასუხი ყველა კითხვას და აუცილებლად გაეცემა. რაც შეეხება იმას, რომ კონკრეტულად რადიკალიზებულ ჯგუფებს უნდათ, არასტაბილურობის განცდა გააჩინონ და აყენებენ აბსოლუტურად არამართლზომიერ პოლიტიკურ მოთხოვნებს, ჩვენ არასტაბილურობის შექმნის საფუძველს არავის მივცემთ. ჩვენი ხელისუფლება ზრუნავს იმაზე, რომ საზოგადოებას ყველა კითხვაზე მაქსიმალურად გაეცეს პასუხი, მაგრამ ჩვენ ასევე ვიზრუნებთ იმაზე, რომ ქვეყანაში იყოს სტაბილურობა” – განაცხადა გიორგი კვირიკაშვილმა.   პარტიის აღმასრულებელი მდივნის ირაკლი კობახიძის განცხადებით, სხდომაზე საუბარი შეეხო უმრავლესობის მხრიდან დროებითი საგამოძიებო კომისიის წევრთა სავარაუდო შემადგენლობას.  „ჩვენ ვისაუბრეთ  კომისიის ფორმირების პრინციპებზე. მათ შორის ჩვენი მხრიდან სავარაუდო შემადგენლობაზე, რომელიც იქნება წარმოდგენილი კომისიაში. კომისიის შემადგენლობა საბოლოოდ მას შემდეგ ჩამოყალიბდება, რაც გავივლით კონსულტაციებს ოპოზიციასთან. სავარაუდოდ, მომავალ კვირაში ჩვენ დაგვჭირდება რიგგარეშე სხდომის მოწვევა  და კომისიის შემადგენლობა  სხდომაზე ჩამოყალიბდება“ - განაცხადა ირაკლი კობახიძემ.   პოლიტსაბჭოს სხდომაზე ასევე გადაწყდა, რომ პარტიას ხუთი მდივანი ეყოლება. გენერალური მდივნის თანამდებობაზე კვლავ რჩება კახა კალაძე, აღმასრულებელი მდივნის თანამდებობაზე - ირაკლი კობახიძე, ხოლო პოლიტიკური მდივანი კვლავ გიორგი ვოლსკი იქნება. დამატებით შემოღებულია ორი ახალი მდივნის თანამდებობა. კერძოდ, საერთაშორისო მდივნის პოზიციას დაიკავებს თამარ ჩუგოშვილი, რეგიონული მდივნის პოზიციას კი - დიმიტრი სამხარაძე.

ხორავას ქუჩაზე მომხდარმა ტრაგედიამ მეც ისევე შემზარა, როგორც მთელი ქართული საზოგადოება. თქვენთან ერთად მეც მძაფრი ინტერესით ვაკვირდებოდი სამართლებრივი პროცესის მიმდინარეობას და დარწმუნებული ვიყავი, რომ ამ საქმეზე მართლმსაჯულება სრულად და დროულად აღსრულდებოდა. მე პირადად ვიცნობ ირაკლი შოთაძეს და დარწმუნებული ვარ მის პროფესიონალიზმსა და კეთილსინდისიერებაში. მჯეროდა და მჯერა, რომ ირაკლი და მისი უწყება ყველაფერს აკეთებდნენ, რათა ყველა დამნაშავეს ადეკვატურად ეგო პასუხი კანონის წინაშე. სამწუხაროდ, მოვლენები ისე განვითარდა, რომ გამოძიების სანდოობა დაზარალებულის და საზოგადოების გარკვეული ნაწილის მხრიდან ეჭვის ქვეშ დადგა, რასაც მთავარი პროკურორის მხრიდან მყისიერად მოჰყვა უკიდურესად ღირსეული, უმაღლესი პოლიტიკური და მორალური პასუხისმგებლობით გამსჭვალული ნაბიჯი. ირაკლი შოთაძის გადადგომა არის ის სრულიად ახალი სტანდარტი, რომლის დამკვიდრება იყო ქართული ოცნების თაოსნობით განხორციელებული 2012 წლის სახალხო რევოლუციის მთავარი მიზანი. კიდევ ერთხელ მინდა მივუსამძიმრო დაზარალებულ ოჯახებს და გამოვთქვა რწმენა, რომ მართლმსაჯულება ყოველ მიზეზ გარეშე აღსრულდება!

საქართველოს დამოუკიდებლობის 100 წლისთავისადმი მიძღვნილი საზეიმო მიღება

საქართველოს პირველი დემოკრატიული რესპუბლიკის 100 წლისთავს ქვეყანასა და ხალხს პარტია „ქარული ოცნება - დემოკრატიული საქართველოს“ თავმჯდომარე ბიძინა ივანიშვილი ულოცავს:     „საქართველოს თითოეულ მოქალაქეს ვულოცავ დღევანდელ დღეს.   მინდა სიამაყით აღვნიშნო, რომ 100 წლის წინ, როდესაც ქართული რესპუბლიკა დაფუძნდა იმ უზარმაზარ სივრცეში, რასაც ევრაზია ჰქვია, უიშვიათესი მოვლენა იყო დემოკრატიულ საფუძვლებზე დაფუძნებული სახელმწიფოების რაოდენობა.   ქართული დემოკრატიული რესპუბლიკა ყველაზე პროგრესულ და ხალხის სამსახურში მყოფი სახელმწიფოების რანგში შეიძლება მოვიხსენიოთ. და ეს არ იყო შემთხვევითი, რამეთუ ქართული რესპუბლიკა დაფუძნდა და მემკვიდრე იყო მსოფლიოში ერთ-ერთი უძველესი სახელმწიფოსი. მსოფლიო ცივილიზაციის გარიჟრაჟზე არსებობდა კოლხეთი, ძლიერი და განვითარებული სახელმწიფო, სადაც ეგულებოდათ ოქროს საწმისი, ცოდნისა და სიბრძნის სიმბოლო  და ჩვენ ყველაფერი უნდა გავაკეთოთ იმისათვის, რომ ჩვენი ქვეყანა განვითარებული სახელმწიფოების ღირსეულ რიგში ჩადგეს და ჩვენს უზარმაზარ, ოცდაათ საუკუნოვან  სახელმწიფოებრივ ტრადიციას და კულტურას შესატყვისი პატივი მივაგოთ.   კიდევ ერთჯერ ვულოცავ მთელ საქართველოს დღევანდელ დღესასწაულს.“     ბიძინა ივანიშვილმა კომენტარი დამოუკიდებლობის დღისადმი მიძღვნილ საზეიმო მიღებაზე გააკეთა.

