×

18 ოქტომბერი, 2020

საქართველოს პრემიერ-მინისტრ გიორგი გახარიას სიტყვით გამოსვლა ფოთში მაჟორიტარი დეპუტატობის კანდიდატის ირაკლი ხახუბიას წარდგენაზე

კახიმ კარგად გაიხსენა ფოთის მნიშვნელობა საქართველოსთვის, ფოთის პორტის და საზღვაო ინფრასტრუქტურის მნიშვნელობა, თუმცა უნდა დავამატოთ, რომ ანტიკური პერიოდიდან ჰქონდა ამ ქალაქს ეს ფუნქცია, ათასწლეულების წინ, თუმცა დიდი ნიკო ნიკოლაძის შემდგომ ამან სულ სხვა დატვირთვა მიიღო და გახდა არა მხოლოდ საქართველოსთვის, არამედ მთელი რეგიონისთვის ინდუსტრიულად ძალზედ მნიშვნელოვანი ქალაქი. ეს მე-19 საუკუნიდან დაიწყო და ჩვენ ყველაფერი უნდა გავაკეთოთ იმისთვის, რომ ფოთის განვითარება იმავე მიმართულებით კიდევ უფრო გაძლიერდეს.
უნდა შევთანხმდეთ და გულწრფელები ვიყოთ ერთმანეთთან, რომ ფოთში ბევრი პრობლემაა, მაგრამ მიუხედავად ამისა, მინდა გითხრათ, რომ შემდგომი 4 წელი იქნება კონკრეტულად ფოთის აღმშენებლობის წლები. იმიტომ, რომ ეს არა მხოლოდ ფოთს, არამედ მთლიანად ქვეყანას სჭირდება. უახლოეს პერიოდში გარდა „პეის ტერმინალისა“, რომელიც ჩვენთვის ძალზედ მნიშვნელოვანია და ჩვენს ამერიკელ პარტნიორებთან ერთად ხორციელდება ამ ნავსადგურის გაფართოება, დაიწყება ფოთის ძირითადი პორტის ჩრდილოეთით მშენებლობა, განახლება. ეს იქნება უდიდესი შესაძლებლობა იმისთვის, რომ ფოთის პორტის ტვირთბრუნვა შემდგომში 10 მილიონი ტონით გაიზარდოს.
გარდა ამისა, მთავრობამ გამოაცხადა შესწავლა, თუ როგორ დაპროექტდეს ფოთის შემოვლითი გზა. ეს დღესაც სერიოზული პრობლემაა, მაგრამ როგორც კი დამატებითი ტვირთები გაჩნდება ფოთში, ფოთის გზას ექნება უკიდურესად დიდი მნიშვნელობა, არა მხოლოდ პორტის ინფრასტრუქტურისთვის, არამედ ფოთის მოსახლეობისთვის. ასევე უნდა ვიცოდეთ, რომ აუცილებლად გაკეთდება რიონზე ახალი ხიდი. ეს ტექნიკური ნაგებობა, რომელიც ათწლეულების განმავლობაში მიგდებული იყო, რეკონსტრუირებულია და ეკოლოგიური კატასტროფისგან აზღვევს ფოთს. გარდა ამისა, გაკეთდება ახალი ხიდი და შესაბამისად, ეს ჰიდროტექნიკური ნაგებობა ახალ ფუნქციას შეიძენს.
ყველას კარგად უნდა გვესმოდეს, რომ ეს ყველაფერი კეთდება იმისთვის, რომ ფოთი განვითარდეს, როგორც ინდუსტრიული ქალაქი, მაგრამ ამასთან ერთად, როგორც კომფორტული ქალაქი ჩვენი მოქალაქეების ყოველდღიური ცხოვრებისთვის. ამიტომ კეთდება ფეხბურთის სტადიონები, შენდება საცურაო აუზები და სპორტული კომპლექსები. რა თქმა უნდა, ეს ყველაფერი გაგრძელდება. მომავალი 4 წლის განმავლობაში, ფოთის სისტემურ ინფრასტრუქტურაში, მხოლოდ სახელმწიფოს მხრიდან, ვგულისხმობ გზებს, წყალმომარაგებას, კანალიზაციას, საბავშვო ბაღებს, სკოლებს - მინიმუმ 150 მილიონი ლარი იქნება ინვესტირებული, იმისთვის, რომ ფოთის, როგორც ქალაქის ინფრასტრუქტურა წესრიგში მოვიყვანოთ. ჩვენ აქ ისეთი გარემო უნდა შევქმნათ, რომ ფოთიდან ახალგაზრდები სხვაგან კი არ მიდიოდნენ, ფოთი უნდა გახდეს თვითონ მიზიდულობის ცენტრი, ინდუსტრიის და ეკონომიკური განვითარების თვალსაზრისით. ყველა დარგის განვითარების პოტენციალი აქვს ფოთს, როგორც ტრანსპორტი და ლოგისტიკა, ასევე სოფლის მეურნეობა. მეთევზეობა უაღრესად მნიშვნელოვანია ფოთში.
ჩვენ ამ ყველაფრის გასაკეთებლად, ყველას კარგად გვესმის, გვჭირდება ერთიანობა, ძლიერი ადგილობრივი ხელისუფლება და რა თქმა უნდა ჩვენი წარმომადგენელი, ფოთის წარმომადგენელი საქართველოს უმაღლეს საკანონმდებლო ორგანოში - დეპუტატი, რომელსაც ავირჩევთ 31 ოქტომბერს და ირაკლი ხახუბია არის ამ ქალაქის ღირსეული შვილი, ყველაზე კეთილსინდისიერი ადამიანი. მან იცის ის პრობლემები, რომლებიც აქ არის, მათ ჩვენ ყველანი ერთად გადავლახავთ და მივალთ საბოლოო მიზნამდე, მიუხედავად იმ უჩვეულო მდგომარეობისა, რომ ახლა პირბადეებით ვსხედვართ და ერთმანეთს ვესაუბრებით. რა თქმა უნდა, ეს ჩვენთვის არ არის ჩვეული გარემო, მაგრამ ჩვენ ზედმიწევნით ზუსტად უნდა დავიცვათ ეს წესები. მოვიგებთ არჩევნებსაც, გადავლახავთ კოვიდით გამოწვეულ კრიზისსაც, გადავლახავთ ეკონომიკურ კრიზისსაც, ეს ყველაფერი უნდა გავაკეთოთ ერთად. ოღონდ, რა თქმა უნდა, გვჭირდება მოთმინება და გვჭირდება, დავიცვათ ელემენტარული წესები ერთად. არ არის რთული პირბადის ტარება, მაშინ როდესაც ვიცით, რამხელა ფასი აქვს ამას ჩვენი მოქალაქეების, ჩვენი ხანდაზმულების ჯანმრთელობის შესანარჩუნებლად. სწორედ ეს გამოგვარჩევს ჩვენ სხვა ჩვენი ოპონენტებისგან, რომელთა პასუხისმგებლობა ძალიან კარგად გამოჩნდა ბათუმში. ამიტომ, მინდა მოვუწოდო თითოეულ თქვენგანს, ღირსეულად, სამართლიან ბრძოლაში ერთად წყნარად, მშვიდად გავიმარჯვოთ 31 ოქტომბერს. გამარჯვებას გისურვებთ!