პოლიტიკურ გაერთიანება „ქართული ოცნება - დემოკრატიულ საქართველოს“  ახალი თავმჯდომარე ჰყავს. ქვეყნის მმართველი პარტიის ლიდერად ბიძინა ივანიშვილის კანდიდატურას პარტიის მეხუთე ყრილობამ ერთხმად დაუჭირა მხარი.      ყრილობის დელეგატებისადმი მიმართვაში ბიძინა ივანიშვილმა პოლიტიკაში დაბრუნების მიზეზებსა და იმ ფუნდამენტურ სახელმწიფოებრივ გამარჯვებებზე ისაუბრა, რასაც ხელისუფლებამ არასრულ ექვს წელიწადში მიაღწია.     „დიახ, მომიწია იმ თანამიმდევრობის დარღვევა, რომლის შესახებაც  პოლიტიკაში შემოსვლისთანავე განვაცხადე, მაგრამ როცა შენს ხალხზე, ქვეყანაზეა ლაპარაკი და ვითარება გადაწყვეტილების შეცვლას ითხოვს, გაჯიუტება საკუთარ თავთან არასწორია. ვიდრე უშუალოდ პოლიტიკაში ჩემი დაბრუნების მიზეზებზე გადავიდოდე, რამდენიმე სიტყვით ჩვენი ერთად განვლილი გზა მინდა მიმოვიხილო. დღეს არ ვაპირებ ხელისუფლების საქმიანობასა და მოღვაწეობაზე ვრცელი და დეტალური ანგარიში წარმოვადგინო, მითუმეტეს, რომ ეს არ არის ჩემი პრეროგატივა, მაგრამ თავს ვალდებულად ვთვლი,  რომ მოქალაქეობრივი პასუხისმგებლობით და სიამაყითაც კი, ხაზი გავუსვა იმ ფუნდამენტურ სახელმწიფოებრივ გამარჯვებებს, რასაც ხელისუფლებამ ისტორიულად ძალზე მოკლე დროში, არასრულ ექვს წელიწადში მიაღწია პირადად ჩემთვის და, დარწმუნებული ვარ, საქართველოს მოსახლეობის დიდი უმრავლესობისათვის ყველაზე მნიშვნელოვანია ის დემოკრატიული ტრანსფორმაცია, რომელიც ქვეყანამ განიცადა ბოლო წლების განმავლობაში - განაცხადა პარტიის ახლადარჩეულმა თავმჯდომარემ.     ბიძინა ივანიშვილმა ხაზგასმით აღნიშნა, რომ დღეს საქართველოს მოქალაქეები რეალურად თავისუფლები და სახელმწიფოს მხრიდან ყოველგვარი თვითნებობისაგან დაცულნი არიან. მისი თქმით, დამოუკიდებლობის მოპოვების შემდეგ სწორედ ეს იყო ჩვენი ხალხის ერთ-ერთი მთავარი ეროვნული ამოცანა- ისინი დემოკრატიული გზით ირჩევენ ხელისუფლებას და თავადვე ანიჭებენ მას სახელმწიფოს მართვის ლეგიტიმაციას.     „დღეს ჩვენ გვყავს არა არჩევნების გაყალბებით, დაშინებითა და ძალადობით მოსული, არამედ ხალხის ნდობის საფუძველზე შერჩეული, ცხადია, არა უნაკლო, მაგრამ რაც მთავარია, ადამიანზე, როგორც მთავარ ღირებულებაზე ორიენტირებული ხელისუფლება. ამის თვალსაჩინო მაგალითი, სხვას ყველაფერს რომ თავი დავანებოთ, საყოველთაო ჯანდაცვის ხელმისაწვდომობის უზრუნველყოფა წარმოადგენს.  დღეს სრულად დაცული და ხელშეუხებელია ერთ-ერთი მთავარი სოციალური ინსტიტუტი, ადამიანის თავისუფალი განვითარების ძირითადი საფუძველი - კერძო საკუთრება, რომელიც წინა ხელისუფლების დროს ფეხქვეშ გათელილი და განადგურებული იყო. აღარ არსებობს ელიტარული კორუფცია, ხელისუფლებასთან შეზრდილი ბიზნესმენების მიერ ხელში ჩაგდებული და მონოპოლიზებული სფეროები, სადაც ფეხის შედგმის გაფიქრებაც კი ჩვეულებრივ მეწარმეს  მრავალწლიან პატიმრობად და მთელი ქონების დაკარგვად უჯდებოდა. სრული პასუხისმგებლობით ვაცხადებ, რომ დღეს, ისე როგორც არასდროს, საქართველოს ისტორიაში, თავისუფალი და დაცულია ბიზნესი - ქვეყანაში დოვლათის შექმნისა და კეთილდღეობის მთავარი საფუძველი, რაც ჩემთვის უდიდესი ბედნიერებაა“ - განაცხადა პარტიის ლიდერმა.     მისივე თქმით,  სწორედ ამან განაპირობა, რომ მსოფლიო ეკონომიკაში ბოლო წლებში არსებული არასტაბილურობისა და რყევების მიუხედავად, საქართველო ყველა საერთაშორისო ორგანიზაციის შეფასებით, კაპიტალის დაბანდების თვალსაზრისით, ერთ-ერთი ყველაზე მიმზიდველი და საინტერესო ქვეყანაა. პირდაპირი უცხოური ინვესტიციების საერთო მოცულობამ კი შარშან საქართველოს ისტორიაში რეკორდულ მაჩვენებელს მიაღწია.     „ბოლო 5 წლის მონაცემებით,  ეკონომიკური ზრდის თვალსაზრისით, საქართველო ლიდერობს რეგიონში, ხოლო სავალუტო ფონდის ბოლო, განახლებული მონაცემებით, მომავალი 6-წლიანი ეკონომიკური ზრდის პროგნოზით, საქართველო ლიდერია არათუ რეგიონში არამედ ევროპის და ცენტრალური აზიის ქვეყნებს შორისაც. ხელშესახები პროგრესი გვაქვს სასამართლოს დამოუკიდებლობისა და სამართალდამცავი ორგანოების დეპოლიტიზირების კუთხით, რადიკალურ გარდატეხას მივაღწიეთ პენიტენციალურ სისტემაში ადამიანის უფლებათა დაცვის მიმართულებით. წარმატებით დავასრულეთ საკონსტიტუციო რეფორმის რთული და წინააღმდეგობებით აღსავსე პროცესი და იმ კონსტიტუციის ნაცვლად, რომელიც ფორმალურად ამართლებდა ერთი ადამიანის მარადიულ მმართველობას, მივიღეთ ხალხის მმართველობაზე ორიენტირებული ევროპული სტანდარტის ძირითადი კანონი. ეს კონსტიტუცია საქართველოს შეუქცევადი დემოკრატიული პროგრესის საყრდენი და წინაპირობაა! ადრეც მითქვამს და ახლაც ვიმეორებ, რომ დღევანდელ საქართველოში პოლიტიკურ პრობლემებს მნიშვნელოვანწილად ქმნის ის, რომ ერთის მხრივ გვაქვს თითქმის ევროპული ხარისხის დემოკრატია, რასაც მეორეს მხრივ ბევრად ჩამორჩება ეკონომიკური განვითარების დონე. დემოკრატიისა და ეკონომიკის დონეებს შორის ასეთი დისპროპორცია იმდენად უნიკალური მოვლენაა, რომ ძნელად თუ მოიძებნება რომელიმე სხვა ქვეყანა, სადაც ანალოგიური მდგომარეობაა. ტრადიციულ დემოკრატიებში ეკონომიკა და თავისუფლებები, როგორც წესი, ერთმანეთს ზრდიდნენ და ავსებდნენ. ამ დისჰარმონიის აღმოფხვრა თანამედროვე საქართველოს უმთავრესი გამოწვევაა და ამ გზაზე, როგორ რთულ ამოცანადაც არ უნდა ჩანდეს ეს, ჩვენ არჩევანი დემოკრატიის სასარგებლოდ გავაკეთეთ და გადაჭრით ვთქვით, რომ ეკონომიკა უნდა დავაწიოთ დემოკრატიას და არა პირიქით. აუცილებლად უნდა შევინარჩუნოთ დემოკრატიის მაღალი დონე და მუდმივად ვიზრუნოთ მის განვითარებაზე. დემოკრატია არის ჩვენი უპირობო არჩევანი, თუმცა, სწორედ ამ არჩევანისადმი ერთგულება გარკვეულწილად ზრდის ქვეყანაში პოლიტიკურ რისკებს, რადგან ავანტიურისტული ჯგუფები დესტრუქციული ქმედებებით იბრძვიან ძალაუფლებისთვის“- განაცხადა ბიძინა ივანიშვილმა.     მმართველი პარტიის ლიდერი მედიის თავისუფლებასაც შეეხო და აღნიშნა, რომ მედიის თავისუფლების ხარისხის  მკვეთრმა ზრდამ, რაც მისივე თქმით,  ხალხის განსაკუთრებული მონაპოვარი და უშუალოდ არსებული ხელისუფლების დამსახურებაა, უამრავ სიკეთესთან ერთად, განაპირობა სიცრუისა და პროპაგანდის მანქანის ძალიან დიდი სიმძლავრით ამუშავება.     მიმართვაში პარტიის ახლადარჩეულმა თავმჯდომარემ  პოლიტიკაში დაბრუნების მიზეზებზე ისაუბრა.     „მტკიცედ მჯერა, რომ ჩვენ არ გვაქვს უფლება, ფუჭ კინკლაობაში, თუნდაც უმნიშვნელო დრო, ენერგია და რესურსი დავხარჯოთ. დაუშვებელია, პირადი უთანხმოებისა და წყენის გამო, საერთო პარტიული და მითუმეტეს ეროვნული ამოცანების შესრულებისთვის თუნდაც მცირე დაბრკოლების შექმნა. მე ვიგრძენი, რომ ჩემს მიერ შექმნილი პარტია „ქართული ოცნება - დემოკრატიული საქართველო“, რომლის იდეოლოგიური მდგრადობა მის სახალხოობაშია, ამ პროცესების გაღრმავების შემთხვევაში დაშორდებოდა ხალხს. ამიტომ გადავწყვიტე დაბრუნება, დიახ - მეორედ შემოსვლა საჯარო პოლიტიკაში. დღეს ჩვენ ვიმყოფებით ისტორიული გარდატეხის მომენტში და სწორედ ახლა არ გვაქვს უიმედობისა და გულგატეხილობის უფლება. ჩვენ დღეს მხოლოდ გამარჯვებების უფლება გვაქვს! „ქართულმა ოცნებამ“ დემოკრატიას შეუქცევადობის პირველი მძლავრი იმპულსი მისცა და ამით გაუხსნა საქართველოს ევროპის კარი! დემოკრატიაა ჩვენი უკომპრომისო ეროვნული იდეა და ჩემი ზეამოცანაა ამ მონაპოვარის შენარჩუნება და განვითარება. სწორედ ამისთვის ვბრუნდები საჯარო პოლიტიკაში! მე მწამს საქართველოსი, მჯერა ჩვენი განსაკუთრებულობის, მჯერა ჩვენი ევროპული პერსპექტივის და ზუსტად ვიცი, რომ აუცილებლად დავიბრუნებთ ჩვენს აფხაზ და ოს ძმებს და რომ უდიდესი წარსულის ხალხს გვექნება ღირსეული მომავალი! ეს არის ჩემი მთავარი და აბსოლუტური მიზანი! ამ საქმეს ბოლომდე მივიყვანთ და გავიმარჯვებთ! სწორედ ამიტომ დავბრუნდი პოლიტიკაში!“ - განაცხადა ბიძინა ივანიშვილმა.     ყრილობის დელეგატებს და მიწვეულ სტუმრებს სიტყვით მიმართეს პრემიერ-მინისტრმა გიორგი კვირიკაშვილმა და პარტიის გენერალურმა მდივანმა, თბილისის მერმა კახა კალაძემ.     გიორგი კვირიკაშვილმა „ქართული ოცნების სახელით მადლობა გადაუხადა ბიძინა ივანიშვილს იმისთვის, რომ ქვეყნის განვითარების  მნიშვნელოვან ეტაპზე  დათანხმდა უხელმძღვანელოს პარტიას და წარმატებები უსურვა მას. „ჩვენ, როგორც ხელისუფლებაში მყოფი მმართველი ძალა, ვგრძნობთ განსაკუთრებულ პასუხისმგებლობას ქვეყნის წინაშე და ვთვლით, რომ პარტია, რომელიც  უმრავლესობით არის წარმოდგენილი სახელმწიფოს მართვის ყველა რგოლში, - აღმასრულებელ, ადგილობრივ თუ საკანონმდებლო ხელისუფლებაში, საჭიროებს მეტ სიმტკიცეს და ახლებურ მიდგომას.     პრემიერ-მინისტრის თქმით, აუცილებელია პარტია „ქართული ოცნება“ გრძელვადიანი პერსპექტივის მქონე, ძლიერ ინსტიტუციად ჩამოყალიბდეს, რომელიც არჩევნებიდან არჩევნებამდე მთლიანი ციკლის განმავლობაში იმუშავებს სრული დატვირთვით და ორიენტირებული იქნება მუდმივ განვითარებაზე. ეს განსაკუთრებით მნიშვნელოვანია ახალი საკონსტიტუციო ცვლილებების გათვალისწინებით . „ბიძინა ივანიშვილის ავტორიტეტისა და მისდამი ხალხის ნდობის ფაქტორის გათვალისწინებით, დარწმუნებული ვარ, რომ „ქართული ოცნება - დემოკრატიული საქართველო“ განახლებული ენერგიით შეეჭიდება და გაუმკლავდება დღევანდელ გამოწვევებს“ - განაცხადა გიორგი კვირიკაშვილმა.     პრემიერ-მინისტრი თავის გამოსვლაში საგარეო პოლიტიკასაც შეეხო. „ჩვენი პრაგმატული და სწორი საგარეო პოლიტიკის შედეგად, საქართველოში შეიქმნა უსაფრთხო და სტაბილური გარემო და დღეს, ჩვენი ქვეყანა ყველაზე უფრო ახლოს არის ევროკავშირთან და ნატოსთან, ვიდრე ოდესმე ყოფილა. მიღწეული შედეგი ჩვენ დამატებით სტიმულს გვაძლევს, რომ კიდევ უფრო ამბიციური ვიყოთ ჩვენს სამომავლო გეგმებში. უკვე შემუშავებულია საქართველოს ევროკავშირში ინტეგრაციის საგზაო რუკის ახალი კონცეფცია, რომლის  დევიზია - „მეტი ინტეგრაცია ახალი შესაძლებლობებისთვის“. ახალი კონცეფცია მიზნად ისახავს ევროკავშირთან თანამშრომლობის არსებული მექანიზმების, ასევე „ასოცირების შესახებ შეთანხმების“ მიღმა შესაძლებლობების მაქსიმალურ გამოყენებას, რაც ხელს შეუწყობს საქართველოს მომზადებას ევროკავშირში შემდგომი ინტეგრაციისათვის აუცილებლად მინდა გამოვყო ევროკავშირთან ვიზალიბერალიზაციის შეთანხმება, რომლის შედეგადაც დღეს საქართველოს მოქალაქეებს შეუძლიათ თავისუფალი მიმოსვლა ევროკავშირის ქვეყნებში. ეს მიმოსვლა ჩვენს ხალხს არაერთ შესაძლებლობას უჩენს როგორც ევროპასთან კულტურული და ღირებულებითი სიახლოვის გასამყარებლად, ისე ეკონომიკური თვალსაზრისითაც - განაცხადა გიორგი კვირიკაშვილმა.   პარტიის გენერალურმა მდივანმა კახა კალაძემ „ქართული ოცნების“ მმართველობის პერიოდში დემოკრატიის განვითარების, ადამიანის უფლებების,  ეკონომიკის, სოციალური დაცვის, საგარეო ურთიერთობების და სხვა მიმართულებით გადადგმულ ნაბიჯებზე ისაუბრა. მისი თქმით, ყველა ამ რეფორმის უკან იდგა პარტიის უმთავრესი ღირებულება - ადამიანი, საქართველოს მოქალაქე, თავისი ყოველდღიური საზრუნავით და უკეთესი მომავლის იმედით.     „ჩვენ შევძელით ამ პრობლემების მნიშვნელოვანი ნაწილის დაძლევა, თუმცა, რა თქმა უნდა, კიდევ ბევრი საკითხის გადაჭრაა საჭირო, ჩვენი ქვეყნისა და ხალხის კეთილდღეობის მისაღწევად. დღეს, ჩვენი პოლიტიკური გუნდის წინაშე, ახალი ტიპის გამოწვევები დგას, ჩვენი პარტია გადადის განვითარების ახალ ეტაპზე. და მე დარწმუნებული ვარ, ბიძინა ივანიშვილის ხელმძღვანელობით, ჩვენ შევძლებთ საზოგადოების კონსოლიდაციას ახალი ხედვებისა და იდეების განსახორციელებლად.  დარწმუნებული ვარ დღევანდელი ცვლილებები იქნება მძლავრი იმპულსი საქართველოში პარტიული და პოლიტიკური ცხოვრების ახალ საფეხურზე გადასაყვანად - განაცხადა კახა კალაძემ.     ყრილობას პარტიის დელეგატები, მინისტრთა კაბინეტის წევრები და დიპლომატიური კორპუსის წარმომადგენლები ესწრებოდნენ.

პოლიტიკური გაერთიანება „ქართული ოცნება - დემოკრატიული საქართველოს“ მეხუთე ყრილობამ პოლიტსაბჭოს განახლებული შემადგენლობა აირჩია.     15 კაციანი პოლიტსაბჭო  ყრილობას პარტიის გენერალურმა მდივანმა კახა კალაძემ წარუდგინა.  დელეგატებმა განახლებული პოლიტსაბჭოს ერთხმად დაუჭირა მხარი. პოლიტსაბჭოს  წევრებად აირჩიეს:     ბიძინა ივანიშვილი - „ქართული ოცნება - დემოკრატიული საქართველოს“ და პოლიტსაბჭოს თავმჯდომარე გიორგი კვირიკაშვილი - პრემიერ-მინისტრი  კახა კალაძე - თბილისის მერი ირაკლი კობახიძე - პარლამენტის თავმჯდომარე თამარ ჩუგოშვილი - პარლამენტის თავმჯდომარის პირველი მოადგილე გიორგი ვოლსკი - პარლამენტის თავმჯდომარის მოადგილე ილია ნაკაშიძე - პარლამენტის თავმჯდომარის მოადგილე არჩილ თალაკვაძე - საპარლამენტო უმრავლესობის ლიდერი მამუკა მდინარაძე - პარლამენტის ფრაქცია „ქართული ოცნების“ თავმჯდომარე დიმიტრი სამხარაძე - პარლამენტის ფრაქცია „ქართული ოცნების“ თავმჯდომარის მოადგილე   ირაკლი ტრიპოლსკი - პარლამენტის ფრაქცია „ქართული ოცნების“ თავმჯდომარის მოადგილე   ბიძინა გეგიძე - ფრაქცია „ქართული ოცნება-ძლიერი საქართველოსთვის“ თავმჯდომარე   მაია ცქიტიშვილი - რეგიონული განვითარებისა და ინფრასტრუქტურის მინისტრი; სოზარ სუბარი - ლტოლვილთა და განსახლების მინისტრი დავით საგანელიძე - საპარტნიორო ფონდის თავმჯდომარე     ყრილობას პარტიის დელეგატები, მინისტრთა კაბინეტის წევრები და დიპლომატიური კორპუსის წარმომადგენლები ესწრებოდნენ.    

მოგესალმებით ყველას,   მაინც მომიწია ამ ტრიბუნასთან დადგომა. დიახ, მომიწია იმ თანამიმდევრობის დარღვევა, რომლის შესახებაც პოლიტიკაში შემოსვლისთანავე განვაცხადე, მაგრამ როცა შენს ხალხზე, ქვეყანაზეა ლაპარაკი და ვითარება გადაწყვეტილების შეცვლას ითხოვს, გაჯიუტება საკუთარ თავთან არასწორია.   ვიდრე უშუალოდ პოლიტიკაში ჩემი დაბრუნების მიზეზებზე გადავიდოდე, რამდენიმე სიტყვით ჩვენი ერთად განვლილი გზა მინდა მიმოვიხილო.   დღეს არ ვაპირებ ხელისუფლების საქმიანობასა და მოღვაწეობაზე ვრცელი და დეტალური ანგარიში წარმოვადგინო, მითუმეტეს, რომ ეს არ არის ჩემი პრეროგატივა, მაგრამ თავს ვალდებულად ვთვლი, რომ მოქალაქეობრივი პასუხისმგებლობით და სიამაყითაც კი, ხაზი გავუსვა იმ ფუნდამენტურ სახელმწიფოებრივ გამარჯვებებს, რასაც ხელისუფლებამ ისტორიულად ძალზე მოკლე დროში, არასრულ ექვს წელიწადში მიაღწია.   პირადად ჩემთვის და, დარწმუნებული ვარ, საქართველოს მოსახლეობის დიდი უმრავლესობისათვის ყველაზე მნიშვნელოვანია ის დემოკრატიული ტრანსფორმაცია, რომელიც ქვეყანამ განიცადა ბოლო წლების განმავლობაში.   დღეს საქართველოს მოქალაქეები რეალურად თავისუფლები და სახელმწიფოს მხრიდან ყოველგვარი თვითნებობისაგან დაცულნი არიან. შეგახსენებთ, რომ დამოუკიდებლობის მოპოვების შემდეგ სწორედ ეს იყო ჩვენი ხალხის ერთ-ერთი მთავარი ეროვნული ამოცანა. ისინი დემოკრატიული გზით ირჩევენ ხელისუფლებას და თავადვე ანიჭებენ მას სახელმწიფოს მართვის ლეგიტიმაციას.   დღეს ჩვენ გვყავს არა არჩევნების გაყალბებით, დაშინებითა და ძალადობით მოსული, არამედ ხალხის ნდობის საფუძველზე შერჩეული, ცხადია, არა უნაკლო, მაგრამ რაც მთავარია, ადამიანზე, როგორც მთავარ ღირებულებაზე ორიენტირებული ხელისუფლება. ამის თვალსაჩინო მაგალითი, სხვას ყველაფერს რომ თავი დავანებოთ, საყოველთაო ჯანდაცვის ხელმისაწვდომობის უზრუნველყოფა წარმოადგენს.   დღეს სრულად დაცული და ხელშეუხებელია ერთ-ერთი მთავარი სოციალური ინსტიტუტი, ადამიანის თავისუფალი განვითარების ძირითადი საფუძველი - კერძო საკუთრება, რომელიც წინა ხელისუფლების დროს ფეხქვეშ გათელილი და განადგურებული იყო. აღარ არსებობს ელიტარული კორუფცია, ხელისუფლებასთან შეზრდილი ბიზნესმენების მიერ ხელში ჩაგდებული და მონოპოლიზებული სფეროები, სადაც ფეხის შედგმის გაფიქრებაც კი ჩვეულებრივ მეწარმეს მრავალწლიან პატიმრობად და მთელი ქონების დაკარგვად უჯდებოდა.   სრული პასუხისმგებლობით ვაცხადებ, რომ დღეს, ისე როგორც არასდროს, საქართველოს ისტორიაში, თავისუფალი და დაცულია ბიზნესი - ქვეყანაში დოვლათის შექმნისა და კეთილდღეობის მთავარი საფუძველი, რაც ჩემთვის უდიდესი ბედნიერებაა.   სწორედ ამან განაპირობა, რომ მსოფლიო ეკონომიკაში ბოლო წლებში არსებული არასტაბილურობისა და რყევების მიუხედავად, საქართველო ყველა საერთაშორისო ორგანიზაციის შეფასებით, კაპიტალის დაბანდების თვალსაზრისით, ერთ-ერთი ყველაზე მიმზიდველი და საინტერესო ქვეყანაა. პირდაპირი უცხოური ინვესტიციების საერთო მოცულობამ კი შარშან საქართველოს ისტორიაში რეკორდულ მაჩვენებელს მიაღწია.   ბოლო 5 წლის მონაცემებით, ეკონომიკური ზრდის თვალსაზრისით, საქართველო ლიდერობს რეგიონში, ხოლო სავალუტო ფონდის ბოლო, განახლებული მონაცემებით, მომავალი 6-წლიანი ეკონომიკური ზრდის პროგნოზით, საქართველო ლიდერია არათუ რეგიონში არამედ ევროპის და ცენტრალური აზიის ქვეყნებს შორისაც.   ხელშესახები პროგრესი გვაქვს სასამართლოს დამოუკიდებლობისა და სამართალდამცავი ორგანოების დეპოლიტიზირების კუთხით, რადიკალურ გარდატეხას მივაღწიეთ პენიტენციალურ სისტემაში ადამიანის უფლებათა დაცვის მიმართულებით.   წარმატებით დავასრულეთ საკონსტიტუციო რეფორმის რთული და წინააღმდეგობებით აღსავსე პროცესი და იმ კონსტიტუციის   ნაცვლად, რომელიც ფორმალურად ამართლებდა ერთი ადამიანის მარადიულ მმართველობას, მივიღეთ ხალხის მმართველობაზე ორიენტირებული ევროპული სტანდარტის ძირითადი კანონი.   ეს კონსტიტუცია საქართველოს შეუქცევადი დემოკრატიული პროგრესის საყრდენი და წინაპირობაა!   თვალშისაცემია წინსვლა საგარეო მიმართულებით. არასოდეს საქართველო ისე დაახლოებული არ ყოფილა ევროპასთან და ნატოსთან, როგორც ამჟამად. ჩვენ ერთიანი ევროპული ოჯახის ასოცირებული წევრები ვართ და ეს ფაქტი უკვე იურიდიულადაც დადასტურებულია. ამოქმედებულია ევროპასთან თავისუფალი ვაჭრობისა და უვიზო მიმოსვლის რეჟიმი, რომლითაც უამრავმა ადამიანმა ისარგებლა.   საგრძნობლად განმტკიცდა და გაღრმავდა ურთიერთობა ჩვენს სტრატეგიულ მოკავშირესთან, ამერიკის შეერთებულ შტატებთან.   ჩვენ ნაწილობრივ უკვე მოვახერხეთ რუსეთთან ურთიერთობის დეესკალაცია და ვიმედოვნებთ, რომ საერთაშორისო პარტნიორების დახმარებით, შესაძლებელი გახდება ურთიერთმოსმენისა და დიალოგის რეჟიმზე გადასვლა, რაც ჩვენი სახელმწიფოებრივი ამოცანების ნაბიჯ-ნაბიჯ მიღწევის პერსპექტივებს შექმნის.   და ბოლოს, უკანასკნელი ათწლეულების განმავლობაში ყველაზე ცვალებად, არაპროგნოზირებად, ტერორიზმისა და გლობალური სამხედრო კონფლიქტის საშიშროების წინაშე მდგარი მსოფლიოს პირობებში, როცა არნახულად მაღალია გეოპოლიტიკური და გეოეკონომიკური ინტერესების დაპირისპირების ხარისხი, ჩვენ შევძელით საქართველოს მოქალაქეებისათვის უსაფრთხოებისა და მშვიდობის უზრუნველყოფა. ჩვენ შევძელით სტაბილურობის შენარჩუნება.   ახლა მინდა დღევანდელ მთავარ სათქმელს დავუბრუნდე.  რატომ ვბრუნდები პოლიტიკაში, მაშინ, როცა რამდენიმე წლის წინ საჯაროდ განვაცხადე, რომ ამ გადაწყვეტილებას მხოლოდ უკიდურესი აუცილებლობის შემთხვევაში მივიღებდი. რატომ გადავწყვიტე ახლა, კვლავ ჩავუდგე სათავეში იმ პოლიტიკურ პარტიას, რომელიც 2012 წელს დავაფუძნე და ჩემს ხალხთან ერთად შევასრულე ჩემს ცხოვრებაში ალბათ ერთ-ერთი ყველაზე საპატიო მისია - დავამარცხეთ და, დარწმუნებული ვარ, ქვეყნის მართვას საბოლოოდ ჩამოვაშორეთ მოძალადე და ხალხის მჩაგვრელი ხელისუფლება.   ამის შემდეგ საკუთარი ინიციატივით გავედი აქტიური პოლიტიკიდან, რადგან ჩავთვალე, რომ ჩემი როლი საზოგადოების განვითარებაში უფრო მნიშვნელოვანი იქნებოდა და დღესაც დარწმუნებული ვარ, რომ ეს იყო სწორი გადაწყვეტილება, ვინაიდან ის, რაც ჭარბად გამაჩნდა - ხალხის ნდობა - ხელისუფლებაზე მეტად მაშინ საზოგადოებას უფრო სჭირდებოდა. მაშ ახლა რატომღა ვდგამ ამ ნაბიჯს, რატომ გახდა საჭირო პოლიტიკაში ჩემი დაბრუნება? ეს არის კითხვა, რომელზეც საზოგადოება ჩემგან მკაფიო პასუხს ელის და მეც მზად ვარ, გაგიზიაროთ ჩემი მოსაზრებები. ვინც ახლოს მიცნობს, კარგად იცის, რომ ეს ჩემთვის საკმაოდ რთული გადაწყვეტილება არც დღევანდელი ხელისუფლების, არც „ქართული ოცნების“ და, მითუმეტეს არც ჩემი პირადი ინტერესებიდან გამომდინარე არ მიმიღია. ისევე, როგორც 2011 წლის ოქტომბერში, მიზანი ამჟამადაც იგივე და უცვლელია: საქართველოს, საქართველოს ხალხის და თითოეული ოჯახის კეთილდღეობა და ღირსეული მომავალი!   ამიტომ ახლა სწორედ ჩემს ხალხს მინდა მივმართო! ჩვენ ვდგავართ ძალზე მნიშვნელოვანი გამოწვევის წინაშე, რასაც პირობითად სამი მიზეზი განსაზღვრავს და უქმნის ნოყიერ ნიადაგს. პირველი მიზეზია - ობიექტურად არსებული არასახარბიელო სოციალურ-ეკონომიკური მდგომარეობა და ამ, ისედაც რთული ვითარების კიდევ უფრო მძაფრ, ხელოვნურად დამძიმებულ ფერებში წარმოჩენის განუწყვეტელი მცდელობები;   მეორე - ოპონენტების უმრავლესობისგან   მომდინარე უკიდურესად დესტრუქციული მუხტი და ბოლოს,  მესამე - ხელისუფლების შიგნით არსებული, მართალია სუსტი, მაგრამ მაინც სრულიად არასაჭირო, უსაფუძვლო და ქვეყნის ინტერესების დამაზიანებელი გაუგებრობები. უფრო დეტალურად შევჩერდეთ თითოეულ მათგანზე. ზედმიწევნით კარგად ვიცი, რა სირთულეების წინაშეა დღეს რიგითი მოქალაქე. ჩვენ ხომ ჯერ კიდევ ვერ დავაღწიეთ თავი იმ ეკონომიკურ სიდუხჭირეს, რომელშიც დამოუკიდებლობის გარიჟრაჟზე განვითარებული, მათ შორის, სისხლიანი კატაკლიზმების შედეგად აღმოვჩნდით.    ჯერ კიდევ არ გვქონდა მოშუშებული სამოქალაქო ომის იარები, როდესაც ტერიტორიული მთლიანობისთვის ომში ჩავებით, რასაც შედეგად რუსული ოკუპაცია და მასობრივი დევნილების ორი ტალღა მოჰყვა. სწორედაც რომ, თანამედროვე სახელმწიფო მართვის ტრადიციის არქონის კვალდაკვალ დაწყებულმა ქაოსმა უმძიმესი სოციალურ-ეკონომიკური ვარდნა გამოიწვია ქვეყანაში და სიღარიბე მასობრივ მოვლენად აქცია. დღემდე მწვავეა უმუშევრობის, ხოლო დასაქმებულთათვის არასაკმარისი ხელფასის, აგრეთვე პენსიების პრობლემა, - სამწუხაროდ ძვირდება ცხოვრება.   ადრეც მითქვამს და ახლაც ვიმეორებ, რომ დღევანდელ საქართველოში პოლიტიკურ პრობლემებს მნიშვნელოვანწილად ქმნის ის, რომ ერთის მხრივ გვაქვს თითქმის ევროპული ხარისხის დემოკრატია, რასაც მეორეს მხრივ ბევრად ჩამორჩება ეკონომიკური განვითარების დონე. დემოკრატიისა და ეკონომიკის დონეებს შორის ასეთი დისპროპორცია იმდენად უნიკალური მოვლენაა, რომ ძნელად თუ მოიძებნება რომელიმე სხვა ქვეყანა, სადაც ანალოგიური მდგომარეობაა. ტრადიციულ დემოკრატიებში ეკონომიკა და თავისუფლებები, როგორც წესი, ერთმანეთს ზრდიდნენ და ავსებდნენ.   ამ დისჰარმონიის აღმოფხვრა თანამედროვე საქართველოს უმთავრესი გამოწვევაა და ამ გზაზე, როგორ რთულ ამოცანადაც არ უნდა ჩანდეს ეს, ჩვენ არჩევანი დემოკრატიის სასარგებლოდ გავაკეთეთ და გადაჭრით ვთქვით, რომ ეკონომიკა უნდა დავაწიოთ დემოკრატიას და არა პირიქით. აუცილებლად უნდა შევინარჩუნოთ დემოკრატიის მაღალი დონე და მუდმივად ვიზრუნოთ მის განვითარებაზე. დემოკრატია არის ჩვენი უპირობო არჩევანი, თუმცა, სწორედ ამ არჩევანისადმი ერთგულება გარკვეულწილად ზრდის ქვეყანაში პოლიტიკურ რისკებს, რადგან ავანტიურისტული ჯგუფები   დესტრუქციული ქმედებებით იბრძვიან ძალაუფლებისთვის. ჩვენ ვცხოვრობთ გლობალური ინფორმირებულობის ეპოქაში, სადაც საქართველოს მოქალაქეები სარგებლობენ სრული საინფორმაციო თავისუფლებით და ხელმისაწვდომობით. ისინი, ამავე დროს, უვიზოდ მოგზაურობენ ევროპის და მსოფლიოს მაღალგანვითარებულ ქვეყნებში და თვალნათლივ ხედავენ იქაური და აქაური ცხოვრების დონის შორის არსებულ უზარმაზარ ეკონომიკურ და სოციალურ კონტრასტს. განვითარებული ქვეყნების მთლიანი შიდა პროდუქტი ხშირად 5-ჯერ და 10-ჯერ აღემატება ჩვენსას. ასეთ დროს, ცხადია, ბუნებრივად ჩნდება სურვილი, რომ საქართველოში ცხოვრების დონე ევროპულს გაუტოლდეს და ეს დაუყოვნებლივ, ან მაქსიმალურად მოკლე დროში მოხდეს.   არაფერია უცნაური და გაუგებარი იმაში, რომ ხალხს უკეთესად ცხოვრება სურს, მაგრამ უცნაური და გაუგებარი ისაა, რომ საქართველოში თითქმის ვერ ვნახავთ პოლიტიკოსს და ექსპერტს, ვინც სიმართლეს ეტყოდა და გასაგებად აუხსნიდა ადამიანებს, რომ ევროპას ასწლეულების განმავლობაში მრავალი ეკონომიკური და პოლიტიკური კატაკლიზმის გადატანა დასჭირდა, ვიდრე ცხოვრების დღევანდელ დონეს მიაღწევდა და რომ ბუნებაში ვერ იარსებებს ხელისუფლება, რომელიც შეძლებს ეკონომიკა წელიწადში ხუთი და ექვსი კი არა, არამედ ექვსასი პროცენტით გაზარდოს.   მედიის თავისუფლების ხარისხის მკვეთრმა ზრდამ, რაც ჩვენი ხალხის განსაკუთრებული მონაპოვარი და გადაჭარბების გარეშე შეიძლება ითქვას, რომ უშუალოდ არსებული ხელისუფლების დამსახურებაა, უამრავ სიკეთესთან ერთად, განაპირობა სიცრუისა და პროპაგანდის მანქანის ძალიან დიდი სიმძლავრით ამუშავება. რიგი პოლიტიკური პარტიების მიერ მართული ტელევიზიები, ტყუილის წარმოების კონვეიერში ჩართული პოლიტიკოსები და ეგრეთწოდებული ექსპერტები მიზანდასახულად ნერგავენ უიმედობის, სასოწარკვეთილების და შიშის ატმოსფეროს. ეს „ცარიელი სიმრავლე“ ცდილობს დააჯეროს ხალხი, რომ ქვეყანა ინგრევა, ლამის აპოკალიფსი მოახლოვდა და ყოველივე ეს არის ამ ხელისუფლების საქმიანობის შედეგი, რომელიც თითქოს არაფერს აკეთებს მდგომარეობის გამოსასწორებლად. ცხადია, ეს ბრალდებები არცერთი მეტნაკლებად სანდო და დასაბუთებული არგუმენტით არ არის გამყარებული, თუმცა შეჭირვებული და სიდუხჭირით დაღლილი ადამიანები ამ ოსტატურად შეფუთულ ტყუილებს იყენებენ . გადაჭარბების გარეშე მინდა გითხრათ, რომ საქართველოში დღეს მიმდინარეობს არნახული საინფორმაციო იერიში ადამიანთა ცნობიერებაზე. ჩვენს ქვეყანაში დამკვიდრდა ერთგვარი სტანდარტი, რომლის თანახმადაც ფაქტს „ახალი ამბის“ სტატუსი მხოლოდ იმ შემთხვევაში ენიჭება, თუ იგი ნეგატიურ კონტექსტს შეიცავს.   სამწუხაროდ, ამ ნეგატიურმა ტრენდმა, პრაქტიკულად, საყოველთაო ხასიათი მიიღო და უნდა აღვნიშნო, რომ ხელისუფლებამაც სათანადოდ ვერ უპასუხა ამ გამოწვევას.   მეორე პრობლემა, რამაც დღევანდელი გადაწყვეტილების მიღებისკენ მიბიძგა, ქვეყანაში კონკურენტუნარიანი ოპოზიციის დეფიციტია. ჩვენი ოპონენტების უღირსი ნაწილი ხელისუფლებასთან არგუმენტირებული მეტოქეობის, გონივრული, უკეთესი ალტერნატივების შეთავაზების და დასაბუთებული კრიტიკის ნაცვლად, შეპყრობილია მხოლოდ ანტიდემოკრატიული რევანშის წყურვილით.   ისინი ერთმანეთს ეჯიბრებიან არა უკეთესი პროგრამების წარმოდგენაში, არამედ ქვეყანაში უპერსპექტივობისა და უიმედობის ატმოსფეროს დანერგვაში, რადგან კარგად იციან, რომ მხოლოდ ეროვნული პესიმიზმია მათი ის ერთადერთი პლაცდარმი, რომლიდანაც შეძლებენ ქართულ დემოკრატიაზე შურისძიებას. ხალხის ნდობის არქონის გამო, ისინი ვერ ხედავენ დემოკრატიული პროცედურებით ხელისუფლებაში მოსვლის პერსპექტივას და ამიტომაც ცდილობენ ისეთი განწყობის შექმნას, როდესაც არეულობა სიტუაციის შეცვლის ერთადერთ გზად უნდა მოეჩვენოს ხალხს. ჩემთვის სრულიად ნათელია, რომ სწორედ ამ და ქვეყნის წინაშე არსებული სხვა მრავალი გამოწვევის ფონზე, ხელისუფლების შიგნით დაიწყო გარკვეული დაპირისპირება, რაც გასცდა პოლიტიკური გუნდისთვის მისაღებ დემოკრატიულობისა და აზრთა სხვადასხვაობის საზღვრებს და სწორედ ეს არის მესამე მიზეზი, რის გამოც მე პოლიტიკაში ვბრუნდები.   მტკიცედ მჯერა, რომ ჩვენ არ გვაქვს უფლება, ფუჭ კინკლაობაში, თუნდაც უმნიშვნელო დრო, ენერგია და რესურსი დავხარჯოთ. დაუშვებელია, პირადი უთანხმოებისა და წყენის გამო, საერთო პარტიული და მითუმეტეს ეროვნული ამოცანების შესრულებისთვის თუნდაც მცირე დაბრკოლების შექმნა. მე ვიგრძენი, რომ ჩემს მიერ შექმნილი პარტია „ქართული ოცნება - დემოკრატიული საქართველო“, რომლის იდეოლოგიური მდგრადობა მის სახალხოობაშია, ამ პროცესების გაღრმავების შემთხვევაში დაშორდებოდა ხალხს. ამიტომ გადავწყვიტე დაბრუნება, დიახ - მეორედ შემოსვლა საჯარო პოლიტიკაში.   დღეს ჩვენ ვიმყოფებით ისტორიული გარდატეხის მომენტში და სწორედ ახლა არ გვაქვს უიმედობისა და გულგატეხილობის უფლება. ჩვენ დღეს მხოლოდ გამარჯვებების უფლება გვაქვს!   მიუხედავად ჩვენი ქვეყნის მიმართ არსებული გულწრფელი მხარდაჭერისა, დემოკრატიის არარსებობის პირობებში, არცერთი ევროპული სახელმწიფო არ მიგვიჩნევდა სრულფასოვან, თანასწორ პარტნიორად. დემოკრატიის გარეშე ჩვენ განწირულნი ვიყავით, რომ საქართველოსა და ევროპას შორის დისტანცია შემცირების ნაცვლად, კიდევ უფრო გაიზრდებოდა. დემოკრატიის გარეშე, ჩვენ ვერასოდეს გავხდებოდით ევროპული ოჯახის წევრი. ექვსი წლის წინ,   ქართველმა ხალხმა დაძლია უიმედობა და გულგატეხილობა და თავისი ბედისწერა შეცვალა, ირწმუნა ჩვენი პოლიტიკური ძალის და მოიპოვა დემოკრატია. ჩვენ დემოკრატია არც მემკვიდრეობით მიგვიღია და არც ვინმეს კეთილი ნებით უბოძებია ზემოდან, ჩვენ ის სამკვდრო-სასიცოცხლო ბრძოლით ხელიდან გამოვგლიჯეთ რეჟიმს. და რაც ყველაზე მთავარია, უნიკალური ორგანიზებისა და პროცესების ფილიგრანული მართვის წყალობით, ჩვენ ეს უსისხლოდ მოვახერხეთ. სწორედ ამით დავამტკიცეთ, რომ ევროპელობა ჩვენი ცივილიზაციური არჩევანია. ზედმეტი თავმდაბლობის გარეშე ვიტყვი: „ქართულმა ოცნებამ“ დემოკრატიას შეუქცევადობის პირველი მძლავრი იმპულსი მისცა და ამით გაუხსნა საქართველოს ევროპის კარი!   დემოკრატიაა ჩვენი უკომპრომისო ეროვნული იდეა და ჩემი ზეამოცანაა ამ მონაპოვარის შენარჩუნება და განვითარება. სწორედ ამისთვის ვბრუნდები საჯარო პოლიტიკაში!   სრულიად განჭვრეტად მომავალში ჩვენ ღირსეულად დავიმკვიდრებთ თავს ევროპულ ოჯახში, როგორც გამორჩეული, თვითმყოფადი ერი, უძველესი ქრისტიანული კულტურის, უნიკალური დამწერლობის და პოლიფონიის, ტრადიციული მეღვინეობის და ვეფხისტყაოსნის ქვეყანა, დასახლებული გულღია და ტოლერანტი ადამიანებით, სადაც სწამთ, რომ „სტუმარი ღვთისაა“. სტუმარმასპინძლობა ჩვენი ეროვნული იდენტობის ნაწილია და ძალიან მალე ეს გამორჩეული თვისება, მე ვიტყოდი - ჩვენი საწყისი უპირატესობა - სწრაფი განვითარების და კეთილდღეობის წყაროდ უნდა გადაიქცეს როგორც მთლიანად ქვეყნისთვის, ისე ათასობით ქართული ოჯახისთვის. საქართველოს შესწევს უნარი, რომ უმასპინძლოს არამხოლოდ მილიონობით ტურისტს, არამედ საუკეთესო პირობებით, უმაღლეს დონეზე უმასპინძლოს საერთაშორისო ფორუმებს, უმასპინძლოს დიდ ბიზნესს, გახდეს განათლების, სამედიცინო მომსახურების და მაღალი ტექნოლოგიების რეგიონალური ცენტრი - იყოს დიდი შესაძლებლობების ქვეყანა. საჭიროა მხოლოდ მიზანდასახულობა, რწმენა და შრომა, ყველაფერი დანარჩენი ჩვენ უხვად მოგვანიჭა ბუნებამ.   ხელისუფლების ვალდებულებაა, რომ უზრუნველყოს მშვიდობა, შეინარჩუნოს სტაბილური, უსაფრთხო და კონკურეტუნარიანი გარემო თითოეული მოქალაქისთვის.   მე მწამს საქართველოსი, მჯერა ჩვენი განსაკუთრებულობის, მჯერა ჩვენი ევროპული პერსპექტივის და ზუსტად ვიცი, რომ აუცილებლად დავიბრუნებთ ჩვენს აფხაზ და ოს ძმებს და რომ უდიდესი წარსულის ხალხს გვექნება ღირსეული მომავალი! ეს არის ჩემი მთავარი და აბსოლუტური მიზანი! ამ საქმეს ბოლომდე მივიყვანთ და გავიმარჯვებთ! სწორედ ამიტომ დავბრუნდი პოლიტიკაში!

„პარტიაში რეფორმების მეორე ტალღის მიზანი უნდა იყოს ჩვენი პარტიის საბოლოოდ ჩამოყალიბება ევროპული ტიპის პოლიტიკურ გაერთიანებად, რომელიც მუშაობს და აქტიურია არა მხოლოდ არჩევნების პერიოდში არა მხოლოდ საშტაბო რეჟიმში, არამედ, რომელიც არჩევნებიდან არჩევნებამდე პერიოდშიც, ყოველდღიურ რეჟიმში არის ჩართული პოლიტიკური პროცესების დაგეგმვაში და მართვაში- ეს არის ჩვენი საბოლოო ამოცანა და აქ ხაზგასმით უნდა აღინიშნოს ის, რომ ამ პროცესს სათავეში ჩაუდგება, პრაქტიკულად უკვე ჩაუდგა ჩვენი პარტიის დამფუძნებელი ბატონი ბიძინა ივანიშვილი და ეს არის საუკეთესო გარანტია იმისა, რომ ეს მიზანიც იქნება სათანადოდ და სრულფასოვნად მიღწეული“,-ამის შესახებ საქართველოს პარლამენტის თავმჯდომარე ირაკლი კობახიძემ პოლიტიკური გაერთიანება „ ქართული ოცნება - დემოკრატიული საქართველოს“ ცენტრალურ ოფისში, თბილისის რაიონული ორგანიზაციების კონფერენციაზე განაცხადა.     პარტიის აღმასრულებელმა მდივანმა დამსწრეებს ქვეყნის განვითარებასა და პარტიის გაძლიერებაში შეტანილი წვლილისთვის მადლობა გადაუხადა. მისი თქმით, ქვეყანა ყველა მიმართულებით აგრძელებს წინსვლას და ეს არის მმართველი პარტიის თითოეული წევრის დამსახურება.     ირაკლი კობახიძემ შეკრებილებს ორი წლის წინ დასახული მიზნები შეახსენა და აღნიშნა, რომ ეს მიზნები მიღწეულია.     „ჩვენ გვქონდა ორი წლის წინ ამავე ფორმატში კონფერენციაზე შეკრების საშუალება და მაშინ ჩვენ ვსაუბრობდით იმაზე, თუ როგორი გეგმები გვქონდა ქვეყნის განვითარების თვალსაზრისით, როგორი გეგმები გვქონდა პარტიის გაძლიერების კუთხით და დღეს, ორი წლის თავზე, შეიძლება ითქვას, რომ ის მიზნები, რომლებიც მაშინ ჩვენ დავისახეთ, არის მიღწეული. ამაზე ჩვენ ერთად ვიმუშავეთ და ამაშიც არის, რა თქმა უნდა, პარტიის თითოეული წევრის ძალიან დიდი დამსახურება. მაშინ ჩვენ ვსაუბროდით იმაზე, რომ გასაძლიერები იყო პარტიის ცენტრალური რგოლი, ცენტრალური ოფისი, იმ დროისათავის, პრაქტიკულად უმოქმედო იყო ცენტრალური აპარატი და ჩვენი ერთ-ერთი უმთავრესი ამოცანა იყო მაშინ პარტიის ცენტრალური ოფისის გაძლიერება. ეს მიზანი დავისახეთ და ეს მიზანი სათანადოდ განხორციელდა. განსაკუთრებული აქცენტი გაკეთდა რეგიონული სამსახურის გაძლიერებაზე. გაძლიერდა ეს სამსახური, გაძლიერდა სხვა სამსახურები და ამ ყველაფერმა ძალიან დიდი წვლილი შეიტანა ჩვენს საარჩევნო წარმატებაში, 2016 წლის საპარლამენტო არჩევნებში”,- განაცხადა პარლამენტის თავმჯდომარემ. მისივე თქმით, ასევე განსაკუთრებული პრიორიტეტი იყო ადგილობრივი ორგანიზაციების გაძლიერება. ირაკლი კობახიძის თქმით, იმ დროისთვის, პარტიული ოფისების უმეტესობა რეგიონებში, პრაქტიკულად დაკეტილი იყო და ამ ორგანიზაციების გაძლიერება 2016 წლის საპარლამენტო არჩევნებში გამარჯვების მნიშვნელოვანი საწინდარი გახდა.     „უმოქმედო იყო ადგილობრივი ოფისები და ჩვენი ამოცანა ამ შემთხვევაში იყო ადგილობრივი ორგანიზაციების ამოქმედება, ამ ორგანიზაციების გაძლიერება და ესეც გახდა მნიშვნელოვანი საწინდარი იმისა, რომ ჩვენ გავიმარჯვეთ 2016 წლის საპარლამენტო არჩევნებში. ასევე, ვსაუბრობდით იმაზე, რომ განახლებას საჭიროებდა ჩვენი პოლიტიკური გუნდი და ეს მიზანიც სათანადოდ შესრულდა. განახლდა ჩვენი საპარლამენტო გუნდი, განახლდა სამთავრობო გუნდი. ასევე, შემდეგ უკვე მუნიციპალურ დონეზე განახლდა ჩვენი პოლიტიკური გუნდი, რაც იყო ასევე ძალიან მნიშვნელოვანი საფუძველი იმისა, რომ ჩვენ წარმატებით გაგვეგრძელებინა ჩვენი პოლიტიკური საქმიანობა. ამ ყველაფრის შედეგად, წარმატებული კამპანიის შედეგად და რაც მთავარია, ჩვენი მოსახლეობის, ხალხის მხარდაჭერის შედეგად ჩვენ მოვიპოვეთ დამაჯერებილი გამარჯვება 2016 წელს, საპარლამენტო არჩევნებში”,- განაცხადა პარტიის აღმასრულებელმა მდივანმა.     ირაკლი კობახიძის შეფასებით, 2016 წლის არჩევნები გარდამტეხი და საკვანძო მნიშვნელობის იყო და სწორედ საპარლამენტო არჩევნებში, მმართველმა გუნდმა მოახერხა ის, რომ „ნაციონალური მოძრაობა“ აღარ არის რისკ-ფაქტორი ქვეყნის დემოკრატიული განვითარებისთვის. მისივე თქმით, პრინციპული და მნიშვნელოვანი იყო 2017 წლის არჩევები, განსაკუთრებით-დედაქალაქში. ირაკლი კობახიძის შეფასებით, ის, რომ დღეს ყველა ხედავს თბილისის განვითარებას, არის პარტიის მობილიზაციისა და კონსოლიდაციის შედეგი.     „ეს იყო ნამდვილად კიდევ ერთი, მორიგი, გარდამტეხი არჩევნები, საკვანძო არჩევნები. მაშინ, იმ დროისათვის, ჯერ კიდევ საკმაოდ ძლიერი იყო ჩვენი მთავარი ოპონენტი, „ნაციონალური მოძრაობა“ და ჩვენ 2016 წლის საპარლამენტო არჩევნებში, მოვახერხეთ ის, რომ „ნაციონალური მოძრაობა“ დღეს აღარ არის რისკ -ფაქტორი ჩვენი დემოკრატიული განვითარებისათვის და ქვეყანა აგრძელებს შეუქცევად წინსვლას დემოკრატიული მიმართულებით და ყველა სხვა მიმართულებით, რომელიც არის მნიშვნელოვანი, ზოგადად, ჩვენი ქვეყნის განვითარებისათვის.     ასევე, 2017 წლის არჩევნები იყო ჩვენთვის ძალიან პრინციპული და მნიშვნელოვანი, განსაკუთრებით თბილისში. აქ ჩვენ მიზნად დავისახეთ პირველივე ტურში დამაჯერებლად გამარჯვება და ძალიან მნიშვნელოვანია, რომ ეს მიზანიც იქნა მიღწეული და დღეს, ის რომ ჩვენ ყველა ვხედავთ თბილისში განვითარებას, ვხედავთ ახალ ენერგიას, არის ზუსტად იმის დამსახურება, რომ ჩვენი პარტია, ჩვენი აქტივი იყო მობილიზებული და ამ კონსოლიდაციის შედეგად ჩვენ მოვახერხეთ დამაჯერებელი გამარჯვების მოპოვება და თბილისი დღეს ახალი ენერგიით აგრძელებს წინსვლას ბევრი მიმართულებით და აგრძელებს იმ გამოწვევებთან გამკლავებას, რომელიც დგას ჩვენი ქალაქის წინაშე. ეს იყო კიდევ ერთხელ გავიმეორებ ის ერთგვარი  დაპირებები, რომელიც გაიცა მაშინ, ორი წლის წინ, პარტიულ  კონფერენციაზე და ეს მიზნები ჩვენ ყველამ ერთად შევასრულეთ. რომ არა პარტიის თითოეული წევრის თანამონაწილეობა, თანადგომა, ერთად დგომა, ბუნებრივია, ამ მიზნების მიღწევა იქნებოდა შეუძლებელი”,-განაცხადა ირაკლი კობახიძემ.     პარლამენტის თავმჯდომარის განცხადებით, პრინციპულად მნიშვნელოვანია დამაჯერებლი გამარჯვების მოპოვება საპრეზიდენტო არჩევნებში. როგორც ირაკლი კობახიძემ სიტყვით გამოსვლისას აღნიშნა, ის დარწმუნებულია, რომ მმართველი გუნდი არჩევნებში ღირსეული კანდიდატით წარდგება.     “წინ გველის ჩვენ ახლა ასევე ძალიან  მნიშვნელოვანი არჩევნები, საპრეზიდენტო არჩევნები. ამ შემთხვევაშიც ჩვენთვის პრინციპულად მნიშვნელოვანია დამაჯერებელი გამარჯვების მოპოვება, პირველივე ტურში გამარჯვება და დარწმუნებული ვარ, რომ ჩვენ წავრსდგებით ღირსეული კანდიდატით ამ არჩევნებში და ჩვენი კანდიდატით მოვიპოვებთ ასევე დამაჯერებელ გამარჯვებას რაც იქნება კიდევ ერთი მნიშვნელოვანი წინაპირობა იმისათვის,  რომ გაგრძელდეს ჩვენი ქვეყნის განვითარება ყველა მიმართულებით“,- აღნიშნა ირაკლი კობახიძემ.     მისი თქმით, საპრეზიდენტო არჩევნების შემდგომ, ორწლიან პერიოდს პარტია განვითარებისთვის და რეფორების მეორე ტალღის განხორციელებისთვის გამოიყენებს, რომლის მიზანიც „ქართული ოცნების“ ევროპული ტიპის პოლიტიკურ გაერთიანებად საბოლოო ჩამოყალიბებაა. ირაკლი კობახიძემ ხაზგასმით აღნიშნა, რომ ამ პროცესს სათავეში ჩაუდგება პარტიის დამფუძნებელი ბიძინა ივანიშვილი და სწორედ ეს არის სათანადო გარანტია იმისა, რომ ეს მიზანი სათანადოდ და სრულფასოვნად იქნება მიღწეული.      “ჩვენ საპრეზიდენტო არჩევნების შემდეგ გვექნება დაახლოებით ორწლიანი პერიოდი, თავისუფალი პერიოდი, არჩევნებისგან თავისუფალი პერიოდი. სამწუხაროდ, წინა, პარქტიკულად, ყველა წელი იყო საარჩევნო 2012 წლის შემდეგ გარდა ერთი გამონაკლისისა და ეს ორ წლიანი პერიოდი შეგვიძლია ჩვენ ძალიან კარგად გამოვიყენოთ პარტიის განვითარებისათვის და ეს დრო აუცილებლად უნდა იყოს ამისათვის გამოყენებული. ჩვენ ვსაუბრობთ უკვე საკმაოდ დიდიხანია იმაზე, რომ საჭიროა პარტიაში რეფორმების მეორე ტალღის განხორციელება და ამ მეორე ტალღის მიზანი უნდა იყოს ჩვენი პარტიის საბოლოოდ ჩამოყალიბება ევროპული ტიპის პოლიტიკურ გაერთიანებად, რომელიც მუშაობს და აქტიურია არა მხოლოდ არჩევნების პერიოდში არა მხოლოდ საშტაბო რეჟიმში, არამედ, რომელიც არჩევნებიდან არჩევნებამდე პერიოდშიც, ყოველდღიურ რეჟიმში არის ჩართული პოლიტიკური პროცესების დაგეგმვაში და მართვაში. ეს არის ჩვენი საბოლოო ამოცანა და აქ ხაზგასმით უნდა აღინიშნოს ის, რომ ამ პროცესს სათავეში ჩაუდგება, პრაქტიკულად უკვე ჩაუდგა ჩვენი პარტიის დამფუძნებელი ბატონი ბიძინა ივანიშვილი და ეს არის საუკეთესო გარანტია იმისა, რომ ეს მიზანიც იქნება სათანადოდ და სრულფასოვნად მიღწეული და ამაშიც, ამ მიზნის მიღწევაშიც, რა თქმა უნდა, პარტიის თითოეული წევრი ვიქნებით  ძალიან აქტიურად ჩართული. ჩვენ გვაქვს, კიდევ ერთხელ გავიმეორებ, სერიოზული მიღწევები. არის ასევე სერიოზული გამოწვევები, პრობლემები, სირთულეები და სირთულეების გამკლავებას  სჭირდება, რა თქმა უნდა, ჩვენი კონსოლიდაცია. პარტიის თითოეული წევრის მხარდაჭერა, თანადგომა, ერთად დგომა და ასეთი ერთად დგომის პირობებში, მე დარწმუნებული ვარ. რომ ჩვენი ყველა მიზანი იქნება აუცილებლად წარმატებით მიღწეული”,- მიმართა დამსწრეებს პარტიის აღმასრულებელმა მდივანმა.

  პოლიტიკური გაერთიანება „ქართული ოცნება-დემოკრატიული საქართველოს“  ცენტრალურ ოფისში თბილისის რაიონული ორგანიზაციების კონფერენცია გაიმართა,  რითაც დასრულდა კონფერენციების ციკლი, რომლის მიზანი პარტიის მომავალი განვითარების გეგმების განხილვა და პარტიის ყრილობისთვის მზადება იყო.     კონფერენციაზე  საოლქო ორგანიზაციების თავმჯდომარეები, ბიუროს წევრები და ყრილობის დელეგატები აირჩიეს.  კონფერენციის მონაწილეებს სიტყვით მიმართეს პარტიის გენერალურმა მდივანმა კახა კალაძემ და აღმასრულებელმა მდივანმა ირაკლი კობახიძემ.   „თბილისის კონფერენციით დასრულდა კონფერენციების ციკლი, რომლის მიზანი პარტია “ქართული ოცნება-დემოკრატიული საქართველოს” მომავალი განვითარების გეგმების განხილვა და პარტიის ყრილობისთვის მზადება იყო.   „ქართული ოცნების” საქალაქო და რაიონული ორგანიზაციების კონფერენციები მთელი ქვეყნის მასშტაბით ჩატარდა, სადაც ადგილობრივი ორგანიზაციების თავმჯდომარეები, ბიუროს წევრები და ყრილობის დელეგატები აირჩიეს.   სრული პასუხისმგებლობით ვაცხადებ, რომ ყველა ქალაქში, ყველა კონფერენციაზე იგრძნობოდა სრული მზაობა და მუხტი ჩვენი მხარდამჭერებისა და “ქართული ოცნების” აქტივისტებისგან- გადავიდეს პარტია განვითარების ახალი ეტაპზე და განსაკუთრებით მახარებს ის ფაქტი, რომ ამ პროცესში სულ უფრო და უფრო მეტი ახალგაზრდა ერთვება.   „მინდა ასევე გაცნობოთ, რომ პარტიის მეხუთე ყრილობა გაიმართება 11 მაისს, თბილისში. ყრილობა საქმიან, სამუშაო ფორმატში წარიმართება, რომელსაც პოლიტიკური გუნდი, პარტიის ადგილობრივი ორგანიზაციებისა და პოლიტსაბჭოს მიერ არჩეული დელეგატები დაესწრებიან. დარწმუნებული ვარ, პარტია “ქართული ოცნება-დემოკრატიული საქართველო”, ბიძინა ივანიშვილის თაოსნობით, განახლებული გეგმებით და ახალი ხედვებით, შექმნის მუხტს და გააერთიანებს საზოგადოებას ჩვენი ქვეყნის უკეთესი მომავლის საშენებლად - განაცხადა პარტიის გენერალურმა მდივანმა კახა კალაძემ კონფერენციის შემდეგ გამართულ ბრიფინგზე.

„ქართული ოცნება - დემოკრატიული საქართველოს“ პოლიტსაბჭოს სხდომამ პარტიის ყრილობაზე განსახილველ საკითხებზე იმსჯელა     პოლიტიკური გაერთიანება „ქართული ოცნება - დემოკრატიული საქართველოს“ ცენტრალურ ოფისში პოლიტსაბჭოს სხდომა გაიმართა, რომელზეც პარტიის ყრილობაზე განსახილველ საკითხებზე იმსჯელეს.     სხდომამ ერთხმად მიიღო გადაწყვეტილება პარტიის თავმჯდომარედ ბიძინა ივანიშვილის წარდგენის შესახებ. დასახელდა ასევე პოლიტსაბჭოს 15 კაციანი შემადგენლობა.     პოლიტსაბჭოს ახალ წევრებად წარდგენილი არიან შემდეგი კანდიდატები:     1.     ბიძინა ივანიშვილი - „ქართული ოცნების“ დამფუძნებელი; 2.     გიორგი კვირიკაშვილი - პრემიერ-მინისტრი; 3.     ირაკლი კობახიძე - პარლამენტის თავმჯდომარე; 4.     კახა კალაძე - თბილისის მერი; 5.     თამარ ჩუგოშვილი - პარლამენტის თავმჯდომარის პირველი მოადგილე; 6.     გიორგი ვოლსკი - პარლამენტის თავმჯდომარის მოადგილე; 7.     ილია ნაკაშიძე - პარლამენტის თავმჯდომარის მოადგილე; 8.     არჩილ თალაკვაძე - საპარლამენტო უმრავლესობის ლიდერი; 9.     მამუკა მდინარაძე - პარლამენტის ფრაქცია „ქართული ოცნების“ თავმჯდომარე; 10.   დიმიტრი სამხარაძე - პარლამენტის ფრაქცია „ქართული ოცნების“ თავმჯდომარის მოადგილე   11.   ირაკლი ტრიპოლსკი - პარლამენტის ფრაქცია „ქართული ოცნების“ თავმჯდომარის მოადგილე 12.   ბიძინა გეგიძე - ფრაქცია „ქართული ოცნება-ძლიერი საქართველოსთვის“ თავმჯდომარე   13.   მაია ცქიტიშვილი - რეგიონული განვითარებისა და ინფრასტრუქტურის მინისტრი; 14.   სოზარ სუბარი - ლტლვილთა და განსახლების მინისტრი; 15.   დავით საგანელიძე - საპარტნიორო ფონდის თავმჯდომარე;   პოლიტსაბჭოს ახალ წევრებს პარტია „ქართული ოცნება – დემოკრატიული საქართველოს“ ყრილობა 11 მაისს დაამტკიცებს.

საწევრო შენატანები და შემოწირულობები 09,04,2018-28,04,2018

მოგესალმებით,   მინდა, საზოგადოებას ვამცნო ის მნიშვნელოვანი სიახლე, რომელიც იგეგმება ჩვენს გუნდში - პარტია “ქართულ ოცნებაში”. ჩვენ კარგად გვესმის, რომ სრულიად ბუნებრივი და ლეგიტიმურია საზოგადოების ინტერესი მმართველ პარტიაში მიმდინარე პროცესების მიმართ და ხალხს სჭირდება სიცხადე.   ჩვენ, როგორც ხელისუფლებაში მყოფი მმართველი ძალა, ვგრძნობთ განსაკუთრებულ პასუხისმგებლობას ქვეყნისა და ხალხის წინაშე და მივიჩნევთ, რომ ჩვენი სახელმწიფოს განვითარებისა და ახალი გამოწვევების ფონზე დადგა აუცილებლობა, მაქსიმალურად გავაძლიეროთ პარტია ,,ქართული ოცნება - დემოკრატიული საქართველო“ და სიმტკიცე შევძინოთ ჩვენს გუნდს.   ჩვენთვის ძალიან მნიშვნელოვანია პარტიის შიგნით მიმდინარე დემოკრატიული პროცესები. ამავე დროს, ჩვენ გვაერთიანებს მკვეთრად გამოხატული ღირებულებები და ერთიანი პოლიტიკური ხედვა, როგორც საშინაო, ისე საგარეო მიმართულებით. ამიტომ, მნიშვნელოვანია, რომ ჩვენ, როგორც მმართველმა პოლიტიკურმა ძალამ, შევინარჩუნოთ ერთსულოვნება ფუნდამენტურ სახელმწიფოებრივ საკითხებთან დაკავშირებით.   მოგეხსენებათ, რომ ბატონმა ბიძინა ივანიშვილმა ჩვენი ქვეყნის უახლესი ისტორიის ერთ-ერთ ურთულეს დროს ჩამოაყალიბა პარტია ,,ქართული ოცნება-დემოკრატიული საქართველო", რომელმაც გარდამტეხი როლი შეასრულა სახელმწიფოს დემოკრატიულ განვითარებაში.   ყველასთვის ნათელია, თუ რამდენად დიდია ჩვენი გუნდისთვის, მისი დამაარსებლის - ბატონი ბიძინა ივანიშვილის ფაქტორი.   მინდა გითხრათ, რომ პირადად ჩემი და მთელი გუნდის სახელით, მე შევთავაზე და ვთხოვე ჩვენი პარტიის დამფუძნებელს, რომ სათავეში ჩაუდგეს პარტიას და მოხარული ვარ, რომ ბატონმა ბიძინა ივანიშვილმა თანხმობა განაცხადა.   მას ყველაზე მეტად ძალუძს, გააძლიეროს მთავარი პოლიტიკური ბირთვი, პარტიის თავმჯდომარის რანგში, შესძინოს მეტი და ახალი დინამიკა შემდგომი განვითარებისთვის, მეტი ეფექტურობისთვის და პროგრესისთვის, როგორც აღმასრულებელ, ასევე საკანონმდებლო ხელისუფლებას და თვითმმართველ ორგანოებს.   უახლოეს დღეებში გაიმართება პარტიის პოლიტსაბჭოს სხდომა, შემდეგ უკვე მალე - ყრილობა და დარწმუნებულები ვართ, რომ, როგორც პოლიტსაბჭო, ასევე მთელი საქართველოდან წარმოდგენილი დელეგატები ერთხმად აირჩევენ ბიძინა ივანიშვილს ახალ თავმჯდომარედ და შესაბამისად, არჩეული იქნება პოლიტიკური საბჭოს განახლებული შემადგენლობაც.   დარწმუნებული ვარ, ეს გადაწყვეტილება პოზიტიურად აისახება ჩვენი ქვეყნის პოლიტიკურ ცხოვრებაზე. ეს იქნება ახალი იმპულსი ჩვენთვის, პარტია „ქართული ოცნების“ თითოეული წევრისთვის, ჩვენი გუნდისათვის და პირადად ჩემთვის, როგორც ამ ქვეყნის პრემიერ-მინისტრისთვის.   დიდი მადლობა

შეხვედრა პარტია „ქართულ ოცნებაში"

„ქართული ოცნების" ახალგაზრდული ორგანიზაციის წევრებმა, 1989 წლის 9 აპრილს რუსთაველის გამზირზე დაღუპულთა ხსოვნას პატივი მიაგეს და მემორიალი ტიტებითა და გვირვინით შეამკეს.

საწევრო შენატანები და შემოწირულობები 26,02,2018-18,03,2018

„ქართული ოცნების" ახალგაზრდული ორგანიზაციის წევრებმა პატივი მიაგეს 1921 წელს გმირულად დაღუპულ იუნკერთა ხსოვნას და მემორიალი გვირგვინით შეამკეს  

„ქართული ოცნება-დემოკრატიული საქართველოს“ ახალგაზრდულმა ორგანიზაციამ მონაწილეობა მიიღო ახალგაზრდა სოციალისტთა საერთაშორისო გაერთიანების (IUSY) ყოველწლიურ კონგრესში. მონტენეგროში გამართულ ღონისძიებაზე ორგანიზაციის წევრებმა ერთხმად დაუჭირეს მხარი „ქართული ოცნების“ ახალგაზრდული ორგანიზაციის სრულ წევრობას.   აღსანიშნავია, რომ ახალგაზრდული ორგანიზაცია უკვე წლებია თანამშრომლობს IUSY-თან. 2016 წლის გაზაფხულზე ჩვენი ორგანიზაცია მისი დამკვირვებელი წევრი გახდა. იმავე წლის ივნისში IUSY-ის გენერალური მდივანი პარტიის ახალგაზრდული ორგანიზაციის ყრილობასაც ესწრებოდა. ასევე, ჩვენი წარმომადგენლები სისტემატურად მონაწილეობენ საერთაშორისო ორგანიზაციის მიერ გამართულ კონფერენციებს უკრაინაში, მოლდოვაში, რუმინეთში, ალბანეთში, შვედეთსა და მსოფლიოს სხვადასხვა ქვეყნებში.   IUSY მსოფლიოში ყველაზე დიდი ახალგაზრდული ორგანიზაციაა, რომლის წევრებიც ევროპის და სხვა 100-მდე ქვეყნის წარმომადგენლები არიან.

შემოწირულობები 

პარტია „ქართული ოცნება - დემოკრატიული საქართველოს“ ლიდერები ბორჯომის მერობის კანდიდატ ლევან ლიპარტიას მხარდასაჭერად, დღეს  ბორჯომში ჩავიდნენ და ადგილობრივ ამომრჩეველთან შეხვედრა გამართეს.     შეხვედრას პარტიის აღმასრულებელი მდივანი, პარლამენტის თავმჯდომარე ირაკლი კობახიძე, რეგიონული განვითარებისა და ინფრასტრუქტურის მინისტრი ზურაბ ალავიძე და პარლამენტის წევრები ესწრებოდნენ.   მმართველი გუნდის წარმომადგენლებმა მოსახლეობას ლევან ლიპარტიას მხარდაჭერისკენ მოუწოდეს და ადგილობრივი თვითმმართველობის საქმიანობაში აქტიურობა სთხოვეს.   „დღეს ჩამოვედით იმისთვის, რომ მხარი დავუჭიროთ ჩვენს კანდიდატს ბორჯომის მუნიცილაპიტეტის მერის პოსტზე ლევან ლიპარტიას. მისი არჩევით ის უამრავი პროექტი უნდა გაგრძელდეს, რომელიც ბორჯომში ხორციელდება. ზოგადად, ქვეყანაში ძალიან ბევრი რამ კეთდება, რასაც ჩვენი მოსახლეობა ხედავს. სწორედ ამის შედეგია ის, რომ ჩვენ ადგილობრივი თვითმმართველობის არჩევნებში  დამაჯერებელი გამარჯვება კიდევ ერთხელ მოვიპოვეთ“, - განაცხადა ირაკლი კობახიძემ.   მისივე თქმით, მმართველი პარტიის მიერ ბევრი რამ კეთდება იმისთვის, რომ მოსახლეობის სოციალური და ეკონომიკური მდგომარეობა გაუმჯობესდეს.   „მინდა მხარდაჭერა გამოვუცხადო ჩვენს თანაგუნდელს, ლევან ლიპარტიას ამ საპატიო პოსტისთვის ბრძოლაში, ვუსურვო მას გამარჯვება და წარმატება. საბოლოოდ, რა თქმა უნდა, ყველაფერი ბორჯომელ ამომრჩეველზეა დამოკიდებული. კიდევ ერთხელ მინდა მოვუწოდო მათ, რომ მხარი დაუჭირონ „ქართულ ოცნებას“, ჩვენ მიერ აღებულ პოლიტიკურ კურსს და მერობის კანდიდატ ლევან ლიპარტიას“, - განაცხადა ირაკლი კობახიძემ.   ბორჯომელ ამომრჩეველს სიტყვით ასევე, ზურაბ ალავიძემ მიმართა და   მუნიციპალიტეტის განვითარების შესაძლებლობებზე ისაუბრა.   „დღეს შევიკრიბეთ ის ადამიანები, ვისაც გვწამს და გვჯერა, რომ  ერთობლივი ძალისხმევითა და მუშაობით, ულამაზეს მხარეს - ბორჯომს განვავითარებთ. ბორჯომი არის ჩვენი ქვეყნის ერთ-ერთი თვალსაჩინო სავიზიტო ბარათი, როგორც ქვეყნის გარეთ, ისე ქვეყნის შიგნით. მთლიანად ბორჯომის მუნიციპალიტეტში ინფრასტრუქტურა გვაქვს მოსაწესრიგებელი, თუმცა ეს ყველაფერი რომ გავაკეთოთ, ერთად უნდა ვიმუშაოთ“, - განაცხადა ზურაბ ალავიძემ.   რეგიონული განვითარების მინისტრმა ბორჯომში დაგეგმილ ინფრასტრუტურულ პროექტებზე გაამახვილა ყურადღება და მოსახლეობას მუნიციპალიტეტის აღმშენებლობის პროცესში აქტიური ჩართულობა სთხოვა.   „მინდა მოგიწოდოთ, რომ მერობის არჩევნებში მხარი „ქართული ოცნების“ კანდიდატს დავუჭიროთ და მასთან ერთად ვიმუშაოთ ბორჯომის მუნიციპალიტეტის აღმშენებლობისთვის. ბორჯომის 24 სოფელი მაღალმთიანი სტატუსით უკვე სარგებლობს, რომელთაც კიდევ ორი - სოფელი საკირე და ტაძრისი დაემატება. აღნიშნული სოფლები მაღალმთიანი დასახლების ნუსხაში წლის ბოლომდე შევლენ და იმ შეღავათებით ისარგებლებენ, რომელიც მთავრობამ მათთვის დააწესა“, - აღნიშნა ზურაბ ალავიძემ.   თავად მერობის კანდიდატმა კი, ამომრჩეველთან შეხვედრაზე მმართველ გუნდსა და ადგილობრივ მოსახლეობას მხარდაჭერისთვის მადლობა გადაუხადა და აღნიშნა, რომ გამარჯვების შემთხვევაში, ყველა იმ პროექტის განხორციელებას გეგმავს, რომელიც ბორჯომის საკეთილდღეოდ არის მიმართული.   „პირველ რიგში, მინდა მადლობა გადაგიხადოთ თითოეულ თქვენგანს მხარდაჭერისთვის. მინდა, განსაკუთრებული მადლობა გადავუხადო „ქართული ოცნების“ გუნდს ნდობისთვის, რომელმაც ნდობა გამომიცხადა და ბორჯომში მერობის კანდიდატად წარმადგინა. ეს ჩემთვის დიდი პასუხისმგებლობა და პატივია. ვაპირებ, განვახორციელო ყველა ის  პროექტი და მიმართულება, რაც ბორჯომის საკეთილდღეოდ არის მიმართული. გარწმუნებთ, რომ ოთხი წლის შემდეგ, ბორჯომი ბევრად უფრო ლამაზი და განვითარებული იქნება“, - განაცხადა ლევან ლიპარტიამ.   მერობის კანდიდატმა ადგილობრივ მოსახლეობას 12 ნოემბერს, არჩევნებზე აქტიურობისკენ მოუწოდა.